ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಶ್ರೀ ಗುರು ಯುವಕ ವೃಂದ (ರಿ.) ಬೊಕ್ಕ ಶ್ರೀ ಗುರು ಯುವತಿ ಮಂಡಲ ಸಜಿಪ ಕೊಲ್ಯದ ರಜತ ಸಂಭ್ರಮ

ತಾರೀಖ್ 31/1/2021 ನೇ ಐತಾರ ಶ್ರೀ ಗುರು ಯುವಕ ವೃಂದ (ರಿ.) ಬೊಕ್ಕ ಶ್ರೀ ಗುರು ಯುವತಿ ಮಂಡಲದ ರಜತ ಸಂಭ್ರಮ ದ ಪರವಾದ್ ಐತಾರ ಕಾಂಡೆ 7:30 ಕ್ ಗಣಹೋಮ ನಡತುಂಡು.9 ಗಂಟೆಗ್ ” ಒಂಜೇ ಜಾತಿ, ಒಂಜೇ ಮತ,ಒಂಜೇ ದೇವೆರ್ ” ಪಂದ್ ಪಂಡಿನ ಬ್ರಹ್ಮ ಶ್ರೀ ನಾರಾಯಣ ಗುರುಕ್ಲೆನ ಪೂಜೆ ನಡತುಂಡು. ಕಾಂಡೆ 10 ಗಂಟೆಗ್ ಸತ್ಯನಾರಾಯಣ ಪೂಜೆ ಮಲ್ತ್ದ್ ಮಂಗಳಾರತಿ ರ್ದ್ ಬೊಕ್ಕ ಅನ್ನ ಸಂತರ್ಪಣೆ ನಡತುಂಡು . ಸುಮಾರ್ 600 ಜನ ಸೇರ್ದ್ ಇತ್ತೆರ್ ಪಂದ್ ಕಾರ್ಯಕ್ರಮದ ಪ್ರಧಾನ ಕಾರ್ಯದರ್ಶಿ ತೆರಿಪಾಯೆರ್.

ಮಧ್ಯಾಹ್ನ 2 ಗಂಟೆಗ್ ಬೇತೆ ಬೇತೆ ಸಾಂಸ್ಕೃತಿಕ ಕಾರ್ಯಕ್ರಮ ನಡತುಂಡು. ಬೈಯ್ಯ 4 ಗಂಟೆಗ್ ದೇವೆರ್ನ ಮೆರವಣಿಗೆ ನಡತುಂಡು. ರಾತ್ರಿ 8:30 ಕ್ ಅನ್ನಪ್ರಸಾದ ಸೇವೆ ಲಾ ನಡತುಂಡು ಸರಿ ಸುಮಾರ್ 1500 ಜನ ಈ ಲೇಸ್ ಡ್ ಪಾಲ್ ಪಡೆದಿತ್ತೆರ್. ರಾತ್ರಿ 12 ಗಂಟೆ ಮುಟಲ ಅನ್ನಪ್ರಸಾದ ಸೇವೆ ನಡತುಂಡು.

ರಾತ್ರಿ 9 ಗಂಟೆಗ್ ಶ್ರೀ ದುರ್ಗಾಪರಮೇಶ್ವರೀ ಕೃಪಾಪೋಷಿತ ಯಕ್ಷಗಾನ ಮಂಡಳಿ ಕಟೀಲು ಮೆಕ್ಲೆನೆರ್ದ್ ಶ್ರೀ ದೇವಿ ಮಹಾತ್ಮೆ ಯಕ್ಷಗಾನ ಸೇವೆ ನಡತುಂಡು. ಯುವಕ ವೃಂದ ಅಂಚನೇ ಯುವತಿ ಮಂಡಲದ ಸರ್ವ ಸದಸ್ಯೆರ್ ಈ ಲೇಸ್ ಡ್ ಪಾಲ್ ಪಡೆದ್ ತನ್ಕುಲೆ ನಿರಂತರ ವಾಯಿನ ಪರಿಶ್ರಮರ್ದ್ ಈ ಲೇಸ್ ಯಶಸ್ವಿಯಾದ್ ನಡಪರೆ ಸಹಕಾರ ಕೊರಿಯೆರ್ ಪಂದ್ ಸಂಘದ ಗುರ್ಕಾರ್ಲು ತೆರಿಪಾದೆರ್.

ನನದ ಲೇಸ್ ಗ್ ಜಗದೀಶ್ ಅಧಿಕಾರಿಗ್ ಲೆಪ್ಪೋಲೆ ಕೊರ್ರೆ ಬಲ್ಲಿ ಪಂಡ್ ದ್ ಮೂಲ್ಕಿ ಬಿರುವೆರ್ನ ಸಂಘ ನಿರ್ಣಯ

ಮೂಲ್ಕಿ: ತುಳುನಾಡ್ದ ಆರಾಧ್ಯ ಶಕ್ತಿಲು ಕೋಟಿ ಚೆನ್ನಯೆರ್ ಅಂಚೆನೇ ಬಿರುವೆರ್ನ ಸಮುದಾಯದ ನಾಯಕೆರೆನ್ ನಿಂದನೆ ಮಲ್ದಿನ ಬೆದ್ರದ ಜಗದೀಶ್ ಅಧಿಕಾರಿಗ್ ಬಿರುವೆರ್ನ ಸಮಾಜದ ಪ್ರತಿಯೊರಿಲ ಅಂಚೆನೇ ಮಾತ ಬಿರುವೆರ್ನ ಸಂಘಟನೆಲು ಒವ್ವೇ ಒಂಜಿ ವ್ಯಕ್ತಿಗತ ಅತ್ತ್ ಡ ಸಾರ್ವಜನಿಕ ಸಭೆ- ಸಮಾರಂಭೊಲೆಗ್ ನನ ದುಂಬಗ್ ಲೆಪ್ಪೋಲೆ ಕೊರ್ರೆ ಬಲ್ಲಿ ಪನ್ಪಿನ ಬಾರಿ ಮಲ್ಲ ನಿರ್ಣಯೊನು ದೆತೊಂದೆರ್.

ಮೂಲ್ಕಿ ಬಿರುವೆರ್ನ ಸಮಾಜ ಸೇವಾ ಸಂಘದ ಸಭಾಂಗಣೊಡು ಐತಾರ ಸಂಘದ ಗುರ್ಕಾರ್ಲು ರಮೇಶ್ ಅಮೀನ್ ಕೊಕ್ಕರ್‌ಕಲ್ ಮೆರೆನ ಗುರ್ಕಾರ್ಮೆ ಡ್ ನಡತಿನ ಸಭೆಟ್ಟ್ ಈ ನಿರ್ಣಯ ದೆತೊಂಡೆರ್.ತುಳುನಾಡ್ದ ಸರ್ವಧರ್ಮ ದಕುಲುಲ ನಂಬೊಂದು ಬೈದಿನ ಕೋಟಿ ಚೆನ್ನಯರೆಗ್ ಗರೊಡಿ ಅಂಚೆನೆ ಬೇತೆ ದೈವ ಸಾನ್ನಿಧ್ಯದ ಒರುಟ್ಟು ವಿಶೇಷ ಮಾನಾದಿಗೆ ಕೊರೊಂದುಲ್ಲೆರ್. ಆಂಡ ಜಗದೀಶ್ ಅಧಿಕಾರಿ ಅಕ್ಲೆನ್ಲ ಅವಮಾನ ಮಲ್ದೆರ್. ಅಂಚಾದ್ ಜಗದೀಶ್ ಅಧಿಕಾರಿನ ನಿಂದನೆದ ಪಾತೆರೊನು ಮಾತೆರ್ಲ ಖಂಡಿಸಾಯೆರ್. ಆರ್ ಕೇಂಡ್ ದಿನ ಕ್ಷಮೆ ಕಾಲ್ಪನಿಕ ಬೊಕ್ಕ ಆಧಾರದಾಂತಿನವು. ಮನಸ್ಸ್ ಡ್ ದುಷ್ಟ ಬುದ್ದಿ ದೀದ್ ಏರ್ನನಾ ಒತ್ತಾಯೊಗು ಬಗ್ಗ್ ದ್ ಕ್ಷಮೆ ಕೇಂಡೆರ್ಡಲ ಸಮಾಜ ಅರೆನ್ ಕ್ಷಮಿಸುಜಿ.
ಸಭೆತ್ತ ನಿರ್ಣಯದಂಚ ಜಗದೀಶ್ ಅಧಿಕಾರಿನ್ ಸಮಾಜದಕುಲು ಏರ್ಲಾ ಲೆಪ್ಪರೆ ಬಲ್ಲಿ ಪನ್ಪಿನ ನಿರ್ಣಯೊನು ಪಾಲನೆ ಮಲ್ಪೊಡು. ಜಗತ್ತ್ ದ ಮಾತ ಬಿರುವೆರ್ನ ಸಂಘಟನೆಲು ಉಂದೆಕ್ಜ್ ಬಲ ಕೊರೊಡು ಪಂಡ್ ದ್ ಮಾತ ಬಿರುವೆರ್ನ ಸಂಘದಕ್ಲೆನ ಒಕ್ಕೂಟ ಆಯಿನ ರಾಷ್ಟ್ರೀಯ ಬಿಲ್ಲವರ ಮಹಾಮಂಡಲೊಗು ಬಿನ್ನೈತ ಮಲ್ಪರೆ ನಿರ್ಣಯ ಮಲ್ತೆರ್. ಸಮಾಜೊಡು ತಪ್ಪು ಸಂದೇಶ ಕೊರ್ಪಿನ ಅಂಚೆನೆ ಉದ್ಧಟತನ ತೋಜಾಯಿನ ಅಧಿಕಾರಿನ್ ರಾಜಕೀಯ ಪಕ್ಷೊರ್ದು ಶಾಶ್ವತವಾದ್ ನಿವೃತ್ತಿ ಮಲ್ಪಾವೊಡು ಪಂಡ್ ದ್ ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್‌ಕುಮಾರ್ ಕಟೀಲು ಅಂಚೆನೇ ಜಿಲ್ಲಾಧ್ಯಕ್ಷೆರ್ ಸುದರ್ಶನ್ ಅರೆಡ ಬಿನ್ನೈತ ಮಲ್ತ್ ದ್ ಹಕ್ಕೊತ್ತಾಯ ಮಲ್ಪುನು ಪಂಡ್ ದ್ ತೀರ್ಮಾನ ಮಲ್ತೆರ್.
ಸಭೆಟ್ಟ್ ಬಿರುವೆರ್ನ ಸಂಘದ ಮಾಜಿ ಅಧ್ಯಕ್ಷೆರ್ ಆಯಿನ ರಾಘು ಸುವರ್ಣ ಕೊಳಚಿಕಂಬಳ, ಯದೀಶ್ ಅಮೀನ್ ಕೊಕ್ಕರ್‌ಕಲ್, ಡಾ.ಹರಿಶ್ಚಂದ್ರ ಪಿ. ಸಾಲಿಯಾನ್, ಮೂಲ್ಕಿ ನಗರ ಪಂಚಾಯತ್‌ ಉಪಾಧ್ಯಕ್ಷೆರ್ ಸತೀಶ್ ಅಂಚನ್ ಬಾಳೆಹಿತ್ಲು, ಬಿರುವೆರ್ ಕುಡ್ಲದ ಮೂಲ್ಕಿ ಘಟಕದ ಅಧ್ಯಕ್ಷೆರ್ ಕಿಶೋರ್ ಸಾಲ್ಯಾನ್, ಶ್ರೀ ನಾರಾಯಣಗುರು ಸೇವಾದಳದ ಪರವಾದ್ ಉಮೇಶ್ ಮಾನಂಪಾಡಿ, ಶ್ರೀ ನಾರಾಯಣಗುರು ಮಹಿಳಾ ಮಂಡಳಿದ ಗೌರವಾಧ್ಯಕ್ಷೆ ಸರೋಜಿನಿ ಸುವರ್ಣ, ಸಾಮಾಜಿಕ ಚಿಂತಕೆರ್ ದಿನೇಶ್ ಬಪ್ಪನಾಡು ಮೊಕುಲು ಮಾತ ಪಾತೆರಿಯೆರ್.
ಸಂಘದ ಮಲ್ಲ ಕಾರ್ಯಂತೆರ್ ಕಮಲಾಕ್ಷ ಬಡುಗುಹಿತ್ಲು ನಿರ್ಣಯ ಮಂಡನೆ ಮಲ್ತ್ ದ್ ಸಭೆ ಸುಧಾರಿಕೆ ಮಲ್ತೆರ್.

ಕಾಂಗ್ರೆಸ್ ಹಿಂ.ವರ್ಗ ಜಿಲ್ಲಾಧ್ಯಕ್ಷೆರಾದ್ ವಿಶ್ವಾಸ್‌ಕುಮಾರ್ ದಾಸ್ ಆಯ್ಕೆ

ಕರ್ನಾಟಕ ಪ್ರದೇಶ ಕಾಂಗ್ರೆಸ್ ಸಮಿತಿದ ಹಿಂದುಳಿದ ವರ್ಗದ ದಕ್ಷಿಣ ಕನ್ನಡ ಜಿಲ್ಲಾಧ್ಯಕ್ಷೆರಾದ್ ವಿಶ್ವಾಸ್ ಕುಮಾರ್ ದಾಸ್ ಮೆರೆನ್ ಆಯ್ಕೆ ಮಲ್ದೆರ್.

ರಾಜ್ಯ ಕಾಂಗ್ರೆಸ್ ವರಿಷ್ಟೆರ್ನ ನಿರ್ದೇಶನದ ಪ್ರಕಾರ ನೇಮಕ ಮಲ್ದೆರ್ . ವಿಶ್ವಾಸ್ ಕುಮಾರ್ ಮೇರ್ ಪಕ್ಷದ ಸಂಘಟನೆ ಕಾರ್ಯಡ್ ಸಕ್ರಿಯವಾದ್ ಬೇಲೆ ಮಲ್ದೆರ್. ಕಾಂಗ್ರೆಸ್ ಪಕ್ಷದ ಸಬಲೀಕರಣ, ಸಂಘಟನೆ, ಬಲವರ್ಧನ ಕಾರ್ಯಡ್ ಸಮರ್ಪಣಾ ಭಾವಡ್ ಮಲ್ದಿನ ಬೇಲೆ ಶ್ಲಾಘನೀಯ.

ಕೆಪಿಸಿಸಿ ಹಿಂದುಳಿದ ವರ್ಗದ ದಕ್ಷಿಣ ಕನ್ನಡ ಜಿಲ್ಲಾಧ್ಯಕ್ಷೆರಾದ್ ಆಯ್ಕೆಯಾಯಿನ ವಿಶ್ವಾಸ್ ಕುಮಾರ್ ದಾಸ್ ಮೆರೆಗ್ ರಾಜ್ಯಾಧ್ಯಕ್ಷಲಕ್ಷ್ಮೀ ನಾರಾಯಣ ಮಾನದಿಗೆ ಮಲ್ತೆರ್.