Fri. Nov 20th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ನ. 7-8ಕ್ ಒಡಿಪುಗ್ ಸಿಎಂ ಬೊಮ್ಮಾಯಿ ಭೇಟಿ

ಒಡಿಪು: ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ನ 7-8 ಕ್ ಒಡಿಪುಗ್ ಭೇಟಿ ಕೊರಿಯೆರೆ ಉಲ್ಲೆರ್.

ನ.7ಕ್ ಬೊಲ್ಪುಗು 10:30ಕ್ ಆದಿ ಒಡಿಪು ಹೆಲಿಪ್ಯಾಡ್‌ಗ್ ಸಿಎಂ ಬಸವರಾಜ್ ಬೊಮ್ಮಾಯಿ ಬತ್ತ್ ದ್, ಬೊಕ್ಕ ಕಾಪುಗ್ ಪೋದು 11 ಗಂಟೆಗ್ ಜನಸಂಕಲ್ಪ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್. ಬೊಕ್ಕ ಮಧ್ಯಾಹ್ನ 1:50ಕ್ ಒಡಿಪು ಎಂಜಿಎಂ ಕಾಲೇಜ್ ಡ್ ನಡಪುನ ಕರಾವಳಿದ ಹಿರಿಯ ಪತ್ರಕರ್ತೆರೆನ ಜನ್ಮಶತಮಾನೋತ್ಸವ ಸಂಸ್ಮರಣೆ ಲೇಸ್ ಡ್ ಪಾಲ್ ಪಡೆಪೆರ್. ಬೊಕ್ಕ ಮಧ್ಯಾಹ್ನ 3:45ಕ್ ಕುಂದಾಪುರ ತಾಲೂಕ್ ಹೊಸಾಡು ಗ್ರಾಮದ ಮುಳ್ಳಿಕಟ್ಟೆಡ್ ಒಡಿಪು ಜಿಲ್ಲಾಡಳಿತದ ವತಿರ್ದ್ ಅಟ್ಡಣೆ ಮಲ್ತಿನ ಬೈಂದೂರ್ ವಿಧಾನಸಭಾ ಕ್ಷೇತ್ರದ ಬೇತೆ ಬೇತೆ ಅಭಿವೃದ್ಧಿ ಕಾಮಗಾರಿಲೆಗ್ ಕೆಸರ್ ಕಲ್ಲ್ ಪಾಡ್ದ್, ಉದಿಪನ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.

ಡೇಂಜರ್ ! ಬೆದ್ರದ ಜ್ಯೋತಿನಗರ ಪಾರ್ಕ್ ಡ್ ನೇಲೊಂದುಂಡು ಪಿಲಿ ಕುಂಡೇಲ್ದ ಗೂಡು!!

ಬೆದ್ರ: ಬೆದ್ರ ಪೊಲೀಸ್ ಠಾಣೆದ ಕೈತಲ್ ಇಪ್ಪುನ ಜ್ಯೋತಿನಗರ ಮಹಾತ್ಮಾ ಗಾಂಧಿ ಪಾರ್ಕ್ ಡ್ ಪಿಲಿ ಕುಂಡೇಲ್ದ (Tiger Bee) ಮಲ್ಲ ಗೂಡು ಕಟ್ಟ್ ದ್ ಜನಕ್ಲೆನ ಜೂವೊಗು ಭಾರಿ ಸಂಚಿಕಾರ ಆಪಿಲೆಕ ಉಂಡು.


ಆಂಡ ಈ ಸಂಗತಿ ಪಾರ್ಕ್ ಗ್ ಸಂಬಂಧ ಪಟ್ಟಿನ ಒವ್ವೇ ಅಧಿಕಾರಿಗ್ಲಾ ತೆರಿದಿಜಿ ಪನ್ಪುನವೆ ವಿಪರ್ಯಾಸ. ಮುಲ್ಪ ಬೊಲ್ಪುಗು ಬಯ್ಯಗ್ ಸುಮಾರ್ ಜನ ವಾಕಿಂಗ್ ಮಲ್ಪರೆ ಬರ್ಪೆರ್. ಶಾಲೆ ಕಾಲೇಜ್ ಜೋಕುಲು ಜೂವ ಕೈಟ್ ಪತೊಂದು ಪಾರ್ಕ್ ಡ್ ತಿರ್ಗುನಂಚ ಆತ್ಂಡ್. ಜೋಕುಲು ಜನಕುಲು ತಿರ್ಗೆರೆ ಈ ಪಾರ್ಕ್ ಭಾರೀ ಡೇಂಜರ್ ಜಾಗೆ ಆದುಂಡು.

ಪಿಲಿ ಕುಂಡೇಲ್ ದ ಗೂಡು ದಾದಾಂಡಲ ತಾಗ್ಂಡ ಅಯಿಕ್ಕುಲು ತಿಕ್ಕಿನಕ್ಲೆಗ್ ತುಚ್ಚುಂಡು. ಉಂದೆಟ್ಟ್ ನರಮಾನಿ ಆಡ್ ಪ್ರಾಣಿಲಾವಡ್ ಬದ್ ಕ್ ದ್ ಒರಿವುನು ಭಾರಿ ಕಮ್ಮಿ. ಅಯಿಕುಲು ತನ್ನ ಗೂಡುಕಟ್ಟುನ ಜಾಗೆನ್ ಆಕ್ರಮಣಕಾರಿ ಆದ್ ರಕ್ಷಣೆ ಮಲ್ತೊಂದುಪ್ಪುವ. ಆಂಡಲ ನಮ ಭಾರೀ ಜಾಗ್ರತೆಡ್ ಇಪ್ಪೊಡು.

ದಾಯೆ ಪಂಡ ನೆತ್ತ ಪಿಲಿ ಕುಂಡೇಲ್ದ ಕೊಂಡಿಲು ತೊಡ್ಡೆಕೆಲೆಂಜಿರ್ದ್ ಲ ಹೆಚ್ಚ ಡೇಂಜರ್. ನೆತ್ತ ಕೊಂಡಿಲೆಡ್ ಅಸಿಟೈಲ್‍ಕೋಲಿನ್ ಪನ್ಪುನ ಇಸ ಇಪ್ಪುಂಡು. ಏರ್ಲಾ ಎದುರು ತಿಕ್ಂಡ ಒಂಜೇ ಕುಂಡೇಲ್ ಬೆರಿ ಬೆರಿಕ್ಕ್ ಕುಟ್ಟುವ. ಅಂಚಾದ್ ಪುರಸಭೆತ್ತ ಅಧಿಕಾರಿಲು ನೆತ್ತ ಬಗೆಟ್ ಆಯಿನತ್ ಬೇಗ ಕ್ರಮ ದೆತೊನೊಡು ಪಂದ್ ಜನಕುಲು ಒತ್ತಾಯ ಮಲ್ತೊಂದುಲ್ಲೆರ್.

ಕಲ್ಲಾಪು ಬುರ್ದುಗೋಳಿ ಶ್ರೀ ಕೊರಗ ತನಿಯನ ಆದಿ ಜಾಗೆಗ್ ಭೇಟಿ ಕೊರಿನ ಸಂಗೀತ ನಿರ್ದೇಶಕೆರ್ ಅಲೋಕ್

ಪುಗರ್ತೆದ ಸಂಗೀತ ನಿರ್ದೇಶಕೆರ್ ಬೊಕ್ಕ ಪದ ಪನ್ಪುನಾರ್ ಅಲೋಕ್ ಮೇರ್ ಇನಿ ಕಲ್ಲಾಪು ಬುರ್ದುಗೋಳಿದ ಶ್ರೀ ಕೊರಗ ತನಿಯನ ಆದಿ ಜಾಗೆಗ್ ಬತ್ತ್‌ದ್, ಮುಲ್ಪುದ ಪರಪೋಕುನ್ ತೆರಿಯೊಂದು ಪ್ರಾರ್ಥನೆ ಮಲ್ತೆರ್.

ಈ ಪೊರ್ತುಡು ದ.ಕ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರ್ ತೊಕ್ಕೊಟ್ಟ್‌ದ ಶ್ರೀ ಸಾಯಿ ಪರಿವಾರ್ ಟ್ರಸ್ಟ್ ದ ಪ್ರಮುಖೆರ್ ಒಟ್ಟುಗು ಇತ್ತೆರ್.

ಕಡಬ: ನೀರ್ ಬುಡ್ದು ಶಾಲೆದ ಕೈತಲ್ ಬತ್ತಿನ ಮುದಲೆ!!

ಕಡಬ: ನೀರ್ ನ್ ಬುಡ್ದು ಮಾರ್ಗಗ್ ಬತ್ತಿನ ಮುದಲೆನ್ ಅರಣ್ಯ ಇಲಾಖೆದ ಸಿಬ್ಬಂದಿಲು ರಕ್ಷಣೆ ಮಲ್ತ್ ದ್ ಬೊಕ್ಕ ನೀರ್ ಗ್ ಬುಡ್ನ ಘಟನೆ ದಕ್ಷಿಣ ಕನ್ನಡ ಜಿಲ್ಲೆದ ಕಡಬ ತಾಲೂಕ್ ದ ಆಲಂಕಾರ್ ಕೊಂಡಾಡಿಕೊಪ್ಪ ಪ್ರಾಥಮಿಕ ಶಾಲೆದ ಕೈತಲ್ ನಡತ್ಂಡ್.


ಶುಕ್ರಾರ ಬೊಲ್ಪುಗು ಕೊಂಡಾಡಿಕೊಪ್ಪ ಶಾಲೆದ ಕೈತಲ್ ಈ ಮುದಲೆ ಮಾರ್ಗಡ್ ಇತ್ತ್ಂಡ್.
ಉಂದೆನ್ ರಬ್ಬರ್ ಟ್ಯಾಪಿಂಗ್‌ ಬೇಲೆಗ್ ಪೋವೊಂದು ಇತ್ತಿನ ಶೀನಪ್ಪ ಕುಂಬಾರ ಮೇರ್ ತೂದು ಅರಣ್ಯ ಇಲಾಖೆಗ್ ತೆರಿಪಾದೆರ್. ಅರಣ್ಯ ಇಲಾಖೆದ ಸಿಬಂದಿಲಾಯಿನ ಬಾಲಚಂದ್ರ ಗೌಡ ಬೊಕ್ಕ ರವಿಕುಮಾರ್ ಕೂಡ್ಲೆ ಜಾಗೆಗ್ ಬತ್ತ್ ದ್, ಸ್ಥಳೀಯೆರಾಯಿನ ಶೀನಪ್ಪ ಕುಂಬಾರ, ಕಿರಣ್ ಕೊಂಡಾಡಿ ಬೊಕ್ಕ ಧರ್ಮಸ್ಥಳ ಶೌರ್ಯ ಟೀಮ್ ದ ಕಾರ್ಯಕರ್ತೆರಾಯಿನ ಹರೀಶ್, ವಿನೋದ್ ಸೇರ್ದ್ ಮುದಲೆನ್ ಪತ್ತ್ ದ್ ಕುಮಾರಧಾರೆ ತುದೆಕ್ ಬುಡಿಯೆರ್.

ಓರಿಯೋ ಕಂಪನಿದ ಡಿಸೈನ್ ಮಲ್ಪರೆ 4 ವರ್ಷ ಬೋಡಾಂಡ್ ಗೆ!

ಓರಿಯೊ ಬಿಸ್ಕೆಟ್‌ದ ಮೇಲ್ ಡದ ತೋಜಿದ್ ಬರ್ಪಿನ ಲೋಗೋದ ಡಿಸೈನ್ ನ್ ಸರಿಯಾದ್ ನಿಕುಲು ತೂತರಾ ? 1912 ನೇ ಇಸವಿಡ್ ಬುಡುಗಡೆ ಆತಿನ ಈ ಲೋಗೊ ತಯಾರ್ ಮಲ್ಪರೆ ವಿನ್ಯಾಸಕಾರೆರ್ ಕಮ್ಮಿಡ್ಲ 4 ವರ್ಷ ದೆತೊಂದೆರ್ ಗೆ. ಉಂದೆಟ್ಟ್ ಮಸ್ತ್ ಸೂಕ್ಷ್ಮ ವಿಚಾರೊಲು ಉಂಡು.

ಈ ಲೋಗೊ ವೃತ್ತಾಕಾರೊಡು ಇತ್ತ್ ದ್ ಪೊರ್ಲುದ ಕೆತ್ತನೆಲು ಉಂಡು.ಈ ಲೋಗೋಡು  ರಡ್ಡ್ ಶಿಲುಬೆ ಲೆನ್ ಜೋಡ್ಸಾದ್ ದೀತಿಲೆಕ ಮಿತ್ತ್ ಡ್ ದೀತೆರ್‌. ಇಪ್ಪುನ ವೃತ್ತ ನಬಿಸ್ಕೋ ಉಂದು ಯುರೋಪಿಯನ್ ದೇಶೊದ ಒಂಜಿ ಸಂಕೇತವಾದುಂಡು. ಉಂದೆಟ್ಟ್ ಒಂಜಿ ಚುಕ್ಕೆ ಬೊಕ್ಕ ನಾಲ್ ತ್ರಿಕೋನದ ಜ್ಯಾಮಿತಿದ ಮಾದರಿ ಉಂಡು. ಅವ್ ಓರಿಯೊಸ್‌ನ್ ಸುರುತ್ತ ಕ್ರುಸೇಡ್ನ ಪರಪೋಕುದೊಟ್ಟ್‌ಗ್ ಸಂಪರ್ಕಿಸಾವುಂಡ್.

ನೆತ್ತ ಸರ್ಕಲ್ ಗ್ ಮಸ್ತ್ ಅರ್ಥ ಉಂಡು. ಜೀವನ, ಸೃಷ್ಟಿ, ಶಕ್ತಿ, ಮೋಕೆ ಬೊಕ್ಕ ಬದಲಾವಣೆ ಸೇರಿನಂಚನೆ ಮಸ್ತ್ ರೀತಿದ ಅರ್ಥ ಉಂಡು. ಅಂಚಾದ್ ಓರಿಯೋ ಕಾಲಿ ಟೇಸ್ಟಿ ರೌಂಡ್ ಕುಕೀ ಅತ್ತ್. ನಿಕ್ಲೆನ ಜೀವನನ್ ಬದಲ್ ಮಲ್ಪುನ ಶಕ್ತಿಲ ನಿಕ್ಲೆನ ಕೈಟ್ ಉಂಡು ಪನ್ಪಿನ ಸಂದೇಶಲ ಅಯಿಟ್ ಉಂಡು.

ಪ್ರತಿ ಓರಿಯೋ ಕುಕೀಡ್ ಸಿಂಗಾರಡ್ ಇಪ್ಪುನ ರಡ್ಡ್ ವೇಫರ್‌ ಬೊಕ್ಕ ರುಚಿ ಕೊರ್ಪಿನ ಕ್ರೀಮ್ ಫಿಲ್ಲಿಂಗ್‌ದ ನಡುಟ್ಟು ಎನಿಗ್ಮಾಡ್ ಸುತ್ತುನ ರಹಸ್ಯ ಆದುಂಡು. ನನೊಂಜಿ ಕಡೆಟ್ಟ್ ವೇಫರ್‌ದ ಅಲಂಕಾರಿಕ ವಿನ್ಯಾಸ ಚಾಕೊಲೇಟ್ ಹಿಟ್ಟ್‌ದ ಕಾಗಜಿದ ಮಿತ್ತ್ ಪೋಪಿನ ಪಿತ್ತಾಳೆದ ರೋಲರ್‌ರ್ದ್ ಸ್ಟ್ಯಾಂಪ್ ಮಲ್ತ್‌ದೆರ್.

ಓರಿಯೋ ಪದತ್ತ ಸುತ್ತಲ ನಾಲ್ ಇರೆತ್ತ ಕ್ಲೋವರ್ ಉಂಡು. ಉಂದೆನ್ ನಬಿಸ್ಕೋದ ಸಾಂಪ್ರದಾಯಿಕ ಲೋಗೋಡ್ ದೀತೆರ್. ಓರಿಯೋ ಪನ್ಪಿನ ಪುದರ್ ಫ್ರೆಂಚ್ ಪದರ್ದ್ ಪುಟ್ಟ್‌ದಿಪ್ಪೊಡು. “ಓರಿಯೋ” ಪನ್ಪಿನ ಪುದರ್ ಗ್ರೀಕ್‌ಡ್ ಪರ್ವತ ಪನ್ಪಿನ ಅರ್ಥನ್ ಕೊರ್ಪುಂಡು.

ಕರಿನ 105 ವರ್ಷಡ್ ಓರಿಯೋ ಮಸ್ತ್ ಪುದರ್‌ನ್ ಬದಲ್ ಮಲ್ತ್‌ದ್ಂಡ್. ಅವೆನ್ ಸುರುಕ್ಕ್ 1912ಕ್ಕ್ ಬುಡುಗಡೆ ಆನಗ ಓರಿಯೊ ಬಿಸ್ಕಿಟ್ ಪಂದ್ ಪನೊಂದಿತ್ತೆರ್. 1921 ಟ್ಟ್ ಓರಿಯೊ ಸ್ಯಾಂಡ್‌ವಿಚ್, 1937 ಟ್ಟ್ ಓರಿಯೋ ಕ್ರೀಮ್ ಸ್ಯಾಂಡ್‌ವಿಚ್ ಪಂದ್ ಪುದರ್ ಇತ್ತ್ಂಡ್. 1974 ಟ್ಟ್ ಕಡೆಕ್ಕಾದ್ ಓರಿಯೊ ಪಂದ್ ಮರುನಾಮಕರಣ ಮಲ್ತೆರ್. ಉಂದು ಓರಿಯೊ ಬಿಸ್ಕಿಟ್ ದ ಲೋಗೊದ ಕತೆ.

ಉಳ್ಳಾಲ ತಾಲೂಕ್‌ದ ತಹಸೀಲ್ದಾರ್ರೆನ ಕಾರ್‌ ಡ್ರೈವರ್ ಜರ ಬತ್ತ್ ದ್ ತೀರ್ ಪೋಯೆರ್

ಉಳ್ಳಾಲ: ಉಳ್ಳಾಲ ತಾಲೂಕು ತಹಸೀಲ್ದಾರ್ ಮೆರೆನ ಕಾರ್‌ದ ಡ್ರೈವರ್ ಆದಿಪ್ಪುನ ಸಜೀಪನಡುತ್ತ ಕಿಶೋರ್(35) ಜ್ವರ ಬತ್ತ್‌ದ್ ಇನಿ ದೇರಳಕಟ್ಟೆ ಖಾಸಗಿ ಆಸ್ಪತ್ರೆಡ್ ತೀರ್ ಪೋತೆರ್.

ಕರಿನ ಒಂಜಿ ವರ್ಷರ್ದ್ ಉಳ್ಳಾಲ ತಾಲೂಕು ತಹಸೀಲ್ದಾರ್ ಪುಟ್ಟರಾಜು ಮೆರೆನ ಕಾರ್‌ದ ಡ್ರೈವರ್ ಆದ್ ಬೇಲೆ ಮಲ್ತೊಂದಿತ್ತಿನ ಕಿಶೋರ್, ಸುಕ್ರಾರದಾನಿ ಜ್ವರ ಬತ್ತಿನೆಡ್ದಾವರ ದೇರಳಕಟ್ಟೆ ಆಸ್ಪತ್ರೆಗ್ ದಾಖಲ್ ಆದಿತ್ತೆರ್. ಇನಿ ಪುಲ್ಯಕಾಂಡೆ ತೀರ್ ಪೋತೆರ್.

ಗುಜರಾತ್ ಮಾಜಿ ಆರೋಗ್ಯ ಸಚಿವೆರ್ ಜೈ ನಾರಾಯಣ ವ್ಯಾಸ್ ಬಿಜೆಪಿಗ್ ರಾಜೀನಾಮೆ

ಗುಜರಾತ್: ಗುಜರಾತ್ ವಿಧಾನಸಭೆ ಚುನಾವಣೆಗ್ ದಿನ ನಿಗಂಟ್ ಆಯಿನ ಪೊರ್ತುಡು ಮಾಜಿ ಆರೋಗ್ಯ ಸಚಿವೆರ್ ಜೈ ನಾರಾಯಣ ವ್ಯಾಸ್ ಬಿಜೆಪಿಗ್ ರಾಜೀನಾಮೆ ಕೊರ್ತೆರ್.

2007ರ್ದ್ 2012 ಮುಟ್ಟ ಜೈ ನಾರಾಯಣ ವ್ಯಾಸ್ ಬಿಜೆಪಿ ಸರ್ಕಾರಡ್ ಆರೋಗ್ಯ ಸಚಿವರಾದ್ ಬೇಲೆ ಮಲ್ತೊಂದು ಇತ್ತಿನ ಮೇರ್ ಇತ್ತೆ ಈ ಪಕ್ಷಗ್ ರಾಜೀನಾಮೆ ಕೊರ್ದು ನನ ಒವು ಪಕ್ಷಗ್ ಸೇರುವೆರ್ ಪನ್ಪುನ ಮಾಹಿತಿ ತೆರಿದಿಜಿ. ಆಂಡ ಆರ್ ಆಮ್ ಆದ್ಮಿ ಪಕ್ಷ ಸೇರುನ ಸಾಧ್ಯತೆ ಉಂಡು ಪಂದ್ ತೆರಿದ್ ಬೈದ್ಂಡ್. ಗುಜರಾತ್ ವಿಧಾನಸಭೆಕ್ಕ್ ಡಿ. 1ಕ್ ಸುರುತ ಹಂತ ಬೊಕ್ಕ ಡಿ. 5 ಕ್ ರಡ್ಡ್ ನೇ ಹಂತದ ವೋಟು ನಡಪರೆ ಉಂಡು. ಡಿ. 8ಕ್ ಫಲಿತಾಂಶ ಪ್ರಕಟ ಆಪುಂಡು.

ವಿರಾಟ್ ಕೊಹ್ಲಿಗ್ ಇನಿ ಪುಟ್ಟು ಪರ್ಬದ ಗೌಜಿ

ಬೆಂಗ್ಲೂರ್: ಟೀಮ್ ಇಂಡಿಯಾ ಮಾಜಿ ನಾಯಕೆ ಬೊಕ್ಕ ರಾಯಲ್ ಚಾಲೆಂಜರ್ಸ್ ಬೆಂಗ್ಲೂರ್ ಟೀಮ್ ದ ಶ್ರೇಷ್ಠ ಬ್ಯಾಟ್ಸ್ ಮನ್ ವಿರಾಟ್ ಕೊಹ್ಲಿಗ್ ಇನಿ 34 ನೇ ವರ್ಷದ ಪುಟ್ಟುಪರ್ಬದ ಗೌಜಿ.


ಈ ದಿನನ್ ನೆಂಪು ಮಲ್ತ್ ದ್ ಅಭಿಮಾನಿಲು ಸಾಮಾಜಿಕ ಜಾಲತಾಣಡ್ ಎಡ್ಡೆಪ್ಪು ಬಯಕ್ ದೆರ್.

ಮಾರ್ಗದ ಗುಂಡಿಗ್ ಬೂರ್ದು ಮತಿ ತತ್ತ್ ಪೋಯಿನ ಜವನೆ..!

ಬೆಂಗ್ಲೂರು: ಪೇಂಟೆದ ಜಾಲಹಳ್ಳಿದ ಗಂಗಮ್ಮ ಮಾರ್ಗಡ್ ಇಪ್ಪುನ ಗುಂಡಿಗ್ ವಿದ್ಯಾರಣ್ಯಪುರತ್ತ ಸಂದೀಪ್ ಪನ್ಪಿನಾರ್ ಬೂರ್ದು ಕೋಮಾಗ್ ಪೋತೆರ್.

ಕ್ರಿಕೆಟ್ ಗೊಬ್ಬುದು ಇಲ್ಲಗ್ ಬರ್ಪಿನ ಪೊರ್ತುಡು ಮಾರ್ಗಡ್ ಇತ್ತಿನ ಗುಂಡಿ ತೋಜಂದೇ ತತ್ತ್‌ದ್ ಬೂರ್ದೆರ್. ತರೆಕ್ಕ್ ಮಸ್ತ್ ಪೆಟ್ಟಾದಿತ್ತ್‌ದ್ ಅರೆನ್ ಖಾಸಗಿ ಆಸ್ಪತ್ರೆಗ್ ದಾಖಲ್ ಮಲ್ತ್‌ದಿತ್ತೆರ್.

ಕಡಬ: ಕರೆಂಟ್ ಕಂಬಗ್ ಗುದ್ದಿನ ಕಾರ್..!!

ಕಡಬ : ಕಾರೊಂಜಿ ಕರೆಂಟ್ ಕಂಬಗ್ ಗುದ್ದಿನ ಘಟನೆ ಕಡಬ ಪೇಂಟೆಡ್ ಕೋಡೆ ರಾತ್ರೆ ನಡತ್ಂಡ್.

ಈ ಘಟನೆಡ್ ಕಾರ್ ಡ್ರೈವರ್ ಬಚಾವಾತೆರ್. ಕಾರ್ ದ ರಭಸಗ್ ಕಾರ್ ದ ಎದುರು ಮೈ ನಕ್ಕೆ ಆತ್ಂಡ್. ಕರೆಂಟ್ ಕಂಬ ಮಗ್ ರ್ದ್, ವಯರ್ ಮಾತ ಕಾರ್ ದ ಮಿತ್ತ್ ಬೂರ್ದುಂಡು. ಈ ಕಾರ್ ಕಡಬರ್ದ್ ಸುಬ್ರಹ್ಮಣ್ಯಗ್ ಪೋವೊಂದು ಇತ್ತ್ಂಡ್ ಪಂದ್ ತೂಯಿನಕುಲು ತೆರಿಪಾದೆರ್.

You Missed