Fri. Nov 20th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಶಿವಮೊಗ್ಗ: ಕಾರ್ ಬೊಕ್ಕ ಬೈಕ್ ತಾಂಟ್‌ದ್ ಬಾಲೆ ಸೇರ್ದ್ ಒಂಜೇ ಕುಟುಮದ ಮೂಜಿ ಜನ ತೀರ್ ಪೋಯೆರ್

ಶಿವಮೊಗ್ಗ: ಕಾರ್ ಬೊಕ್ಕ ಬೈಕ್ ತಾಂಟ್‌ದ್ ಬಾಲೆ ಸೇರ್ದ್ ಒಂಜೇ ಕುಟುಮದ ಮೂಜಿ ಜನ ಜಾಗೆಡೇ ತೀರ್ ಪೋಯಿನ ಘಟನೆ ಶಿಕಾರಿಪುರ ತಾಲೂಕ್‌ದ ಶಿರಾಳಕೊಪ್ಪ ಕೈತಲ್ ನಡತ್ಂಡ್.

ಜ್ಯೋತಿ (30), ಗಂಗಮ್ಮ (50) ಬೊಕ್ಕ ಸೌಜನ್ಯ (4) ತೀರ್ ಪೋತಿನಕುಲು. ನನೋರಿಯಗ್ ಮಸ್ತ್ ಪೆಟ್ಟಾದಿತ್ತ್‌ದ್ ಆಸ್ಪತ್ರೆಗ್ ದಾಖಲ್ ಮಲ್ತ್‌ದೆರ್. ಮಲ್ಲಿಕಾರ್ಜುನ್ ಕುಟುಮದೊಟ್ಟುಗು ಬೈಕ್‌ಡ್ ಪೊವೊಂದಿತ್ತಿನ ಪೊರ್ತುಡು ಹಿರೇಕೆರೂರುರ್ದ್ ಶಿರಾಳಕೊಪ್ಪಗ್ ಬರೊಂದಿತ್ತಿನ ಕಾರ್ ತಾಂಟ್‌ದ್ಂಡ್. ಸೌಜನ್ಯ ಜಾಗೆಡೇ ತೀರ್ ಪೋದಿತ್ತ್‌ದ್ ಒರಿನಕುಲು ಆಸ್ಪತ್ರೆಡ್ ತೀರ್ ಪೋತೆರ್.

ಕುಡ್ಲಡ್ ಗೆಜ್ಜೆಗಿರಿ ಮೇಳದ ಉದಿಪನದ ಲೆಪ್ಪೋಲೆ ಬುಡುಗಡೆ ಲೇಸ್

ನವೆಂಬರ್ 27 ಕ್ಕ್ ಶ್ರೀ ಕ್ಷೇತ್ರ ಗೆಜ್ಜೆಗಿರಿಟ್ಟ್ ನಡಪುನ ಶ್ರೀ ಗೆಜ್ಜೆಗಿರಿ ಪೊಸ ಮೇಳದ ಉದಿಪನ ಅಂಚನೆ ಸುರುತ್ತ ದೇವೆರೆನ ಸೇವೆ ಆಟದ ಲೆಪ್ಪೋಲೆನ್ ಕುಡ್ಲದ ಕುದ್ರೋಳಿ ಬ್ರಹ್ಮ ಶ್ರೀ ನಾರಾಯಣ ಗುರುಕ್ಲೆನ ತತ್ವ ಸಂದೇಶದ ರಂಗ ಚಾಲನೆ ಲೇಸ್‌ಡ್ ಬಿ. ಜನಾರ್ಧನ ಪೂಜಾರ್ಲು ಬುಡುಗಡೆ ಮಲ್ತೆರ್.

ಈ ಪೊರ್ತುಡು ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಅಭಿವೃದ್ಧಿ ಸಮಿತಿ ಅಧ್ಯಕ್ಷೆರ್ ದೇವೇಂದ್ರ ಪೂಜಾರಿ, ಕೋಶಾಧಿಕಾರಿ ಪದ್ಮರಾಜ್ ಆರ್, ಗೆಜ್ಜೆಗಿರಿ ಕ್ಷೇತ್ರದ ಉಪಾಧ್ಯಕ್ಷೆರ್ ರವಿಪೂಜಾರಿ ಚಿಲಿಂಬಿ, ಟ್ರಸ್ಟಿ ಶೈಲೇಂದ್ರ ಸುವರ್ಣ, ಎಚ್ ಜನಾರ್ಧನ, ರಾಜೇಂದ್ರ ಚಿಲಿಂಬಿ, ಸುರೇಶ್ ಪೂಜಾರಿ ಲೇಸ್‌ಡ್ ಇತ್ತೆರ್.

ಆರ್ಥಿಕವಾದ್ ಪಿರ ಒರಿದಿನ ವರ್ಗದಕಲೆಗ್ ಶೇ. 10 ಮೀಸಲಾತಿಗ್ ಸುಪ್ರೀಂಕೋರ್ಟ್ ಒಪ್ಪಿಗೆ

ಹೊಸದಿಲ್ಲಿ: ಆರ್ಥಿಕವಾದ್ ಪಿರ ಒರಿದಿನ  ವರ್ಗದಕಲೆಗ್(ಇಡಬ್ಲ್ಯುಎಸ್) ಕಾಲೇಜ್‌ ಲೆಗ್ ಬೊಕ್ಕ ಸರಕಾರಿ ಬೇಲೆಲೆಡ್ ಶೇ.10 ಮೀಸಲಾತಿ ಕೊರ್ಪಿನೆಕ್ಕ್ ಸುಪ್ರೀಂಕೋರ್ಟ್ ಸೋಮಾರ ಅನು ಕೊರ್ತುಂಡು.

ಉಂದು ಸಂವಿಧಾನದ ಮೂಲ ರಚನೆನ್ ತತ್ತ್ ದಿಜಿ ಪಂದ್ ಸುಪ್ರೀಂ ಕೋರ್ಟ್ ಪನ್ತ್ಂಡ್.
ಐನ್ ಜನ ನ್ಯಾಯಾಧೀಶೆರೆನ ಸಾಂವಿಧಾನಿಕ ಪೀಠಡ್ ನಾಲ್ ನ್ಯಾಯಾಧೀಶೆರ್ ನಕುಲು ಆರ್ಥಿಕವಾದ್ ಪಿರವು ಒರಿನ ವರ್ಗದಕಲೆಗ್ ಶೇ.10 ಮೀಸಲಾತಿದ ತೀರ್ಪು ಕೊರ್ತೆರ್.
ಇಡಬ್ಲ್ಯುಎಸ್ ಮೀಸಲಾತಿನ್ 2019 ತ ಸಾರ್ವತ್ರಿಕ ಚುನಾವಣೆದ ದುಂಬು ಸುರು ಮಲ್ದಿತ್ತೆರ್. ಅವೆತ್ರ ವಿರುದ್ಧ 40 ಅರ್ಜಿಲೆನ್ ಸುಪ್ರೀಂ ಕೋರ್ಟ್‌ಡ್ ಸಂದಾದಿತ್ತೆರ್.

ರಾಜೇಶ್ ಕೆಂಚನಕೆರೆ ಮೆರೆಗ್ ಬಿರುವೆರ್ ಕುಡ್ಲ, ಮುಲ್ಕಿ ಘಟಕರ್ದ್ ಪನವುದ ಸಕಾಯ

ಮುಲ್ಕಿ : ಸಮಾಜ ಸೇವಕೆರ್, ಚಿತ್ರನಟೆ ಉದಯ ಪೂಜಾರಿ ಮೇರ್ನ ಮುತಾಲಿಕೆದ ಬಿರುವೆರ್ ಕುಡ್ಲ (ರಿ) ಸಂಘಟನೆದ ಮುಲ್ಕಿ ಘಟಕದ ವತಿರ್ದ್ 66 ನೇ ಸ್ಪಂದನ ಸೇವಾ ಯೋಜನೆ ಪಟ್ಟುನ ಲೇಸ್ ನ.6 ಐತಾರ ನಡತ್ಂಡ್.

ಕೆಂಚನಕೆರೆ ನಿವಾಸಿ, ಪುಗರ್ತೆದ ನಾಟಕ ಕಲಾವಿದೆರ್ ಆಯಿನ ರಾಜೇಶ್ ಕೆಂಚನಕೆರೆ ಮೆರೆನ ಕಿಡ್ನಿ ಸಮಸ್ಯೆದ ಚಿಕಿತ್ಸೆಗಾದ್ 66 ನೇ ಸ್ಪಂದನ ಸೇವಾ ಯೋಜನೆದ 10,000 ರೂ. ಪನವುದ ಚೆಕ್ಕ್ ನ್ ಅರೆಗ್ ಕೊರಿಯೆರ್.

ಈ ಪೊರ್ತುಡು ಬಿರುವೆರ್ ಕುಡ್ಲ ಮುಲ್ಕಿ ಘಟಕದ ಅಧ್ಯಕ್ಷೆರ್ ಕಿಶೋರ್ ಜೆ ಸಾಲ್ಯಾನ್,ಕಾರ್ಯದರ್ಶಿ ಗಿರಿಧರ್ ಅಮೀನ್, ಕೋಶಾಧಿಕಾರಿ ಅಶೋಕ್ ಸುವರ್ಣ, ಸದಸ್ಯೆರಾಯಿನ ತಾರನಾಥ್ ಎನ್ ಮುಲ್ಕಿ, ರಮೇಶ್ ಜನನಿ, ಯತೀಶ್ ಕೊಲೆಕಾಡಿ ಮೊಕುಲು ಮಾತ ಇತ್ತೆರ್.

ಒಡಿಪು: ಶ್ರೀಕೃಷ್ಣ ಮಠಡ್ ನಾಲ್ ದಿನತ ಲಕ್ಷ ದೀಪೋತ್ಸವ

ಒಡಿಪು: ಉತ್ಥಾನ ದ್ವಾದಶಿದ ಲೆಕ್ಕೊಡು ಶ್ರೀಕೃಷ್ಣ ಮಠಡ್ ಸುರು ಆಯಿನ ನಾಲ್ ದಿನತ ತೆಪ್ಪೋತ್ಸವ ಬೊಕ್ಕ ಲಕ್ಷ ದೀಪೋತ್ಸವ, ಮಹೋತ್ಸವಡ್ ಸಾರ ಸಾರ ಭಕ್ತೆರ್ ಪಾಲ್ ಪಡೆತೆರ್.

ಈ ಲೇಸ್ ಡ್ ಪರ್ಯಾಯ ಕೃಷ್ಣಾಪುರ ಮಠದ ಶ್ರೀ ವಿದ್ಯಾಸಾಗರ ತೀರ್ಥ ಸ್ವಾಮೀಜಿ ಪೂಜೆ ಸಂದಾಯೆರ್.


ಬಯ್ಯಗ್ ಬೇತೆ ಬೇತೆ ಮಠತ ಹಿರಿಯ-ಕಿರಿಯ ಸ್ವಾಮಿಲು ರಥಬೀದಿಡ್ ಸೇರ್ದ್ ಲಕ್ಷ ದೀಪೋತ್ಸವನ್ ಮಲ್ತೆರ್. ನೆಟ್ ಸಾರ ಸಾರ ಭಕ್ತೆರ್ ಸೇರ್ದ್ ದೀಪಲೆನ್ ಪೊತ್ತಾದ್ ಆಶೀರ್ವಾದ ಪಡೆಯೆರ್.

ಉಚ್ಚಯ ಮೂರ್ತಿನ್ ಅಲಂಕಾರ ಮಲ್ತಿನ ತೆಪ್ಪಡ್ ದೀದ್ ಸಂಗೀತ ವಾದ್ಯರ್ದ್ ಕೆರೆತ ಸುತ್ತಲ ಕೊನೊಯೆರ್.  ನ. 8 ಮುಟ್ಟ ಈ ಲಕ್ಷದೀಪೋತ್ಸವ ನಡಪರೆ ಉಂಡು.

ಅಲೆಮಾರಿ ಜನಾಂಗದ ಎಡ್ಡೆಪ್ಪುಗಾದ್ ಬೆಂದಿನ ಭಾಸ್ಕರ್ ದಾಸ್ ಎಕ್ಕಾರ್ ನನ ಇಜ್ಜೆರ್

ಆರ್. ಎಸ್. ಎಸ್ ಕರ್ನಾಟಕ ದಕ್ಷಿಣ ಪ್ರಾಂತ್ಯದ ಧರ್ಮ ಜಾಗರಣದ ಸಮನ್ವಯ ಪರಿಯೋಜನಾ ಪ್ರಮುಖ್ ಬೊಕ್ಕ ಅಲೆಮಾರಿ ಜನಾಂಗದ ಎಡ್ಡೆಪ್ಪುಗಾದ್ ಬೆಂದಿನ ಭಾಸ್ಕರ್ ದಾಸ್ ಎಕ್ಕಾರ್ ಐತಾರ ಬಯ್ಯಗ್ ಬೆಂಗ್ಲೂರ್ ದ ಜೈನ್ ಆಸ್ಪತ್ರೆಡ್ ದೇವೆರೆ ಪಾದ ಸೇರ್ಯೆರ್.

ಮೇರ್ ಭಾರತ ಸರಕಾರದ ಸಾಮಾಜಿಕ ನ್ಯಾಯ ಹಕ್ಕ್ ಲೆನ ಸಬಲೀಕರಣ ಸಚಿವಾಲಯದ ಡಿಎನ್ ಟಿ- ಎನ್ ಟಿ- ಎಸ್ ಎನ್ ಟಿ ಅಭಿವೃದ್ಧಿ ಪ್ರಾಧಿಕಾರದ ಸದಸ್ಯೆರಾದ್, ಕೃಷಿಕೆರಾದ್, ಸಮಾಜ ಸೇವಕೆರಾದ್ ಸೇವೆ ಸಂದಾದೆರ್.

ಸಮಾಜಸೇವಕೆರ್ ವಿಜಯ ಪಂಡಿತ್ ಮೆರೆಗ್ ಮಾನಾದಿಗೆ

ಶ್ರೀ ವೀರಾಂಜನೇಯ ಫ್ರೆಂಡ್ಸ್ ಕ್ಲಬ್ ಬಂಬ್ರಾಣ ಮೊಕ್ಲೆನ ಮುತಾಲಿಕೆಡ್ ನಡತಿನ ಫ್ಲಡ್ ಲೈಟ್ ಮ್ಯಾಚ್ ದ ಪೊರ್ತುಡು ಅತಿ ಶ್ರೇಷ್ಠ ವಾಯಿನ ಅಂಬೇಡ್ಕರ್ ನ್ಯಾಷನಲ್ ಅವಾರ್ಡ್ ಪಡೆಯಿನ ಸಮಾಜಸೇವಕೆರ್, ಕೊಡುಗೈ ದಾನಿ ವಿಜಯ ಪಂಡಿತ್ ಭಗವತಿ ಮೆರೆನ್ ಮಾನಾದಿಗೆ ಮಲ್ತೆರ್. ಈ ಪೊರ್ತುಡು ಮಂಜೇಶ್ವರ ಶಾಸಕೆರ್ ಎ.ಕೆ.ಎಂ ಅಶ್ರಫ್ ಬೊಕ್ಕ ಮಲ್ಲ ಬಿನ್ನೆರ್ ಇತ್ತೆರ್.

ಇಟಲ ಶ್ರೀ ಸೋಮನಾಥೇಶ್ವರ ದೇವಲ್ಯಡ್ ಪೊಸ ಕೊಡಿಮರತ್ತ ಮೆರವಣಿಗೆಗ್ ಚಾಲನೆ ಕೊರಿನ ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್

ಬೆದ್ರ ತಾಲೂಕ್‌ದ ಮಹತೋಭಾರ ಇಟಲ ಶ್ರೀ ಸೋಮನಾಥೇಶ್ವರ ದೇವಲ್ಯ ದರೆಗುಡ್ಡೆಡ್ ಪೊಸ ಕೊಡಿಮರತ್ತ ಮೆರವಣಿಗೆಗ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಚಾಲನೆ ಕೊರಿಯೆರ್.

ಈ ಕಜ್ಜೊ ಕಾಂಡೆ 9 ಗಂಟೆಗ್ ಸುರು ಆದಿತ್ತ್ ದ್ ಬಯ್ಯ 6.30 ಮುಟ್ಟ ನಡಪರೆ ಉಂಡು. ಸುಳ್ಯ ಗೂನಡ್ಕರ್ದ್ ಈ ಕೊಡಿಮರ ಪಿದಡ್ ದಿತ್ತ್ ದ್, ಕೋಟೆಬಾಗಿಲು – ಶಿರ್ತಾಡಿ – ಅಳಿಯೂರು ಜಂಕ್ಷನ್ ಪೋದು ಇಟಲ ಶ್ರೀ ಸೋಮನಾಥೇಶ್ವರ ದೇವಲ್ಯಗ್ ಬರಿಯರೆ ಉಂಡು. ಸಾದಿಡ್ ಭಕ್ತೆರ್ ಕೊಡಿಮರಕ್ಕ್ ಅಲ್ಪಲ್ಪ ಪುಷ್ಪಾರ್ಚನೆ ಮಲ್ಪರೆ ಉಲ್ಲೆರ್.

ರಷ್ಯಾದ ಕೆಫೆಟ್ಟ್ ತೂ ಪೊತ್ತ್ ದ್ 13 ಜನ ತೀರ್ ಪೋಯೆರ್

ಮಾಸ್ಕೊ : ರಷ್ಯಾದ ಕೊಸ್ಟ್ರೋಮ ಪೇಂಟೆದ ಕೆಫೆಟ್ಟ್ ತೂ ಪೊತ್ತ್ ದಿತ್ತ್ ದ್ 13 ಜನ ತೀರ್ ಪೋಯಿನ ಘಟನೆ ನಡತ್oಡ್.


250 ರ್ದ್ ಎಚ್ಚದ ಜನಕ್ಲೆನ್ ಬೇತೆ ಜಾಗೆಗ್ ಲೆತೊಂದು ಪೋತೆರ್ ಪಂದ್ ಕೈತಲ್ ದ ಅಧಿಕಾರಿಲು ತೆರಿಪಾದೆರ್.
ಘಟನೆಡ್ 5 ಜನಕ್ಕ್ ಪೆಟ್ಟಾತ್oಡ್. ತೂ 3,500 ಚದರ ಮೀಟರ್ ಗ್ ಪೋದಿತ್ತ್oಡ್. ರಕ್ಷಣಾ ಪಡೆ ತೂ ತೆಕ್ಕಾವುನ ಬೇಲೆ ಮಲ್ತ್ ದೆರ್ ಪಂದ್ ಸಿಟಿಕೋವ್ ಮಾಹಿತಿ ತೆರಿಪಾದ್oಡ್.

ಎಲ್ಲೆ ( ನ.6) ಬೈರಂಪಳ್ಳಿ ಶ್ರಮಿಕ ತರುಣರ ಕೂಟದ ಮುತಾಲಿಕೆಡ್ 2 ನೇ ಇಲ್ಲ್ ಕೊರ್ಪುನ ಲೇಸ್

ಬೈರಂಪಳ್ಳಿ: ಶ್ರಮಿಕ ತರುಣರ ಕೂಟದ ಬೈರಂಪಳ್ಳಿದ ಮುತಾಲಿಕೆಡ್ ನಿರ್ಮಾಣ ಆಯಿನ ರಡ್ಡ್ ನೇ ಇಲ್ಲ್ ನ್ 41 ನೇ ಶೀರೂರುದ ಪಟ್ಟಿಬಾವು ಮುಟ್ಟಿ ಹರಿಜನ ಮೆರೆಗ್ ಕೊರ್ಪುನ ಲೇಸ್ ನ.6 ಐತಾರ ಬೊಲ್ಪುಗು 8 ಗಂಟೆಗ್ ನಡಪರೆ ಉಂಡು.


ಈ ಲೇಸ್ ಬೊಲ್ಪುಗು 8 ಗಂಟೆಗ್ ಗಣಹೋಮರ್ದ್ ಸುರು ಆಪುಂಡು. ಬೊಕ್ಕ ದೀಪ ಪ್ರಜ್ವಲನೆ ಆದ್, ರಾಮನಗರ ಜಿಲ್ಲೆ ಮಾಗಡಿ ತಾಲೂಕ್ ದ ಸೋಲೂರ್ ದ ಶ್ರೀ ನಾರಾಯಣಗುರು ಮಠ, ಆರ್ಯ ಈಡಿಗ ಮಹಾಸಂಸ್ಥಾನ ಶ್ರೀ ರೇಣುಕಾ ಪೀಠ ನೆತ್ತ ಪೀಠಾಧಿಪತಿ ಶ್ರೀ ಶ್ರೀ ಶ್ರೀ ವಿಖ್ಯಾತಾನಂದ ಸ್ವಾಮೀಜಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್. ಒಡಿಪುದ ಉದ್ಯಮಿ ಹರೀಶ್ ಕುಕ್ಕೆಹಳ್ಳಿ ಲೇಸ್ ನ್ ಉದಿಪನ ಮಲ್ಪರೆ ಉಲ್ಲೆರ್. ಬಿನ್ನೆರಾದ್ ಬೈರಂಪಳ್ಳಿ ದಲಿತ ಸಂಘರ್ಷ ಸಮಿತಿದ ಪ್ರತಿನಿಧಿ ರಮೇಶ್ ಹರಿಖಂಡಿಗೆ, ಒಡಿಪುದ ವಕೀಲೆರ್ ಸತೀಶ್ ಪೂಜಾರಿ, ಮಲ್ಪೆ ಉದ್ಯಮಿ ದೇವದಾಸ್ ಸುವರ್ಣ, ಬೈರಂಪಳ್ಳಿ ಉದ್ಯಮಿ ಪ್ರವೀಣ್ ಪೂಜಾರಿ ಸಾಂತ್ಯಾರ್ ಈ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್ ಪಂದ್ ಬೈರಂಪಳ್ಳಿ ಶ್ರಮಿಕ ತರುಣರ ಕೂಟದ ಗೌರವಾಧ್ಯಕ್ಷೆರ್, ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಬೊಕ್ಕ ಬೈರಂಪಳ್ಳಿ ಶ್ರಮಿಕ ತರುಣರ ಕೂಟದ ಮಹಿಳಾ ಘಟಕದ ಗೌರವಾಧ್ಯಕ್ಷೆರ್, ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

You Missed