Wed. Nov 18th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಧರ್ಮಸ್ಥಳ ಕಾಂಗ್ರೆಸ್ ಮುಖಂಡೆರ್ ಚಂದನ್ ಪ್ರಸಾದ್ ಕಾಮತ್ ಬಿಜೆಪಿಗ್ ಸೇರಿಯೆರ್

ಧರ್ಮಸ್ಥಳ: ಧರ್ಮಸ್ಥಳ ಗ್ರಾಮ ಪಂಚಾಯತ್ ದ ಮಾಜಿ ಅಧ್ಯಕ್ಷೆರ್ ಕಾಂಗ್ರೆಸ್ ಪಕ್ಷಡ್ ಸುಮಾರ್ ಎಡ್ಡೆ ಜಬದಾರಿನ್ ನಿರ್ವಹಿಸಿನ ಚಂದನ್ ಪ್ರಸಾದ್ ಕಾಮತ್ ಬಿಜೆಪಿಗ್ ಸೇರಿಯೆರ್.

ನಗರಾಭಿವೃದ್ಧಿ ಸಚಿವೆರ್ ಬೈರತಿ ಬಸವರಾಜ್ ಮೆರೆನ ದೋಸ್ತಿ ಆಯಿನ ಮೇರ್ ಸೋಮಾರ ಅರೆನ ಎದುರುಡು ಬಿಜೆಪಿ ಸೇರಿಯೆರ್. ಈ ಪೊರ್ತುಡು ಶಾಸಕೆರ್ ಹರೀಶ್ ಪೂಂಜ, ಬೆಂಗ್ಲೂರ್ ಬೃಹತ್ ಮಹಾನಗರ ಕಾರ್ಪೋರೇಟರ್ ಶ್ರೀಕಾಂತ್, ಜಯಪ್ರಕಾಶ್, ಬೊಕ್ಕ ಕೈತಲ್ ದ ಗ್ರಾ.ಪಂ ಮುಖಂಡೆರ್ ಇತ್ತೆರ್.

ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಷಷ್ಠಿ ಉಚ್ಚಯ

ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ಷಷ್ಠಿ ಉಚ್ಚಯದ ಅಟ್ಟಣೆಲು ಮುಗಿಯೊಂದು ಬೈದ್ಂಡ್. ಆಯಿಟ್ ರಥ ಕಟ್ಟುವ ಕೆಲಸ, ಪೈಂಟಿಂಗ್, ಸ್ವಚ್ಛತೆ, ತಾದಿ ಬರಿಟ್ಟ್ ಲೈಟಿಂಗ್ ದ ಬೇಲೆ ಮುಗಿತ್ಂಡ್.


ನ.21ಕ್ ಬೊಲ್ಪುಗು ಕೊಪ್ಪರಿಗೆ ಏರುನ ಮುಖೇನ ಷಷ್ಠಿ ಉಚ್ಚಯ ಸುರು ಆಪುಂಡು. ರಾತ್ರಿ, ಶೇಷವಾಹನ ಉಚ್ಚಯ ನಡಪರೆ ಉಂಡು. ನ.22 ರಾತ್ರೆ ಶೇಷವಾಹನ ಬಂಡಿ ಉಚ್ಚಯ ನಡಪುಂಡು, ನ.23 ಬಯ್ಯಗ್ ಲಕ್ಷದೀಪ ಉಚ್ಚಯ ನಡಪುನ ಪೊರ್ತುಡು ನೂದೆರ್ದ್ ಲ ಎಚ್ಚ ಭಜನೆ ತಂಡಲೆರ್ದ್ ನಲಿಕೆ ಭಜನೆ ನಡಪರೆ ಉಂಡು. ರಾಜಗೋಪುರರ್ದ್ ಸುರು ಆದ್ ಕುಮಾರಧಾರ ಮುಟ್ಟ ನಲಿಕೆ ಭಜನೆ ನಡಪುಂಡು. ನ.24 ಕ್ ಶೇಷ ವಾಹನ ಉಚ್ಚಯ, ನ.25 ಕ್ ಅಶ್ವವಾಹನ ಉಚ್ಚಯ, 26 ಗ್ ಮಯೂರ ವಾಹನ ಉಚ್ಚಯ, ನ.27 ಕ್ ಪೂತ್ತ ತೇರ್ ದ ಉಚ್ಚಯ, ನ.28 ಕ್ ಪಂಚಮಿ ರಥ ಉಚ್ಚಯ, ತೈಲಾಭ್ಯಂಜನ ನಡಪುಂಡು. ಬೊಕ್ಕ ನ.29 ಕ್ ವೈಭವರ್ದ್ ಚಂಪಾಷಷ್ಠಿ ಮಹಾರಥ ಉಚ್ಚಯ, ಬೊಕ್ಕ ನ.30 ಕ್ ಬೊಲ್ಪುಗು ಅವಭೃತೋತ್ಸವ, ನೌಕಾವಿಹಾರ ನಡಪರೆ ಉಂಡು.
(ವರದಿ : ಗೋಪಿಚಂದನ ಕೆ.ಎಸ್.)

ಅಟಲ್ ಪೆನ್ಶನ್ ಯೋಜನೆದ ಅನುಷ್ಠಾನೊಗು ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಗ್ ರಾಷ್ಟ್ರೀಯ ಪುರಸ್ಕಾರ

ಕುಡ್ಲ: ಪ್ರಮುಖ ಗ್ರಾಮೀಣ ಬ್ಯಾಂಕ್ ಆದಿಪ್ಪುನ ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್, ಅಟಲ್ ಪಿಂಚಣಿ ಯೋಜನೆದ (ಏಪಿವೈ) ಅನುಷ್ಠಾನಗ್ ಸಂಬಂಧ ಪಟ್ಟಿನಂಚ 2022-2023ತ ಕಾಲಡ್ ಮಲ್ತಿನ ಎಡ್ಡೆ ಸಾಧನೆಗ್ ಕುಡೊರ ರಾಷ್ಟ್ರಮಟ್ಟದ ಪ್ರಶಸ್ತಿ ತಿಕ್ಕ್ ದ್ಂಡ್.

ಸೋಮಾರ ದಿಲ್ಲಿ ನಡತಿನ ಇಸೇಸ ಲೇಸ್ ಡ್ ಬ್ಯಾಂಕ್‌ ಅಧ್ಯಕ್ಷೆರ್ ಪಿ. ಗೋಪಿಕೃಷ್ಣ ಮೇರ್ ಪಿಂಚಣಿ ನಿಧಿ ನಿಯಂತ್ರಣ ಬೊಕ್ಕ ಅಭಿವೃದ್ಧಿ ಪ್ರಾಧಿಕಾರದ (ಪಿ ಎಫ್‌ ಆರ್ ಡಿ ಎ) ಅಧ್ಯಕ್ಷೆರ್ ಸುಪ್ರತಿಮ್ ಬಂಡೋಪಾಧ್ಯಾಯ ಮೇರೆರ್ದ್ ಪ್ರಶಸ್ತಿ ದೆತೊಂಡೆರ್. ಪ್ರಶಸ್ತಿ ದೆತೊಂದು ಪಾತೆರಿನ ಮೇರ್, ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್‌ ಆರ್ಥಿಕವಾದ್ ಪಿರವು ಒರಿನ ಬೊಕ್ಕ ಕಡಿಮೆ ಆದಾಯದ ಇಪ್ಪುನ ವರ್ಗಲೆಗ್ ಪನವುದ ಸೇವೆನ್ ಕೊರಿಯೆರ್ ಬ್ಯಾಂಕ್ ಪರಮಾದ್ಯತೆ ಕೊರ್ತುಂಡು. ಅಟಲ್ ಪೆನ್ಶನ್ ಯೋಜನೆ ಅಸಂಘಟಿತ ಕಾರ್ಮಿಕ ವರ್ಗಗ್ ವರದಾನ ಆತ್ಂಡ್. ನಿರ್ದಿಷ್ಟ ಮಲ್ತಿನ ಕಂತ್ ನ್ ಕೊರ್ದು, 61 ನೇ ವರ್ಷರ್ದ್ ರೂ.1000/- ರ್ದ್ ರೂ.5000/- ಮಿತಿಟ್ ಪಿಂಚಣಿನ್ ದೆತೊನೊಲಿ. ಕರ್ನಾಟಕ ವಿಕಾಸ್‌ ಗ್ರಾಮೀಣ ಬ್ಯಾಂಕ್ ಇಡೆ ಮುಟ್ಟ 3,34,687 ಅಟಲ್ ಪಿಂಚಣಿ ಅಕೌಂಟ್ ಮಲ್ದ್ಂಡ್. ಈ ದಾಖಲೆರ್ದ್ ರೈತೆರ್, ರೈತಕಾರ್ಮಿಕೆರ್, ಕಾರ್ಖಾನೆಲೆಡ್ ಬೆಂದ್ ದೆರ್. ನಿಶ್ಚಿತ ಪಿಂಚಣಿ ಇಜ್ಜಂದೆ ಶ್ರಮಿಕೆರ್ ತನ್ನ 60 ನೇ ವರ್ಷದ ಬೊಕ್ಕ ನಿಶ್ಚಿಂತ ಬದ್ ಕ್ ಸಾಗರೆ ಅನುಕೂಲ ಆಪುಂಡು ಪನ್ಪುನವೇ ಸಮಾಧಾನದ ಇಷಯ ಪಂದ್ ಗೋಪಿಕೃಷ್ಣ ಮೇರ್ ಪಂಡೆರ್. ಬೊಕ್ಕ ಪ್ರಶಸ್ತಿ ಸ್ವೀಕಾರ ಮಲ್ತಿನ ಬಗೆಟ್ ಪಾತೆರಿನ ಮೇರ್, ಪ್ರಶಸ್ತಿ ಬ್ಯಾಂಕ್ ದ ಗೌರವ ಹೆಚ್ಚ ಮಲ್ದ್ಂಡ್ ಪಂದ್ ಪಂಡೆರ್. ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ 2022-23 ನೇ ಹಣಕಾಸು ವರ್ಷಡ್ ಪಿಂಚಣಿ ನಿಧಿ ನಿಯಂತ್ರಣ ಬೊಕ್ಕ ಅಭಿವೃದ್ಧಿ ಪ್ರಾಧಿಕಾರ (ಪಿ ಎಫ್‌ ಆರ್ ಡಿ ಎ) ಬ್ಯಾಂಕ್ ಗ್ ಪ್ರತಿ ಶಾಖೆಗ್ 80 ಅಕೌಂಟ್ ದ ಸರಾಸರಿಟ್ 50320 ಅಕೌಂಟ್ ದ ಗುರಿ ದೀದಿತ್ತ್ಂಡ್. ಆಯಿಕ್ ಪ್ರತಿಯಾದ್ ಬ್ಯಾಂಕ್ ನವೆಂಬರ್ ತಿಂಗೊಲ್ಡ್ 110ತ ಸರಾಸರಿಟ್ 69132 ಅಕೌಂಟ್ ಮಲ್ಪುನ ಮುಖೇನ ಗುರಿ ಮೀರಿನ ಸಾಧನೆ ಮಲ್ದ್ಂಡ್. ಉಂದು ದಕ್ಷಿಣ ಭಾರತ ಮಟ್ಟಡ್ ಒರಿನ ಬ್ಯಾಂಕುಲೆನ ಸರಾಸರಿರ್ದ್ ಹೆಚ್ಚತ್ಂಡ್. ಕರ್ನಾಟಕ ವಿಕಾಸ ಗ್ರಾಮೀಣ ಬ್ಯಾಂಕ್ ಕರಿನ ಮೇ ತಿಂಗೊಲ್ಡ್ ಒಂಜೇ ದಿನ 44000 ರ್ದ್ ದೆಚ್ಚ ಅಕೌಂಟ್ ಲಾಗಿನ್ ಮಲ್ಪುನ ಮುಖೇನ ರಾಷ್ಟ್ರೀಯ ದಾಖಲೆ ಸ್ಥಾಪನೆ ಮಲ್ತಿನೆನ್ ಮುಲ್ಪ ನೆನೆಪೊಲಿ. ಇತ್ತೆದ ಕರ್ನಾಟಕ ವಿಕಾಸ್‌ ಗ್ರಾಮೀಣ ಬ್ಯಾಂಕ್ ಕುಡ್ಲರ್ದ್ ವಿಜಯಪುರ ಮುಟ್ಟ 9 ಜಿಲ್ಲೆಲೆನ ಕಾರ್ಯ ಪರಿಧಿಡ್ 629 ಶಾಖೆಲು ಉಲ್ಲ.30700 ಕೋಟಿ ರೂ. ವಹಿವಾಟು ಮಲ್ತೊಂದು ಉಂಡು.

ಯಕ್ಷಗಾನ ಕಲಾವಿದನ ಇಲ್ಲದ ಬೀಗ ಪುಡಾತ್ ದ್ ಬಂಗಾರ್ ಕಂಡಿನ ಫೇಸ್ ಬುಕ್ ದೋಸ್ತಿ!

ಕುಂದಾಪುರ: ಫೇಸ್ ಬುಕ್ ಮುಖೇನ ಗುರ್ತ ಆಯಿನ ದೋಸ್ತಿ ಒರಿ ಯಕ್ಷಗಾನ ಕಲಾವಿದನ ಇಲ್ಲದ ಬೀಗ ಪುಡಾತ್ ದ್ ಸಾರ ಸಾರ ರೂ. ಬಿಲೆತ ಬಂಗಾರ್ ಕಂಡಿನ ಘಟನೆ ಬೈಂದೂರ್ ತಾಲೂಕ್ ದ ಶಿರೂರ್ ಗ್ರಾಮಡ್ ನಡತ್ಂಡ್.


ಶಿರೂರ್ ಗ್ರಾಮದ ಮೇಲ್ಪೇಟೆ ನಿವಾಸಿ ಸಂತೋಷ ಮೊಗವೀರ(34) ಮೆರೆನ ಇಲ್ಲಲ್ ಕಂಡ್ದೆರ್. ಮೇರ್ ಯಕ್ಷಗಾನ ಕಲಾವಿದೆರಾದ್, ಚಿಕ್ಕ ಮೇಳ ನಡಪಾವೊಂದು ಇತ್ತೆರ್. ಮೇರ್ ಮೇಳದ ಸೊತ್ತುಲೆನ ಒಟ್ಟಿಗೆ ಶಿರೂರ್ ಗ್ರಾಮದ ಶಿರೂರ್ ಮೇಲ್ಪೆಟೆದ ಸುಭಾಷ್ ಪ್ರಭು ಮೆರೆನ ಒಂಜಿ ರೂಮ್ ಡ್ ವಾಸ ಆದಿತ್ತೆರ್. ಮೆರೆಗ್ ರಡ್ಡ್ ವರ್ಷದ ಪಿರವು ಫೇಸ್ ಬುಕ್ ಡ್ ಗುರುರಾಜ್ ಪನ್ಪಿನರೆನ ಗುರ್ತ ಆದಿತ್ತ್ಂಡ್. ನ.9ಕ್ ಸಂತೋಷ್ ಮೆರೆನ ರೂಮ್ ಗ್ ಬತ್ ದ್ ಒಟ್ಟಿಗೆ ಇತ್ತಿನ ದೋಸ್ತಿ ಬೊಕ್ಕ ಸಂತೋಷ್ ಮೆರೆನ ರೂಮ್ ಡ್ ಬ್ಯಾಗ್ ಡ್ ದೀದಿತ್ತಿನ 12 ಗ್ರಾಂ ತೂಕದ ಬಂಗಾರ್ದ ಚೈನ್, 4 ಗ್ರಾಂ ತೂಕದ ಬಂಗಾರ್ ದ ಉಂಗಿಲ, ಕಾಣಿಕೆ ಡಬ್ಬಿಡ್ ಇತ್ತಿನ 10 ಸಾರ ಕಾಸ್, ಕುಡೊಂಜಿ ಡಬ್ಬಿಡ್ 1 ಸಾರ ರೂ. ಕಾಸ್ ಬೊಕ್ಕ 14 ಸಾರ ಬಿಲೆತ ರಿಯಲ್ಮೀ ಮೊಬೈಲ್ ಫೋನ್ ನ್ ಕಂಡ್ ದ್ ಬಲಿತ್ದೆರ್. ಕಂಡಿನ ಸೊತ್ತುಲೆನ ಒಟ್ಟು ಬಿಲೆ 85 ಸಾರ ರೂ. ಆತ್ಂಡ್ ಪಂದ್ ದೂರುಡ್ ತೆರಿಪಾದೆರ್. ಈ ಬಗೆಟ್ ಬೈಂದೂರ್ ಪೊಲೀಸ್‌ ಠಾಣೆಡ್ ಕೇಸ್ ದಾಖಲ್ ಆತ್ಂಡ್.

ಬೆದ್ರ ವಿಶ್ವ ಹಿಂದೂ ಪರಿಷತ್ ಬಜರಂಗ ದಳ ಪ್ರಖಂಡದ ಮುತಾಲಿಕೆಡ್ “ಗೋವಿಗಾಗಿ ಹೊರೆ ಕಾಣಿಕೆ ಅರ್ಪಣೆ” ಲೇಸ್ ಉದಿಪನ

ಬೆದ್ರ: ವಿಶ್ವ ಹಿಂದೂ ಪರಿಷತ್ ಬಜರಂಗದಳ ಬೆದ್ರ ಪ್ರಖಂಡದ ವತಿರ್ದ್ ನಡತಿನ “ಗೋವಿಗಾಗಿ ಹೊರೆಕಾಣಿಕೆ ಅರ್ಪಣೆ” ಲೇಸ್ ಗ್ ಆಲಂಗಾರ್ ಶ್ರೀ ಮಹಾಲಿಂಗೇಶ್ವರ ದೇವಲ್ಯಡ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಐತಾರ ಉದಿಪನ ಮಲ್ತೆರ್.

ಈ ಪೊರ್ತುಡು ದಕ್ಷಿಣ ಕನ್ನಡ ಹಾಲು ಉತ್ಪದಕೆರೆ ಒಕ್ಕೂಟದ ಅಧ್ಯಕ್ಷೆರ್ ಕೆ. ಪಿ. ಸುಚರಿತ್ ಶೆಟ್ಟಿ ಪುರಸಭೆ ಅಧ್ಯಕ್ಷೆರ್ ಪ್ರಸಾದ್ ಕುಮಾರ್, ಸ್ಥಾಯಿ ಸಮಿತಿದ ಅಧ್ಯಕ್ಷೆರ್ ನಾಗರಾಜ್ ಪೂಜಾರಿ, ವಿಶ್ವ ಹಿಂದೂ ಪರಿಸತ್ ಬೆದ್ರ ಪ್ರಖಂಡದ ಕಾರ್ಯಾಧ್ಯಕ್ಷೆರ್ ಶ್ಯಾಮ ಹೆಗ್ಡೆ, ಕಾರ್ಯದರ್ಶಿ ಸುಚೇತನ್ ಜೈನ್, ಸಹ ಕಾರ್ಯದರ್ಶಿ ರಕ್ಷಿತ್, ಸತ್ಸಂಗ್ ಪ್ರಮುಖ ಶೇಖರ ಪುತ್ತಿಗೆ, ಬೆದ್ರ ಬಜರಂಗದಳ ಸಂಯೋಜಕೆರ್ ಅಭಿಲಾಶ್ ಅರ್ಜುನಪುರ, ಗೋರಕ್ಷಾ ಪ್ರಮುಖೆರ್ ಅವಿನಾಶ್, ಸಂಪರ್ಕ ಪ್ರಮುಖೆರ್ ಪ್ರವೀಣ್ ಕೆ, ಅಖಾಡ ಪ್ರಮುಖೆರ್ ಸಂಜಯ ಹೆಗ್ಡೆ, ಸುರಕ್ಷಾ ಪ್ರಮುಖೆರ್ ಧನಂಜಯ, ನಗರ ಸಂಯೋಜಕೆರ್ ವಿಜೇಶ್, ಬೊಕ್ಕ ಸಂಘ ಪರಿವಾರದ ಹಿರಿಯೆರ್ ಇತ್ತೆರ್.

ಕಟೀಲ್ ರ್ದ್ ಕುಡ್ಲ ಮುಟ್ಟದ ಸಂಚಾರೊಗು ಮಾರ್ಗ ಬದಲಾತ್ಂಡ್

ಕುಡ್ಲ: ಕುಡ್ಲ-ಅತ್ರಾಡಿ ರಾಜ್ಯ ಮಾರ್ಗದ ಸಂಖ್ಯೆ 67ತ 16.20 ಕಿ.ಮೀ. ರ್ದ್ 19 ಕಿ.ಮೀ. ಮುಟ್ಟ ಮಾರ್ಗ ಅಭಿವೃದ್ಧಿ ಕಾಮಗಾರಿ ಸುರು ಆಯೆರೆ ಉಂಡು.


ಮಾರ್ಗಡ್ ಗಾಡಿ ಸಂಚಾರಗ್ ನಿಷೇಧ ಆದೇಶ ಬೊಕ್ಕ ಸಾರ್ವಜನಿಕೆರೆನ ಸಂಚಾರೊಗು ಬೊಕ್ಕ ಗಾಡಿಲೆನ ಸುಗಮ ಸಂಚಾರಗ್ ಬದಲಿ ಮಾರ್ಗದ ವ್ಯವಸ್ಥೆ ಮಲ್ಪಿ ಪಂದ್ ಅಪರ ದಂಡಾಧಿಕಾರಿಲು ಆದಿಪ್ಪುನ ಪೊಲೀಸ್ ಆಯುಕ್ತೆರ್ ಎನ್. ಶಶಿಕುಮಾರ್ ಆದೇಶ ಮಲ್ದೆರ್. ಕಟೀಲ್ ಕಡೆರ್ದ್ ಕುಡ್ಲಗ್ ಬರ್ಪಿನ ಗಾಡಿಲು ಬಜಪೆ ಚರ್ಚ್ ಜಂಕ್ಷನ್ ಡ್ ಎಡತ್ತ ಮೆಯಿಕ್ಕ್ ತಿರ್ಗ್ ದ್ ಬಜಪೆ ಠಾಣೆದ ಎದುರುದ ಪರತ್ತ್ ವಿಮಾನ ನಿಲ್ದಾಣ ಮಾರ್ಗವಾದ್ ಮುರ ಜಂಕ್ಷನ್, ಕಿನ್ನಿಪದವು ಮಾರ್ಗದ ಮುಖೇನ ಕುಡ್ಲಗ್ ಬರ್ಪುಂಡು. ಕುಡ್ಲರ್ದ್ ಕಟೀಲ್ ಕಡೆಕ್ ಪೋಪುನ ಗಾಡಿಲು ಕುಡ್ಲರ್ದ್ ಮರವೂರು ಸಂಕ, ಕೆಂಜಾರ್ ಮಾರ್ಗವಾದ್ ಕಿನ್ನಿಪದವು ಜಂಕ್ಷನ್ ಡ್ ಬಲಕ್ ತಿರ್ಗ್ ದ್ ದ್ ಮುರ ಜಂಕ್ಷನ್, ಬಜಪೆ ಪೊಲೀಸ್ ಸ್ಟೇಷನ್ ಎದುರುಡೇ ಬಜಪೆ ಚರ್ಚ್ ಜಂಕ್ಷನ್ ಮಾರ್ಗದ ಮುಖೇನ ಕಟೀಲ್ ಕಡೆಕ್ ಪೋಪೊಂಡು ಪಂದ್ ಆದೇಶಡ್ ತೆರಿಪಾದೆರ್.

ರಿಷೆಶನ್ ಬರ್ಪಿಲೆಕ ಉಂಡು, ಅನಗತ್ಯ ಕಾಸ್ ಕರ್ಚಿ ಮಲ್ಪಡೆ: ಜೆಫ್ ಬೆಜೋಸ್

ಡೆಲ್ಲಿ: ನನ ಬೇಗೊಡೆ ಆರ್ಥಿಕ ಹಿಂಜರಿತ (ರಿಸೆಷನ್) ಬರ್ಪಿನ ವಾತಾವರಣ ಉಂಡು. ಅಂಚಾದ್ ಅನಗತ್ಯ ಕರ್ಚಿ ಮಲ್ಪಡೆ ಪಂದ್ ಅಮೆಜಾನ್ ಸಂಸ್ಥಾಪಕೆರ್ ಜೆಫ್ ಬೆಜೋಸ್ ಮೇರ್ ಗ್ರಾಹಕೆರೆಗ್ ಬೊಕ್ಕ ಉದ್ಯಮ ಸಂಸ್ಥೆಲೆಗ್ ಎಚ್ಚರ್ಗೆ ಕೊರ್ತೆರ್.


ನಿಕ್ಲೆನ ಕಾಸ್ ನ್ ಭಾರಿ ಜಾಗ್ ರ್ತೆಡ್ ಕರ್ಚಿ ಮಲ್ಪುಲೆ. ನನದ ತಿಂಗೊಲ್ಡು ಪೊಕ್ಕಡೆ ಪೊಕ್ಕಡೆ ಕರ್ಚಿ ಮಲ್ಪೊರ್ಚಿ. ಅಗತ್ಯ ಇಜ್ಜಿಡ ಪೊಸ ಕಾರ್, ಟಿ.ವಿ. ಫ್ರಿಡ್ಜ್ ದೆತೊನರೆ ಪೋವೊಡ್ಚಿ ಪಂದ್ ಸಲಹೆ ಕೊರ್ತೆರ್. ಅವ್ವತ್ತಾಂದೆ ದುಡ್ಡು ಪಾಡ್ದ್ ಒವ್ವೇ ರಿಸ್ಕ್ ದೆತೊನೊಯೆರೆ ಪೋವೊರ್ಚಿ. ಕೆಲವು ರಿಸ್ಕ್ ದೆತೊನೊನೆನ್ ಕಮ್ಮಿ ಮಲ್ಪುಲೆ, ಅಂಚೆನೆ ರಜೆತ ದಿನಟ್ ಕಾಸ್ ನ್ ಪೊಕ್ಕಡೆ ಕರ್ಚಿ ಮಲ್ಪೊರ್ಚಿ ಪಂದ್ ಆರ್ ಪಂಡೆರ್.

ಚೀನಾಡ್ ಕಾರ್ಖಾನೆಗ್ ತೂ ಪೊತ್ತ್ ದ್ 36 ಜನ ತೀರ್ ಪೋಯೆರ್

ಸೆಂಟ್ರಲ್ ಚೀನಾದ ಕಾರ್ಖಾನೆ ಒಂಜೇಟ್ ತೂ ಪೊತ್ತ್ ದ್ 36 ಜನ ತೀರ್ ಪೋಯೆರ್. ಈ ಘಟನೆ ಸೋಮಾರ ಮಧ್ಯಾನ್ನ ಮಧ್ಯ ಚೀನಾದ ಹೆನಾನ್ ಪ್ರಾಂತ್ಯದ ಅನ್ಯಾಂಗ್ ಪೇಂಟೆಡ್ ನಡತ್ಂಡ್ ಪಂದ್ ವರದಿ ಆತ್ಂಡ್.

ಈ ಘಟನೆಗ್ ಕಾರಣ ದಾದ ಪಂದ್ ನನಾ ತೆರಿವೊಂಡಾತೆ. ಕರಿನ ಕೆಲವು ವರ್ಷಲೆರ್ದ್ ಚೀನಾಡ್ ಗ್ಯಾಸ್ ಬ್ಲಾಸ್, ಕೆಮಿಕಲ್ ಫ್ಯಾಕ್ಟರಿ ಬ್ಲಾಸ್ಟ್ ನಂಚಿನ ಆಕ್ಸಿಡೆಂಟ್ ಹೆಚ್ಚಾದ್ ನಡತೊಂದು ಉಂಡು.

ಕೆದಂಬಾಡಿ ರಾಮಯ್ಯ ಗೌಡೆರೆನ ಕಂಚಿದ ಮೂರ್ತಿ ಉದಿಪನದ ಪೊರ್ತುಡು ತುಳುನಾಡ್‌ದ ಕೊಡಿನ್ ರಾಪಾಯಿನ ತುಳುನಾಡ ರಕ್ಷಣಾ ವೇದಿಕೆ

ಕುಡ್ಲ: ಭಾರತ ದೇಶೊಡು ತುಳುನಾಡ್‌ಡ್ ನಡತಿನ ಸ್ವಾತಂತ್ರೊ ಸಂಗ್ರಾಮ ಅಮರ ಸುಳ್ಯ ಸ್ವಾತಂತ್ರೊಡು ಪೊರ್ಂಬಾಟ ನಡಪಾಯಿನ ಗುರ್ಕಾರೆ, ಅಂಕದ ಕಲೊತ್ತ ಬಿರ್ಸೆ, ಕೆದಂಬಾಡಿ ರಾಮಯ್ಯ ಗೌಡೆರೆನ ಕಂಚಿದ ಪ್ರತಿಮೆ ಕುಡ್ಲದ ಬಾವುಟ ಗುಡ್ಡೆಡ್ ನ.19ಕ್ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಉದಿಪನ ಮಲ್ತೆರ್.

ಸ್ವಾತಂತ್ರೊ ಸಂಗ್ರಾಮಡ್ ಬ್ರಿಟಿಷೆರೆನ ಕೊಡಿ ಜಪುಡಾದ್, ತೂ ಪೊತ್ತಾದ್ ತುಳುನಾಡ್‌ದ ಕೊಡಿನ್ ರಾಪಾಯೆರ್. ಅವೆತ ನೆಂಪುಗಾದ್ ಕೋಟೆದ ಬಬ್ಬು ಸ್ವಾಮಿ ದೈವೋಲ್ಯ ಬಿಜೈ ಕಾಪಿಕಾಡ್ ಡ್ ಇಸೇಸವಾದ್ ದೈವ ದೇವೆರೆಡ ಅನುವು ಕೇಂದ್ ದೈವೊಲ್ಯದ ಗುರಿಕಾರೆ ರಾಜೇಂದ್ರ ಕಿರೋಡಿಯನ್, ಅಲ್ಪದ ಚಾಕಿರಿದಾರ್ ಉಮಾನಾಥ ಮೊಕ್ಲೆನ ಪಾಲ್ವಿಕೆಡ್, ತುಳುಪರ ಪೊರ್ಂಬಾಟಗಾರೆರ್ ಚರಿತ್ ಪೂಜಾರಿ, ರೋಶನ್ ರೆನೋಲ್ಡ್, ತುಳುನಾಡ ದೈವಾರಾಧನಾ ಸಂರಕ್ಷಣಾ ಯುವ ವೇದಿಕೆದ ಗುರ್ಕಾರ್ಲು ಭರತ್ ಬಲ್ಲಾಳ್ ಬಾಗ್, ತುಳುನಾಡ ರಕ್ಷಣಾ ವೇದಿಕೆದ ಸ್ಥಾಪಕೆರ್ ಗುರ್ಕಾರ್ಲು ಯೋಗೀಶ್ ಶೆಟ್ಟಿ ಜೆಪ್ಪು ಮುಕ್ಲು ಪೂರ ಒಟ್ಟು ಸೇರೊಂದು ತುಲು ಕೊಡಿನ್ ರಾಮಯ್ಯ ಗೌಡೆರೆನ ಪ್ರತಿಮೆದಡೆಗ್ ಸಂದಾಯೆರ್.

ನಂದಿನಿ ಪೇರ್ ದ ಬಿಲೆ ಲೀಟರ್ ಗ್ 2 ರೂ. ಎಚ್ಚ

ನಂದಿನಿ ಪೇರ್ ದ ಬಿಲೆ ಹೆಚ್ಚ ಮಲ್ಪೆರೆ ಇಜ್ಜಿ ಪಂದ್ ಕೋಡೆ ಸಿಎಂ ಪಂನ್ತೆರ್. ಆಂಡ ರೈತೆರ್ ಬೊಕ್ಕ ಗ್ರಾಹಕೆರೆಗ್ ಕಷ್ಟ ಆವಂದಿಲೆಕ್ಕ ಪ್ರತಿ ಲೀಟರ್ ಪೇರ್ ದ ಮಿತ್ತ್ 3 ರೂ. ಬದಲ್ ಗ್ 2 ರೂ. ಹೆಚ್ಚ ಮಲ್ಪೆರೆ ಕೆಎಂಎಫ್ ನಿರ್ಧಾರ ಮಲ್ದ್ಂಡ್.

ಈ ಬಗೆಟ್ ರಡ್ಡ್ ದಿನತ ಉಲಯಿ ಸಂಬಂಧ ಪಟ್ಟಿನ ಅಧಿಕಾರಿಲೆನ ಒಟ್ಟಿಗೆ ಸಮಾಲೋಚನೆ ನಡಪಾದ್, ಸೂಕ್ತ ತೀರ್ಮಾನ ದೆತೊನೊಡು ಪಂದ್ ಸಿಎಂ ಕೂಡ ಕೆಎಂಎಫ್ ಗ್ ಸಲಹೆ ಕೊರ್ತೆರ್. ಇಂಚಾದ್ ರಡ್ಡ್ ದಿನತ ಬೊಕ್ಕ ಜನಕ್ಲೆಗ್ ಸರ್ಕಾರ ಬಿಲೆ ಏರಿಕೆದ ಶಾಕ್ ಕೊರ್ಪುನ ಗ್ಯಾರಂಟಿ ಪಂದ್ ಮೂಲಲು ತೆರಿಪಾದ.