Wed. Nov 18th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ನ.25: ರಾಜಶ್ರೀ ಟಿ. ರೈ ಪೆರ್ಲ ಬರೆತಿನ “ರಡ್ಡ್ ಕವುಲೆ” ಬೂಕು ಬುಡುಗಡೆ ಲೇಸ್

ತುಳು ಕನ್ನಡ ಬರವುಗಾರ್ತಿ, ಸಂಶೋಧಕಿ ರಾಜಶ್ರೀ ಟಿ. ರೈ ಪೆರ್ಲ ಮೇರ್ ಮೊಡೆತಿನ “ರಡ್ಡ್ ಕವುಲೆ” ಬೂಕು ಬುಡುಗಡೆ ಕಜ್ಜೊ ನ. 25 ತಾರೀಕ್ ಸುಕ್ರಾರ ಮಧ್ಯಾಹ್ನ 2 ಗಂಟೆಗ್ ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕಾ ಚಾವಡಿಡ್ ನಡಪರೆ ಉಂಡು.

ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆದ ಮಾನಾದಿಗೆದ ಸಂಪೊಲಿಗೆದಾರ್ ಮುಲ್ಕಿ ಕರುಣಾಕರ ಶೆಟ್ಟಿ ಬೂಕು ಬುಡುಗಡೆ ಮಲ್ಪರೆ ಉಲ್ಲೆರ್. ಕುಡ್ಲ ವಿಶ್ವವಿದ್ಯಾನಿಲಯದ ಒತ್ತು ಪ್ರಾಧ್ಯಾಪಕೆರ್ ಡಾ| ಧನಂಜಯ ಕುಂಬ್ಳೆ ಮಾನಾದಿಗೆದ ಬಿನ್ನೆರ್ ಆದ್ ಪಾಲ್ ಪಡೆಯರೆ ಉಲ್ಲೆರ್. ಚಾವಡಿದ ಮಿತ್ತರ್ಮೆಡ್ ರಾಜಶ್ರೀ ಟಿ. ರೈ ಪೆರ್ಲ ಓಲಗ ಆಯರೆ ಉಲ್ಲೆರ್. ಅಂಚನೆ ಮಲ್ಲ ಬಿನ್ನೆರಾದ್ ಟೈಮ್ಸ್ ಆಫ್ ಕುಡ್ಲದ ಪ್ರಬಂಧಕೆರ್ ಭುವನ ದಿನೇಶ್ ಕುಂಪಲ, ಮುಖ್ಯ ಪ್ರಬಂಧಕೆರ್ ಪವನ್ ರಾಜ್, ಸಹ ಸಂಪಾದಕೆರ್ ಯಶೋಧರ ಕೋಟ್ಯಾನ್ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್.

ಸನ್ನಿಧಿ ಟಿ. ರೈ ಪೆರ್ಲ ಬೂಕುದ ಪೊಲಬುನ್ ಮಲ್ಪರೆ ಉಲ್ಲೆರ್. ಅಂಚನೆ ದೀಕ್ಷಿತಾ ಕುರ್ನಾಡ್ ಕಜ್ಜೊ ಸುದಾರ್ಪಯರೆ ಉಲ್ಲೆರ್.

ಉಚ್ಚಿಲ ಮಹಾಲಕ್ಷ್ಮಿ ದೇವಲ್ಯಗ್ ಭೇಟಿ ಕೊರ್ನ ಗೃಹಸಚಿವೆರ್ ಆರಗ ಜ್ಞಾನೇಂದ್ರ

ಒಡಿಪು: ಇಂಚಿಪ್ಪ ನಿರ್ಮಾಣ ಆಯಿನ ಉಚ್ಚಿಲ ಶ್ರೀ ಮಹಾಲಕ್ಷ್ಮಿ ದೇವಲ್ಯಗ್ ರಾಜ್ಯ ಗೃಹ ಸಚಿವೆರ್ ಆರಗ ಜ್ಞಾನೇಂದ್ರ ಮೇರ್ ಬುಧಾರ ಬಯ್ಯಗ್ ಭೇಟಿ ಕೊರ್ದು ಶ್ರೀ ಮಹಾಲಕ್ಷ್ಮಿನ ದರ್ಶನ ಪಡೆಯೆರ್.

ಮೆರೆನ್ ದೇವಲ್ಯದ ವತಿರ್ದ್ ಪೂರ್ಣ ಕುಂಭದೊಟ್ಟಿಗೆ ಎದ್ಕೊನಿಯೆರ್. ಉಚ್ಚಿಲ ಮಹಾಲಕ್ಷ್ಮಿ ದೇವಲ್ಯದ ಅರ್ಚಕೆರ್ ಕೆ ವಿ ರಾಘವೇಂದ್ರ ಉಪಾಧ್ಯಾಯ ಬೊಕ್ಕ ವಿಷ್ಣುಮೂರ್ತಿ ಉಪಾಧ್ಯಾಯ ಮೊಕುಲು ಶ್ರೀದೇವಿಗ್ ಪೂಜೆ ಸಂದಾದ್, ಪ್ರಸಾದ ಕೊರಿಯೆರ್. ದೇವಲ್ಯದ ರೂವಾರಿ ನಾಡೋಜ ಡಾ. ಜಿ. ಶಂಕರ್ ಮೇರ್ ದೇವಲ್ಯದ ವತಿರ್ದ್ ಗೃಹ ಸಚಿವರೆಗ್ ತಮ್ಮನ ಮಲ್ತ್ ದ್ ಸ್ಮರಣಿಕೆ ಕೊರಿಯೆರ್. ಈ ಪೊರ್ತುಡು ಕಾಪು ಶಾಸಕೆರ್ ಲಾಲಾಜಿ ಆರ್ ಮೆಂಡನ್, ಮೊಗವೀರ ಮಹಾಜನ ಸಂಘದ ಅಧ್ಯಕ್ಷೆರ್ ಜಯ ಸಿ ಕೋಟ್ಯಾನ್ ಬೆಳ್ಳಂಪಳ್ಳಿ, ಕ್ಷೇತ್ರ ಆಡಳಿತ ಸಮಿತಿದ ಅಧ್ಯಕ್ಷೆರ್ ವಾಸುದೇವ ಸಾಲಿಯನ್, ಮಹಾಜನ ಸಂಘದ ಮಹಿಳಾ ಘಟಕದ ಉಪಾಧ್ಯೆಕ್ಷೆರ್ ಜಾನಕಿ ಲೀಲಾಧರ್, ನಾರಾಯಣ ಕರ್ಕೇರಾ, ದಿನೇಶ್ ಏರ್ಮಾಳ್, ದಿನೇಶ್ ಮೂಳೂರು, ಮೋಹನ್ ಬಂಗೇರ, ದೇವಲ್ಯದ ಪ್ರಧಾನ ಕಾರ್ಯನಿರ್ವಾಹಕೆರ್ ಸತೀಶ್ ಅಮೀನ್ ಮಟ್ಟು, ಕಾಪು ಬಿಜೆಪಿ ಅಧ್ಯಕ್ಷೆರ್ ಶ್ರೀಕಾಂತ್ ನಾಯಕ್, ಕಾರ್ಯದರ್ಶಿ ಗೋಪಾಲಕೃಷ್ಣ ರಾವ್, ಕಾಪು ಪೊಲೀಸ್ ವೃತ್ತ ನಿರೀಕ್ಷಕೆರ್ ಕೆ. ಸಿ ಪೂವಯ್ಯ, ಪಡುಬಿದ್ರೆ ಠಾಣಾಧಿಕಾರಿ ಪುರುಷೋತ್ತಮ್ ಇತ್ತೆರ್.

ನಟೆ ಉಪೇಂದ್ರ ಆಸ್ಪತ್ರೆಗ್ ದಾಖಲ್

ಬೆಂಗ್ಲೂರ್: ನಟೆ ಉಪೇಂದ್ರ ದಂಬುದ ಸಮಸ್ಯೆರ್ದ್ ಆಸ್ಪತ್ರೆಗ್ ದಾಖಲ್ ಆತೆರ್.


ಶೂಟಿಂಗ್ ದ ಪೊರ್ತುಡು ಡಸ್ಟ್ ಅಲರ್ಜಿರ್ದ್ ತೊಂದರೆ ಅನುಭವಿಸಿನ ಉಪೇಂದ್ರ ಮೆರೆನ್ ನೆಲಮಂಗಲದ ಕೈತಲ್ ಇಪ್ಪುನ ಹರ್ಷ ಆಸ್ಪತ್ರೆಗ್ ದಾಖಲ್ ಮಲ್ದೆರ್.ಇತ್ತೆ ಚಿಕಿತ್ಸೆ ಪಡೆದ್, ಮೇರ್ ಆಸ್ಪತ್ರೆರ್ದ್ ಪಿದಯಿ ಬೈದೆರ್ ಪಂದ್ ವರದಿ ಆತ್ಂಡ್.

ಮುಂಡ್ಕೂರು: ಅಧಿಕಾರಿಲೆನ ನಿರ್ಲಕ್ಷ್ಯರ್ದಾವರ ಪೊಂಜೊವುಗ್ ಕನ ಆದ್ ಒರಿದಿನ ಪೊಸ ಇಲ್ಲ್‌ದ ಬೇಲೆ

ಮುಲ್ಕಿ: ಕಿನ್ನಿಗೋಳಿದ ಮುಂಡ್ಕೂರು ಗ್ರಾ.ಪಂ. ವ್ಯಾಪ್ತಿದ ದೇವಲ್ಯದ ಕೈತಲ್ ಇಪ್ಪುನ ಮಸ್ತ್ ಬಡವೆರ್ ಆಯಿನ ಪೊಂಜೊವು ವಸಂತಿ ಪನ್ಪಿನರೆನ ಇಲ್ಲ್ ಬೂರುನ ಸ್ಥಿತಿಟ್ಟ್ ಉಂಡು. ಪಂಚಾಯತ್ ಅಧಿಕಾರಿಲೆನ ಭರವಸೆರ್ದ್ ಪೊಸ ಇಲ್ಲ್ ನಿರ್ಮಾಣದ ಬೇಲೆ ಆವೊಂದಿತ್ತ್ಂಡಲ ಒವ್ವೇ ರೀತಿದ ಯೋಜನೆದ ಕಾಸ್ ಮಂಜೂರು ಆವಂದಿನ ಕಾರಣ ಇಲ್ಲದ ಬೇಲೆ ಅಂಚನೆ ಒರಿದ್ಂಡ್.

ಮುಲ್ಕಿದ ಜೀವನ್ ಶೆಟ್ಟಿ ಸುಮಾರ್ 1,40,000 ರೂ ಕಾಸ್‌ನ್ ಸಾಮಾಜಿಕ ಜಾಲತಾಣದ ಮುಕೇನ ದಾನಿಲೆರ್ದ್ ಒಟ್ಟು ಮಲ್ತ್‌ದ್ ಪಣವುದ ಸಕಾಯ ಮಲ್ತಿತ್ತೆರ್. ಜೀವನ್ ಶೆಟ್ಟಿ ಪಂಚಾಯತ್ ಅಧಿಕಾರಿಲೆನ್ ಸಂಪರ್ಕಿಸಾದ್ ಸರಕಾರದ ಯೋಜನೆದ ಮುಕೇನ ಪೊಸ ಇಲ್ಲ್‌ದ ನಿರ್ಮಾಣಗ್ ಅನುಮತಿ ಕೊರ್ಪಿಲೆಕ್ಕ ಮಲ್ತ್‌ದಿತ್ತೆರ್. ಆಂಡ ಸರ್ಕಾರದ ಒವ್ವೇ ಸವಲತ್ತು ಇದ ಮುಟ್ಟ ತಿಕ್ಕ್‌ದಿಜಿ. ಅಧಿಕಾರಿಲೆನ ಬೇಜವಾಬ್ದಾರಿರ್ದ್ ಪೊಂಜೊವುಗ್ ಇಲ್ಲ್ ಕಟ್ಟರೆ ಆವಂದೇ ಕನ ಆದ್ ಒರಿದ್ಂಡ್.

ಬಹರೈನ್ : ಅಮ್ಮ ಕಲಾವಿದರು ಬಹರೈನ್’ ಸಂಘಟನೆ ಮುತಾಲಿಕೆಡ್ “ಸಂಗೀತ ಗಾನ ಸಂಭ್ರಮ”

ಬಹರೈನ್: ಪುಗರ್ತೆದ ಕಲಾವಿದೆರೆನ ಒಟ್ಟುಗು ಮೋಹನ್ ದಾಸ್ ರೈ ಎರುಮ್ಬು ಮೆರೆನ ಸಕಾರಡ್ “ಅಮ್ಮ ಕಲಾವಿದರು ಬಹರೈನ್” ಮುತಾಲಿಕೆಡ್ “ಸಂಗೀತ ಗಾನ ಸಂಭ್ರಮ” ಲೇಸ್ ನ.18 ಗ್ ಸುಕ್ರಾರ ಬಹರೈನ್‌ದ ಇಂಡಿಯನ್ ಕ್ಲಬ್ಬಿದ ಕ್ರೀಡಾಂಗಣಡ್ ನಡತ್ಂಡ್.

 

ಪುಗರ್ತೆದ ಗಾಯಕೆರ್ ಪುತ್ತೂರು ಜಗದೀಶ್ ಆಚಾರ್ಯ, ಗಾಯಕಿ ಸಮನ್ವಿ ರೈ ಪುತ್ತೂರು, ಗಾಯಕಿ ದಿವ್ಯನಿಧಿ ರೈ ,ಕೊಳಲು ವಾದಕೆರ್ ದಿವ್ಯ ಧನುಷ್ ರೈ ಒಟ್ಟುಗು ಗಿಟಾರ್ ವಾದಕೆರ್ ಶರತ್ ಹಳೆಯಂಗಡಿ, ಡ್ರಮ್ ವಾದಕೆರ್ ವಾಮನ್ ಬೈಲೂರ್ , ಕೀ ಬೋರ್ಡ್ ವಾದಕೆರ್ ಶಿಜಿಮೊನ್ ,ತಬಲಾ ವಾದಕೆರ್ ಸುರೇಶ್ ಬಾಬು ಅಂಚನೆ ರೆಡ್ ಎಫ್ .ಎಂ ದ ರೇಡಿಯೋ ನಿರೂಪಕೆರ್ ಆರ್ .ಜೆ . ಪ್ರಸನ್ನ ಮೊಕ್ಲೆನ ಒಟ್ಟುಗು ಸುಮಾರ್ 4 ಘಂಟೆದ ಕಾಲ ಸಂಗೀತ ಗಾನ ಸಂಭ್ರಮ ಲೇಸ್ ನಡತ್ಂಡ್.

ಈ ಪೊರ್ತುಡು ಪುಗರ್ತೆದ ಗಾಯಕೆರ್ ಜಗದೀಶ್ ಆಚಾರ್ಯ ಪುತ್ತೂರ್ ಮೆರೆಗ್ “ಸ್ವರ ಸಾಮ್ರಾಟ್” ಬಿರ್ದ್ ಕೊರ್ದು ಮಾನಾದಿಗೆ ಮಲ್ತೆರ್. ಅಂಚನೆ ಬೇತೆ ಕಲಾವಿದೆರೆಗ್ಲಾ ಮಾನಾದಿಗೆ ಮಲ್ತೆರ್.

ಕುಕ್ಕರ್ ಬಾಂಬ್ ಪುಡಾದಿನ ಆರೋಪಿ ಶಾರೀಕ್‌ಗ್ ವೆಂಟಿಲೇಟರ್ ಘಟಕಡ್ ನಡತೊಂದು ಇಪ್ಪುನ ಚಿಕಿತ್ಸೆ

ಕುಡ್ಲ: ಕಂಕನಾಡಿ ನಗರ ಪೊಲೀಸ್ ಠಾಣೆ ಕೈತಲ್ ಸನಿವಾರ ರಿಕ್ಷಾಡ್ ಕುಕ್ಕರ್ ಬಾಂಬ್ ಪುಡಾದಿನ ಘಟನೆಡ್ ಪೆಟ್ಟಾದ್ ಆಸ್ಪತ್ರೆಡ್ ಚಿಕಿತ್ಸೆ ಪಡೆಯೊಂದು ಇಪ್ಪುನ ಆರೋಪಿ ಶಾರೀಕ್‌ನ್ ವೆಂಟಿಲೇಟರ್ ಘಟಕಡ್ ದಾಖಲ್ ಮಲ್ತ್‌ದ್ ಚಿಕಿತ್ಸೆ ಕೊರೊಂದುಲ್ಲೆರ್.

ಶಾರೀಕ್‌ನ ದೇಹ ಶೇ. 45 % ದಾತು ಪೊತ್ತ್‌ದ್ ಪೊತ್ಂಡ್. ಅಂಚಾದ್ ವೆಂಟಿಲೇಟರ್‌ಗ್ ವರ್ಗಾವಣೆ ಮಲ್ತ್‌ದೆರ್.

ಮುಡಿಪು: ನ.27 ಕ್ಕ್ ಎಸ್.ಕೆ. ಗೋಲ್ಡ್ ಸ್ಮಿತ್ ಇಂಡಸ್ಟ್ರಿಯಲ್ ಕೋ-ಅಪರೇಟಿವ್ ಸೊಸೈಟಿ ಸಂಸ್ಥೆದ 15 ನೇ ಶಾಖೆ ಉದಿಪನ

ಎಸ್.ಕೆ. ಗೋಲ್ಡ್ ಸ್ಮಿತ್ ಇಂಡಸ್ಟ್ರಿಯಲ್ ಕೋ-ಅಪರೇಟಿವ್ ಸೊಸೈಟಿ ಸಂಸ್ಥೆದ 15 ನೇ ಶಾಖೆ ನ.27 ತಾರೀಕ್ ಐತಾರ ಕಾಂಡೆ 11 ಗಂಟೆಗ್ ಮುಡಿಪುದ ವಿಶ್ವಕರ್ಮ ಸಮುದಾಯ ಭವನದ 1 ನೇ ಮಾಳಿಗೆಡ್ ಉದಿಪನ ಆಯರೆ ಉಂಡು.

ಪರಮಪೂಜ್ಯ ಜಗದ್ಗುರು ಅನಂತಶ್ರೀ ವಿಭೂಷಿತ ಕಾಳಹಸ್ತೇಂದ್ರ ಸರಸ್ವತೀ ಮಹಾಸ್ವಾಮಿ ಬೊಕ್ಕ ಪರಮಪೂಜ್ಯ ಜಗದ್ಗುರು ಅನಂತಶ್ರೀ ವಿಭೂಷಿತ ಶಿವಸುಜ್ಞಾನ ತೀರ್ಥ ಮಹಾಸ್ವಾಮೀಜಿ ಲೇಸ್‌ನ್ ತುಡರ್ ಅರ್ಲಾದ್ ಆಶೀರ್ವಚನ ಮಲ್ಪರೆ ಉಲ್ಲೆರ್. ಅಂಚನೆ ಮಂಗಳೂರು ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಯು.ಟಿ. ಖಾದರ್ ಲೇಸ್ ಉದಿಪನ ಮಲ್ಪರೆ ಉಲ್ಲೆರ್. ಅಂಚನೆ ಮಾಮಲ್ಲ ಬಿನ್ನೆರ್ ಲೇಸ್‌ಡ್ ಪಾಲ್ ಪಡೆಯರೆ ಉಲ್ಲೆರ್.

ಡಿ.3 : ದೈವರಾಜ ಶ್ರೀ ಬಬ್ಬುಸ್ವಾಮಿ ದೈವಸ್ಥಾನ ಅಳಪೆಡ್ ದೀಪೋಚ್ಚಯ ಬೊಕ್ಕ ರಥೋಚ್ಚಯ

ಕುಡ್ಲ: ದೈವರಾಜ ಶ್ರೀ ಬಬ್ಬುಸ್ವಾಮಿ ದೈವಸ್ಥಾನ ಅಳಪೆಡ್ ಡಿಸೆಂಬರ್ 3 ತಾರೀಕ್ ಸನಿವಾರ ದೀಪೋಚ್ಚಯ ಬೊಕ್ಕ ರಥೋಚ್ಚಯ ನಡಪರೆ ಉಂಡು.

ಅಂಚನೆ ಶ್ರೀ ಸತ್ಯನಾರಾಯಣ ಪೂಜೆ ನಡಪರೆ ಇತ್ತ್‌ದ್, ಭಕ್ತೆರ್ ಬತ್ತ್‌ದ್ ಶ್ರೀ ದೇವೆರೆನ ಅಂಚನೆ ದೈವದ ಸಿರಿಮುಡಿ ಗಂಧಪ್ರಸಾದನ್ ದೆತೊಂದು ದೈವದ ಕೃಪೆಗ್ ಪಾತ್ರರಾವೊಡು ಪಂದ್ ದೈವಸ್ಥಾನದ ಮೊಕ್ತೇಸರೆರ್ ಪದ್ಮನಾಭ ಶೆಟ್ಟಿ ಬೊಕ್ಕ ಗುರಿಕಾರೆರ್ ದಯಾನಂದ ಶೆಟ್ಟಿ ಲೆಪ್ಪೋಲೆಡ್ ತೆರಿಪಾದೆರ್.

ಶ್ರೀ ಮಹಾದೇವಿ ಭಜನಾ ಮಂದಿರ (ರಿ.) ಅಳಪೆಡ್ 62 ನೇ ವರ್ಷದ ಏಕಾಹ ಭಜನೋಚ್ಚಯ

ಕುಡ್ಲದ ಶ್ರೀ ಮಹಾದೇವಿ ಭಜನಾ ಮಂದಿರ (ರಿ.) ಅಳಪೆಡ್ ಡಿಸೆಂಬರ್ 10 ತಾರೀಕ್ ಸನಿವಾರ 62 ನೇ ವರ್ಷದ ಏಕಾಹ ಭಜನೋಚ್ಚಯ ನಡಪರೆ ಉಂಡು.

ಸೂರ್ಯೋದಯಗ್ ಕಾಂಡೆ 6.43 ಕ್ಕ್ ಸುರು ಆದ್ ಮನದಾನಿ ಸೂರ್ಯೋದಯಗ್ 6.43 ಗಂಟೆ ಮುಟ್ಟ ನಡಪರೆ ಉಂಡು. ಅಂಚಾದ್ ಬರ್ಪಿನ ಭಕ್ತೆರ್ ಈ ಏಕಾಹ ಭಜನೋಚ್ಚಯನ್ ಪೊರ್ಲು ಮಲ್ತ್‌ದ್, ಗಂಧಪ್ರಸಾದ ದೆತೊಂದು ಶ್ರೀ ಮಹಾದೇವಿ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಆಡಳಿತ ಮಂಡಳಿ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೊಲೆಡ್ ತೆರಿಪಾದೆರ್.

ನ.27: ಪಕ್ಷಿಕೆರೆ “ಪತ್ತೆರೆ ಕೂಟ”ದ ಮುತಾಲಿಕೆಡ್ ತುಳುವ ಪರಂಪರೆದ ಗ್ರಾಮ ಉಚ್ಚಯ

ಹಳೆಯಂಗಡಿ: ಪತ್ತೆರೆ ಕೂಟ, ಪಕ್ಷಿಕೆರೆ ನೆತ್ತ ವತಿರ್ದ್ ತುಳುನಾಡ್ ದ ಜಾನಪದ ಪರಂಪರೆನ್ ತೆರಿಪಾವುನ ಗ್ರಾಮ ಉಚ್ಚಯ-2022 ಉಂದುವೇ ನ.27 ಐತಾರದಾನಿ ಪಕ್ಷಿಕೆರೆ ಇಗರ್ಜಿದ ಜಾಲ್ ಡ್ ನಡಪರೆ ಉಂಡು.


ಆನಿ ಬೊಲ್ಪುಗು 9 ಗಂಟೆಗ್ ತುಡರ ದಿಬ್ಬಣ ಬತ್ತ್ ದ್ ದ್, ಗೊಬ್ಬುದ ಕಲಟ್ ಬೇತೆ ಬೇತೆ ಗ್ರಾಮೀಣ ಗೊಬ್ಬುಲು ನಡಪರೆ ಉಂಡು. ಮಧ್ಯಾಹ್ನ 2 ಗಂಟೆರ್ದ್ 6 ಗಂಟೆ ಮುಟ್ಟ ನಲಿಕೆದ ಕಲಟ್ ಸಾಂಸ್ಕೃತಿಕ ವೈವಿಧ್ಯ ನಡಪರೆ ಉಂಡು. ಬೊಲ್ಪುಗು ನಡಪುನ ಉದಿಪನ ಲೇಸ್ ಬೊಕ್ಕ ಬಯ್ಯಗ್ ನಡಪುನ ಮುಗಿತಲದ ಲೇಸ್ ಡ್ ಮಲ್ಲ ಮಲ್ಲ ಬಿನ್ನೆರ್ ಓಲಗ ಆವರೆ ಉಲ್ಲೆರ್. ಈ ಪೊರ್ತುಡು ಪದ್ಮಶ್ರೀ ಅಕ್ಷರ ಸಂತ ಹರೇಕಳ ಹಾಜಬ್ಬ ಮೆರೆಗ್ ತಮ್ಮನ ಮಲ್ತ್ ದ್ ಮಾನಾದಿಗೆ ಮಲ್ಪರೆ ಉಂಡು. ಈ ನಡುಟ್ಟು ಬೇತೆ ಬೇತೆ ರೀತಿಡ್ ಮನಸ್ ದಿಂಜಾವುನ ಪಂತೊಲು ಬೊಕ್ಕ ತಿಂಡಿ ತಿನಿಸುಲು ಈ ಲೇಸ್ ಗ್ ಇಸೇಸ ಪೊರ್ಲು ಕೊರ್ರೆ ಉಂಡು. ಈ ಪರಿಸರಡ್ ಸುಮಾರ್ ವರ್ಷೊರ್ದು ಬೊಕ್ಕ ನಡತೊಂದು ಇಪ್ಪುನ ಈ ಗ್ರಾಮ ಉಚ್ಚಯಗ್ ಕೈತಲ್ ದ ಗಣ್ಯೆರೆನ್ ವಿಶ್ವಾಸಗ್ ದೆತೊಂದು ಸಮಿತಿ ರಚನೆ ಮಲ್ದ್ಂಡ್. ಅಂಚನೆ ಬೇತೆ ಬೇತೆ ಸಂಘ ಸಂಸ್ಥೆಲು ಬೊಕ್ಕ ಸ್ವಸಹಾಯ ಸಂಘಲು ಈ ಲೇಸ್ ಗ್ ಕೈತಾಂಗ್ ಕೊರೊಂದುಲ್ಲೆರ್. ಸುಮಾರ್ ಸಮಯರ್ದ್ ಈ ಲೇಸ್ ದ ಯಶಸ್ವಿಗ್ ಬೊಡಾದ್ ಸಂಘಟಕೆರ್ ಬೇಲೆ ಮಲ್ತೊಂದು ಉಲ್ಲೆರ್. ಪಕ್ಷಿಕೆರೆ ಚರ್ಚ್ ವಠಾರಡ್ ನಡಪುನ ಈ ಲೇಸ್ ಡ್ ಹಳ್ಳಿ ಬದ್ ಕ್ ದ ಪರತಿರಿ, ಪರಪೋಕುದ ಮಹತ್ವ ತೆರಿಯರೆ ಮಾತೆರ್ಲ ಹೆಚ್ಚದ ಸಂಖ್ಯೆಡ್ ಬತ್ತ್ ದ್ ಪಾಲ್ ಪಡೆದ್ ಸಹಕಾರ ಮಲ್ಪೊಡು ಪಂದ್ ಪತ್ತೆರೆ ಕೂಟದ ಪದಾಧಿಕಾರಿಲು ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.