Wed. Nov 18th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಡಿ.3: ವೇಣೂರ್‌ದ ಪೆರ್ಮುಡಡ್ 30ನೇ ವರ್ಷದ ಸೂರ್ಯ-ಚಂದ್ರ ಜೋಡು ಕರೆ ಕಂಬುಲ

ವೇಣೂರ್‌ದ ಪೆರ್ಮುಡಡ್ 30ನೇ ವರ್ಷದ ಸೂರ್ಯ-ಚಂದ್ರ ಜೋಡು ಕರೆ ಕಂಬುಲ ಡಿ.3 ತಾರೀಕ್ ಸನಿವಾರದಾನಿ ನಡಪರೆ ಉಂಡು.

ಅಳದಂಗಡಿ ಅರಮನೆತ್ತ ತಿಮ್ಮಣ್ಣರಸೆರ್ ಡಾ| ಪದ್ಮಪ್ರಸಾದ್ ಅಜಿಲೆರ್ ಲೇಸ್‌ನ್ ಉದಿಪನ ಮಲ್ಪರೆ ಉಲ್ಲೆರ್. ಅಂಚನೆ ವೇಣೂರು ಶ್ರೀ ಮಹಾಲಿಂಗೇಶ್ವರ ದೇವಲ್ಯದ ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಯನ್. ಪುರುಷೋತ್ತಮ ರಾವ್ ಲೇಸ್‌ದ ಗುರ್ಕಾರ್ಮೆ ವಹಿಸೊನರೆ ಉಲ್ಲೆರ್. ಅಂಚನೆ ಈ ಲೇಸ್‌ಗ್ ಮಸ್ತ್ ಮಾಮಲ್ಲ ಬಿನ್ನೆರ್ ಪಾಲ್ ಪಡೆಯರೆ ಉಲ್ಲೆರ್.

ಮಾರ್ಚ್ 9 ತಾರೀಕ್ ರ್ದ್ ಸೆಕೆಂಡ್ ಪಿಯುಸಿ ಪರೀಕ್ಷೆ ಸುರು

ಬೆಂಗ್ಳೂರ್: 2023 ತ್ತ ಮಾರ್ಚ್ 9 ರ್ದ್ 29 ಮುಟ್ಟ ದ್ವಿತೀಯ ಪಿಯುಸಿ ವಾರ್ಷಿಕ ಪರೀಕ್ಷೆ ನಡಪರೆ ಉಂಡು ಪಂದ್ ಶಿಕ್ಷಣ ಸಚಿವೆರ್ ಬಿ.ಸಿ. ನಾಗೇಶ್ ತೆರಿಪಾದೆರ್.

ಈ ಬಗೆಟ್ ಟ್ವೀಟ್ ಮಲ್ತಿನ ಆರ್, ದ್ವಿತೀಯ ಪಿಯುಸಿ ವಾರ್ಷಿಕ ಪರೀಕ್ಷೆದ ಟೈಮ್ ಟೇಬಲ್ ಪ್ರಕಟಣೆ ಆತ್ಂಡ್. 2023 ತ್ತ ಮಾರ್ಚ್ 9 ರ್ದ್ ಮಾರ್ಚ್ 29 ಮುಟ್ಟ ಪರೀಕ್ಷೆ ನಡೆಪರೆ ಉಂಡು ಪಂದ್ ತೆರಿಪಾದೆರ್.

ಡಿ.28-30 : ವಣಸಾಯ ಶ್ರೀ ವನದುರ್ಗಾ, ಕೊಡಂಗೆ ಶ್ರೀ ಭಟಾರಿ ಯಾನೆ ಮಲೆದೇವತೆ ಬೊಕ್ಕ ಕಲ್ಕುಡಗುಡ್ಡೆ ಶ್ರೀ ಕಲ್ಕುಡ-ಕಲ್ಲುರ್ಟಿ, ವ್ಯಾಘ್ರಚಾಮುಂಡಿ ಬೊಕ್ಕ ಪರಿವಾರ ದೈವಲೆನ ಸಾನಿಧ್ಯಡ್ ಪ್ರತಿಷ್ಠಾ ಕಲಶೋಚ್ಚಯ ಬೊಕ್ಕ ನೇಮೋಚ್ಚಯ

ವಣಸಾಯ ಶ್ರೀ ವನದುರ್ಗಾ, ಕೊಡಂಗೆ ಶ್ರೀ ಭಟಾರಿ ಯಾನೆ ಮಲೆದೇವತೆ ಬೊಕ್ಕ ಕಲ್ಕುಡಗುಡ್ಡೆ ಶ್ರೀ ಕಲ್ಕುಡ-ಕಲ್ಲುರ್ಟಿ, ವ್ಯಾಘ್ರಚಾಮುಂಡಿ ಬೊಕ್ಕ ಪರಿವಾರ ದೈವಲೆನ ಸಾನಿಧ್ಯಡ್ ಪ್ರತಿಷ್ಠಾ ಕಲಶೋಚ್ಚಯ ಬೊಕ್ಕ ನೇಮೋಚ್ಚಯ ಡಿ.28 ಬುಧಾರರ್ದ್ ಡಿ. 30 ಶುಕ್ರಾರ ಮುಟ್ಟ ನಡಪರೆ ಉಂಡು.

ಈ ಲೇಸ್ ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ವೀರೇಂದ್ರ ಹೆಗ್ಗಡೆ ಬೊಕ್ಕ ಶ್ರೀ ಮಹಾಲಕ್ಷ್ಮೀ ಕ್ಷೇತ್ರ ಶ್ರೀ ಧಾಮ ಮಾಣಿಲದ ಶ್ರೀ ಶ್ರೀ ಮೋಹನದಾಸ ಪರಮಹಂಸ ಸ್ವಾಮಿಲು, ಮೊಕ್ಲೆನ ಮಾರ್ಗದರ್ಶನಡ್, ಬ್ರಹ್ಮ ಶ್ರೀ ನೀಲೇಶ್ವರ ಉಚ್ಚಿಲತ್ತಾಯ ಪದ್ಮನಾಭ ತಾಂತ್ರಿಲೆನ ನೇತೃತ್ವಡ್ ಬೊಕ್ಕ ಕೂಡುಕಟ್ಟ್ ದ ಯಜಮಾನತ್ವಡ್ ನಡಪುಂಡು.


ಡಿ.28 ಬುಧಾರದಾನಿ ಬೊಲ್ಪುಗು ಕಾರ್ಯಾಲಯ ಉದಿಪನ ಬೊಕ್ಕ ತಂತ್ರಿಲು ಬರಿಯೆರೆ, ಪೂರ್ಣಕುಂಭ ಎದ್ಕೊನಿಯೆರೆ ಬೊಕ್ಕ ವಣಸಾಯಡ್ ಗ್ರಾಮಸ್ಥೆರೆರ್ದ್ ಹೊರಕಾಣಿಕೆ ಸಮರ್ಪಣೆ, ಆಯಿರ್ದ್ ವಣಸಾಯ, ಕೊಡಂಗೆ ಬೊಕ್ಕ ಕಲ್ಕುಡಗುಡ್ಡೆಡ್ ಪ್ರಾರ್ತನೆ, ಪ್ರಸಾದ ಪರಿಗ್ರಹ, ಬಿಂಬ ಪರಿಗ್ರಹ, ಪುಣ್ಯಾಹ, ಪ್ರಸಾದ ಶುದ್ಧಿ, ವಾಸ್ತುರಕ್ಷೋಘ್ನ ಹೋಮ, ವಾಸ್ತುಬಲಿ ನಡಪುಂಡು.

ಡಿ.29 ಗುರುವಾರದಾನಿ ಬೊಲ್ಪುಗು ವಣಸಾಯ, ಕೊಡಂಗೆ ಬೊಕ್ಕ ಕಲ್ಕುಡಗುಡ್ಡೆಡ್ ಗಣಪತಿ ಹೋಮ, ಬಿಂಬಶುದ್ಧಿ, ಅನುಜ್ಞಾ-ಕಲಶ ಪೂಜೆ, ಅನುಜ್ಞಾ-ಕಲಶಾಭಿಷೇಕ ಬೊಕ್ಕ ಕೊಡಂಗೆಡ್ ಕೈತಲ್ ದ ಗ್ರಾಮಲೆನ ಭಕ್ತೆರೆರ್ದ್ ಹೊರಕಾಣಿಕೆ ಸಮರ್ಪಣೆ, ಬೊಕ್ಕ ವಣಸಾಯ ಶ್ರೀ ವನದುರ್ಗಾ, ಕೊಡಂಗೆ ಶ್ರೀ ಭಟಾರಿ ಯಾನೆ ಮಲೆದೇವತೆ ಬೊಕ್ಕ ಕಲ್ಕುಡಗುಡ್ಡೆ ಶ್ರೀ ಕಲ್ಕುಡ-ಕಲ್ಲುರ್ಟಿ, ವ್ಯಾಘ್ರಚಾಮುಂಡಿ ಬೊಕ್ಕ ಪರಿವಾರ ದೈವಲೆನ ಸಾನಿಧ್ಯಡ್ ಖನನಾದಿ- ಸಪ್ತಶುದ್ಧಿ, ಪ್ರತಿಷ್ಠೆ, ಚೋರಶಾಂತಿಹೋಮ, ಹೋಮ-ಕಲಶಾಭಿಷೇಕ, ಸಾನಿಧ್ಯ-ಕಲಶಾಭಿಷೇಕ, ಮಹಾಪೂಜೆ, ಪ್ರಸಾದ ಕೊರಿಯೆರೆ ಬೊಕ್ಕ ಬ್ರಾಹ್ಮಣ ಸಮರ್ಪಣೆ ಬೊಕ್ಕ ವನಭೋಜನ, ಕೊಡಂಗೆ ದೈವೋಲ್ಯಗ್ ಭಂಡಾರ ಬರಿಯೆರೆ ಬೊಕ್ಕ ನೇಮೋಚ್ಚಯ ಆಯಿರ್ದ್ ಬೊಕ್ಕ ಅನ್ನಸಂತರ್ಪಣೆ ನಡಪರೆ ಉಂಡು.


ಡಿ.30 ಶುಕ್ರಾರದಾನಿ ಬಯ್ಯಗ್ ಧಾರ್ಮಿಕ ಸಭೆ ನಡಪುಂಡು. ಈ ಸಭೆಟ್ ಅನುಗ್ರಹ ಸಂದೇಶನ್ ಜಗದ್ಗುರು ಶ್ರೀಮನ್ಮಾಧ್ವಾಚಾರ್ಯ ಮೂಲ ಮಹಾಸಂಸ್ಥಾನ, ಶ್ರೀ ವಾಮನ ತೀರ್ಥ ಪರಂಪರೆ ಶ್ರೀ ಶೀರೂರು ಮಠ ಒಡಿಪುದ ಶ್ರೀ ಶ್ರೀ ವೇದವರ್ಧನ ತೀರ್ಥೆರ್ ಬೊಕ್ಕ ಶ್ರೀ ಮಹಾಲಕ್ಷ್ಮೀ ಕ್ಷೇತ್ರ ಶ್ರೀ ಧಾಮ ಮಣಿಲದ ಶ್ರೀ ಶ್ರೀ ಮೋಹನದಾಸ ಪರಮಹಂಸ ಸ್ವಾಮಿಲು ಕೊರಿಯೆರೆ ಉಲ್ಲೆರ್.

ಈ ಲೇಸ್ ದ ಅಧ್ಯಕ್ಷತೆನ್ ಬೊಲ್ತೇರ್ ವಿಧಾನಸಭಾ ಕ್ಷೇತ್ರದ ಶಾಸಕೆರ್ ಹರೀಶ್ ಪೂಂಜ ಒಯಿಸೊಂದೆರ್. ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ನಿಕಟಪೂರ್ವ ಅಧ್ಯಕ್ಷೆರ್ ದಯಾನಂದ ಕತ್ತಲ್ ಸಾರ್ ಪ್ರಧಾನ ಭಾಷಣ ಮಲ್ಪೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಬೊಲ್ತೇರ್ ವಿಧಾನಪರಿಷತ್ ಸದಸ್ಯೆರ್ ಕೆ.ಪ್ರತಾಪಸಿಂಹ ನಾಯಕ್, ಬೊಕ್ಕ ಕೆ. ಹರೀಶ್ ಕುಮಾರ್, ಬೊಲ್ತೇರ್ ವಕೀಲೆರ್ ಧನಂಜಯ ರಾವ್ ಬರಿಯೆರೆ ಉಲ್ಲೆರ್.

‌ಬೊಕ್ಕ ಶ್ರೀ ಶಾರದಾಂಬಾ ಮಹಿಳಾ ಹವ್ಯಾಸಿ ಯಕ್ಷಗಾನ ಕಲಾಸಂಘ (ರಿ.)ಬೋಳಂತೂರು ಮೊಕ್ಲೆರ್ದ್ ನರಕಾಸುರ ಮೋಕ್ಷ ಯಕ್ಷಗಾನ ಲೇಸ್ ನಡಪುಂಡು. ಆಯಿರ್ದ್ ಬೊಕ್ಕ ಭಂಡಾರ ಬರಿಯೆರೆ ಬೊಕ್ಕ ನೇಮೋಚ್ಚಯ ಆದ್, ಅನ್ನಸಂತರ್ಪಣೆ ನಡಪರೆ ಉಂಡು.

ಈ ಲೇಸ್ ಡ್ ನಿಕುಲು ಮಾತ ಪಾಲ್ ಪಡೆದ್, ದೈವ ದೇವೆರೆನ ಕೃಪೆಗ್ ಪಾತ್ರರಾವೋಡು ಪಂದ್ ಜೀರ್ಣೋದ್ಧಾರ ಸಮಿತಿದ ಗೌರವಾಧ್ಯಕ್ಷೆರ್ ಹರೀಶ್ ಪೂಂಜ(ಶಾಸಕೆರ್), ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಜನಾರ್ದನ ಗೌಡ ಕಜೆ, ವಿಶ್ವಸ್ಥ ಮಂಡಳಿ (ರಿ)ದ ವಿಶ್ವನಾಥ ರಾವ್ ಹಿರ್ತಡ್ಕ, ಪ್ರತಿಷ್ಠಾ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಮಧುಕರ ರಾವ್ ಮಚ್ಚಳೆ, ಬೊಕ್ಕ ಸರ್ವಸದಸ್ಯೆರ್ ಬೊಕ್ಕ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.

20 ಸೆಕೆಂಡ್‌ಡ್ 10 ಲಕ್ಷ ರೂ. ಬಿಲೆತ ಬಂಗಾರ್ ಕಂಡಿನ ಕಲ್ವೆದಿ

ಉತ್ತರ ಪ್ರದೇಶ: ಪೊಂಜೋವ್ ಒರ್ತಿ ಬಂಗಾರ್ ಅಂಗಡಿರ್ದ್ ನೆಕ್ಲೇಸ್ ಸೆಟ್‌ ಕಂಡ್ ದ್ ಬಲಿತಿನ ಘಟನೆ ಗೋರಖ್‌ಪುರಡ್ ನಡತ್ಂಡ್.


ಈ ಪೊಂಜೋವ್ ಬಲ್ದೇವ್ ಪ್ಲಾಜಾಡ್ ಇಪ್ಪುನ ಬೆಚು ಲಾಲ್ ಸರಾಫ್ ಪ್ರೈವೇಟ್ ಲಿಮಿಟೆಡ್‌ಗ್ ಬತ್ ದ್, ಅಲ್ಪ ಬಂಗಾರ್ ತೂವೊಂದು ಕುಲ್ಲುದ್ ಇತ್ತೆರ್. ಬೊಕ್ಕ ಸೀರೆಡ್ ಬಂಗಾರ್ ದ ಬಾಕ್ಸ್‌ ನ್ ಪಾಡೊಂದು, ಕುಡೊಂಜಿ ನೆಕ್ಲೇಸ್‌ ದ ಬಗೆ ಕೇನ್ದ್, ಬೊಕ್ಕ 20 ಸೆಕೆಂಡ್‌ಲ ಕಮ್ಮಿ ಪೊರ್ತುಡು 10 ಲಕ್ಷ ರೂ. ಬಿಲೆತ ಬಂಗಾರ್ ಕಂಡ್ ದ್ ಬಲಿತಿನೆತ್ತ ವೀಡಿಯೋ ಸಿಸಿಟಿವಿಡ್ ಸೆರೆ ಆತ್ಂಡ್. ಈ ಪೊಂಜೋವ್ ಸನ್‌ಗ್ಲಾಸ್‌, ಮಾಸ್ಕ್‌ ಪಾಡಿರ್ನೆದಾವೆರ ಮೋನೆನ್ ಗುರ್ತ ಮಲ್ಪೆರೆ ಕಷ್ಟ ಆತ್ಂಡ್.

ಎಲ್ಲೆ ಸುಪ್ರೀಂ ಕೋರ್ಟ್ ಡ್ ಬೆಳಗಾವಿ ಗಡಿ ವಿವಾದ ವಿಚಾರಣೆ

ಬೆಂಗ್ಲೂರ್: ಬೆಳಗಾವಿ ಗಡಿ ವಿವಾದಗ್ ಸಂಬಂಧ ಪಟ್ಟಿನಂಚನೆ ಸಂದಾಯಿನ ಅರ್ಜಿದ ವಿಚಾರಣೆ ಎಲ್ಲೆ ಸುಪ್ರೀಂ ಕೋರ್ಟ್ ಡ್ ನಡಪರೆ ಉಂಡು.


ಈ ಬಗೆಟ್ ಬೆಳಗಾವಿಡ್ ಬಿಗಿ ಭದ್ರತಾ ವ್ಯವಸ್ಥೆ ಮಲ್ಪೆರೆ ಆತ್ಂಡ್. ಎಡಿಜಿಪಿ ಅಲೋಕ್ ಕುಮಾರ್ ಈ ಬಗೆಟ್ ಮಹಾರಾಷ್ಟ್ರದ ಗಡಿ ಜಿಲ್ಲೆದ ಪೊಲೀಸ್ ಅಧಿಕಾರಿಲೆನೊಟ್ಟಿಗೆ ಕಾನೂನು ಬೊಕ್ಕ ಸುವ್ಯವಸ್ಥೆ ಕಾಪಾಡುವ ದಿಟ್ಟಿಡ್ ನಿಕಟ ಸಹಕಾರದ ಬಗೆಟ್ ಸಮಾಲೋಚನೆ ನಡಪಾದೆರ್. ಅಂಚನೆ ಡೆಲ್ಲಿಡ್ ಇಪ್ಪುನ ಮುಖ್ಯಮಂತ್ರಿ ಬಸವರಾಜ್ ಬೊಮ್ಮಾಯಿ ಪೆರಿಯ ವಕೀಲೆರ್ ಮುಕುಲ್ ರೋಹ್ಟಗಿ ಮೆರೆನೊಟ್ಟಿಗೆ ಪಾತೆರ್ದೆರ್.

ರಡ್ಡ್ ಕಾರ್ ಇಜ್ಜಂದಿನ ಆನನ್ ಮದಿಮೆ ಆಯಿನ ಪೊಣ್ಣು!!

ರಡ್ಡ್ ಕಾರ್ ಇಜ್ಜಂದಿನ ಜವನೆ ಒರಿಯನ್ ಪೊಣ್ಣು ಒರ್ತಿ ಮದಿಮೆ ಆಯಿನ ಸಂಗತಿ ಹಾಸನ ಜಿಲ್ಲೆ ಹೊಳೆನರಸೀಪುರ ತಾಲೂಕ್‌ದ ಗವಿ ಸೋಮನಹಳ್ಳಿದ ದೇವಲ್ಯಡ್ ನಡತ್ಂಡ್.

ಆನಗ್ ಮಲ್ಲಾದಿಗೆ ಇಜ್ಜಿಡಲ ಆಯನ್ ಮದಿಮೆ ಆಯಿನ ಪೊಣ್ಣು ಮಾತೆರ್ನಲ ಮೆಚ್ಚುಗೆ ಪಡೆದೆರ್. ಗವಿ ಸೋಮನಹಳ್ಳಿದ ಕಾಳಮ್ಮ ಬೊಕ್ಕ ಗಂಗಾಧರಾಚಾರ್ ಮೆರೆನ ಮಗೆ ಜಿ.ಜಿ.ಸೋಮಾಚಾರ್ ಎಲ್ಯ ಅಂಗಡಿ ದೀದ್ ಜೀವನ ಮಲ್ತೊಂದಿತ್ತೆರ್.

ಶಾಂತಿಗ್ರಾಮ ಹೋಬಳಿದ ಶಶಿಕಲಾ ಬೊಕ್ಕ ನರಸಿಂಹ ಮೆರೆನ ಮಗಲ್ ವೀಣಾ, ಸೋಮಾಚಾರ್ ಮೆರೆನ್ ಮದಿಮೆ ಆತೆರ್. ರಡ್ಡ್ ಗ್ರಾಮದ ಪೆರಿಯೆರ್ ಈ ಮದಿಮೆದ ಬಗೆಟ್ಟ್ ಆನ್ -ಪೊಣ್ಣನ ಒಪ್ಪಿಗೆ ಪಡೆಯೊಂದು ಮದಿಮೆ ಮಲ್ದೆರ್. ಮೊಕುಲೆನ ನನದ ಜೀವನಗಾದ್ ಬೇಲೆ ಒಂಜೆನ್ ಕೊರೊಡು ಪಂದ್ ಗ್ರಾಮಸ್ಥೆರ್ ಶಾಸಕೆರ್ ಎಚ್.ಡಿ.ರೇವಣ್ಣ ಮೆರೆಗ್ ಬಿನ್ನಾಪು ಮಲ್ತ್‌ದೆರ್.

ತೊರ್ತಲ್‌ಡ್ ನಡತ್ಂಡ್ ತುಳು ಉಚ್ಚಯ ಲೇಸ್

ಅಪ್ಪೆ ಬಾಸೆ ಪೊರ್ಂಬಾಟ ಕೂಟ, ತುಳುನಾಡ್ ಮುತಾಲಿಕೆಡ್ ತೊರ್ತಲ್‌ಡ್ ತುಳು ಉಚ್ಚಯ ಲೇಸ್ ಐತಾರದ (ನ.27) ಸುರತ್ಕಲ್‌ದ ಕರ್ನಾಟಕ ಸೇವಾ ವೃಂದ ಸಭಾಂಗಣಡ್ ನಡತ್ಂಡ್.

 

ತುಳು ಬಾಸೆ ಸಂಸ್ಕೃತಿ ಸಂಭ್ರಮದ ಈ ಲೇಸ್‌ನ್ ಕುಲಾಯಿ ಗುತ್ತುದ ಗುತ್ತಿನಾರ್ ಶಂಕರ ಪಟ್ಲೇರ್ ಉದಿಪನ ಮಲ್ತೆರ್. ಅಂಚೆನೆ ಶ್ರೀ ಕ್ಷೇತ್ರ ಕೇಮಾರುದ ಈಶ ವಿಠಲದಾಸ ಸ್ವಾಮೀಜಿ ಎಡ್ಡೆ ಮದಿಪು ಮದಿತೆರ್.

 

ಉಚ್ಚಯದ ಮದಿಪುದ ಮಣೆಟ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ನಿಕಟಪೂರ್ವ ಗುರ್ಕಾರ್ಲು ದಯಾನಂದ ಜಿ. ಕತ್ತಲ್‌ಸಾರ್ ಮೇರ್ ತುಳು ಕರ್ನಾಟಕ ರಾಜ್ಯದ ಅಧಿಕೃತ ಭಾಷೆ, ದೈವಾರಾಧಕೆರಾಯಿನ ತಮ್ಮಣ್ಣ ಶೆಟ್ಟಿ ಮೇರ್, ತುಳುನಾಡ ದೈವಾರಾಧನೆ, ಹಿರಿಯ ತುಳು ರಂಗಕರ್ಮಿ ವಿಜಯ್ ಕುಮಾರ್ ಕೊಡಿಯಾಲ್ ಬೈಲ್ ತುಳು ರಂಗ ಭೂಮಿ, ಉಪನ್ಯಾಸಕೆರಾಯಿನ ಅರ್ಪಿತ ಶೆಟ್ಟಿ ತುಳುವೆರೆ ಬದ್‌ಕ್ ಅಂಚೆನೆ ವಿಚಾರವಾದಿ ಶ್ರೀಕಾಂತ್ ಶೆಟ್ಟಿ ತುಳುನಾಡ ತನ್ನಾಲ್ಮೆದ ಬಗೆಟ್ ಮದಿಪು ಕೊರಿಯೆರ್.

 

ಮಲ್ಲ ಬಿನ್ನೆರಾದ್ ಕುಡ್ಲ ಮನಪಾ ಪದುಕೆರಾಯಿನ ವರುಣ್ ಚೌಟ, ಕುಮಾರಿ ಶ್ವೇತಾ ಅಂಚೆನೆ ಸ್ವರ್ಣ ಕುಂಭ ವಿವಿಧೋದ್ದೇಶ ಸಹಕಾರಿ ಸಂಘದ ನಾಗೇಶ್ ಕುಲಾಲ್, ಸಿನೆಮಾ ನಟಿ ಶೈಲಶ್ರೀ ಮುಲ್ಕಿ ಪಾಲ್ ಪಡೆದ್ ಮದಿಪುನು ಕೊರಿಯೆರ್. ಅಯಿತೊಟ್ಟುಗು ತುಳು ಬದ್‌ಕ್‌ನ್ ತೋಜಾವುನ ನಲಿಕೆಲು ಉಚ್ಚಯದ ಮಿನದನ‌ನ್ ರಂಗ್ ಮಲ್ತ್ಂಡ್.

ಗುರ್ತ ಇಜ್ಜಂದಿನ ಪೊಣ್ಣು, ಪೊಂಜೋವ್ ನ್ 14 ಸೆಕೆಂಡ್ ರ್ದ್ ಹೆಚ್ಚ ಪೊರ್ತು ಓಂಗುದು ತೂಂಡ ಅರೆಸ್ಟ್ ಮಲ್ಪೊಲಿ..!

ಡೆಲ್ಲಿ: ಗುರ್ತ ಇಜ್ಜಂದಿನ ಒವ್ವೇ ಪೊಣ್ಣನ್ ಅತ್ತ್ಂಡ ಪೊಂಜೋವ್ ನ್ 14 ಸೆಕೆಂಡ್‌ ರ್ದ್ ಹೆಚ್ಚ ಪೊರ್ತು ಓಂಗುದ್ ತೂಂಡ, ಬೊರ್ಚಂದಿನ ರೀತಿಡ್ ಸನ್ನೆ ಮಲ್ತ್ಂಡ, ಪದ್ಯ ಪಂಡ ಐಪಿಸಿ ಸೆಕ್ಷನ್‌ದಡಿಟ್ ಅರೆಸ್ಟ್ ಮಲ್ಪೊಲಿ ಪಂದ್ ನ್ಯಾಷನಲ್ ಕ್ರೈಂ ಇನ್ವೆಷ್ಟಿಗೇಶನ್ ಬ್ಯೂರೋ (NCIB) ಪುದರ್ ದ ಸ್ವಯಂ ಸೇವಾ ಸಂಘಟನೆ ಪಂತ್ಂಡ್.

ಈ ಸ್ವಯಂ ಸೇವಾ ಸಂಘಟನೆದ ಲೋಗೋ ಪೊಲೀಸ್ ಇಲಾಖೆದ ಲೋಗೋದಲೆಕ್ಕನೇ ಉಂಡು. ಸಂಸ್ಥೆದ ಈ ಟ್ವೀಟ್ ಸಾಮಾಜಿಕ ಜಾಲತಾಣಡ್ ಭಾರೀ ಚರ್ಚೆ ಆವೊಂದು ಉಂಡು. ಅಂಚನೆ ಆಣ್ ಜೋವ್ ನಕ್ಲೆನ ಈ ವರ್ತನೆ ಭಾರತೀಯ ದಂಡ ಸಂಹಿತೆ ಸೆಕ್ಷನ್ 294 (A) ಬೊಕ್ಕ (B) ಪ್ರಕಾರ ಶಿಕ್ಷಾರ್ಹ ಅಪರಾಧ ಆಪುಂಡು. ಬರೆದ್ ಮೆಸೇಜ್ ಕಡಪಾವುನ ಅಪರಾಧಗ್ ಗರಿಷ್ಠ 3 ತಿಂಗೊಲ್ದ ಶಿಕ್ಷೆ ಕೊರೊಲಿ. ಆಯಿರ್ದ್ದಾವೆರ ಈ ಸೆಕ್ಷನ್‌ದಡಿಟ್ ಕೇಸ್ ದಾಖಲ್ ಮಲ್ಪೊಲಿ ಪಂದ್ ಎನ್‌ಜಿಒ ತೆರಿಪಾದ್ಂಡ್.

ಗಿನ್ನೆಸ್ ವಿಶ್ವದಾಖಲೆ ಬರೆಯಿನ ನರೇಂದ್ರ ಮೋದಿ ಮೈದಾನ

ಅಹ್ಮದಾಬಾದ್‌ದ ನರೇಂದ್ರ ಮೋದಿ ಮೈದಾನ ಗಿನ್ನೆಸ್ ವಿಶ್ವದಾಖಲೆ ಮಲ್ತ್‌ದ್ಂಡ್. ಈ ವರ್ಷ ರಾಜಸ್ಥಾನ್ ರಾಯಲ್ಸ್ ಬೊಕ್ಕ ಗುಜರಾತ್ ಟೈಟಾನ್ಸ್ ನಡುಟ್ಟ್ ಐಪಿಎಲ್ ಫೈನಲ್ ನಡತ್‌ದಿತ್ತ್ಂಡ್.

ಅಲ್ಪ 1,01,556 ಜನಕುಲು ಬತ್ತ್‌ದ್ ಫೈನಲ್ ಪಂತೊನು ತೂದಿತ್ತೆರ್. ಇದ ಮುಟ್ಟ ಟಿ20 ಪಂತೊಡು ಈ ಸಂಖ್ಯೆಡ್ ಜನ ಸೇರ್‌ದಿಜ್ಜಾಂಡ್. ಅಂಚಾದ್ ಗಿನ್ನೆಸ್ ಸಂಸ್ಥೆ ವಿಶ್ವದಾಖಲೆದ ಪ್ರಮಾಣಪತ್ರ ಕೊರ್ತುಂಡು.

ಕಮ್ಮಿ ಮಾರ್ಕ್ ಬತ್ತ್ಂಡ್ ಪಂದ್ ಕಿರಿಕಿರಿಗ್ ಪೋಡಿದ್ ಆತ್ಮಹತ್ಯೆ ಮಲ್ತಿನ ಕಲ್ಪಾರ್ಥಿ

ಹೆಬ್ರಿ: ಪ್ರಥಮ ಪಿಯುಸಿ ಕಲ್ತೊಂದಿತ್ತಿನ ಪೊಣ್ಣು ತನ್ನ ಇಲ್ಲಡ್ ಬಲ್ಲ್ ದೆತೊಂದು ಆತ್ಮಹತ್ಯೆ ಮಲ್ತಿನ ಘಟನೆ ಹೆಬ್ರಿದ ಪೆರ್ಡೂರ್‌ಡ್ ನಡತ್ಂಡ್.

ತೃಪ್ತಿ(17) ಆತ್ಮಹತ್ಯೆ ಮಲ್ತಿನ ಪೊಣ್ಣು. ವಿಜ್ಞಾನ ವಿಭಾಗಡ್ ಕಲ್ತೊಂದಿತ್ತಿನ ತೃಪ್ತಿ ಇಂಚಿಪ್ಪಗ್ ನಡತಿನ ಪರೀಕ್ಷೆಡ್ ಕಮ್ಮಿ ಮಾರ್ಕ್ ಪಡೆದ್ ಇತ್ತೆರ್. ಈ ಬಗೆಟ್ ಶಾಲೆಡ್ ಕಿರಿಕಿರಿ ಮಲ್ದಿತ್ತೆರ್ ಪನ್ಪಿನ ಆರೋಪ ಬೈದ್ಂಡ್. ಈ ನಿಲೆಟ್ಟ್ ಪೊಣ್ಣು ಆತ್ಮಹತ್ಯೆ ಮಲ್ದೆರ್ ಪಂದ್ ತೆರಿದ್ ಬೈದ್ಂಡ್. ಹಿರಿಯಡ್ಕ ಪೊಲೀಸ್ ಠಾಣೆಡ್ ಪ್ರಕರಣ ದಾಖಲ್ ಆತ್ಂಡ್.