Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಜ.8 : ಪುನರೂರು ಪ್ರತಿಷ್ಠಾನ (ರಿ.) ದ ಮುತಾಲಿಕೆಡ್ ಪುನರೂರು ಸಂಭ್ರಮ

ಪುನರೂರು ಪ್ರತಿಷ್ಠಾನ (ರಿ.) ದ ವಾರ್ಷಿಕ ಉಚ್ಚಯ “ಪುನರೂರು ಸಂಭ್ರಮ ” ಜ.8 ಐತಾರ ಬಯ್ಯಗ್ 4 ಗಂಟೆಗ್ ಪುನರೂರು ಶ್ರೀ ವಿಶ್ವನಾಥ ದೇವಲ್ಯದ ಚಾವಡಿಡ್ ನಡಪರೆ ಉಂಡು.

ಲೇಸ್ ದ ಅಧ್ಯಕ್ಷತೆನ್ ಪುನರೂರು ಪ್ರತಿಷ್ಠಾನ (ರಿ.) ದ ಗೌರವಾಧ್ಯಕ್ಷೆರ್ ಧರ್ಮದರ್ಶಿ ಡಾ| ಹರಿಕೃಷ್ಣ ಪುನರೂರು ಒಯಿಸೊನ್ವೆರ್. ಕುಡ್ಲ ಸ್ವಸ್ತಿಕ ನ್ಯಾಷನಲ್ ಶಾಲೆದ ಅಧ್ಯಕ್ಷೆರ್ ಡಾ| ರಾಘವೇಂದ್ರ ಹೊಳ್ಳ ಈ ಲೇಸ್ ನ್ ಉದಿಪನ ಮಲ್ಪೆರೆ ಉಲ್ಲೆರ್. ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಅನುವಂಶಿಕ ಅರ್ಚಕೆರ್ ವೇದಮೂರ್ತಿ ಲಕ್ಷ್ಮೀನಾರಾಯಣ ಅಸ್ರಣ್ಣ ಶುಭಸಂಶನೆ ಮಲ್ಪರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಕುಡ್ಲದ ದಕ್ಷಿಣ ಕನ್ನಡ ಸಹಕಾರಿ ಹಾಲು ಉತ್ಪಾದಕರ ಒಕ್ಕೂಟ ನಿಯಮಿತದ ಅಧ್ಯಕ್ಷೆರ್ ಕೆ.ಪಿ ಸುಚರಿತ ಶೆಟ್ಟಿ ಬೊಕ್ಕ ಧಾರ್ಮಿಕ ಪರಿಷತ್ ದ ಸದಸ್ಯೆರ್ ಕೊಡೆತ್ತೂರು ಭುವನಾಭಿರಾಮ ಉಡುಪ ಮೊಕುಲು ಬರಿಯೆರೆ ಉಲ್ಲೆರ್.ಗೌರವ ಉಪಸ್ಥಿತಿಡ್ ಪುನರೂರು ಶ್ರೀ ವಿಶ್ವನಾಥ ದೇವಲ್ಯದ ಆಡಳಿತ ಮೊಕ್ತೇಸೆರ್ ಪಟೇಲ್ ವಾಸುದೇವ ರಾವ್ ಬೊಕ್ಕ ಪುನರೂರು ಪ್ರತಿಷ್ಠಾನ (ರಿ.) ದ ಗೌರವಾಧ್ಯಕ್ಷೆರ್ ಎಚ್.ಕೆ ಉಷಾರಾಣಿ ಉಲ್ಲೆರ್. ಈ ಲೇಸ್ ಪುನರೂರು ಪ್ರತಿಷ್ಠಾನ (ರಿ.) ಪ್ರಧಾನ ಕಾರ್ಯದರ್ಶಿ ಶ್ರೇಯಾ ಪುನರೂರು, ಉಪಾಧ್ಯೆಕ್ಷೆರ್ ರಾಧಿಕಾ ಸುಧೀರ್ ಬೊಕ್ಕ ಮಲ್ಲಿಕಾ ಅರವಿಂದ್, ಕೋಶಾಧಿಕಾರಿ ಚಂದ್ರಿಕಾ ಸುಧೀರ್ ಬೊಕ್ಕ ಮುಲ್ಕಿ ಜನವಿಕಾಸ ಸಮಿತಿದ ಅಧ್ಯಕ್ಷೆರ್ ದಾಮೋದರ್ ಶೆಟ್ಟಿ ಕೊಡೆತ್ತೂರು ಮೊಕ್ಲೆನ ಪಾಲ್ವಿಕೆಡ್ ನಡಪುಂಡು ಪಂದ್ ಪುನರೂರು ಪ್ರತಿಷ್ಠಾನ (ರಿ.)ದ ಅಧ್ಯಕ್ಷೆರ್ ದೇವಪ್ರಸಾದ್ ಪುನರೂರು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಡಿ.25: ಕೊಡೆತ್ತೂರು ಶ್ರೀ ಅರಸು ಕುಂಜರಾಯ ದೈವೊಲ್ಯಡ್ ಚೌತಿ ಪರ್ಬ, ಗೆಂಡ ಸೇವೆ

ಕಿನ್ನಿಗೋಳಿ : ಕೊಡೆತ್ತೂರು ಶ್ರೀ ಅರಸು ಕುಂಜರಾಯ ದೈವೊಲ್ಯಡ್ ಡಿ.25 ಐತಾರದಾನಿ ಚೌತಿ ಪರ್ಬ ಬೊಕ್ಕ ಸಾರ್ವಜನಿಕ ಗೆಂಡ ಸೇವೆ ನಡಪರೆ ಉಂಡು.

ಶ್ರೀ ಅರಸುಕುಂಜರಾಯ ದೈವೊಲೆನ ಭಂಡಾರ, ಭಂಡಾರದ ಇಲ್ಲಲ್ ರ್ದ್ ಬರಿಯೆರೆ ಉಂಡು. ಬೊಕ್ಕ ಚೌತಿ ಪರ್ಬ ಬೊಕ್ಕ ಪಾಲಕಿ ಸೇವೆ, ಸುಮಂಗಲಿಯೆರೆನ ಎಡೆಪೂಜೆ, ಪ್ರಸಾದ ಕೊರಿಯೆರೆ. ಬೊಕ್ಕ ಅನ್ನಸಂತರ್ಪಣೆ ಆದ್ ಬಲೀಂದ್ರ ಪೂಜೆ, ಗೆಂಡ ಸೇವೆ ಆಯಿ ಬೊಕ್ಕ ಭಂಡಾರ ಪಿದಾಡುಂಡು. ಈ ಲೇಸ್ ಗ್ ನಿಕುಲು ಮಾತ ಬತ್ ದ್, ಶ್ರೀಮುಡಿ ಗಂಧ-ಪ್ರಸಾದ ದೆತೊಂದು ಶ್ರೀ ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಕೊಡೆತ್ತೂರು ಶ್ರೀ ಅರಸು ಕುಂಜರಾಯ ದೈವೊಲ್ಯದ ಅಧ್ಯಕ್ಷೆರ್ ಬೊಕ್ಕ ಆಡಳಿತ ಮಂಡಳಿದ ಸರ್ವಸದಸ್ಯೆರ್, ಬೊಂಬೈ ಸಮಿತಿ ಬೊಕ್ಕ ಊರುದ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಸುರತ್ಕಲ್ ಗೋವಿಂದ ದಾಸ ಕಾಲೇಜ್ ಡ್ ಗುಲಾಬಿ ಆಂದೋಲನ ಅಭಿಯಾನ

ಸುರತ್ಕಲ್ : ಗೋವಿಂದ ದಾಸ ಕಾಲೇಜ್ ದ ಸುರತ್ಕಲ್ ಬೊಕ್ಕ ರಾಷ್ಟ್ರೀಯ ಸೇವಾ ಯೋಜನೆ, ದ.ಕ. ಜಿಲ್ಲಾಡಳಿತ & ಜಿಲ್ಲಾ ಪಂಚಾಯತ್, ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಇಲಾಖೆ, ತಾಲೂಕ್ ಆರೋಗ್ಯಾಧಿಕಾರಿ ಕಚೇರಿ ಕುಡ್ಲ ಬೊಕ್ಕ ಜಿಲ್ಲಾ ತಂಬಾಕು ನಿಯಂತ್ರಣ ಕೋಶ ನೆತ್ತ ಒಟ್ಟುಸೇರಿಗೆಡ್ ತಂಬಾಕು ಚಟ ನಿರ್ಮೂಲ ಮಲ್ಪುನ “ಗುಲಾಬಿ ಆಂದೋಲನ ಅಭಿಯಾನ” ಡಿ.20 ಅಂಗಾರೆದಾನಿ ಗೋವಿಂದ ದಾಸ ಕಾಲೇಜ್ ಸುರತ್ಕಲ್ ಡ್ ನಡತ್ಂಡ್.


ಈ ಲೇಸ್ ದ ಮಲ್ಲ ಬಿನ್ನೆರಾಯಿನ ಗೋವಿಂದ ದಾಸ ಕಾಲೇಜ್ ದ ಆಡಳಿತಾತ್ಮಕ ನಿರ್ದೇಶಕೆರ್ ಪ್ರೊ.ರಮೇಶ್ ಕುಳಾಯಿ ಲೇಸ್ ಗ್ ಎಡ್ಡೆಪ್ಪು ಬಯಕಿಯೆರ್. ತಾಲೂಕ್ ಆರೋಗ್ಯಾಧಿಕಾರಿ ಶ್ರೀ. ಪುಂಡಲೀಕ ಲಕಾಟಿ ಮೇರ್ ಪಾತೆರ್ದ್, ಆರೋಗ್ಯಪೂರ್ಣ ಜವನೆರ್ದ್ ಸದೃಢ ಭಾರತದ ನಿರ್ಮಾಣ ಸಾಧ್ಯ, ಅಯಿಕ್ಕಾದ್ ನಮ್ಮ ಭಾರತ ವ್ಯಸನಮುಕ್ತ ಆ ವೊಡು. ಈ ನಿಟ್ಟ್ ಡ್ ಶಾಲಾ ಕಾಲೇಜ್ ಪರಿಸರಡ್ ತಂಬಾಕು ಕಡ್ಡಾಯವಾದ್ ನಿಷೇಧ ಮಲ್ಪುನ ಅನಿವಾರ್ಯ ಆತ್ಂಡ್. ಈ ಬಗೆಟ್ ಕಲ್ಪಾರ್ಥಿಲೇ ಜನ ಜಾಗೃತಿ ಪುಟ್ಟಾವೊಡು ಪಂದ್ ಪಂಡೆರ್.

ಈ ಪೊರ್ತುಡು ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಅಧಿಕಾರಿ ಡಾ. ಕಿಶೋರ್ ಕುಮಾರ್, ಜಿಲ್ಲಾ ಸರ್ವೇಕ್ಷಣಾ ಅಧಿಕಾರಿ ಡಾ. ಜಗದೀಶ್, ತಾಲೂಕ್ ಆರೋಗ್ಯ ಅಧಿಕಾರಿ ಡಾ. ಸುಜಯ್ ಭಂಡಾರಿ, ಬೊಕ್ಕ ಪ್ರಾಂಶುಪಾಲೆರ್ ಪ್ರೊ. ಕೃಷ್ಣಮೂರ್ತಿ, ಉಪ ಪ್ರಾಂಶುಪಾಲೆರ್ ಪ್ರೊ. ರಮೇಶ್ ಭಟ್ ಎಸ್.ಜಿ, ರಾ‌.ಸೇ ಯೋಜನಾಧಿಕಾರಿ ಅಕ್ಷತಾ ವಿ. ಇತ್ತೆರ್. ಎನ್.ಎಸ್.ಎಸ್. ಸ್ವಯಂ ಸೇವಕೆರ್ ಸುಮಾರ್ 40 ರ್ದ್ ಹೆಚ್ಚ ಅಂಗಡಿಲೆಗ್ ಭೇಟಿ ಕೊರ್ದು ತಂಬಾಕುರ್ದ್ ಆಪುನ ದುಷ್ಪರಿಣಾಮಲೆನ್ ತೆರಿಪಾದ್, ಅಕ್ಲೆಗ್ ಗುಲಾಬಿ ಪೂ ಕೊರ್ದು ಮನವೊಲಿಸುನ ಲೇಸ್ ಯಶಸ್ವಿಯಾದ್ ನಡತ್ಂಡ್. ಹಿರಿಯ ಆರೋಗ್ಯ ನಿರೀಕ್ಷಣಾಧಿಕಾರಿ, ತಾಲೂಕ್ ಆರೋಗ್ಯಾಧಿಕಾರಿ ಕಚೇರಿದ ಸಿ. ಆರ್. ಪ್ರದೀಪ್ ಕುಮಾರ್ ಮೇರ್ ಎದ್ಕೊನಿಯೆರ್. ಎನ್.ಎಸ್.ಎಸ್. ಯೋಜನಾಧಿಕಾರಿ ಅಕ್ಷತಾ ವಿ. ಸೊಲ್ಮೆ ಸಂದಾಯೆರ್. NSS ಕಲ್ಪಾರ್ಥಿ ಆಯಿನ ಮಾನಸ ಲೇಸ್ ಸುಧಾರಿಕೆ ಮಲ್ತೆರ್.

ಶ್ರೀರಾಜ ಬೆಳ್ಚಪ್ಪಾಡ, ಪ್ರೇಮಲತಾ ದಂಪತಿಲೆನ ಮದಿಮೆದ ಬೊಳ್ಳಿ ಪರ್ಬದ ಗೌಜಿ

ಸರ್ವೆರೆಡ ಸರಳವಾದ್ ಇತ್ ದ್, ಬದ್ಕ್ ದ ಕಷ್ಟ ಸುಖನ್ ತೆರಿದ್ ಬತ್ತಿನಕ್ಲೆಗ್ ಸಾಂತ್ವನ ಪಂಡಿನ ಶ್ರೀರಾಜ ಬೆಳ್ಚಪ್ಪಾಡ ಬೊಕ್ಕ ಪ್ರೇಮಲತಾ ದಂಪತಿಲು ಮದಿಮೆ ಆಯಿನ 25 ನೇ ವರ್ಷದ ಬೊಳ್ಳಿ ಪರ್ಬ ಗೌಜಿಡ್ ಉಲ್ಲೆರ್.

ಈ ಬೊಳ್ಳಿ ಪರ್ಬದ ಗೌಜಿನ್ ಮೊಕುಲು ಮೊಕುಲು ಈ ಗೌಜಿನ್ ಒಂಜಿ ಬಡಪತ್ತ್ ಕುಟುಂಬಗ್ ಆಹಾರದ ಕಿಟ್ ಕೊರ್ಪುನ ಮುಖೇನ ಆಚರಣೆ ಮಲ್ತೆರ್. ಆ ದೇವೆರ್ ಮೊಕುಲೆಗ್ ಬೊಕ್ಕ ಮೊಕ್ಲೆನ ಕುಟುಂಬಗ್ ಆಯುರಾರೋಗ್ಯ ಭಾಗ್ಯನ್ ಕೊರಡ್ ಪಂದ್ ಶ್ರೀ ರಾಜ ಬೆಳ್ಚಪ್ಪಾಡ ಸೇವಾ ಟ್ರಸ್ಟ್ ಉದ್ಯಾವರ ಮಾಡ ಮಂಜೇಶ್ವರ ಮೊಕುಲು ಕೇನೊಂದೆರ್.

ಅಳದಂಗಡಿ ಪಟ್ಟದ ಕಂಬುಲಡ್ ಪಾಲ್ ಪಡೆಯಿನ ತಾಟೆ

ಅಳದಂಗಡಿಡ್ ಪಟ್ಟದ ಕಂಬುಲ ಅಂಗಾರೆ ನಡತ್ಂಡ್.

ಈ ಕಂಬುಲಡ್ ತುಳುನಾಡ್ ದ ಕಂಬುಲ ಕ್ಷೇತ್ರಡ್ ಇಸೇಸ ಸಾಧನೆ ಬೊಕ್ಕ ಮಸ್ತ್ ಪುದರ್ ಗಲಸೊಂದು ಇಪ್ಪುನ, ಅತ್ತಂದೆ ಮಸ್ತ್ ಅಭಿಮಾನಿಲೆನ್ ಪಡೆಯಿನ ತಾಟೆ ಎರು ಪಾಲ್ ಪಡೆದ್ ಮಸ್ತ್ ಜನ ಅಭಿಮಾನಿಲೆನ ಮೆಚ್ಚಿಗೆನ್ ಪಡೆದ್ಂಡ್.

ಸಮಾಜಗ್ ಮಾದರಿ ಆಯಿನ ಆಶಿಕ್ ಗ್ರೂಪ್ ದ ಮುಖ್ಯಸ್ಥೆರ್ ಎಮ್. ಇರ್ಫಾನ್

ಗೆಲುವು ನರಮಾನಿಗ್ ಸಂತೋಷನ್ ಕನತ್ ಕೊರ್ಪುಂಡು. ಆಂಡ ಸೋಲ್ ಜೀವನಗ್ ಪಾಠ ಕಲ್ಪಾವುಂಡು. ಅವ್ವೇ ಸೋಲುನು ದೊಂಕುದು ಉಂತುದು ಪರಿಶ್ರಮರ್ದ್ ದುಂಬು ಪೋಂಡ ಮಾತ್ರ ಯಶಸ್ಸ್ ನ್ ತೂಪ ಪನ್ಪುನೆಕ್ ಆಶಿಕ್ ಗ್ರೂಪ್ ದ ಮುಖ್ಯಸ್ಥೆರ್, ಕೊಡುಗೈ ದಾನಿ ಎಮ್ ಇರ್ಫಾನ್ ಸಾಕ್ಷಿ.

ನರಮಾನಿ ಆದ್ ಪುಟ್ಟಿ ಬೊಕ್ಕ ಜೀವನ ಪನ್ಪುನ ತಾದಿಡ್ ಸೋಪುನ ಗೆಂದುನ ಸಹಜ. ಗೆಲ್ಮೆಗ್ ಉಬ್ಬೆರಂದೆ ಸೋಲುಗು ಕುಗ್ಗಂದೆ ರಡ್ಡೆನ್ ಲ ಸಮನಾದ್ ಸ್ವೀಕಾರ ಮಲ್ಪುನ ಮನಸ್ಥಿತಿ ನಮ್ಮ ಆದಿತ್ತ್ಂಡ, ಯಶಸ್ವಿ ಕಂಡಿತವಾದ್ ನಮನ್ ನಡೊಂದು ಬರ್ಪುಂಡು ಪನ್ಪುನೆಟ್ ಒವ್ವೇ ಸಂದೇಹಲ ಇಜ್ಜಿ. ಮಾತ ದೇವೆರೆನ ಇಚ್ಚೆದಂಚನೆ ನಡಪುಂಡು. ಜೀವನಡ್ ತಾನ್ ಲ ಸುಂದರ ಬದ್ ಕ್ ನ್ ಕಟ್ಟೊನೊಡು ಪಂದ್ ಕನ ಕಟ್ಟೊಂದು ಪೋನಗ ಕಣ್ಣೆದುರುಗ್ ಪರಿಶ್ರಮ ಇಜ್ಜಂದೆ ಸಂಪಾದನೆಗ್ ಅವಕಾಶಲೇ ತಾದಿ ತೂಪಾವ.

ಡಿ. 25 : ಮೂಲ್ಕಿಡ್ ಯುವವಾಹಿನಿ 35ನೇ ವಾರ್ಷಿಕ ಸಮಾವೇಶ

ಮುಲ್ಕಿ : 2022 ನೇ ದಾಲ್ ದ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆದಿನ ಸಮಾಜ ಸೇವಾ ಸಂಘಟನೆ “ಯುವವಾಹಿನಿ (ರಿ)”ದ 35 ನೇ ವಾರ್ಷಿಕ ಸಮಾವೇಶ ಬೊಕ್ಕ ಪೊಸ ಪದುಕೆರ್ನ ಪದಗ್ರಹಣ ಲೇಸ್ ಡಿ.25 ಐತಾರ ಮುಲ್ಕಿ ವಿಜಯಾ ಕಾಲೇಜಿದ ಅರ್ಪಣಾ ಸಭಾಂಗಣದ ಚಾವಡಿಡ್ ಯುವವಾಹಿನಿ ಮುಲ್ಕಿ ಘಟಕದ ಮುತಾಲಿಕೆಡ್ ನಡಪರೆ ಉಂಡು ಪಂದ್ ಯುವವಾಹಿನಿ ಕೇಂದ್ರ ಸಮಿತಿದ ಅಧ್ಯಕ್ಷೆರ್ ಉದಯ ಅಮೀನ್ ಮಟ್ಟು ತೆರಿಪಾಯೆರ್.

ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಚಾವಡಿಡ್ ಅಂಗಾರೆ ನಡತಿನ ಸುದ್ದಿಗೋಷ್ಠಿಡ್ ಆರ್ ಈ ವಿಷಯದ ಪೊಲಬು ಮಲ್ತೆರ್. ಯುವವಾಹಿನಿ ಸಮಾವೇಶೊನು ಕಾಂಡೆ 9.30ಕ್ಕ್ ಭಾರತ್ ಬ್ಯಾಂಕ್‌ದ ನಿರ್ದೇಶಕೆರ್ ಸೂರ್ಯಕಾಂತ್ ಜೆ. ಸುವರ್ಣ ಉದಿಪನ ಮಲ್ಪುವೆರ್.ಯುವವಾಹಿನಿದ ಮುಖವಾಣಿ ” ಸಿಂಚನ” ವಿಶೇಷ ಸಂಚಿನ್ ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವೆರ್ ವಿ. ಸುನಿಲ್‌ಕುಮಾರ್ ಬುಡುಗಡೆ ಮಲ್ಪುವೆರ್. ಈ ಪೊರ್ತುಡು ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪುರಸ್ಕೃತೆರಾಯಿನ ರಾಜ್‌ಕುಮಾರ್ ಬೆಹರಿನ್, ಭಾರತೀಯ ವೈದ್ಯಕೀಯ ಸಂಘದ ಅತ್ಯುತ್ತಮ ಕಾರ್ಯದರ್ಶಿ ಪ್ರಶಸ್ತಿ ಪಡೆದಿನ ಡಾ. ಸದಾನಂದ ಪೂಜಾರಿ ಮೊಕ್ಲೆಗ್ ಸಾಧನಾಶ್ರೀ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ಪರೆ ಉಂಡು. ಅಂಚೆನೆ ಏಕಲವ್ಯ ಪ್ರಶಸ್ತಿ ಪಡೆದಿನ ಅಂತಾರಾಷ್ಟ್ರೀಯ ಕ್ರೀಡಾಪಟು ನಿತಿನ್ ಪೂಜಾರಿ ವಿಟ್ಲ, ರಾಷ್ಟ್ರೀಯ ಸೇವಾ ಯೋಜನೆಡ್ ರಾಷ್ಟ್ರೀಯ ಪದಕ ಗೆಂದಿನ ರಶ್ಮಿ ಜಿ. ಅಂಚನ್ ಕುಳಾಯಿ, ವೈದ್ಯಕೀಯ ವಿಭಾಗದ ಸ್ನಾತಕೋತ್ತರ ಪದವಿಡ್ ಬಂಗಾರ್ದ ಪದಕ ಪಡೆದಿನ ಡಾ. ವಿನಾಯಕ ಎನ್. ಅಂಚನ್ ಮೊಕ್ಲೆನ್ ಯುವ ಸಾಧನಾ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ಪರೆ ಉಂಡು. ಅವ್ವತ್ತಾಂದೆ ಪ್ರಸ್ತುತ ವರ್ಷಡ್ ಗೌರವ ಡಾಕ್ಟರೇಟ್ ಪಡೆದಿನ ಬಿಲ್ಲವ ಸಮುದಾಯದ ಆಜಿ ಜನ ಸಾಧಕೆರೆನ್ ವಿಶೇಷವಾದ್ ಮಾನಾದಿಗೆ ಮಲ್ಪರೆ ಉಂಡು ಪಂದ್ ಆರ್ ತೆರಿಪಾಯೆರ್. ಕುದ್ರೋಳಿ ಶ್ರೀ ನಾರಾಯಣಗುರು ಕಾಲೇಜಿದ ಉಪನ್ಯಾಸಕೆರ್ ಕೇಶವ ಬಂಗೇರ ಪ್ರಧಾನ ಭಾಷಣ ಮಲ್ಪರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಮುಲ್ಕಿ ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್, ಕುಡ್ಲ ಉತ್ತರ ವಿಭಾಗದ ಸಹಾಯಕ ಪೊಲೀಸ್ ಆಯುಕ್ತೆರ್ ಮಹೇಶ್‌ಕುಮಾರ್, ರಂಗಭೂಮಿ ಬೊಕ್ಕ ಚಲಚಿತ್ರ ನಟೆ ನವೀನ್ ಡಿ. ಪಡಿಲ್ ಪಾಲ್ ಪಡೆವರೆ ಉಲ್ಲೆರ್. ದಕ್ಷಿಣ ಕನ್ನಡ, ಒಡಿಪು ಬೊಕ್ಕ ಬೆಂಗಳೂರು ಸೇರ್ದ್ ಯುವವಾಹಿನಿದ ಒಟ್ಟು 33 ಘಟಕರ್ದ್ ಅಂದಾಜಿ 3220 ಸದಸ್ಯೆರ್ ಸಮಾವೇಶಡ್ ಪಾಲ್ ಪಡೆವುನ ನಿರೀಕ್ಷೆ ಉಂಡು ಪಂದ್ ತೆರಿಪಾಯೆರ್. ಪತ್ರಿಕಾಗೋಷ್ಠಿಡ್ ಯುವವಾಹಿನಿ (ರಿ) ಕೇಂದ್ರ ಸಮಿತಿ ಪ್ರಧಾನ ಕಾರ್ಯದರ್ಶಿ ಸತೀಶ್ ಕಿಲ್ಪಾಡಿ, ಮುಲ್ಕಿ ಸಮಾವೇಶದ ನಿರ್ದೇಶಕೆರ್ ಹರೀಂದ್ರ ಸುವರ್ಣ, ಯುವವಾಹಿನಿ (ರಿ) ಮೂಲ್ಕಿ ಘಟಕದ ಅಧ್ಯಕ್ಷೆರ್ ಭಾರತಿ ಭಾಸ್ಕರ ಕೋಟ್ಯಾನ್, ಕಾರ್ಯದರ್ಶಿ ಜಾಹ್ನವಿ ಮೋಹನ್ ಸುವರ್ಣ, ಮಾಧ್ಯಮ ಸಂಚಾಲಕೆರ್ ನರೇಂದ್ರ ಕೆರೆಕಾಡು ಇತ್ತೆರ್.

ಬಡಪತ್ತ್ ದ ಕುಟುಂಬದ ರಡ್ಡ್ ಇಲ್ಲ್ ನವೀಕರಣ

ಯುವವಾಹಿನಿ 35 ನೇ ವರ್ಷದ ಸಮಾವೇಶದ ಸಮಾಜ ಸೇವಾ ಚಟುವಟಿಕೆದ ಒಂಜಿ ಭಾಗವಾದ್ ಮುಲ್ಕಿ ಪರಿಸರದ ಬಡಪತ್ತ್ ದ ರಡ್ಡ್ ಕುಟುಂಬದ ಇಲ್ಲ್ ಲೆನ್ ನವೀಕರಣ ಮಲ್ಪುನ ಉದ್ದೇಶ ಉಂಡು. ಅವ್ವತ್ತಾಂದೆ ಕೂಳೂರುದ ಪಂಜಿಮೊಗೆರ್ ದಲ್ಪ ಸ್ವಂತ ಕಟ್ವಾಣ ನಿರ್ಮಾಣ ಮಲ್ಪುನ ಯೋಜನೆ ಉಂಡು ಪಂದ್ ಯುವವಾಹಿನಿ ಅಧ್ಯಕ್ಷೆರ್ ಉದಯ ಅಮೀನ್ ಮಟ್ಟು ಪಂಡೆರ್.

ಎಂಆರ್‌ಪಿಎಲ್‌ಡ್ 95 ಕೆಲಸ ಖಾಲಿ ಉಂಡು

ಕುಡ್ಲ : ಬೈಕಂಪಾಡಿಡ್ ಇಪ್ಪುನ ಮಂಗಳೂರು ರಿಫೈನರಿ ಬೊಕ್ಕ ಪೆಟ್ರೋಕೆಮಿಕಲ್ಸ್ ಲಿಮಿಟೆಡ್‌ಡ್ (ಎಂಆರ್‌ಪಿಎಲ್‌) ಖಾಲಿ ಇಪ್ಪುನ 95 ಪೋಸ್ಟ್ ಖಾಲಿ ಇತ್ತ್ ದ್ ಅರ್ಜಿ ಲೆತ್ತ್ ದೆರ್. ಬೇಲೆ ನಾಡೊಂದು ಇಪ್ಪುನ ತುಳುನಾಡ್ ದ ಉದ್ಯೋಗಾಕಾಂಕ್ಷಿಲೆಗ್ ಈ ಅವಕಾಶನ್ ಗಲಸೊಲಿ.


ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ ಹುದ್ದೆಗ್ ಅರ್ಜಿ ಲೈದೆರ್. ಆಸಕ್ತಿ ಇಪ್ಪುನ ಅಭ್ಯರ್ಥಿಲು 2023ತ ಜನವರಿ 15 ತ ಸುರುಕು ಆನ್‌ಲೈನ್ ಮುಖೇನ ಅರ್ಜಿ ಸಂದಾವೊಲಿ. ಕುಡ್ಲ ಉದ್ಯೋಗದ ಕಾರ್ಯ ಸ್ಥಾನ ಆತ್ಂಡ್. ತಿಂಗೊಲ್ ಗ್ ₹ 50,000 ರ್ದ್ ₹ 1,60,000 ಮುಟ್ಟ ಸಂಬಳ ಉಂಡು.

95 ಕೆಲಸದ ವಿವರ:
ಸಹಾಯಕ ಕಾರ್ಯನಿರ್ವಾಹಕ (ಹಣಕಾಸು/ ಆಂತರಿಕ ಲೆಕ್ಕಪರಿಶೋಧನೆ)– 4
ಸಹಾಯಕ ಕಾರ್ಯನಿರ್ವಾಹಕ (ಕಾರ್ಯದರ್ಶಿ)– 1
ಸಹಾಯಕ ಕಾರ್ಯನಿರ್ವಾಹಕ ಯುಜಿಸಿ (ಮಾರ್ಕೆಟಿಂಗ್)– 12
ಸಹಾಯಕ ಕಾರ್ಯನಿರ್ವಾಹಕ (ಗ್ರಂಥಾಲಯ ಬೊಕ್ಕ ಮಾಹಿತಿ ವಿಜ್ಞಾನ)–1
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ರಾಸಾಯನಿಕ)–28
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ಮೆಕ್ಯಾನಿಕಲ್)–24
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ಸಿವಿಲ್)–2
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ಎಲೆಕ್ಟ್ರಿಕಲ್)–7
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ಇನ್ಸ್ಟ್ರುಮೆಂಟೇಶನ್)–11
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ಕಂಪ್ಯೂಟರ್ ಸೈನ್ಸ್)–5
ಸಹಾಯಕ ಇಂಜಿನಿಯರ್ ಬೊಕ್ಕ ಸಹಾಯಕ ಕಾರ್ಯನಿರ್ವಾಹಕ (ರಸಾಯನಶಾಸ್ತ್ರ)–1
ವಿದ್ಯಾರ್ಹತೆ:
ಎಂಆರ್‌ಪಿಎಲ್‌ಡ್ ಖಾಲಿ ಇಪ್ಪುನ ಬೇಲೆಗಾದ್ ಅರ್ಹ ಅಭ್ಯರ್ಥಿಲು ಸಿಎ, ಐಸಿಎಐ, ಸಿಎಂಅ, ಬಿಎಸ್ಸಿ, ಬಿಇ, ಬಿಟೆಕ್‌, ಎಂಬಿಎ, ಸ್ನಾತಕೋತ್ತರ ಡಿಪ್ಲೊಮಾ, ಸ್ನಾತಕೋತ್ತರ ಪದವಿ, ಎಂಎಸ್ಸಿ ಮುಗಿತ್ ದ್ ಇಪ್ಪೊಡು.
ವಯೋಮಿತಿ ವಿವರ:
ಖಾಲಿ ಇಪ್ಪುನ ಬೇಲೆಗ್ ಅರ್ಹ ಅಭ್ಯರ್ಥಿಲೆನ ಪ್ರಾಯ ಜನವರಿ 15, 2023ಕ್ 27 ವರ್ಷ ರ್ದ್ ಜಾಸ್ತಿ ಆಯೆರೆ ಬಲ್ಲಿ.
ಹಿಂದುಳಿದ ವರ್ಗದಕ್ಲೆಗ್ 3 ವರ್ಷ ಸಡಿಲಿಕೆ, ಎಸ್‌ಸಿ, ಎಸ್‌ಟಿ ಅಭ್ಯರ್ಥಿಲೆಗ್ 5 ವರ್ಷ ಸಡಿಲಿಕೆ, ಪಿಡಬ್ಲ್ಯೂಡಿ ಅಭ್ಯರ್ಥಿಲೆಗ್ 10 ವರ್ಷ ಸಡಿಲಿಕೆ ಕೊರಿಯೆರ್.
ಅರ್ಜಿ ಶುಲ್ಕ:
ಸಾಮಾನ್ಯ, ಹಿಂದುಳಿದ ಬೊಕ್ಕ ಇಡಬ್ಲ್ಯೂಎಸ್‌ ಅಭ್ಯರ್ಥಿಲೆಗ್ ₹ 118 ಅರ್ಜಿ ಶುಲ್ಕ ನಿಗದಿ ಆತ್ಂಡ್. ಎಸ್‌ಸಿ, ಎಸ್‌ಟಿ, ಪಿಡಬ್ಲ್ಯೂಡಿ ಬೊಕ್ಕ ಮಾಜಿ ಸೈನಿಕೆರೆಗ್ ಅರ್ಜಿ ಶುಲ್ಕ ಇಪ್ಪುಜಿ.
ಆಯ್ಕೆ ಪ್ರಕ್ರಿಯೆ:
ಅಭ್ಯರ್ಥಿಲೆನ್ ಸಂದರ್ಶನ ಮುಖೇನ ಆಯ್ಕೆ ಮಲ್ಪುವೆರ್.

ವೀರ ಯೋಧ ಗ್ರೂಪ್ ಕ್ಯಾಪ್ಟನ್ ಕುಬೆವೂರು ದೊಡ್ಡಮನೆ ದಿನೇಶ್ಚಂದ್ರ ಭಂಡಾರಿ ಮಾರ್ಗದ ಪುದರ್ ದೀಪುನ ಲೇಸ್

ಮುಲ್ಕಿ : ವೀರ ಯೋಧ ಗ್ರೂಪ್ ಕ್ಯಾಪ್ಟನ್ ಕುಬೆವೂರು ದೊಡ್ಡಮನೆ ದಿನೇಶ್ಚಂದ್ರ ಭಂಡಾರಿ ಮಾರ್ಗದ ಪುದರ್ ದೀಪುನ ಲೇಸ್ ಡಿ.23 ಶುಕ್ರಾರದಾನಿ ಬಯ್ಯಗ್ 3:30 ಕ್ ಮುಲ್ಕಿ ಗೇರುಕಟ್ಟೆ ರಾಜ್ಯ ಮಾರ್ಗ ಕಿನ್ನಿಗೋಳಿ ಶಿವ ಭಜನಾ ಮಂಡಳಿದ ಕೈತಲ್ ನಡಪರೆ ಉಂಡು.

ಈ ಲೇಸ್ ಡ್ ಕುಡ್ಲ ಸಂಸದೆರ್ ನಳಿನ್ ಕುಮಾರ್ ಕಟೀಲ್ ನಾಮಫಲಕ ಉದಿಪನ ಮಲ್ಪರೆ ಉಲ್ಲೆರ್. ಮುಲ್ಕಿ-ಬೆದ್ರ ಶಾಸಕೆರ್ ಉಮಾನಾಥ ಕೋಟ್ಯಾನ್ ಲೇಸ್ ನ್ ಉದಿಪನ ಮಲ್ಪುವೆರ್. ಅಧ್ಯಕ್ಷತೆನ್ ಮುಲ್ಕಿ ನಗರ ಪಂಚಾಯತ್ ಅಧ್ಯಕ್ಷೆರ್ ಸುಭಾಷ್ ಶೆಟ್ಟಿ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ KEONICS ಅಧ್ಯಕ್ಷೆರ್ ಹರಿಕೃಷ್ಣ ಬಂಟ್ವಾಳ, ಕುಡ್ಲ ಬಂಟರ ಯಾನೆ ನಾಡವರ ಮಾತೃ ಸಂಘ (ರಿ.) ದ ಅಧ್ಯಕ್ಷೆರ್ ಅಜಿತ್ ರೈ ಮಾಲಾಡಿ, ಕುಡ್ಲ ಸ್ಮಾರ್ಟ್ ಸಿಟಿ ಲಿ.‌ ಜನರಲ್ ಮ್ಯಾನೇಜರ್ (Tech), ಅರುಣ್ ಪ್ರಭಾ ಕೆ.ಎಸ್, ಮುಲ್ಕಿ ನಗರ ಪಂಚಾಯತ್ ಉಪಾಧ್ಯೆಕ್ಷೆರ್ ಸತೀಶ್ ಅಂಚನ್, ಮುಲ್ಕಿ ನಗರ ಪಂಚಾಯತ್ ಮುಖ್ಯಾಧಿಕಾರಿ ಪಿ.ಚಂದ್ರ ಪೂಜಾರಿ ಬರಿಯೆರೆ ಉಲ್ಲೆರ್ ಪಂದ್ ಗ್ರೂಪ್ ಕ್ಯಾಪ್ಟನ್ ಕುಬೆವೂರು ದೊಡ್ಡಮನೆ ದಿನೇಶ್ಚಂದ್ರ‌ ಭಂಡಾರಿ ಕುಟುಂಬದಕುಲು ಲೆಪ್ಪೋಲೆಡ್ ತೆರಿಪಾದೆರ್.

ಡಾ. ಶಿವರಾಮ ಕಾರಂತ ಬಾಲ ಪುರಸ್ಕಾರಗ್ ಸುನಿಧಿ ಅಜೆಕಾರ್ ಆಯ್ಕೆ

ಅಜೆಕಾರ್: ಕೋಟ ಡಾ. ಶಿವರಾಮ ಕಾರಂತ ಹುಟ್ಟೂರ ಪ್ರಶಸ್ತಿ (ರಿ.) ಬೊಕ್ಕ ಕೋಟತಟ್ಟು ಗ್ರಾಮ ಪಂಚಾಯತಿ ಕೊರ್ಪುನ ಡಾ. ಶಿವರಾಮ ಕಾರಂತ ಬಾಲ ಪುರಸ್ಕಾರಗ್ ಕಾರ್ಲ ತಾಲೂಕ್ ರ್ದ್ ಅಜೆಕಾರ್ ಸರಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆದ ಸುನಿಧಿ ಅಜೆಕಾರ್ ಆಯ್ಕೆ ಆತೆರ್.

ಸ್ಯಾಕ್ಸೋಪೊನ್ ಕಲಾವಿದೆರಾಯಿನ ಪ್ರೀತಮ್ ಮುದ್ರಾಡಿ, ಸಂಜಿತ್ ಗಂಗೊಳ್ಳಿ ಸೇರ್ದ್ 20 ಪ್ರಾಥಮಿಕ ಶಾಲೆದ ಪ್ರತಿಭಾನ್ವಿತರೆನ್ ಆಯ್ಕೆ ಮಲ್ದೆರ್ ಪಂದ್ ಡಾ. ಕಾರಂತ ಪ್ರತಿಷ್ಠಾನದ ಕಾರ್ಯಧ್ಯೆಕ್ಷೆರ್ ಆನಂದ ಸಿ.ಕುಂದರ್, ಕಾರ್ಯದರ್ಶಿ ನರೇಂದ್ರ ಕುಮಾರ್ ಕೋಟ, ಪಂಚಾಯತಿ ಅಧ್ಯಕ್ಷೆರ್ ಅಶ್ವಿನಿ ದಿನೇಶ್, ಇಸೇಸ ಕರ್ತವ್ಯ ಅಧಿಕಾರಿ ಪೂರ್ಣಿಮಾ ಮೆರೆನ ಸಂಯುಕ್ತ ಪ್ರಕಟಣೆ ತೆರಿಪಾದೆರ್. ಅಖಿಲ ಕರ್ನಾಟಕ ಬೆಳದಿಂಗಳ ಸಾಹಿತ್ಯ ಸಮ್ಮೇಳನ ಸಮಿತಿದ ಜೋಕುಲೆನ ವಿಭಾಗದ ಸಂಚಾಲಕೆರಾದ್, ಬೊಂಬೈ, ಚಿತ್ರದುರ್ಗ, ಕಾಸ್ರೋಡು, ಕಿನ್ನಿಗೋಳಿ, ಕುಡ್ಲ, ಒಡಿಪು, ಮೈಸೂರ್, ಉಬಾರ್ ಸೇರ್ದ್ ಸುಮಾರ್ ತಿಕ್ ಡ್ ಲೇಸ್ ಕೊರ್ತೆರ್. ಚೈತನ್ಯಶ್ರೀ ಕರುನಾಡ ರತ್ನ, ಪ್ರತಿಭಾ ಚೇತನ ಪ್ರಕೃತಿ ಕಲಾ ರತ್ನ ಗೌರವಲೆಗ್ ಪಾತ್ರರಾತೆರ್. ಮೇರ್ ಪತ್ರಕರ್ತೆರ್ ಡಾ. ಶೇಖರ ಅಜೆಕಾರ್ ಬೊಕ್ಕ ಸೌಮ್ಯಶ್ರೀ ದಂಪತಿಲೆನ ಮಗೆ .

You Missed