Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಮದಿಮೆಡ್ ಡ್ಯಾನ್ಸ್ ಮಲ್ತೊಂದು ಇತ್ತಿನ ಜವನೆ ಬೂರ್ದು ತೀರ್ ಪೋಯೆರ್

ರೇವಾ: ಮದಿಮೆ ಲೇಸ್ ಡ್ ಡ್ಯಾನ್ಸ್ ಮಲ್ತೊಂದು ಇತ್ತಿನ 32 ವರ್ಷದ ಜವನೆ ಒರಿ ಇತ್ತಿಲೆಕ್ಕನೇ ಬೂರ್ದು ತೀರ್ ಪೋಯಿನ ಘಟನೆ ಕೋಡೆ ರಾತ್ರೆ ನಡತ್ಂಡ್.

ರೇವಾಗ್ ಮದಿಮೆಗ್ ಬತ್ತಿನ ಉತ್ತರ ಪ್ರದೇಶದ ಕಾನ್ಪುರ ಜಿಲ್ಲೆದ ನಿವಾಸಿ ಅಭಯ್ ಬೊಕ್ಕ ಸಚನ್ ಡ್ರಮ್ ದ ಸೌಂಡ್ ಗ್ ತರೆ ತಿರ್ಗುದು ಬೂರ್ವೆರ್. ನೆತ್ತ ವೀಡಿಯೋ ಸಾಮಾಜಿಕ ಜಾಲತಾಣಡ್ ವೈರಲ್ ಅತ್ಂಡ್. ಸಚನ್ ನ್ ಕೂಡ್ಲೆ ಕೈತಲ್ ದಕುಲು ಆಸ್ಪತ್ರೆಗ್ ಲೆತೊಂದು ಪೋಯೆರ್. ಆಂಡ ಮೇರ್ ತೀರ್ ಪೋತೆರ್ ಪಂದ್ ತೆರಿದ್ ಬೈದ್ಂಡ್.

ಕುಡ್ಲಡ್ ಜ.27 ರ್ದ್ ಫಿಶ್ ಫೆಸ್ಟಿವಲ್

ಕುಡ್ಲದ ಮೀನುಗಾರಿಕೆ ಕಾಲೇಜ್, ಹೈದರಾಬಾದ್‍ದ ರಾಷ್ಟ್ರೀಯ ಮೀನುಗಾರಿಕಾ ಅಭಿವೃದ್ಧಿ ಮಂಡಳಿ ಬೊಕ್ಕ ಮೀನುಗಾರಿಕಾ ಇಲಾಖೆದ ಒಟ್ಟುಸೇರಿಗೆಡ್ ಮೀನುಗಾರಿಕಾ ಕಾಲೇಜ್ ದ ಚಾವಡಿಡ್ ಜ. 27 ಬೊಕ್ಕ 28 ಕ್ ಬೊಲ್ಪುಗು 10 ಗಂಟೆರ್ದ್ ಬಯ್ಯ ಮುಟ್ಟ ಫಿಶ್ ಫೆಸ್ಟಿವಲ್-2023 ನಡಪರೆ ಉಂಡು.

ನೆತ್ತ ಉದಿಪನನ್ ಮೀನುಗಾರಿಕೆ ಸಚಿವೆರ್ ಎಸ್. ಅಂಗಾರ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ಬೀದರ್ ದ ಕರ್ನಾಟಕ ಪಶು ವೈದ್ಯಕೀಯ ವಿಶ್ವವಿದ್ಯಾಲಯದ ಕುಲಪತಿ ಡಾ. ಕೆ.ಸಿ. ವೀರಣ್ಣ, ಹೈದರಾಬಾದ್‍ದ ರಾಷ್ಟ್ರೀಯ ಮೀನುಗಾರಿಕಾ ಅಭಿವೃದ್ಧಿ ಮಂಡಳಿದ ಮುಖ್ಯ ಕಾರ್ಯನಿರ್ವಾಹಕ ಅಧಿಕಾರಿ ಡಾ. ಸುವರ್ಣ, ಬೀದರ್ ದ ಕರ್ನಾಟಕ ಪಶು ವೈದ್ಯಕೀಯ ವಿಶ್ವವಿದ್ಯಾಲಯದ ವಿಸ್ತರಣಾ ನಿರ್ದೇಶಕೆರ್ ಡಾ. ಎನ್.ಎ. ಪಾಟೀಲ್, ಕರ್ನಾಟಕ ಮೀನುಗಾರಿಕೆ ನಿರ್ದೇಶಕೆರ್ ರಾಮಾಚಾರ್ಯ ಬರಿಯೆರೆ ಉಲ್ಲೆರ್. ಕುಡ್ಲದ ಮೀನುಗಾರಿಕಾ ಕಾಲೇಜ್ ದ ಡೀನ್ ಡಾ. ಶಿವಕುಮಾರ್ ಮಗದ ಗುರ್ಕಾರ್ಮೆನ್ ಒಯಿಸೊನ್ವೆರ್.

ಜಿಮ್‌ಡ್ ವ್ಯಾಯಾಮ ಮಲ್ತೊಂದಿತ್ತಿಪ್ಪುನಗ ತಿರ್ತ್ ಬೂರ್ದು ತೀರ್ ಪೋಯಿನ ಜನ

ಪಾಲ್ಘರ್: ಮಹಾರಾಷ್ಟ್ರದ ಪಾಲ್ಘರ್ ಜಿಲ್ಲೆದ ವಸಾಯಿ ಪೇಂಟೆಡ್ ಜಿಮ್‌ಡ್ ವ್ಯಾಯಾಮ ಮಲ್ತೊಂದಿಪ್ಪುನಗ 67 ವರ್ಷದ ಜನ ಒರಿ ತೀರ್ ಪೋಯಿನ ಘಟನೆ ನಡತ್ಂಡ್.

ಪ್ರಹ್ಲಾದ್ ನಿಕಮ್ ತೀರ್ ಪೋಯಿನಾರ್. ಜಿಮ್‌ಡ್ ವ್ಯಾಯಾಮ ಮಲ್ತೊಂದಿಪ್ಪುನಗ ತರೆ ತಿರ್ಗ್‌ದ್ ತಿರ್ತ್ ಬೂರ್ದೆರ್. ತೀರ್ ಪೋಯಿನೆಕ್ಕ್ ಕಾರಣ ದಾದ ಪಂದ್ ತೆರಿದ್ ಬೈದಿಜಿ.

ನಟಿ ರಾಖಿ ಸಾವಂತ್ ಅರೆಸ್ಟ್

ಬೊಂಬೈ: ಮೈಸೂರುದ ಉದ್ಯಮಿ ಆದಿಲ್ ದುರಾನಿ ಮೆರೆನ್ ಮದಿಮೆ ಆಯಿನೆರ್ದಿಂಚಿ ಸುದ್ದಿಡ್ ಇಪ್ಪುನ ರಾಖಿ ಸಾವಂತ್ ಮೆರೆನ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್ ಪಂದ್ ನಟಿ ಶೆರ್ಲಿನ್ ಚೋಪ್ರಾ ಟ್ವಿಟರ್‌ಡ್ ತೆರಿಪಾದೆರ್.

ಎಫ್ಐಆರ್ 883/2022 ಕ್ ಸಂಬಂಧ ಪಟ್ಟಿನಂಚನೆ ಬೊಂಬೈ ಸೆಷನ್ಸ್ ನ್ಯಾಯಾಲಯ ಕೋಡೆ ನಿರೀಕ್ಷಣಾ ಜಾಮೀನ್ ಕೊರಿಯೆರೆ ತಿರಸ್ಕಾರ ಮಲ್ತಿನ ಬೆರಿಟ್ಟೆ ರಾಖಿ ಮೆರೆನ್ ಅರೆಸ್ಟ್ ಮಲ್ದೆರ್ ಪಂದ್ ಶೆರ್ಲಿನ್ ಚೋಪ್ರಾ ಬರೆವೊಂದೆರ್.

ದೇವೆರ್ ಕೊರ್ಪಿನ ಸೊತ್ತುನು ದೇವೆರೆಗೇ ಸಮರ್ಪಣೆ ಮಲ್ಪೊಡು : ಶ್ರೀ ವಿದ್ಯಾಪ್ರಸನ್ನ ಸ್ವಾಮೀಜಿ, ಪಾವಂಜೆ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಡ್ ಬ್ರಹ್ಮಕಲಶ ಉಚ್ಚಯದ ಉಗ್ರಾಣ ಮೂರ್ತ

ಹಳೆಯಂಗಡಿ: ದೇವಸ್ಥಾನದ ಅಭಿವೃದ್ಧಿ ಆಂಡ ಗ್ರಾಮದ ಅಭಿವೃದ್ಧಿ ಆಪುಂಡು. ಪ್ರಕೃತಿಡ್ ತಿಕ್ಕುನ ಒವ್ವೇ ವಸ್ತುಲ ಆವಡ್, ಅವು ನಮಕ್ಕ್ ದೇವೆರ್ ಕೊರ್ತಿನವು. ಅವೆನ್ ಅರೆಗೇ ಸಮರ್ಪಣೆ ಮಲ್ತ್ಂಡ ನಮ್ಮ ಬದ್ ಕ್ ಸಾರ್ತಕ ಆಪುಂಡು. ಅಯಿಟ್ಟ್ ದೇವೆರ್ನ ಅನುಗ್ರಹ ತಿಕ್ಕುಂಡು ಪಂದ್ ಶ್ರೀ ಕ್ಷೇತ್ರ ಸುಬ್ರಹ್ಮಣ್ಯ ಮಠದ ಶ್ರೀ ವಿದ್ಯಾ ಪ್ರಸನ್ನ ತೀರ್ಥ ಸ್ವಾಮೀಜಿ ಪಂಡೆರ್.

ಆರ್ ಪಾವಂಜೆ ಶ್ರೀ ಮಹಾಲಿಂಗೇಶ್ವರ ಮಹಾ ಗಣಪತಿ ದೇವಸ್ಥಾನಡ್ ಜ.28ಗು ನಡಪುನ ಅಷ್ಟ ಬಂಧ ಬ್ರಹ್ಮಕಲಶ ಉಚ್ಚಯದ ನಿಲೆಟ್ಟ್ ದೇವಸ್ಥಾನಡ್ ಉಗ್ರಾಣ ಮೂರ್ತಗ್ ಚಾಲನೆ ಕೊರ್ದು ಪಾತೆರಿಯೆರ್.

ದೇವಲ್ಯದ ತಂತ್ರಿಲಾಯಿನ ವೇ.ಮೂ ರಾಧಾಕೃಷ್ಣ ಉಪಾಧ್ಯಾಯೆರ್ನ ಮುತಾಲಿಕೆಡ್ ಮಹಾಪೂಜೆ, ಸಾಮೂಹಿಕ ಪ್ರಾರ್ತನೆ ನಡತ್ಂಡ್. ಅವೆರ್ದ್ ಬೊಕ್ಕ ತೋರಣ ಪ್ರತಿಷ್ಠೆ, ಪುಣ್ಯಾಹ ಪಂಚಗವ್ಯ, ದೇವ ನಾಂದಿ, ಕಂಕಣ ಕಟ್ಟುನ, ಅರಣಿ ಮಥನ, ಭದ್ರ ದೀಪ, ಪ್ರತಿಷ್ಠೆ, ಗವ್ಯ ಯಾಗ, ಗೋಪೂಜೆ ನಡತ್ಂಡ್.

ಜೀರ್ಣೋದ್ಧಾರದ ಅಂಗವಾದ್ ಭಕ್ತಾದಿಲು ಸೇವಾ ರೂಪಡ್ ಕೊರ್ತಿನ ಬೇತೆ ಬೇತೆ ಕೊಡುಗೆಲೆನ ಲೋಕಾರ್ಪಣೆ ಕಾರ್ಯಕ್ರಮ ನಡತ್ಂಡ್.

ಈ ಪೊರ್ತುಡು ಜ್ಯೋತಿಷಿ ಯಚ್ ಶಿವರಾಯ ಪ್ರಭು ಮೇರ್ ಬರೆತಿನ ಶ್ರೀ ಕ್ಷೇತ್ರದ ಇತಿಹಾಸ ಸಂಚಿನ್ ಸ್ವಾಮಿಲು ಬುಡುಗಡೆ ಮಲ್ತೆರ್.

ಕಟೀಲು ಕ್ಷೇತ್ರದ ಅನುವಂಶಿಕ ಮೊಕ್ತೇಸರೆರ್ ವಾಸುದೇವ ಅಸ್ರಣ್ಣ, ಮುಲ್ಕಿ ಸೀಮೆ ಅರಸೆರ್ ದುಗ್ಗಣ್ಣ ಸಾವಂತರು, ಮಲ್ಲ ವಿದ್ವಾಂಸೆರ್ ವೇ.ಮೂ. ಕೃಷ್ಣ ಭಟ್ ಪಾವಂಜೆ, ಪ್ರಧಾನ ಅರ್ಚಕೆರ್ ವಾಸುದೇವ ಭಟ್, ಪವಿತ್ರ ಪಾಣಿ ಪಿ. ಗಣೇಶ್ ಭಟ್ , ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಸೂರ್ಯ ಕುಮಾರ್, ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಪ್ರಕಾಶ್ ಎನ್ ಶೆಟ್ಟಿ, ಪ್ರಧಾನ ಕಾರ್ಯದರ್ಶಿ, ಚಂದ್ರಶೇಖರ ನಾನಿಲ್ , ಜೊತೆ ಕಾರ್ಯದರ್ಶಿ ರಾಮದಾಸ್ ಪಾವಂಜೆ, ಹಳೆಯಂಗಡಿ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಪೂರ್ಣಿಮಾ, ಕೆಮ್ರಾಲ್ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಲೀಲಾ ಕೃಷ್ಣಪ್ಪ, ಪಡುಪಣಂಬೂರು ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಮಂಜುಳಾ, ಅದಿತ್ಯ ಮುಕಾಲ್ದಿ ಖಂಡಿಗೆ ಬೂಡು, ಹಳೆಯಂಗಡಿ ಬಿಲ್ಲವ ಸಂಘದ ಗೌರವಾಧ್ಯಕ್ಷೆರ್ ಗಣೇಶ್ ಬಂಗೇರ, ಶಶೀಂದ್ರ ಸಾಲಿಯಾನ್, ಕಸ್ತೂರಿ ಪಂಜ, ವಿನೋದ್ ಬೊಳ್ಳೂರು, ಜೀವನ್ ಪ್ರಕಾಶ್ ಕಾಮೆರೊಟ್ಟು, ದಿನೇಶ್ ಹರಿಪಾದೆ, ಸುಕೇಶ್ ಪಾವಂಜೆ, ಪ್ರವೀಣ್ ಬೊಳ್ಳೂರು, ಕೃಷ್ಣ ಹೆಬ್ಬಾರ್, ಅಶ್ವಿನಿ ದೇವಾಡಿಗ, ಪ್ರೇಮಲತಾ ಯೋಗೀಶ್, ಅರುಣಾ ಮುಕ್ಕ, ಗೌತಮ್ ಜೈನ್ ಮುಲ್ಕಿ ಅರಮನೆ,ಎಸ್ ಕೆ ಪಿ ಎ ನ ಮೋಹನ್ ರಾವ್, ಸುಧಾಕರ ಅಮೀನ್ ಹಳೆಯಂಗಡಿ, ಜ್ಯೋತಿ ರಾಮಚಂದ್ರ, ಸುಲೋಚನಾ , ರಾಘು ದೇವಾಡಿಗ, ಸುಕುಮಾರ್ ವ್ಯವಸ್ಥಾಪನಾ, ಜೀರ್ಣೋದ್ಧಾರ ಸಮಿತಿದ ಸದಸ್ಯೆರ್ ಬೊಕ್ಕ ಚೌಕ ಗ್ರಾಮಸ್ಥೆರ್ ಇತ್ತೆರ್.

ಮರಕ್ಕ್ ಮುಂಡು ಕಟ್ ದ್ ಸೈಯರೆ ಪೋನಗ ಮುಂಡು ಪರಿದ್ ತಿರ್ತ್ ಬೂರ್ದು ತೀರ್ ಪೋಯಿನ ಜವನೆ

ದೊಡ್ಡಬಳ್ಳಾಪುರ: ಮರಕ್ಕ್ ಲುಂಗಿ ಕಟ್ ದ್ ಸೈಯರೆ ಪೋಯಿನ ಜವನೆ ಮುಂಡು ಪರಿದ್ ತಿರ್ತ್ ಬೂರ್ದು ತೀರ್ ಪೋಯಿನ ಘಟನೆ ದೊಡ್ಡಬಳ್ಳಾಪುರ ಪೇಂಟೆದ ಭಗತ್‌ಸಿಂಗ್ ಕ್ರೀಡಾಂಗಣದ ಕೈತಲ್ ನಡತ್ಂಡ್.

19 ವರ್ಷ ಪ್ರಾಯದ ಜವನೆ ಮುಂಡುನ್ ಮರಕ್ಕ್ ಕಟ್ ದ್ ಆತ್ಮಹತ್ಯೆ ಮಲ್ಪರೆ ಪ್ರಯತ್ನ ಮಲ್ತ್‌ದೆ. ಅಪಗ ಮುಂಡು ಪರಿದ್ ತಿರ್ತ್ ಬೂರ್ದಿನ ಬಿರ್ಸ್‌ಗ್ ತರೆಕ್ಕ್ ತಾಗ್‌ದ್ ಮಸ್ತ್ ನೆತ್ತೆರ್ ಪೋದು ತೀರ್ ಪೋತೆರ್. ದೊಡ್ಡಬಳ್ಳಾಪುರ ಪೊಲೀಸೆರ್ ಭೇಟಿ ಕೊರ್ದು ಪರಿಶೀಲನೆ ಮಲ್ತ್‌ದೆರ್.

ಗ್ಯಾಂಬಿಯಾದ ಉಪಾಧ್ಯಕ್ಷೆರ್ ಜೂಫ್ ಭಾರತಡ್ ತೀರ್ ಪೋಯೆರ್

ಡೆಲ್ಲಿ: ಗ್ಯಾಂಬಿಯಾದ ಉಪಾಧ್ಯಕ್ಷೆರ್ ಬದರಾ ಅಲಿಯು ಜೂಫ್ (65) ಭಾರತಡ್ ತೀರ್ ಪೋಯೆರ್.

ಮೇರ್ ಮೂಜಿ ವಾರದ ಪಿರವು ಚಿಕಿತ್ಸೆ ಪಡೆಯೆರೆ ಪಂದ್ ಭಾರತಗ್ ಬತ್ತ್ ದ್ ಇತ್ತೆರ್. ಮುಲ್ಪ ಮೆರೆಗ್ ಚಿಕಿತ್ಸೆ ಫಲಕಾರಿ ಅವಂದೆ ತೀರ್ ಪೋಯೆರ್ ಪಂದ್ ಗ್ಯಾಂಬಿಯಾದ ಅಧ್ಯಕ್ಷೆರ್ ಆಡಮಾ ಬಾರೋ ಬುಧಾರ ತೆರಿಪಾದೆರ್.

Gambian vice president dies in India after a brief illness

Delhi : Gambian vice President Badhara Joof (65) who was in India for medical treatment dies after brief illness.

He had come down to India three weeks back for medical treatment. His death was announced by Gambian president Adama Barrow on Wednesday.

ಕುಡ್ಲ: ಇಲ್ಲಡ್ ತೂ ಪೊತ್ತ್‌ದ್ ಕರಿಂಚಿದ್ ಪೋಯಿನ ಲಕ್ಷಾಂತರ ಬಿಲೆತ್ತ ಸೊತ್ತುಲು

ಕುಡ್ಲ: ಇಲ್ಲಡ್ ತೂ ಪೊತ್ತ್‌ದ್ ಲಕ್ಷಾಂತರ ರೂಪಾಯಿದ ಸೊತ್ತುಲು ಪೊತ್ತ್‌ದ್ ಕರಿಂಚಿದ್ ಪೋಯಿನ ಘಟನೆ ಸುರತ್ಕಲ್ ಕೈತಲ್‌ದ ಬಾಂಗ್ಲಾ ವಠಾರಡ್ ನಡತ್ಂಡ್.

ಉಮೇಶ ಆಚಾರ್ಯ ಮೆರೆನ ಇಲ್ಲಡ್ ತೂ ಪೊತ್ತ್‌ದ್ಂಡ್. ಇಲ್ಲಡ್ ಏರ್ ಇಜ್ಜಂದಿನ ಪೊರ್ತುಡು ಫ್ರಿಡ್ಚ್‌ಡ್ ತೂ ಪೊತ್ತ್‌ದ್ ಇಲ್ಲದ ಮಾತ ಕಡೆಕ್ಕ್ ಪಗರ್‌ದ್ಂಡ್. ಶಾಸಕೆರ್ ಭರತ್ ಶೆಟ್ಟಿ ವೈ. ಮೇಯರ್ ಜಯಾನಂದ ಅಂಚನ್ ಜಾಗೆನ್ ಬತ್ತ್‌ದ್ ಪರಿಶೀಲನೆ ಮಲ್ತ್‌ದೆರ್.

ಇಲ್ಲಡ್ ಪುಡಾಯಿನ ಗ್ಯಾಸ್ ಸಿಲಿಂಡರ್ : ಪೊಂಜೋವ್ ಬಚಾವ್!

ಮಾಣಿ: ಒಂಜಿ ಇಲ್ಲಡ್ ಗ್ಯಾಸ್ ಸಿಲಿಂಡರ್ ಪುಡಾದ್ ತೂ ಪೊತ್ತಿನ ಘಟನೆ ಬಂಟ್ವಾಳ ತಾಲೂಕ್ ದ ಮಾಣಿಡ್ ನಡತ್ಂಡ್.

ಮಾಣಿ ಗ್ರಾಮದ ಕಾಪಿಕಾಡು ದೀಪಾ ಪನ್ಪುನರೆನ ಇಲ್ಲಲ್ ತೂ ಪೊತ್ತ್ ದ್ಂಡ್. ಈ ಅಪಾಯರ್ದ್ ಮೇರ್ ಬಚಾವ್ ಆತೆರ್. ನೇರ್ದ್ ಇಲ್ಲಲ್ ಇತ್ತಿನ ಕರೆಂಟ್ ಸೊತ್ತುಲು ಸೇರ್ದ್ ಸೊತ್ತುಲು ಮಾತ ತೂಟ್ ಪೊತ್ತ್ ದ್ಂಡ್. ಜಾಗೆಗ್ ಪುತ್ತೂರ್ ಅಗ್ನಿಶಾಮಕ ದಳದ ಸಿಬ್ಬಂದಿಲು ಬತ್ತ್ ದ್ ಕಾರ್ಯಾಚರಣೆ ನಡಪಾವೊಂದು ಉಲ್ಲೆರ್.

ಕಲಾ ಸವ್ಯಸಾಚಿ ಪ್ರಶಾಂತ್ ಸಿ.ಕೆ. ಮೆರೆಗ್ ಕುಂದೇಶ್ವರ ಸಮ್ಮಾನ್‌ ಪ್ರಶಸ್ತಿ

ಕುಡ್ಲ: ಕಾರ್ಲದ ಹಿರ್ಗಾನ ಶ್ರೀ ಕುಂದೇಶ್ವರ ಕ್ಷೇತ್ರರ್ದ್ ಕೊರ್ಪಿನ ಶ್ರೀ ಕುಂದೇಶ್ವರ ಸಮ್ಮಾನ್‌ ಪ್ರಶಸ್ತಿಗ್ ಬಹುಮುಖ ಪ್ರತಿಭೆದ ಯಕ್ಷ ಕಲಾವಿದೆ ರಂಗದ ಬಿರ್ಸೆ ಪ್ರಶಾಂತ್‌ ಸಿ.ಕೆ. ಆಯ್ಕೆ ಆತೆರ್.

ಜ.21ಕ್ ನಡಪುನ ಶ್ರೀ ಕುಂದೇಶ್ವರ ಜಾತ್ರೆದ ಪೊರ್ತುಡು ಈ ಪ್ರಶಸ್ತಿನ್ ಪ್ರಧಾನ ಮಲ್ಪುವೆರ್. ವೃತ್ತಿಪರ ಆಟದ ಮೇಳಡ್ ಹಾಸ್ಯ ಕಲಾವಿದೆರಾದಿಪ್ಪುನ ಪ್ರಶಾಂತ್‌ ಸಿ.ಕೆ. ಮೇರ್, ಮಸ್ತ್ ಆಟದ ಪ್ರಸಂಗನ್ ಬೊಕ್ಕ ತುಳು ನಾಟಕಲೆನ್ ರಚನೆ ಮಲ್ದೆರ್. ಅವ್ವತ್ತಂದೆ ಸಿನಿಮಾ ರಂಗಡ್ ದಾಖಲೆ ನಿರ್ಮಾಣ ಮಲ್ತಿನ ಮೇರ್ ಕಾಂತಾರಡ್ ಬೊಕ್ಕ ಆಟಗ್ ಸಂಬಂಧ ಪಟ್ಟಿನ ವದನ ಕಲಾತ್ಮಕ ಪಿಕ್ಚರ್ ಡ್ ಬೊಕ್ಕ ರಾಷ್ಟ್ರಪ್ರಶಸ್ತಿ ಗೆಂದಿನ ಪಿಂಗಾರ ಪಿಕ್ಚರ್ ಡ್ ದೈವಪಾತ್ರಧಾರಿಯಾದ್ ಅಭಿನಯ ಮಲ್ದೆರ್.

ಟಿವಿ ವಾಹಿನಿಡ್ ಹಾಸ್ಯ ಸರಣಿಲು, ಯಕ್ಷ ರಸ, ಹಾಸ್ಯ ಆಟದ ಪ್ರಸಂಗಲೆನ್ ನಿರ್ದೇಶನ ಮಲ್ತ್ ದ್ ಅಭಿನಯ ಮಲ್ತೆರ್. ವೃತ್ತಿಪರ ಮೇಳಡ್ ಇತ್ತ್ ದ್ ಸುಮಾರ್ ತಿರುಗಾಟ ಮಲ್ತಿನ ಮೇರ್ ತುಳು ರಂಗಭೂಮಿದ ಅನರ್ಘ್ಯ ರತ್ನ. ಮೆರೆನ ಬಹುಮುಖ ಪ್ರತಿಭೆನ್ ಗುರ್ತಿಸದ್ ಈ ಪ್ರಶಸ್ತಿಗ್ ಆಯ್ಕೆ ಮಲ್ಪೆರೆ ಆತ್ಂಡ್ ಪಂದ್ ಸಾಂಸ್ಕೃತಿಕ ಲೇಸ್ ದ ಸಂಯೋಜಕೆರ್ ಜಿತೇಂದ್ರ ಕುಂದೇಶ್ವರ ತೆರಿಪಾದೆರ್.‌


ಸನಿಯಾರ ರಾತ್ರೆ 7 ಗಂಟೆಗ್ ಪುಗರ್ತೆದ ಕಲಾವಿದೆರ್ ಒಟ್ಟು ಸೇರ್ದ್ ಹಿರಣ್ಯಾಕ್ಷ ಹಿರಣ್ಯ ಕಶಿಪು ತುಳು ಬೊಕ್ಕ ಕನ್ನಡ ಆಟ ಪ್ರದರ್ಶನ ಅವರೆ ಉಂಡು. ಬೊಕ್ಕ ಮಾಯದಪ್ಪೆ ಮಂತ್ರದೇವತೆ ತುಳು ನಾಟಕ ನಡಪರೆ ಉಂಡು. ಜ.22ಕ್ ವರ್ಷಾಧಿದ ಉಚ್ಚಯ, ಅನ್ನಸಂತರ್ಪಣೆ, ನೇಮ ನಡಪರೆ ಉಂಡು ಪಂದ್ ಕ್ಷೇತ್ರದ ಪ್ರಕಟಣೆಡ್ ತೆರಿಪಾದೆರ್.

You Missed