ಭಾರತ ಬೊಕ್ಕ ಪಾಕ್ ಗಡಿಟ್ಟ್ ಅಮಲ್ ದ ಸೊತ್ತುಲೆನ ಸಾಗಾಟ ನಡತೊಂದು ಉಂಡು.
ಅತ್ತಂದೆ ಡ್ರೋನ್ ದ ಮುಖೇನ ಪಾಕ್ ಕಡೆರ್ದ್ ಸಾಗಾಟ ಆವೊಂದು ಇತ್ತಿನ ಹೆರಾಯಿನ್ ನ್ ಬಿಎಸ್ಎಫ್ ದ ಪಂಜಾಬ್ ಫ್ರಾಂಟಿಯರ್ ವಶಕ್ಕ್ ಪಡೆತ್ಂಡ್. ಅಮೃತಸರ ವಲಯದ ಬಿಎಸ್ಎಫ್ ಪಡೆರ್ದ್ ಕಾರ್ಯಾಚರಣೆ ನಡತ್ ದ್ಂಡ್. ನೆತ್ತೊಟ್ಟಿಗೆ ಮಂಜಲ್ ಬಣ್ಣದ ಟೇಪ್, ಕರ್ಬದ ಕೊಕ್ಕೆ ಬೊಕ್ಕ ಮಿನ್ಕುನ 8 ಪಟ್ಟಿನ್ ವಶಕ್ಕ್ ಪಡೆತ್ಂಡ್.
ಪುತ್ತೂರ್: ವಿಧಾನ ಸಭೆ ಕ್ಷೇತ್ರದ ಬಿಜೆಪಿ ಅಭ್ಯರ್ಥಿ ಆಶಾ ತಿಮ್ಮಪ್ಪ ಗೌಡ ಮೆರೆನ ಪರ ವೋಟುದ ಪ್ರಚಾರ ಮಲ್ಪರೆ ರಾಜ್ಯ ಬಿಜೆಪಿ ಚುನಾವಣಾ ಸಹ ಉಸ್ತುವಾರಿ, ತಮಿಳುನಾಡ್ ಬಿಜೆಪಿ ರಾಜ್ಯಾಧ್ಯಕ್ಷೆರ್ ಅಣ್ಣಾಮಲೈ ಮೇರ್ (ಎ.29) ಎಲ್ಲೆ ಪುತ್ತೂರ್ ಗ್ ಬರಿಯೆರೆ ಉಲ್ಲೆರ್.
ಈ ಲೇಸ್ ಎಲ್ಲೆ ಮಧ್ಯಾಹ್ನ 3 ಗಂಟೆಗ್ ಕಾವು ಜನಮಂಗಳ ಸಭಾಭವನಡ್ ನಡಪರೆ ಉಂಡು.
ಕಾಂಗ್ರೆಸ್ ನಾಯಕಿ ಪ್ರಿಯಾಂಕಾ ಗಾಂಧಿನ ಮಿತ್ತ್ ಮೈಸೂರ್ ಡ್ ಬಿಜೆಪಿ ದೂರು ಕೊರ್ತುಂಡು.
ಲಿಂಗಾಯಿತೆರೆನ್ ಬಿಜೆಪಿ ಪಕ್ಷ ಅವಮಾನ ಮಲ್ದ್ಂಡ್ ಪನ್ಪುನ ಹೇಳಿಕೆನ್ ಆರೋಪ ಮಲ್ತ್ ದ್ ಮೈಸೂರ್ ಗ್ರಾಮಾಂತರ ಕಾನೂನು ಘಟಕರ್ದ್ ಚುನಾವಣಾಧಿಕಾರಿಗ್ ದೂರು ಕೊರ್ತುಂಡು.
ಕೆಆರ್ ಪೇಟೆಡ್ ಪ್ರಚಾರದ ಪೊರ್ತುಡು ಪ್ರಿಯಾಂಕಾ ಮೇರ್ ಲಿಂಗಾಯಿತೆರೆಗ್‌ ಬಿಜೆಪಿ ಅವಮಾನ ಮಲ್ದ್ಂಡ್ ಪಂದ್ ಜಾತಿ, ಧರ್ಮದ ಇಚಾರ ಗಲಸ್ ದ್ ಪ್ರಚಾರ ಮಲ್ದೆರ್ ಪಂದ್ ಆರೋಪ ಮಲ್ದೆರ್. ಅಂಚಾದ್ ಈ ಬಗೆಟ್ ಕ್ರಮ ದೆತೊನೊಡು ಪಂದ್ ಬಿಜೆಪಿ ದೂರುಡ್ ಬಿನ್ನಾಪು ಮಲ್ದ್ಂಡ್.
ಪುತ್ತೂರ್: ಪಕ್ಷೇತರ ಅಭ್ಯರ್ಥಿ ಅರುಣ್ ಕುಮಾರ್ ಪುತ್ತಿಲ ಮೇರ್ ಧರ್ಮಸ್ಥಳ ಶ್ರೀ ಮಂಜುನಾಥ ಸ್ವಾಮಿ ಕ್ಷೇತ್ರಗ್ ಭೇಟಿ ಕೊರಿಯೆರ್.
ಬೊಕ್ಕ ಧರ್ಮಾಧಿಕಾರಿ ಡಾ.ಡಿ ವೀರೇಂದ್ರ ಹೆಗ್ಗಡೆ ಮೆರೆನ್ ಭೇಟಿ ಆದ್ ಆಶೀರ್ವಾದ ಪಡೆಯೆರ್.
ಮಣಿಪಾಲ: ರೇಡಿಯೊ ಮಣಿಪಾಲ್ ಡ್ ‘ಕಾವ್ಯಗಾನ-ಸಂಗೀತ ಪಾಠ’ ಲೇಸ್ ದ 5ನೇ ಸಂಚಿಕೆ ಎ.28 ಕ್ಕ್ ಸುಕ್ರಾರ ಬಯ್ಯಗ್ 5.30ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಸಂಗೀತ ಶಿಕ್ಷಕೆರ್ ಕಾವ್ಯಶ್ರೀ ಸೀತಾರಾಮ ಆಚಾರ್ಯ ಕೊಡವೂರು ಪಾಲ್ ಪಡೆಯೆರೆ ಉಲ್ಲೆರ್. ನನ ಎ.29 ಕ್ಕ್ ಸನಿಯಾರ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಉತ್ತರ ಪ್ರದೇಶದ ಅಯಾನ್ ಗುಪ್ತಾ ಪನ್ಪುನ ಆಣ್ 10ನೇ ವರ್ಷಡ್ 10ನೇ ಕ್ಲಾಸ್ ಪರೀಕ್ಷೆಡ್ ಪಾಸಾತೆ.
ಅಯಾನ್ 76.6% ಮಾರ್ಕ್ ಪಡೆತೆ. ಕರಿನ ವರ್ಷ 9ನೇ ಕ್ಲಾಸ್ ಪಾಸಾಯಿನ ಅಯಾನ್ ಈ ವರ್ಷ 10 ನೇ ಕ್ಲಾಸ್ ಪಾಸಾತೆ.
ಲಾಕ್ ಡೌನ್ ಪೊರ್ತುಡು ಅಯಾನ್ ತನ್ನರ್ದ್ ಮಿತ್ತ ಕ್ಲಾಸ್ ದ ಬೂಕುನ್ ಓದೊಂದು ಇತ್ತೆ. ಅಂಚಾದ್ ಈ ಆಣನ ಪ್ರತಿಭೆನ್ ತೂದು 10 ನೇ ಕ್ಲಾಸ್ ಪರೀಕ್ಷೆ ಬರೆಯೆರೆ ಇಸೇಸ ಅನುಮತಿ ದೆತೊಂದ ಪಂದ್ ಶಾಲೆದ ಪ್ರಾಂಶುಪಾಲೆರ್ ಪೊಲಬು ಕೊರ್ತೆರ್.
UPSC ದ CAPF ಡ್ 322 ಸಹಾಯಕ ಕಮಾಂಡೆಂಟ್ ಬೇಲೆಗ್ ಅರ್ಜಿ ಪಾಡೊಲಿ.
ನೆಟ್ಟ್ BSF-86, CRPF-55, CISF-91, ITBP-60 ಬೊಕ್ಕ SSB ಡ್ 30 ಬೇಲೆ ಉಂಡು. ಆಸಕ್ತ ಬೊಕ್ಕ ಅರ್ಹ ಅಭ್ಯರ್ಥಿಲು ವೆಬ್‌ಸೈಟ್ upsc.nic.in ಗ್ ಭೇಟಿ ಕೊರ್ಪಿನ ಮುಖೇನ ಮೇ 16 ತ್ತ ಉಲಯಿ ಅರ್ಜಿ ಸಂದಾವೊಡು. ಅರ್ಜಿ ಸಂದಾಯೆರೆ ಪದವಿ ಶಿಕ್ಷಣದ ಅರ್ಹತೆ ಇಪ್ಪೊಡು. ಲಿಖಿತ ಪರೀಕ್ಷೆ, ದೈಹಿಕ ಪರೀಕ್ಷೆ ಬೊಕ್ಕ ದಾಖಲೆದ ಪರಿಶೀಲನೆದ ಆಧಾರದ ಮಿತ್ತ್ ಆಯ್ಕೆ ಮಲ್ಪೆರೆ ಆಪುಂಡು ಪಂದ್ ಪ್ರಕಟಣೆ ತೆರಿಪಾದ್ಂಡ್.
ಸಂಚಾರಿ ನಿಯಮ ಉಲ್ಲಂಘನೆ ಮಲ್ತಿನ ಪ್ರಧಾನಿ ಮೋದಿನ ಮಿತ್ತ್ ಒಂಜಿ ಜನ ದೂರು ಕೊರ್ತೆರ್.
ಇಂಚಿಪ್ಪ ಕೇರಳದ ಕೊಚ್ಚಿಡ್ ಪ್ರಧಾನಿ ಮೇರ್ ರೋಡ್ ಶೋ ಪೊರ್ತುಡು ನಿಯಮ ಉಲ್ಲಂಘನೆ ಮಲ್ತಿನೆಕ್ಕ್ ತ್ರಿಶೂರ್ ನಿವಾಸಿ ಪೊಲೀಸೆರೆಗ್ ದೂರು ಕೊರ್ತೆರ್. ಮೋದಿ ಗಾಡಿದ ಬಾಕಿಲ್ ಡ್ ಉಂತುದು ಪ್ರಯಾಣ ಮಲ್ದೆರ್ ಪಂದ್ ಆನ್ ಲೈನ್ ದೂರುಡ್ ಪಂತೆರ್. ಅತ್ತಂದೆ ಕಾರ್ ದ ಗ್ಲಾಸ್ ದ ಮಿತ್ತ್ ಪೂ ಬೂರ್ದಿತ್ತ್ಂಡ್. ಡ್ರೈವರ್ ಗ್ ಎದುರು ತೋಜೊಂದು ಇಜ್ಜಾಂಡ್ ಪಂದ್ ದೂರುಡ್ ಬರೆತೆರ್.
ಕುಡ್ಲ: ಕಾಂಗ್ರೆಸ್‌ದ 5ನೇ ಗ್ಯಾರಂಟಿನ್ ಕಾಂಗ್ರೆಸ್ ನಾಯಕೆ ರಾಹುಲ್ ಗಾಂಧಿ ಮೇರ್ ಗುರುವಾರ ಘೋಷಣೆ ಮಲ್ದೆರ್.
ಕುಡ್ಲ ಪೇಂಟೆರ್ದ್ ಪಿದಯಿದ ಅಡ್ಯಾರ್ ದ ಸಹ್ಯಾದ್ರಿ ಕಾಲೇಜ್ ಮೈದಾನಡ್ ಆಯೋಜನೆ ಮಲ್ತಿನ ಕಾಂಗ್ರೆಸ್ ವೋಟುದ ಪ್ರಚಾರದ ಸಭೆಟ್ಟ್ ಪಾತೆರಿನ ಮೇರ್, ರಾಜ್ಯಡ್ ಕಾಂಗ್ರೆಸ್ ಸರಕಾರ ಬತ್ತಿನ ಸುರುತ್ತ ದಿನರ್ದೆ ಪೊಂಜೋವ್ ನಕ್ಲೆಗ್ ಸರಕಾರಿ ಬಸ್ ಟ್ಟ್ ಧರ್ಮಗ್ ಪ್ರಯಾಣ ಮಲ್ಪರೆ ಪಂದ್ ಘೋಷಣೆ ಮಲ್ದೆರ್.
ಬಿಜೆಪಿ ಸರ್ಕಾರದ ಪೊರ್ತುಡು ಪೆಟ್ರೋಲ್ ದ ಮಿತ್ತ್ 60 ರ್ದ್ 90 ರೂ. ಗ್ಯಾಸ್ ಗ್ 400 ರ್ದ್ 1100 ರೂ. ಆತ್ಂಡ್. ನೋಟ್ ಬ್ಯಾನ್ ಬಡವೆರೆನ ಕಾಸ್ ನ್ ದೆತೊಂದುಂಡು. ಜವನೆರೆಗ್ ಬೇಲೆ ತಿಕೊಂದು ಇಜ್ಜಿ. ಬಿಜೆಪಿ ಸರ್ಕಾರ ಬೇಲೆ ಕೊರೊಂದು ಇಜ್ಜಿ. 40 ಕೋಟಿ ಜನ ಕೂಡ ಬಡಪತ್ತ್ ಡ್ ಉಲ್ಲೆರ್. 90 ಲಕ್ಷ ಎಲ್ಯ ಬೊಕ್ಕ ಮಧ್ಯಮ ಕೈಗಾರಿಕೆ ಮುಚ್ಚಿದ್ಂಡ್. ಉಂದು ಬಿಜೆಪಿದ ವಿಕಾಸ ಮಂತ್ರ, ಭ್ರಷ್ಟಾಚಾರ 40%, ನಿರುದ್ಯೋಗ ಬೊಕ್ಕ ಬಿಲೆ ಎಚ್ಚ ಮಲ್ದ್ಂಡ್ ಪಂದ್ ರಾಹುಲ್ ಪಂಡೆರ್.
ತಾಳಿಪಾಡಿ ಶ್ರೀ ಧರ್ಮ ಜಾರಂದಾಯ-ಬಂಟ ಬೊಕ್ಕ ಶ್ರೀ ಧೂಮಾವತಿ-ಬಂಟ ದೈವೊಲೆನ ದೈವೊಲ್ಯಡ್ ಪುನರ್ ಪ್ರತಿಷ್ಠೆ, ಕಲಶಾಭಿಷೇಕ ಬೊಕ್ಕ ವರ್ಷಾದಿದ ನೇಮ ಎ.30-ಮೇ4 ಮುಟ್ಟ ನಡಪರೆ ಉಂಡು.
ಈ ಲೇಸ್ ನರಹರಿ ತಂತ್ರಿಲೆನ ಮುತಾಲಿಕೆಡ್, ಪ್ರಧಾನ ಅರ್ಚಕೆರ್ ಬಾಲಕೃಷ್ಣ ಭಟ್ರೆನ ಸಹಕಾರಡ್ ನಡಪರೆ ಉಂಡು.
ಎ.30 ಐತಾರ ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ತೋರಣ ಮೂರ್ತ, ಉಗ್ರಾಣ ಮೂರ್ತ, ಗಣಯಾಗ ಬಯ್ಯಗ್ ವಾಸ್ತುಪೂಜೆ, ವಾಸ್ತುಹೋಮ, ವಾಸ್ತುಬಲಿ ನಡಪರೆ ಉಂಡು.
ಮೇ1 ಸೋಮಾರ ಬೊಲ್ಪುಗು ದುರ್ಗಾಹೋಮ, ಬಯ್ಯಗ್ ಬಪ್ಪನಾಡ್ ಮೇಳದಕ್ಲೆರ್ದ್ ಆಟ ನಡಪರೆ ಉಂಡು.
ಮೇ2 ಅಂಗಾರೆ ಬೊಲ್ಪುಗು ಸುದರ್ಶನಯಾಗ, ದುರ್ಗಾಯಾಗ, ಬಯ್ಯಗ್ ಮಂಡಲ ರಚನೆ, ಭುವನೇಶ್ವರಿ ಪೂಜೆ, ವನದುರ್ಗಾ ಹೋಮ ಬೊಕ್ಕ ಕಲ್ಲಡ್ಕ ವಿಠಲ್ ನಾಯಕ್ ಮೆರೆರ್ದ್ ಸಾಹಿತ್ಯ, ಸಂಗೀತ, ಸಂಭ್ರಮ ಆದ್ ಧರ್ಮಸಭೆ,ರಾತ್ರೆ ವಿಜಯ ಕಲಾವಿದೆರೆರ್ದ್ ತೊಟ್ಟಿಲ್ ನಾಟಕ ನಡಪರೆ ಉಂಡು.
ಮೇ3 ಬುಧಾರ ಬೊಲ್ಪುಗು ಪ್ರತಿಷ್ಠೆ ಹೋಮ, ತಾರಿಪಾಡಿಗುತ್ತುರ್ದ್ ಭಂಡಾರ ಬರಿಯೆರೆ ಉಂಡು. ಬಯ್ಯಗ್ ಪಟ್ಲ ಸತೀಶ್ ಶೆಟ್ಟಿ ಕೂಟದಕ್ಲೆರ್ದ್ ಯಕ್ಷಗಾನ ನಾಟ್ಯ ವೈಭವ ಆದ್ ಧರ್ಮಸಭೆ, ರಾತ್ರೆ ಲಕುಮಿ ಕಲಾವಿದೆರೆರ್ದ್ ಗರುಡ ಪಂಚಮಿ ನಾಟಕ ನಡಪರೆ ಉಂಡು.
ಮೇ4 ಗುರುವಾರ ಮಧ್ಯಾಹ್ನ ಅನ್ನಸಂತರ್ಪಣೆ ಸೇವೆ, ರಾತ್ರೆ ಗೌರವ ಸಮರ್ಪಣೆ ಲೇಸ್ ಆದ್ ಧರ್ಮ ಜಾರಂದಾಯ-ಬಂಟ ಬೊಕ್ಕ ಧೂಮಾವತಿ-ಬಂಟ ದೈವೊಲೆನ ವರ್ಷಾಧಿದ ನೇಮ, ಕೋರ್ದಬ್ಬು ಬೊಕ್ಕ ಧೂಮಾವತಿ ದೈವೊಲೆನ ಭಂಡಾರ ಬತ್ತ್ ದ್ ಭೇಟಿ ಆಯೆರೆ ಉಂಡು.
ಮೇ5 ಬೊಲ್ಪುಗು ತಾರಿಪಾಡಿಗುತ್ತುಗು ಭಂಡಾರ ಪೋಪುಂಡು.
ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ತಾರಿಪಾಡಿಗುತ್ತು ದಿನೇಶ ಭಂಡ್ರಿಯಾಲ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
