ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

Sudha Murthy of Infosys honoured with ” Bala Sahitya Puraskar” ಇನ್ಫೋಸಿಸ್ ಸಂಸ್ಥಾಪಕಿ ಸುಧಾಮೂರ್ತಿ ಮೆರೆಗ್ ಬಾಲ ಸಾಹಿತ್ಯ ಪುರಸ್ಕಾರ

ಈ ವರ್ಷದ ಬಾಲ ಸಾಹಿತ್ಯ ಪುರಸ್ಕಾರ ಬೊಕ್ಕ ಯುವ ಪುರಸ್ಕಾರ ಗೆಂದಿನಕ್ಲೆನ ಪಟ್ಟಿನ್ ಕೇಂದ್ರ ಸಾಹಿತ್ಯ ಅಕಾಡೆಮಿ ಪ್ರಕಟ ಮಲ್ದ್ಂಡ್.

ಈ ಬಾಲ ಸಾಹಿತ್ಯ ಪುರಸ್ಕಾರಗ್ ಇನ್ಫೋಸಿಸ್ ಸಂಸ್ಥಾಪಕಿ ಸುಧಾ ಮೂರ್ತಿ ಆಯ್ಕೆ ಆತೆರ್. ಮೆರೆನೊಟ್ಟಿಗೆ ವಿಜಯಶ್ರೀ ಹಾಲಾಡಿ ಸೇರ್ದ್ 22 ಜನ ಆಯ್ಕೆ ಆತೆರ್.

ಯುವ ಪುರಸ್ಕಾರಗ್ ಮಂಜು ನಾಯಕ್ ಚಳ್ಳೂರು ಸೇರಿನಂಚನೆ 20 ಲೇಖಕೆರ್ ಆತೆರ್. ಸುಧಾಮೂರ್ತಿ ಮೆರೆನ ಗ್ರ್ಯಾಂಡ್ ಪೇರೆಂಟ್ಸ್ ಬ್ಯಾಗ್ ಆಫ್ ಸ್ಟೋರೀಸ್ ಪನ್ಪುನ ಕಥಾ ಸಂಕಲನಗ್ ಪ್ರಶಸ್ತಿ ತಿಕ್ ದ್ಂಡ್.

KARBWWB Recruitment 2023 notification given for recruitment for SDA,Field inspectors ಕರ್ನಾಟಕ ಕಟ್ಟಡ ಕಾರ್ಮಿಕೆರೆನ ಕಲ್ಯಾಣ ಮಂಡಳಿಗ್ ನೇಮಕಾತಿ

ಕರ್ನಾಟಕ ಕಟ್ಟಡ ಬೊಕ್ಕ ಬೇತೆ ನಿರ್ಮಾಣ ಕಾರ್ಮಿಕೆರೆನ ಕಲ್ಯಾಣ ಮಂಡಳಿ ನೇಮಕಾತಿ (KARBWWB Recruitment 2023) ಜೂನ್ 2023 ತ್ತ ಅಧಿಕೃತ ಅಧಿಸೂಚನೆದ ಮುಖೇನ SDA, ಫೀಲ್ಡ್ ಇನ್ಸ್‌ಪೆಕ್ಟರ್‌ ಬೇಲೆನ್ ಭರ್ತಿ ಮಲ್ಪೆರೆ ಅರ್ಹ ಬೊಕ್ಕ ಆಸಕ್ತ ಅಭ್ಯರ್ಥಿಲು ಅರ್ಜಿ ಸಂದಾವೊಲಿ.

ಅರ್ಹ ಬೊಕ್ಕ ಆಸಕ್ತ ಅಭ್ಯರ್ಥಿಲು ನಿಗದಿ ಮಲ್ತಿನ ತಾರೀಕ್ ದುಯಿ ಅರ್ಜಿ ಸಂದಾವೊಡು. ಅಭ್ಯರ್ಥಿಲು ತನ್ನ ಆನ್‌ಲೈನ್ ಅರ್ಜಿನ್ ಭರ್ತಿ ಮಲ್ಪುನ ದುಂಬು ಈ ಬೇಲೆಗ್ ಅಗತ್ಯ ಇಪ್ಪುನ ಪ್ರಾಯದ ಮಿತಿ, ವಿದ್ಯಾರ್ಹತೆ ಬೊಕ್ಕ ಅನುಭವ ಸೇರಿನಂಚೆನೆ ಮಾತ ಅರ್ಹತಾ ಷರತ್ತ್ ನ್ ಪರಿಶೀಲನೆ ಮಲ್ಪೊಡು.

ನೆತ್ತ ನೇಮಕಾತಿ ಅಧಿಸೂಚನೆದ ಪೊಲಬು:

ಸಂಸ್ಥೆ ಪುದರ್: ಕರ್ನಾಟಕ ಕಟ್ಟಡ ಬೊಕ್ಕ ಬೇತೆ ನಿರ್ಮಾಣ ಕಾರ್ಮಿಕೆರೆನ ಕಲ್ಯಾಣ ಮಂಡಳಿ (KARBWWB)
ಒಟ್ಟು ಬೇಲೆ: 186
ಬೇಲೆದ ಜಾಗೆ: ಕರ್ನಾಟಕ
ಬೇಲೆದ ಪುದರ್: SDA, ಫೀಲ್ಡ್ ಇನ್ಸ್‌ಪೆಕ್ಟರ್‌
ಸಂಬಳ: ರೂ.21400-70850/- ಪ್ರತಿ ತಿಂಗೊಲ್

KARBWWB ನೇಮಕಾತಿ ಬೇಲೆದ ಪೊಲಬು:

ಕಲ್ಯಾಣ ಅಧಿಕಾರಿ: 12
ಕ್ಷೇತ್ರ ನಿರೀಕ್ಷಕೆರ್: 60
ಸುರುತ್ತ ವಿಭಾಗದ ಸಹಾಯಕೆರ್ (FDA): 12
ಖಾಸಗಿ ಸಲಹೆಗಾರೆರ್: 2 ರಡ್ಡನೇ ವಿಭಾಗದ ಸಹಾಯಕೆರ್ (SDA): 100

ಶೈಕ್ಷಣಿಕ ಅರ್ಹತೆ ಬೊಕ್ಕ ಪ್ರಾಯ:

ಕರ್ನಾಟಕ ಕಟ್ಟಡ ಬೊಕ್ಕ ಬೇತೆ ನಿರ್ಮಾಣ ಕಾರ್ಮಿಕೆರೆನ ಕಲ್ಯಾಣ ಮಂಡಳಿ ನೇಮಕಾತಿ ಅಧಿಕೃತ ಅಧಿಸೂಚನೆದ ಪ್ರಕಾರ, ಅಭ್ಯರ್ಥಿಲು ಈ ಇಲಾಖೆಡ್ ಖಾಲಿ ಇಪ್ಪುನ ಬೇಲೆದ ಅನುಸಾರವಾದ್ ವಿದ್ಯಾರ್ಹತೆ ಬೊಕ್ಕ ಪ್ರಾಯ KARBWWB ನಿಯಮದ ಪ್ರಕಾರ ಇಪ್ಪೊಡು.

ಪ್ರಾಯದ ಸಡಿಲಿಕೆ:

ಅರ್ಹ ಅಭ್ಯರ್ಥಿಲೆಗ್ ಪ್ರಾಯದ ಸಡಿಲಿಕೆ ಉಂಡು.

ಆಯ್ಕೆ ಪ್ರಕ್ರಿಯೆ:

ಅರ್ಹ ಅಭ್ಯರ್ಥಿಲೆನ್ ಲಿಖಿತ ಪರೀಕ್ಷೆ ಬೊಕ್ಕ ಸಂದರ್ಶನದ ಮುಖೇನ ಆಯ್ಕೆ ಮಲ್ಪೆರೆ ಆಪುಂಡು.

KARBWWB ನೇಮಕಾತಿ ಬೇಲೆದ ಸಂಬಳ (ತಿಂಗೊಲ್ ಗ್):

ಕಲ್ಯಾಣ ಅಧಿಕಾರಿ: 37900-70850/- ರೂ.
ಕ್ಷೇತ್ರ ನಿರೀಕ್ಷಕೆರ್:33450-62600/- ರೂ.
ಸುರುತ್ತ ವಿಭಾಗದ ಸಹಾಯಕೆರ್ (FDA): 27650-52650/- ರೂ.
ಖಾಸಗಿ ಸಲಹೆಗಾರೆರ್: 27650-52650/- ರೂ.
ರಡ್ಡನೇ ವಿಭಾಗದ ಸಹಾಯಕೆರ್ (SDA): 21400-42000/- ರೂ.

ಆನ್‌ಲೈನ್‌ ಡ್ ಜೂನ್ 23 ರ್ದ್ ಅರ್ಜಿ ಸಂದಾವುನ ಪ್ರಕ್ರಿಯೆ ಸುರು ಆತ್ಂಡ್. ಅರ್ಜಿ ಸಂದಾವುನಕುಲು ಜುಲೈ 22 ಮುಟ್ಟ ಸಂದಾವೊಲಿ. ನೆತ್ತ ಅರ್ಜಿ ಫೀಸ್ ನ್ ಕಟ್ಟಿಯೆರೆ ಜುಲೈ 25 ಜುಲೈ ಅಕೇರಿದ ತಾರೀಕ್ ಆತ್ಂಡ್. ಆಂಡ ಇ-ಪೋಸ್ಟ್ ಆಫೀಸ್ ದ ಮುಖೇನ ಫೀಸ್ ಕಟ್ಟೊನಕುಲು ಜು. 26 ತ್ತುಲಯಿ ಕಟ್ಟೊಡು.

Earthquake of 3.2 intensity in Haryana ಹರಿಯಾಣಡ್ 3.2 ಬಿರ್ಸ್ ದ ಭೂಕಂಪ

ಹರಿಯಾಣದ ರೋಹ್ಟಕ್ ಜಿಲ್ಲೆಡ್ ಇನಿ ಬೊಲ್ಪುಗು 3.2 ಬಿರ್ಸ್ ದ ಭೂಕಂಪ ಆತ್ಂಡ್ ಪಂದ್ ರಾಷ್ಟ್ರೀಯ ಭೂಕಂಪನಶಾಸ್ತ್ರ ಕೇಂದ್ರ ತೆರಿಪಾದ್ಂಡ್.

ಈ ಭೂಕಂಪರ್ದ್ ತೊಂದರೆ ಆಯಿನ ಬಗ್ಗೆ ಒವ್ವೇ ಪೊಲಬು ವರದಿ ಆತಿಜಿ. ಜೂನ್ 6 ಕ್ಕ್ ಹರಿಯಾಣದ ಜಜ್ಜರ್ ಡ್ ಭೂಮಿರ್ದ್ 12 ಕಿಮೀ ಅಡಿಟ್ಟ್ 2.5 ಬಿರ್ಸ್ ದ ಭೂಕಂಪ ಆತ್ಂಡ್.

A farmer commits suicide as he could not find a suitable girl for marriage!! ಮದಿಮೆ ಆಯೆರೆ ಪೊಣ್ಣು ತಿಕಿಜಿ ಪಂದ್ ಆತ್ಮಹತ್ಯೆ ಮಲ್ತೊನ್ನ ರೈತೆ

ಮದಿಮೆ ಆಯೆರೆ ಪೊಣ್ಣು ತಿಕಿಜಿ ಪಂದ್ ಮಾಸ್ತ್ ಬೇಜಾರಾಯಿನ ರೈತೆಯೊರಿ ವಿಷ ಪರ್ದ್ ಆತ್ಮಹತ್ಯೆ ಮಲ್ತೊನ್ನ ಘಟನೆ ಹಾವೇರಿ ಜಿಲ್ಲೆದ ಬ್ಯಾಡಗಿ ತಾಲೂಕ್ ದ ಮಾಸಣಗಿಡ್ ನಡತ್ಂಡ್.

ಈ ಘಟನೆಗ್ ತೀರ್ ಪೋಯಿನಾರ್ ಮಂಜುನಾಥ ನಾಗನೂರು (36) ಪಂದ್ ತೆರಿದ್ ಬೈದ್ಂಡ್.

ಮೇರ್ ಕರಿನ 8 ವರ್ಷೊದಿಂಚ ಪೊಣ್ಣು ನಾಡೊಂದು ಇತ್ತೆರ್. ಆಂಡ ಮೆರೆಗ್ ಪೊಣ್ಣು ತಿಕ್ ದ್ ಇಜ್ಜಂಡ್. ಇಂಚಾದ್ ಎನ್ನ ಪೊಪ್ಪ ಅಮ್ಮಗ್ ಎನ್ನೆರ್ದ್ ಮಾಸ್ತ್ ತೊಂದರೆ ಅವೊಂದು ಉಂಡು ಪಂದ್ ಡೆತ್ ನೋಟ್ ಬರೆದ್ ಆತ್ಮಹತ್ಯೆ ಮಲ್ತೊಂದೆರ್.

Pesticide traces found in Shabarimale Prasada ಶಬರಿಮಲೆ ಪ್ರಸಾದಡ್ ಕೀಟನಾಶಕ ಪತ್ತೆ

ಶಬರಿಮಲೆಟ್ಟ್ ಕೊರ್ಪಿನ ಅರವಣ ಪಾಯಸ ಪ್ರಸಾದಡ್ ಕೀಟನಾಶಕ ಪತ್ತೆ ಆತ್ಂಡ್.

ಈ ಬಗೆಟ್ 32 ಟಿನ್ ನ್ ರಾಜ್ಯ ಆಹಾರ ಸುರಕ್ಷತಾ ಇಲಾಖೆ ತಪಾಸಣೆ ಮಲ್ಪೆರೆ ನಿರ್ಧಾರ ಮಲ್ದ್ಂಡ್. ಏಲಕ್ಕಿ ಪಾಡ್ದಿನ ಅರವಣ ಪಾಯಸದ 6.65 ಲಕ್ಷ ಟಿನ್ ಡ್ ಕೀಟನಾಶಕ ಪತ್ತೆ ಆತ್ಂಡ್. ಅಂಚಾದ್ ಕೀಟನಾಶಕ ಪ್ರಮಾಣದ ಪತ್ತೆಗ್ ಕುಡೊರ ಗುಣಮಟ್ಟ ಪರೀಕ್ಷೆ ಮಲ್ಪೆರೆ ತಿರುವಾಂಕೂರು ದೇವಸ್ವಂ ಮಂಡಳಿಯ ಬಿನ್ನಾಪುಗ್ ಸುಪ್ರೀಂ ಒಪ್ಪಿಗೆ ಕೊರಿನ ಬೊಕ್ಕ ಪರಿಶೀಲನೆಗ್ ಕಡಪಾದೆರ್.

Scooterist meets with an accident and loses life when trying to avoid a dog on the road!! ಅಡ್ಡ ಬತ್ತಿನ ನಾಯಿನ್ ತಪ್ಪಾಯರೆ ಪೋದು ಸ್ಕೂಟರ್ ಆಕ್ಸಿಡೆಂಟ್: ತೀರ್ ಪೋಯಿನ ಸವಾರೆ

ಕುಡ್ಲ: ನಾಯಿ ಅಡ್ಡ ಬತ್ತಿನ ಕಾರಣ ಗೇನ ತತ್ತ್ ದ್ ಸ್ಕೂಟರ್ ಸವಾರೆ ಡಿವೈಡರ್ ಗ್ ಗುದ್ದುದು ತರೆಕ್ಕ್ ಮಸ್ತ್ ಪೆಟ್ಟಾದ್ ಆಸ್ಪತ್ರೆಗ್ ಸಾಗಾವುನ ತಾದಿ ನಡುಟ್ ತೀರ್ ಪೋಯಿನ ಘಟನೆ ಯೆಯ್ಯಾಡಿ ಕೈತಲ್ ದ ಶರ್ಬತ್ ಕಟ್ಟೆಡ್ ನಡದ್ಂಡ್.

ಮರೋಳಿ ಬಜ್ಜೋಡಿ ನಿವಾಸಿ ನರಸಿಂಹ ಗಟ್ಟಿ (67) ತೀರ್ ಪೋಯಿನಾರ್. ಮೇರ್ ಕಂಪೆನಿದ ಡೀಲರ್ ಶಿಪ್ ಪಡೆದ್ ವ್ಯವಹಾರ ಮಲ್ತೊಂದು ಇತ್ತೆರ್. ಮೆರೆಗ್ ಬೊಡೆದಿ, ರಡ್ಡ್ ಆಣ್ ಜೋಕುಲು ಉಲ್ಲೆರ್.

MLA Gurme Suresh Shetty visits to inspect work progress at the Hejmadi Bunder being built at a cost of 188 crores ಪೆಜಮಾಡಿ ಬಂದರ್ ದ ಬೇಲೆ ತೂವರೆ ಬತ್ತಿನ ಶಾಸಕೆ ಗುರ್ಮೆ ಸುರೇಶ್ ಶೆಟ್ರ್

ಪೆಜಮಾಡಿ: ಅಂದಾಜಿ 188 ಕೋಟಿ ರೂ. ಅನುದಾನಡ್ ಮಂಜೂರಾದ್ ಶೇ. 60 ದಾತ್ ಬೇಲೆ ಮುಗಿದಿನ ಪೆಜಮಾಡಿದ ಬಂದರ್ ದ ಬೇಲೆನ್ ತೂವರೆ ಕಾಪು ಶಾಸಕೆರ್ ಗುರ್ಮೆ ಸುರೇಶ್ ಶೆಟ್ಟಿ ಮೇರ್ ಇಲಾಖಾಧಿಕಾರಿಲೆನೊಟ್ಟಿಗೆ ಶುಕ್ರಾರ ಭೇಟಿ ಕೊರಿಯೆರ್.

ಶಾಸಕೆರ್ ಸುರೇಶ್ ಶೆಟ್ರ್ ಪಾತೆರ್ದ್, ಗುಣಮಟ್ಟ ತೂದು ಬೇಗಡೇ ಕಾಮಗಾರಿದ ಬೇಲೆ ಮಲ್ಪುಲೆಕ್ಕ, ಅಧಿಕಾರಿಲೆಗ್ ತೆರಿಪಾದ್ ಬಾಕಿ ಇಪ್ಪುನ ಅನುದಾನದ ಬುಡುಗಡೆದ ಬಗೆಟ್ಟ್ ಮೀನುಗಾರಿಕಾ ಸಚಿವೆರೆಡ ಪಾತೆರ್ದ್, ಬೇಗಡೇ ಅನುದಾನ ಬುಡುಗಡೆ ಮಲ್ಪುಲೆಕ್ಕ ಬಿನ್ನಾಪು ಸಂದಾವೆ ಪಂದ್ ಪಂಡೆರ್.

ಈ ಪೊರ್ತುಡು ನಿಕಟಪೂರ್ವ ಶಾಸಕೆರ್ ಲಾಲಾಜಿ ಆರ್ ಮೆಂಡನ್, ಹೆಜಮಾಡಿ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಪಾಂಡುರಂಗ, ಉಪಾಧ್ಯಕ್ಷೆರ್ ಪವಿತ್ರ ಗಿರೀಶ್, ಪೆಜಮಾಡಿ ಗ್ರಾಮ ಪಂಚಾಯತ್ ಸದಸ್ಯೆರ್ ಪ್ರಾಣೇಶ್ ಪೆಜಮಾಡಿ, ಶರಣ್ ಮಟ್ಟು, ಜಗನ್ನಾಥ್, ನಳಿನಿ, ಸುಜಾತ, ಬಬಿತಾ, ಪೆಜಮಾಡಿ ಮೀನುಗಾರಿಕೆ ಬಂದರು ಸಮಿತಿದ ಅಧ್ಯಕ್ಷೆರ್ ಸದಾಶಿವ ಕೋಟ್ಯಾನ್, ಉಪಾಧ್ಯಕ್ಷೆರ್ ರವಿ ಕುಂದರ್, ಪ್ರಧಾನ ಕಾರ್ಯದರ್ಶಿ ವಿಜಯ ಬಂಗೇರ, ಮೀನುಗಾರ ಮುಖಂಡೆರ್ ಹರೀಶ್ ಚಂದ್ರ ಮೆಂಡನ್, ನಾರಾಯಣ ಮೆಂಡನ್, ದಿವಾಕರ ಮೆಂಡನ್ ಬೊಕ್ಕ ಬಂದರು ಇಲಾಖೆದ ಕಾರ್ಯಪಾಲಕ ಅಭಿಯಂತರೆರ್ ಶ್ರೀನಿವಾಸ್ ಮೂರ್ತಿ, ಸಹಾಯಕ ಕಾರ್ಯಪಾಲಕ ಅಭಿಯಂತರೆರ್ ಉದಯ್ ಕುಮಾರ್, ಸಹಾಯಕೆರ್ ಅಭಿಯಂತರೆರ್ ಜಯರಾಜ್ ಬೊಕ್ಕ ಕೈತಲ್ ದಕುಲು ಇತ್ತೆರ್.

Vidhana Parishad by elections: Jagdish Shettar , Boseraju and Tipanna Kamakanur elected as members unopposed ವಿಧಾನ ಪರಿಷತ್ ಗ್ ಶೆಟ್ಟರ್ ಸೇರ್ದ್ ಕಾಂಗ್ರೆಸ್’ದ ಮೂಜಿ ಜನ ಅವಿರೋಧ ಆಯ್ಕೆ

ಬೆಂಗ್ಲೂರ್: ಮಾಜಿ ಸಿಎಂ ಜಗದೀಶ್‌ ಶೆಟ್ಟರ್, ಸಚಿವೆರ್ ಬೋಸರಾಜು ಬೊಕ್ಕ ತಿಪ್ಪಣ್ಣ ಕಮಕನೂರು ಮೊಕುಲು ವಿಧಾನ ಪರಿಷತ್‌ ಸದಸ್ಯೆರಾದ್ ಅವಿರೋಧ ಆಯ್ಕೆ ಆತೆರ್.

ವಿಧಾನ ಪರಿಷತ್ ಉಪ ವೋಟುಗ್ ನಾಮಪತ್ರ ಸಂದಾಯಿನ ಕಾಂಗ್ರೆಸ್ ದ ಮೂಜಿ ಅಭ್ಯರ್ಥಿಲಾಯಿನ ಜಗದೀಶ್ ಶೆಟ್ಟರ್, ತಿಪ್ಪಣ್ಣ ಕಮಕನೂರು ಬೊಕ್ಕ ಸಚಿವೆರ್ ಬೋಸರಾಜು ಮೇರ್ ಅವಿರೋಧವಾದ್ ಆಯ್ಕೆ ಆತೆರ್ ಪಂದ್ ಚುನಾವಣಾಧಿಕಾರಿ ವಿಶಾಲಾಕ್ಷಿ ಮೇರ್ ಶುಕ್ರಾರ ಅಧಿಕೃತವಾದ್ ಘೋಷಣೆ ಮಲ್ದೆರ್.

ಜೂ.26 ರ್ದ್ ಕಾರ್ಲದ ಪರಶುರಾಮ ಥೀಮ್ ಪಾರ್ಕ್‌ಗ್ ಪ್ರವೇಶ ಇಜ್ಜಿ..!

ಕಾರ್ಲ: ತಾಲೂಕ್ ದ ಯರ್ಲಪಾಡಿ ಗ್ರಾಮ ಪಂಚಾಯತ್ ವ್ಯಾಪ್ತಿದ ಪರಶುರಾಮ ಥೀಮ್ ಪಾರ್ಕ್‌ ಗ್ ಸದ್ಯೊಗು ಸಾರ್ವಜನಿಕೆರೆಗ್ ಪ್ರವೇಶ ಬಂದ್ ಮಲ್ದೆರ್.

ಥೀಮ್ ಪಾರ್ಕ್ ಡಿತ್ತಿನ ಪರಶುರಾಮ ಮೂರ್ತಿನ್ ಗಟ್ಟಿಮಲ್ಪುನ, ಅಂಚೆನೆ ತೆಡಿಲ್ ನಿರೋಧಕ ಪಾಡುನ ಬೊಕ್ಕ ಮಣ್ಣ್ ಪತ್ತಂದಿನ ಲೇಪ ಪಾಡುನ ಬೇಲೆ ಇಪ್ಪುನೆರ್ದಾವರ ಈ ನಿರ್ಧಾರನ್ ಅಧಿಕಾರಲು ದೆತೊಂದೆರ್.

ಜೂ. 26 ರ್ದ್ ಸೆಪ್ಟೆಂಬರ್ ತಿಂಗೊಲ್ ದ ಅಕೇರಿ ಮುಟ್ಟ ಪರಶುರಾಮ ಥೀಮ್ ಪಾರ್ಕ್‌ಗ್ ಸಾರ್ವಜನಿಕೆರ್ ಬೊಕ್ಕ ಪ್ರವಾಸಿಗರೆರ್ ಭೇಟಿ ಕೊರ್ಪುನೆನ್ ಉಂತಾದೆರ್ ಪಂದ್ ಕಾರ್ಲ ತಹಶೀಲ್ದಾರೆರ್ ಪ್ರಕಟಣೆಡ್ ತೆರಿಪಾದೆರ್.

ಬಿಗ್ ಬಾಸ್ ರೂಪೇಶ್ ಶೆಟ್ಟಿ ನಟನೆ, ನಿರ್ದೇಶನದ “ಸರ್ಕಸ್” ತುಳು ಪಿಚ್ಚರ್ ಬುಡುಗಡೆ

ಕುಡ್ಲ : ಬಿಗ್ ಬಾಸ್ ವಿನ್ನರ್ ರೂಪೇಶ್ ಶೆಟ್ಟಿ ನಿರ್ದೇಶನದ ಭಾರಿ ನಿರೀಕ್ಷೆದ “ಸರ್ಕಸ್” ತುಳು ಸಿನಿಮಾ ಶುಕ್ರವಾರ ಕಾಂಡೆ ಭಾರತ್ ಮಾಲ್ ದ ಬಿಗ್ ಸಿನಿಮಾಸ್ ಡ್ ಬುಡುಗಡೆ ಆಂಡ್. ಬೈದಿನ ಬಿನ್ನೆರ್, ಗಣ್ಯೆರ್ ತುಡರ್ ಅರ್ಲಾದ್ ಲೇಸ್ ಉದಿಪನ ಮಲ್ತೆರ್ .

ಈ ಪೊರ್ತುಡು ಪಾತೆರ್ನ ಸರ್ಕಸ್ ಪಿಚ್ಚರ್ ದ ನಿರ್ದೇಶಕೆರ್, ನಟೆ ರೂಪೇಶ್ ಶೆಟ್ರ್, “ತುಳು ಸಿನಿಮಾಗ್ ಎಲ್ಯ ಮಾರ್ಕೆಟ್ ಇತ್ತ್ಂಡಲ ಈತ್ ಮಲ್ಲ ಮಟ್ಟ್ ಡ್ ಸರ್ಕಸ್ ಸಿನಿಮಾಗ್ ಪ್ರೋತ್ಸಾಹ ಕೊರ್ಪಿನವು ಭಾರಿ ಖುಷಿತ್ತ ವಿಚಾರ ಪಂದ್ ಪಂಡೆರ್.

ತುಳು ಚಿತ್ರರಂಗ ಇತ್ತೆ ಭಾರಿ ಎತ್ತರೊಡು ಉಂಡು. ಆಂಡ ಆ ಎತ್ತರೊಗು ಏರಿಯರೆ ಕೆ.ಎನ್. ಟೇಲರ್ ನಂಚಿನ ಹಿರಿಯ ಕಲಾವಿದೆರೆರ್ದ್ ಇತ್ತೆದ ಯುವ ಕಲಾವಿದರ್ ಮುಟ್ಟ ಸಾರಸಾರ ಕಲಾವಿದೆರ್ ಬೆನ್ನಿ ಬೆನ್ತೆರ್.ಅಕ್ಲೆನ ಮಾತೆರ್ನಲ ಶ್ರಮರ್ದಾತ್ರ ತುಳು ಸಿನಿಮಾ ತುಳುವೆರ್ನ ಪ್ರೀತಿ ಗೆಂದ್ ದ್ಂಡ್. ಮಾತೆರ್ಲ ಸರ್ಕಸ್ ಪಿಚ್ಚರ್ ನ್ ತೂದು ಬೆರಿಬಲ ಕೊರ್ಲೆ ಪಂಡೆರ್.

ಅವೆರ್ದ್ ಬೊಕ್ಕ ಪಾತೆರಿನ ಭೋಜರಾಜ್ ವಾಮಂಜೂರು, “ಸರ್ಕಸ್ ಸಂಪೂರ್ಣ ಮನಸ್ ಗ್ ಉಲ್ಲಾಸ್ ಕೊರ್ಪಿನ ಪಿಚ್ಚರ್. ಗಿರಿಗಿಟ್ ರ್ದ್ ಬೊಕ್ಕ ಕುಡೊರ ಅವೇ ಟೀಮ್ ಒಟ್ಟಾದ್ ಅಭಿನಯ ಮಲ್ತ್ ದ. ನಿಕ್ಲೆನ ಪ್ರೋತ್ಸಾಹ ನೇ ಎಂಕ್ಲೆಗ್ ಮಲ್ಲ ಬಲ ಆದುಂಡು ಪಂಡೆರ್.

ತೆಲಿಕೆದ ಬೊಳ್ಳಿ ದೇವದಾಸ್ ಕಾಪಿಕಾಡ್ ಪಾತೆರ್ದ್ “ಸರ್ಕಸ್ ಚಿತ್ರ ತುಳುನಾಡ್ ಡ್ ಲ ಸಕ್ಸೆಸ್ ಆವಡ್. ನನಾತ್ ತುಳು ಪಿಚ್ಚರ್ ಲು ಬುಡುಗಡೆ ಆದ್ ಜನಕ್ಲೆನ ಮನಸ್ ಗೆಂದಡ್ ಪಂಡೆರ್.

ಅರ್ಜುನ್ ಕಾಪಿಕಾಡ್ ಪಾತೆರ್ದ್, “ತುಳು ಚಿತ್ರರಂಗಡ್ ಸರ್ಕಸ್ ಸಿನಿಮಾ ಭಾರಿ ಪುದರ್ ಪಡೆವೊಂದುಂಡು. ಬುಡುಗಡೆ ಆಯಿನ ಮಾತ ಚಿತ್ರಮಂದಿರಡ್ ಲ ಸಿನಿಮಾ ಯಶಸ್ಸು ಆವಡ್ ” ಪಂಡೆರ್.

ಲೇಸ್ ಡ್ ಪ್ರಕಾಶ್ ಪಾಂಡೇಶ್ವರ್, ವಾಲ್ಟರ್ ನಂದಳಿಕೆ, ವಿ.ಜಿ.ಪಾಲ್, ತಮ್ಮ ಲಕ್ಷ್ಮಣ, ರೂಪೇಶ್ ಶೆಟ್ಟಿ, ಹೀರೊಯಿನ್ ರಚನಾ ರೈ, ಸುಧಾಕರ ಶೆಟ್ಟಿ ಮುಗ್ರೋಡಿ, ಅನಿಲ್ ಶೆಟ್ಟಿ, ಮಂಜುನಾಥ್ ಅತ್ತಾವರ, ಸಂಪತ್ ಶೆಟ್ಟಿ, ಭೋಜರಾಜ್ ವಾಮಂಜೂರ್, ಸಚಿನ್ ಎ ಎಸ್ ಉಪ್ಪಿನಂಗಡಿ, ಅನಿಲ್ ದಾಸ್, ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್ ಶೆಟ್ಟಿ, ಜಗನ್ನಾಥ ಶೆಟ್ಟಿ ಬಾಳ, ಪ್ರಕಾಶ್ ತೂಮಿನಾಡ್, ಪ್ರದೀಪ್ ಆಳ್ವ ಕದ್ರಿ, ಸಾಯಿಕೃಷ್ಣ ಕುಡ್ಲ, ರಾಜಗೋಪಾಲ್ ರೈ, ದಿವಾಕರ್ ಪಾಂಡೇಶ್ವರ, ನಾರಾಯಣ ಪೂಜಾರಿ, ತಾರಾನಾಥ ಶೆಟ್ಟಿ ಬೋಳಾರ, ಮುಖೇಶ್ ಹೆಗ್ಡೆ, ಇಸ್ಮಾಯಿಲ್ ಮೂಡುಶೆಡ್ಡೆ, ಲಾಯ್ ವಾಲೆಂಟೈನ್ ಸಲ್ದಾನ, ಚಂದ್ರಹಾಸ್ ಉಳ್ಳಾಲ್, , ನವೀನ್ ಶೆಟ್ಟಿ ಎಡ್ಮೆಮಾರ್, ನವೀನ್ ಶೆಟ್ಟಿ, ಅಥರ್ವ ಪ್ರಕಾಶ್, ಆನಂದ ಕುಂಪಲ ಮೊಕುಲು ಮಾತ ಇತ್ತೆರ್.

ಸರ್ಕಸ್ ಚಿತ್ರನ್ ಶೂಲಿನ್ ಫಿಲಂಸ್, ಮುಗ್ರೋಡಿ ಫಿಲಂಸ್, ಮಂಜುನಾಥ ಅತ್ತಾವರ ನಿರ್ಮಾಣ ಮಲ್ದೆರ್. ರೂಪೇಶ್ ಶೆಟ್ಟಿ, ನವೀನ್ ಡಿ ಪಡೀಲ್, ಅರವಿಂದ್ ಬೋಳಾರ್, ಭೋಜರಾಜ್ ವಾಮಂಜೂರ್, ಪಂಚಮಿ ವಾಮಂಜೂರ್, ಸಾಯಿಕೃಷ್ಣ ಕುಡ್ಲ, ನಟಿ ರಚನಾ ರೈ, ಪ್ರಸನ್ನ ಶೆಟ್ಟಿ ಬೈಲೂರು, ಸಂದೀಪ್ ಶೆಟ್ಟಿ ಮಾಣಿಬೆಟ್ಟು, ಉಮೇಶ್ ಮಿಜಾರ್, ಚಂದ್ರಹಾಸ ಉಳ್ಳಾಲ, ರೂಪ ವರ್ಕಾಡಿ, ಪ್ರದೀಪ್ ಆಳ್ವ ಕದ್ರಿ,ನಿತೇಶ್ ಶೆಟ್ಟಿ ಎಕ್ಕಾರ್ ಅಭಿನಯ ಮಲ್ದೆರ್.

ಕನ್ನಡದ ಖ್ಯಾತ ಗಾಯಕೆ ಚಂದನ್ ಶೆಟ್ಟಿ ಪನ್ತಿನ ಟೈಟಲ್ ಸಾಂಗ್ ಗ್ ಲಾಯ್ ವಾಲೆಂಟೈನ್ ಸಲ್ದಾನ ಇವರ ಸಂಗೀತ ಕೊರ್ತೆರ್. ನವೀನ್ ಶೆಟ್ಟಿ ನೃತ್ಯ ಸಂಯೋಜನೆ ಮಲ್ದೆರ್. ರೂಪೇಶ್ ಶೆಟ್ಟಿ ಸಾಹಿತ್ಯ ಬರೆತೆರ್. “ಗಿರಿಗಿಟ್” ಪುಗರ್ತೆದ ಪ್ರಸನ್ನ ಶೆಟ್ಟಿ ಬೈಲೂರು ಸಂಭಾಷಣೆ ಬರೆತೆರ್. ನಿರಂಜನ್ ದಾಸ್ ಕ್ಯಾಮರಾ, ರಾಹುಲ್ ವಸಿಷ್ಠ ಸಂಕಲನದ ಜಬದಾರಿ ಒಯಿಸೊಂದೆರ್.

ಜಗತ್ತ್ ಇಡೀಕ ಬುಡುಗಡೆ

ಸರ್ಕಸ್ ತುಳು ಸಿನಿಮಾ ಕುಡ್ಲದ ರೂಪವಾಣಿ, ಭಾರತ್ ಸಿನಿಮಾಸ್, ಪಿವಿಆರ್, ಸಿನಿಪೊಲಿಸ್, ಸುರತ್ಕಲ್ ದ ನಟರಾಜ್, ಸಿನಿಗ್ಯಾಲಕ್ಸಿ, ಪಡುಬಿದ್ರೆದ ಭಾರತ್ ಸಿನಿಮಾಸ್, ಒಡಿಪುದ ಕಲ್ಪನಾ, ಮಣಿಪಾಲದ ಭಾರತ್ ಸಿನಿಮಾಸ್, ಐನಾಕ್ಸ್, ಬೆದ್ರದ ಅಮರಶ್ರೀ, ಕಾರ್ಲದ ರಾಧಿಕಾ, ಪ್ಲಾನೆಟ್, ಬೊಲ್ತೇರ್ ದ ಭಾರತ್, ಕುಂದಾಪುರ ಭಾರತ್ ಸಿನಿಮಾಸ್, ಕೊಪ್ಪದ ಜೆಎಂಜೆ ಟಾಕೀಸ್, ಪುತ್ತೂರುದ ಭಾರತ್ ಸಿನಿಮಾಸ್, ಸುಳ್ಯದ ಸಂತೋಷ್, ಕಾಸ್ರೋಡುದ ಕೃಷ್ಣ, ಮುಳ್ಳೇರಿಯದಲ್ ಕಾವೇರಿ ಸಿನಿಮಾಸ್ ಚಿತ್ರಮಂದಿರಡ್ ಪ್ರದರ್ಶನ ಆವರೆ ಉಂಡು.
ಅಂಚೆನೆ ದುಬೈ, ಅಬುದಾಬಿ, ಅಜ್ಮಾನ್, ಶಾರ್ಜಾ, ಒಮಾನ್, ಮಸ್ಕತ್, ಕತಾರ್ ದೇಶೊಲೆಡ್ಲ ಸರ್ಕಸ್ ಸಿನಿಮಾ ಬುಡುಗಡೆ ಆತ್ಂಡ್.

ಗೌಜಿದ ಮೆರವಣಿಗೆ

ಸುಕ್ರಾರ ಕಾಂಡೆ ನೆಹರೂ ಮೈದಾನರ್ದ್ ಭಾರತ್ ಮಾಲ್ ಮುಟ್ಟ ಸರ್ಕಸ್ ಪಿಚ್ಚರ್ ಕೂಟದಕುಲು ಬರ್ಸದ ನಡುಟ್ಟುಲ ಭಾರಿ ಗೌಜಿದ ಮೆರವಣಿಗೆ ನಡಪಾಯೆರ್.

ಚೆಂಡೆ, ಕೊಂಬು ವಾದ್ಯ, ಕಲ್ಲಡ್ಕದ ಗೊಂಬೆ ನಲಿಕೆ ಮೆರವಣಿಗೆಗ್ ಪೊಸ ಕಳೆ ಕನತ್ಂಡ್. ಭಾರಿ ಸಂಖ್ಯೆಡ್ ತುಳು ಚಿತ್ರಪ್ರೇಮಿಲು ಪಾಲ್ ಪಡೆದಿತ್ತೆರ್. ರೂಪೇಶ್ ಶೆಟ್ಟಿ, ಭೋಜರಾಜ್ ವಾಮಂಜೂರು ಮೊಕುಲು ಮಾತ ಚೆಂಡೆದ ಪೆಟ್ಟ್ ದ ಗ್ ಪಿಲಿ ನಲಿಕೆದ ಪಜ್ಜೆ ಪಾಡ್ದ್ ಕಲಾವಿದೆರೆಗ್ ಉಮೇದ್ ಕೊರಿಯೆರ್.