ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಮುಲ್ಕಿ ರೋಟರಿ ಕ್ಲಬ್ ದ ಅಧ್ಯಕ್ಷೆರಾದ್ ಭುಜಂಗ ಕವತ್ತಾರ್ ಆಯ್ಕೆ

ರೋಟರಿ ಕ್ಲಬ್ ಮುಲ್ಕಿ ನೆತ್ತ ಪೊಸ ಅಧ್ಯಕ್ಷೆರಾದ್ ರೊ. ಭುಜಂಗ ಕವತ್ತಾರ್ ಅಧಿಕಾರ ಸ್ವೀಕಾರ ಮಲ್ಪರೆ ಉಲ್ಲೆರ್.

ನಿಕಟಪೂರ್ವ ಅಧ್ಯಕ್ಷೆರಾದ್ ಜೋವಿನ್ ಪ್ರಕಾಶ್ ಡಿಸೋಜ, ಕಾರ್ಯದರ್ಶಿಯಾದ್ ರೇಮಂಡ್ ರೆಬೆಲ್ಲೋ, ಕೋಶಾಧಿಕಾರಿ ಬೊಕ್ಕ ದಂಡಪಾಣಿಯಾದ್ ಜೋನ್ ಜೆ. ಡಿಸೋಜ, ಸಂಘ ಸೇವಾ ನಿರ್ದೇಶಕೆರಾದ್ ಜೋಯಲ್ ಹೆರಾಲ್ಡ್ ಡಿಸೋಜ, ವೃತ್ತಿ ಸೇವಾ ನಿರ್ದೇಶಕೆರಾದ್ ಲಿಯಾಕತ್ ಆಲಿ, ಸಮುದಾಯ ಸೇವಾ ನಿರ್ದೇಶಕೆರಾದ್ ಅಶೋಕ್ ಕುಮಾರ್ ಶೆಟ್ಟಿ, ಅಂತಾರಾಷ್ಟ್ರೀಯ ಸೇವಾ ನಿರ್ದೇಶಕೆರಾದ್ ಕಿಶೋರ್ ಸಾಲ್ಯಾನ್, ಯುವ ಸೇವಾ ನಿರ್ದೇಶಕೆರಾದ್ ರಿಚಾರ್ಡ್ ಫುರ್ಟಾಡೊ, ಸದಸ್ಯತನ ಸಭಾಪತಿಯಾದ್ ಯಶವಂತ ಎನ್. ಸಾಲ್ಯಾನ್, ದತ್ತಿನಿಧಿ ಸಭಾಪತಿಯಾದ್ ರಾಜಾ ಪತ್ರಾವೊ, ಪಲ್ಸ್ ಪೋಲಿಯೋ ಸಭಾಪತಿಯಾದ್ ಅಜೇಯ್ ಕುಮಾರ್, ಐಟಿ ಬೊಕ್ಕ ವೆಬ್‌ಸೈಟ್ ಸಭಾಪತಿಯಾದ್ ರವಿಚಂದ್ರ ಜಿಲ್ಲಾ ಯೋಜನೆ ಸಭಾಪತಿಯಾದ್ ಜಿನರಾಜ್ ಸಿ‌. ಸಾಲ್ಯಾನ್ ಆಯ್ಕೆ ಆತೆರ್.

ತಿಗಲೆ ಬೇನೆಡ್ ತೀರ್ ಪೋಯಿನ ಬಿಜೆಪಿ ಮುಖಂಡೆ ಸಿದ್ದೇಶ್ ಯಾದವ್

ಬೆಂಗ್ಲೂರ್ ದ ಮಲ್ಲೇಶ್ವರಂ ಡ್ ಇಪ್ಪುನ ಬಿಜೆಪಿ ಮುಖ್ಯ ಕಚೇರಿಡ್ ಸಭೆಕ್ಕ್ ಪಾಲ್ ಪಡೆಯಿನ ಬಿಜೆಪಿ ಮುಖಂಡೆ ಸಿದ್ದೇಶ್ ಯಾದವ್ (46) ತಿಗಲೆ ಬೇನೆಡ್ ತೀರ್ ಪೋಯೆರ್.

ಚಿತ್ರದುರ್ಗ ಜಿಲ್ಲೆದ ಹಿರಿಯೂರು ತಾಲೂಕ್ ದ ಸಿದ್ದೇಶ್, OBC ಮೋರ್ಚಾದ ಪ್ರಧಾನ ಕಾರ್ಯದರ್ಶಿ ಆದಿತ್ತೆರ್. ಜಿಲ್ಲಾ ಪ್ರಭಾರಿಲೆನ ಸಭೆಟ್ಟ್ ಪಾಲ್ ಪಡೆಯೆರೆ ಬಿಜೆಪಿ ಕಚೇರಿಗ್ ಬತ್ತಿತ್ತೆರ್. ‌ಸಭೆ ಮುಗಿತ್ ದ್ ಪಿದಯಿ ಬನ್ನಗ ತಿಗಲೆ ಬೇನೆಡ್ ತೀರ್ ಪೋತೆರ್. ಕೂಡ್ಲೆ ಆಸ್ಪತ್ರೆಗ್ ಸೇರ್ಸಾಂಡಲ ಪ್ರಯೋಜನ ಆತಿಜಿ ಪಂದ್ ತೆರಿದ್ ಬೈದ್ಂಡ್.

ಬೆದ್ರ: ಗೊಬ್ಬೊಂದಿತ್ತಿನ ಕಲ್ಪಾರ್ಥಿ ತೀರ್ ಪೋಯೆರ್

ಬೆದ್ರ: ಟೆನ್ನಿಸ್ ಬಾಲ್ ಗೊಬ್ಬೊಂದು ಇತ್ತಿನ ಕಲ್ಪಾರ್ಥಿಯೊರಿ ತರೆ ತಿರ್ಗ್ ದ್ ಬೂರ್ದು ತೀರ್ ಪೋಯಿನ ಘಟನೆ ಬೆದ್ರದ ಎಕ್ಸಲೆಂಟ್ ಕಾಲೇಜ್ ಡ್ ನಡತ್ಂಡ್.

ಸೆಕೆಂಡ್ ಪಿಯುಸಿ ಕಲ್ತೊಂದು ಇತ್ತಿನ ನಂಜನಗೂಡು ತಾಲೂಕ್ ದ ಕಳಲೆ ಗ್ರಾಮದ 17 ವರ್ಷದ ಆರ್. ಧನುಷ್ ತೀರ್ ಪೋಯಿನಾರ್.
ಈ ಘಟನೆ ಸಿಸಿ ಕ್ಯಾಮೆರಾಡ್ ರೆರ್ಕಾಡ್ ಆತ್ಂಡ್.

ನಂಜನಗೂಡು ಶಾಸಕೆರ್ ದರ್ಶನ್ ಧ್ರುವನಾರಾಯಣ್, ಮಾಜಿ ಶಾಸಕೆ ಕಳಲೆ ಕೇಶವಮೂರ್ತಿ, ಜಿಪಂ ಮಾಜಿ ಸದಸ್ಯೆ ಎನ್. ಮಹದೇವ್ ಸೇರ್ದ್ ಸುಮಾರ್ ಜನ ತೀರ್ ಪೋಯಿನ ಆನಾನ ಅಕೇರಿದ ದರ್ಶನ ಪಡೆತೆರ್. ಆಂಡ ಈ ಬಗ್ಗೆ ಒವ್ವೇ ಕೇಸ್ ದಾಖಲ್ ಆತಿಜಿ ಪಂದ್ ತೆರಿದ್ ಬೈದ್ಂಡ್.

ಭಾರೀ ಬರ್ಸ: ಶಾಲೆ ಕಾಲೇಜ್ ಗ್ ರಜೆ

ರಾಜ್ಯಡ್ ಭಾರೀ ಬರ್ಸ ಬರೊಂದು ಉಂಡು. ಅತ್ತಂದೆ ನನ 4 ದಿನ ಆಜಿ ಜಿಲ್ಲೆಗ್ IMD ಆರೆಂಜ್ ಅಲರ್ಟ್ ಘೋಷಣೆ ಮಲ್ದ್ಂಡ್.

ಚಿಕ್ಕಮಗಳೂರು, ಕೊಡಗು, ಶಿವಮೊಗ್ಗ, ಒಡಿಪು, ದ.ಕ ಬೊಕ್ಕ ಉ.ಕ ಡ್ ಭಾರೀ ಬರ್ಸ ಬರ್ಪುಂಡು. ಆಯಾ ಜಿಲ್ಲೆದ ಶಾಲೆ, ಕಾಲೇಜ್ ಗ್ ರಜೆ ಕೊರ್ಪಿನ ಬಗ್ಗೆ ಅಲೋಜನೆ ನಡತೊಂದು ಉಂಡು.

ಕುಡ್ಲ, ಮುಲ್ಕಿ, ಬಂಟ್ವಾಳ, ಬೆದ್ರ, ಉಳ್ಳಾಲ ತಾಲೂಕ್ ದ ಶಾಲೆ-ಕಾಲೇಜ್ ಗ್ ಇನಿ ರಜೆ ಪೋಷಣೆ ಮಲ್ಪರೆ ಪಂದ್ DC ಆದೇಶ ಕೊರ್ತೆರ್. ಕೈತಲ್ ದ ಕಾಸ್ರೋಡು ಜಿಲ್ಲೆಡ್ ಶಾಲೆಗ್ ಇನಿ ರಜೆ ಕೊರ್ತೆರ್.

ರಾಜ್ಯ ಬಜೆಟ್: ಸಮುದಾಯ ಬಾನುಲಿಗ್ಲಾ ಪಾಲ್ ಇಪ್ಪಡ್

ಸಮುದಾಯದ ಅಭಿವೃದ್ಧಿಗಾದ್ ಬೇಲೆ ಮಲ್ತೊಂದು ಇಪ್ಪುನ ಸ್ವರ ಇಜ್ಜಂದಿನ ಸಮುದಾಯಗ್ ಸ್ವರ ಕೊರ್ಪಿನ ಪರಿಣಾಮಕಾರಿ ಮಾಧ್ಯಮ ಆತ್ಂಡ್ ಸಮುದಾಯ ಬಾನುಲಿ.

ಉಂದು ನಿಜವಾಯಿನ ಅರ್ಥಡ್ ಜನಕ್ಲೆಗಾದ್ ಜನಕುಲೆ ನಡಪಾವೊನ ಜನಕ್ಲೆನ ಬಾನುಲಿ. ಸಮಾಜದ ಮುಖ್ಯವಾಹಿನಿರ್ದ್ ದೂರ ಇಪ್ಪುನ ಸಮುದಾಯಲೆಗ್ ಒಂಜಿ ಸ್ವರ ಉಂಡು, ಅನುಭವ ಉಂಡು. ಅವೆನ್ ಬೇತೆಕ್ಲೆನೊಟ್ಟಿಗೆ ಪಾಲ್ ಪಟ್ಟಿಯೆರೆ ಸಮುದಾಯ ಬಾನುಲಿ ಸಹಕಾರಿ ಆತ್ಂಡ್.

ಕೇಂದ್ರ ಸರ್ಕಾರ ಇಂಚಿಪ್ಪದ ವರ್ಷಡ್ ಆಕಾಶವಾಣಿ ಬೊಕ್ಕ ದೂರದರ್ಶದ ಕೇಂದ್ರನ್ ಪೊಸತಾದ್ ಸುರು ಮಲ್ಪುಲೆಕ್ಕ ಇಜ್ಜಿ. ಈ ರಡ್ಡ್ ಮಾಧ್ಯಮಲು ಮಲ್ಪೊಡಾಯಿನ ಬೇಲೆನ್ ಖಾಸಗಿ ಬಾನುಲಿ ಬೊಕ್ಕ ಟಿವಿ ಚಾನೆಲ್‌ಗ್ ಕೊರ್ಪುನೆತ್ತೊಟ್ಟಿಗೆ ಎಚ್ಚದ ಜಬದಾರಿನ್ ಕೊರ್ತುಂಡು.‌ ಅತ್ತಂದೆ, ಬಾನುಲಿ ಕ್ಷೇತ್ರಡ್ ಸಮುದಾಯ ಬಾನುಲಿಲು ಬೊಕ್ಕ ಮೆಟ್ರೋ ಮಹಾನಗರಲೆಗ್ ಕಮರ್ಷಿಯಲ್ ಎಫ್ ಎಂ ಕೇಂದ್ರನ್ ಸುರು ಮಲ್ತ್ ದ್ ಜನಕ್ಲೆನ ಬೇಡಿಕೆನ್ ಪೂರೈಸಾಯೆರೆ ಕೇಂದ್ರ ಸರ್ಕಾರ ಅನುಮತಿ ಕೊರೊಂದು ಬೈದ್ಂಡ್.

ಇಂಚಿಪ್ಪದ ವರ್ಷಡ್ ಸುಮಾರ್ ಜಿಲ್ಲೆಡ್ ಶಿಕ್ಷಣ ಸಂಸ್ಥೆಲು ಬೊಕ್ಕ ಸರ್ಕಾರೇತರ ಸಂಸ್ಥೆಲು (ಎನ್.ಜಿ.ಒ) ಲು ಜಿಲ್ಲಾ ಬೊಕ್ಕ ತಾಲೂಕ್ ಕೇಂದ್ರಲೆಡ್ ಸಮುದಾಯ ಬಾನುಲಿನ್ ಸುರು ಮಲ್ದ್ಂಡ್. ಇಡೀ ದೇಶಡ್ 439 ರ್ದ್ ಎಚ್ಚ ಸಮುದಾಯ ಬಾನುಲಿ ಇತ್ತ್ಂಡ ಕರ್ನಾಟಕಡ್ ಸುಮಾರ್ 24 ಸಮುದಾಯ ಬಾನುಲಿ ಬೇಲೆ ಮಲ್ತೊಂದು ಉಂಡು.

ಸ್ವತಃ ಸುದ್ದಿ ಸಂಗ್ರಹ ಮಲ್ಪುನ ವಾರ್ತೆಲೆನ ಪ್ರಸಾರವೊಂಜೇನ್ ಬುಡ್ದ್ ಒರಿನ ಮತ ಇಸಯನ್ ಸಮುದಾಯ ಬಾನುಲಿಲು ಪ್ರಸಾರ ಮಲ್ಪೊಂಡು. ಆಂಡ ಕೈತಲ್ ದಕ್ಲೆನ ಮುತಾಲಿಕೆಡ್ ಪೊಲಬು ಬೊಕ್ಕ ಪ್ರಸಾರ ಸಚಿವಾಲಯದ ನಿಯಮಾವಳಿದ ಅನುಸಾರವಾದ್ ಶಿಕ್ಷಣ, ಆರೋಗ್ಯ, ಕೃಷಿ, ಕಲೆ, ಸಾಹಿತ್ಯ, ಕ್ರೀಡೆ, ಸಾಂಸ್ಕೃತಿಕ ಬೊಕ್ಕ ಮನರಂಜನೆದ ಲೇಸ್ ನ್ ಉಂದು ಪ್ರಸಾರ ಮಲ್ತೊಂದು ಉಂಡು. ಇಸೇಸವಾದ್ ಸರ್ಕಾರದ ಬೇತೆ ಬೇತೆ ಇಲಾಖೆದ ಅಭಿವೃದ್ಧಿ ಲೇಸ್ ನ್ ಪ್ರಸಾರ ಮಲ್ಪೆರೆ ಅವಕಾಶ ಕೊರೊಂದು ಬೈದ್ಂಡ್.

ಕರ್ನಾಟಕ ಸರಕಾರದ ಮುತಾಲಿಕೆಡ್ ಗ್ರಾಮೀಣ ಪರ್ಪಿನ ನೀರ್ ಬೊಕ್ಕ ನೈರ್ಮಲ್ಯ ಇಲಾಖೆದ ಯೋಜನೆದ ಬಗೆಟ್ ಲೇಸ್ ನ್ ಏಪಲ ಕೆಲವು ವರ್ಷೊದಿಂಚ ಪ್ರಸಾರ ಮಲ್ತಿನ ಉದಾಹರಣೆಲ ಉಂಡು. ಆಂಡ ದುರದೃಷ್ಟಕರ ಸಂಗತಿ ಪಂಡ ಪ್ರಾದೇಶಿಕ ಮಟ್ಟಡ್ ಮಲ್ಪು‌ನ ಸಮುದಾಯದ ಅಭಿವೃದ್ಧಿಪರವಾದಿಪ್ಪುನ ಸಮುದಾಯ ಬಾನುಲಿದ ಬೇಲೆಗ್ ಸರಕಾರದ ಸಕಾಯ ಏಪಲ ತಿಕ್ ದಿಜಿ.

ಸಮುದಾಯ ಬಾನುಲಿನ್ ಬುಲೆಪಾವೊಡು ಪಂದ್ ಕೇಂದ್ರ ಸರ್ಕಾರದ ಆಶಯ. ಸುಮಾರ್ ಸರ್ತಿ ಕೇಂದ್ರ ಸರ್ಕಾರ ರಾಜ್ಯ ಸರ್ಕಾರಗ್ ಪತ್ರ ಬರೆದ್ ಕೈತಲ್ ದ ಸಮುದಾಯ ಬಾನುಲಿನ್ ಉತ್ತೇಜನ ಮಲ್ಪೆರೆ ಆರ್ಥಿಕ ಬಲ ಕೊರ್ಪಿನ ಇಸೇಸ ಪ್ರಾಜೆಕ್ಟ್ ನ್ ಕೊರೊಡು ಪಂದ್ ತೆರಿಪಾವೊಡು.‌ ಆಂಡ ಕೇಂದ್ರ ಸರ್ಕಾರದ ಈ ಬಿನ್ನಾಪುಗ್ ರಾಜ್ಯ ಸರ್ಕಾರಲು ನನ ಮಾನ್ಯ ಮಲ್ಪಂದಿನ ವಿಷಾದದ ಸಂಗತಿ. ರಾಜ್ಯದ ಗ್ರಾಮೀಣ ಪ್ರದೇಶದ ಸಮುದಾಯ ಅಭಿವೃದ್ಧಿ ಕಾರ್ಯಗ್ ಪೊಲಬುನ್ ಒದಗಿಸಾವೊನ ಉದ್ದೇಶರ್ದ್ ಸುರು ಆಯಿನ ‘ನಮ್ಮ ಬಾನುಲಿ’ ಯೋಜನೆನ್ ಇಂಚಿಪ್ಪದ ವರ್ಷಡ್ ಉಂತಾದೆರ್. ನೆನ್ ಕುಡೊರ ಪರಿಶೀಲನೆ ಮಲ್ಪುನ ಅಗತ್ಯ ಉಂಡು. ವಾರ್ಷಿಕ ಮಾಧ್ಯಮ ಯೋಜನೆಡ್ ಸಮುದಾಯ ಬಾನುಲಿನ್ ಸೇರ್ಸಾವೊನ ಮುಖೇನ ಆಯಿತ್ತ ಸೇವೆನ್ ಸದ್ಬಳಕೆ ಮಲ್ಪೆರೆ ರಾಜ್ಯದ ಪೊಲಬು ಬೊಕ್ಕ ಸಾರ್ವಜನಿಕ ಸಂಪರ್ಕ ಇಲಾಖೆಗ್ ಕೇಂದ್ರ ಪೊಲಬು ಬೊಕ್ಕ ಪ್ರಸಾರ ಇಲಾಖೆರ್ದ್ ಆದೇಶ ಬತ್ತ್ ದ್ ಒಂಜಿ ವರ್ಷ ಕಳೆಂಡಲ ರಾಜ್ಯ ಸರಕಾರ ಒವ್ವೇ ಕ್ರಮಗ್ ದುಂಬಾತಿಜಿ. ಬೇತೆ ಮಾಧ್ಯಮಗ್ ಕೊರ್ಪಿನ ಸರಕಾರಿ ಜಾಹೀರಾತ್ ನ್ ಕೊರೊಂದು ಇಜ್ಜಿ. ಈ ಸರ್ತಿ ಆಂಡಲ ರಾಜ್ಯ ಸರಕಾರ ಸ್ವರ ಇಜ್ಜಂದಿನಕ್ಲೆಗ್ ಸ್ವರ ಕೊರ್ಪಿನ ಸಮುದಾಯ ಬಾನುಲಿಗಾದ್ ಯೋಜನೆನ್ ರೂಪಿಸಾವೊನ ಅಗತ್ಯ ಉಂಡು. ಆವೆರ್ದಾವೆರ ರಾಜ್ಯ ಸರ್ಕಾರ ತನ್ನ ಬಜೆಟ್‌ ಗ್ ಒತ್ತು ಕೊರ್ದು ಸಮುದಾಯ ಬಾನುಲಿದ ಬೇಲೆನ್ ಉತ್ತೇಜನೆ ಮಲ್ಪೊಡು‌. ಸರಕಾರದ ಮತ ಯೋಜನೆನ್ ಕೈತಲ್ ದ ಸಮುದಾಯಗ್ ಎತ್ತವೊಂದಿಪ್ಪುನ ಸಮುದಾಯ ಬಾನುಲಿದ ಸೇವೆನ್ ಪರಿಗಣಿಸಾದ್ ಅಭಿವೃದ್ಧಿದ ಕನನ್ ನನಸ್ ಮಲ್ಪೊಡಾಪುಂಡು.‌

ಡಾ.ರಶ್ಮಿ ಅಮ್ಮೆಂಬಳ
ಸ್ಥಾಪಕಾಧ್ಯಕ್ಷೆರ್,
ಕರ್ನಾಟಕ ಸಮುದಾಯ ಬಾನುಲಿ ಕೇಂದ್ರಲೆನ ಸಂಘ

ಒಂಜಿ ವಾರ ಭಾರೀ ಬರ್ಸ: ಕೆಲವು ಕಡೆ ಆರೆಂಜ್ ಅಲರ್ಟ್

ಕರಾವಳಿ ಜಿಲ್ಲೆಡ್ ನನ ಒಂಜಿ ವಾರ ಭಾರೀ ಬರ್ಸ ಬರ್ಪುಂಡು ಪಂದ್ ಹವಾಮಾನ ಇಲಾಖೆ ಎಚ್ಚೆರ್ಗೆ ಕೊರ್ತುಂಡು.

ಈ ತಿಂಗೊಲ್ಡ್ ರಾಜ್ಯದ ಕೆಲವು ಕಡೆಟ್ಟ್ ವಾಡಿಕೆರ್ದ್ ಎಚ್ಚ ಬರ್ಸ ಬರ್ಪಿನ ಅಂದಾಜಿ ಉಂಡು ಪಂದ್ ಭಾರತೀಯ ಹವಾಮಾನ ಇಲಾಖೆ (ಐಎಂಡಿ) ತೆರಿಪಾದ್ಂಡ್. ಆಂಡ ಬೆಂಗ್ಲೂರ್ ಪೇಂಟೆ, ಬೆಂಗ್ಲೂರ್ ಗ್ರಾಮಾಂತರ, ರಾಮನಗರ, ಚಿಕ್ಕಬಳ್ಳಾಪುರ, ಕೋಲಾರಡ್ ಮಾತ್ರ ವಾಡಿಕೆರ್ದ್ ಕಮ್ಮಿ ಪ್ರಮಾಣಡ್ ಬರ್ಸ ಬರ್ಪುಂಡು ಪಂದ್ ತೆರಿಪಾದ್ಂಡ್.

ಜು.4 ರ್ದ್ ನನದ ಒಂಜಿ ವಾರ ರಾಜ್ಯ ಇಡೀ ಭಾರಿ ಬರ್ಸ ಬರ್ಪುಂಡು. ಒಡಿಪು, ದಕ್ಷಿಣ ಕನ್ನಡ, ಉತ್ತರ ಕನ್ನಡಡ್ ಜು.4 ರ್ದ್ ಜು.6 ಮುಟ್ಟ ಭಾರಿ ಬರ್ಸ ಬರ್ಪಿನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆ ಆರೆಂಜ್ ಅಲರ್ಟ್ ಘೋಷಣೆ ಮಲ್ದ್ಂಡ್.

ಅಂಚೆನೆ ಚಿಕ್ಕಮಗಳೂರು, ಹಾಸನ, ಕೊಡಗು, ಶಿವಮೊಗ್ಗಡ್ ಜು.6 ಕ್ಕ್ ಭಾರೀ ಬರ್ಸ ಬರ್ಪುಂಡು ಪಂದ್ ಹವಾಮಾನ ಇಲಾಖೆ ರೆಡ್ ಅಲರ್ಟ್ ಕೊರ್ತುಂಡು.‌

ನನ ಬೆಳಗಾವಿ, ಧಾರವಾಡ, ಹಾವೇರಿ, ಬಳ್ಳಾರಿ, ಮಂಡ್ಯ, ತುಮಕೂರು ಜಿಲ್ಲೆಗ್ ಯೆಲ್ಲೋ ಅಲರ್ಟ್ ಘೋಷಣೆ ಆತ್ಂಡ್. ಕಾರವಾರ ಬೊಕ್ಕ ಕಾರ್ಲಡ್ ಭಾರೀ ಬರ್ಸ ಬರ್ಪುಂಡು.

ಇನಿ ಕೇಂದ್ರ ಸಂಪುಟ ಸಭೆ

ಇನಿ ಪ್ರಧಾನಿ ನರೇಂದ್ರ ಮೋದಿ ಮುತಾಲಿಕೆಡ್ ಕೇಂದ್ರ ಸಚಿವ ಸಂಪುಟ ಸಭೆ ನಡಪರೆ ಉಂಡು.

ನನ ಕೆಲವೇ ತಿಂಗೊಲ್ಡ್ ಸುಮಾರ್ ರಾಜ್ಯಡ್ ನಡಪರೆ ಇಪ್ಪುನ ವಿಧಾನಸಭೆ ವೋಟು, ನನದ ವರ್ಷ ನಡಪರೆ ಇಪ್ಪುನ ಸಾರ್ವತ್ರಿಕ ವೋಟು ಬೊಕ್ಕ ಬೇತೆ ಇಸಯದ ಬಗ್ಗೆ ಈ ಸಭೆಟ್ಟ್ ಚರ್ಚೆ ನಡಪರೆ ಉಂಡು.

ಎನ್ ಸಿಪಿ ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್ ಮೆರೆನ್ ಸಂಪುಟಗ್ ಸೇರ್ಸಾವೊನ ಅಂದಾಜಿ ಉಂಡು ಪಂದ್ ವರದಿ ಆತ್ಂಡ್.

ಪರಿಷತ್ ಡ್ ಪೊಸ ಸದಸ್ಯೆರ್ನ ಪ್ರಮಾಣ ವಚನ

ಮಾಜಿ ಸಿಎಂ ಜಗದೀಶ್ ಶೆಟ್ಟರ್, ಸಚಿವೆರ್ ಬೋಸರಾಜು ಬೊಕ್ಕ ತಿಪ್ಪಣ್ಣಪ್ಪ ಕಮಕನೂರ್ ಮೊಕುಲು ವಿಧಾನ ಪರಿಷತ್ ಸದಸ್ಯೆರಾದ್ ಇನಿ ಪ್ರಮಾಣ ವಚನ ಸ್ವೀಕಾರ ಮಲ್ತೆರ್.

ವಿಧಾನಸೌಧದ ಕಟ್ವಾನಡ್ ವಿಧಾನ ಪರಿಷತ್ ದ ಸಭಾಪತಿ ಬಸವರಾಜ್ ಹೊರಟ್ಟಿ ಮೇರ್ ಪೊಸ ಸದಸ್ಯೆರಾದ್ ಪ್ರಮಾಣ ವಚನ ಸ್ವೀಕಾರ ಮಲ್ತೆರ್.

ಈ ಪೊರ್ತುಡು ಸಿಎಂ ಸಿದ್ದರಾಮಯ್ಯ ಮೇರ್ ಪೊಸ ವಿಧಾನ ಪರಿಷತ್ ದ ಸದಸ್ಯೆರೆಗ್ ಪೂತ್ತ ಗುಚ್ಚ ಕೊರ್ದು ಅಭಿನಂದನೆ ಮಲ್ತೆರ್. ಈ ಪೊರ್ತುಡು ಸಚಿವೆರ್, ಶಾಸಕೆರ್ ಇತ್ತೆರ್.

ಅನ್ನಭಾಗ್ಯ ಯೋಜನೆ: ಅರಿತ್ತ ಬದಲ್ ಎಕೌಂಟ್ ಗ್ ಕಾಸ್

ಅನ್ನಭಾಗ್ಯ ಯೋಜನೆದ ಲೆಕ್ಕೊಡು ಬಿಪಿಎಲ್ ಕಾರ್ಡ್ ದಕ್ಲೆಗ್ ಎಕೌಂಟ್ ಗ್ ಕಾಸ್ ಪಾಡಿಯೆರೆ ಕಾಂಗ್ರೆಸ್ ಸರ್ಕಾರ ಆದೇಶ ಮಲ್ದ್ಂಡ್ ಪಂದ್ ವರದಿ ಆತ್ಂಡ್.

ಈ ಯೋಜನೆದ ಲೆಕ್ಕೊಡು ಕುಟುಂಬದ ಪ್ರತಿ ಸದಸ್ಯೆರೆಗ್ 10 ಕೆಜಿ ಅರಿ ಕೊರೊಡು ಇತ್ತ್ಂಡ್. ಆಂಡ ಕೇಂದ್ರ ಸರ್ಕಾರ ಅರಿ ಕೊರಂದಿನೆರ್ದಾವೆರ ಸಿದ್ದರಾಮಯ್ಯೆರೆನ ಸರ್ಕಾರ 5ಕೆಜಿ ಅರಿತ್ತೊಟ್ಟಿಗೆ ಒರಿನ 5ಕೆಜಿ ಅರಿತ್ತ ಕಾಸ್ ನ್ (170ರೂ.) ಕೊರಿಯೆರೆ ನಿರ್ಧಾರ ಮಲ್ದ್ಂಡ್. ಈ ಬಗ್ಗೆ ಡಿಬಿಟಿ ಮುಖೇನ ಬಿಪಿಎಲ್ ಕುಟುಂಬದ ಸದಸ್ಯೆರೆನ ಒಟ್ಟು ಮೊತ್ತನ್ ಕುಟುಂಬದ ಯಜಮಾನನ ಎಕೌಂಟ್ ಗ್ ಪಾಡಿಯೆರೆ ನಿರ್ಧಾರ ಮಲ್ದ್ಂಡ್.

LPG ಸಿಲಿಂಡರ್ ಬಿಲೆ ಎಚ್ಚ ಮಲ್ಪರೆ ಕೇಂದ್ರ ಸರ್ಕಾರದ ಆಲೋಚನೆ

ವಾಣಿಜ್ಯ ಬಳಕೆದ ಎಲ್ ಪಿಜಿ ಸಿಲಿಂಡರ್ ಮಿತ್ತ್ ದ ತೆರಿಗೆನ್ ಎಚ್ಚ ಮಲ್ಪುವ ಪಂದ್ ಕೇಂದ್ರ ಸರ್ಕಾರ ಘೋಷಣೆ ಮಲ್ದ್ಂಡ್.

ಮೂಲ ಕಸ್ಟಮ್ಸ್ ಸುಂಕನ್ 5% ರ್ದ್ 15% ಗ್ ಏರಾವುನೆತ್ತೊಟ್ಟಿಗೆ ಕೃಷಿ ಮೂಲಸೌಕರ್ಯ ಬೊಕ್ಕ ಅಭಿವೃದ್ಧಿ ಸೆಸ್ ನ್ 15% ಗ್ ಏರಿಸಾವುನ ಬಗೆಟ್ಟದ ತೆರಿಪಾದ್ಂಡ್. ಆಂಡ ಸಾರ್ವಜನಿಕೆರೆಗ್ ಎಲ್ ಪಿಜಿ ಸಿಲಿಂಡರ್ ಕೊರ್ಪಿನ ಕಂಪೆನಿಲೆಗ್ ಈ ಟ್ಯಾಕ್ಸ್ ರ್ದ್ ಪಿದಯಿ ದೀಪುನ ಅಂದಾಜಿದ ಬಗ್ಗೆ ಪಂತೆರ್. ಒಂಜಿ ವೇಳೆ ಟ್ಯಾಕ್ಸ್ ಎಚ್ಚಾಂಡ ನನದ ದಿನಟ್ಟ್ ಎಲ್ ಪಿಜಿ ಬಿಲೆ ಎಚ್ಚಾಪುಂಡು ಗ್ಯಾರಂಟಿ ಪಂದ್ ಪಂತೆರ್.