ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ರಾಜ್‌ ಘಾಟ್‌ಡ್ 12 ಅಡಿ ಎತ್ತರದ ಮಹಾತ್ಮ ಗಾಂಧಿ ಪ್ರತಿಮೆ ಅನಾವರಣ

ಡೆಲ್ಲಿ: ರಾಷ್ಟ್ರಪತಿ ದ್ರೌಪದಿ ಮುರ್ಮು ಮೇರ್ ಸೋಮಾರ ಡೆಲ್ಲಿದ ರಾಜ್‌ ಘಾಟ್‌ಡ್ ಮಹಾತ್ಮ ಗಾಂಧಿ ಮೆರೆನ 12 ಅಡಿ ಎತ್ತರದ ಪ್ರತಿಮೆನ್ ಅನಾವರಣ ಮಲ್ತೆರ್.

ಈ ಪೊರ್ತುಡು ರಾಷ್ಟ್ರಪತಿ ಮೇರ್ ಪಾತೆರ್ದ್, ಮಹಾತ್ಮಾ ಗಾಂಧಿ ಮೇರ್ ವಿಶ್ವ ಸಮುದಾಯಗ್ ಅಮೂಲ್ಯ ಕೊಡುಗೆ ಕೊರ್ತೆರ್. ಮೆರೆನ ಮೌಲ್ಯಲು ಬೊಕ್ಕ ಆದರ್ಶಲು ಜಗತ್ತ್ ಗ್ ಪೊಸ ದಿಕ್ಕ್ ನ್ ತೊಜಪಾದ್ಂಡ್ ಪಂದ್ ಪಂಡೆರ್.

ರೇಡಿಯೊ ಮಣಿಪಾಲ್ ಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಸಮುದಾಯ ಬಾನುಲಿ ಜೆಸಿಐ ಕಲ್ಯಾಣಪುರದ ಮುತಾಲಿಕೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 23ನೇ ಸಂಚಿಕೆ ಸೆ.5 ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಂಡ್.

ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರ್. ಸೆ.6 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ದ https://play.google.com/store/apps/details?id=com.atc.radiomanipal ಬೊಕ್ಕ ಐಫೋನ್ ದ https://itunes.apple.com/app/id6447231815 ಲಿಂಕ್ ಮುಖೇನ ರೇಡಿಯೊ ಮಣಿಪಾಲ್ ಆಪ್ ಡೌನ್‌ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆಡ್ ತೆರಿಪಾದ್ಂಡ್.

ರೇಡಿಯೊ ಮಣಿಪಾಲಡ್ ಗುರುನಮನ ಲೇಸ್

ಮಣಿಪಾಲ: ರೇಡಿಯೋ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರಡ್ ಶಿಕ್ಷಕರ ದಿನಾಚರಣೆದ ಇಸೇಸ ಕಾರ್ಯಕ್ರಮ ಗುರುನಮನ ಸೆ.5 ಅಂಗಾರೆ ಬಯ್ಯಗ್ 5 ಗಂಟೆಗ್ ಪ್ರಸಾರ ಆಂಡ್.

ಈ ಲೇಸ್ ಡ್ ಪ್ರಾಂಶುಪಾಲೆರಾದ್ ನಿವೃತ್ತೆರಾಯಿನ ಪ್ರೊ.ಲಕ್ಷ್ಮೀ ಬಾಯಿ ಬೊಕ್ಕ ಶಾಲೆದ ಶಿಕ್ಷಕೆರ್ ಜಯಲಕ್ಷ್ಮೀ ಸತೀಶ್ ಪಾಲ್ ಪಡೆಯೆರ್. ಸೆ.6 ಬುಧಾರ ಮಧ್ಯಾಹ್ನ 1 ಗಂಟೆಗ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ಲಿಂಕ್ ಓಪನ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆಡ್ ತೆರಿಪಾದ್ಂಡ್.

ಸೆ.17: ಪೊಸಳ್ಳಿ ಕುಲಾಲ ಸಮುದಾಯ ಭವನಡ್ ಕುಲಾಲ ಜೋಕುಲೆನ ಕೃಷ್ಣ ಕೃಷ್ಣ ಶ್ರೀಕೃಷ್ಣಾ-ಕೃಷ್ಣ ಏಸ ಪಂತೊ

ಬಂಟ್ವಾಳ: ಬಂಟ್ವಾಳ ತಾಲೂಕ್ ಕುಲಾಲ ಸುಧಾರಕ ಸಂಘ (ರಿ.) ದ ನಿರೆಲ್ಡ್ ಕುಲಾಲ ಸೇವಾದಳದ ಮುತಾಲಿಕೆಡ್ ಸೆ.17 ಐತಾರ ಬಿ.ಸಿ.ರೋಡ್ ದ ಪೊಸಳ್ಳಿ ಕುಲಾಲ ಸಮುದಾಯ ಭವನಡ್ ಕೃಷ್ಣ ಕೃಷ್ಣ ಶ್ರೀಕೃಷ್ಣ ಪನ್ಪುನ ಕುಲಾಲ ಜೋಕುಲೆನ ಕೃಷ್ಣ ಏಸ ಪಂತೊ, ನನ್ನ ಕನಸಿನ ಕೃಷ್ಣ ಪನ್ಪುನ ಚಿತ್ರ ಬುಡ್ಪಾನ ಪಂತೊ ಬೊಕ್ಕ ಕುಸಾಲ್ ಪಾತೆರದ ಬಿರ್ಸೆರ್ ಪಂತೊ ನಡಪರೆ ಉಂಡು.

6 ತಿಂಗೊರ್ದ್ 5 ವರ್ಷದ ಜೋಕುಲೆಗ್ ಮುದ್ದು ಕೃಷ್ಣ ಏಸ, 5 ರ್ದ್ 10 ವರ್ಷದೊಲಯಿದ ಜೋಕುಲೆಗ್ ಬಾಲಕೃಷ್ಣ, ಬೊಕ್ಕ ರಾಧಾಕೃಷ್ಣ, ಯಶೋಧಾ ಕೃಷ್ಣ ಪಂತೊಗು ಒವ್ವೇ ಪ್ರಾಯದ ಮಿತಿ ಇಪ್ಪುಜಿ. ಚಿತ್ರಕಲೆಟ್ಟ್ ಕಿರಿಯ ಬೊಕ್ಕ ಹಿರಿಯ ವಿಭಾಗಲು ಉಂಡು. ಕುಸಾಲ್ ಪಾತೆರದ ಬಿರ್ಸೆರ್ ಪಂತೊಡು ಒವ್ವೇ ವಯೋಮಿತಿ ಇಪ್ಪುಜಿ. ಆಂಡ ಹಾಸ್ಯಡ್ ರಾಜಕೀಯ, ಜಾತಿನಿಂದನೆ ಬೊಕ್ಕ ಬೊರ್ಚಂದಿನ ಶಬ್ದನ್ ಗಲಸಿಯೆರೆ ಬಲ್ಲಿ. ಚಾವಡಿಡ್ ಪ್ರದರ್ಶನ ಮಲ್ಪುನ ಹಾಸ್ಯನ್ ವೀಡಿಯೋ ಮಲ್ತ್ ದ್ 98808 36173 ನಂಬರ್ ಗ್ ಕಡಪಾವೊಡು.‌ ಮಾತ ಪಂತೊಡು ಪಾಲ್ ಪಡೆಪುನಕುಲು ಸೆ.10 ತ್ತೊಲಯಿ ಅಕ್ಲೆನ ಪುದರ್ ನ್ ನೊಂದಣಿ ಮಲ್ಪೊಡು.

ಅಂಚೆನೆ ಮಧ್ಯಾಹ್ನ ಸಭಾ ಲೇಸ್ ನಡಪರೆ ಉಂಡು. ತಾಲೂಕ್ ಸಂಘದ ಅಧ್ಯಕ್ಷೆರ್ ರಾಧಾಕೃಷ್ಣ ಬಂಟ್ವಾಳ ಗುರ್ಕಾರ್ಮೆನ್ ಒಯಿಸೊನ್ವೆರ್. ಮಲ್ಲ ಬಿನ್ನೆರಾದ್ ಸಿನಿಮಾ ಆರ್ಟ್ ಡೈರೆಕ್ಟರ್ ರಾಜೇಶ್ ಕೊಳಕೆ, ಉಪನ್ಯಾಸಕೆರ್ ಬೊಕ್ಕ ಖ್ಯಾತ ಸಂಗೀತಗಾರೆ ಶುಭಮ್, ರಂಗಭೂಮಿ ಕಲಾವಿದೆ ಮೇಧಾವಿ ಮಡಂತ್ಯಾರ್ ಪಾಲ್ ಪಡೆಯೆರೆ ಉಲ್ಲೆರ್.

ಸಭಾ ಲೇಸ್ ಡ್ ನಿರಂತರ ಕಾರ್ಯಾಗಾರದ ಮೂಜಿನೇ ಹಂತದ ಚೈತನ್ಯ 3.0 ಚಾಲನೆ ನಡಪರೆ ಉಂಡು. ಡ್ಯಾನ್ಸ್, ಯಕ್ಷನಾಟ್ಯ, ಚಿತ್ರಕಲೆ, ನಾಯಕತ್ವದೊಟ್ಟಿಗೆ ರಂಗ ನಟನೆಗ್ ಚಾಪರ್ಕ ಕೂಟದ ಕಲಾವಿದೆ ಸುರೇಶ್ ಕುಲಾಲ್, ಶಿಕ್ಷಣ ಮಾರ್ಗದರ್ಶಕೆರ್ ಲೋಕೇಶ್ ಕುಲಾಲ್ ನಾರ್ಶ, ಆರೋಗ್ಯ ಚೈತನ್ನ ಡಾ. ಅಶ್ವನಿ ಬಾಲಕೃಷ್ಣ ಅಗ್ರಬೈಲು ಬೊಕ್ಕ ಯೋಗ ತರಬೇತಿಗಾದ್ ಕಿಶೋರ್ ಕುಲಾಲ್ ಕೈಕುಂಜೆ ಈ ಪೊರ್ತುಡು ಪಾಲ್ ಪಡೆಯೆರೆ ಉಲ್ಲೆರ್.

ಈ ಸಭಾ ಲೇಸ್ ದ ಬೊಕ್ಕ ಕುಲಾಲ ಸೇವಾದಳತ್ತ ಸದಸ್ಯೆರ್ದ್ ಸಾಂಸ್ಕೃತಿಕ ವೈಭವ, ವಿನೂತನ ಶೈಲಿಡ್ ಕಥಾರೂಪಕ ಪುಣ್ಯಕೋಟಿ ಬೊಕ್ಕ ಚಂದ್ರಯಾನ 3 ಲೇಸ್ ನಡಪರೆ ಉಂಡು ಪಂದ್ ಕುಲಾಲ ಸೇವಾದಳತ್ತ ದಳಪತಿ ರಾಜೇಶ್ ಕುಮಾರ್ ಎಚ್. ಬೊಕ್ಕ ಕಾರ್ಯದರ್ಶಿ ಜಯಂತ ಅಗ್ರಬೈಲು ಪತ್ರಿಕಾ ಹೇಳಿಕೆಡ್ ತೆರಿಪಾದೆರ್.