ಟೈಮ್ಸ್ ಆಫ್ ಕುಡ್ಲ ನ್ಯೂಸ್ Times of Kudla News

ಕುಕ್ಕೆ: ಚೌತಿದ ಅಂಗವಾದ್ ಸಾಂಸ್ಕೃತಿಕ ಸಂಜೆಡ್ ಜಾನಪದ ವೈಭವ

ಸುಬ್ರಹ್ಮಣ್ಯ: ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಮುತಾಲಿಕೆಡ್ ನಡತಿನ 53ನೇ ವರ್ಷೊದ ಸಾರ್ವಜನಿಕ ಗಣೇಶೋತ್ಸವದ ಲೆಕ್ಕೊಡು ಶ್ರೀ ದೇವಲ್ಯದ ರಥಬೀದಿದ ಕುಕ್ಕೆಶ್ರೀ ಕಲಾವೇದಿಕೆಡ್ ಎಸ್‌ಎಸ್‌ಪಿಯು ಕಾಲೇಜ್ ದ ಸಾಂಸ್ಕೃತಿಕ ಸಂಘದ ಕಲ್ಪಾರ್ಥಿಲೆರ್ದ್ ಪ್ರದರ್ಶನ ಆಯಿನ ಜನಪದೀಯ ನೃತ್ಯ ಸಿಂಚನ ಕಲಾಸಕ್ತೆರೆನ್ ರಂಜಿಸಾಂಡ್.

ಒವ್ವೇ ಸರಿಯಾಯಿನ ತರಬೇತುದಾರೆರ್ ಇಜ್ಜಂದಿನ ಕಲ್ಪಾರ್ಥಿಲೇ ಆಸಕ್ತಿರ್ದ್ ಪ್ರದರ್ಶನ ಮಲ್ತಿನ ಪ್ರತಿಭೆ ಸಭಾಂಗಣಡ್ ದಿಂಜಿನ ಜನಕ್ಲೆನ ಎದುರುಡು ಪೊರ್ಲಾಂಡ್. ಸುಮಾರ್ 2 ಗಂಟೆದ 125ಕ್ ಎಚ್ಚ ಕಲ್ಪಾರ್ಥಿಲು ನೃತ್ಯ ವೈವಿದ್ಯ ಮಲ್ತೆರ್. ವಿದ್ಯಾಲಕ್ಷ್ಮೀ ಬೊಕ್ಕ ಕೂಟದಕುಲು ವರಹ ರೂಪಂ ಪದ್ಯದ ಭರತನಾಟ್ಯ ಬೊಕ್ಕ ನಾಟ್ಯ ಶೈಲಿದ ಸಮ್ಮಿಲನದ ನೃತ್ಯ ಪ್ರದರ್ಶನ ಮಲ್ತೆರ್.

ಆಶೀತಾ, ಚಂದನ್, ಶಿಲ್ಪಾ, ಗಾಯತ್ರಿ, ನವ್ಯಶ್ರೀ, ವಿನ್ಯಾ, ಧನ್ಯಶ್ರೀ ಬೊಕ್ಕ ಕೂಟದಕುಲು ದೇವತಾ ಗೀತೆಗ್ ನರ್ತನ ಮಲ್ತೆರ್. ವೈಶಾಲಿ ಬೊಕ್ಕ ಕೂಟದಕುಲು ಶ್ರೀ ಕುಕ್ಕೆ ಸುಬ್ರಹ್ಮಣ್ಯ ಮಹಾತ್ಮೆ ಪನ್ಪುನ ನೃತ್ಯ ನಾಟಕ ಪ್ರದರ್ಶನ ಮಲ್ತೆರ್. ಚಿನ್ಮಿಯಿ ಡಿ.ಎಸ್ ಭಕ್ತಿಗೀತೆ ಪಂಡ್ಂಡ ನುರಿತ ಚೆಂಡೆ ವಾದಕೆರ್ ಇಪ್ಪುನ ಮಿಥುನ್ ಬೊಕ್ಕ ಸಂಗಡಿಗೆರೆನ ಕೂಟ ಸಿಂಗಾರಿ ಮೇಳ ನುಡಿಸಾಯೆರ್. ಲೇಸ್ ದ ಅಕೇರಿಡ್ ಅಕ್ಷಯ್ ಕಂದಡ್ಕ ಬೊಕ್ಕ ಕೂಟದಕುಲು ಪಿಲಿಏಸ ಪ್ರದರ್ಶನ ಮಲ್ತೆರ್.

ಲೇಸ್ ನ್ ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ ನಾಯಕ್ ಬೊಕ್ಕ ಸಾಂಸ್ಕೃತಿಕ ಕೂಟದ ಸಂಚಾಲಕಿ ರೇಖಾರಾಣಿ ಸೋಮಶೇಖರ್ ಸಂಯೋಜನೆ ಮಲ್ತೆರ್. ಸಾಂಸ್ಕೃತಿಕ ಕೂಟದ ಸಹಸಂಚಾಲಕೆರ್ ರತ್ನಾಕರ ಸುಬ್ರಹ್ಮಣ್ಯ, ಉಪನ್ಯಾಸಕೆರ್ ಶ್ರೀಧರ್ ಪುತ್ರನ್, ಸವಿತಾ ಕೈಲಾಸ್ ಬೊಕ್ಕ ಶ್ಯಾಮಿಲಿ, ಹಿರಿಯ ವಿದ್ಯಾರ್ಥಿ ರಾಧಾಕೃಷ್ಣ ದೇವರಗದ್ದೆ ಬೊಕ್ಕ ಚಂದ್ರಶೇಖರ್ ಮಲ್ಲಿಗೆಮಜಲು ಸಹಕಾರ ಕೊರಿಯೆರ್.

ಚೌತಿಡ್ ಕುಕ್ಕೆಶ್ರೀ ಭಜನಾ ಮಂಡಳಿ, ಶ್ರೀವಲ್ಲೀ ಭಜನಾ ಮಂಡಳಿ ಬೊಕ್ಕ ವಿದ್ಯಾಸಾಗರ ಭಜನಾ ಸಂಗಮದ ಕಲಾವಿದೆರ್ದ್ ಭಜನೆ ನಡತ್ಂಡ್. ಸುನಾದ ಸಂಗೀತ ಕಲಾಶಾಲೆ ಸುಬ್ರಹ್ಮಣ್ಯದ ಕಲ್ಪಾರ್ಥಿಲೆರ್ದ್ ಭಕ್ತಿಗಾನ, ಉಜಿರೆದ ವೈಷ್ಣವಿ ಸ್ಕೂಲ್ ಆಫ್ ಡ್ಯಾನ್ಸ್ ಕೂಟರ್ದ್ ನೃತ್ಯ ಸಂಗಮ, ಕುಮಾರಸ್ವಾಮಿ ವಿದ್ಯಾಲಯದ ಕಲ್ಪಾರ್ಥಿಲೆರ್ದ್ ಕುಮಾರ ವೈಭವ, ಹೊಸಬೆಟ್ಟು ನೃತ್ಯರಂಗ ಡ್ಯಾನ್ಸ್ ಅಕಾಡೆಮಿದ ಪೂಜಾ ಪ್ರಭಾತ್ ಕೂಟದಕ್ಲೆರ್ದ್ ನೃತ್ಯ ವೈಭವ, ಕಾಮಿಡಿ ಕಿಲಾಡಿ ಖ್ಯಾತಿದ ದೀಕ್ಷಿತ್ ರಾಮಕುಂಜ ಮೆರೆರ್ದ್ ಹಾಸ್ಯಮಯ ಮಿಮಿಕ್ರಿ, ಅಮ್ಮ ಕಲಾವಿದೆರ್ ಕುಡ್ಲ ಮೊಕ್ಲೆರ್ದ್ ಅಲೆಬುಡಿಯೆರ್‌ಗೆ ಹಾಸ್ಯಮಯ ತುಳು ನಾಟಕ ಪ್ರದರ್ಶನ ಆಂಡ್. ಲೇಸ್ ದ ಅಕೇರಿಡ್ ಸರ್ವ ಕಲಾವಿದೆರೆಗ್ ಗುರ್ಕಾರೆ ದಿನೇಶ್ ಸಂಪ್ಯಾಡಿ ಬೊಕ್ಕ ಪದಾಧಿಕಾರಿಲು ದೇವೆರೆನ ಪ್ರಸಾದ ಕೊರ್ದು ಮಾನಾದಿಗೆ ಮಲ್ತೆರ್.

ವರದಿ: ಗೋಪಿಚಂದನ್ ಕೆಎಸ್

ಅ.2: “ಪುರ್ಸ ಕಟ್ಟುನ: ಇನಿ- ಕೋಡೆ-ಎಲ್ಲೆ”ದ ಸಾಕ್ಷ್ಯಚಿತ್ರ ಬುಡುಗಡೆ

ತುಳುಭಾಷೆದ ಸುರುತ್ತ ಸಂಶೋಧನಾತ್ಮಕ ಸಾಕ್ಷ್ಯಚಿತ್ರ “ಪುರ್ಸ ಕಟ್ಟುನ: ಇನಿ- ಕೋಡೆ-ಎಲ್ಲೆ” ದ ಬುಡುಗಡೆ ಲೇಸ್ ಅ.2 ಕ್ಕ್ ಬೊಲ್ತೇರ್ ದ ವಾಣಿ ಪದವಿ ಪೂರ್ವ ಕಾಲೇಜ್ ಡ್ ನಡಪರೆ ಉಂಡು.

ವಿಕಿಮೀಡಿಯ ಫೌಂಡೇಶನ್, CIS-A2K, ಕರಾವಳಿ ವಿಕಿಮೀಡಿಯನ್ಸ್ ಯೂಸರ್ ಗ್ರೂಪ್ ಮೊಕ್ಲೆನ ಸಹಕಾರರ್ದ್ ಭರತೇಶ ಅಲಸಂಡೆಮಜಲು ಬೊಕ್ಕ ಡಾ.ವಿಶ್ವನಾಥ ಬದಿಕಾನ ಮೇರ್ ನಿರ್ಮಾಪಕೆರಾದ್ ತಯಾರ್ ಮಲ್ತಿನ ಡಾ. ಸುಂದರ‌ ಕೇನಾಜೆ ನಿರ್ದೇಶನ ಮಲ್ತಿನ ಈ ಸಾಕ್ಷ್ಯಚಿತ್ರ ಬೊಲ್ತೇರ್ ಭಾಗಡ್ ಪ್ರಚಲಿತ ಇಪ್ಪುನ ಪುರ್ಸ ಕಟ್ಟುನ ಕುಣಿತ ಬೊಕ್ಕ ಸುಳ್ಯ ಪರಿಸರಡ್ ಇಪ್ಪುನ ಸಿದ್ಧವೇಷ ಕುಣಿತಗ್ ಸಂಬಂಧ ಪಟ್ಟ್ ದ್ಂಡ್.

ತುಳು ಸಂಶೋಧನಾತ್ಮಕ ನೆಲೆಟ್ಟ್ ತಯಾರಾದಿಪ್ಪುನ ಈ ಸಾಕ್ಷ್ಯಚಿತ್ರ ಪುರ್ಸ ಕುಣಿತದ ಹಿನ್ನಲೆ, ಕುಣಿತದ ಸ್ವರೂಪ ಬೊಕ್ಕ ವಿದ್ವಾಂಸೆರೆನ ವಿಶ್ಲೇಷಣೆ ಬೊಕ್ಕ ಇತ್ತೆದ ಸ್ಥಿತಿಗತಿನ್ ಅವಲಂಬಿಸಾದ್ಂಡ್. ತುಳುತ್ತ ಸುರುತ್ತ ಸಂಶೋಧನಾತ್ಮಕ ಸಾಕ್ಷ್ಯಚಿತ್ರವಾದ್ ಬುಡುಗಡೆ ಆಯೆರೆ ಉಂಡು. ಬೊಲ್ತೇರ್ ದ ಪರಿಸರ, ಪುರ್ಸ ಕಟ್ಟುನ, ಕಂದ್ರಪ್ಪಾಡಿ ಪುರುಷ ದೈವ, ಗೌಡ ಸಮುದಾಯ ಬೊಕ್ಕ ಮಲೆಕುಡಿಯ ಸಮುದಾಯದ ಸಿದ್ಧವೇಷ ಬೊಕ್ಕ ಮರಾಠಿ ಜನಾಂಗ ಬಾಲೆಸಾಂತು ಕುಣಿತನ್ ತೌಲನಿಕವಾದ್ ಈ ಸಾಕ್ಷ್ಯಚಿತ್ರಡ್ ಗಲಸ್ ದೆರ್.

ಮೈಸೂರ್ ದ ಕನ್ನಡಿ ಕ್ರಿಯೇಷನ್ ಕೂಟ ಬೊಲ್ತೇರ್ ಪರಿಸರಡ್ ಒಂಜಿ ವಾರದ ಕಾಲ ಚಿತ್ರೀಕರಣ ನಡಪಾದ್ ಈ ಸಾಕ್ಷ್ಯಚಿತ್ರನ್ ತಯಾರ್ ಮಲ್ದ್ಂಡ್. ತುಳುನಾಡ್ ದ ಹಿರಿಯ ವಿದ್ವಾಂಸೆರ್, ಕುಣಿತದ ಕಲಾವಿದೆರ್ ಬೊಕ್ಕ ವಿಭಿನ್ನ ಕುಣಿತದಕುಲು ಇಪ್ಪುನ ಈ ಸಾಕ್ಷ್ಯಚಿತ್ರ ಪುರ್ಸ ಕಟ್ಟುನೆತ್ತ ಬಗೆಟ್ಟ್ ಸುಮಾರ್ ಪೊಸ ವಿಚಾರನ್ ತೆರಿಪಾದ್ಂಡ್. ಗುರು ಪ್ರಸಾದ್ ಸ್ವಾಮಿ ಹಿರೇಮಠ ಬೆಂಗ್ಲೂರ್ ಬೊಕ್ಕ ಕೂಟದ ಛಾಯಾಗ್ರಹಣ, ರಂಜಿತ್ ಸೇತು ಮೈಸೂರು ಮೆರೆನ ಸಂಕಲನ, ದೀಪು ನಾಯರ್ ಮೈಸೂರು ಮೆರೆನ ಸಂಗೀತ ಬೊಕ್ಕ ಡಾ.ಗಿರೀಶ ಮೆರೆನ ಇಂಗ್ಲೀಷ್ ಉಪಶೀರ್ಷಿಕೆ, ದಿನೇಶ್ ಕುಕ್ಕುಜಡ್ಕ ಮೆರೆನ ರೇಖಾಚಿತ್ರಡ್ ಈ ಸಾಕ್ಷ್ಯಚಿತ್ರ ಉಂಡು.

ವಾಣಿ ಪದವಿ ಪೂರ್ವ ಕಾಲೇಜ್, ಬೊಲ್ತೇರ್ ಬೊಕ್ಕ ಸಿಐಎಸ್ ಎ2ಕೆ ಬೆಂಗ್ಲೂರ್ ಈ ಸಂಸ್ಥೆಲೆನ ಒಟ್ಟುಸೇರಿಗೆಡ್ ನಡಪುನ ಈ ಬುಡುಗಡೆ ಲೇಸ್ ದ ಗುರ್ಕಾರ್ಮೆನ್ ವಾಣಿ ಶಿಕ್ಷಣ ಸಂಸ್ಥೆದ ಗುರ್ಕಾರೆ ಪಿ. ಕುಶಾಲಪ್ಪ ಗೌಡ ಮೇರ್ ಗುರ್ಕಾರ್ಮೆನ್ ಒಯಿಸೊನ್ವೆರ್. ಸಾಕ್ಷ್ಯಚಿತ್ರ ಬುಡುಗಡೆನ್ ಕರ್ನಾಟಕ ಜಾನಪದ ವಿಶ್ವವಿದ್ಯಾನಿಲಯ ವಿಶ್ರಾಂತ ಉಪಕುಲಪತಿ ಡಾ.ಕೆ. ಚಿನ್ನಪ್ಪ ಗೌಡ ಮಲ್ಪುವೆರ್. ಮಲ್ಲ ಬಿನ್ನೆರಾದ್ ಬೊಂಬೈ ವಿಶ್ವವಿದ್ಯಾನಿಲಯ ವಿಶ್ರಾಂತ ಪ್ರಾಧ್ಯಾಪಕೆರ್ ಪ್ರೊ. ತಾಳ್ತಜೆ ವಸಂತ ಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್. ಬೊಕ್ಕ ವಾಣಿ ಪದವಿ ಪೂರ್ವ ಕಾಲೇಜ್ ಪ್ರಾಂಶುಪಾಲೆರ್ ಯದುಪತಿ ಗೌಡ, ಎಸ್.ಡಿ.ಎಂ. ಕಾಲೇಜ್ ಉಜಿರೆದ ಕನ್ನಡ ವಿಭಾಗದ ಸಹ ಪ್ರಾಧ್ಯಾಪಕೆರ್ ಡಾ.ದಿವಾಕರ ಕೊಕ್ಕಡ ಬರಿಯೆರೆ ಉಲ್ಲೆರ್. ಬುಡುಗಡೆ ಆಯಿನ ಬೊಕ್ಕ ಈ ಸಾಕ್ಷ್ಯಚಿತ್ರ ವಿಕಿಕಾಮನ್ಸ್ ಬೊಕ್ಕ ಯೂಟ್ಯೂಬ್ ಡ್ ತಿಕ್ಕುಂಡು.