ರಾಜ್ಯದ ಸುದ್ದಿ | State News

ಪಿಯುಸಿ ಮೌಲ್ಯಮಾಪನ ಎಲ್ಲೆರ್ದ್ ಸುರು

ಬೆಂಗ್ಲೂರ್: 2022-23 ನೇ ಸಾಲ್‌ದ ಸೆಕೆಂಡ್ ಪಿಯುಸಿ ಪರೀಕ್ಷೆ ಮುಗಿದಿತ್ತ್‌ದ್ , ಉಂದೆತ್ತ ಮೌಲ್ಯಮಾಪನ ಎಪ್ರಿಲ್ 5 ನೆರ್ದ್ ಸುರು ಆಯರೆ ಉಂಡು.

ಮೇ ಸುರುತ್ತ ವಾರಡ್ ದ್ವಿತೀಯ ಪಿಯುಸಿದ ರಿಸಲ್ಟ್‌ನ್ ಕರ್ನಾಟಕ ಶಾಲಾ ಪರೀಕ್ಷೆ ಬೊಕ್ಕ ಮೌಲ್ಯನಿರ್ಣಯ ಮಂಡಳಿ ಕೊರಿಯರೆ ಇತ್ತ್‌ದ್, ಕರ್ನಾಟಕ ವಿಧಾನಸಭೆ ವೋಟುದ ನಿಲೆಟ್ ರಿಸಲ್ಟ್ ಒಂತೆ ತಡ ಆಪಿನ ಸಾಧ್ಯತೆ ಉಂಡು.

ಸೋಷಿಯಲ್ ಮೀಡಿಯಾ ಸ್ಟಾರ್ ಪೊಲೀಸೆರ್‍ನ ವಶಕ್ಕ್

ಬೆಂಗ್ಲೂರ್: ಬಂಗಾರ್ ಕಂಡೊಂದಿತ್ತಿನ ಸೋಷಿಯಲ್ ಮೀಡಿಯಾ ಸ್ಟಾರ್‌ನ್ ಬೆಂಗ್ಲೂರ್‌ದ ಅಮೃತಹಳ್ಳಿ ಪೊಲೀಸೆರ್ ಅರೆಸ್ಟ್ ಮಲ್ತ್‌ದೆರ್.

ಬೊಂಬಾಯಿದ ಸೋಷಿಯಲ್ ಮೀಡಿಯಾ ಸ್ಟಾರ್ ಆಯಿನ ಸಲೀಂ(ಸಾಹಿಲ್) ಅರೆಸ್ಟ್ ಆಯಿನ ಆರೋಪಿ ಪಂದ್ ತೆರಿದ್ ಬೈದ್ಂಡ್. ಮೇರ್ ಒಂಜಿ ವರ್ಷದ ಪಿರವು 3.5 ಕೆಜಿರ್ದ್‌ಲ ಎಚ್ಚದ ಬಂಗಾರ್‌ದೊಟ್ಟುಗು ತಿಕ್ಕ್‌ದ್ ಬೂರ್ದಿತ್ತ್‌ದ್, ಬಸವನಗುಡಿ ಪೊಲೀಸೆರ್ ಅರೆಸ್ಟ್ ಮಲ್ತ್‌ದಿತ್ತೆರ್. ಇತ್ತೆ ಜೈಲ್‌ರ್ದ್ ಬತ್ತಿ ಬೊಕ್ಕ ಕುಡ ಬಂಗಾರ್‌ ಕಂಡ್‌ದಿತ್ತ್‌ದ್ ಬೆಂಗ್ಲೂರ್‌ದ ಅಮೃತಹಳ್ಳಿ ಪೊಲೀಸೆರ್ ಅರೆಸ್ಟ್ ಮಲ್ತ್‌ದೆರ್.

ಎಸ್ಸೆಸ್ಸೆಲ್ಸಿದ ಜೋಕ್ಲೆಗ್ ಈ ಸರ್ತಿಲ 26 ಗ್ರೇಸ್ ಮಾರ್ಕ್ಸ್!

ಬೆಂಗ್ಲೂರ್: ಈ ಸರ್ತಿ ಎಸ್ಸೆಸ್ಸೆಲ್ಸಿ ವಾರ್ಷಿಕ ಪರೀಕ್ಷೆ ಬರೆಪಿನ ಕಲ್ಪಾರ್ಥಿಲೆಗ್ 26 ಗ್ರೇಸ್ ಮಾರ್ಕ್ಸ್ ಪಡೆಯುನ ಅವಕಾಶ ಉಂಡು.

ಈ ಶೈಕ್ಷಣಿಕ ವರ್ಷಡ್ ಕೊರೊನಾದ ಪೆಟ್ಟ್ ಆತ್ ಇಜ್ಜಿಂಡಲ ಕೊರೊನಾ ಪ್ರಭಾವದ ಶೈಕ್ಷಣಿಕ ವರ್ಷ ಪಂದ್ ಪರಿಗಣಿಸಾದ್ ಗ್ರೇಸ್ ಮಾರ್ಕ್ಸ್ ಕೊರಿಯರೆ ಕರ್ನಾಟಕ ಶಾಲಾ ಪರೀಕ್ಷಾ ಬೊಕ್ಕ ಮೌಲ್ಯನಿರ್ಣಯ ಮಂಡಳಿ ನಿರ್ಧಾರ ಮಲ್ತ್‌ದ್ಂಡ್.

ಮೂಜಿ ವಿಷಯಲೆಗ್ ಮಾತ್ರ ಗ್ರೇಸ್ ಮಾರ್ಕ್ ಕೊರಿಯರೆ ಬೋರ್ಡ್ ದುಂಬು ಬೈದ್ಂಡ್. ಭಾಷಾ ಬೊಕ್ಕ ಕೋರ್ ವಿಷಯಲೆಗ್ ಮಾತ್ರ ಗ್ರೇಸ್ ಮಾರ್ಕ್ ತಿಕ್ಕುಂಡು. ಕಮ್ಮಿ ಮಾರ್ಕ್ ಪಡೆಯುನ ಕಲ್ಪಾರ್ಥಿಲೆಗ್ ಮಾತ್ರ ಉಂದು ಅನ್ವಯ ಆಪುಂಡು ಪಂದ್ ನಿರ್ದೇಶಕೆರ್ ತೆರಿಪಾದೆರ್.