ತುಳು ಸುದ್ದಿ

ಜಿಲ್ಲಾ ಮಟ್ಟದ ವಾಲಿಬಾಲ್: ಆಣುಲೆನ ವಿಭಾಗಡ್ ಬೆದ್ರ, ಪೊಣ್ಣುಲೆನ ವಿಭಾಗಡ್ ಕುಡ್ಲಗ್ ರಡ್ಡನೇ ತಾನ

ಸುಬ್ರಹ್ಮಣ್ಯ: ಶಾಲಾ ಶಿಕ್ಷಣ ಇಲಾಖೆ ದ.ಕ ಬೊಕ್ಕ ಶ್ರೀ ಸುಬ್ರಹ್ಮಣ್ಯೇಶ್ವರ ಪದವಿಪೂರ್ವ ಕಾಲೇಜ್ ದ ಒಟ್ಟುಸೇರಿಗೆಡ್ ಸುಬ್ರಹ್ಮಣ್ಯದ ಎಸ್‌ಎಸ್‌ಪಿಯು ಕಾಲೇಜ್ ದ ಕ್ರೀಡಾಂಗಣಡ್ ಸೋಮಾರ ನಡತಿನ ಜಿಲ್ಲಾ ಮಟ್ಟದ ಪದವಿಪೂರ್ವ ಕಾಲೇಜ್ ವಿಭಾಗದ ಆಣ್-ಪೊಣ್ಣುಲೆನ ವಾಲಿಬಾಲ್ ಪಂತೊದ ರಡ್ಡ್ ವಿಭಾಗಡ್ ಬೊಲ್ತೇರ್ ತಾಲೂಕ್ ಸುರುತ್ತ ತಾನ ಪಡೆದ್ ಚಾಂಪಿಯನ್ ಪಟ್ಟನ್ ಪಡೆತ್ಂಡ್.

ಈ ಪಂತೊಡು ಬೊಲ್ತೇರ್ ಕೂಟ ಆನ್ ಲೆನ ವಿಭಾಗಡ್ ಬೆದ್ರ ಕೂಟನ್ ಬೊಕ್ಕ ಪೊಣ್ಣುಲೆನ ವಿಭಾಗಡ್ ಕುಡ್ಲ ಕೂಟನ್ ಸೋಪಾದ್ ಪ್ರಶಸ್ತಿ ಪಡೆತ್ಂಡ್.

ಆಣ್ ಲೆನ ವಿಭಾಗದ ಅಕೇರಿದ ಗೊಬ್ಬುಡು ಬೊಲ್ತೇರ್ ತಾಲೂಕ್ ಕೂಟ (ಎಸ್‌ಡಿಎಂಸಿ ಉಜಿರೆ) ಬೆದ್ರ ತಾಲೂಕ್ ಕೂಟ (ಆಳ್ವಾಸ್ ಬೆದ್ರ) ನ್ 25-14 ಬೊಕ್ಕ 25-17 ನೇರ ಸೆಟ್‌ರ್ದ್ ಸೋಪಾದ್ಂಡ್. ಬೆದ್ರ ಕೂಟ ರಡ್ಡನೇ ತಾನ ಪಡೆತ್ಂಡ್. ಬೊಲ್ತೇರ್ ಕೂಟ ಕುಡ್ಲ ಕೂಟನ್ ಬೊಕ್ಕ ಬೆದ್ರ ಕೂಟ ಮುಲ್ಕಿ ಕೂಟನ್ ಸೆಮಿಫೈನಲ್‌ಡ್ ಸೋಪಾದ್ ಫೈನಲ್‌ ಗ್ ಬೈದ್ಂಡ್. ಆನ್ ಲೆನ ವಿಭಾಗಡ್ ಬೊಲ್ತೇರ್ ದ ಪ್ರತೀಕ್ ಬೆಸ್ಟ್ ಎಟ್ಯಾಕರ್), ಬೊಲ್ತೇರ್ ದ ಸುಭಾಸ್ (ಬೆಸ್ಟ್ ಸೆಟ್ಟರ್) ಬೊಕ್ಕ ಬೆದ್ರದ ರಾಕೇಶ್ (ಆಲ್ ರೌಂಡರ್) ವೈಯಕ್ತಿಕ ಇನಾಮು ಪಡೆಯೆರ್.

ಪೊಣ್ಣುಲೆನ ವಿಭಾಗದ ಅಕೇರಿದ ಗೊಬ್ಬುಡು ಬೊಲ್ತೇರ್ ತಾಲೂಕ್ ಕೂಟ (ಮುಂಡಾಜೆ ಪ.ಪೂ ಕಾಲೇಜ್) ಕುಡ್ಲ ತಾಲೂಕ್ ಕೂಟ (ಸೈಂಟ್ ಅಲೋಷಿಯಸ್ ಕಾಲೇಜ್ ಕುಡ್ಲ) ನ್ 25-20 ಬೊಕ್ಕ 25-16 ನೇರ ಸೆಟ್‌ ರ್ದ್ ಸೋಪಾಂಡ್. ಕುಡ್ಲ ಕೂಟಗ್ ರಡ್ಡನೇ ತಾನ ತಿಕ್ಕ್ಂಡ್. ಬೊಲ್ತೇರ್ ಕೂಟ ಬೆದ್ರ ಕೂಟನ್ ಬೊಕ್ಕ ಕುಡ್ಲ ಕೂಟ ಪುತ್ತೂರ್ ಕೂಟನ್ ಸೆಮಿ ಫೈನಲ್‌ಡ್ ಸೋಪಾದ್ ಫೈನಲ್‌ ಗ್ ಬತ್ತ್ ದ್ ಇತ್ತ್ಂಡ್. ಪೊಣ್ಣುಲೆನ ವಿಭಾಗಡ್ ಬೊಲ್ತೇರ್ ಕೂಟದ ವರ್ಷಾ (ಬೆಸ್ಟ್ ಎಟ್ಯಾಕರ್), ಕುಡ್ಲದ ಹುಲಿಗೆಮ್ಮ (ಬೆಸ್ಟ್ ಸೆಟ್ಟರ್) ಬೊಕ್ಕ ಮುಂಡಾಜೆದ ಅಶ್ವಿನಿ.ಕೆ (ಆಲ್ ರೌಂಡರ್) ವೈಯಕ್ತಿಕ ಇನಾಮು ಪಡೆಯೆರ್.

ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ ಡಾ.ನಿಂಗಯ್ಯ, ಶ್ರೀ ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್ ಶ್ರೀವತ್ಸ ಬೆಂಗ್ಲೂರ್, ದ.ಕ ಜಿಲ್ಲಾ ಕ್ರೀಡಾ ಸಂಯೋಜಕೆರ್ ಅರುಣ್ ಡಿಸೋಜಾ, ಜಿಲ್ಲಾ ಕಬಡ್ಡಿ ರೆಫ್ರಿ ಎಸೋಸಿಯೇಶನ್‌ದ ಗುರ್ಕಾರೆ ಶಿವರಾಮ ಯೇನೆಕಲ್ಲು, ಗ್ರಾ.ಪಂ. ಉಪಾಧ್ಯಕ್ಷೆರ್ ವೆಂಕಟೇಶ್ ಎಚ್.ಎಲ್, ಗ್ರಾ.ಪಂ.ಸದಸ್ಯೆ ಭಾರತಿ ದಿನೇಶ್, ಸುಬ್ರಹ್ಮಣ್ಯ ರೋಟರಿ ಕ್ಲಬ್ ಪೂರ್ವಾಧ್ಯಕ್ಷೆರ್ ಗಿರಿಧರ್ ಸ್ಕಂಧ, ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ್ ನಾಯಕ್, ಹಿರಿಯ ವಿದ್ಯಾರ್ಥಿ ಸಂಘದ ಗುರ್ಕಾರೆ ರಾಜೇಶ್ ಎನ್.ಎಸ್, ಶಿಕ್ಷಕ ರಕ್ಷಕ ಸಂಘದ ಉಪಾಧ್ಯಕ್ಷೆರ್ ಚಿದಾನಂದ ಕಂದಡ್ಕ, ದೈಹಿಕ ಶಿಕ್ಷಣ ಉಪನ್ಯಾಸಕೆರ್ ರಾಧಾಕೃಷ್ಣ ಚಿದ್ಗಲ್, ವಿದ್ಯಾರ್ಥಿ ಸಂಘದ ಸಂಚಾಲಕೆರ್ ಜಯಪ್ರಕಾಶ್ ಆರ್ ಗೆಂದಿನಕ್ಲೆಗ್ ಇನಾಮು ಪಟ್ಟಿಯೆರ್.

ಕಡಬ, ಸುಳ್ಯ, ಪುತ್ತೂರ್, ಬೊಲ್ತೇರ್, ಬಂಟ್ವಾಳ, ಉಳ್ಳಾಲ, ಬೆದ್ರ, ಕುಡ್ಲ, ಮುಲ್ಕಿ ತಾಲೂಕ್ ದ ಆಣುಲು ಬೊಕ್ಕ ಪೊಣ್ಣುಲೆನ ಕೂಟಲು ಚಾಂಪಿಯನ್‌ಶಿಪ್ ಗಾದ್ ಗೊಬ್ಬುಂಡು

ವರದಿ: ಗೋಪಿಚಂದನ್ ಕೆಎಸ್

ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ ಮಿಜಾರ್ ಮುತಾಲಿಕೆಡ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ‌.) ಮಿಜಾರ್ ದ ಮುತಾಲಿಕೆಡ್ ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ ಮಲ್ತೆರ್.

ಕಾರ್ಲ ತಾಲೂಕ್ ದ ಕೆರ್ವಾಸೆ ನಿವಾಸಿ ಸಂತೋಷ್ ಪೂಜಾರಿ ಮೇರ್ ಮೆದುಳುದ ನರತ್ತ ಸಮಸ್ಯೆ ಡ್ ಉಲ್ಲೆರ್. ಕುಡ್ಲದ ಕೆ.ಎಸ್. ಹೆಗ್ಡೆ ಬೊಕ್ಕ ಕೆಎಂಸಿ ಆಸ್ಪತ್ರೆಡ್ Neuro interventional ಶಸ್ತ್ರಚಿಕಿತ್ಸೆ ಪಡೆದ್ ಇತ್ತೆ ವೈದ್ಯೆರೆನ ಸಲಹೆದಂಚೆನೆ ವಿಶ್ರಾಂತಿ ಪಡೆವೊಂದು ಉಲ್ಲೆರ್. ನೆಕ್ಕ್ ಸುಮಾರ್ 6.50 ಲಕ್ಷ ಖರ್ಚಾತ್ಂಡ್. ಸಾಲ ಮಲ್ತ್ ದ್ ಶಸ್ತ್ರಚಿಕಿತ್ಸೆ ಮಲ್ಪದೆರ್.

ರಿಕ್ಷಾ ಡ್ರೈವರ್ ಆಯಿನ ಮೇರ್ ಬೊಡೆದಿ ಬೊಕ್ಕ ಮೂಜಿ ಎಲ್ಯ ಜೋಕುಲೆನೊಟ್ಟಿಗೆ ಜೀವನ ನಿರ್ವಹಣೆ ಮಲ್ತೊಂದು ಉಲ್ಲೆರ್. ಇತ್ತೆ ವೈದ್ಯೆರ್ ಕನಿಷ್ಠ 6 ತಿಂಗೊಲ್ ವಿಶ್ರಾಂತಿ ಪಡೆಯರೆ ಪಂಡಿನೆರ್ದಾವರ ಜೀವನ ನಿರ್ವಹಣೆ ಕಷ್ಟ ಸಾಧ್ಯ ಆತ್ಂಡ್. ಅಂಚಾದ್ ಮೇರ್ ನನದ ಚಿಕಿತ್ಸೆಗ್ ಬೊಕ್ಕ ಜೀವನ ನಿರ್ವಹಣೆಗ್ ಸಹಕರಿಸಾಯೆರೆ ತುಳುನಾಡ ಪೊರ್ಲು ಚಾರಿಟೇಬಲ್ ಟ್ರಸ್ಟ್ (ರಿ.) ಮಿಜಾರ್ ದ ಕೂಟಗ್ ಬಿನ್ನಾಪು ಮಲ್ದೆರ್. ಮೆರೆನ ಬಿನ್ನಾಪುಗ್ ಸ್ಪಂದಿಸಾಯಿನ ಈ ಕೂಟ 20 ಸಾರ ರೂ.ದ ಚೆಕ್ ನ್ ಮಾರಿಗುಡಿ ದೇವಲ್ಯದ ನಾರಾಯಣ ಅರ್ಚಕೆರೆನ ಮುಖೇನ ಪಟ್ಟಿಯೆರ್. ಈ ಪೊರ್ತುಡು ಪದಾಧಿಕಾರಿಲು ಸೇವಾ ದಾನಿಲು ಪಾಲ್ ಪಡೆದಿತ್ತೆರ್.

ಸುಬ್ರಹ್ಮಣ್ಯ ಇನ್ನರ್ ವೀಲ್ ಕ್ಲಬ್ ದ ಮುತಾಲಿಕೆಡ್ ಪೊಂಜೋವ್ ನಕ್ಲೆಗ್ ಪೌಷ್ಟಿಕ ತೆನಸ್ ಶಿಬಿರ, ಪಂತೊ

ಸುಬ್ರಹ್ಮಣ್ಯ ಇನ್ನರ್ ವೀಲ್ ಕ್ಲಬ್ ದ ಮುತಾಲಿಕೆಡ್ ಏನೇಕಲ್ಲು ಅಂಗನವಾಡಿ ಶಾಲೆಡ್ ಪೊಂಜೋವ್ ನಕ್ಲೆಗಾದ್ ಪೌಷ್ಟಿಕ ತೆನಸ್ ತಯಾರ್ ಮಲ್ಪುನ ಬೊಕ್ಕ ಪಂತೊನ್ ಆಯೋಜನೆ ಮಲ್ತ್ ದ್ ಇತ್ತೆರ್.

ಏನೆಕಲ್ಲು ಅಂಗನವಾಡಿದ ಪೋಷಕೆರ್ ಬೊಕ್ಕ ಕೈತಲ್ ದ ಸುಮಾರ್ 50 ಪೊಂಜೋವ್ ನಕುಲು ಈ ಪೌಷ್ಟಿಕ ತೆನಸ್ ತಯಾರ್ ಮಲ್ತ್ ದ್ ಪಂತೊಡು ಪಾಲ್ ಪಡೆದಿತ್ತೆರ್. ಪೌಷ್ಟಿಕ ತೆನಸ್ ತಯಾರ್ ಮಲ್ಪುನ ಪಂತೊ ಎನ್ನ ಸುಬ್ರಹ್ಮಣ್ಯ ಸದಾನಂದ ಆಸ್ಪತ್ರೆದ ವೈದ್ಯಾಧಿಕಾರಿ ಡಾ ಭಾನುಮತಿ ಉದಿಪನ ಮಲ್ತೆರ್.

ಈ ಪೊರ್ತುಡು ಸುಬ್ರಹ್ಮಣ್ಯ ಇನ್ನರ್ ವೀನ್ ಕ್ಲಬ್ ದ ಮುತಾಲಿಕೆಡ್ 25 ಜೋಕುಲೆನ ಕುರ್ಸುನ್ ಬೊಕ್ಕ 20 ನೀರ್ ದ ಬಾಟಲಿನ್ ಕೊಡುಗೆಯಾದ್ ಕೊರಿಯೆರ್.

ಈ ಪೊರ್ತುಡು ಸುಬ್ರಹ್ಮಣ್ಯ ಇನ್ನರ್ ವೀಲ್ ಕ್ಲಬ್ ದ ಗುರ್ಕಾರೆ ವೇದ ಶಿವರಾಮ್, ಪೂರ್ವ ಅಧ್ಯಕ್ಷೆರ್ ಸರೋಜಾ ಮಾಯಿಲಪ್ಪ, ಸದಸ್ಯೆರ್ ಶ್ರೀಜಾ ಚಂದ್ರಶೇಖರ್, ಅಂಗನವಾಡಿ ವಲಯ ಮೇಲ್ವಿಚಾರಕಿ ದೀಪಿಕಾ, ಬಾಲ ವಿಕಾಸ ಅಂಗನವಾಡಿ ಸಮಿತಿ ಅಧ್ಯಕ್ಷೆರ್ ನಳಿನಿ ಭರತ್ ಪಿ, ಅಂಗನವಾಡಿ ಕಾರ್ಯಕರ್ತೆರ್ ಜಯ ರಮೇಶ್, ಜೋಕುಲೆನ ಪೋಷಕೆರ್ ಬೊಕ್ಕ ಊರುದ ಪೊಂಜೋವ್ ನಕುಲು ಈ ಪೊರ್ತುಡು ಪಾಲ್ ಪಡೆದಿತ್ತೆರ್.‌

ವರದಿ: ಗೋಪಿಚಂದನ್ ಕೆಎಸ್

ಕುಕ್ಕೆ: ಜಿಲ್ಲಾ ಮಟ್ಟದ ಪ.ಪೂ ಕಾಲೇಜ್ ಡ್ ವಾಲಿಬಾಲ್ ಪಂತೊದ ಉದಿಪನ

ಸುಬ್ರಹ್ಮಣ್ಯ: ಶಾಲಾ ಶಿಕ್ಷಣ ಇಲಾಖೆ ದ.ಕ ಬೊಕ್ಕ ಶ್ರೀ ಸುಬ್ರಹ್ಮಣ್ಯೇಶ್ವರ ಪದವಿಪೂರ್ವ ಕಾಲೇಜ್ ದ ಮುತಾಲಿಕೆಡ್ ಸುಬ್ರಹ್ಮಣ್ಯದ ಎಸ್ ಎಸ್ ಪಿಯು ಕಾಲೇಜ್ ದ ಕ್ರೀಡಾಂಗಣಡ್ ಅಂಗಾರೆ ಜಿಲ್ಲಾ ಮಟ್ಟದ ವಾಲಿಬಾಲ್ ಪಂತೊ ನಡತ್ಂಡ್.

ಪಂತೊನ್ ಸುಬ್ರಹ್ಮಣ್ಯ ಗ್ರಾ.ಪಂ. ಗುರ್ಕಾರ್ದಿ ಸುಜಾತಾ ಕಲ್ಲಾಜೆ ಉದಿಪನ ಮಲ್ತೆರ್. ಮಲ್ಲ ಬಿನ್ನೆರಾದ್ ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ವ್ಯವಸ್ಥಾಪನಾ ಸಮಿತಿ ಸದಸ್ಯೆರ್ ಶ್ರೀವತ್ಸ ಬೆಂಗ್ಲೂರ್, ದ.ಕ ಜಿಲ್ಲಾ ಕ್ರೀಡಾ ಸಂಯೋಜಕೆರ್ ಅರುಣ್ ಡಿಸೋಜಾ ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ್ ನಾಯಕ್, ಹಿರಿಯ ವಿದ್ಯಾರ್ಥಿ ಸಂಘದ ಗುರ್ಕಾರೆ ರಾಜೇಶ್ ಎನ್.ಎಸ್, ಶಿಕ್ಷಕ ರಕ್ಷಕ ಸಂಘದ ಉಪಾಧ್ಯಕ್ಷೆರ್ ಚಿದಾನಂದ ಕಂದಡ್ಕ, ಕಾಲೇಜ್ ದ ಸಾಂಸ್ಕೃತಿಕ ಸಂಘದ ಸಂಚಾಲಕಿ ರೇಖಾರಾಣಿ ಸೋಮಶೇಖರ್, ದೈಹಿಕ ಶಿಕ್ಷಣ ಉಪನ್ಯಾಸಕೆರ್ ರಾಧಾಕೃಷ್ಣ ಚಿದ್ಗಲ್, ವಿದ್ಯಾರ್ಥಿ ಸಂಘದ ಸಂಚಾಲಕೆರ್ ಜಯಪ್ರಕಾಶ್.ಆರ್, ಕಾಲೇಜ್ ದ ಕ್ರೀಡಾ ಕಾರ್ಯದರ್ಶಿ ಅಜಿತ್ ಜೋಗಿ ಪಾಲ್ ಪಡೆದಿತ್ತೆರ್.

ಕಡಬ, ಸುಳ್ಯ, ಪುತ್ತೂರ್, ಬೊಲ್ತೇರ್, ಬಂಟ್ವಾಳ, ಉಳ್ಳಾಲ, ಬೆದ್ರ, ಕುಡ್ಲ, ಮುಲ್ಕಿ ತಾಲೂಕ್ ದ ಬಾಲಕ ಬೊಕ್ಕ ಬಾಲಕಿಯೆರೆನ ಕೂಟಲು ಚಾಂಪಿಯನ್‌ಶಿಪ್ ಗಾದ್ ಗೊಬ್ಬೆರೆ ಉಲ್ಲ.

ವರದಿ: ಗೋಪಿಚಂದನ್ ಕೆಎಸ್

ಕುಕ್ಕೆ: ಚೌತಿದ ಅಂಗವಾದ್ ಸಾಂಸ್ಕೃತಿಕ ಸಂಜೆಡ್ ಜಾನಪದ ವೈಭವ

ಸುಬ್ರಹ್ಮಣ್ಯ: ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಮುತಾಲಿಕೆಡ್ ನಡತಿನ 53ನೇ ವರ್ಷೊದ ಸಾರ್ವಜನಿಕ ಗಣೇಶೋತ್ಸವದ ಲೆಕ್ಕೊಡು ಶ್ರೀ ದೇವಲ್ಯದ ರಥಬೀದಿದ ಕುಕ್ಕೆಶ್ರೀ ಕಲಾವೇದಿಕೆಡ್ ಎಸ್‌ಎಸ್‌ಪಿಯು ಕಾಲೇಜ್ ದ ಸಾಂಸ್ಕೃತಿಕ ಸಂಘದ ಕಲ್ಪಾರ್ಥಿಲೆರ್ದ್ ಪ್ರದರ್ಶನ ಆಯಿನ ಜನಪದೀಯ ನೃತ್ಯ ಸಿಂಚನ ಕಲಾಸಕ್ತೆರೆನ್ ರಂಜಿಸಾಂಡ್.

ಒವ್ವೇ ಸರಿಯಾಯಿನ ತರಬೇತುದಾರೆರ್ ಇಜ್ಜಂದಿನ ಕಲ್ಪಾರ್ಥಿಲೇ ಆಸಕ್ತಿರ್ದ್ ಪ್ರದರ್ಶನ ಮಲ್ತಿನ ಪ್ರತಿಭೆ ಸಭಾಂಗಣಡ್ ದಿಂಜಿನ ಜನಕ್ಲೆನ ಎದುರುಡು ಪೊರ್ಲಾಂಡ್. ಸುಮಾರ್ 2 ಗಂಟೆದ 125ಕ್ ಎಚ್ಚ ಕಲ್ಪಾರ್ಥಿಲು ನೃತ್ಯ ವೈವಿದ್ಯ ಮಲ್ತೆರ್. ವಿದ್ಯಾಲಕ್ಷ್ಮೀ ಬೊಕ್ಕ ಕೂಟದಕುಲು ವರಹ ರೂಪಂ ಪದ್ಯದ ಭರತನಾಟ್ಯ ಬೊಕ್ಕ ನಾಟ್ಯ ಶೈಲಿದ ಸಮ್ಮಿಲನದ ನೃತ್ಯ ಪ್ರದರ್ಶನ ಮಲ್ತೆರ್.

ಆಶೀತಾ, ಚಂದನ್, ಶಿಲ್ಪಾ, ಗಾಯತ್ರಿ, ನವ್ಯಶ್ರೀ, ವಿನ್ಯಾ, ಧನ್ಯಶ್ರೀ ಬೊಕ್ಕ ಕೂಟದಕುಲು ದೇವತಾ ಗೀತೆಗ್ ನರ್ತನ ಮಲ್ತೆರ್. ವೈಶಾಲಿ ಬೊಕ್ಕ ಕೂಟದಕುಲು ಶ್ರೀ ಕುಕ್ಕೆ ಸುಬ್ರಹ್ಮಣ್ಯ ಮಹಾತ್ಮೆ ಪನ್ಪುನ ನೃತ್ಯ ನಾಟಕ ಪ್ರದರ್ಶನ ಮಲ್ತೆರ್. ಚಿನ್ಮಿಯಿ ಡಿ.ಎಸ್ ಭಕ್ತಿಗೀತೆ ಪಂಡ್ಂಡ ನುರಿತ ಚೆಂಡೆ ವಾದಕೆರ್ ಇಪ್ಪುನ ಮಿಥುನ್ ಬೊಕ್ಕ ಸಂಗಡಿಗೆರೆನ ಕೂಟ ಸಿಂಗಾರಿ ಮೇಳ ನುಡಿಸಾಯೆರ್. ಲೇಸ್ ದ ಅಕೇರಿಡ್ ಅಕ್ಷಯ್ ಕಂದಡ್ಕ ಬೊಕ್ಕ ಕೂಟದಕುಲು ಪಿಲಿಏಸ ಪ್ರದರ್ಶನ ಮಲ್ತೆರ್.

ಲೇಸ್ ನ್ ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ ನಾಯಕ್ ಬೊಕ್ಕ ಸಾಂಸ್ಕೃತಿಕ ಕೂಟದ ಸಂಚಾಲಕಿ ರೇಖಾರಾಣಿ ಸೋಮಶೇಖರ್ ಸಂಯೋಜನೆ ಮಲ್ತೆರ್. ಸಾಂಸ್ಕೃತಿಕ ಕೂಟದ ಸಹಸಂಚಾಲಕೆರ್ ರತ್ನಾಕರ ಸುಬ್ರಹ್ಮಣ್ಯ, ಉಪನ್ಯಾಸಕೆರ್ ಶ್ರೀಧರ್ ಪುತ್ರನ್, ಸವಿತಾ ಕೈಲಾಸ್ ಬೊಕ್ಕ ಶ್ಯಾಮಿಲಿ, ಹಿರಿಯ ವಿದ್ಯಾರ್ಥಿ ರಾಧಾಕೃಷ್ಣ ದೇವರಗದ್ದೆ ಬೊಕ್ಕ ಚಂದ್ರಶೇಖರ್ ಮಲ್ಲಿಗೆಮಜಲು ಸಹಕಾರ ಕೊರಿಯೆರ್.

ಚೌತಿಡ್ ಕುಕ್ಕೆಶ್ರೀ ಭಜನಾ ಮಂಡಳಿ, ಶ್ರೀವಲ್ಲೀ ಭಜನಾ ಮಂಡಳಿ ಬೊಕ್ಕ ವಿದ್ಯಾಸಾಗರ ಭಜನಾ ಸಂಗಮದ ಕಲಾವಿದೆರ್ದ್ ಭಜನೆ ನಡತ್ಂಡ್. ಸುನಾದ ಸಂಗೀತ ಕಲಾಶಾಲೆ ಸುಬ್ರಹ್ಮಣ್ಯದ ಕಲ್ಪಾರ್ಥಿಲೆರ್ದ್ ಭಕ್ತಿಗಾನ, ಉಜಿರೆದ ವೈಷ್ಣವಿ ಸ್ಕೂಲ್ ಆಫ್ ಡ್ಯಾನ್ಸ್ ಕೂಟರ್ದ್ ನೃತ್ಯ ಸಂಗಮ, ಕುಮಾರಸ್ವಾಮಿ ವಿದ್ಯಾಲಯದ ಕಲ್ಪಾರ್ಥಿಲೆರ್ದ್ ಕುಮಾರ ವೈಭವ, ಹೊಸಬೆಟ್ಟು ನೃತ್ಯರಂಗ ಡ್ಯಾನ್ಸ್ ಅಕಾಡೆಮಿದ ಪೂಜಾ ಪ್ರಭಾತ್ ಕೂಟದಕ್ಲೆರ್ದ್ ನೃತ್ಯ ವೈಭವ, ಕಾಮಿಡಿ ಕಿಲಾಡಿ ಖ್ಯಾತಿದ ದೀಕ್ಷಿತ್ ರಾಮಕುಂಜ ಮೆರೆರ್ದ್ ಹಾಸ್ಯಮಯ ಮಿಮಿಕ್ರಿ, ಅಮ್ಮ ಕಲಾವಿದೆರ್ ಕುಡ್ಲ ಮೊಕ್ಲೆರ್ದ್ ಅಲೆಬುಡಿಯೆರ್‌ಗೆ ಹಾಸ್ಯಮಯ ತುಳು ನಾಟಕ ಪ್ರದರ್ಶನ ಆಂಡ್. ಲೇಸ್ ದ ಅಕೇರಿಡ್ ಸರ್ವ ಕಲಾವಿದೆರೆಗ್ ಗುರ್ಕಾರೆ ದಿನೇಶ್ ಸಂಪ್ಯಾಡಿ ಬೊಕ್ಕ ಪದಾಧಿಕಾರಿಲು ದೇವೆರೆನ ಪ್ರಸಾದ ಕೊರ್ದು ಮಾನಾದಿಗೆ ಮಲ್ತೆರ್.

ವರದಿ: ಗೋಪಿಚಂದನ್ ಕೆಎಸ್