ಬೊಂಬೈದ ಗೋರೆಗಾಂವ್ ಡ್ ಇಪ್ಪುನ 7 ಮಾಳಿಗೆದ ಕಟ್ವಾನಡ್ ನಡುರಾತ್ರೆ ತೂ ಪೊತ್ತ್ ದ್ 6 ಜನ ತೀರ್ ಪೋಯೆರ್.
ಅತ್ತಂದೆ ಈ ಘಟನೆಡ್ 45 ಜನಕ್ಕ್ ಮಸ್ತ್ ಪೆಟ್ಟಾತ್ಂಡ್. 2 ಜನತ್ತ ಸ್ಥಿತಿ ಗಂಭೀರ ಉಂಡು. ಸುರುಕು ಪಾರ್ಕಿಂಗ್ ಜಾಗೆಡ್ ಸುರು ಆಯಿನ ತೂ ಕ್ರಮೇಣ ಒಂಜೊಂಜೇ ಮಾಳಿಗೆಗ್ ಪಸೆರ್ಂಡ್. ಪಾರ್ಕಿಂಗ್ ಜಾಗೆಗ್ ಉಂತಾದ್ ಇತ್ತಿನ 4 ಕಾರ್ ಬೊಕ್ಕ 30 ಬೈಕ್ ತೂಟ್ಟ್ ಪೊತ್ತ್ ದ್ಂಡ್.
ಗುಜರಾತ್: ಜವನೆಯೊರಿ ಕ್ಲಾಸ್ ಡ್ ಗರ್ಬಾ ಅಭ್ಯಾಸ ಮಲ್ಪುನಗ ತಿಗಲೆ ಬೇನೆಡ್ ತೀರ್ ಪೋಯಿನ ಘಟನೆ ಸೂರತ್ ಡ್ ನಡತ್ ದ್ಂಡ್.
ರಾಜ್ ಧರ್ಮೇಶ್ ಮೋದಿ (26) ತೀರ್ ಪೋಯಿನಾರ್ ಪಂದ್ ತೆರಿದ್ ಬೈದ್ಂಡ್. ಮೆರೆಗ್ ತಿಗಲೆ ಬೇನೆ ಬತ್ತಿ ಕೂಡ್ಲೆ ವೈದ್ಯಕೀಯ ಚಿಕಿತ್ಸೆ ಕೊರಿಯೆರೆ ಆಸ್ಪತ್ರೆಗ್ ಕೊನೊತೆರ್. ಆಂಡ ಮೇರ್ ಕೊನೊನಗ ತಾದಿ ನಡುಟ್ಟೆ ತೀರ್ ಪೋತೆರ್.
ಕುಡ್ಲ: ಬೆದ್ರ ತಾಲೂಕುದ ಪುಚ್ಚೆಮುಗೇರು ಗ್ರಾಮಡ್ ಹಿಂದೂ ಧಾರ್ಮಿಕ ಕಟ್ಟೆಡ್ ಇಸ್ಲಾಂ ಧ್ವಜ ದೀನ ಘಟನೆ ನಡತ್‌ಂಡ್. ವಿಷಯ ತೆರಿನಂಚೆನೆ ಜಾಗೆಗ್ ಬತ್ತಿನ ಬೆದ್ರ ಪೊಲೀಸೆರ್ ಧ್ವಜನ್ ತೆರವು ಮಲ್ತ್‌ದೆರ್. ಈ ಪೊರ್ತುಗು ಸರ್ಕಲ್ ಇನ್ಸ್‌ಪೆಕ್ಟರ್ ಸಂದೇಶ್ ಪಂಚಾಯತ್ ಅನುಮತಿ ದೆತೊನಂದೆ ಪಾಡಿನ ಧ್ವಜ ಉಂದು. ಈ ಬಗ್ಗೆ ಪೊಲೀಸೆರ್ನ ಗಮನಗ್ ತೆರಿಪಾವಂದೆ ಇತ್ತಿನೆಕ್ಕ್ ಪಿಡಿಒ ಅರೆಗ್ ತರಾಟೆಗ್ ದೆತೊಂದೆರ್. ಪಿಡಿಒ ಕರ್ತವ್ಯದ ಬಗ್ಗೆ ಎಚ್ಚರಿಕೆ ಕೊರ್ದು, ನಿಕ್ಲೆನ ಮಿತ್ತ್ ಕೇಸ್ ಪಾಡುವೆ ಪಂದ್ ಎಚ್ಚರಿಕೆ ಕೊರ್ತೆರ್.
ಸುಳ್ಯ ಕೆವಿಜಿ ಪಾಲಿಟೆಕ್ನಿಕ್ ಪ್ರಾಂಶುಪಾಲೆರಾಯಿನ ಪ್ರೊ. ಎ.ಎಸ್ ರಾಮಕೃಷ್ಣ ಅರೆನ ಕೊಲೆ ಕೇಸ್ ದ ಅಪರಾಧಿಲೆಗ್ ಹೈಕೋರ್ಟ್ ನ್ಯಾಯಾಧೀಶೆರ್ ಜೀವಾವಧಿ ಶಿಕ್ಷೆ ಕೊರ್ದು ತೀರ್ಪು ಕೊರ್ತೆರ್.
ಕುರುಂಜಿ ವೆಂಕಟರಮಣ ಗೌಡ ಮೆರೆನ ಮಗೆ ಡಾ. ರೇಣುಕಾ ಪ್ರಸಾದ್ ಸೇರಿನಂಚ ಆರೋಪಿಲೆಡ್‌ ಒರಿಯನ್‌ ಬುಡ್ದು ಐನ್ ಜನಕ್ಕ್ ಶಿಕ್ಷೆ ವಿಧಿಸಾದೆರ್. ವೀಡಿಯೋ ಕಾನ್ಪರೆನ್ಸ್ ಮುಖೇನ ಹೈ ಕೋರ್ಟ್ ನ್ಯಾಯಾಧೀಶೆರ್ ಅಪರಾಧಿಲೆನ ಅಹವಾಲು ತೂದು ಶಿಕ್ಷೆದ ತೀರ್ಪು ಪ್ರಕಟ ಮಲ್ತ್‌ದೆರ್.
ಉಜಿರೆ ಎಸ್.ಡಿ.ಎಂ ಪಾಲಿಟೆಕ್ನಿಕ್ ಕಾಲೇಜ್‌ಡ್ ದ.ಕ. ಒಡಿಪು ಅಂತರ್ ಜಿಲ್ಲಾ ಆಂಜೊಕ್ಲೆನ ಮ್ಯಾಟ್ ಕಬ್ಬಡಿ ಮ್ಯಾಚ್ ಉದಿಪನ *** ಉಜಿರೆ: ಶ್ರೀ ಧ.ಮ.ಪಾಲಿಟೆಕ್ನಿಕ್ ಸಂಸ್ಥೆದ ಮುತಾಲಿಕೆಡ್ ಅ.6 ದಾನಿ ದ.ಕ ಬೊಕ್ಕ ಒಡಿಪು ಅಂತರ್ ಜಿಲ್ಲಾ ಪಾಲಿಟೆಕ್ನಿಕ್ ಕಾಲೇಜ್‌ದ ಮ್ಯಾಟ್ ಕಬ್ಬಡಿ ಪಂದ್ಯಾಟದ ಉದಿಪನ ಲೇಸ್ ಕಾಲೇಜ್‌ದ ಒಳಾಂಗಣಡ್‌ ನಡತ್‌ಂಡ್.
ಅಂತರಾಷ್ಟ್ರೀಯ ಕಬ್ಬಡಿ ಮಾಜಿ ಆಟಗಾರೆರ್ ಎಷ್ಯನ್ ಗೋಲ್ಡ್ ಮೆಡಲಿಸ್ಟ್, ಪ್ರೊ ಕಬಡ್ಡಿ ತರಬೇತುದಾರೆರ್ ಜಗದೀಶ್ ಕುಂಬ್ಳೆ ಪಂದ್ಯಾಟ ಉದಿಪನ ಮಲ್ತೆರ್. ಗುರ್ಕಾರ್ಮೆನ್‌ ಎಸ್.ಡಿ.ಎಂ ಪಾಲಿಟೆಕ್ನಿಕ್ ಕಾಲೇಜ್‌ದ ಪ್ರಾಂಶುಪಾಲೆರ್ ಸಂತೋಷ್ ವಹಿಸ್‌ದ್‌ ಇತ್ತೆರ್. ಎಸ್.ಡಿ.ಎಂ.ಸ್ಪೋರ್ಟ್ಸ್ ಕ್ಲಬ್ ಕಾರ್ಯದರ್ಶಿ ರಮೇಶ್ ಹೆಚ್, ರಾಷ್ಟ್ರೀಯ ಕಬಡ್ಡಿ ತರಬೇತುದಾರೆರ್ ಕೃಷ್ಣಾನಂದ ರಾವ್ ದೈಹಿಕ ಶಿಕ್ಷಣ ನಿರ್ದೇಶಕೆರ್ ನಿತಿನ್, ಮೆನೇಜರ್ ಚಂದ್ರಕಾಂತ್ ಜೈನ್, ದೈಹಿಕ ಶಿಕ್ಷಣ ನಿರ್ದೇಶಕೆರ್, ಉಪನ್ಯಾಸಕೆರ್, ಸಿಬ್ಬಂದಿಲು, ಕಲ್ಪಾರ್ಥಿಲು, ಬೇತೆ ಬೇತೆ ಕಾಲೇಜ್‌ದ ತಂಡದಕುಲು ಪಾಲ್‌ ಪಡೆದಿತ್ತೆರ್.
ನಾವರ : ನಾವರ ಗೋಳಿಕಟ್ಟೆಡ್‌ ನಡಪುನ 20ನೇ ವರ್ಷದ ಸಾರ್ವಜನಿಕ ಶ್ರೀ ಶಾರದೋತ್ಸವ ಪೂಜಾ ಮಹೋತ್ಸವದ ಲೆಪ್ಪೋಲೆ ಬುಡುಗಡೆ ಅ.6 ದಾನಿ ನಾವರ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಡ್‌ ಬುಡುಗಡೆ ಮಲ್ತೆರ್.
ಈ ಪೊರ್ತುಡು ದೇವಸ್ಥಾನದ ಪ್ರಧಾನ ಅರ್ಚಕೆರಾಯಿನ ನಾರಾಯಣ ರಾವ್, ಶಾರದೋತ್ಸವ ಸೇವಾ ಸಮಿತಿದ ಗೌರವಾಧ್ಯಕ್ಷೆರ್ ಪಿ.ಹೆಚ್.ಪ್ರಕಾಶ್ ಶೆಟ್ಟಿ, ಪ್ರಧಾನ ಸಂಚಾಲಕೆರ್ ವಿಜಯ ಕುಮಾರ್ ಜೈನ್, 2023 ಸಾಲ್‌ದ ಗುರ್ಕಾರ್ಲು ರಮಾನಾಥ ಪಾದೆಮಾರಡ್ಡ, ಕಾರ್ಯದರ್ಶಿ ಪುಷ್ಪಾವತಿ ಯೋಗಕ್ಷೇಮ ನಾವರ, ಮಾಜಿ ಗುರ್ಕಾರ್ಲು ವೀರೇಂದ್ರ ಕುಮಾರ್ ಜೈನ್, ಗಿರೀಶ್ ಕುಮಾರ್, ಕುದ್ಯಾಡಿ. ಗ್ರಾಮ ಪಂಚಾಯತ್ ಸದಸ್ಯೆರ್ ರವಿ ಪೂಜಾರಿ ಹಾರಡ್ಡೆ, ಸಂಚಾಲಕೆರ್ ಸದಾನಂದ ಬಿ.ಕುದ್ಯಾಡಿ, ರಾಜೂ ಸಾಲ್ಯಾನ್ ಬಿರ್ಮೆಕ್ಯಾರ್, ನಿತ್ಯಾನಂದ ಎನ್. ಯೋಗಕ್ಷೇಮ ನಾವರ, ಸುಬ್ರಹ್ಮಣ್ಯ ಭಟ್, ಬೀಡುಮನೆ. ಮಹಿಳಾ ಸದಸ್ಯೆರಾಯಿನ ಸುಶೀಲಾ ಹೆಗ್ಡೆ ನಾವರ, ಗಿರಿಜಾ ಅಶೋಕ ನಗರ, ದಿನೇಶ್ ಕುಮಾರ್ ಗೋಳಿಕಟ್ಟೆ, ಅಜಿತ್ ಕುಮಾರ್ ಅಲೆಕ್ಕಿ, ಸಂಪತ್ ಶೆಟ್ಟಿ ರಾಜಪಾದೆ ಇತ್ತೆರ್.
ಕುಡ್ಲ: ಪುಗರ್ತೆದ ಗುಜ್ಜರಕೆರೆ ಕೈತಲ್ ದ ಆರೆಕೆರೆ ಭಾಗಡ್ ಸುಮಾರ್ ವರ್ಷೊದಿಂಚ ಮರಿಯಲಡ್ ಆವೊಂದು ಇತ್ತಿನ ಒಳಚರಂಡಿ ಸಮಸ್ಯೆ ಇತ್ತೆ ಸರಿ ಆತ್ಂಡ್.
ಎಲ್ಯ ಬರ್ಸಗೇ ಈ ಭಾಗಡ್ ಚರಂಡಿ ದಿಂಜಿದ್ ನೀರ್ ಮಾರ್ಗಡ್ ಪೋವೊಂದು ಇತ್ತ್ಂಡ್. ನೆರ್ದ್ ಕೈತಲ್ ದ ನಿವಾಸಿಲು ಬೇತೆ ಬೇತೆ ರೀತಿದ ಸಮಸ್ಯೆ ಎದುರಿಸಾವೊಡಾಪುಂಡು. ಸುಮಾರ್ ವರ್ಷೊದಿಂಚ ಆಡಳಿತಡ್ ಇಪ್ಪುನಕ್ಲೆಗ್ ಕೈತಲ್ ದಕುಲು ಬಿನ್ನಾಪು ಮಲ್ತ್ಂಡಲ ಆ ಸಮಯಗ್ ಅಧಿಕಾರಡ್ ಇತ್ತಿನ ಆಡಳಿತ ವರ್ಗ ಬೊಕ್ಕ ಸಂಬಂಧ ಪಟ್ಟಿನ ಇಲಾಖೆರ್ದ್ ಈ ಬಗೆಟ್ಟ್ ಸಕಾರಾತ್ಮಕ ಸ್ವಂದನೆ ತಿಕ್ಕಂದಿನ ಪರಿಣಾಮ ಸಮಸ್ಯೆ ಅಂಚೆನೆ ಇತ್ತ್ಂಡ್.
ಈ ಬಗೆಟ್ಟ್ ಟೈಮ್ಸ್ ಆಫ್ ಕುಡ್ಲ ತುಳು ಪ್ರತಿಕೆ ವರದಿ ಪ್ರಕಟ ಮಲ್ತ್ ದ್ ಇತ್ತ್ಂಡ್. ಇತ್ತೆ ಶಾಸಕೆರ್ ವೇದವ್ಯಾಸ ಕಾಮತ್, ಕೈತಲ್ ದ ಮನಪಾ ಸದಸ್ಯೆ ರೇವತಿ ಶ್ಯಾಮ ಸುಂದರ್ ಮೇರ್ ಸಮಸ್ಯೆಗ್ ಸ್ವಂದಿಸಾದೆರ್. ಅಧಿಕಾರಿಲೆನ ಮುಖೇನ ಒಳಚರಂಡಿ ಸಮಸ್ಯೆ ಬಗೆಹರಿಸಾವೆ ಪಂದ್ ಪಂತೆರ್ ಪಂದ್ ಕೈತಲ್ ದ ನೇಮು ಕೊಟ್ಟಾರಿ ತೆರಿಪಾದೆರ್.
ಧರ್ಮಸ್ಥಳ: ಮಾಜಿ ಮುಖ್ಯಮಂತ್ರಿ ಜಗದೀಶ ಶೆಟ್ಟರ್ ಶ್ರೀ ಕ್ಷೇತ್ರ ಧರ್ಮಸ್ಥಳಕ್ಕ್ ಭೇಟಿ ಕೊರ್ದ್ ದೇವೆರ್ನ ದರ್ಶನ ಮಲ್ತ್, ವಿಶೇಷ ಪೂಜೆ ಸಲ್ಲಿಸಾಯೆರ್. ಬೊಕ್ಕ ಧರ್ಮಾಧಿಕಾರಿ ಡಿ. ವೀರೇಂದ್ರ ಹೆಗ್ಗಡೆರೆನ್ ಭೇಟಿಯಾದ್ ಆಶೀರ್ವಾದ ಪಡೆಯೊಂಡೆರ್.
ಒಡಿಪು: ಶ್ರೀ ಭಗವತೀ ತೀಯಾ ಭಕ್ತವೃಂದ ಭಜನಾ ಮಂದಿರ ಕೊಡವೂರು ಮೂಲು ಅ.20 ದಾನಿ ನವರಾತ್ರಿ ಉಚ್ಚಯ ನಡಪೆರೆ ಉಂಡು. ಶ್ರೀ ಭಗವತೀ ದೇವಿಗ್‌ ಬಯ್ಯ 6 ಗಂಟೆರ್ದ್‌ ಭಜನಾ ಸೇವೆ ಬೊಕ್ಕ ರಾತ್ರೆ 8.30 ಕ್ಕ್ ಮಹಾಪೂಜೆ ಆದ್‌ ಬೊಕ್ಕ ಅನ್ನಸಂತರ್ಪಣೆ ನಡಪೆರೆ ಉಂಡು.
ಈ ಮಾತಾ ಕಾರ್ಯಕ್ರಮಡ್‌ ಶ್ರೀ ಭಗವತೀ ದೇವಿನ ಭಕ್ತೆರ್ ಪಾಲ್‌ ಪಡೆದ್‌, ತನು-ಮನ-ಧನರ್ದ್‌ ಸಹಕಾರ ಮಲ್ತ್, ಗಂಧ ಪ್ರಸಾದ ಸ್ವೀಕಾರ ಮಲ್ತ್ ಶ್ರೀ ದೇವಿನ ಅನುಗ್ರಹಗ್ ಪಾತ್ರರಾವೊಡು ಪಂದ್ ಲೆಪ್ಪೋಲೆಡ್‌ ತೆರಿಪಾದೆರ್.
ಪುತ್ತೂರು : ಅ.7 ದಾನಿ ಪುತ್ತೂರುಡು ನಡಪುನ ಶೌರ್ಯ ಜಾಗರಣ ರಥಯಾತ್ರೆ, ಶೋಭಾಯಾತ್ರೆ ಬೊಕ್ಕ ಬೃಹತ್ ಹಿಂದೂ ಶೌರ್ಯ ಸಂಗಮ ಸಮಾವೇಶದ ಬಗ್ಗೆ ಅ.5 ದಾನಿ ಪುತ್ತೂರು ಪೇಂಟೆಡ್‌ ಲೆಪ್ಪೋಲೆ ಪತ್ರದ ವಿತರಣೆ ಕಾರ್ಯಕ್ರಮ ನಡತ್‌ಂಡ್. ದರ್ಬೆರ್ದ್-ಬೊಳುವಾರು ಮುಟ್ಟ, ಹಿಂದೂ ಪರ ಸಂಸ್ಥೆಲೆಗ್ ಲೆಪ್ಪೋಲೆ ಪತ್ರದ ವಿತರಣೆ ಮಲ್ತೆರ್.
ವಿಶ್ವ ಹಿಂದೂ ಪರಿಷದ್ ಜಿಲ್ಲಾಧಕ್ಷೆರ್ ಡಾ. ಕೃಷ್ಣಪ್ರಸನ್ನ, ಬಜರಂಗದಳ ಕರ್ನಾಟಕ ದಕ್ಷಿಣ ಪ್ರಾಂತ ಸಹಸಂಯೋಜಕೆರ್ ಮುರಳಿಕೃಷ್ಣ ಹಸಂತಡ್ಕ, ಶೌರ್ಯ ರಥಯಾತ್ರೆ ಸ್ವಾಗತ ಸಮಿತಿದ ಗುರ್ಕಾರ್ಲು ಕಿಶೋರ್ ಬೊಟ್ಯಾಡಿ, ಸಂಚಾಲಕೆರ್ ಕೃಷ್ಣ ಪ್ರಸಾದ್ ಬೆಟ್ಟ, ಕಾರ್ಯದರ್ಶಿ ವಿರೂಪಾಕ್ಷ ಭಟ್, ದಿನೇಶ್ ಪಂಜಿಗ, ವಿಶಾಖ್ ರೈ, ಹರೀಶ್ ದೋಳ್ಪಾಡಿ ಈ ಪೊರ್ತುಡು ಇತ್ತೆರ್.
