ತುಳು ಸುದ್ದಿ

ಶೌರ್ಯ ಜಾಗರಣ ರಥಯಾತ್ರೆ, ಹಿಂದೂ ಸಮಾಜೋತ್ಸವ ಲೇಸ್ ಮುಗಿತಲ

ಒಡಿಪು: ಸನಾತನ ಧರ್ಮ ಅಂಚೆನೆ ಸಂಸ್ಕೃತಿನ್ ವಿರೋಧ ಮಲ್ಪುನ ಜನಕ್ಲೆನ ಎದುರುಡು ಧೈರ್ಯಡ್ ಉಂತುನ ರಾಜಕೀಯ ಪ್ರಜ್ಞೆನ್ ಪ್ರತಿಯೊರಿಲ ಬುಲೆಪಾವೊಡು. ಉಂದು ತಾದಿಡ್ ಉಂತುದು ಪೊರ್ಂಬಾಟ ಮಲ್ಪುನೆರ್ದ್ ಸಾಧ್ಯ ಇಜ್ಜಿ ಪಂದ್ ಪೇಜಾವರ ಮಠಾಧೀಶೆರ್ ಶ್ರೀ ವಿಶ್ವಪ್ರಸನ್ನ ತೀರ್ಥ ಸ್ವಾಮೀಜಿ ಪಂಡೆರ್.

ಮೇರ್ ಜಿಲ್ಲಾ ವಿಶ್ವ ಹಿಂದೂ ಪರಿಷತ್ತ್ ಭಜರಂಗದಳರ್ದ್ ಅಂಗಾರೆ ಎಂಜಿಎಂ ಕಾಲೇಜ್ ಮೈದಾನಡ್ ನಡತಿನ ಹಿಂದೂ ಸಮಾಜೋತ್ಸವ ಬೊಕ್ಕ ಶೌರ್ಯ ಜಾಗರಣ ರಥಯಾತ್ರೆ ಲೇಸ್ ಡ್ ಆಶೀರ್ವಚನ ಕೊರಿಯೆರ್.

ಬೊಕ್ಕ ಮೇರ್ ಪಾತೆರ್ದ್, ನಮ ಮಾತ ಶಾಂತಿ ಪ್ರಿಯೆರ್. ಧರ್ಮದ ಪ್ರತಿಪಾದಕೆರ್. ಶ್ರೀರಾಮ‌ ದೇವೆರೆನ ಆದರ್ಶ ಪಾಲನೆ ಮಲ್ಪುನಕುಲು. ಕಲ್ಲ್ ದಕ್ಕುನ, ಕಂಡುನ ಅತ್ತ್ಂಡ ಏರೆನಾಂಡಲ ತರೆ ದೆಪ್ಪುನಕುಲು ನಮ ಅತ್ತ್, ಇತ್ತೆ ನಮ್ಮ ಇಲ್ಲ್ ದುಲಯಿ ಬತ್ತ್ ದ್ ಜೋಕ್ಲೆನ್ ಕೊನೊಪುನ ಪರಿಸ್ಥಿತಿ ನಿರ್ಮಾಣ ಆತ್ಂಡ್. ಉಂದೆನ್ ನಮ ಮಾತ ಒಟ್ಟಾದ್ ಪ್ರತಿಭಟನೆ ಮಲ್ತ್ ದ್ ಲವ್ ಜಿಹಾದ್ ವಿರುದ್ಧ ಪೊರ್ಂಬಾಟ ಮಲ್ಪೊಡು ಪಂದ್ ಪಂಡೆರ್.

ಅದಮಾರು ಮಠಾಧೀಶೆರ್ ಶ್ರೀ ಈಶಪ್ರಿಯತೀರ್ಥ ಸ್ವಾಮೀಜಿ ಆಶೀರ್ವಾದ ಕೊರ್ದು, ಪಾತೆರ್ದ್, ಸಾಧನೆಗ್ ಸಂಕಲ್ಪ ಮಸ್ತ್ ಮುಖ್ಯ. ಭಾರತದ ಶಕ್ತಿ ಬುಲೆವೊಂದು ಉಂಡು, ಕೆಲವೆರೆನ ಶಕ್ತಿ ಕುಂಬುಡದಲೆಕ್ಕ ಹಾಳ್ ಆವೊಂದು ಉಂಡು. ಭಾರತ ಕುಡೊರ ಜಗದ್ಗುರು ಆವೊಡು ಪಂದ್ ಪಂಡೆರ್.

ಬೋಪಾಲ್ ದ ಮಹಾಮಂಡಲೇಶ್ವರ ಶ್ರೀ ಅಖಿಲೇಶ್ವರಾನಂದ ಗಿರಿ ಮಹಾರಾಜ್ ಪಾತೆರ್ದ್, ಭಾರತನ್ ಪುಡಾಪುನ ಶಕ್ತಿಲೆನ ವಿರುದ್ಧ ದೇಶದ ಸಮಗ್ರತೆಗಾದ್ ಏಪಲ ಸಂಘಟಿತ ಸಂಘರ್ಷ ಮಲ್ತೊಂದು ಇಪ್ಪುವ, ಲವ್ ಜಿಹಾದ್ ಗ್ ಹಿಂದೂ ಸಮಾಜ ಸರಿಯಾಯಿನ ಉತ್ತರ ಕೊರೊಡು ಪಂದ್ ಪಂಡೆರ್.

ಆರೆಸ್ಸ್ ಸ್ ದ ಪ್ರಾಂತ ಸಹ ಕಾರ್ಯವಾಹಕೆರ್ ಪಿಎಸ್ ಪ್ರಕಾಶ್ ಪಾತೆರ್ದ್, ಶೌರ್ಯ ಇಜ್ಜಂದಿನ ಸಮಾಜಗ್ ಸಾವು ಖಂಡಿತ. ಹಿಂದೂ ಸಮಾಜ ಶೌರ್ಯವಂತ ಸಮಾಜ. ಭಾರತದ ಗೆಲ್ಮೆದ ಇತಿಹಾಸನ್ ಜೋಕುಲೆಗ್ ತೆರಿಪಾವೊಡು ಪಂದ್ ಪಂಡೆರ್.

ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ನ ಉದ್ಯಮಿ ಮನೋಹರ ಶೆಟ್ಟಿ ಪಾತೆರ್ದ್, ನಮ್ಮ ದೇಶನ್ ನಮ ಕಾಪಾಡೊಡು. ನಮರ್ದ್ ಏರೆಗ್ಲಾ ತೊಂದರೆ ಕೊರಿಯೆರೆ ಬಲ್ಲಿ. ಆಂಡ ನಮಕ್ ತೊಂದರೆ ಕೊರ್ಪಿನಕ್ಲೆಗ್ ಸರಿಯಾಯಿನ ಉತ್ತರ ಕೊರೊಡು ಪಂದ್ ಪಂಡೆರ್.

ಪ್ರಾಂತ ಸಂಯೋಜಕೆರ್ ಸುನಿಲ್ ಕೆ ಆರ್ ಪಾತೆರ್ದ್, ಇಡೀ ರಾಜ್ಯನೇ ಹಿಂದುತ್ವದ ಕೋಟೆ ಆಯೆರೆ ಉಂಡು. ಬಜರಂಗದಳ ಮಾತ ಸವಾಲ್ ನ್ ಎದುರಿಸಾಯೆರೆ ತಯಾರ್ ಉಂಡು ಪಂದ್ ಪಂಡೆರ್. ‌

ಈ ಪೊರ್ತುಡು ವಿಹಿಂಪ ಪ್ರಾಂತದ ಕಾರ್ಯಾಧ್ಯಕ್ಷೆರ್ ಡಾ| ಎಂ.ಬಿ ಪುರಾಣಿಕ್, ಉದ್ಯಮಿ ಗಣೇಶ್ ಹೆಗ್ಡೆ, ಹರಿಯಪ್ಪ ಕೋಟ್ಯಾನ್, ಕಡ್ತಳ ವಿಶ್ವನಾಥ ಪೂಜಾರಿ ಪುಣೆ, ರಮೇಶ್ ಬಂಗೇರ, ರವೀಂದ್ರ ಶೆಟ್ಟಿ ಬಜಗೋಳಿ, ವಿಹಿಂಪ ಜಿಲ್ಲಾಧ್ಯಕ್ಷೆರ್ ವಿಷ್ಣುಮೂರ್ತಿ ಆಚಾರ್ಯ, ಭಜರಂಗ ದಳ ರಾಷ್ಟ್ರೀಯ ಸಹ ಸಂಚಾಲಕೆರ್ ಸೂರ್ಯನಾರಾಯಣ, ಪ್ರಮುಖೆರ್ ಮಹಾಬಲ ಹೆಗಡೆ, ಪೂರ್ಣಿಮಾ ಸುರೇಶ್ ಪಾಲ್ ಪಡೆದಿತ್ತೆರ್.

ಜಿಲ್ಲಾ ಸಂಚಾಲಕೆರ್ ಚೇತನ್ ಪರಲ್ಕೆ ಎದ್ಕೊನಿಯೆರ್. ಅಜಿತ್ ಬೊಕ್ಕ ಭಾಗ್ಯಶ್ರೀ ಐತಾಳ ಲೇಸ್ ದ ಸುಧಾರಿಕೆ ಮಲ್ತೆರ್.

ಕೇಸರಿ ಬಾವುಟಗ್ 10 ಲಕ್ಷ ರೂ. ಬಾಂಡ್!

ಜಿಲ್ಲಾ ಕಾರ್ಯದರ್ಶಿ ದಿನೇಶ್ ಮೆಂಡನ್ ಪಾತೆರ್ದ್, ಕೇಸರಿ ಬಾವುಟ ಕಟ್ಟರೆ ಪೊಲೀಸೆರ್ 10 ಲಕ್ಷ ರೂ.ದ ಬಾಂಡ್ ಬರೆಪಾದೆರ್. ದುಂಬಗ್ ಇಲ್ಲ ಇಲ್ಲಡ್ ಕೇಸರಿ ಬಾವುಟ ರಾಪಾವ, ಕೇಸರಿ ಬಾವುಟ ರಾಪಾಯೆರೆ ಬಾಂಡ್ ಬರೆದ್ ಕೊರ್ಪಿನ ಸ್ಥಿತಿ ನಿರ್ಮಾಣ ಆತ್ಂಡ್ ಪಂದ್ ಪಂಡೆರ್.

ಶೋಭಾಯಾತ್ರೆ ಜೋಡುಕಟ್ಟೆರ್ದ್ ಸುರು

ಶೌರ್ಯ ಜಾಗರಣ ರಥಯಾತ್ರೆನ್ ಜೋಡುಕಟ್ಟೆಡ್ ಉದಿಪನ ಮಲ್ತೆರ್. ಅಲ್ಪರ್ದ್ ಸುರು ಆಯಿನ ಶೋಭಾಯಾತ್ರೆ ಕೋರ್ಟ್ ಮಾರ್ಗ, ಕೆಎಂ ಮಾರ್ಗ, ಸರ್ವಿಸ್ ಬಸ್, ಸಿಟಿ ಬಸ್ ನಿಲ್ದಾಣ, ಕಲ್ಸಂಕ, ಕಡಿಯಾಳಿ ಮಾರ್ಗವಾದ್ ಎಂಜಿಎಂ ಮೈದಾನಗ್ ಬತ್ತ್ಂಡ್. ಈ ಮೈದಾನದ ಸುತ್ತ ಕೇಸರಿ ಪತಾಕಿ, ಬಾವುಟರ್ದ್ ಅಲಂಕಾರ ಮಲ್ತ್ ದ್ ಇತ್ತೆರ್. ಪ್ರವೇಶ ದ್ವಾರಡ್ ಭಗತ್ ಸಿಂಗ್, ಸ್ವಾಮಿ ವಿವೇಕಾನಂದ, ವೀರ ಸಾರ್ವಕರ್, ಚಂದ್ರಶೇಖರ್ ಆಜಾದ್, ಛತ್ರಪತಿ ಶಿವಾಜಿ ಮಹಾರಾಜ್ ಸೇರಿನಂಚೆನೆ ಸುಮಾರ್ ಜನತ್ತ ಪೋಟೋನ್ ಪಾಡ್ದಿತ್ತೆರ್. ಅಂಚೆನೆ ಕಲಾವಿದೆ ಜಗದೀಶ್ ಪುತ್ತೂರ್ ಬೊಕ್ಕ ಕೂಟದಕ್ಲೆರ್ದ್ ದೇಶಭಕ್ತಿಗೀತೆ ಗಾಯನ ನಡತ್ಂಡ್.