ತುಳು ಸುದ್ದಿ

ರಾಜ್ಯಡ್ ಭಾರೀ ಬರ್ಸ

ರಾಜ್ಯದ ಸುಮಾರ್ ಜಿಲ್ಲೆಡ್ ಸೋಮಾರ‌ ಭಾರೀ ಬರ್ಸ ಬೈದ್ಂಡ್. ಇನಿಲ ಕೆಲವು ಕಡೆಟ್ಟ್ ತೆಡಿಲ್ ಮೆಂಚ್ ದ ಬರ್ಸ ಬರೊಂದು ಉಂಡು.

ಅಂಚಾದ್ ದಕ್ಷಿಣ ಕನ್ನಡ, ಒಡಿಪು, ಉ.ಕನ್ನಡ, ಕೊಡಗು, ಚಿಕ್ಕಮಗಳೂರು, ಹಾಸನ ಸೇರಿನಂಚೆನೆ ಸುಮಾರ್ ಜಿಲ್ಲೆಡ್ ಇನಿ ಯೆಲ್ಲೋ ಅಲರ್ಟ್ ಘೋಷಣೆ ಮಲ್ದೆರ್. ಅತ್ತಂದೆ ಅ.21 ಮುಟ್ಟ ಭಾರೀ ಬರ್ಸ ಬರ್ಪುಂಡು ಪಂದ್ ಹವಾಮಾನ ಇಲಾಖೆ ಎಚ್ಚರಿಕೆ ಕೊರ್ತುಂಡು.

ಮಲೆನಾಡು ಜನಹಿತ ರಕ್ಷಣಾ ವೇದಿಕೆದ ಮುತಾಲಿಕೆಡ್ ರೈತ ರಕ್ಷಣಾ ಚಳವಳಿ ಸುರು: ಕಿಶೋರ್ ಶಿರಾಡಿ

ಮಲೆನಾಡು ಜನಹಿತ ರಕ್ಷಣಾ ವೇದಿಕೆದ ಮುತಾಲಿಕೆಡ್ ನ.8ಕ್ಕ್ ಸುಬ್ರಹ್ಮಣ್ಯರ್ದ್ ರೈತ ರಕ್ಷಣಾ ಚಳವಳಿ ಸುರು ಮಲ್ಪುವ ಪಂದ್ ವೇದಿಕೆದ ಸಂಚಾಲಕೆರ್ ಕಿಶೋರ್ ಶಿರಾಡಿ ಸುಬ್ರಹ್ಮಣ್ಯಡ್ ನಡತಿನ ಪತ್ರಿಕಾಗೋಷ್ಠಿಡ್ ಪಂಡೆರ್.

ರೈತೆರೆಗ್ ನೆಮ್ಮದಿ ಇಜ್ಜಿ, ಒಂಜಿ ಕಡೆ ಕಾಡ್ ಪ್ರಾಣಿಲೆನ ತೊಂದರೆ, ನನೊಂಜಿ ಕಡೆ ಅರಣ್ಯ ಇಲಾಖೆದ ಅಧಿಕಾರಿನ ದಬ್ಬಾಳಿಕೆ ನಡತೊಂದು ಉಂಡು. ಲಂಚ ಕೊರಿನಕ್ಲೆಗ್ ಕಂದಾಯ ಇಲಾಖೆ ಜಾಗದ ರೆಕಾರ್ಡ್ ಮಲ್ತ್ ದ್ ಕೊರ್ಪುಂಡು ಪಂದ್ ಮೇರ್ ಆರೋಪ ಮಲ್ದೆರ್.

ಪತ್ರಿಕಾಗೋಷ್ಠಿಡ್ ಜಯಪ್ರಕಾಶ್ ಕೂಜುಗೋಡು, ಹರೀಶ್ ಬಳ್ಪ, ವೀರೇಶ್ ಪಂಜೋಡಿ ಇತ್ತೆರ್.

ವರದಿ: ಗೋಪಿಚಂದನ್ ಕೆಎಸ್

ಪುನರೂರು ಪ್ರತಿಷ್ಠಾನದ ಮುತಾಲಿಕೆಡ್ ವಿಶ್ವ ಆಹಾರ ದಿನಾಚರಣೆ ಆಹಾರ ಜಾಗೃತಿ ಅಭಿಯಾನ-2023

ಮುಲ್ಕಿ: ಪುನರೂರು ಪ್ರತಿಷ್ಠಾನದ ಮುತಾಲಿಕೆಡ್ ಜನವಿಕಾಸ ಸಮಿತಿ ಸಹಕಾರಡ್, ವಿಶ್ವ ಆಹಾರ ದಿನಾಚರಣೆ ಆಹಾರ ಜಾಗೃತಿ ಅಭಿಯಾನ 2023 ಕಿನ್ನಿಗೋಳಿ ಕೈತಲ್ ದ ಬಳ್ಕುಂಜೆ ತೋಟ ಹೌಸ್ ಡ್ ನಡತ್ಂಡ್.

ಲೇಸ್ ದ ಗುರ್ಕಾರ್ಮೆನ್ ಪ್ರತಿಷ್ಠಾನದ ಮಾನಾದಿಗೆದ ಗುರ್ಕಾರೆ, ಧರ್ಮದರ್ಶಿಲು ಡಾ. ಹರಿಕೃಷ್ಣ ಪುನರೂರು ಒಯಿಸೊಂದು ಪಾತೆರ್ದ್, ವಿಶ್ವ ಆಹಾರದ ದಿನಾಚರಣೆದ ಲೆಕ್ಕೊಡು ಆಹಾರ ಪೂರೈಸಾವುನ ರೈತನ ಪ್ರಾಮುಖ್ಯತೆನ್ ತೆರಿಪಾವೊನೆತ್ತೊಟ್ಟಿಗೆ ದೇಶದ ಬೆನ್ನೆಲು ಆಯಿನ ಸಾಧಕ ಪ್ರಗತಿಪರ ರೈತೆರೆನ್ ಗುರುತಿಸಾದ್, ಮಾನಾದಿಗೆ ಮಲ್ಪುನೇ ಕರ್ತವ್ಯ ಆತ್ಂಡ್. ಅತ್ತಂದೆ ತೆನಸ್ ದ ಅಪವ್ಯಯನ್ ಉಂತಾಯೆರೆ ಆಹಾರ ಜಾಗೃತಿ ಲೇಸ್ ಎಪಲ ನಡಪರೆ ಉಂಡು ಪಂದ್ ಪಂಡೆರ್.

ಈ ಪೊರ್ತುಡು ಪುತ್ತೂರು ದೇಂದಡ್ಕ ಶ್ರೀ ಮಹಾಲಿಂಗೇಶ್ವರ ಮಹಾ ಗಣಪತಿ ದೇವಲ್ಯದ ಅರ್ಚಕೆರ್ ಸುಬ್ರಹ್ಮಣ್ಯ ಭಟ್, ಬಳ್ಕುಂಜೆ ಭಜನಾ ಮಂದಿರದ ಗುರ್ಕಾರೆ ಪ್ರಸಾದ್ ಶೆಟ್ಟಿ, ಉದ್ಯಮಿ ಸತೀಶ ರಾಮ ಪೂಜಾರಿ, ಪ್ರತಿಷ್ಠಾನದ ಗುರ್ಕಾರೆ ದೇವ ಪ್ರಸಾದ್, ಪ್ರಧಾನ ಕಾರ್ಯದರ್ಶಿ ಶ್ರೇಯ, ಜನವಿಕಾಸ ಸಮಿತಿದ ಗುರ್ಕಾರೆ ಶೋಭಾರಾವ್, ಜಿತೇಂದ್ರ ವಿ ರಾವ್, ಪ್ರಾಣೇಶ್ ಭಟ್, ಶಶಿಕರ, ದಾಮೋದರ್ ಶೆಟ್ಟಿ ಕೊಡೆತ್ತೂರು ಪಾಲ್ ಪಡೆದಿತ್ತೆರ್.

ಈ ಲೇಸ್ ಡ್ ಕೃಷಿ ಕ್ಷೇತ್ರದ ಸಾಧಕೆರ್ ಎಲಿಯಾಸ್ ಡಿಸೋಜಾ ಬಳ್ಕುಂಜೆ ಮೆರೆಗ್ ಕೃಷಿ ರತ್ನ 2023 ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್.

ಇಸ್ರೇಲ್ ಡ್ ಸೈತಿನಕ್ಲೆನ ಸಂಖ್ಯೆ 4 ಸಾರ

ಇಸ್ರೇಲ್ ಬೊಕ್ಕ ಹಮಾಸ್ ನಡುಟ್ಟ್ ಕರಿನ ಪತ್ತ್ ದಿನರ್ದಿಂಚ ನಡಪುನ ಯುದ್ದರ್ದ್ ಸುಮಾರ್ 4 ಸಾರ ಜನ ತೀರ್ ಪೋತೆರ್‌ ಪಂದ್ ವರದಿ ಆತ್ಂಡ್. ‌

ಇಸ್ರೇಲ್ ಅಧಿಕಾರಿಲು ಹಮಾಸ್ ದಾಳಿರ್ದ್ 1400 ಜನ ತೀರ್ ಪೋತೆರ್ ಪಂದ್ ಘೋಷಣೆ ಮಲ್ದೆರ್. 2620 ಪ್ಯಾಲೇಸ್ಟೈನಿಯನ್ ಲು ಸೈದೆರ್, 9600 ಜನಕ್ಕ್ ಪೆಟ್ಟಾತ್ಂಡ್ ಪಂದ್ ಗಾಜಾ ಆರೋಗ್ಯ ಸಚಿವಾಲಯ ತೆರಿಪಾದ್ಂಡ್.

ಉತ್ತರಾಖಂಡಡ್ 4.0 ಬಿರ್ಸ್ ದ ಭೂಕಂಪ

ಉತ್ತರಾಖಂಡದ ಪಿಥೋರಗಢಡ್ 4.0 ಬಿರ್ಸ್ ದ ಭೂಕಂಪ ಆತ್ಂಡ್ ಪಂದ್ ರಾಷ್ಟ್ರೀಯ ಭೂಕಂಪನಶಾಸ್ತ್ರ ಕೇಂದ್ರ ತೆರಿಪಾದ್ಂಡ್.

ಭೂಕಂಪದ ಅನುಭವ ಆಯಿನ ಕೂಡ್ಲೆ ಜನ ಇಲ್ಲರ್ದ್ ಪಿದಯಿ ಬತ್ತ್ ದ್ ಸುರಕ್ಷಿತ ಜಾಗೆಗ್ ಬಲಿತೆರ್ ಪಂದ್ ವರದಿ ಆತ್ಂಡ್. ‌ಈ ಘಟನೆಗ್ ಸಂಬಂಧಪಟ್ಟಿನಂಚೆನೆ ಆಸ್ತಿ-ಪಾಸ್ತಿಗ್ ತೊಂದರೆ ಆಯಿನ ಬಗೆಟ್ಟ್ ಪೊಲಬು ತೆರಿದ್ ಬೈದಿಜಿ.