ತುಳು ಸುದ್ದಿ

ದೇವೆರೆ ಪಾದೊ ಸೇರಿಯೆರ್ ಬಪ್ಪನಾಡು ದೇವಲ್ಯದ ಬ್ರಹ್ಮ ಕಲಶ ಉಚ್ಚಯ ಬೊಕ್ಕ ಜೀರ್ಣೋದ್ದಾರ ಸಮಿತಿದ ಗುರ್ಕಾರೆ ನಾರಾಯಣ ಶೆಟ್ಟಿ

ಮುಲ್ಕಿ: ಪುಗರ್ತೆದ ಮುಲ್ಕಿ ಸೀಮೆದ ಒರ್ಂಬ ಮಾಗಣೆದ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಬ್ರಹ್ಮಕಲಶ ಉಚ್ಚಯ ಬೊಕ್ಕ ಜೀರ್ಣೋದ್ದಾರ ಸಮಿತಿದ ಗುರ್ಕಾರೆ ಬಿ.ಎಂ ನಾರಾಯಣ ಶೆಟ್ಟಿ (86) ಹುಷಾರ್ ದಾಂತೆ ಬೆಂಗ್ಲೂರುಡು ಇಪ್ಪುನ ಬಸವೇಶ್ವರ ನಗರದ ತನ್ನ ಇಲ್ಲಲ್ ತೀರ್ ಪೋಯೆರ್.

ಮೇರ್ ಬಪ್ಪನಾಡು ದೇವಲ್ಯದ ಬ್ರಹ್ಮಕಲಶ ಉಚ್ಚಯ ಬೊಕ್ಕ ಜೀರ್ಣೋದ್ಧಾರ ಸಮಿತಿದ ಗುರ್ಕಾರೆಯಾದ್, ದುಂಬುದ ಸಮಿತಿದ ಕಾರ್ಯಾಧ್ಯಕ್ಷೆರಾದ್, ಕೊಡುಗೈ ದಾನಿಯಾದ್ ದೇವಲ್ಯದ ಮಾತ ಅಭಿವೃದ್ಧಿಗ್ ಬೆಂದ್ ದೆರ್.

ಮೆರೆಗ್ ಬೊಡೆದಿ ಬೊಕ್ಕ 2 ಪೊಣ್ಣು ಜೋಕುಲು ಉಲ್ಲೆರ್. ಮೆರೆನ ನಿಧನೊಗು ಬಪ್ಪನಾಡು ಸೀಮೆದ ಅರಸೆರಾಯಿನ ದುಗ್ಗಣ್ಣ ಸಾವಂತೆರ್, ಶಾಸಕೆರ್ ಉಮಾನಾಥ ಕೋಟ್ಯಾನ್, ಮಾಜಿ ಸಚಿವೆರ್ ಅಭಯ ಚಂದ್ರ, ಯುವ ಕಾಂಗ್ರೆಸ್ ನಾಯಕೆ ಮಿಥುನ್ ರೈ, ಧರ್ಮದರ್ಶಿಲು ಡಾ.ಹರಿಕೃಷ್ಣ ಪುನರೂರು, ಪುನರೂರು ಪ್ರತಿಷ್ಠಾನದ ಗುರ್ಕಾರೆ ದೇವಪ್ರಸಾದ್ ಪುನರೂರು, ಮುಲ್ಕಿ ಬಂಟರ ಸಂಘದ ಮಾನಾದಿಗೆದ ಗುರ್ಕಾರೆ ಸಂತೋಷ್ ಕುಮಾರ್ ಹೆಗ್ಡೆ, ಗುರ್ಕಾರೆ ಅಶೋಕ್ ಕುಮಾರ್ ಶೆಟ್ಟಿ, ಮುಲ್ಕಿ ಜಿಎಸ್‌ಬಿ ಸಭಾದ ಅತುಲ್ ಕುಡ್ವ, ಮುಲ್ಕಿ ಬಿಲ್ಲವ ಸಮಾಜ ಸೇವಾ ಸಂಘದ ಗುರ್ಕಾರೆ ಪ್ರಕಾಶ್ ಸುವರ್ಣ, ಅತಿಕಾರಿಬೆಟ್ಟು ಗ್ರಾಪಂ ಒತ್ತು ಗುರ್ಕಾರೆ ಮನೋಹರ ಕೋಟ್ಯಾನ್, ಸದಸ್ಯೆರ್ ದಯಾನಂದ ಮಟ್ಟು, ಮುಲ್ಕಿ ನ.ಪಂ ಮಾಜಿ ಗುರ್ಕಾರೆ ಸುಭಾಶ್ ಶೆಟ್ಟಿ, ಸದಸ್ಯೆರ್ ಹರ್ಷ ರಾಜ ಶೆಟ್ಟಿ, ಸತೀಶ್ ಅಂಚನ್, ಪುತ್ತು ಬಾವ, ಮುಲ್ಕಿ ನ.ಪಂ.ಮುಖ್ಯಾಧಿಕಾರಿ ಇಂದು ಎಂ, ಮಾಜಿ ಗುರ್ಕಾರೆ ಸುನಿಲ್ ಆಳ್ವ, ಮಾಜಿ ಸದಸ್ಯೆರ್ ಉಮೇಶ್ ಮಾನಂಪಾಡಿ, ಕೆಪಿಸಿಸಿ ಕೋ ಆರ್ಡಿನೇಟರ್ ವಸಂತ್ ಬೆರ್ನಾಡ್, ಮುಲ್ಕಿ ಲಯನ್ಸ್ ಕ್ಲಬ್ ಗುರ್ಕಾರೆ ಶೀತಲ್ ಸುಶೀಲ್, ಡಾ. ಹರಿಶ್ಚಂದ್ರ ಪಿ.ಸಾಲ್ಯಾನ್, ಶಶಿಂದ್ರ ಸಾಲ್ಯಾನ್, ಅರಸು ಕಂಬುಲ ಸಮಿತಿದ ಗುರ್ಕಾರೆ ಕಿರಣ್ ಶೆಟ್ಟಿ ಕೊಲ್ನಾಡು ಗುತ್ತು, ಉದಯಕುಮಾರ್ ಶೆಟ್ಟಿ ಉದ್ಯಮಿ ಶಿವರಾಮ್ ಜಿ ಅಮೀನ್, ಕಿಶೋರ್ ಶೆಟ್ಟಿ ಬಪ್ಪನಾಡು, ಗೌತಮ್ ಜೈನ್ ಮುಲ್ಕಿ ಅರಮನೆ, ಶಂಕರ್ ಪಡಂಗ, ಮುಲ್ಕಿ ಪ್ರೆಸ್ ಕ್ಲಬ್ ಗುರ್ಕಾರೆ ನಿಶಾಂತ್ ಶೆಟ್ಟಿ ಸಂತಾಪ ತೆರಿಪಾದೆರ್.

ಗಾಡಿಗ್ HSRP ಪ್ಲೇಟ್ ಪಾಡುನು ಎಂಚ?

ಗಾಡಿಲೆಗ್ HSRP ಪ್ಲೇಟ್ ಪಾಡಿಯೆರೆ ಆನ್ ಲೈನ್ ಡೇ ಅವಕಾಶ ಉಂಡು.

http//transport.karnataka.gov.in ಅತ್ತ್ಂಡ www.siam.in ಗ್ ಕ್ಲಿಕ್ ಕೊರ್ದು ಬುಕ್ HSRP ಮಿತ್ತ್ ಕ್ಲಿಕ್ ಮಲ್ಪೊಡು. ‌ನಿಕ್ಲೆನ ಗಾಡಿ ತಯಾರ್ ಮಲ್ಪುನಕ್ಲೆನ್ ಆಯ್ಕೆ ಮಲ್ತ್ ದ್ ಗಾಡಿದ ಮೂಲ ಪೊಲಬುನ್ ಭರ್ತಿ ಮಲ್ಪೊಡು. ಬೊಕ್ಕ ಫೀಸ್ ಲ ಆನ್ ಲೈನ್ ಮುಖೇನನೇ ಪಾವತಿ ಮಲ್ಪೊಲಿ. ಗಾಡಿ ಮಾಲೀಕೆರೆನ ಮೊಬೈಲ್ ಸಂಖ್ಯೆಗ್ ಒಟಿಪಿ ಬರ್ಪುಂಡು. ನಂಬರ್ ಪ್ಲೇಟ್ ಪಾಡಿಯೆರೆ ಜಾಗೆ ಆಯ್ಕೆ ಮಲ್ತ್ಂಡ ಅಕ್ಲೆ ಬತ್ತ್ ದ್ ಫಿಟ್ ಮಲ್ಪುವೆರ್.

ಚೀನಾಡ್ ತೂ ಪೊತ್ತ್ ದ್ 26 ಜನ ತೀರ್ ಪೋಯೆರ್

ಉತ್ತರ ಚೀನಾದ ಶಾಂಕ್ಸಿ ಪ್ರಾಂತ್ಯಡ್ ತೂ ಪೊತ್ತ್ ದ್ 26 ಜನ ತೀರ್ ಪೋಯಿನ ಘಟನೆ ನಡತ್ ದ್ಂಡ್.

ನೆಟ್ಟ್ 38 ಜನಕ್ಕ್ ಪೆಟ್ಟಾತ್ಂಡ್. ಅಧಿಕಾರಿಲು ಜಾಗೆಗ್ ಬತ್ತ್ ದ್ ರಕ್ಷಣಾ ಕಾರ್ಯಾಚರಣೆ ಮಲ್ತೊಂದು ಉಲ್ಲೆರ್. ಈ ಘಟನೆಗ್ ಕಾರಣ ದಾದ ಪಂದ್ ನನ ತೆರಿದ್ ಬರೊಡಾತೆ.

ದುಬೈ ಗಡಿನಾಡ ಉಚ್ಚಯದ ಅಟ್ಟಣೆ ಸಭೆ

ದುಬೈ: ಗಡಿನಾಡ ಸಾಹಿತ್ಯ ಸಾಂಸ್ಕೃತಿಕ ಅಕಾಡೆಮಿ (ರಿ.) ಯು.ಎ.ಇ. ಘಟಕ ದುಬೈದ ಮುತಾಲಿಕೆಡ್ ಡಿ.10 ಕ್ಕ್ ದುಬೈಡ್ ನಡಪರೆ ಇಪ್ಪುನ ದುಬೈ ಗಡಿನಾಡ ಉಚ್ಚಯ-2023 ದ ಯಶಸ್ವಿಗ್ ಚರ್ಚೆ ಮಲ್ಪರೆ ನ.15 ಕ್ಕ್ ಸಭೆ ನಡತ್ಂಡ್.

ಗಡಿನಾಡ ಸಾಹಿತ್ಯ ಸಾಂಸ್ಕೃತಿಕ ಅಕಾಡೆಮಿ (ರಿ.) ದುಬೈ ಘಟಕದ ಗುರ್ಕಾರೆ ನ್ಯಾ.ಇಬ್ರಾಹಿಂ ಕಲೀಲ್ ಮೆರೆನ ಸಭಾ ಅಧ್ಯಕ್ಷತೆಡ್ ದುಬೈದ ಬಿಸಿನೆಸ್ ಬೇದ ಬೆ.ಬೈಟ್ಸ್ ರೆಸ್ಟೋರೆಂಟ್ ಡ್ ನಡತ್ಂಡ್.

ಸಭೆಟ್ಟ್ ಗಡಿನಾಡ ಉಚ್ಚಯದ ಯಶಸ್ವಿದ ಬಗೆಟ್ಟ್ ಚರ್ಚೆ ಮಲ್ತೆರ್. ಗಡಿನಾಡ್ ದ ಕಾಸ್ರೋಡು ಜಿಲ್ಲೆರ್ದ್ ಬತ್ತಿನ ಗ.ಸಾ.ಸಾ. ಕಾಸ್ರೋಡುದ ಕೋಶಾಧಿಕಾರಿ ಝಡ್ ಎ.ಕಯ್ಯಾರ ಪಾತೆರ್ದ್, ನನ ನಮ್ಮ ಗಡಿನಾಡ ಉಚ್ಚಯ ಲೇಸ್ ಗ್ ಕೇವಲ ಒಂತೆ ದಿನ ಇಪ್ಪುರ್ನೆದಾವೆರ ಲೇಸ್ ದ ತಯಾರಿ ಆಯಿನಾತ್ ಬೇಗ ಆವೊಡು. ಮಾತೆರೆರ್ನಾಲ ಒಟ್ಟು ಸೇರ್ಸಾದ್ ಒಂಜಿ ಎಡ್ಡೆ ಲೇಸ್ ಮಲ್ಪುನ ಬೊಕ್ಕ ಲೇಸ್ ದ ಯಶಸ್ವಿಗ್ ಯು.ಎ.ಇ.ಡ್ ಇಪ್ಪುನ‌ ಮಾತ ಗಡಿನಾಡ ಕನ್ನಡಿಗೆರ್ ಸಹಕಾರ ಕೊರೊಡು ಪಂದ್ ಬಿನ್ನಾಪು ಮಲ್ತೆರ್.

ಯು ಎ ಇ ಸಂದರ್ಶನಡ್ ಇಪ್ಪುನ ಗಡಿನಾಡ ಸಾಹಿತ್ಯ ಸಾಂಸ್ಕೃತಿಕ ಅಕಾಡೆಮಿ ಮಸ್ಕತ್ ಘಟಕದ ಗುರ್ಕಾರೆ ಅಬೂಬಕರ್ ರೋಯಲ್ ಬೋಲ್ಲಾರ್ ನ್ ದುಬೈ ಘಟಕದ ಮುತಾಲಿಕೆಡ್ ಮೋಕೆಡ್ ಎದ್ಕೊನಿಯೆರ್.

ರೋಯಲ್ ಅಬೂಬಕರ್ ಪಾತೆರ್ದ್, ಡಿ.10 ಕ್ಕ್ ನಡಪರೆ ಇಪ್ಪುನ ದುಬೈದ ಲೇಸ್ ಗ್ ಮಸ್ಕತ್ ಘಟಕದ ಪದುಕೆರ್ ಬೊಕ್ಕ ಸದಸ್ಯೆರ್ ಬತ್ತ್ ದ್ ಲೇಸ್ ದ ಯಶಸ್ವಿಗ್ ಸಹಕಾರ ಮಲ್ಪುನ ಭರವಸೆನ್ ಕೊರ್ಪೆ. ನಮ್ಮ ಮಸ್ಕತ್ ಘಟಕದ ಲೇಸ್ ಜನವರಿ 5 ಕ್ಕ್ ಮಸ್ಕತ್ ಡ್ ಗೌಜಿಡ್ ನಡಪರೆ ಉಂಡು. ದುಬೈ ಘಟಕದ ಮಾತೆರ್ಲಾ ಲೇಸ್ ಗ್ ಬರೊಡು ಪಂದ್ ಲೆಪ್ಪೋಲೆನ್ ಕೊರಿಯೆರ್.

ಮಲ್ಲ ಬಿನ್ನೆರಾದ್ ಯುಸುಫ್ ಬೋಲ್ಲಾರ್, ಅಬ್ದುಲ್ ರಹಮಾನ್‌ ಕಣ್ಣೂರು ಲೇಸ್ ಗ್ ಎಡ್ಡೆಪ್ಪು ಬಯಕಿಯೆರ್.

ಸಭೆಟ್ಟ್ ಗ.ಸಾ.ಸ ಅಕಾಡೆಮಿ ದುಬೈ ಘಟಕದ ಪದುಕೆರ್ ಸದನ್ ದಾಸ್ ಶಿರೂರು, ಸುಗಂದರಾಜ್ ಬೇಕಲ್, ಪ್ರಧಾನ ಕಾರ್ಯದರ್ಶಿ ಅಮರ್ ದೀಪ್ ಕಲ್ಲೂರಾಯ, ಡಾ.ಅಬ್ದುಲ್ ರಹಮಾನ್‌ ಬಾವ, ಯುಸೂಫ್ ಶೇಣಿ, ಆಶೀಫ್ ಹೊಸಂಗಡಿ, ಕೋಶಾಧಿಕಾರಿ ಇಬ್ರಾಹಿಂ ಬಾಜೂರಿ, ಇಬ್ರಾಹಿಂ ಬೇರಿಕೆ, ಝುಬೈರ್ ಕುಬಣೂರು, ವಿಜಯಕುಮಾರ್ ಶೆಟ್ಟಿ ಗಾಣದಮೂಲೆ ಮಜಿಬೈಲ್, ಮಂಜುನಾಥ ಕಾಸ್ರೋಡು, ಅಶ್ರಫ್ ಪಾವೂರು, ಅಮನ್ ತಳೆಕಲ, ಮನ್ಸೂರು, ಅಶ್ರಫ್ ಪಿ.ಪಿ.ಬಾಯಾರ್, ಸಾಕೀರ್ ಬಾಯರ್, ಆಶೀಖ್ ಮೀಯಾ, ಮಹಮ್ಮದ್ ಕುಞ್ಞಿ ಮಂಜೇಶ್ವರ, ಅರೋನ್ ಪೈವಳಿಕೆ, ಶೀಯಾಬ್ ಜೋಡುಕಲ್ಲು, ಮನ್ಸೂರ್ ಪೆರ್ಲ, ಶಂಶೀರ್ ಮೀಯ ಪಾಲ್ ಪಡೆದಿತ್ತೆರ್. ಅಮರ್ ದೀಪ್ ಕಲ್ಲೂರಾಯ ಎದ್ಕೊನಿಯೆರ್. ಮಂಜುನಾಥ ಕಾಸ್ರೋಡು ಸೊಲ್ಮೆ ಸಂದಾಯೆರ್.

ರೇಡಿಯೊ ಮಣಿಪಾಲಡ್ ಕೃಷಿವಾಣಿ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಕೃಷಿವಾಣಿ ಸರಣಿ ಲೇಸ್ ದ ಸಂಚಿಕೆ ನ.16 ಕ್ಕ್ ಗುರುವಾರ ಬಯ್ಯಗ್ 6.15 ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಕೃಷಿಕೆರ್ ಶ್ಯಾಮ ಕಾವ್ರಾಡಿ ತಮ್ಮ ಕೃಷಿ ಕಾಯಕದ ಬಗೆಟ್ಟ್ ಪಾತೆರಿಯೆರೆ ಉಲ್ಲೆರ್. ನ.17 ಕ್ಕ್ ಮಧ್ಯಾಹ್ನ 2.15 ಕ್ಕ್ ಕುಡೊರ ಪ್ರಸಾರ ಆಪುಂಡು. ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.