ತುಳು ಸುದ್ದಿ

ಕೈಕಂಬದ ರೋಸಾ ಮಿಸ್ತಿಕಾ ಪ್ರೌಢ ಶಾಲೆಡ್ ಬೆಥನಿ ಸಂಸ್ಥಾಪನಾ ದಿನ

ಗುರುಪುರ, ಜುಲೈ 16: ಗುರುಪುರ ಕಿನ್ನಿಕಂಬಳದ (ಕೈಕಂಬ) ಬೆಥನಿ ಸಂಸ್ಥೆದ ರೋಸಾ ಮಿಸ್ತಿಕಾ ಪ್ರೌಢ ಶಾಲೆಡ್ ಗುರುವಾರ ಬೆಥನಿ ಸಂಸ್ಥಾಪನಾ ದಿನಾಚರಣೆ ಬೊಕ್ಕ ಬೆಥನಿ ಸಂಸ್ಥೆದ ಶತಮಾನ ಆರಂಭೋತ್ಸವ ಸಭೆ ನಡತುಂಡು .ಶಾಲಾ ಸಂಚಾಲಕಿ ಸಿಸ್ಟರ್ ಮಾರಿ ಬೆಲ್ ಸಭೆತ ಗುರ್ಕಾರ್ಮೆ ವಹಿಸಿಯೆರ್.

ರೋಸಾಮಿಸ್ತಿಕಾ ಪ್ರೌಢಶಾಲೆದ ಮುಖ್ಯ ಶಿಕ್ಷಕಿ ಸಿಸ್ಟರ್ ಲೊಲಿಟಾ ಪಿರೇರಾ ಪಾತೆರ್ದ್ ಫಾ. ರೇಮಂಡ್ ಮಸ್ಕರೇನಸ್ ಮೆರೆರ್ದ್ ಸ್ಥಾಪನೆ ಆಯಿನ ಬೆಥನಿ ಸಂಸ್ಥೆ ಬೊಕ್ಕ ಬೆಥನಿ ವಿದ್ಯಾ ಸಂಸ್ಥೆಗ್ ಜು. 16ಕ್ಕ್ ನೂದು ವರ್ಷ ಆಪುಂಡು ಪಂದ್ ಪಂಡೆರ್.

ವಿಶ್ವ ಜನಸಂಖ್ಯಾ ದಿನಾಚರಣೆ ಬೊಕ್ಕ ಮಲೇರಿಯಾ/ ಡೆಂಗ್ಯೂ ವಿರೋಧಿ ಮಾಸಾಚರಣೆ 2021 – ಶಾಸಕ ರಘುಪತಿ ಭಟ್ ಉದಿಪನ

ಒಡಿಪು, ಜುಲೈ 16: ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್ ಒಡಿಪು ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಇಲಾಖೆ ಒಡಿಪು ತಾಲೂಕು ಆರೋಗ್ಯಾಧಿಕಾರಿಲೆನ ಕಛೇರಿ, ಒಡಿಪು ಕರ್ನಾಟಕ ರಾಜ್ಯ ಸರಕಾರಿ ನೌಕರರ ಸಂಘ, ಜಿಲ್ಲಾ ಶಾಖೆ ಒಡಿಪು ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ, ಅಂಬಲಪಾಡಿ ಒಡಿಪು ಮೆಕ್ಲೆನ ಒಟ್ಟು ಸೇರಿಗೆಡ್ ಇನಿ ತಾರೀಖ್ 16-07-2021 ದಾನಿ ನಡತಿನ ವಿಶ್ವ ಜನಸಂಖ್ಯಾ ದಿನಾಚರಣೆ ಬೊಕ್ಕ ಮಲೇರಿಯಾ/ ಡೆಂಗ್ಯೂ ವಿರೋಧಿ ಮಾಸಾಚರಣೆ 2021 ಲೇಸ್ ಡ್ ಶಾಸಕ ಶ್ರೀ ಕೆ. ರಘುಪತಿ ಭಟ್ ಮೇರ್ ಪಾಲ್ ಪಡೆದ್ ಲೇಸ್ ಉದಿಪನ ಮಲ್ತೆರ್ ಅಂಚನೇ ಕರಪತ್ರ ಬುಡುಗಡೆ ಮಲ್ತೆರ್ .

ಈ ಪೊರ್ತುಡು ಒಡಿಪು ನಗರ ಸಭೆಯ ಗುರ್ಕಾಲಾಯಿನ ಸುಮಿತ್ರಾ ಆರ್ ನಾಯಕ್, ಸ್ಥಳೀಯ ನಗರಸಭಾ ಸದಸ್ಯೆರಾಯಿನ ಹರೀಶ್ ಶೆಟ್ಟಿ, ಜಿಲ್ಲಾ ಆರೋಗ್ಯಾಧಿಕಾರಿಲಾಯಿನ ನಾಗಭೂಷಣ್ ಉಡುಪ, ಜಿಲ್ಲಾ ವಾರ್ತಾಧಿಕಾರಿಲಾಯಿನ ಮಂಜುನಾಥ್, ಶ್ರೀ ಕ್ಷೇತ್ರ ಧರ್ಮಸ್ಥಳ ಯೋಜನೆ, ಕರಾವಳಿ ಪ್ರಾದೇಶಿಕ ಕಚೇರಿ ಉಡುಪಿದ ಪ್ರಾದೇಶಿಕ ನಿರ್ದೇಶಕೆರಾಯಿನ ವಸಂತ್ ಸಾಲ್ಯಾನ್, ಕರ್ನಾಟಕ ರಾಜ್ಯ ಸರಕಾರಿ ನೌಕರರ ಸಂಘ ಜಿಲ್ಲಾ ಶಾಖೆದ ಗುರ್ಕಾರ್ಲಾಯಿನ ಸುಬ್ರಹ್ಮಣ್ಯ ಶೇರಿಗಾರ್, ಉಡುಪಿ ತಾಲೂಕು ವೈದ್ಯಾಧಿಕಾರಿಲಾಯಿನ ವಾಸುದೇವ್ ಅಡಿಗ ಪಾಲ್ ಪಡೆದಿತ್ತೆರ್.

ಬಂಟ್ವಾಳ ಶ್ರೀ ಆದಿಶಕ್ತಿ ಚಾಮುಂಡೇಶ್ವರೀ ಕ್ಷೇತ್ರಗ್ ಶಿಲಾನ್ಯಾಸ ಲೇಸ್

ಬಂಟ್ವಾಳ, ಜುಲೈ 16: ಬಂಟ್ವಾಳದ ಕಸ್ಟ ಗ್ರಾಮದ ಅಗ್ರಾರ್ ಕೈತಲ್ ದ ದರ್ಬೆ ಶ್ರೀ ಆದಿಶಕ್ತಿ ಚಾಮುಂಡೇಶ್ವರೀ ಕ್ಷೇತ್ರ ಬೊಕ್ಕ ಗೋಶಾಲೆ ಟ್ರಸ್ಟ್ ವತಿರ್ದ್ ಭಕ್ತೆರ್ನ ಸಾಕರಡ್ ಪೊಸತಾದ್ ನಿರ್ಮಾಣ ಆಯೆರೆ ಉಪ್ಪುನ ಶ್ರೀ ಆದಿಶಕ್ತಿ ಚಾಮುಂಡೇಶ್ವರೀ ಕ್ಷೇತ್ರಗ್ ಗುರುವಾರ ಶಿಲಾನ್ಯಾಸ ನಡತುಂಡು .

ಕ್ಷೇತ್ರದ ಆರಾಧ್ಯ ಶಕ್ತಿ ಶ್ರೀ ಆದಿಶಕ್ತಿ ಚಾಮುಂಡೇಶ್ವರೀ ಬೊಕ್ಕ ಪರಿವಾರ ದೇವೆರೆಗ್ ಪೂಜೆ ಮಲ್ತಿ ಬೊಕ್ಕ ವೇದಮೂರ್ತಿ ನಾಳ ಶ್ರೀ ದುರ್ಗಾಪರಮೇಶ್ವರೀ ದೇವಸ್ಥಾನದ ಪ್ರಧಾನ ಅರ್ಚಕೇರಾಯಿನ ರಾಘವೇಂದ್ರ ಅಸ್ರಣ್ಣ ಮೆರ್ನ ಪೌರೋಹಿತ್ಯಡ್ ಶಾಸ್ಪೋಕ್ತವಾದ್ ದೇವಸ್ಥಾನ ನಿರ್ಮಾಣಗ್ ಶಿಲಾನ್ಯಾಸ ನಡಪಾಯೆರ್ .

ಈ ಪೊರ್ತುಡು ಶಿಲ್ಪಿ ಹರೀಶ್, ಕ್ಷೇತ್ರದ ಗುರ್ಕಾರ್ಲಾಯಿನ ವಿಶ್ವನಾಥ ಕರ್ಕೇರಾ, ದೀಕ್ಷಿತ್, ದೇವಿ ದರ್ಶನಪಾತ್ರಿ ರಂಜಿತ ಪಾಲ್ ಪಡೆದಿತ್ತೆರ್.

ಶ್ರೀಕೃಷ್ಣ ಮಠ ಪರ್ಯಾಯ ಶ್ರೀ ಅದಮಾರು ಮಠಟ್ ಉದ್ವರ್ತನ

ಒಡಿಪು,ಜುಲೈ 16: ತಾರೀಖ್ 17-07-2021ನೇ ಶನಿವಾರದಾನಿ ಶ್ರೀಕೃಷ್ಣ ಮಠಟ್ ಉದ್ವರ್ತನ ನಡಪರೆ ಉಂಡು .

ಶ್ರೀ ಶ್ರೀ ವಿಶ್ವಪ್ರಿಯತೀರ್ಥ ಶ್ರೀಪಾದೆರ್ ಬೊಕ್ಕ ಶ್ರೀ ಶ್ರೀ ಈಶಪ್ರಿಯತೀರ್ಥ ಶ್ರೀಪಾದೆರ್ ಶ್ರೀಕೃಷ್ಣ ಮಠಟ್ ಪುಣ್ಣಿಮೆರ್ದ್ (24-7-2021) ಚಾತುರ್ಮಾಸ ವ್ರತ ಪತ್ತರೆ ಉಲ್ಲೆರ್ . ಪರ್ಯಾಯ ಪೀಠಾಧೀಶೆರಾಯಿನ ಶ್ರೀ ಶ್ರೀ ಈಶಪ್ರಿಯತೀರ್ಥ ಶ್ರೀಪಾದೆರ್ ಪುಣ್ಣಿಮೆರ್ದ್ ಉತ್ಥಾನ ದ್ವಾದಶಿ ಮುಟ 4 ತಿಂಗೊಲ್ ದ ಚಾತುರ್ಮಾಸ ವ್ರತನ್ ಶ್ರೀಮಠಟ್ ಆಚರಣೆ ಮಲ್ಪುವೆರ್ ಪಂದ್ ಸಂಕಲ್ಪ ಮಲ್ದೆರ್ .

ಶ್ರೀಕೃಷ್ಣ ಮಠಟ್ ತಾರೀಖ್ 19-07-2021ನೇ ಸೋಮವಾರ ಆಷಾಢ ಶುದ್ಧ ದಶಮಿದಾನಿ ಶ್ರೀದೇವೆರೆಗ್ ಮಹಾಭಿಷೇಕವು ನಡಪರೆ ಉಂಡು . ಬೊಂಡ ಶ್ರೀದೇವೆರೆಗ್ ಸಮರ್ಪಣೆ ಮಲ್ಪುನ ಭಕ್ತಾದಿಲು ತಾರೀಖ್ 18-07-2021ನೇ ಬೈಯ್ಯ 4:00 ಗಂಟೆದುಲಯಿ ಉತ್ತರ ದ್ವಾರಡ್ ಕಂತ್ ಕೊರೋಲಿ.

ತಾರೀಖ್ 20-07-2021 ಅಂಗಾರೆ ಆಷಾಢ ಶುದ್ಧ ಪ್ರಥಮ ಏಕಾದಶಿದಾನಿ ಪರ್ಯಾಯ ಪೀಠಾಧೀಶರಾಯಿನ ಶ್ರೀ ಶ್ರೀ ಈಶಪ್ರಿಯ ತೀರ್ಥ ಶ್ರೀಪಾದೆರ್ ಶ್ರೀಕೃಷ್ಣ ಭಕ್ತೆರೆಗ್ ಮುದ್ರಾಧಾರಣೆನ್ ಮಲ್ತೆರ್ .ಕಾಂಡೆ 11.00 ಗಂಟೆಗ್ ರಾಜಾಂಗಣಡ್ ಸರಕಾರದ ನಿಯಮ ಪಾಲಿಸಾದ್ ಸಾಮಾಜಿಕ ಅಂತರ ಕಾತೊಂದು , ಕಡ್ಡಾಯವಾದ್ ಮಾಸ್ಕ್ ಪಾರ್ದ್ ಭಕ್ತಾದಿಲು ಮುದ್ರಾಧಾರಣೆಡ್ ಪಾಲ್ ಪಡೆಯೋಲಿ ಅಂಚನೇ ತಮ್ಮ-ತಮ್ಮ ಆರೋಗ್ಯನ್ ಜಾಸ್ತಿ ಗೇನೊಡು ದೀಯೊಂದು ಸಾಕಾರ ಕೊರೊಡು ಪಂದ್ ಶ್ರೀಮಠದ ಪ್ರಕಟಣೆ ತೆರಿಪಾದುಂಡು .

ಯುವ ಮರಾಠ, ದಕ್ಷಿಣ ವಲಯ ಕುಂಪಲ : ಪದಾಧಿಕಾರಿಲೆನ ಆಯ್ಕೆ

ಕುಂಪಲ, ಜುಲೈ 16 : ಯುವ ಮರಾಠ, ದಕ್ಷಿಣ ವಲಯ ಕುಂಪಲ ನೆತ್ತ 2021- 2022 ನೇ ಸಾಲ್ ದ ಪೊಸ ಪದಾಧಿಕಾರಿಲೆನ ಆಯ್ಕೆ ಅಂಗಾರೆ ನಡತುಂಡು.

ಪೊಸ ಗುರ್ಕಾರ್ಲಾದ್ ರಾಕೇಶ್ ವಾಗ್ಮನ್,
ಗೌರವಧ್ಯಕ್ಷರಾದ್ ಸುಬ್ರಮಣ್ಯ ರಾವ್ ಸಿಂಧ್ಯಾ,
ಉಪಾಧ್ಯಕ್ಶೆರಾದ್ ಜಗದೀಶ್ ರಾವ್,
ಕಾರ್ಯದರ್ಶಿಯಾದ್ ಯತೀಶ್ ರಾವ್,
ಖಜಾಂಜಿ ಚಂದ್ರಶೇಖರ ರಾವ್,
ಜೊತೆ ಕಾರ್ಯದರ್ಶಿ ಶಿವಾಜಿ ರಾವ್,
ಕ್ರೀಡಾ ಕಾರ್ಯದರ್ಶಿ ದಯಾನಂದ ರಾವ್ ಬೊಕ್ಕ ಹರೀಶ್ ರಾವ್,ಸಂಘಟನಾ ಕಾರ್ಯದರ್ಶಿ ವಿಕಾಸ್ ರಾವ್,ವಿದ್ಯಾ ನಿಧಿ ಸಂಚಾಲಕೆರ್ ಸುಬ್ರಮಣ್ಯ ರಾವ್, ಚರಣ್ ಪವಾರ್, ಸುನಿಲ್ ರಾವ್ ಆಯ್ಕೆ ಆಯೆರ್.

ಜಾಸ್ತಿ ಆಯಿನ ನೇತ್ರಾವತಿದ ನೀರ್ ದ ಮಟ್ಟ

ಬಂಟ್ವಾಳ, ಜುಲೈ 16: ರಡ್ಡ್ ದಿನರ್ದ್ ಬರೊಂದು ಇಟ್ಟಿನ ಬರ್ಸಗ್ ನೇತ್ರಾವತಿ ತುದೆಟ್ ನೀರ್ ದ ಮಟ್ಟ ಗುರುವಾರ ಜಾಸ್ತಿ ಆತುಂಡು .

ಕಾಂಡೆ ನೇತ್ರಾವತಿ ನದಿಟ್ 6.4 ಮೀಟರ್ ಎತ್ತರಡ್ ನೀರ್ ಪೋವೊಂದು ಇತ್ತುಂಡು . ಬೈಯ್ಯದ ಪೊರ್ತುಡು ನೀರ್ ದ ಮಟ್ಟ 7 ಮೀಟರ್ ಮಟ್ಟಗ್ ಏರ್ದುಂಡು.

ಕೆನರಾ ಬ್ಯಾಂಕ್ ನೇಮಕಾತಿ; ಜುಲೈ 31ತ್ತ ಉಲಯಿ ಅರ್ಜಿ ಲೆಪ್ಪೋಲೆ

ಬೆಂಗ್ಳೂರು, ಜುಲೈ 16: ; ಕೆನರಾ ಬ್ಯಾಂಕ್ ಜ್ಯುನಿಯರ್ ಆಫೀಸರ್ಸ್ ಹುದ್ದೆದ ಭರ್ತಿಗಾದ್ ಅರ್ಜಿ ಲೈದೆರ್ . ಅರ್ಹ ಬೊಕ್ಕ ಆಸಕ್ತ ಅಭ್ಯರ್ಥಿಲು ಜುಲೈ 31, 2021ತ್ತ ಉಲಯಿ ಅರ್ಜಿಲೆನ್ ಪಾಡೋಲಿ.

ಒಟ್ಟು 5 ಜುನಿಯರ್ ಆಫೀಸರ್ಸ್ ಹುದ್ದೆನ್ ಭರ್ತಿ ಮಲ್ತೊಂದು ಉಲ್ಲೆರ್ . ಆಯ್ಕೆಯಾಯಿನ ಅಭ್ಯರ್ಥಿಲು ದೇಶದ ಒವ್ವೆ ಪೇಂಟೆಡ್ ಬೇಲೆ ಮಲ್ಪೋಡಾಪುಂಡು . ಆಯ್ಕೆಯಾಯಿನ ಅಭ್ಯರ್ಥಿಲೆನ ಸಂಬಳ 19,200 ರೂ. ಪ್ರತಿ ತಿಂಗೊಲು ಪಂದ್ ಪ್ರಕಟಣೆಡ್ ಪಂತೆರ್.

ಅರ್ಜಿಲೆನ್ ಸಲ್ಲಿಸಾವುನ ಅಭ್ಯರ್ಥಿಲೆಗ್ 31 ಮಾರ್ಚ್ 2021 ದ ಪ್ರಕಾರ ಕನಿಷ್ಠ 21 ಗರಿಷ್ಠ 30 ವರ್ಷದ ವಯೋಮಿತಿನ್ ನಿಗದಿ ಮಲ್ದೆರ್ . ಕೆನರಾ ಬ್ಯಾಂಕ್ ನೇಮಕಾತಿ ನಿಯಮದ ಅನ್ವಯ ವಯೋಮಿತಿ ಸಡಿಲಿಕೆ ಉಪ್ಪುಂಡು . ಅರ್ಜಿಲೆನ್ ಸಲ್ಲಿಸಾವುನ ಅಭ್ಯರ್ಥಿಲು ಡಿಡಿ ರೂಪಡ್ 250 ರೂ. ಪಾವತಿ ಮಲ್ಪೊಡು .

ನಿಗದಿತ ನಮೂನೆಡ್ ಅರ್ಜಿನ್ ಭರ್ತಿ ಮಲ್ತ್ , ಸ್ವಯಂ ದೃಢೀಕರಣ ಮಲ್ತಿನ ದಾಖಲಾತಿಲೆನ್ ಲಗತ್ ಮಲ್ತ್ ಅರ್ಜಿಲೆನ್ ಜುಲೈ 31ತ್ತ ಉಲಯಿ ಕೊರೊಡು . ರಿಜಿಸ್ಟರ್ ಅತ್ತುಂಡ ಸ್ಪೀಡ್ ಪೋಸ್ಟ್ ಮುಖೇನ ಕೊರೊಡು .

ಅರ್ಜಿ ಪಾಡ್ಯರೆ ವಿಳಾಸ; The Executive Vice President, Canbank Factors Ltd, No. 67/1, Kanakapura Main Road (Near Lalbagh West Gate), Basavanagudi, BENGALURU – 560004