ತುಳು ಸುದ್ದಿ

ಬಂಗಾಳ ಕೊಲ್ಲಿಡ್ ಭೂಕಂಪ

ಚೆನ್ನೈ: ಬಂಗಾಳ ಕೊಲ್ಲಿಡ್ ಅಂಗಾರೆ ಮಧ್ಯಾಹ್ನ ಭೂಕಂಪನ ಆತುಂಡು , ತಮಿಳುನಾಡು ಬೊಕ್ಕ ಆಂಧ್ರಪ್ರದೇಶದ ಕೆಲವು ಜಾಗೆಡ್ ಐತ ಅನುಭವ ಆತುಂಡು .

ಚೆನ್ನೈ, ಕಾಕಿನಾಡ ಸೇರಿನಂಚ ಅವ್ವೆತೋ ಜಾಗೆಡ್ ಭೂಮಿ ಕಂಪಿಸಾದುಂಡು ಪಂದ್ ಪಂಡೆರ್.
ಚೆನ್ನೈರ್ದ್ 320 ಕಿ.ಮೀ ದೂರ ಬೊಕ್ಕ ಆಂಧ್ರದ ಕಾಕಿನಾಡರ್ದ್ 296 ಕಿಮೀ ದೂರಡ್ ಸಮುದ್ರ ನಡುಟು 10 ಕಿ.ಮೀ ಆಳಡ್ ಭೂಮಿ ಕಂಪನ ಆತುಂಡು .

ಕೋಚ್ ಕಾಶೀನಾಥ್ನ ಇಲ್ಲಗ್ ಭೇಟಿ ಕೊರಿನ ಬಂಗಾರ್ದ ಪದಕ ಗೆಂದಿನ ನೀರಜ್ ಚೋಪ್ರಾ

ಉತ್ತರ ಕನ್ನಡ (ಶಿರಸಿ) : ಟೋಕಿಯೋ ಒಲಿಂಪಿಕ್ಸ್ಡ್ ಜಾವಲಿನ್ ಎಸೆತಡ್ ಬಂಗಾರ್ದ ಪದಕ ಪಡೆದ್ ಭಾರತಗ್ ಪುದರ್ ಕನತಿನ ನೀರಜ್ ಚೋಪ್ರಾ ಇತ್ತೆ ತಮ್ಮ ಮಾಜಿ ಕೋಚ್ ಕಾಶೀನಾಥ್ ಮೆರೆನ್ ಭೇಟಿ ಆತೆರ್.

ಈ ಮುಖೇನ ತನ್ನ ಗುರುಕ್ಲೆಗ್ ಸೊಲ್ಮೆ ಸಂದೈತ ಮಲ್ದೆರ್ . ರಾಜ್ಯದ ಉತ್ತರ ಕನ್ನಡ ಜಿಲ್ಲೆದ ಶಿರಸಿದ ಬೆಂಗಳೆ ಗ್ರಾಮದ ಕಾಶೀನಾಥ ನಾಯ್ಕ ಸುರುತ ದಿನಟ್ ನೀರಜ್ ಗ್ ಕೋಚ್ ಆದ್ ಇತ್ತೆರ್ . ಈ ಬಗ್ಗೆ ಆರ್ನ ಒಟ್ಟಿಗೆ ಇತ್ತಿನ ಸಲಿಗೆನ್ ಕಾಶೀನಾಥ್ ಲಾ ಮಾಧ್ಯಮಡ್ ಪಟ್ಟ್ದಿತ್ತೆರ್.

ಸೌತ್ ಕೆನರಾ ಫೋಟೊಗ್ರಾಫರ್ಸ್ ಎಸೋಸಿಯೇಷನ್(ರಿ.) ವತಿರ್ದ್ ವಿಶ್ವ ಛಾಯಾಗ್ರಹಣ ದಿನ ಆಚರಣೆ

ಒಡಿಪು : ಒಡಿಪು ಸೌತ್ ಕೆನರಾ ಫೋಟೊಗ್ರಾಫರ್ಸ್ ಎಸೋಸಿಯೇಷನ್(ರಿ.) ಒಡಿಪು ವಲಯ ವತಿರ್ದ್ ವಿಶ್ವ ಛಾಯಾಗ್ರಹಣ ದಿನ ಆಚರಣೆ ಮಲ್ತೆರ್ , ಲೇಸ್ ನ್ ಉದಿಪನ ಮಲ್ತಿನ ಬಡಗುಬೆಟ್ಟು ಕೋ.ಸೊಸೈಟಿ ನೆತ್ತ ಪ್ರಧಾನ ವ್ಯವಸ್ಥಾಪಕೆರ್ ಆಯಿನ ಜಯಕರ ಶೆಟ್ಟಿ ಇಂದ್ರಾಳಿ ಫೋಟೋಗ್ರಾಪರ್ಸ್ ಗ್ ಸರಕಾರರ್ದ್ ತಿಕ್ಕುನ ಸವಲತ್ತ್ ಗ್ ಹೋರಾಟ ಅತಿ ಮುಖ್ಯ ಪಂದ್ ಪಂಡೆರ್.

ಈ ಪೊರ್ತುಡು ಪೆರಿಯ ಛಾಯಾಗ್ರಹಕೆರಾಯಿನ ಸುಂದರ ಪೂಜಾರಿ, ಮಲಬಾರ್ ಗೋಲ್ಡ್ ಅಂಡ್ ಡೈಮಂಡ್ಸ್ ಹಫೀಝ್ ರೆಹಮಾನ್, ಪೊರ್ಲು ಸ್ಟುಡಿಯೋ ಕಾರ್ಲ ಜಿನೇಶ್ ಪ್ರಸಾದ್ ಮೆರೆಗ್ ಮಾನದಿಗೆ ಮಲ್ತೆರ್.

ವೇದಿಕೆಡ್ ಒಡಿಪು ವಲಯದ ಗುರ್ಕಾರ್ಲಾಯಿನ ಪ್ರಕಾಶ್ ಕೋಡಂಕೂರು, ಸಮಾಜ ಸೇವಕೆರಾಯಿನ ವಿಶ್ವನಾಥ್ ಪೂಜಾರಿ, ಎಸ್.ಕೆ.ಪಿ.ಯ ಜಿಲ್ಲಾ ಗುರ್ಕಾರ್ಲಾಯಿನ ಕರಂದಾಡಿ ಶ್ರೀಧರ್ ಶೆಟ್ಟಿಗಾರ್, ಮಾಧ್ಯಮ ಪ್ರತಿನಿಧಿ ಜನಾರ್ದನ್ ಕೊಡವೂರು, ಸುಂದರ್ ಪೂಜಾರಿ, ಪ್ರಸಾದ್ ಜತ್ತನ್ ಪಾಲ್ ಪಡೆದಿತ್ತೆರ್ .

100 ಬಿಲಿಯನ್ ಡಾಲರ್ ಲಾಭ ಪಡೆಯಿನ ಇನ್ಫೋಸಿಸ್

ಮುಂಬೈ: ಮಾಹಿತಿ ತಂತ್ರಜ್ಞಾನ ಕ್ಷೇತ್ರದ ಕಂಪನಿ ಇನ್ಫೋಸಿಸ್‌ ಇತ್ತೆ 100 ಬಿಲಿಯನ್‌ ಡಾಲರ್‌ ಮೊತ್ತದ ಕಂಪನಿ ಪನ್ಪಿನ ಪುಗಾರ್ತೆ ಪಡೆತುಂಡು.

ಅಂಗಾರೆ ಬಾಂಬೆ ಷೇರು ಪೇಂಟೆಡ್ ಇನ್ಫೋಸಿಸ್‌ ಷೇರುಲು ಶೇ.0.94ಕ್ಕ್ ಜಾಸ್ತಿ ಆತುಂಡು . ಆಂಡ ಪ್ರತಿ ಷೇರ್ ಗ್ 1,739.20 ರೂ.ಗ್ ಮಾರಾಟ ಆದಿತ್ತುಂಡು . ಅಂಚಾದ್ , 7.45 ಲಕ್ಷ ಕೋಟಿ ರೂ. ಮಾರುಕಟ್ಟೆ ಬಂಡವಾಳದ ಗುರಿ ಮುಟ್ಟುನ ಸಾಧ್ಯವಾತುಂಡು .

ಬಜ್ಜೆಯಿದ ಬಿಲೆ ಕ್ವಿಂಟಾಲ್ ಗ್ 50000 ರೂ

ಕುಡ್ಲ : ದಾದಾನೆ ಆವಡ್ ಮಲೆನಾಡು ಬೊಕ್ಕ ತುಳುನಾಡ್ ಡ್ ಈ ಸಲ ಕಂಗ್ ದ ತೋಟ ಉಪ್ಪುನಕ್ಳು ನೆಮ್ಮದಿಡ್ ನಿದ್ರೆ ಮಲ್ಪೊಲಿ . ಒವ್ವೆ ಚಿಂತೆಲಾ ಇಜ್ಜಂದೆ , ಸಾಲಸೂಲದ ಬಗ್ಗೆ ಯೋಚನೆ ಮಲ್ಪಂದೆ , ನಿಶ್ಚಿಂತೆಡ್ ಉಪ್ಪೊಲಿ ದಾಯೆ ಪಂಡ ಬಜ್ಜೆಯಿದ ಬಿಲೆ ಜಾಸ್ತಿ ಆವೊಂದು ಉಂಡು.

ಆಗಸ್ಟ್ ಸುರುತ ವಾರರ್ದೆ ಬಜ್ಜೆಯಿದ ಬಿಲೆ ಜಾಸ್ತಿ ಆತುಂಡು ಇತ್ತೆ 50 ಸಾರಗ್ ಬತ್ದ್ ಉಂತುದುಂಡು. ನನ ದುಂಬುದ ದಿನಟ್ ಬಜ್ಜೆಯಿದ ಬಿಲೆ ಜಾಸ್ತಿ ಆಪಿನ ಸಾಧ್ಯತೆ ಉಂಡು. ಬಜ್ಜೆಯಿ ಒಟ್ಟು ಮಲ್ತ್ ದೀತಿನಕುಲು ಆಯಿನಾತ್ ಬೇಗಡ್ ಮಾರುನ ಎಡ್ಡೆ ಪಂಡ ತಪ್ಪಾವಂದ್.

ಕಾರ್ಲಡ್ ಕಣ್ಣ್ ತಪಾಸಣಾ ಶಿಬಿರ

ಕಾರ್ಕಳ : ಲಯನ್ಸ್ ಕ್ಲಬ್ ಕಾರ್ಕಳ,ಪ್ರಸಾದ್ ನೇತ್ರಾಲಯ ಸೂಪರ್ ಸ್ಪೆಷಾಲಿಟಿ ಕಣ್ಣ್ ದ ಆಸ್ಪತ್ರೆ, ಒಡಿಪು,ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣ ಸೊಸೈಟಿ (ಅಂಧತ್ವ ವಿಭಾಗ) ಒಡಿಪು ಡಾ| ಪಿ. ದಯಾನಂದ ಪೈ ಬೊಕ್ಕ ಶ್ರೀ ಸತೀಶ್ ಪೈ ಚಾರಿಟೇಬಲ್ ಟ್ರಸ್ಟ್ (ರಿ) ನೇತ್ರಜ್ಯೋತಿ ಚಾರಿಟೇಬಲ್ ಟ್ರಸ್ಟ್ ಒಡಿಪು ಮೆಕ್ಲೆನ ಒಟ್ಟು ಸೇರಿಗೆಡ್ ದರ್ಮದ ಕಣ್ಣ್ ತಪಾಸಣಾ ಚಿಕಿತ್ಸಾ ಶಿಬಿರ ತಾರೀಖ್ 29-08-2021 ನೇ ಐತಾರ ಕಾಂಡೆ 9.00 ಗಂಟೆರ್ದ್ ಮಧ್ಯಾಹ್ನ 1.30 ಮುಟ ಲಯನ್ಸ್ ಭವನ, ನಗರ ಪೊಲೀಸ್ ಠಾಣೆದ ಎದುರು ನಡಪರೆ ಉಂಡು.