ರಪಕ್ಕ ಸುದ್ದಿ Flash News

ನೆಲ್ಯಾಡಿ ಸೀನಿಯರ್ ಛೇಂಬರ್ ವತಿರ್ದ್ ಪರಿಸರ ದಿನಾಚರಣೆ

ನೆಲ್ಯಾಡಿ, ಜೂ. 06 : ಪರಿಸರ ಸಂರಕ್ಷಣೆ ನಮ್ಮ ಕರ್ತವ್ಯ ಆದುಂಡು . ಇತ್ತೆದ ಕಾಲಮಾನಡ್ ಪರಿಸರ ಒರಿಪಾವುನ ಕಡೆಕ್ ಜಾಸ್ತಿ ಒತ್ತು ಕೊರೊಡು ಪಂದ್ ನೆಲ್ಯಾಡಿ ಸೀನಿಯರ್ ಛೇಂಬರ್ ನ ವತಿರ್ದ್ ವಿಶ್ವ ಪರಿಸರದ ದಿನಾಚರಣೆದ ಪ್ರಯುಕ್ತ ಸಂತ ಜಾರ್ಜ್ ಪದವಿ ಪೂರ್ವ ಕಾಲೇಜು ನೆಲ್ಯಾಡಿಡ್ ದೈ ನಡ್ಪಿನ ಮುಖೇನ ಬೊಕ್ಕ ಹೈಸ್ಕೂಲ್ ಜೋಕ್ಲೆಗ್ ರಾಜ್ಯಮಟ್ಟದ ” ಪರಿಸರ ಸಂರಕ್ಷಣೆ ಮತ್ತು ಕೊರೋನ” ಪನ್ಪಿನ ವಿಷಯದ ಬಗ್ಗೆ ಪ್ರಬಂಧ ಪಂಥ ಅಂಚನೇ ಪ್ರೈಮರಿ ಜೋಕ್ಲೆಗ್ “ಪರಿಸರ ಸಂರಕ್ಷಣೆ” ವಿಷಯದ ಮಿತ್ತ್ ಚಿತ್ರಕಲೆ ಪಂಥನ್ ಅಟ್ಟನೆ ಮಲ್ತಿತ್ತೆರ್ .

ಈ ಲೇಸ್ ಡ್ ನೆಲ್ಯಾಡಿ ‌ಸೀನಿಯರ್ ಛೇಂಬರ್ದ ಗುರ್ಕಾರ್ಲಾಯಿನ ಡಾ. ಸದಾನಂದ ಕುಂದರ್, ಕಾರ್ಯದಶಿ ಪ್ರಶಾಂತ ಸಿ.ಎಚ್, ಕೋಶಾಧಿಕಾರಿ ವೆಂಕಟರಮಣ ‌ಅರ್, ಕಾಲೇಜಿನ ಪ್ರಾಂಶುಪಾಲೆರಾಯಿನ ಏಲಿಯಸ್, ಮುಖ್ಯಗುರುಕುಲಾಯಿನ ತೋಮಸ್ ಬೊಕ್ಕ ಸದಸ್ಯೆರಾಯಿನ ವಿಶ್ವನಾಥ ರೈ ಪಾಲ್ ಪಡೆದಿತ್ತೆರ್ .

ವಿಶ್ವ ಹಿಂದೂ ಪರಿಷತ್ ಬಜರಂಗದಳ ಕೋಡಿಕಲ್ ವತಿರ್ದ್ ನೆತ್ತೆರ್ ದಾನ ಶಿಬಿರ

ಕೋಡಿಕಲ್, ಜೂನ್ 6: ತಾರೀಖ್ 6/6/2021 ನೇ ಐತಾರ ಕಾಂಡೆ 8:30 ರ್ದ್ ಮಧ್ಯಾಹ್ನ 12 ಗಂಟೆ ಮುಟ ವಿಶ್ವ ಹಿಂದೂ ಪರಿಷತ್ ಬಜರಂಗದಳ ಕೋಡಿಕಲ್ ನೆತ್ತ ವತಿರ್ದ್ ವೆನ್ಲಾಕ್ ಆಸ್ಪತ್ರೆದ ಒಟ್ಟು ಸೇರಿಗೆಡ್ ನೆತ್ತೆರ್ ದಾನ ಶಿಬಿರ ನಡಪರೇ ಉಂಡು.

ಬಿಲ್ಲವ ಜನಾಂಗದಕ್ಲೆಗ್ ಪರಿಹಾರ ಕೊರ್ರೆ ಸಂಸದೆರೆಗ್ ಮನವಿ

ಒಡಿಪು , ಜೂ.6: ಜನಪ್ರತಿನಿಧಿಲು ಬಿಲ್ಲವ ಜನಾಂಗದ ಬಗ್ಗೆ ಗೇನ ಕೊರ್ದು , ಮುಖ್ಯ ಮಂತ್ರಿಲೆನ ಮಿತ್ತ್ ಒತ್ತಡ ಕಂತ್ , ಬಿಲ್ಲವ ಜನಾಂಗಗ್ ನ್ಯಾಯ ಒದಗಿಸಾದ್ ಕೂಡಲೇ ಪರಿಹಾರ ಘೋಷಣೆ ಮಲ್ಪೊಡು ಪಂದ್ ಕಟಪಾಡಿ ವಿಶ್ವನಾಥ ಕ್ಷೇತ್ರದ ಗುರ್ಕಾರ್ಲಾಯಿನ ಬಿ.ಎನ್.ಶಂಕರ ಪೂಜಾರಿ ಅವಿಭಜಿತ ದ.ಕ. ಜಿಲ್ಲೆದ ಶಾಸಕೆರ್, ಸಂಸದೆರ್ ಪತ್ರ ಬರೆದ್ ಮನವಿ ಸಲ್ಲಿಸಾಯೆರ್ .

ಶೇಂದಿ ದೆತ್ದ್ ಬದುಕುವ ಬಿಲ್ಲವ/ಈಡಿಗ ಜನಾಂಗದ ಮೂರ್ತೆದಾರಿಕೆ ಕಸುಬು ಲಾಕ್‌ಡೌನ್‌ರ್ದಾವರ ಸಂಪೂರ್ಣ ಉಂಟುದುಂಡು , ಮೂರ್ತೆದಾರೆರ್ನ ಕುಟುಂಬ ಅನಾಥ ಆತುಂಡು.ಬಿಲ್ಲವ ಜನಾಂಗದ ಆರಾಧ್ಯ ದೇವೇರಾಯಿನ ಕೋಟಿ-ಚೆನ್ನಯ್ಯ ಗರಡಿಡ್ ಪೂಜೆ ಮಲ್ಪುನ ಗರಡಿ ಅರ್ಚಕೆರ್.ದರ್ಶನ ಪಾತ್ರಿಲು, ಸಿಬ್ಬಂದಿಲು, ದೇವಸ್ಥಾನದ ಸಿಬ್ಬಂದಿಲಕ ಸಂಕಷ್ಟಡ್ ಉಲ್ಲೆರ್ , ರಾಜ್ಯ ಸರಕಾರ ಮೆಕ್ಲೆನ ಸಾಕಾರಗ್ ಬರೊಡು ಪಂದ್ ಒತ್ತಾಯ ಮಲ್ದೆರ್.

ಸವಿತಾ ಸಮಾಜರ್ದ್ ಕಾರ್ಮಿಕ ಅಧಿಕಾರಿಲೆಗ್ ಮನವಿ

ಒಡಿಪು , ಜೂ.6: ಸರಕಾರದ ಸಹಾಯಧನ ವಿಚಾರಡ್ ಕ್ಷೌರಿಕ ಬಂಧುಲೆಗ್ ಸಾಕಷ್ಟು ಅನಾನುಕೂಲತೆ ಉಂಡು ಎಚ್ಚದ ರೀತಿಡ್ ನಮ್ಮ ಬಂಧುಲು ಫಲಾನುಭವಿಲೆಗ್ ಇಲಾಖಾ ವತಿರ್ದ್ ಸಾಕಾರ ಕೊರೊಡು ಒಡಿಪು ಜಿಲ್ಲಾ ಸವಿತಾ ಸಮಾಜದ ಗೌರವ ಗುರ್ಕಾರ್ಲಾಯಿನ ಗೋವಿಂದ ಭಂಡಾರಿ ಬೊಕ್ಕ ಪ್ರಧಾನ ಕಾರ್ಯದರ್ಶಿ ಸದಾಶಿವ ಬಂಗೇರ ಕುರ್ಕಾಲು ಒಡಿಪು ಜಿಲ್ಲಾ ಕಾರ್ಮಿಕ ಅಧಿಕಾರಿಲೆನ್ ಭೇಟಿ ಮಲ್ತ್ ಬಿನ್ನಾಪು ಮಲ್ತೆರ್.

ಸಿಪಿಎಂ ಪೆರಿಯ ಮುಖಂಡ ಕೆ. ಗೋವಿಂದ ಶೆಟ್ಟಿಗಾರ್ ನಿಧನ

ಕುಂದಾಪುರ, ಜೂ.5: ಸಿಪಿಐಎಂ ಪಕ್ಷದ ಪೆರಿಯ ಮುಖಂಡ, ಕರ್ನಾಟಕ ಪ್ರಾಂತ ರೈತ ಸಂಘದ ತಾಲೂಕು ಮಾಜಿ ಗುರ್ಕಾರ್ಲಾಯಿನ , ಕೋಟೇಶ್ವರ ಗ್ರಾಪಂ ಮಾಜಿ ಸದಸ್ಯ ಕೆ.ಗೋವಿಂದ ಶೆಟ್ಟಿಗಾರ್(88) ಜೂ.3 ತಾರೀಖ್ ಗ್ ಕೋಟೇಶ್ವರದ ಖಾಸಗಿ ಆಸ್ಪತ್ರೆಡ್ ವಯೋಸಹಜ ಅನಾರೋಗ್ಯರ್ದ್ ತೀರ್ ಪೋಯೆರ್ .

1970ಟ್ಟ್ ಸಿಪಿಐಎಂ ಪಕ್ಷಡ್ ರಾಜಕೀಯ ಜೀವನ ಸುರು ಮಲ್ತಿನ ಆರ್ ಭೂಸುಧಾರಣೆ ಕಾನೂನು ಜಾರಿಗಾದ್ ಗೇಣಿದಾರ ರೈತರ ಭೂಮಿ ಖಾಯಂತಿಗಾದ್ ನಡತಿನ ಹೋರಾಟಡ್ ಸಕ್ರೀಯವಾದ್, ಗೇಣಿದಾರೆರೆಗ್ ಭೂಮಿ ಮೆರ್ನ ಮಹತ್ವದ ಹೋರಾಟ ಆದಿತ್ತುಂಡು . ಕೋಟೇಶ್ವರ ಗ್ರಾಪಂಗ್ ರಡ್ಡ್ ಅವಧಿಗ್ ಸದಸ್ಯರಾದ್ ಆಯ್ಕೆಯಾಯೆರ್ .

ಕಟ್ಟಡ ಕಾರ್ಮಿಕೆರೆಗ್ ಕೋವಿಡ್ ಲಸಿಕೆ

ಒಡಿಪು , ಜೂ.6: ಒಡಿಪು ಜಿಲ್ಲೆದ ಆದ್ಯತಾ ಕೂಟದ ಕಟ್ಟಡ ಕಾರ್ಮಿಕೆರೆಗ್ ಸರಕಾರದ ನಿರ್ದೇಶನದಲಕ ಜೂ.5ರ್ದ್ ಪ್ರಾಥಮಿಕ ಆರೋಗ್ಯ ಘಟಕದ ವ್ಯಾಪ್ತಿಡ್ ಕಟ್ಟಡ ಕಾರ್ಮಿಕೆರೆಗ್ ಲಸಿಕೆ ಕೊರ್ಪಿನ ಕಾರ್ಯನ್ ಸುರು ಮಲ್ದೆರ್ .

ಐರ್ದಾವರ ಜಿಲ್ಲೆದ ನೋಂದಾಯಿತ ಕಟ್ಟಡ ಕಾರ್ಮಿಕೆರ್ , ಕಟ್ಟಡ ಬೊಕ್ಕ ಇತರೆ ನಿರ್ಮಾಣ ಕಾರ್ಮಿಕೆರ್ನ ಕಲ್ಯಾಣ ಮಂಡಳಿರ್ದ್ ಪಡೆಯಿನ ಮೂಲ ಗುರುತಿನಚೀಟಿ ಬೊಕ್ಕ ಆಧಾರ್‌ಕಾರ್ಡ್ ನ್ ತಮ್ಮ ಕೈತಲ್ದ ಪಿಹೆಚ್‌ಸಿ ಅತ್ತುಂಡ ಕೋವಿಡ್ ವ್ಯಾಕ್ಸಿನ್ ಸೆಂಟರ್‌ಡ್ ಹಾಜರ್ ಪಡಿಸಾದ್ ಲಸಿಕೆ ಲಭ್ಯತೆದ ಆಧಾರದ ಮಿತ್ತ್ ಲಸಿಕೆನ್ ಪಡೆಯೋಡು ಪಂದ್ ತೆರಿಪಾಯೆರ್.

ನೋಂದಣಿಯಾವಂದಿನ ಕಟ್ಟಡ ಕಾರ್ಮಿಕೆರ್ ಕಾರ್ಮಿಕೆರೆನ್ ಇಲಾಖೆರ್ದ್ ಈಗಾಗಲೇ ಪಡೆಯಿನ ಅನುಬಂಧ-3 ಬೊಕ್ಕ ಆಧಾರ್‌ಕಾರ್ಡ್‌ನ್ ಹಾಜರು ಪಡಿಸಾದ್ ಲಸಿಕೆನ್ ಲಭ್ಯತೆ ಆಧಾರದ ಮಿತ್ತ್ ಪಡೆಯೋಡು ಅಂಚನೇ ಇತ್ತೇ ಮುಟ ಅನುಬಂಧ-3ನ್ ಪಡೆವಂದಿನ ಕಟ್ಟಡ ಕಾರ್ಮಿಕೆರ್ ತಮ್ಮ ತಾಲೂಕು ಕಾರ್ಮಿಕ ನಿರೀಕ್ಷಕೆರೆನ್ ಸಂಪರ್ಕಿಸಾದ್ ಅನುಬಂಧ-3ನ್ ಪಡೆದ್ ಲಸಿಕೆ ಪಡೆಯೋಡು ಪಂದ್ ಜಿಲ್ಲಾ ಕಾರ್ಮಿಕ ಅಧಿಕಾರಿ ಕುಮಾರ್ ಪ್ರಕಟಣೆಡ್ ತೆರಿಪಾಯೆರ್ .

ದಕ್ಷಿಣ ಕನ್ನಡಡ್ ಸುರುತ್ತ ಆಕ್ಸಿಜನ್ ಉತ್ಪಾದನ ಘಟಕ ಬಂಟ್ವಾಳಡ್ ಉದಿಪನ

ಬಂಟ್ವಾಳ ಜೂ.06:ದಕ್ಷಿಣ ಕನ್ನಡ ಜಿಲ್ಲೆದ ಸುರುತ್ತ ಆಕ್ಸಿಜನ್ ಉತ್ಪಾದನಾ ಘಟಕನ್ ವಾಮದಪದವು ಸಮುದಾಯ ಬಂಟ್ವಾಳದ ಆರೋಗ್ಯ ಕೇಂದ್ರದ ಆವರಣಡ್ ಶನಿವಾರ ಉದಿಪನ ಮಲ್ತೆರ್ .

ದಕ್ಷಿಣ ಕನ್ನಡ ಜಿಲ್ಲಾ ಉಸ್ತುವಾರಿ ಸಚಿವ ಕೋಟ ಶ್ರೀನಿವಾಸ ಪೂಜಾರಿ ಆಕ್ಸಿಜನ್ ಘಟಕನ್ ಉದಿಪನ ಮಲ್ತೆರ್.ಬಂಟ್ವಾಳಡ್ ಕೊರೊನಾ ವಿರುದ್ಧ ಹೋರಾಟ ವ್ಯವಸ್ಥಿತವಾದ್ ನಡತೊಂದು ಉಂಡು , ಸಂಸದ ನಳಿನ್ ಕುಮಾರ್ ಕಟೀಲು, ಶಾಸಕ ರಾಜೇಶ್ ನಾಯ್ಕ್ ಬೊಕ್ಕ ಅಧಿಕಾರಿ ವೃಂದದ ಶ್ರಮನ್ ಮೇರ್ ಪುಗರಿಯೆರ್.