ರಪಕ್ಕ ಸುದ್ದಿ Flash News

ಬೆಂಗ್ಲೂರು: ಇನಿ ಜನಪ್ರತಿನಿಧಿಲು, ಡಿಸಿ ಒಟ್ಟುಗು ಮುಖ್ಯಮಂತ್ರಿ ಸಭೆ

ಬೆಂಗ್ಲೂರು: ಒಡಿಪು ಜಿಲ್ಲೆಡ್ ಆವೊಂದಿಪ್ಪುನ ಪೊಯ್ಯೆ ಸಾಗಾಟ, ಕೆಂಪುಕಲ್ಲ್ ಅಂಚನೆ ಬೇತೆ ಸಮಸ್ಯೆದ ಬಗೆಟ್ ಅ.5 ಕ್ಕ್ ಬಯ್ಯ 5 ಗಂಟೆಗ್ ವಿಧಾನಸೌಧದ ಸಮಿತಿ ಕೋಣೆಡ್ ಮುಖ್ಯಮಂತ್ರಿಲೆನ ಜಿಲ್ಲಾ ಉಸ್ತುವಾರಿ ಸಚಿವೆರ್, ಜಿಲ್ಲೆದ ಐನ್ ಶಾಸಕೆರ್, ರಡ್ಡ್ ವಿಧಾನ ಪರಿಷತ್ ಸದಸ್ಯೆರ್, ಜಿಲ್ಲಾಧಿಕಾರಿ, ಜಿಲ್ಲಾ ಪಂಚಾಯತ್ ಸಿಇಒ ಅಂಚನೆ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಸೇರ್ದ್ ಜಿಲ್ಲೆದ ಪ್ರಮುಖೆರ್‌ನೊಟ್ಟುಗು ಸಭೆ ನಡಪಾಯರೆ ಉಲ್ಲೆರ್.

ಕಾಪು: ಪೊಸ ಮಾರಿಗುಡಿ ಜೀರ್ಣೋದ್ಧಾರ: ಶಾಸಕೆರ್, ಧಾರ್ಮಿಕ ಮುಖಂಡೆರೆರ್ದ್ ಸಮಾಲೋಚನೆ ಸಭೆ

ಕಾಪು: ಮುಲ್ಪದ ಶ್ರೀ ಹೊಸ ಮಾರಿಗುಡಿ ದೇವಲ್ಯ ಅಭಿವೃದ್ಧಿ ಸಮಿತಿ ಮುತಾಲಿಕೆಡ್ ಒಡಿಪು ಜಿಲ್ಲೆದ ಶಾಸಕೆರ್, ಉದ್ಯಮಿಲು, ಸಾಮಾಜಿಕ ಬೊಕ್ಕ ಧಾರ್ಮಿಕ ಮುಖಂಡೆರ್ ಅಂಚನೆ ಭಕ್ತೆರ್ ಒಟ್ಟು ಸೇರಿಗೆಡ್ ಸಮಾಲೋಚನ ಸಭೆ ನಡತ್ಂಡ್.

ಪ್ರಧಾನ ಅರ್ಚಕೆರ್ ವೇ| ಮೂ| ಶ್ರೀನಿವಾಸ ತಂತ್ರಿ ಕಲ್ಯ, ವೇ| ಮೂ| ಶ್ರೀಶ ತಂತ್ರಿ ಕೊರಂಗ್ರಪಾಡಿ ಮುತಾಲಿಕೆಡ್ ಮಾರಿಯಮ್ಮ ದೇವಿನ ಸನ್ನಿಧಾನಡ್ ಸಾಮೂಹಿಕ ಪ್ರಾರ್ಥನೆ ಮಲ್ತ್‌ದ್ ಸಭೆ ನಡತ್ಂಡ್.

ಜಿಲ್ಲೆದ ಜನಪ್ರತಿನಿಧಿಲು ಬೊಕ್ಕ ಬಿನ್ನೆರೆನ ಕೂಟ ಇಳಕಲ್ ಶಿಲೆರ್ದ್ ನಿರ್ಮಾಣ ಆವೊಂದಿಪ್ಪುನ ಹೊಸ ಮಾರಿಗುಡಿ, ಉಚ್ಚಂಗಿ ಗುಡಿ ಬೊಕ್ಕ ದೇವಲ್ಯದ ಸಮಗ್ರ ಅಭಿವೃದ್ಧಿ ಕಾಮಗಾರಿನ್ ತೂದ್ ಎಡ್ಡೆಪ್ಪುದ ಪಾತೆರ ಪಾತೆರಿಯೆರ್.