ಊರ್ದ ಸುದ್ದಿ Regional News

ವಿಜಯಾ ಕಲಾವಿದೆರ್ ಕುಟುಂಬದ ಸಾಧಕೆರೆಗ್ ಮಾನಾದಿಗೆ, ಊರುಗು ಬರೊಡ್ಚಿ ನಾಟಕದ ಮುರ್ತ

ವಿಜಯಾ ಕಲಾವಿದೆರ್ ಕಿನ್ನಿಗೋಳಿ ನೆತ್ತ ಒರುಟ್ಟು ಕುಟುಂಬೊದ ಕಲಾವಿದೆರೆಗ್ ಮಾನಾದಿಗೆ ಬೊಕ್ಕ “ಊರುಗು ಬರೊಡ್ಚಿ” ತುಳು ನಾಟಕೊದ ಮುರ್ತದ ಲೇಸ್ ಐತಾರದಾನಿ
ಕಿನ್ನಿಗೋಳಿದ ಐಕಳ ಹರೀಶ್ ಶೆಟ್ರೆನ ಶ್ರೀ ಭ್ರಮರಾಂಬಿಕೆ ಇಲ್ಲದ ಜಾಲ್ ಡ್ ನಡತ್ಂಡ್.
ಸಮಾಜೊಗು ಎಡ್ಡೆಂತಿನೆನ್ ಬೋಧನೆ ಮಲ್ಪುನ ವಿಜಯಾ ಕಲಾವಿದೆರ್ನ ಯಶಸ್ವಿ “ಬೈರಾಸ್ ಭಾಸ್ಕರೆ” ನಾಟಕೊದ ಲೆಕ್ಕನೆ ಊರುಗು ಬರೊಡ್ಚಿ ಪನ್ಪಿನ ನಾಟಕಲಾ ಎಡ್ಡೆ ಸಂದೇಶ ಕೊರ್ದು ಯಶಸ್ವಿ ಆವಡ್ ಪಂಡೆರ್ ಮಲ್ಲ ಬಿನ್ನೆರಾದ್ ಬತ್ತಿನ ಶ್ರೀ ಲಕ್ಷ್ಮಿ ನಾರಾಯಣ ಆಸ್ರಣ್ಣೆರ್ ಪಂಡೆರ್.ಲೇಸ್ ದ ಗುರ್ಕಾರ್ಮೆ ವಹಿಸಿದಿತ್ತಿನ ಜಾಗತಿಕ ಬಂಟೆರ್ನ ಸಂಘೊಲೆನ ಫೆಡರೇಷನ್ ದ ಗುರ್ಕಾರ್ಲು ಐಕಳ ಹರೀಶ್ ಶೆಟ್ರ್ ಪಾತೆರ್ದ್ ಶುಭ ಹಾರೈಕೆ ಮಲ್ತೆರ್. ಕೊರೊನಾದ ಕಾಲೊಡು ಬೊಂಬಾಯಿದಕಲೆನ ಪರಿಸ್ಥಿತಿ ಬಾರಿ ಬಂಞ ಇತ್ತ್ಂಡ್. ಆಂಡಾ ಬೊಂಬಾಯಿ ಇಜ್ಜಿಡ ಊರು ಇಜ್ಜಿ . ದಾಯೆ ಪಂಡ ಊರುದ ಬುಲೆಚ್ಚಿಲ್ ಗ್ ದೈವ ದೇವಸ್ಥಾನೊಲೆನ ಜೀರ್ಣೋದ್ಧಾರೊಗು ಏತ್ ಕಷ್ಡ ಆಂಡಲಾ ಕಷ್ಟ ಬುಡ್ತಿನಕುಲು ಬೊಂಬಾಯಿದಕುಲು. ಇಂಚಿನ ಪೊರ್ತುಡು ಊರುಗು ಬರೊಡ್ಚಿ ಪನ್ಪಿನ ನಾಟಕ ಎಡ್ಡೆ ಸಂದೇಶ ಕೊರ್ದು ಯಶಸ್ವಿ ಆವಡ್ ಪಂಡೆರ್.
ಧರ್ಮದರ್ಶಿ ಹರಿಕೃಷ್ಣ ಪುನರೂರು ,
ಕಲಾಪೋಷಕೆರ್, ಸಂತೋಷ್ ಶೆಟ್ಟಿ , ರಂಗ ನಿರ್ದೇಶಕೆರ್ ಚಂದ್ರಶೇಖರ ಸುವರ್ಣೆರ್ ಶುಭ ಹಾರೈಕೆ ಮಲ್ತೆರ್.

ಚಂದ್ರಿಕಾ ಹರೀಶ್ ಶೆಟ್ರ್ ,ಯಕ್ಷ ಲಹರಿದ ಗುರ್ಕಾರ್ಲು ರಘುನಾಥ ಕಾಮತ್ ಕೆಂಚನಕೆರೆ, ರಂಗ ನಟೆ ರಾಜೇಶ್ ಕೆಂಚನಕೆರೆ, ಮೂಲ್ಕಿ ವಲಯದ ಪತ್ರಕರ್ತೆರ್ನ ಕೂಟದ ಗುರ್ಕಾರ್ಲು ನಿಶಾಂತ್ ಕಿಲೆಂಜೂರು , ಸ್ವರಾಜ್ ಶೆಟ್ರ್ ಮೊಕುಲು ಇತ್ತೆರ್.ಉಂದುವೇ ಪೊರ್ತುಡು
ಧಾರ್ಮಿಕ ಪರಿಷತ್ ದ ಪದುಕೆರಾಯಿನ ಯುಗಪುರುಷ ದ ಸಂಪಾದಕೆರ್ ಭುವನಭಿರಾಮ ಉಡುಪೆರ್, ಮಲ್ಲ ಬೆನ್ನಿದಾರ್ , ಕಲಾವಿದೆ ಸುಧಾಕರ ಸಾಲ್ಯಾನ್ ಅಂಚೆನೇ ತುಳು ಸಾಹಿತ್ಯ ಅಕಾಡೆಮಿದ ಪದುಕೆರಾಯಿನ ಪತ್ರಕರ್ತೆ ನರೇಂದ್ರ ಕೆರೆಕಾಡು ಮೆರೆಗ್ ಮಾನಾದಿಗೆ ಮಲ್ತೆರ್.ಉಂದುವೇ ಪೊರ್ತುಡು ಐಕಳ ಹರೀಶ್ ಶೆಟ್ರ್ ನಾಟಕಕಾರೆ ಹರೀಶ್ ಪಡುಬಿದ್ರಿ ಮೆರೆಗ್ ನಾಟಕೊಗು ವೀಳ್ಯ ಕೊರಿಯೆರ್.

ಬಾಲ ಕಲಾವಿದೆ ಮಂಜೂಷ ಭಗವಾನ್ ಸುರತ್ಕಲ್ ದೇವೆರೆನ್ ಸುಗಿತೆರ್.
ವಿಜಯ ಕಲಾವಿದೆರ್ ನೆತ್ತ ಸಂಚಾಲಕೆರ್ ಸಾಯಿನಾಥ್ ಶೆಟ್ಟಿ ಮಾನಾದಿಗೆ ಪಡೆಯಿನಕಲೆಗ್ ಅಭಿನಂದನೆ ಮಲ್ತೆರ್.ಕಲಾವಿದೆರಾಯಿನ ಭಾಸ್ಕರ ಪಕ್ಷಿಕೆರೆ, ಹರಿಪ್ರಸಾದ್ ನಂದಳಿಕೆ, ಸುಷ್ಮಿತಾ ಕುಲಾಲ್ ಮಾನಾದಿಗೆ ಪತ್ರ ಓದು ಪಂಡೆರ್.
ವಿಜಯಾ ಕಲಾವಿದೆರ್ ಗುರ್ಕಾರ್ಲು ಶರತ್ ಶೆಟ್ಟಿ ಎದ್ಕೊಂಡೆರ್ . ಅಂಚೆನೇ ಲೇಸ್ ನಡಪಾದ್ ಕೊರಿಯೆರ್.

ಅತ್ಯಾಚಾರ ಮಲ್ತಿನ ಆರೋಪಡ್ ಕಲ್ಲಮುಂಡ್ಕೂರ್ ದ ರಿಕ್ಷಾ ಚಾಲಕ ನ ಬಂಧನ

ಮೂಡುಬಿದಿರೆ : ಎಲ್ಯ ಪೊಣ್ಣನ್ ಅತ್ಯಾಚಾರ ಮಲ್ತಿನ ಆರೋಪಡ್ ಕಲ್ಲಮುಂಡ್ಕೂರ್ ದ ರಿಕ್ಷಾ ಚಾಲಕೆನ್ ಕುಡ್ಲದ ಮಹಿಳಾ ಪೊಲೀಸೆರ್ ಬಂಧಿಸಿ ಪೊಕ್ಸೊ ಪ್ರಕರಣ ದಾಖಲ್ ಮಲ್ದೆರ್ .

ಬಂಧಿತ ಆರೋಪಿನ್ ಸತೀಶ್ ಅಂಚನ್ ಪಂದ್ ಪಂತೆರ್ . ಇಂಬೆ ತಾಸೆ ವಾದಕೆ ಪಂದ್ ತೆರಿದ್ ಬೈದುಂಡು . ತನ್ನ ಊರ್ದ ಎಲ್ಯ ಪೊಣ್ಣ ನೊಟ್ಟುಗು ಸ್ನೇಹ ಆದ್ ಆಲ್ನೋಟ್ಟುಗು ಸಲುಗೆಡ್ ನಡತೊಂದು ಇತ್ತೆ ಪಂದ್ ತೆರಿದ್ ಬೈದುಂಡು . ಜುಲೈಡ್ ಪೊಣ್ಣು ಕಲ್ಲಮುಂಡ್ಕೂರ್ ಡ್ ನಡತೊಂದು ಬರೊಂದು ಉಪ್ಪುನಗ ಆರೋಪಿ ಸತೀಶ್ ಆರ್ನ ರಿಕ್ಷಾಡ್ ಬಲವಂತವಾದ್ ಕುಲ್ಲದ್ ಕಲ್ಲ್ ಕೋರೆಗ್ ಲೆತೊಂದು ಅತ್ಯಾಚಾರ ಮಲ್ದೆ ಪಂದ್ ತೆರಿದ್ ಬೈದುಂಡು .

ತುಳುನಾಡ ತುತ್ತೈತ ಜೋಕ್ಲೆನ ಬಾವಚಿತ್ರ ಪಂಥೊದ ಮುಗಿತಲದ ಲೇಸ್ ಅಂಚನೇ ಕೊರಗಜ್ಜನ ಪದತ್ತ ಬಾಲೆ ಕಾರ್ತಿಕ್ ಗ್ “ತುಳುವ ಕುರಲ್” ಬಿರ್ದ್

ಕುಡ್ಲ : ಕೊರಗಜ್ಜನ ಪದ ಪಂಡ್ ದ್ ಪುಗರ್ತೆ ಪಡೆಯಿನ ಕಾರ್ಲದ ಬಾಲೆ ಕಾರ್ತಿಕ್ ಗ್ ” ತುಳುವ ಕುರಲ್” ಪನ್ಪಿನ ಬಿರ್ದ್ ಕೊರ್ದು ಮಾನಾದಿಗೆ ಮಲ್ಪುನ ಲೇಸ್ ಶನಿಯಾರ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಸಿರಿ ಚಾವಡಿಡ್ ನಡತ್ಂಡ್.ಜೋಕುಲೆನ ದಿನೊತ್ತ ಲೆಕ್ಕೊಡು ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ, ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆ, ರೋಟರಿ ಕ್ಲಬ್ ಮುಲ್ಕಿ ಬೊಕ್ಕ ಶ್ರೀ ಸುಬ್ರಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ ತೋಕೂರು ಹಳೆಯಂಗಡಿ ಮೊಕಲೆನ ಒಟ್ಟು ಸೇರಿಗೆಡ್ ನಡತಿನ ತುಳುನಾಡ ತುತ್ತೈತ ಜೋಕುಲೆನ ಬಾವಚಿತ್ರ ಪಂಥೊದ ಮುಗಿತಲದ ಲೇಸ್ ಡ್ ಬಿರ್ದ್ ಕೊರ್ಪಿನ ಕಜ್ಜ ನಡತ್ಂಡ್.

ಉಂದುವೇ ಪೊರ್ತುಡು ಬಾಲೆ ಕಾರ್ತಿಕ್ ನ ಮರ್ದ್ ಅನುಪಾನೊಗು ಬಿನ್ನೆರಾದ್ ಬತ್ತಿತ್ತಿನ ರೋಟರಿ ೩೧೮೧ ಜಿಲ್ಲೆದ ಗವರ್ನರ್ ರೊ.ರಂಗನಾಥ್ ಭಟ್ ಬೊಕ್ಕ ರಜನಿ ರಂಗನಾಥ್ ಭಟ್ ೨೫ ಸಾರ ರೂಪಾಯಿ ಪಣವು ಸಕಾಯದ ಘೋಷಣೆ ಮಲ್ತೆರ್.ಉಂದುವೇ ಪೊರ್ತುಡು ರಿಯಾಲಿಟಿ ಷೋ ಪುಗರ್ತೆದ ಅಚಿಂತ್ಯ ಪುರಾಣಿಕ್ ಗ್ ಲಾ ಮಾನಾದಿಗೆ ಮಲ್ತೆರ್.
ಅಂಚೆನೇ ತುಳುನಾಡ ತುತ್ತೈತ ಪಂಥೊಡು ಸುರೂತ್ತ ಇನಾಮು ಪಡೆಯಿನ ಲತೀಶ್ ಎಚ್ ಕುಮಾರ್, ರಡ್ಡನೇ ಇನಾಮು ಪಡೆಯಿನ ಯುಕ್ತಿ ಎಸ್ ಪ್ರಸಾದ್, ಬೊಕ್ಕ ಮೂಜಿನೇ ಇನಾಮು ಪಡೆಯಿನ ಜಸ್ವಿ ಕುಲಾಲ್ ಮೆರೆಗ್ ಇನಾಮು ಪಟ್ಟಿಯೆರ್.ಅವು ಅತ್ತಾಂದೆ ವಿಶೇಷ ಚೇತನ ಬಾಲೆ ಪ್ರಾರ್ಥನ್, ಜ್ಞಾನಿಕ ಕರ್ಕೇರ ಬೊಕ್ಕ ತೃಷಾ ಪನ್ಪಿನ ಬಾಲೆಗ್ ಲಾ ಮಾನಾದಿಗೆಲ್ತೆರ್. ಅವ್ವೇ ಅತ್ತಾಂದೆ ಬಾಕಿ  ಐನ್ ಜೋಕ್ಲೆಗ್ ಲಾ ಇನಾಮು  ಪಟ್ಟಿಯೆರ್.ಉಂದುವೇ ಪೊರ್ತುಡು ತುಳು ಅಕಾಡೆಮಿದ ಲೆಕ್ಕೊಡು ಬಾಲೆ ಕಾರ್ತಿಕ್ ಗ್ ೫೦೦೦ ರೂಪಾಯಿದ ಪಣವು ಸಕಾಯೊನು ದಯಾನಂದ‌ ಕತ್ತಲಸಾರ್ ಮಲ್ತೆರ್.ಮಲ್ಲ ಬಿನ್ನೆರಾದ್ ಟೈಮ್ಸ್ ಆಫ್ ಕುಡ್ಲ ಪತ್ರಿಕೆ ದ ಸಂಪಾದಕೆರ್ ಎಸ್.ಆರ್.ಬಂಡಿಮಾರ್, ರೊಟೇರಿಯನ್ ಎಮ್.ನಾರಾಯಣ್ ಇತ್ತೆರ್.

ತುಳು ಅಕಾಡೆಮಿದ ಗುರ್ಕಾರ್ಲು ದಯಾನಂದ ಜಿ.ಕತ್ತಲ್ ಸಾರ್ ಲೇಸ್ ದ ಗುರ್ಕಾರ್ಮೆ ಒಯಿಸಿಯೆರ್.

ಅಕಾಡೆಮಿದ ಸದಸ್ಯೆರ್ ಸಂಚಾಲಕೆರ್ ನರೇಂದ್ರ ಕೆರೆಕಾಡು ಲೇಸ್ ನಡಪಾದ್ ಕೊರಿಯೆರ್.ಪದುಕೆರಾಯಿನ ದಿನೇಶ್ ರೈ ಕಡಬ, ಲೀಲಾಕ್ಷ ಕರ್ಕೇರ ಚೇತಕ್ ಪೂಜಾರಿ, ಕಾರ್ಲದ ಸಂತೋಷ್ ಪೂಜಾರಿ, ಶಶಿಧರ ಶೆಟ್ಟಿ ನಿಟ್ಟೆ ಮಿತ್ತೆರ್ಮೆಡ್ ಇತ್ತೆರ್.ಮುಲ್ಕಿ ರೋಟರಿದ ಗುರ್ಕಾರ್ಲು ಅಶೋಕ್ ಕುಮಾರ್ ಶೆಟ್ಟಿ ಮಾತೆರೆನ್ಲ ಎದ್ಕೊಂಡೆರ್. ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ ದ ಗುರ್ಕಾರ್ಲು ಸಂತೋಷ್ ದೇವಾಡಿಗ ಸೊಲ್ಮೆ ಸಂದಾಯೆರ್.
ನೆರ್ದ್ ದುಂಬು ತೋಕೂರುದ ಜೋಕುಲೆರ್ದ್ ತುಳು ಜಾನಪದ್ ನೃತ್ಯ ನಡತ್ಂಡ್.

ಯಕ್ಷ ಕವಿ, ಛಂದೋ ಬ್ರಹ್ಮ ಗಣೇಶ್ ಕೊಲಕಾಡಿ ಮೆರೆಗ್ ಬಿರುವೆರ್ ಕುಡ್ಲ ಮುಲ್ಕಿ ಘಟಕೊರ್ದು ಮಾನಾದಿಗೆ

ಮುಲ್ಕಿದ ಬಿರುವೆರ್ ಕುಡ್ಲ ಸದಸ್ಯೆರ್ ಯಕ್ಷ ಕವಿ, ಛಂದೋಬ್ರಹ್ಮ, ದಕ ಜಿಲ್ಲೆದ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಗಣೇಶ್ ಕೊಲಕಾಡಿ ಮೆರೆಗ್ ಮಾನಾದಿಗೆ ಮಲ್ತೆರ್.ಅಂಚೆನೇ ಬಿರುವೆರೆ ಕುಡ್ಲದ ೩೪ನೇ ಸೇವಾ ಯೋಜನೆನ್ಲಾ ಗಣೇಶ್ ಕೊಲಕಾಡಿ ಮೆರೆಗ್ ಸಂದೈತ ಮಲ್ತೆರ್.

ಬಿರುವೆರ್ ಕುಡ್ಲ ಮುಲ್ಕಿದ ಗುರ್ಕಾರ್ಲು ಕಿಶೋರ್ ಸಾಲ್ಯಾನ್ ಲೇಸ್ ದ ಗುರ್ಕಾರ್ಮೆ ವೈಸೊಂಡೆರ್.
ಮಲ್ಲ ಬಿನ್ನೆರಾದ್ ಕರ್ನಾಟಕ ರಾಜ್ಯೋತ್ಸವ ಪ್ರಶಸ್ತಿ ಪಡೆಯಿನ ಚಂದ್ರಶೇಖರ ಸುವರ್ಣ ಬತ್ತಿತ್ತೆರ್.ಮಿತ್ತರ್ಮೆಡ್ ಮುಲ್ಕಿ ವಿಜಯಾ ರೈತರ ಸೇವಾ ಸಹಕಾರಿ ಸಂಘದ ಗುರ್ಕಾರ್ಲು ರಂಗನಾಥ ಶೆಟ್ಟಿ,ಕೊಲೆಕಾಡಿ ಛಂದೋಬ್ರಹ್ಮ ಟ್ರಸ್ಟ್ ದ ಮಲ್ಲ ಗುರ್ಕಾರ್ಲು ಸದಾಶಿವ ಶೆಟ್ಟಿಗಾರ್ , ಪದುಕೆರಾಯಿನ ಧನಂಜಯ ಕೊಯಿಲ, ಹರಿರಾಜ ಶೆಟ್ಟಿಗಾರ್, ಗುರುರಾಜ ಉಪಾಧ್ಯಾಯ ಎರ್,ಪಂಚಾಯತ್ ಮಾಜಿ ಸದಸ್ಯೆರ್ ಪ್ರಾಣೇಶ್ ಹೆಜಮಾಡಿ, ಬಿರುವೆರ್ ಕುಡ್ಲ ಮುಲ್ಕಿದ ಕಾರ್ಯಂತೆರ್ ಸತೀಶ್ ಕಿಲ್ಪಾಡಿ, ಒತ್ತು ಕಾರ್ಯಂತೆರ್ ರಿತೇಶ್ ಅಂಚನ್, ರಕ್ಷಿತ್ ಕೊಳಚಿಕಂಬಳ,ಸಂಘಟನಾ ಕಾರ್ಯಂತೆರ್ ರಮಾನಾಥ ಸುವರ್ಣ, ಸಲಹೆಗಾರೆರ್ ಉಮೇಶ್ ಮಾನಂಪಾಡಿ, ಗ್ರಾಮ ಸಂಚಾಲಕೆರ್ ಜಗದೀಶ್ ಕಕ್ವಾ, ಮಾಧವ ಪೂಜಾರಿ ಕಿಲ್ಪಾಡಿ, ಕಿಶೋರ್ ಅಂಚನ್, ಬಿರುವೆರ್ ಕುಡ್ಲದ ಸದಸ್ಯೆರ್ ಬೊಕ್ಕ ಅಭಿಮಾನಿಲು ಇತ್ತೆರ್.
ಕಿಶೋರ್ ಸಾಲ್ಯಾನ್ ಬಪ್ಪನಾಡು ಮಾತೆರೆನ್ಲ ಎದ್ಕೊನಿಯೆರ್. ರಿತೇಶ್ ಅಂಚನ್ ಮಾನಾದಿಗೆ ಪತ್ರ ಓದು ಪಂಡೆರ್. ಸತೀಶ್ ಕಿಲ್ಪಾಡಿ ಲೇಸ್ ನಡಪಾದ್ ಕೊರಿಯೆರ್.