ರಾಷ್ಟ್ರಪ್ರಶಸ್ತಿ ವಿಜೇತ ಪುರಸ್ಕೃತ ತಂಡ ಶಾಂಭವಿ ಕಲಾವಿದೆರ್ ಸಾಣೂರು ಕಾರ್ಲ ಮೊಕ್ಲೆನ ಈ ವರ್ಷದ ನೂತನ ಕಲಾ ಕಾಣಿಕೆ “ಅಪ್ಪೆ ಶಾರದೆ” ತುಳು ಸಾಮಾಜಿಕ ಹಾಸ್ಯಮಯ ನಾಟಕ ನೆತ್ತ ಶುಭಮುಹೂರ್ತ ಸಮಾರಂಭ ಅ.20 ದಾನಿ ಬೆದ್ರದ ಸಮಾಜ ಮಂದಿರಡ್ ನಡಪೆರೆ ಉಂಡು. ಅಂಚನೆ ಅವ್ವೇ ದಿನ 7.30 ಕ್ಕ್ ಸಾಂಸ್ಕೃತಿಕ ಕಾರ್ಯಕ್ರಮ ಬೊಕ್ಕ ತುಳು ಸಾಮಾಜಿಕ ಹಾಸ್ಯಮಯ ನಾಟಕ ನಡಪೆರೆ ಉಂಡು ಪಂದ್ ಪ್ರಕಟನೆಡ್ ತೆರಿಪಾದೆರ್.
ಶಿವಧ್ವಜ್ ಶೆಟ್ಟಿ ಕಥೆ, ಚಿತ್ರಕಥೆ, ನಿರ್ದೇಶನದ ಕೊರಮ್ಮ ತುಳು ಪಿಕ್ಚರ್ ಇನಿ (ಅ.18) ಬಯ್ಯಗ್ ಮೈಸೂರ್ ದಸರಾ ಫಿಲ್ಮ್ ಫೆಸ್ಟಿವಲ್ ಡ್ ಪ್ರದರ್ಶನ ಆಪುಂಡು.
ಈ ಪಿಕ್ಚರ್ ಗ್ ಈಶ್ವರಿದಾಸ್ ಶೆಟ್ಟಿ, ರಾಜೇಶ್ವರಿ ರೈ ನಿರ್ಮಾಪಕೆರಾತೆರ್. ಕ್ಯಾಮರ ಮ್ಯಾನ್ ಸುರೇಶ್ ಬೈರಸಂದ್ರ, ಸಂಗೀತ ಶಿನೋಯ್ ವಿ ಜೋಸೆಫ್, ಸಂಕಲನ ಗಣೇಶ್ ನೀರ್ಚಾಲ್, ಸಂಭಾಷಣೆ ಶ್ರೀನಿಧಿ ಡಿ.ಎಸ್, ಅನುವಾದ ಬೊಕ್ಕ ಸಾಹಿತ್ಯ ಕೆ. ಮಹೇಂದ್ರನಾಥ್ ಸಾಲೆತ್ತೂರ್, ಕಲೆ ಸಂತೋಷ್ ಪೂಜಾರಿ ವೇಣೂರ್, ಸಹ ನಿರ್ದೇಶನ ಹರ್ಸಿವ್ ಭಗೀರ, ಪ್ರಸಾದನ ಕುಮಾರ್ ನೊಣವಿನಕೆರೆ, ನಿರ್ಮಾಣ, ನಿರ್ವಹಣೆ ವೀರೇಶ್ ಎಸ್ ಎ, ಕಲೆ ಪರಿಕಾರಲು ಸುಧಾಕರ ಶೆಟ್ಟಿ, ಪ್ರಚಾರ ವಿನ್ಯಾಸ ಯಶ್ವಿನ್ ಕೆ. ಶೆಟ್ಟಿಗಾರ್ ಮಲ್ದೆರ್.
ಬೊಲ್ತೇರ್ ವೀರಕೇಸರಿ ಸಂಘಟನೆದ ಮುತಾಲಿಕೆಡ್ ಅಪ್ಪೆ ಮಗೆ ರಡ್ಡೇ ಜನ ಇಪ್ಪುನ ಹರೀಶ್ ಪನ್ಪುನಾರೆನ ಕುಟುಂಬಗ್ 175ನೇ ಯೋಜನೆ, 7ನೇ ಆಸರೆ ಮುಖೇನ ಇಲ್ಲದ ಭೂಮಿ ಪೂಜೆ ಅ.15 ಐತಾರ ಶಿರ್ತಾಡಿ ವಿದ್ಯಾನಗರ ಮಕ್ಕಿಡ್ ನಡತ್ಂಡ್.
ಈ ಪೊರ್ತುಡು ವಿಧಾನ ಸಭೆ ಸದಸ್ಯೆರ್ ಪ್ರತಾಪ್ ಸಿಂಹ ನಾಯಕ್, ಭಾರತೀಯ ಜನತಾ ಪಕ್ಷ ಬೊಲ್ತೇರ್ ಮಂಡಲದ ಗುರ್ಕಾರೆ ಜಯಂತ್ ಕೋಟ್ಯಾನ್, ಭಾರತೀಯ ಭೂ ಸೇನೆದ ಮಾಜಿ ಸೈನಿಕೆರ್ ವೆಂಕಟ್ರಮಣ ಶರ್ಮಾ ಗುರುವಾಯನಕೆರೆ, ಶ್ರೀ ದುರ್ಗಾ ಪರಮೇಶ್ವರಿ ಅಮ್ಮನ ಕ್ಷೇತ್ರ ನೆಲ್ಲಿಂಗೇರಿ ಪೆರಾಡಿದ ಶಶಿಕಲಾ, ಅಧ್ಯಾ ಫೌಂಡೇಶನ್ ಪಡ್ಡೆದ್ರ ಸ್ಥಾಪಕಧ್ಯಕ್ಷೆರ್ ರಾಕೇಶ್ ಅಜಿಲ, ಕನ್ಯಾಡಿ ಸಮಾಜ ಸೇವಕೆರ್ ಪ್ರಭಾಕರ್ ಸಿ.ಜಿ, ಕುಡ್ಲ ಹಿಂದೂ ಜಾಗರಣೆ ವೇದಿಕೆದ ಜಿಲ್ಲಾ ಕಾರ್ಯಕಾರಿಣಿ ಪ್ರಮುಖೆರ್ ಗಣೇಶ್ ಕುಲಾಲ್ ಕೆದಿಲ, ಮಧುಗಿರಿ ತುಮಕೂರು ಜಿಲ್ಲೆದ ಲೆಕ್ಕ ಪರಿಶೋಧಕೆರ್, ತೆರಿಗೆ ಸಲಹೆಗಾರೆರ್ ಕೃಷ್ಣ ಮೂರ್ತಿ, ಆಮಂತ್ರಣ ಪರಿವಾರ ಸ್ಥಾಪಕಧ್ಯಕ್ಷೆರ್ ವಿಜಯ್ ಕುಮಾರ್ ಜೈನ್, ಭಗವತಿ ಗ್ರೂಪ್ ಪಡ್ಡೆದ್ರದ ಯುವರಾಜ್ ಕುಲಾಲ್, ಉಜಿರೆ ಶಾರದಾ ಶೋರೂಂದ ಹುಕಾರಾಂ, ವೀರ ಕೇಸರಿ ಬೊಲ್ತೇರ್ ದ ಸಂಚಾಲಕೆರ್ ಸತೀಶ್ ಶೆಟ್ಟಿ, ಸಂಘಟಕೆರ್ ಪದ್ಮನಾಭ ಪೂಜಾರಿ ಬೊಕ್ಕ ಸದಸ್ಯೆರ್ ಪಾಲ್ ಪಡೆದಿತ್ತೆರ್.
ವಿಟ್ಲ : ಶ್ರೀ ಭಗವತೀ ಸನ್ನಿಧಿಡ್ ನವರಾತ್ರಿ ವಿಶೇಷ ಪೂಜೆ ಅ.15 ರ್ದ್ ಅ.23 ಮುಟ್ಟ ನಡಪೆರೆ ಉಂಡು. ಅ.20 ದಾನಿ ರಾತ್ರೆ ದುರ್ಗಾಪೂಜೆ ನಡಪೆರೆ ಉಂಡು. ಈ ಪುಣ್ಯ ಕಾರ್ಯಡ್ ಮಾತ ಭಕ್ತೆರ್ ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆದ್ ದೇವೆರ್ನ ಗಂಧ ಪ್ರಸಾದನ್ ಸ್ವೀಕಾರ ಮಲ್ತ್, ಶ್ರೀ ದೇವಿನ ಅನುಗ್ರಹಗ್ ಪಾತ್ರರಾವೊಡು ಪಂದ್ ಆಡಳಿತ ಮಂಡಳಿದಕುಲ್ ಲೆಪ್ಪೋಲೆಡ್ ತೆರಿಪಾದೆರ್.
ಮಣಿಪಾಲ: ಪರ್ಕಳ ರಾಷ್ಟ್ರೀಯ ಹೆದ್ದಾರಿದ ಡಿವೈಡರ್ದ ಕೈತಲ್ ನಡತ್ತ್ನ ಆಕ್ಸಿಡೆಂಟ್ಡ್ ಬೈಕ್ ಸವಾರೆ ಒರಿ ಜಾಗಡೆ ತೀರ್ಪೋಯಿನ ಘಟನೆ ವರದಿ ಆತ್ಂಡ್. ಹಿರಿಯಡ್ಕದ ನಿವಾಸಿ ಅಕ್ಷಯ ಭಟ್ (26) ತೀರ್ಪೋಯಿನ ಜವನೆ. ಇಂದ್ರಾಳಿದ ದೇವಸ್ಥಾನಡ್ ನವರಾತ್ರಿದ ಸಾರ್ವಜನಿಕ ಅನ್ನಸಂತರ್ಪಣೆ ಅಡಿಗೆ ಕೆಲಸ ಮಲ್ಪೆರೆ ಇಲ್ಲರ್ದ್ ಬನ್ನಗ ಈ ಘಟನೆ ನಡತ್ಂಡ್. ಮಣಿಪಾಲ ಪೊಲೀಸ್ ಠಾಣೆದ ಪೊಲೀಸೆರ್ ಜಾಗೆಗ್ ಬತ್ತ್ದ್ ಪರಿಶೀಲನೆ ಮಲ್ತ್ದೆರ್.
ಬೋಲ್ತೆರ್: ಮುಗ್ಗ ಗುತ್ತು ಕುಟುಂಬಸ್ಥರ ಟ್ರಸ್ಟ್ ಬೋಲ್ತೆರ್ ನೆತ್ತ ಮಹಾಸಭೆ ಇಂಚಿಪಗ್ ಮುಗ್ಗ ಗುತ್ತು ಇಲ್ಲಲ್ ನಡತ್ಂಡ್.
ಆಡಳಿತ ಮೊಕ್ತೇಸರೆರಾದ್ ಮಾಜಿ ಶಾಸಕೆರ್ ಕೆ.ವಸಂತ ಬಂಗೇರ, ಅಧ್ಯಕ್ಷೆರಾದ್ ವಿಧಾನ ಪರಿಷತ್ ಶಾಸಕೆರ್ ಕೆ.ಹರೀಶ್ ಕುಮಾರ್, ಕಾರ್ಯದರ್ಶಿಯಾದ್ ನೋಟರಿ ವಕೀಲ ಭಗೀರಥ ಜಿ., ಉಪಾಧ್ಯಕ್ಷೆರಾದ್ ಜಗನ್ನಾಥ ಬಂಗೇರ ನಿರ್ಮಾಲು, ಜೊತೆ ಕಾರ್ಯದರ್ಶಿ ಸೋಮನಾಥ ಬಂಗೇರ ವರ್ಪಾಳೆ, ಕೋಶಾಧಿಕಾರಿ ಶೇಖರ ಬಂಗೇರ ಹೇರಾಜೆ ಆಯ್ಕೆ ಆಯೆರ್. ಟ್ರಸ್ಟ್ ಸದಸ್ಯೆರಾದ್ ಪದ್ಮನಾಭ ಪಾದೆ, ನವೀನ್ ಚಂದ್ರ ಕುವೆತ್ಯಾರು, ಚಂದ್ರಶೇಖರ್ ವಕೀಲೆರ್, ದಿನೇಶ್ ಪೆದಮಲೆ, ತುಕಾರಾಮ ಬಂಗೇರ ಎಂ., ಗಿರಿಜಾ ಕೊಂಗುಜೆ, ಲಲಿತ ಕುರ್ತೋಡಿ, ಜಾನಕಿ, ಹೇಮಾ ದಾಮೋದರ ಮೊಕ್ಲೆನ್ ನೇಮಕ ಮಲ್ತೆರ್.
ಬೋಲ್ತೆರ್: ಭಾರತೀಯ ಜನತಾ ಪಕ್ಷ ಬೋಲ್ತೆರ್ ಮಂಡಲದ ವತಿರ್ದ್ ಕರ್ನಾಟಕ ಸರಕಾರದ ಜನ ವಿರೋಧಿ ಆಡಳಿತದ ವಿರುದ್ಧ ಅ.18 ದಾನಿ ಮಿನಿ ವಿಧಾನ ಸೌಧದ ಎದುರು ಬೃಹತ್ ಪ್ರತಿಭಟನೆ ನಡಪಾದ್ ರಾಜ್ಯದ ಕಾಂಗ್ರೆಸ್ ನೇತೃತ್ವದ ಸರಕಾರ ಭಾರಿ ಭ್ರಷ್ಟಚಾರ ಮಲ್ತೊಂದು ಉಂಡು, ಸಚಿವೆರ್ನ ಆಪ್ತ ಗುತ್ತಿಗೆದಾರೆರ್ನ ಇಲ್ಲಲ್ 42 ಕೋಟಿ ಒವ್ವೇ ದಾಖಲೆ ಇಜ್ಜಂದೆ ಪತ್ತೆ ಆತ್ಂಡ್. ಉಂದು ಸರಕಾರ ಕಮಿಷನ್ ರೂಪಡ್ ದೆತೊಂದು ಇಪ್ಪುನ ಪನವು, ಈ ಬಗ್ಗೆ ಸೂಕ್ತ ತನಿಖೆ ಮಲ್ತ್ದ್ ಸರಕಾರದ ವಿರುದ್ದ ಕ್ರಮ ದೆತೊನೊಡು ಪಂದ್ ಬೋಲ್ತೆರ್ ತಹಶೀಲ್ದಾರ್ ಮೂಲಕ ರಾಜ್ಯಪಾಲೆರೆಗ್ ಮನವಿ ಕೊರಿಯೆರ್.
ಈ ಪೊರ್ತುಡು ವಿಧಾನ ಪರಿಷತ್ ಶಾಸಕೆರ್ ಪ್ರತಾಪಸಿಂಹ ನಾಯಕ್ ಬೊಕ್ಕ ಬಿಜೆಪಿ ಜಿಲ್ಲಾ ಮುಖಂಡೆರ್ ಹರಿಕೃಷ್ಣ ಬಂಟ್ವಾಳ, ಮಂಡಲ ಅಧ್ಯಕ್ಷೆರ್ ಜಯಂತ ಕೋಟ್ಯಾನ್, ಮಂಡಲದ ಪ್ರಧಾನ ಕಾರ್ಯದರ್ಶಿ ಶ್ರೀನಿವಾಸ ರಾವ್ ಧರ್ಮಸ್ಥಳ, ಗಣೇಶ್ ಗೌಡ ನಾವೂರು, ಪಕ್ಷದ ಪ್ರಮುಖೆರ್ ಗ್ರಾ.ಪಂ ಅಧ್ಯಕ್ಷೆರ್, ಸದಸ್ಯೆರ್, ಕಾರ್ಯಕರ್ತೆರ್ ಇತ್ತೆರ್.
ಕುಡ್ಲ: ರಾಜ್ಯಡ್ ಪಡಿತರ ಚೀಟಿ ತಿದ್ದುಪಡಿಗ್ ಕೊರ್ನ ಗಡುವ್ನ್ ವಿಸ್ತರಣೆ ಮಲ್ತ್ದೆರ್. ದ.ಕ. ಜಿಲ್ಲೆಡ್ ಈ ಅವಧಿ ಅ.19ರ್ದ್ ಅ.21 ಮುಟ್ಟ ಉಂಡು ಪಂದ್ ಜಿಲ್ಲಾ ಆಹಾರ ಬೊಕ್ಕ ನಾಗರಿಕ ಸರಬರಾಜು ಇಲಾಖೆದ ಅಧಿಕಾರಿಲು ಮಾಹಿತಿ ಕೊರ್ತೆರ್. ಸರ್ವರ್ ಸಮಸ್ಯೆ ಇತ್ತಿನ ಕೆಲವು ಜಿಲ್ಲೆಡ್ ಈ ತಿದ್ದುಪಡಿ ವಿಸ್ತರಣೆಗ್ ಅವಕಾಶ ಕೊರ್ತೆರ್. ತಿದ್ದುಪಡಿ ಪೊರ್ತುಡು ತೀರ್ಪೋಯಿನಕ್ಲೆನ ಪುದರ್ ದೆಪ್ಪೆರೆ ಬೊಕ್ಕ ಮದಿಮೆ ಆದ್ ಬತ್ತಿನಕ್ಲೆನ ಪುದರ್ ಸೇರ್ಪಾವೆರೆ ಅವಕಾಶ ಉಂಡು. ಸೂಕ್ತ ದಾಖಲೆದೊಟ್ಟಿಗೆ ವಿಳಾಸ ಸೇರಿನಂಚ ಈ ತಿದ್ದುಪಡಿನ್ ಮಲ್ಪೊಲಿ. ಆಂಡ ಪೊಸ ಪಡಿತರ ಚೀಟಿಗ್ ಸದ್ಯ ರಾಜ್ಯರ್ದ್ ಅವಕಾಶ ತಿಕ್ಕಿಜಿ ಪಂದ್ ಅಧಿಕಾರಿಲು ತೆರಿಪಾದೆರ್.
ಕುಡ್ಲ ವೈಭವದ ಮಾರ್ನೆಮಿದ ರಂಗ್ ನ್ ನನಾತ್ ಎಚ್ಚ ಮಲ್ಪೆರೆ ಸೌತ್ ಕೆನರಾ ಫೊಟೋಗ್ರಾಫರ್ಸ್ ಅಸೋಸಿಯೇಷನ್ ಕುಡ್ಲ ವಲಯದ ಮುತಾಲಿಕೆಡ್ ಕುದ್ರೋಳಿ ಶ್ರೀ ಗೋಕರ್ಣನಾಥ ಕ್ಷೇತ್ರದ ಸಹಯೋಗಡ್ “ಮಂಗಳೂರು ದಸರಾ ವೈಭವ” ಶೀರ್ಷಿಕೆಡ್ ಆಯೋಜಿಸಾಯಿನ ರಾಜ್ಯ ಮಟ್ಟದ ಪೊಟೋಗ್ರಫಿ ಬೊಕ್ಕ ವಿಡಿಯೋಗ್ರಫಿ ಸ್ಪರ್ಧೆದ ಪೋಸ್ಟರ್ ಬುಡುಗಡೆ ಶ್ರೀ ಕ್ಷೇತ್ರ ಕುದ್ರೋಳಿ ದೇವಸ್ಥಾನದ ಸಾಂಸ್ಕ್ರತಿಕ ವೇದಿಕೆಡ್ ಅ.17 ದಾನಿ ನಡತ್ಂಡ್.
ಶ್ರೀ ಕ್ಷೇತ್ರದ ಕೋಶಾಧಿಕಾರಿ ಪದ್ಮರಾಜ್ ಆರ್. ಪಾತೆರ್ದ್, ಉಂದೊಂಜಿ ವಿಭಿನ್ನ ಕಾರ್ಯಕ್ರಮ. ನೆಟ್ಟ್ ಛಾಯಾಗ್ರಾಕೆರ್ ಬೊಕ್ಕ ವೀಡಿಯೋ ಗ್ರಾಫರ್ ಎಚ್ಚಿನ ಸಂಖ್ಯೆಡ್ ಪಾಲ್ ಪಡೆದ್ ಸ್ಪರ್ಧಾ ಕಾರ್ಯಕ್ರಮನ್ ಯಶಸ್ವಿಗೊಳಿಸಾದ್ ಕುಡ್ಲ ದಸರಾ ವೈಭವದ ರಂಗ್ನ್ ನನಾತ್ ಎಚ್ಚ ಮಲ್ಪೊಡು ಪಂದ್ ಪಂಡೆರ್. ಕುದ್ರೋಳಿ ದೇವಸ್ಥಾನದ ಟ್ರಸ್ಟಿ ರವಿ ಶಂಕರ್ ಮಿಜಾರ್, ದೇವಸ್ಥಾನ ಅಭಿವೃದ್ಧಿ ಸಮಿತಿ ಅಧ್ಯಕ್ಷೆರ್ ದೇವೆಂದ್ರ ಪೂಜಾರಿ, ಎಸ್.ಕೆ.ಪಿ.ಎ ಮಂಗಳೂರು ವಲಯದ ಅಧ್ಯಕ್ಷ ಹರೀಶ್ ಅಡ್ಯಾರ್, ಕಾರ್ಯದರ್ಶಿ ಅಜಯ್ ಕುಮಾರ್, ಕೋಶಾಧಿಕಾರಿ ಅರ್ಜುನ್ ಆರ್., ಗೌರವಾಧ್ಯಕ್ಷೆರ್ ಪದ್ಮನಾಭ್ ಸುವರ್ಣ, ಜಿಲ್ಲಾ ಉಪಾಧ್ಯಕ್ಷೆರ್ ರಮೇಶ್ ಕಲಾಶ್ರೀ, ಸಲಹಾ ಸಮಿತಿ ಸಂಚಾಲಕೆರ್ ಕರುಣಾಕರ್ ಕಾನಂಗಿ, ಮಾಜಿ ಸಂಚಾಲಕೆರ್ ವಿಠ್ಠಲ ಚೌಟ, ಮಾಜಿ ಜಿಲ್ಲಾಧ್ಯಕ್ಷೆರ್ ಲೋಕೇಶ್, ಮನೋಹರ್ ಸೋನ್ಸ್, ಉಪಾಧ್ಯಕ್ಷೆರ್ ಶ್ರೀಕಾಂತ್ ತಿಲಕ್, ಪ್ರಭಾಕರ್, ಮಾಜಿ ಗೌರವಾಧ್ಯಕ್ಷೆರ್ ವಸಂತ್ ರಾವ್ ಇತ್ತೆರ್.
ಸಂಸದೆರ್ ನಳಿನ್ ಕುಮಾರ್ ಕಟೀಲ್ ಮೆರೆನ ಮಾರ್ಗದರ್ಶನ ಬೊಕ್ಕ ಶಾಸಕೆರ್ ಡಿ.ವೇದವ್ಯಾಸ್ ಕಾಮತ್ ಮೆರೆನ ಮುತಾಲಿಕೆಡ್ ಕುಡ್ಲದ ಪಿಲಿಪರ್ಬನ್ ಕರಿನ ವರ್ಷ ಗೌಜಿಡ್ ಆಯೋಜನೆ ಮಲ್ತ್ ದ್ ಇತ್ಂಡ್. ಅಂಚೆನೆ ಈ ವರ್ಷಲ ಕುಡ್ಲದ ಪಿಲಿಪರ್ಬ-2023 ತ್ತ ಪಿಲಿಏಸ ಪಂತೊ ಅ.21 ಸನಿಯಾರ ಜಿಲ್ಲೆದ ಕೇಂದ್ರ ಮೈದಾನಡ್ ಬೊಲ್ಪುಗು 10 ಗಂಟೆಗ್ ಗೌಜಿಡ್ ನಡಪರೆ ಉಂಡು.
ಕೇಂದ್ರ ಮೈದಾನದ ಚಾವಡಿಡ್, ಜಿಲ್ಲೆದ ತೀರ್ಪುಗಾರೆರೆನ ಸಮ್ಮುಖಡ್, ತುಳುನಾಡ್ ದ ಪುಗರ್ತೆದ 15 ಪಿಲಿಏಸ ಕೂಟದಕುಲು ಪಂತೊಡು ಪಾಲ್ ಪಡೆಪೆರ್. ಈ ಲೇಸ್ ಡ್ ಪಾಲ್ ಪಡೆಯೆರೆ ಜೋಕುಲೆರ್ದ್ ಮಲ್ಲ ಅಕ್ಲೆನ ಮುಟ್ಟ ಪ್ರತಿಯೊರಿ ಕಲಾಪ್ರೇಮಿಗ್ಲಾ ಅವಕಾಶ ಉಂಡು.
ಪಿಲಿಪರ್ಬಡ್ ಪಾಲ್ ಪಡೆಪಿನ ಪಿಲಿಏಸ ಕೂಟ ಮೆರವಣಿಗೆದ ಮುಖೇನ ಚಾವಡಿಗ್ ಬರ್ಪುಂಡು. 20 ನಿಮಿಷದ ಪ್ರದರ್ಶನ ಕೊರ್ಪುಂಡು. ಪ್ರತಿ ಕೂಟ 38 ಕೆ.ಜಿ ತೂಕದ ಅರಿತ್ತ ಮುಡಿನ್ ರಾಪಾವುನೇ ಕಡ್ಡಾಯ ಆತ್ಂಡ್. ಕಪ್ಪುಪಿಲಿ, ಕಿನ್ನಿಪಿಲಿ, ಹಿಮ್ಮೇಳ, ಧರಣಿ ಮಂಡಲ ಇಂಚ ಇಡೀ ಕೂಟ ವೈವಿಧ್ಯತೆರ್ದ್ ಇಪ್ಪುಂಡು.
ಪಂತೊ ನಡಪುನ ಮೈದಾನಡ್ 5 ಸಾರ ಜನ ಕುಲ್ಲುದು ತೂಪುನ ಗ್ಯಾಲರಿ ನಿರ್ಮಾಣ ಆತ್ಂಡ್. ಅಲ್ಪ ಮಲ್ಲ ಪರದೆದ ವ್ಯವಸ್ಥೆನ್ ಮಲ್ದೆರ್. ಲೇಸ್ ಗ್ ಬರಿಯೆರೆ ಆವಂದಿನ ಹಿರಿಯೆರೆಗ್ ಬೊಕ್ಕ ಜೋಕುಲೆಗ್ ಇಲ್ಲಲ್ ಕುಲ್ಲುದು ಲೇಸ್ ತೂಯೆರೆ ಸೀದಾ ಪ್ರಸಾರದ ವ್ಯವಸ್ಥೆ ಮಲ್ದೆರ್. ಗಾಡಿಲೆಗ್ ಮೈದಾನಡ್ ಪಾರ್ಕಿಂಗ್ ವ್ಯವಸ್ಥೆ ಉಂಡು. ಬೊಕ್ಕ ಲೇಸ್ ಗ್ ಬರ್ಪುನ ಬಿನ್ನೆರೆಗ್, ದಾನಿಲೆನ್ ಇಸೇಸ ಆಸನದ ವ್ಯವಸ್ಥೆ ಉಂಡು.
ಪಂತೊಡು ಪಾಲ್ ಪಡೆಪುನ 15 ಪಿಲಿಏಸ ಕೂಟಲು:
1.ಶಿವಶಕ್ತಿ ಟೈಗರ್ಸ್ ಕುಂಜತ್ತೂರು ಮಂಜೇಶ್ವರ
2.ವಿಶಾಲ್ ಕ್ರಿಕೆಟರ್ಸ್ ಕೋಡಿಕಲ್
3. ಪಾಂಡೇಶ್ವರ ಶಾರದಾ ಹುಲಿ, ಪಾಂಡೇಶ್ವರ
4. ಜೈ ಹಿಂದ್ ಫ್ರೆಂಡ್ಸ್, ಮಂಕಿ ಸ್ಟ್ಯಾಂಡ್
5. ವಿಸಿಎಸ್, ಮೂಡುಶೆಡ್ಡೆ (ವಿಷ್ಣು ಪಿಲಿಕುಲು)
6. ನಂದಿಗುಡ್ಡ ಫ್ರೆಂಡ್ಸ್ ಬಾಬು ಗುಡ್ಡ
7. ಮುಳಿಹಿತ್ಲು ಫ್ರೆಂಡ್ಸ್ ಸರ್ಕಲ್ ಜಗದಂಬಾ ಹುಲಿ
8. ಅಶೋಕ್ ರಾಜ್ ಟೀಮ್ ಕಾಡಬೆಟ್ಟು ಒಡಿಪು
9. ಎಸ್ ಎಫ್ ಸಿ ಸೋಮೇಶ್ವರ
10. ಎಸ್ ಕೆ ಬಿ ಟೈಗರ್ಸ್ ಕುಂಪಲ
11. ಪುರಲ್ದಪ್ಪೆನ ಮೋಕೆದ ಬೊಲ್ಲಿಲು ಪೊಳಲಿ ಟೈಗರ್ಸ್
12. ಮಂಗಳೂರ್ ಫ್ರೆಂಡ್ಸ್ ಟೈಗರ್ಸ್ ಮುಳಿಹಿತ್ಲು
13. ಯಂಗ್ ಬಾಯ್ಸ್ ಮುಳಿಹಿತ್ಲು ಮಂಗಳಾದೇವಿ ಹುಲಿ
14. ಶ್ರೀ ಭದ್ರಕಾಳಿ ಟೈಗರ್ಸ್ ಕುಡ್ಲ
15. ಟೀಮ್ ಕಲ್ಲೇಗ ಟೈಗರ್ಸ್ ಪುತ್ತೂರು
ಅಂಚೆನೆ ಈ ಪಂತೊಡು ಕಲಾಪ್ರೇಮಿಲು ಕುಟುಂಬ ಸಮೇತೆರಾದ್ ಬತ್ತ್ ದ್, ದಸರಾ ಗೌಜಿದೊಟ್ಟಿಗೆ ಪಿಲಿಪರ್ಬದ ಪಿಲಿಏಸ ಪಂತೊನು ತೂವೊಡು ಪಂದ್ ಕುಡ್ಲ ಸಾಂಸ್ಕೃತಿಕ ಪ್ರತಿಷ್ಠಾನ ತೆರಿಪಾದ್ಂಡ್.
ಪತ್ರಿಕಾಗೋಷ್ಠಿಡ್ ಕುಡ್ಲ ಸಾಂಸ್ಕೃತಿಕ ಪ್ರತಿಷ್ಠಾನದ ಮಾನಾದಿಗೆದ ಗುರ್ಕಾರೆ ಗಿರಿಧರ್ ಶೆಟ್ಟಿ, ಗುರ್ಕಾರೆ ದಿವಾಕರ್ ಪಾಂಡೇಶ್ವರ್, ಚೇತನ್ ಕಾಮತ್, ಕಿರಣ್ ಶೆಣೈ, ಸೂರಜ್ ಕಾಮತ್, ಜಗದೀಶ್ ಕದ್ರಿ, ಲಲಿತ್ ರಾಜ್ ಮೆಂಡನ್, ಉದಯ್ ಪೂಜಾರಿ, ಅಶ್ವಿತ್ ಕೊಟ್ಟಾರಿ ಪಾಲ್ ಪಡೆದಿತ್ತೆರ್.
