ಕಾರ್ಲ ಶ್ರೀ ರಾಮ ಮಂದಿರಡ್ ಅ.15-24 ಮುಟ್ಟ ಮಾರ್ನೆಮಿ ಉಚ್ಚಯ ನಡಪರೆ ಉಂಡು.
ಅಂಚೆನೆ ಪ್ರತಿದಿನೊಲ ಬಯ್ಯಗ್ ಭಜನೆ, ಶ್ರೀ ರಾಮ ಪರಿವಾರ ದೇವೆರೆಗ್ ಮಹಾಪೂಜೆ ಬೊಕ್ಕ ಪ್ರಸಾದ ಪಟ್ಟುನ ಲೇಸ್ ನಡಪರೆ ಉಂಡು. ಈ ಲೇಸ್ ಡ್ ಭಕ್ತಾದಿಲು ಎಚ್ಚದ ಸಂಖ್ಯೆಡ್ ಪಾಲ್ ಪಡೆದ್ ಶ್ರೀ ರಾಮ ಪರಿವಾರ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಕಾರ್ಲ ಶ್ರೀ ರಾಮ ಮಂದಿರದ ಗುರ್ಕಾರೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಕುಡ್ಲ ಪೇಂಟೆದ ಸೋಮೇಶ್ವರದ ಶ್ರೀ ಸೋಮೇಶ್ವರ ದೇವಲ್ಯಡ್ ಆಳುಪ ಅರಸೆರ್ ಸುರುತ್ತ ಕುಲಶೇಖರ ಆಳುಪೇಂದ್ರನ ಮರಣ ಶಾಸನ ಪತ್ತೆ ಆತ್ಂಡ್ ಪಂದ್ ತುಳುನಾಡ್ ದ ಪಿರಾಕ್ ದ ವಿದ್ವಾಂಸೆರ್ ಪ್ರೊ.ಟಿ. ಮುರುಗೇಶಿ ತೆರಿಪಾದೆರ್.
ಆಯತಾಕಾರದ ಶಿಲೆತ್ತ ಮಿತ್ತ್ ರಡ್ಡ್ ಆಕರ್ಷಕ ಚಿತ್ರಪಟ್ಟಿಕೆಲು ಉಂಡು. ನೆತ್ತ ಪಟ್ಟಿದ ಮಿತ್ತ್ ಶಾಸನದ ಸುರುತ್ತ ಸಾಲ್ ನ್ ಬರೆತೆರ್. ಬೊಕ್ಕ ಚಿತ್ರಪಟ್ಟಿದ ತಿರ್ತ್ 11 ಸಾಲ್ ದ ಶಾಸನ್ ಬರೆತೆರ್. ಶಾಸನದ ಸುರುತ್ತ ಸಾಲ್ ಡ್ ಸೋಮೇಶ್ವರ ದೇವಲ್ಯದ ಸೋಮೇಶ್ವರನ್ ಸೋಮಪ್ರಭು ಮುಲ್ಪ ಉಲ್ಲೆರ್ ಪಂದ್ ಬರೆತೆರ್.
ಬೊಕ್ಕ ಸುರುತ್ತ ಕುಲಶೇಖರನ್ ಸೋಮಕುಲತಿಲಕ, ಪಾಂಡ್ಯ ಮಹಾರಾಜಾಧಿ ರಾಜ, ಪರಮೇಶ್ವರ, ಪರಮಭಟ್ಟಾರಕ ಪಂದ್ ವರ್ಣಿಸಾದೆರ್. ಬೊಕ್ಕ ಶಾಸನದ 5 ಬೊಕ್ಕ 6 ನೇ ಸಾಲ್ ಡ್ ಸೈತಿನ ಬಗೆಟ್ಟ್ ಉಲ್ಲೇಖ ಉಂಡು.
ಕುಡ್ಲ: ಕುಂಪಲ ಶ್ರೀ ಕೃಷ್ಣ ಮುಖ್ಯಪ್ರಾಣ ದೇವಲ್ಯಡ್ ಮಾರ್ನೆಮಿ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.
ಅಂಚೆನೆ ಮಾರ್ನೆಮಿ ಪೂಜೆದ ಲೆಕ್ಕೊಡು ಪ್ರತಿ ದಿನೊಲ ರಾತ್ರೆ ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು ಪಂದ್ ಲೆಪ್ಪೋಲೆಡ್ ತೆರಿಪಾದೆರ್.
ಕುಡ್ಲ: ಪಣಂಬೂರು ಕೈತಲ್ದ ಕಡಲ್ಡ್ ರಡ್ಡ್ ಜನತ ಪುನ ಗುರುವಾರ ಕಾಂಡೆ ನಡತ್ಂಡ್. ಬೆಂಗಳೂರುರ್ದು ಬೂದಿನ ಲಕ್ಷ್ಮಿ (43) ಬೊಕ್ಕ ಬೋರಲಿಂಗಯ್ಯ (50) ತೀರ್ ಪೋಯಿನಕುಲ್ ಪಂದ್ ತೆರಿದ್ ಬೈದ್ಂಡ್.
ರಡ್ಡ್ ಜನ ಕಡಲ್ಗ್ ಲಾಗಿದ್ ಆತ್ಮಹತ್ಯೆ ಮಲ್ತ್ ಇಪ್ಪೊಡು ಪಂದ್ ತೆರಿದ್ ಬೈದ್ಂಡ್. ಸಂಬಂಧಡ್ ರಡ್ಡ್ ಜನ ಅತ್ತಿಗೆ ಬೊಕ್ಕ ಭಾವೆ ಪಂದ್ ತೆರಿದ್ ಬೈದ್ಂಡ್. ಬೆಂಗಳೂರು ಮೂಲದಕುಲ್ ಆಯಿನ ಮೊಕುಲ್ ಇಲ್ಲಲ್ ಏರೆಗ್ಲಾ ಪನಂದೆ ಬತ್ತಿತ್ತೆರ್ ಪನ್ಪುನ ಮಾಹಿತಿ ಪೊಲೀಸೆರೆಗ್ ತಿಕ್ ದ್ಂಡ್.
ಅಕಲ್ನ ಮೊಬೈಲ್ ಕಡಲ್ದ ದಂಡೆಡ್ ತಿಕ್ಕ್ದ್ ಪಣಂಬೂರು ಪೊಲೀಸೆರ್ ಸಂಬಂಧಿಕೆರೆನ್ ಸಂಪರ್ಕ ಮಲ್ತ್ದೆರ್ ಪಂದ್ ತೆರಿದ್ ಬೈದ್ಂಡ್.
ಪುತ್ತೂರು: ಕೋಡಿಂಬಾಡಿದ ಮಠಂತಬೆಟ್ಟು ಶ್ರೀ ಮಹಿಷಮರ್ದಿನಿ ದೇವಸ್ಥಾನಡ್ ನವರಾತ್ರಿ ಪ್ರಯುಕ್ತ ನಡತೊಂದು ಇಪ್ಪುನ ಸಾಂಸ್ಕೃತಿಕ ಕಾರ್ಯಕ್ರಮದ ಅಂಗವಾದ್ ಪುತ್ತೂರುದ ಸಾಧನ ಸಂಗೀತ ಪ್ರತಿಷ್ಠಾನದ ಡಾ.ವಿದುಷಿ ಸುಚಿತ್ರಾ ಹೊಳ್ಳ ಮೇರ್ನ ಶಿಷ್ಯ ವೃಂದರ್ದ್ ಶಾಸ್ತ್ರೀಯ ಸಂಗೀತ ಕಾರ್ಯಕ್ರಮ ನಡತ್ಂಡ್.
ಇಶಾ .ಬಿ, ಅಂಜಲಿ ನಾಯಕ್ ಕೆ, ಮಾನಸ .ಬಿ, ಆರ್ಯನ್ ಸಿ. ಆರ್, ಮಾನ್ವಿ ಕಜೆ, ಅವನಿ ನಾಯಕ್, ಸುಪ್ರಜಾ ರಾವ್, ಮಯೂರಿ.ಕೆ, ಶ್ರೀವಿಭಾ ಕೇಪು, ಕಾರ್ತಿಕ್ ಪ್ರಸಾದ್, ಹೃಷಿಕೇಶ್ ಕೆ, ವಯಲಿನ್ಡ್ ಅನನ್ಯ ಪಿ.ಎಸ್, ಮೃದಂಗಡ್ ಶ್ಯಾಮ್ ಭಟ್ ಸಹಕಾರ ಕೊರಿಯೆರ್.
ಪಂಜ ಸೀಮೆದ ಶ್ರೀ ಪರಿವಾರ ಪಂಚಲಿಂಗೇಶ್ವರ ದೇವಸ್ಥಾನದ ಶ್ರೀ ದುರ್ಗಾಪರಮೇಶ್ವರಿ ಸನ್ನಿಧಿಡ್ ಅ.15 ರ್ದ್ ಅ.23 ಮುಟ್ಟ ನವರಾತ್ರಿ ಉಚ್ಚಯ ನಡಪೆರೆ ಉಂಡು.
ಅ.18 ದಾನಿ ರಾತ್ರೆ ಶ್ರೀ ವಿಷ್ಣು ಭಜನಾ ಮಂಡಳಿ ಅಳ್ಪೆ ಚಿಂಗಾಣಿಗುಡ್ಡೆ ಮೊಕ್ಲೆರ್ದ್ ಭಜನಾ ಸಂಕೀರ್ತನೆ, ಮಹಾಪೂಜೆ, ಪ್ರಸಾದ, ವಿತರಣೆ, ಅನ್ನ ಸಂತರ್ಪಣೆ ನಡತ್ಂಡ್. ಗೋಪಾಲಕೃಷ್ಣ ದೇವಸ್ಯ, ಸುಭಾಷ್ ಪಂಜ, ರಚನಾ ಚಿದ್ಗಲ್, ಸುಬ್ರಹ್ಮಣ್ಯ ಭಟ್ ದೇವಸ್ಯ , ಲಕ್ಷ್ಮೀಶ ಶಗ್ರಿತ್ತಾಯ , ಗಗನ್ ಪಂಜ ಮೊಕ್ಲೆರ್ದ್ ಯಕ್ಷಗಾನ ಕಲಾ ಸೇವೆ ನಡತ್ಂಡ್. ವ್ಯವಸ್ಥಾಪನಾ ಸಮಿತಿದಕುಲ್, ಸೀಮೆದ ಭಕ್ತಾದಿಲು ಈ ಪೊರ್ತುಡು ಇತ್ತೆರ್.
ಕಾರ್ಲ : ನಿಟ್ಟೆ ಗ್ರಾಮದ ಅಖಿಲೇಶ್ (25) ನಾಪತ್ತೆ ಆಯಿನ ಕೇಸ್ ಕಾರ್ಲ ಗ್ರಾಮಾಂತರ ಪೊಲೀಸ್ ಠಾಣೆಡ್ ದಾಖಲಾತ್ಂಡ್. ಅ.9 ದಾನಿ ಕಾಂಡೆ 6.3೦ ಕ್ಕ್ ಇಲ್ಲರ್ದ್ ಒಂಜಿ ಬ್ಯಾಗ್ನ್ ಪತೊಂದು ಪೋಯಿನಾಯೆ ವಾಪಾಸ್ ಇಲ್ಲಗ್ ಬರಂದೆ, ಸಂಬಂಧಿಕೆರ್ನ ಇಲ್ಲಗ್ಲ ಪೋವಂದೆ ನಾಪತ್ತೆ ಆತೆ ಪಂದ್ ಪೊಪ್ಪ ರಾಮಚಂದ್ರ ದೂರು ದಾಖಲ್ ಮಲ್ತ್ದೆರ್.
ಕುಡ್ಲ: ಮಂಗಳಾದೇವಿ ದೇವಸ್ಥಾನದ ವಠಾರಡ್ ಬೇರ ಮಲ್ಪುನ ವಿಚಾರೊಡು ಹೇಳಿಕೆ ಕೊರ್ನ ವಿಹಿಂಪ ಪ್ರಾಂತ್ಯ ಸಹ ಕಾರ್ಯದರ್ಶಿ ಶರಣ್ ಪಂಪ್ವೆಲ್ ಮಿತ್ತ್ ಶಾಂತಿಭಂಗ ಬೊಕ್ಕ ಕೋಮು ಪ್ರಚೋದನೆ ಆರೋಪದಡಿ ಕೇಸ್ ದಾಖಲಾತ್ಂಡ್.
ಮಂಗಳಾದೇವಿ ದೇವಸ್ಥಾನದ ಮಾರ್ನೆಮಿದ ಉಚ್ಚಯಡ್ ಮುಸ್ಲಿಮೆರ್ನ ಬೇರಗ್ ನಿರ್ಬಂಧ ಪಾಡೆರೆ ಹಿಂದೂ ಸಂಘಟನೆಲು ಕರೆ ಕೊರ್ದಿತ್ತ್ಂಡ್. ಅಂಚಾದ್ ಹಿಂದೂ ವ್ಯಕ್ತಿಲೆನ ಅಂಗಡಿದ ಮಿತ್ತ್ ಕೇಸರಿ ಧ್ವಜ ದೀದ್ ಮಾತ ಹಿಂದುಲು ಮಾತಾ ಸೊತ್ತುಲೆನ್ ಹಿಂದೂಲೆನ ಅಂಗಡಿರ್ದೆ ದೆತೊನೊಡು ಪಂದ್ ಹೇಳಿಕೆ ಕೊರ್ದ್ ಇತ್ತೆರ್. ಅ.16 ದಾನಿ ಮಂಗಳಾದೇವಿನ ರಥಬೀದಿಡ್ ಹಿಂದೂಲೆನ ಸ್ಟಾಲ್ಲೆಗ್ ವಿಶ್ವ ಹಿಂದೂ ಪರಿಷತ್ ಭಗವಾ ಧ್ವಜ ಕಟ್ಟ್ದಿತ್ತೆರ್.
ಕುಡ್ಲ: ಗಲಸಿನ ರಡ್ಡ್ ಚಕ್ರ ಗಾಡಿಲೆನ ಮಳಿಗೆ ಗೋಡ್ವಿನ್ಸ್ ನಿರ್ಮಲ್ ಆಟೋ ಕನ್ಸಲ್ಟೆಂಟ್ಸ್ ಎಡ್ಡೆ ಸೇವೆರ್ದ್ ರಾಜ್ಯ ಇಡೀ ಪುದರ್ ಪಡೆತ್ಂಡ್.
ಕುದ್ರೋಳಿ ಅಳಕೆ ಪ್ರದೇಶಡ್ ಸುರು ಆಯಿನ ಶೋರೂಂ 25 ವರ್ಷೊಲೆನ ಸೇವೆನ್ ಕರ್ನಾಟಕದ ಮಾತ ಜಿಲ್ಲೆದ ಜನಕ್ಲೆಗ್ ಕೊರೊಂದು ಉಂಡು. ಮಾತ ವರ್ಗಲೆನ ಕಮ್ಮಿ ಕಿರಯಡ್ ಗಾಡಿಲು ಮುಲ್ಪ ತಿಕ್ಕುಂಡು.
ಅತ್ತಂದೆ ದಸರಾ ಪರ್ಬದ ಲೆಕ್ಕೊಡು ಒಂಜಿ ತಿಂಗೊಲ್ದ ಹೊಸ ಗಾಡಿಲು ಶೇ.30 ದಾತ್ ಕಮ್ಮಿ ಕಿರಯಡ್ ಉಂಡು. ರಡ್ಡ್ ಚಕ್ರದ ಗಾಡಿಲೆಗ್ ಭಾರೀ ಕಮ್ಮಿ ಬಡ್ಡಿಡ್ ಸಾಲ ತಿಕ್ಕುಂಡು. ಪರತ್ ಗಾಡಿಲೆನ್ ಬೇತೆ ಮಾತ ಶೋರೂಂರ್ದ್ ಎಚ್ಚ ಕಿರಯಡ್ ದೆತೊನೊವೆರ್. ಅತ್ತಂದೆ ಮಾರಾಟ ಮಲ್ತಿನ ಗಾಡಿನ್ ಕಡ್ಡಾಯವಾದ್ ಆರ್ ಸಿ ಟ್ರಾನ್ ಫರ್ ಮಲ್ತ್ ದ್ ಆಯಿನ ಪ್ರತಿನ್ ಗ್ರಾಹಕೆರೆಗ್ ಕೊರ್ಪೆರ್. ಮುಲ್ಪ ಕಮ್ಮಿ ಡೌನ್ ಪೇಮೆಂಟ್ ಡ್ ಗ್ರಾಹಕೆರೆಗ್ ಇಷ್ಟ ಇಪ್ಪುನ ಗಾಡಿನ್ ದೆತೊನೊಲಿ. ಒಂಜೇ ಸಂಸ್ಥೆದ ಮುಖೇನ ಆರ್ ಸಿ ವರ್ಗಾವಣೆ, ಇನ್ಸೂರೆನ್ಸ್ ಸಾಲ ಸೌಲಭ್ಯ ಉಂಡು. ಆಕರ್ಷಕ ಕಿರಯಿಡ್ ಎಕ್ಸ್ ಚೇಂಜ್ ಆಫರ್ ಉಂಡು.
ಮಾತ ಕಂಪೆನಿದ ಗಾಡಿಲು ಮುಲ್ಪ ತಿಕ್ಕುಂಡು. ಒಂಜಿ ತಿಂಗೊಲ್ ಆಯಿನ ಬ್ಯಾಟರಿ ಗಾಡಿಲು, ಶೇ.40 ಕಿರಯಿಡ್ ತಿಕ್ಕುಂಡು. ಗ್ರಾಹಕೆರ್ ನೆತ್ತ ಸದುಪಯೋಗನ್ ಪಡೆವೊಲಿ ಪಂದ್ ಸಂಸ್ಥೆದ ವ್ಯವಸ್ಥಾಪಕ ನಿರ್ದೇಶಕೆರ್ ಗೋಡ್ವಿನ್ ಕಾರಿಯಪ್ಪ ಪ್ರಕಟಣೆಡ್ ತೆರಿಪಾದೆರ್.
ಧರ್ಮಸ್ಥಳ: ಶ್ರೀ ಕ್ಷೇತ್ರ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ.ಡಿ.ವೀರೇಂದ್ರ ಹೆಗ್ಗಡೆರೆನ 56ನೇ ಪಟ್ಟಾಭಿಷೇಕ ವರ್ಧಂತ್ಯುತ್ಸವ ಅ. 24 ದಾನಿ ಧರ್ಮಸ್ಥಳಡ್ ನಡಪರೆ ಉಂಡು.
ಪಟ್ಟಾಭಿಷೇಕದ 56ನೇ ವರ್ಧಂತ್ಯುತ್ಸವದ ಪ್ರಯುಕ್ತ ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ಅ.24 ದಾನಿ ಬೇತೆ ಬೇತೆ ಧಾರ್ಮಿಕ ಬೊಕ್ಕ ಸಾಮಾಜಿಕ ಕಾರ್ಯಕ್ರಮ ನಡಪರೆ ಉಂಡು. ಪಟ್ಟಾಭಿಷೇಕ ವರ್ಧಂತ್ಯುತ್ಸವದ ಪ್ರಯುಕ್ತ ದೇವಳದ ಸಿಬ್ಬಂದಿ ವರ್ಗರ್ದ್ ಅ.19 ದಾನಿ ಧರ್ಮಾಧಿಕಾರಿಲೆಗ್ ಗೌರವ ಸಮರ್ಪಣೆ ನಡಪರೆ ಉಂಡು. ಅಮೃತವರ್ಷಿಣಿ ಸಭಾಭವನಡ್ ನಡಪುನ ಕಾರ್ಯಕ್ರಮಡ್ ದೇವಳದ ಹಿರಿಯ 25 ನೌಕರೆರೆಗ್ ಮಾನಾದಿಗೆ ನಡಪರೆ ಉಂಡು. ಅ. 20 ದಾನಿ ಶಾಲಾ-ಕಾಲೇಜ್ರ್ದ್, ಗ್ರಾಮಸ್ಥರೆರ್ದ್, ಶ್ರೀ ಕ್ಷೇತ್ರ ಗ್ರಾಮಾಭಿವೃದ್ಧಿ ಯೋಜನೆ, ಸಿರಿ ಗ್ರಾಮೋದ್ಯೋಗ ಸಂಸ್ಥೆ, ಧರ್ಮಸ್ಥಳ ಸರ್ಕಾರಿ ಕಚೇರಿದ ನೌಕರೆರೆರ್ದ್ ಡಾ|ಡಿ.ವೀರೇಂದ್ರ ಹೆಗ್ಗಡೆರೆಗ್ ಗೌರವ ಸಮರ್ಪಣೆ ನಡಪೆರ ಉಂಡು.
ಅ.21 ದಾನಿ ಬೇತೆ ಬೇತೆ ವಿಭಾಗದ ನಡುಟ್ ಛದ್ಮವೇಷ ಸ್ಪರ್ಧೆ ನಡಪೆರೆ ಉಂಡು. ಅ.24 ದಾನಿ ನಡಪುನ ರಾಜ್ಯಸಭಾ ಸದಸ್ಯೆರ್ ಅಂಚನೆ ಧರ್ಮಾಧಿಕಾರಿ ಡಾ.ವೀರೇಂದ್ರ ಹೆಗ್ಗಡೆರೆನ 56ನೇ ಪಟ್ಟಾಭಿಷೇಕ ವರ್ಧಂತ್ಯುತ್ಸವದ ಕಾರ್ಯಕ್ರಮಕ್ಕ್ ಶ್ರೀ ಕ್ಷೇತ್ರ ಧರ್ಮಸ್ಥಳಡ್ ಭಾರಿ ತಯಾರಿ ನಡತೊಂದು ಉಂಡು.
ಶ್ರೀ ಕ್ಷೇತ್ರ ಧರ್ಮಸ್ಥಳದ 21ನೇ ಧರ್ಮಾಧಿಕಾರಿಯಾದ್ ಪಟ್ಟನ್ ಅಲಂಕಾರ ಮಲ್ತಿನಾರ್ ಡಾ.ಡಿ ವೀರೇಂದ್ರ ಹೆಗ್ಗಡೆರ್.1968 ಅಕ್ಟೋಬರ್ 24 ದಾನಿ ಪಟ್ಟಾಭಿಷಕ್ತೆರಾಯಿನ ಡಾ| ಹೆಗ್ಗಡೆರ್ ನವ ಧರ್ಮಸ್ಥಳದ ನಿರ್ಮಾಣ ಮಲ್ದಿನಾರ್. ಕ್ಷೇತ್ರದ ಪರಂಪರೆನ್ ಬುಲೆಪಾಯಿನಾರ್. ಚತುರ್ದಾನಲಾಯಿನ ಅನ್ನದಾನ, ವಿದ್ಯಾದಾನ, ಅಭಯದಾನ ಬೊಕ್ಕ ಔಷಧ ದಾನರ್ದ್ ಕ್ಷೇತ್ರನ್ ಬುಲೆಪಾಯಿನಾರ್ . ಹೆಗ್ಗಡೆರೆನ ಸಾಮಾಜಿಕ, ಧಾರ್ಮಿಕ, ಸಾಹಿತ್ಯಿಕ, ಸಾಂಸ್ಕೃತಿಕ ಕಾರ್ಯಗ್ ಕೋಟ್ಯಾಂತರ ಭಕ್ತೆರ್ ಮನಸೋತ್ದೆರ್. ಧರ್ಮಸ್ಥಳ ಪನ್ಪುನ ಪುದರ್ನ ವಿಶ್ವವಿಖ್ಯಾತ ಮಲ್ತಿನಾರ್ ಪದ್ಮಭೂಷಣ ಡಾ| ಡಿ.ವಿರೇಂದ್ರ ಹೆಗ್ಗಡೆರ್. ಲಕ್ಷಾಂತರ ಭಕ್ತೆರ್ನ ಇಲ್ಲಲ್ ಧರ್ಮಸ್ಥಳದ ಮಂಜುನಾಥನ ಒಟ್ಟಿಗೆ ಪಾತೆರುನ ಮಂಜುನಾಥ ಪಂದೇ ಭಕ್ತೆರ್ ಲೆಪ್ಪುನ ವೀರೇಂದ್ರ ಹೆಗ್ಗಡೆರೆನ ಪೋಟೋನ್ಲ ಆರಾಧನೆ ಮಲ್ಪುನಕುಲ್ ಉಲ್ಲೆರ್.
