ಕುಡ್ಲ : ಕಲಾವಿದೆ ಜಯಾನಂದ ಆಚಾರ್ಯ ನ್ (65) ಮೆರೆನ್ ಕಾವೂರುದ ಹರಿಪದವುದಲ್ಪ ಕೊಲೆ ಮಲ್ದಿನ ಆರೋಪಿ ಕುಂಜತ್‌ಬೈಲ್ ದೇವಿನಗರದ ರಾಜೇಶ್ ಪೂಜಾರಿ‌ನ್ ಪೊಲೀಸೆರ್ ಅರೆಸ್ಟ್ ಮಲ್ದೆರ್.
ಜಯಾನಂದೆರೆನ ಪುಣ ನಾಲಿಗ್ ಬಲ್ಲ್ ಬಿಗಿತ್ ದಿನ ಸ್ಥಿತಿಟ್ಟ್ ಸನಿವಾರ ಪತ್ತೆ ಆತ್ಂಡ್.
ಈ ಬಗೆಟ್ ಜಯಾನಂದೆರೆನ ಸಹೋದರೆ ಅಚ್ಚುತ ಆಚಾರ್ಯ ಕಾವೂರು ಠಾಣೆಗ್ ಕೇಸ್ ದಾಖಲ್ ಮಲ್ದೆರ್. ನೆತ್ತ ಬಗೆಟ್ ತನಿಖೆ ಸುರು ಮಲ್ತಿನ ಕಾವೂರು ಪೊಲೀಸೆರ್ ರಾಜೇಶ್ ಪೂಜಾರಿ‌ನ್ ಅಂಗಾರೆ ಬಂಧಿಸಾದ್ ಕೋರ್ಟ್ ಗ್ ಹಾಜರ್ ಮಲ್ದೆರ್.
ಕುಡ್ಲ : ವಾಮಂಜೂರು ಜಂಕ್ಷನ್ ಡ್ ಶಾರದಾ ಉಚ್ಚಯದ ಬಗೆಟ್ ವಾಮಂಜೂರು ಫ್ರೆಂಡ್ಸ್ ಸಾರ್ವಜನಿಕ ಜಾಗೆಡ್ ಪಾಡ್ದಿನ ಫ್ಲೆಕ್ಸ್ ಲೆನ್ ಪರಿತ್ ಪಾಡಿನ ಕೇಸ್ ದ ಮಿತ್ತ್ ಮೂಜಿ ಜನಬೊಕ್ಕ ನೆಕ್ ಗಲಸಿನ ಸ್ವಿಫ್ಟ್ ಕಾರ್ ನ್ ಅ.11ಕ್ ಕುಡ್ಲ ಗ್ರಾಮಾಂತರ ಪೊಲೀಸೆರ್ ವಶಕ್ಕ್ ದೆತೊಂದೆರ್.
ಈ ಕೇಸ್ ಗ್ ಸಂಬಂಧ ಪಟ್ ದ್ ಆರೋಪಿಲಾಯಿನ ಸುಮಿತ್ ಹೆಗ್ಡೆ, ಯತೀಶ್ ಪೂಜಾರಿ, ಪ್ರವೀಣ್ ಪೂಜಾರಿ ಇತ್ತೆ ಪೋಲಿಸ್ ವಶಟ್ ಉಲ್ಲೆರ್.
ಈ ಘಟನೆ ಅ.8 ಗು ನಡುರಾತ್ರೆಡ್ ಆದಿತ್ತ್ಂಡ್. ಈ ಬಗೆಟ್ ಕುಡ್ಲ ಗ್ರಾಮಾಂತರ ಪೊಲೀಸ್ ಠಾಣೆಡ್ ಕೇಸ್ ದಾಖಲ್ ಆದಿತ್ತ್ಂಡ್.
ದೇಶೀಯ ಮಾರ್ಕೆಟ್ ಡ್ ಬುಧಾರ ಕಾಂಡೆ ಬಂಗಾರ್, ಬೊಲ್ಲಿದ ಬಿಲೆ ಕಮ್ಮಿಯಾತ್ಂಡ್. 22 ಕ್ಯಾರೆಟ್‌ದ ಗ್ರಾಂ 10 ಬಂಗಾರ್‌ದ ಬಿಲೆ 700 ರೂ. ಕಮ್ಮಿಯಾದ್ 46,900 ರೂ. ಆತುಂಡು. 24 ಕ್ಯಾ. ಬಂಗಾರ್‌ದ ಬಿಲೆ 770 ರೂ. ಕಮ್ಮಿಯಾದ್ 51,160 ರೂ. ದಾಖಲ್ ಆತ್ಂಡ್.
1 ಕೆಜಿ ಬೊಲ್ಲಿದ ಬಿಲೆ 600 ರೂ. ಕಮ್ಮಿಯಾದ್ 58,900 ರೂ. ಆತ್ಂಡ್. ಬೆಂಗ್ಲೂರ್‌ಡ್ 22 ಕ್ಯಾರೆಟ್‌ದ ಗ್ರಾಂ 10 ಬಂಗಾರ್‌ದ ಬಿಲೆ 700 ರೂ. ಕಮ್ಮಿಯಾದ್ 46,000 ರೂ. ಆತ್ಂಡ್.
ತುಳುನಾಡ್‌ದ ಆಣ್ ಕಲೆ ಯಕ್ಷಗಾನದ ಏಸ ಪಾಡ್ದ್ ಸಚಿವೆರ್ ಡಾ. ಸುಧಾಕರ್ ಕುಷಿ ಪಡೆಯೊಂದೆರ್. ಉತ್ತರ ಕನ್ನಡ ಜಿಲ್ಲೆದ ಕಾರವಾರ ತಾಲೂಕ್‌ದ ಭಟ್ಕಳಗ್ ಭೇಟಿ ಮಲ್ತಿನ ಪೊರ್ತುಡು, ಏಸ ಪಾಡ್ದ್ ಫೋಟೋಗ್ ಪೋಸ್ ಕೊರ್ತೆರ್.
ಶಾಸಕೆರ್ ಸುನೀಲ್ ನಾಯ್ಕ್ ಅರೆನ ಇಲ್ಲಡ್ ಯಕ್ಷಗಾನ ಅಟ್ಟನೆ ಮಲ್ತ್‌ದಿತ್ತೆರ್. ಉಂದೆಟ್ಟ್ ಪಾಲ್ ಪಡೆಯಿನ ಸಚಿವೆರ್ ಆಟ ಮುಗಿ ಬೊಕ್ಕ ಏಸ ಪಾಡ್ದ್ ಕುಷಿ ಪಡೆಯೊನ್ಯೆರ್.
ಕೌಲಾಲಂಪುರ: ಮಲೇಷ್ಯಾ ಪ್ರಧಾನಿ ಇಸ್ಮಾಯಿಲ್ ಸಬ್ರಿ ಯಾಕೂಬ್ ರಾಜೀನಾಮೆ ಕೊರ್ತೆರ್. ಅಂಚಾದ್ ಅಲ್ಪ ಕುಡ ವೋಟು ಎದುರಿಸಾವುನ ಸ್ಥಿತಿ ಬೈದ್ಂಡ್.
ಹಾಲಿ ಸಂಸತ್‌ದ ಪೊರ್ತು ಮುಗಿಯರೆ ನನ 9 ತಿಂಗೊಲು ಇತ್ತ್ಂಡ್. ಪ್ರಧಾನಿ ಇಸ್ಮಾಯಿಲ್ ಮುತಾಲಿಕೆಡ್ ಯುನೈಟೆಡ್ ಮಲಯಾಸ್ ನ್ಯಾಷನಲ್ ಆರ್ಗನೈಸೇಷನ್ ನನ ಬರ್ಪಿನ ವೋಟುಡು ಗೆಂದುನ ವಿಶ್ವಾಸ ಉಂಡು.
ಬೆಂಗ್ಲೂರು : ಏತೇ ವಿರೋಧ ಬತ್ತ್oಡಲ ಬೆಂಗ್ಲೂರ್ ಡ್ ಬಲೆತ್ತ್ ಪಾಡ್ದಿನ (ಒತ್ತುವರಿ) ಜಾಗೆದ ಕಟ್ವಾಣಲೆನ್ ದರ್ಪುನ ಬೇಲೆನ್ ಉಂತಾವುಜ ಪಂದ್ ಕಂದಾಯ ಸಚಿವೆರ್ ಆರ್. ಅಶೋಕ್ ಪಂಡೆರ್.
ವಿಧಾನಸೌದಡ್ ಸುದ್ದಿಗಾರೆರ್ನೊಟ್ಟುಗು ಪಾತೆರಿನ ಆರ್, ಬೊಲ್ಲ ಬತ್ತಿನ ಜಾಗೆಲೆಡ್ ಸುರುತ್ತ ಆದ್ಯತೆ ಕೊರ್ದು ಒತ್ತುವರಿ ಕಟ್ವಾಣಲೆನ್ ದರ್ಪುನ ಬೇಲೆ ನಡತೊಂದು ಉಂಡು. ಮಾತೆರ್ಲ ಸಕಾಯ ಕೊರೊಡು. ಏತೇ ವಿರೋಧ ಬತ್ತ್oಡಲ ದರ್ಪುನ ಬೇಲೆನ್ ಉಂತಾವುನ ಪಾತೆರನೇ ಇಜ್ಜಿ ಪಂದ್ ಸಚಿವೆರ್ ಪಂಡೆರ್.
ಕುಡ್ಲ: ಆರ್ಥಿಕ ಸಂಕಷ್ಟಡ್ ಇಪ್ಪುನ ಮಿತ್ತಮುಗೇರ್ ದ ಲಲಿತಾ ಕಾಂಪೌಂಡ್ ನಿವಾಸಿ ಶಶಿಕಲಾ ಮೇರೆಗ್ ವಾರ್ಡ್‌ದ ಬಿಜೆಪಿ ಕಾರ್ಯಕರ್ತೆರ್ ಕಟ್ಟಾದ್ ಕೊರಿನ ಇಲ್ಲ್ ನ್ ಶಾಸಕೆರ್ ವೇದವ್ಯಾಸ್ ಕಾಮತ್ ಕೊರ್ಯೆರ್.
ಈ ಪೊರ್ತುಡು ಪಾತೆರಿನ ಶಾಸಕೆರ್ ವೇದವ್ಯಾಸ್ ಕಾಮತ್, ಮಿತ್ತಮುಗೇರ್ ಲಲಿತಾ ಕಾಂಪೌಂಡ್ ದ ಶಶಿಕಲಾ ಆರ್ಥಿಕವಾದ್ ಸಂಕಷ್ಟ ಇಪ್ಪುನೆನ್ ತೆರಿದ್ ಕೈತಲ್ ದ ಬಿಜೆಪಿ ನಾಯಕೆರಾಯಿನ ಮೋಹನ್ ಪೂಜಾರಿ ಮೆರೆನ ಮುತಾಲಿಕೆಡ್ ವಾರ್ಡ್‌ದ ಕಾರ್ಯಕರ್ತೆರ್ ಪಂಡಿತ್ ದೀನದಯಾಳ್ ಉಪಾಧ್ಯಾಯೆರೆನ ಅಂತ್ಯೋದಯದ ಪರಿಕಲ್ಪನೆ ಅಂಚೆನೆ ಇಲ್ಲ್ ಕಟ್ಟಾದ್ ಕೊರ್ಪುನ ಬಗೆಟ್ ಚಿಂತನೆ ನಡಪಾಯೆರ್. ಆಂಡ ಜಾಗೆಗ್ ಸರಿ ಆಯಿನ ದಾಖಲೆ ಇಜ್ಜಂದಿನ ಕಾರಣ ಸರ್ಕಾರ ರ್ದ್ ಇಲ್ಲ್ ನಿರ್ಮಾಣಗ್ ಸಕಾಯ ತಿಕ್ಕಂದಿಪ್ಪುನಗ ಕಾರ್ಯಕರ್ತೆರೇ ಸುಮಾರ್ 4.5 ಲಕ್ಷ ರೂಪಾಯಿ ಒಟ್ಟು ಮಲ್ತ್ ದ್, ಇಲ್ಲ್ ನಿರ್ಮಾಣದ ಜಬದಾರಿ ದೆತೊಂದು, ಇನಿ ಇಲ್ಲ್ ನ್ ಶಶಿಕಲಾ ಮೇರೆಗ್ ಕೊರ್ಯೆರ್. ಅವ್ವತ್ತಂದೆ ಮೊಕುಲ್ ಕೆಲವೊಂಜಿ
ಆರ್ಥಿಕ ಸಂಕಷ್ಟಡ್ ಇಪ್ಪುನ ಕುಟುಂಬಲೆಗ್ ಇಲ್ಲ್ ಕಟ್ಟಾದ್ ಕೊರ್ತೆರ್. ಅಂಚೆನೆ ಪ್ರಧಾನಿ ನರೇಂದ್ರ ಮೋದಿ ಮೆರೆನ ಸೇವಾ ಹೀ ಸಂಘಟನೆ ಪನ್ಪುನ ಘೋಷಣೆಗ್ ಅರ್ಥ ಕೊರ್ಪುನ ದೃಷ್ಟಿಡ್ ನಮ್ಮ ಕಾರ್ಯಕರ್ತೆರ್ ಉಲ್ಲೆರ್ ಪನ್ಪುನವು ಪೆರ್ಮೆದ ವಿಚಾರ.ಬೊಕ್ಕ ಮಿಲಾಗ್ರಿಸ್ ವಾರ್ಡ್‌ದ ಮಾತ ಕಾರ್ಯಕರ್ತೆರೆಗ್ ಶಾಸಕೆರ್ ಕಾಮತ್ ಸೊಲ್ಮೆ ಸಂದಾಯೆರ್.
ಕುಡ್ಲ ಮಹಾನಗರ ಪಾಲಿಕೆದ ಉಪಮೇಯರ್ ಪೂರ್ಣಿಮಾ, ಸ್ಥಾಯಿ ಸಮಿತಿದ ಅಧ್ಯಕ್ಷೆರ್ ಶಕೀಲಾ ಕಾವ, ಕಿಶೋರ್ ಕೊಟ್ಟಾರಿ, ಪಾಲಿಕೆ ಸದಸ್ಯೆರಾಯಿನ ಭರತ್ ಕುಮಾರ್ ಎಸ್, ರೇವತಿ ಶೆಟ್ಟಿ, ನಾಮನಿರ್ದೇಶಿತ ಸದಸ್ಯೆರಾಯಿನ ಭಾಸ್ಕರ್ ಚಂದ್ರ ಶೆಟ್ಟಿ, ರಮೇಶ್ ಕಂಡೆಟ್ಟು, ಬಿಜೆಪಿ ಮುಖಂಡೆರಾಯಿನ ವಿಜಯ್ ಕುಮಾರ್ ಶೆಟ್ಟಿ, ರವಿಶಂಕರ್ ಮಿಜಾರ್, ನಿತಿನ್ ಕುಮಾರ್, ರೂಪಾ ಡಿ. ಬಂಗೇರ, ಸುರೇಂದ್ರ ಜೆ., ದೀಪಕ್ ಪೈ, ರಮೇಶ್ ಹೆಗ್ಡೆ, ಅಜಯ್ ಕುಲಶೇಖರ, ಮೋಹನ್ ಕೆ. ಪೂಜಾರಿ, ಮೀರಾ ಕರ್ಕೇರಾ, ಅಜಿತ್ ಡಿಸಿಲ್ವ, ಉಮಾನಾಥ್ ಬೋಳಾರ್, ನೀಲೇಶ್ ಕಾಮತ್, ರಘುವೀರ್ ಬಾಬುಗುಡ್ಡ, ಲಲೇಶ್ ಕುಮಾರ್, ಅಶ್ವಿತ್ ಕೊಟ್ಟಾರಿ, ಅನಿಲ್ ಕುಮಾರ್ ಹೊಯಿಗೆ ಬಜಾರ್, ಫೆಡ್ರಿಕ್ ಪೌಲ್, ರೂಪಾ ಕೆ.ಎಸ್, ಮಾಲತಿ ಶೆಟ್ಟಿ, ಮಂಜುನಾಥ್, ಶಬರೀಶ್ ಎಂ. ಎಸ್, ಘನಶ್ಯಾಮ ಆಚಾರ್ಯ, ಗುರು ರಾಜೇಶ್ ಈ ಪೊರ್ತುಡು ಇತ್ತೆರ್.
ಪುತ್ತೂರ್ : ರಿಕ್ಷಾ ಡ್ರೈವರ್ ಒರಿ ಬಾಡಿಗೆ ರಿಕ್ಷಾ ಮಲ್ಪರೆ ಬತ್ತಿನ ಪರ್ಲಡ್ಕ ನಿವಾಸಿ ಹರ್ಷವರ್ಧನ್ ನಾಯ್ಕ್ ಪನ್ಪಿನಾರೆಗ್ 200ರೂ.ದ ನಕಲಿ ನೋಟು ಕೊರ್ದು ಮೋಸ ಮಲ್ತಿನ ಘಟನೆ ಪುತ್ತೂರ್ ಡ್ ನಡತ್ಂಡ್.
ಮೇರ್ ಕೋಡೆ ರಾತ್ರೆ 7 ಗಂಟೆಗ್ ಬೊಳುವಾರ್ ರ್ದ್ ಪರ್ಲಡ್ಕಗ್ ರಿಕ್ಷಾ ಬಾಡಿಗೆಗ್ ಪಂದಿತ್ತೆರ್. ಪರ್ಲಡ್ಕಡ್ ಜತ್ತ್ ದ್ ರಿಕ್ಷಾ ಡ್ರೈವರ್ ಗ್ ಬಾಡಿಗೆ ಕಾಸ್ 500ರೂ.ದ ನೋಟು ಕೊರ್ತೆರ್. ಡ್ರೈವರ್ ಬಾಡಿಗೆ ಕಾಸ್ ದೆತೊಂದು ಒರಿನ ಕಾಸ್ ಕೊರ್ನಗ 200ರೂ.ದ ಒಂಜಿ ನಕಲಿ ನೋಟುನು ಕೊರ್ತೆರ್. ಮೇರ್ ಇಲ್ಲಗ್ ಪೋದು ನೋಟು ತೂನಗ ಅವು ನಕಲಿ ನೋಟು ಪಂದ್ ಗೊತ್ತಾತ್ಂಡ್.
ಪಣಜಿ: ರಜೆತ ದಿನಟ್ ಗೋವಾಗ್ ಬತ್ತಿನ ಒಡಿಪು ಮೂಲದ ಬೆಂಗ್ಲೂರ್ದ ಜವನೆ ಆದಿತ್ಯ ಶೆಟ್ಟಿ (28) ಪಾಡಿ ಜಲಪಾತದ ನೀರ್ ಗ್ ಜತ್ತಿನ ಪೊರ್ತುಡು ಕಾರ್ ಗ್ ಉಚ್ಚು ತುಚ್ಚಿದ್ ಬೊಕ್ಕ ಅವು ಕಾರ್ ಗ್ ಸುತ್ತುದು ತೀರ್ ಪೋತೆರ್.
ಬೆಂಗ್ಲೂರ್ ದ ಐಟಿ ಕಂಪನಿಡ್ ಕೆಲಸ ಮಲ್ತೊಂದು ಇತ್ತಿನ ಮೇರ್ ದೋಸ್ತಿನಕ್ಲೆನೊಟ್ಟಿಗೆ ಗೋವಾಗ್ ತಿರ್ಗರೆ ಬತ್ತಿಪ್ಪುನ ಪೊರ್ತುಡು ಈ ಘಟನೆ ನಡತ್ಂಡ್.
ಕುಡ್ಲ : ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿ ಮುತಾಲಿಕೆಡ್ ಸಿರಿಚಾವಡಿ ಪುರಸ್ಕಾರ, ತುಳು ಪುಸ್ತಕ ಭಂಡಾರ ಬೊಕ್ಕ ಇಲ್ಲ್ ಇಲ್ಲಗ್ ತುಳು ಲಿಪಿ ಪಟ್ಟುನ ಲೇಸ್ ಅ.13 ಗುರುವಾರ ಮಧ್ಯಾಹ್ನ 2 ಗಂಟೆಗ್ ಸುರತ್ಕಲ್ ಗೋವಿಂದದಾಸ ಕಾಲೇಜ್ ಡ್ ನಡಪರೆ ಉಂಡು.
ಈ ಲೇಸ್ ತುಳು ಸಾಹಿತ್ಯ ಅಕಾಡೆಮಿದ ಗುರ್ಕಾಲು ದಯಾನಂದ ಜಿ.ಕತ್ತಲ್ ಸಾರ್ ನ ಗುರ್ಕಾರ್ಮೆಡ್ ನಡಪರೆ ಉಂಡು.
ಹಿಂದೂ ವಿದ್ಯಾದಾಯಿನಿ ಸಂಘ (ರಿ). ಸುರತ್ಕಲ್ ನೆತ್ತ ಕಾರ್ಯಂತೆರ್ ಶ್ರೀರಂಗ ಹೊಸಬೆಟ್ಟು ಲೇಸ್ ದ ಉದಿಪನ ಮಲ್ಪೆರೆ ಉಲ್ಲೆರ್.
ಶಾಸಕೆರ್ ಡಾ.ವೈ.ಭರತ್ ಶೆಟ್ಟಿ ಚಾವಡಿ ತಮ್ಮನ ನಡಪಾದ್ ಕೊರ್ಪೆರ್. ಬೈಕಂಪಾಡಿ ರೋಟರಿ ಕ್ಲಬ್ ಗುರ್ಕಾಲು ರೊ.ಅಶೋಕ್ ಎನ್. ಮೇರ್ ತುಳು ಪುಸ್ತಕ ಭಂಡಾರ ಉದಿಪನ ಮಲ್ಪೆರೆ ಉಲ್ಲೆರ್.
ಮಲ್ಲ ಬಿನ್ನೆರಾದ್ ಕಾರ್ಪೋರೇಟರ್ ವರುಣ್ ಚೌಟ, ಕರ್ನಾಟಕ ಯಕ್ಷಗಾನ ಅಕಾಡೆಮಿದ ಪದುಕೆರ್ ಮಾಧವ ಭಂಡಾರಿ ಕುಳಾಯಿ,ಬಂಟರ ಸಂಘ (ರಿ.)ಸುರತ್ಕಲ್ ದ ಗುರ್ಕಾರ್ಲು ಸುಧಾಕರ ಪೂಂಜ, ಕುಲಾಲ ಸಂಘ (ರಿ.) ಸುರತ್ಕಲ್ ದ ಗುರ್ಕಾರ್ಲು ಮೋಹನ್ ಐ.ಮೂಲ್ಯ, ಕುಳಾಯಿ ಬ್ರಹ್ಮಶ್ರೀ ನಾರಾಯಣಗುರು ಸಮಾಜ ಸೇವಾ ಸಂಘ (ರಿ.) ಗುರ್ಕಾರ್ಲು ಗೋಪಾಲ ಬಂಗೇರ ಕೆ, ಅಗರಿ ಎಂಟರ್ ಪ್ರೈಸಸ್ ಸುರತ್ಕಲ್ ದ ಧನಿಕುಲು ಅಗರಿ ರಾಘವೇಂದ್ರ ರಾವ್, ಗೋವಿಂದದಾಸ ಕಾಲೇಜ್ ಪ್ರಿನ್ಸಿಪಾಲ್ ಕೃಷ್ಣಮೂರ್ತಿ ಮಿತ್ತರ್ಮೆಡ್ ಉಪ್ಪುವೆರ್.
ಈ ಲೇಸ್ ಗ್ ಅಕಾಡೆಮಿದ ರಿಜಿಸ್ಟ್ರಾರ್ ಕವಿತಾ, ಸದಸ್ಯ ಸಂಚಾಲಕೆರ್ ನಾಗೇಶದ ಕುಲಾಲ್ ಬೊಕ್ಕ ಸರ್ವಸದಸ್ಯೆರ್ ಮಾತೆರೆನ್ಲಾ ಮೋಕೆಡ್ ಎದ್ಕೊಂದೆರ್.
