ಊರ್ದ ಸುದ್ದಿ Regional News

ಕಾಂತಾರ’ದ ಮೂಡುರ್ದು ನನಲ ಪಿದಯಿ ಬೈದಿಜಿ ಪಂಡೆರ್ ಖಾವಂದೆರ್

ಕುಟುಂಬ ಸಮೇತ ಸಿನೆಮಾ ತೂಯಿನ ಧರ್ಮಸ್ಥಳದ ಧರ್ಮಾಧಿಕಾರಿ ವೀರೇಂದ್ರ ಹೆಗ್ಗಡೆರ್

ಕುಡ್ಲ : ರಾಜ್ಯಸಭೆ ಸದಸ್ಯೆರ್ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ. ಡಿ.ವೀರೇಂದ್ರ ಹೆಗ್ಗಡೆರ್ ಅರೆನ ಕುಟುಂಬದ ಒಟ್ಟಿಗೆ ಕಾಂತಾರ ಪಿಕ್ಚರ್ ನ್ ಕುಡ್ಲ ದ ಭಾರತ್ ಮಾಲ್ ಬಿಗ್ ಸಿನೆಮಾಸ್ ಡ್ ಕೋಡೆ ತೂಯೆರ್.

ಬೊಡೆದಿ ಬೊಕ್ಕ ಕುಟುಂಬದ ಒಟ್ಟಿಗೆ ಬತ್ತಿನ ಖಾವಂದೆರೆನ್ ಚಿತ್ರಮಂದಿರದ ಅಧಿಕಾರಿಲು ಭಾರಿ ಭಗ್ ತಿಡ್ ಎದ್ಕೊನಿಯೆರ್. ಪಿಕ್ಚರ್ ತೂದು ಖುಷಿ ಪಡೆಯಿನ ಹೆಗ್ಗಡೆರ್, ಕಾಂತಾರ ತೂದು ಅಯಿತ್ತ ಮೂಡುರ್ದು ನನಲ ಪಿದಯಿ ಬೈದಿಜಿ ಪಂದ್ ಮೆಚ್ಚಿಗೆ ಕೊರ್ಯೆರ್.

ದೈವದ ಮಹತ್ವ ಇಪ್ಪುನ ಕಾಂತಾರ ಪಿಕ್ಚರ್ ದ ನಿರ್ದೇಶಕೆರ್ ಬೊಕ್ಕ ನಟೆ ರಿಷಭ್ ಶೆಟ್ರ್ ಪಿಚ್ಚರ್ ಸುರು ಮಲ್ಪುನೆರ್ದ್ ದುಂಬು ಧರ್ಮಸ್ಥಳಗ್ ಪೋದು ದೇವೆರ್ನ ದರ್ಶನ ಮಲ್ತ್ ದ್ ಖಾವಂದೆರೆನ ಆಶೀರ್ವಾದ ದೆತೊಂದೆರ್ ಪನ್ಪಿನೆನ್ ಮುಲ್ಪ ನೆನೆಪೊಲಿ.

ಚರ್ಮ ಗಂಟ್ ಸೀಕ್ ತಡೆಪುನ ನಿಲೆಟ್ಟ್ ಕೈಕಂಜಿಲೆನ ಸಾಗಾಟೊಗು ನಿಷೇಧ: ಜಿಲ್ಲಾಧಿಕಾರಿ ಆದೇಶ

ಕುಡ್ಲ : ಕೈಕಂಜಿಲೆನ ಚರ್ಮಗಂಟ್ ಸೀಕ್ ಕಮ್ಮಿ ಮಲ್ಪೆರೆ ಬೋಡಾದ್ ದಕ್ಷಿಣ ಕನ್ನಡ ಜಿಲ್ಲಾಡಳಿತ ಜಿಲ್ಲೆಡ್ ನ. 30 ಮುಟ್ಟ ಕೈಕಂಜಿಲೆನ ಸಾಗಾಟೊಗು ಒಂತೆ ದಿನ ನಿಷೇಧ ಮಲ್ದ್ಂಡ್.

ಕ್ಯಾಪ್ರಿಪಾಕ್ಸ್ ಪನ್ಪುನ ವೈರಾಣುರ್ದ್ ಬರ್ಪುನ ಚರ್ಮಗಂಟ್ ಸೀಕ್ ಪೆತ್ತ ಬೊಕ್ಕ ಎರ್ಮೆಲೆಡ್ ಇಪ್ಪುಂಡು. ಸೀಕ್ ಇತ್ತಿನ ಕೈಕಂಜಿ ಸಾಗಾಟ ಮಲ್ತ್ಂಡ ಆರೋಗ್ಯಡ್ ಇಪ್ಪುನ ಕೈಕಂಜಿಲೆಗ್ಲಾ ಬರ್ಪುಂಡು. ಅಂಚಾದ್ ಅ.20ರ್ದ್ ನ. 30 ಮುಟ್ಟ ಕೈಕಂಜಿ ಸಾಗಾಟೊಗು ನಿಷೇಧ ಪಂದ್ ಜಿಲ್ಲಾಧಿಕಾರಿ ಡಾ. ರಾಜೇಂದ್ರ ಕೆ.ವಿ. ಆದೇಶ ಕೊರ್ತೆರ್. ನೆತ್ತ ಒಟ್ಟಿಗೆ ಗ್ರಾಮ ಪಂಚಾಯತಿ ವ್ಯಾಪ್ತಿಡ್ ಕೆಲೆಂಜಿ, ಉಮಿಲ್ ನ್ ಕಮ್ಮಿ ಆಯೆರೆ ಫಾಂಗಿಗ್ ಮಲ್ಪುಲೆಕ್ಕ ಮೇರ್ ಈ ಬಗೆಟ್ ಸಂಬಂಧ ಪಟ್ಟಿನಕುಲೆಗ್ ತೆರಿಪಾದೆರ್.