ಊರ್ದ ಸುದ್ದಿ Regional News

ಶ್ರೀ ರಾಮ ಕ್ಷೇತ್ರದ ಬ್ರಹ್ಮಾನಂದ ಬಹರೈನ್ ಬೊಕ್ಕ ದುಬೈಗ್ ಪ್ರವಾಸ

ಧರ್ಮಸ್ಥಳ: ಶ್ರೀ ರಾಮ ಕ್ಷೇತ್ರ ಮಹಾಸಂಸ್ಥಾನದ ಜಗದ್ಗುರು ಪೀಠದ ಪೀಠಾಧೀಶೆರಾಯಿನ ಸದ್ಗುರು ಶ್ರೀ ಬ್ರಹ್ಮಾನಂದ ಸರಸ್ವತಿ ಸ್ವಾಮೀಜಿ ಸೆ.14 ರ್ದ್ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ 169 ನೇ ಪುಟ್ಟುದಿನ ದಿನತ ಗುರುವಂದನಾ ಲೇಸ್ ಡ್ ಪಾಲ್ ಪಡೆಯೆರೆ ಉಲ್ಲೆರ್.

ಈ ಲೆಕ್ಕೊಡು ಆರ್ ದುಬೈ ಬೊಕ್ಕ ಬಹರೈನ್ ಗ್ ಪ್ರವಾಸ ಪಡೊಂದೆರ್. ದುಬೈ ಬೊಕ್ಕ ಬಹರೈನ್ ಡ್ ಗುರುವಂದನಾ ಲೇಸ್ ಡ್ ಪಾಲ್ ಪಡೆದ್ ಒಂಜಿ ವಾರ ಅಲ್ಪದ ಗುರುನಾರಾಯಣ ಸ್ವಾಮಿಲೆನ ಭಕ್ತೆರೆನ್ ಭೇಟಿ ಮಲ್ಪೆರೆ ಉಲ್ಲೆರ್ ಪಂದ್ ಗುರುದೇವ ಮಠದ ಪ್ರಕಟನೆಡ್ ತೆರಿಪಾದೆರ್.

ಉಂತಾದ್ ಪೋಯಿನ ಬೈಕ್ ನ್ ಕಂಡಿನ ಕಲ್ವೆರ್…!

ಬೋಲ್ತೆರ್: ಪಶು ವೈದ್ಯಾಧಿಕಾರಿನ ಆಸ್ಪತ್ರೆದ ಶೆಡ್ಡ್ ಡ್ ಉಂತಾಯಿನ ಬೈಕ್ ನ್ ಕಂಡಿನ ಘಟನೆ ಬೋಲ್ತೆರ್ ಡ್ ನಡತ್‌ಂಡ್.

ಬೋಲ್ತೆರ್ ಪಶು ಆಸ್ಪತ್ರೆದ ವೈದ್ಯಾಧಿಕಾರಿ ಡಾ| ಟಿ.ಸಿ ಮಂಜನಾಯ್ಕ ಮೆರ್ ನ ಆಸ್ಪತ್ರೆದ ಶೆಡ್ಡ್ ಡ್ ಏಪಲದಲೆಕ ಬೊಲ್ಪುಗು ಬೈಕ್ (ಕೆ.ಎ 21 ಯು 6849) ಬೈಕ್ ನ್ ಉಂತಾದ್ ಪೋದ್ ಇತ್ತೆರ್. ರಾತ್ರೆ ವಾಪಾಸ್ ಬತ್ತ್ ದ್ ತೂನಗ ಬೈಕ್ ಕಾಣೆ ಆತ್‌ಂಡ್. ಕಂಡಿನ ಬೈಕ್ ದ ಅಂದಾಜ್ ಕಾಸ್ 35,000 ಪಂದ್ ತೆರಿದ್ ಬೈದುಂಡು.

ನೆತ್ತ ಬಗೆಡ್ ಬೋಲ್ತೆರ್ ಪೊಲೀಸ್ ಠಾಣೆಡ್ ಪ್ರಕರಣ ದಾಖಲಾತ್‌ಂಡ್.

ಗುರುವಾಯನಕೆರೆ ಸಹಕಾರಿ ಸಂಘದ ಮಹಾಸಭೆ

ಗುರುವಾಯನಕೆರೆ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರಿ ಸಂಘದ ವಾರ್ಷಿಕ ಮಹಾಸಭೆ ಸೆ.12 ಅಂಗಾರೆ ಸಂಘದ ಜ್ಯೇಷ್ಠ ಸಭಾಭವನಡ್ ನಡತ್ತ್ಂಡ್.

ಸoಘದ ಗುರ್ಕಾರೆರ್ ನ್ಯಾಯವಾದಿ ಭಗೀರಥ ಜಿ ಸಭೆತ ಗುರ್ಕಾಮೆನ್ ವಹಿಸ್ ದ್ ಪಾತೆರ್ದ್ 2022-23 ನೇ ಸಾಲ್ ಡ್ ಸಂಘ 114 ಕೋಟಿ ವ್ಯವಹಾರ ಮಲ್ತ್ ದ್ 54.80 ಲಕ್ಷ ನಿವ್ವಳ ಲಾಭ ಪಡೆತ್‌ಂಡ್, ಸದಸ್ಯೆರೆಗ್ ಶೇ.10 ಡಿವಿಡೆಂಡ್ ಕೊರ್ಪ ಪಂದ್ ಈ ಪೊರ್ತುಡು ಘೋಷಣೆ ಮಲ್ತೆರ್.

ಕರಿನ ಶೈಕ್ಷಣಿಕ ಸಾಲ್ ಡ್ ಉನ್ನತ ಶ್ರೇಣಿಡ್ ಎಡ್ಡೆ ಮಾರ್ಕ್ ದೆತ್ತಿನ ಸದಸ್ಯೆರ್ನ ಜೊಕ್ಲೆಗ್ ಪ್ರೋತ್ಸಾಹ ಧನ ಕೊರ್ದು ಮಾನಾದಿಗೆ ಮಲ್ತೆರ್. ಜಾಸ್ತಿ ಪಿಗ್ಮಿ ಸಂಗ್ರಹ ಮಲ್ತಿನ ಆನಂದ ಕೋಟ್ಯಾನ್ ಮೆರೆಗ್ ಈ ಪೊರ್ತುಡು ಮಾನಾದಿಗೆ ನಡತ್‌ಂಡ್.

ರೈತೆರೆಗ್ ತೋಟಗಾರಿಕಾ ಇಲಾಖೆದ ಸಹಾಯಕ ನಿರ್ದೇಶೆಕೆರಾಯಿನ ಚಂದ್ರಶೇಖರ ಬೊಕ್ಕ ತಂಡದಕುಲ್ ಮಾಹಿತಿ ಕೊರಿಯೆರ್.

ಮುಖ್ಯ ಕಾರ್ಯನಿರ್ವಾಹಣಾಧಿಕಾರಿ ರವಿಕಲಾ ಎನ್ ವಾರ್ಷಿಕ ವರದಿ ಮಂಡನೆ ಮಲ್ತೆರ್. ಸಂಘದ ಉಪಾಧ್ಯಕ್ಷೆರ್ ಸುಜಿತಾ ವಿ ಬಂಗೇರ, ನಿರ್ದೇಶೆಕೆರಾಯಿನ ನಾರಾಯಣ ರಾವ್ ಮುಗುಳಿ, ಶಾರದಾ, ಗೋಪಿನಾಥ ನಾಯಕ್, ಭುಜಂಗ ಕೆ ಶೆಟ್ಟಿ, ಚಂದ್ರರಾಜ್, ಪುರಂದರ ಶೆಟ್ಟಿ, ಹರಿಶ್ವಂದ್ರ, ಡಿ.ಸಿ.ಸಿ ಪ್ರತಿನಿಧಿ ಸಿರಾಜುದ್ದೀನ್, ಸಂಘದ ಸದಸ್ಯೆರ್, ಸಿಬ್ಬಂದಿಲು ಈ ಪೊರ್ತುಡು ಇತ್ತೆರ್. ನಿರ್ದೇಶೆಕೆರಾಯಿನ ಸಚಿನ್ ಕುಮಾರ್ ನೂಜೋಡಿ ಸೊಲ್ಮೆ ಸಂದಾಯ ಮಲ್ತೆರ್.

ವೇಣೂರು: 23 ನೇ ವರ್ಷದ ಗಣಪತಿ ಉಚ್ಚಯ

ವೇಣೂರು: ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿ, ಫಲ್ಗುಣಿ ಸೇವಾ ಸಂಘ ವೇಣೂರು ನೆತ್ತ ಮುತಾಲಿಕೆಡ್ ವೇಣೂರು ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆದ ಸಹಯೋಗಡ್ 23 ನೇ ವರ್ಷದ ಗಣಪತಿ ಉಚ್ಚಯ ಸೆ.19 ಬೊಕ್ಕ 20 ದಾನಿ ವೇಣೂರು ಪಂಚಾಯತ್ ಕಛೇರಿದ ಕೈತಲ್ ನಡಪೆರೆ ಉಂಡು.

ಸೆ.19 ಅಂಗಾರೆದಾನಿ 9 ಗಂಟೆಗ್ ಗಣಪತಿನ ಪ್ರತಿಷ್ಟೆ, 10 ಗಂಟೆರ್ದ್ 1 ಗಂಟೆ ಮುಟ ಬೇತೆ ಬೇತೆ ಸಾಂಸ್ಕೃತಿಕ ಕಾರ್ಯಕ್ರಮ, ಮದ್ಯಾಹ್ನ 2 ಗಂಟೆರ್ದ್ 5 ಗಂಟೆ ಮುಟ ವೇಣೂರು ಮಹಾಲಿಂಗೇಶ್ವರ ಯಕ್ಷಗಾನ ಸಂಘರ್ದ್ “ಇಂದ್ರಜಿತು ಕಾಳಗ” ಯಕ್ಷಗಾನ ತಾಳಮದ್ದಲೆ, ಬಯ್ಯ 5.30 ಗಂಟೆರ್ದ್ 7.45 ಮುಟ ವೇಣೂರು ತುಳುನಾಡ ಕಲಾವಿದೆರ್‌ರ್ದ್ “ತುಳುನಾಡ ವೈಭವ” ರಾತ್ರೆ 7.45 ಕ್ಕ್ ರಂಗಪೂಜೆ, 8 ಗಂಟೆರ್ದ್ 9.30 ಮುಟ ಧಾರ್ಮಿಕ ಸಭೆ ನಡಪೆರೆ ಉಂಡು. ನೆತ್ತ ಗುರ್ಕಾಮೆನ್ ಪಿಚ್ಚರ್ ಆಕ್ಟರ್, ಸಂಗೀತ ನಿರ್ದೇಶಕೆರ್ ಪ್ರಶಸ್ತಿ ವಿಜೇತೆರ್ ವಿ. ಮನೋಹರ್ ಬೆಂಗ್ಲೂರು ವಹಿಸೊನಿಯೆರೆ ಉಲ್ಲೆರ್. ಮೂಡಬಿದ್ರೆ ಆಳ್ವಾಸ್ ಕಾಲೇಜ್ ದ ಸಂಸ್ಕೃತ ವಿಭಾಗ, ಪ್ರಜ್ಞಾ ಸಂಸ್ಕೃತ ಸಂಘದ ಮುಖ್ಯಸ್ಥೆರ್ ಡಾ| ವಿನಾಯಕ ಭಟ್ ಗಾಳಿಮನೆ ಮಾರ್ಗಸೂಚಿ ಭಾಷಣ ಮಲ್ಪೆರೆ ಉಲ್ಲೆರ್. ಕಲೆಂಜ ಸ್ವಾಮಿ ವಿವೇಕಾನಂದ ಸೇವಾ ಟ್ರಸ್ಟ್ ದ ಪ್ರಧಾನ ಕಾರ್ಯದರ್ಶಿ ಸುಬ್ರಹ್ಮಣ್ಯ ಅಗರ್ತ ಮಲ್ಲ ಬಿನ್ನೆರಾದ್ ಪಾಲ್ ಪಡೆಯೆರೆ ಉಲ್ಲೆರ್. ಅಂಚನೆ ಈ ಪೊರ್ತುಡು ಫಲ್ಗುಣಿ ಸೇವಾ ಸಂಘದ ವತಿರ್ದ್ ಕಲ್ಪಾರ್ಥಿಲೆಗ್ ಕಲ್ಪಾರ್ಥಿ ವೇತನ ವಿತರಣೆ ಮಲ್ಪೆರೆ ಉಲ್ಲೆರ್. ಸಿ.ಎ ಪರೀಕ್ಷೆಡ್ 10 ನೇ ರ‍್ಯಾಂಕ್ ಪಡೆನ ದೀಪಕ್ ಹೆಗ್ಡೆ ಬೊಕ್ಕ ಯಕ್ಷಗಾನ ಕಲಾವಿದೆರ್ ಮನೋಜ್ ವೇಣೂರು ಮೊಕ್ಲೆಗ್ ಮಾನಾದಿಗೆ ನಡಪೆರೆ ಉಂಡು. ರಾತ್ರೆ 9.30 ಗಂಟೆಗ್ “ಸಂಗೀತ ರತ್ನ” ರಾಜ್ಯ ಪ್ರಶಸ್ತಿ ವಿಜೇತ ಪ್ರವೀಣ ಜಯ ವಿಟ್ಲ ಮೊಕ್ಲೆನ ಸಾರಥ್ಯಡ್ ನ್ಯೂ ಶೈನ್ ಮ್ಯೂಸಿಕಲ್ ವಿಟ್ಲ ಮೊಕ್ಲೆರ್ದ್ ಸಂಗೀತ ರಸಮಂಜರಿ ನಡಪೆರೆ ಉಂಡು.

ಸೆ.20 ಬುಧವಾರದಾನಿ ಕಾಂಡೆ 9.30 ಗಂಟೆರ್ದ್ 108 ತಾರಾಯಿದ ಗಣಹೋಮ ನಡಪೆರೆ ಉಂಡು. 1 ಗಂಟೆಗ್ ಮಹಾಮಂಗಳಾರತಿ ಆದ್ ಪ್ರಗತಿಪರ ಕೃಷಿಕೆರ್ ಹರೀಶ್ ಕುಮಾರ್ ಈ ಪೊರ್ತುಡು ಪಾಲ್ ಪಡೆಯೆರೆ ಉಲ್ಲೆರ್. ಮಧ್ಯಾಹ್ನ 2 ಗಂಟೆರ್ದ್ 5 ಗಂಟೆ ಮುಟ ನಲಿಕೆ ಭಜನೆ, 5.30 ಕ್ಕ್ ವೈಭವದ ಮೆರವಣಿಗೆದ ಒಟ್ಟಿಗೆ ಗಣೇಶನ ವಿಗ್ರಹದ ವಿಸರ್ಜನೆ ಆವೆರುಂಡು.