ಕುಡ್ಲ: ಕುಳಾಯಿದ ಚಿತ್ರಾಪುರ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಶರನ್ನವರಾತ್ರಿ ಪೂಜೆ, ಸಾರ್ವಜನಿಕ ಚಂಡಿಕಾಯಾಗ ಬೊಕ್ಕ ಶ್ರೀ ರಾಮತಾರಕ ಯಜ್ಞ ಅ.15-23 ಮುಟ್ಟ ನಡಪರೆ ಉಂಡು.
ಪ್ರತಿದಿನೊಲ ಬಯ್ಯಗ್ ಭಜನೆ ಆದ್ ಮಹಾಪೂಜೆ, ಇಸೇಸ ಪೂತ್ತ ಪೂಜೆ ನಡಪರೆ ಉಂಡು. ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಚಿತ್ರಾಪುರ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಬೊಕ್ಕ ಮಠತ್ತ ಅನುವಂಶಿಕ ಆಡಳಿತ ಮೊಕ್ತೇಸರೆರ್ ಶ್ರೀ ವಿದ್ಯೇಂದ್ರತೀರ್ಥ ಸ್ವಾಮೀಜಿ ಲೆಪ್ಪೋಲೆಡ್ ತೆರಿಪಾದೆರ್.
ಉಳ್ಳಾಲ: ಎದುರುಡ್‌ ಪೋವೊಂದು ಇತ್ತಿನ ಗಾಡಿ ಒಂಜಿ ಒರನೇ ಬ್ರೇಕ್‌ ಪಾಡಿನ ಪರಿಣಾಮಡ್‌ ಪಿರಾವುಡ್‌ ಇತ್ತಿನ ಬೈಕ್‌ದಾಯಗ್‌ ನಿಯಂತ್ರಣ ತಿಕ್ಕಂದೆ ಆಕ್ಸಿಡೆಂಟ್ ಆದ್ ಬೈಕ್‌ ಸವಾರೆ ತೀರ್‌ಪೋಯಿನ ಘಟನೆ ಅ.11 ದಾನಿ ನಡತ್ಂಡ್.
ಉಳ್ಳಾಲದ ಪ್ರಸ್ತುತ ಕೋಟೆಕಾರ್‌ದ ನಿವಾಸಿ ಅಝ್‌ವೀನ್ (21)ತೀರ್‌ಪೋಯಿನ ಜವನೆ. ಮೀನುಗಾರಿಕೆದ ಬೇಲೆಗ್‌ ಪೋನಗ ತೊಕ್ಕೊಟ್ಟುರ್ದ್‌ ಕುಡ್ಲದಂಚಿ ಕಾಂಡೆ ಪೋನಗ ಈ ಘಟನೆ ನಡತ್‌ದ್‌ಂಡ್. ಸಂಚಾರ ಪೊಲೀಸ್ ಠಾಣೆದ ಪೊಲೀಸೆರ್ ತನಿಖೆ ಮಲ್ತ್ದೆರ್.
ವಿಟ್ಲ : ಬಿಲ್ಲವ ಸಂಘದ ಮಹಿಳಾ ಘಟಕದ ಕಾರ್ಯಕಾರಿ ಸಮಿತಿದ ಪದಾಧಿಕಾರಿಲೆನ ಆಯ್ಕೆ ಇಂಚೊಗು ಬಿಲ್ಲವ ಸಂಘದ ಮಹಾಸಭೆಟ್‌ ನಡತ್ಂಡ್.
ಗುರ್ಕಾರ್ದಿ ಆದ್ ಮಮತಾ ಸಂಜೀವ ಪೂಜಾರಿ, ಗೌರವಾಧ್ಯಕ್ಷೆ ಪ್ರೇಮಲತಾ, ಉಪಾಧ್ಯಕ್ಷೆ ಲತಾ ಗಣೇಶ್ ಪೂಜಾರಿ ಪಟ್ಲ, ಕಾರ್ಯದರ್ಶಿಯಾದ್ ಭಾರತಿ ಪ್ರಕಾಶ್, ಜೊತೆ ಕಾರ್ಯದರ್ಶಿಯಾದ್ ಶೋಭಾ ಪಟ್ಲ, ಕೋಶಾಧಿಕಾರಿಯಾದ್ ಪ್ರಮೀಳಾ, ಸಂಘಟನಾ ಕಾರ್ಯದರ್ಶಿಯಾದ್ ನಿರ್ಮಲ, ಕ್ರೀಡಾ ಕಾರ್ಯದರ್ಶಿಯಾದ್ ಧನಲಕ್ಷ್ಮೀ ರಾಜೇಶ್, ಸುನಿತಾ ಸುಂದರ ಆಯ್ಕೆಯಾತೆರ್. ಈ ಪೊರ್ತುಡು ಕಾರ್ಯಕಾರಿ ಸಮಿತಿ ಸದಸ್ಯರೆನ್ಲ ನೇಮಕ ಮಲ್ತೆರ್.
ಕುಕ್ಕೆ ಸುಬ್ರಹ್ಮಣ್ಯ ಪಾರ್ಕಿಂಗ್‌ಡ್‌ ಉಂತಾದ್‌ ಇತ್ತಿನ ಕಾರ್‌ದ ಕನ್ನಡಿ ಪುಡತ್ತ್‌ದ್‌ ಬಂಗಾರ್‌ ಕಂಡಿನ ಕಲ್ವನ್‌ ಸುಬ್ರಹ್ಮಣ್ಯದ ಪೊಲೀಸೆರ್ ಅರೆಸ್ಟ್ ಮಲ್ತ್ದೆರ್. ಪ್ರಭಾಕರ ಹೊನ್ನವಳ್ಳಿ ಪನ್ಪಿನಾಯೆ ಅರೆಸ್ಟ್ ಆಯಿನ ಆರೋಪಿ.
ಸುಬ್ರಹ್ಮಣ್ಯ ಪೊಲೀಸ್ ಠಾಣಾಧಿಕಾರಿ ಕಾರ್ತಿಕ್ ಬೊಕ್ಕ ಮುರಳೀಧರ ನಾಯಕ್, ಕರುಣಾಕರ ಅಂಚನೆ ಸಿಬ್ಬಂದಿಲೆನ ರಡ್ಡ್‌ ಟೀಮ್ ಮಲ್ತ್‌ದ್ ಆರೋಪಿನ್‌ ಸುಬ್ರಹ್ಮಣ್ಯ ರೋಡ್ ರೈಲ್ವೆ ಸ್ಟೇಷನ್‌ಡ್ ಪತ್ ದೆರ್. ಆರೋಪಿನ ಮಿತ್ತ್ ಹೊನ್ನವಳ್ಳಿ ಸೇರಿನಂಚ ಬೇತೆ ಬೇತೆ ಸ್ಟೇಷನ್‌ಡ್ ಕೇಸ್ ಇತ್ತ್‌ದ್‌, ದೇವಸ್ಥಾನಲೆಗ್‌ ಪೋದ್‌ ಏರ್ಲ ಇಜ್ಜಂದಿನ ಪೊರ್ತುಡು ಕಾರ್‌ದ ಕನ್ನಡಿ ಪುಡತ್ತ್‌ದ್‌ ಕಂಡುನ ಬೇಲೆ ಮಲ್ಪುವೆ ಪಂದ್ ಪೊಲೀಸೆರ್ ತೆರಿಪಾದೆರ್. ಆರೋಪಿನ್‌ ಅರೆಸ್ಟ್ ಮಲ್ತ್‌ದ್ ಸುಳ್ಯ ಕೋರ್ಟ್‌ಗ್‌ ಹಾಜರ್‌ ಪಡಿಸಾದ್‌, ಕುಡ್ಲ ಜೈಲ್‌ಗ್‌ ಪಾರ್ದೆರ್‌ ಪಂದ್ ತೆರಿದ್ ಬೈದ್ಂಡ್.
ದೇವರ ಮನೆ ಪ್ರವಾಸಗ್‌ ಬತ್ತ್ ಇತ್ತಿನ ಬೋಲ್ತೆರ್‌ ತಾಲೂಕುದ ಕೊಯ್ಯೂರು ಗ್ರಾಮದ ದೀಕ್ಷಿತ್ ಅಕ್ಟೋಬರ್ 10 ದಾನಿ ಅಂಗಾರೆ ಬಯ್ಯಗ್ ನಾಪತ್ತೆ ಆದ್, ಆಂಡ ಇತ್ತೆ ಅಕ್ಟೋಬರ್ 11 ದಾನಿ ಕಾಂಡೆ ಇಲ್ಲದ ಕೈತಲ್‌ದ ಮೋರಿಡ್ ಪತ್ತೆ ಆತೆ. ಮೋರಿಡ್ ಕುಲ್ದ್‌ ಇತ್ತಿನಾಯನ್‌ ಊರುದಕುಲ್‌ ಇಲ್ಲಗ್‌ ಬುಡ್ದು ನಾಪತ್ತೆ ಪ್ರಕರಣ ಸುಖಾಂತ್ಯ ಆತ್ಂಡ್.
ಜವನೇ ಬೇತೆ ಗಾಡಿದ ಮುಖೇನ ಊರುಗ್‌ ಬತ್ತ್‌ದ್‌ ಪತ್ತೆ ಆತಿನ ಬಗ್ಗೆಟ್ ಬಣಕಲ್ ಪೊಲೀಸೆರೆಗ್‌ ಇಲ್ಲದಕುಲ್‌ ಮಾಹಿತಿ ಕೊರ್ತೆರ್.
ಕುಡ್ಲ: ತುಳುನಾಡ್ ದ ಕಲೆ, ಸಂಸ್ಕೃತಿನ್ ಒರಿಪಾವುನ ದಿಟ್ಟಿಡ್ ಸುರು ಆಯಿನ ಕುಡ್ಲ ಸಾಂಸ್ಕೃತಿಕ ಪ್ರತಿಷ್ಠಾನದ ರಡ್ಡನೇ ವರ್ಷೊದ ಪಿಲಿಪರ್ಬದ ಲೆಪ್ಪೋಲೆನ್ ಪ್ರತಿಷ್ಠಾನದ ಮಾರ್ಗದರ್ಶಕೆರ್, ಸಂಸದೆರ್, ಬಿಜೆಪಿ ರಾಜ್ಯಾಧ್ಯಕ್ಷೆರ್ ನಳಿನ್ ಕುಮಾರ್ ಕಟೀಲ್ ಕುಡ್ಲಡ್ ಬುಡುಗಡೆ ಮಲ್ತೆರ್.
ಬೊಕ್ಕ ಮೇರ್ ಪಾತೆರ್ದ್, ಕುಡ್ಲದ ಕೇಂದ್ರ ಮೈದಾನಡ್ ಅ.21 ಕ್ಕ್ ನಡಪುನ ಪಿಲಿಪರ್ಬ ಈ ವರ್ಷ ಗೌಜಿಡ್ ನಡಪರೆ ಉಂಡು. ಒಟ್ಟು 15 ಕೂಟಲು ಪಾಲ್ ಪಡೆಯೆರೆ ಉಂಡು ಪಂದ್ ಪಂಡೆರ್.
ಪಿಲಿಪರ್ಬದ ಗುರ್ಕಾರ್ಮೆನ್ ಒಯಿಸೊನ್ನ ಶಾಸಕೆರ್ ವೇದವ್ಯಾಸ ಕಾಮತ್ ಪಾತೆರ್ದ್, ತುಳುನಾಡ್ ದ ಸಂಸ್ಕೃತಿ ಪಿಲಿಏಸನ್ ರಾಜ್ಯ, ದೇಶ, ಅಂತಾರಾಷ್ಟ್ರೀಯ ಮಟ್ಟಡ್ ಪ್ರಚಾರ ಮಲ್ಪರೆ ನಮ್ಮ ಪ್ರತಿಷ್ಠಾನ ತಯಾರ್ ಆತ್ಂಡ್. ಪಿಲಿಏಸ ಪಾಡಿನಕ್ಲೆನ್ ಪ್ರೋತ್ಸಾಹ ಮಲ್ಪುನ ದಿಟ್ಟಿಡ್ ಈ ವೇದಿಕೆನ್ ನಿರ್ಮಾಣ ಮಲ್ದ್ಂಡ್. ನೆಕ್ಕ್ ಮಸ್ತ್ ಕಾಸ್ ಖರ್ಚಾಪುಂಡು. ಎಂಕ್ಲೆನ್ ಬೆಂಬಲಿಸಾಯೆರೆ ದುಂಬು ಬತ್ತಿನ ಮಾತ ಸಂಘ, ಸಂಸ್ಥೆಲೆಗ್ ಅಭಿನಂದನೆ ಸಂದಾವೆ ಪಂದ್ ಪಂಡೆರ್.
ಈ ಪೊರ್ತುಡು ಪ್ರತಿಷ್ಠಾನದ ಮಾನಾದಿಗೆದ ಗುರ್ಕಾರೆ ಗಿರಿಧರ್ ಶೆಟ್ಟಿ, ಗುರ್ಕಾರೆ ದಿವಾಕರ ಪಾಂಡೇಶ್ವರ, ಪ್ರಮುಖೆರ್ ಮಂಗಲ್ಪಾಡಿ ನರೇಶ್ ಶೆಣೈ, ಜಗದೀಶ್ ಕದ್ರಿ, ಚೇತನ್ ಕಾಮತ್, ಲಲಿತ್ ಮೆಂಡನ್, ಶಾನ್ ಪಾಲ್ ಪಡೆದಿತ್ತೆರ್.
ಒಡಿಪು: ಕೋಟ ಶಿವರಾಮ ಕಾರಂತೆರೆನ ಪುಟ್ಟು ಪರ್ಬದ ಆಚರಣೆಗ್ ಒಡಿಪು ಜಿಲ್ಲೆಗ್ ಕರ್ನಾಟಕ ರಾಜ್ಯದ ರಾಜ್ಯಪಾಲೆರ್ ಥಾವರ್ ಚಂದ್ ಗೆಹ್ಲೋಟ್ ಭೇಟಿ ಕೊರಿಯೆರ್.
ಅವೆರ್ದ್ ಬೊಕ್ಕ ಕೊಲ್ಲೂರು ಶ್ರೀ ಮೂಕಾಂಬಿಕಾ ದೇವಲ್ಯಗ್ ಭೇಟಿ ಕೊರ್ದು ಬಯ್ಯಗ್ ಕುಡ ಕುಡ್ಲ ಇಮಾನ ನಿಲ್ದಾಣದ ಮುಖೇನ ಬೆಂಗ್ಲೂರುಗ್ ಪ್ರಯಾಣ ಮಲ್ತೆರ್. ಮೆರೆಗ್ ಒಡಿಪು ಬಿಜೆಪಿ ನಿಯೋಗರ್ದ್ ಮಾನಾದಿಗೆ ಮಲ್ತೆರ್. ಜಿಲ್ಲಾ ಬಿಜೆಪಿ ಗುರ್ಕಾರೆ ಕುಯಿಲಾಡಿ ಸುರೇಶ್ ನಾಯಕ್ ರಾಜ್ಯಪಾಲೆರೆಗ್ ಅಭಿನಂದನೆ ಸಂದಾಯೆರ್.
ಈ ಪೊರ್ತುಡು ವಿಭಾಗ ಪ್ರಭಾರಿಲಾಯಿನ ಉದಯ ಕುಮಾರ್ ಶೆಟ್ಟಿ, ಶಾಸಕೆರ್ ಯಶ್ಪಾಲ್ ಸುವರ್ಣ, ಗುರ್ಮೆ ಸುರೇಶ್ ಶೆಟ್ಟಿ, ಗುರುರಾಜ್ ಗಂಟಿಹೊಳೆ, ಮಾಜಿ ಶಾಸಕೆರ್ ಕೆ ರಘುಪತಿ ಭಟ್, ಪ್ರಮೋದ್ ಮಧ್ವರಾಜ್, ಬಿಜೆಪಿ ಜಿಲ್ಲಾ ಪಧಾನ ಕಾರ್ಯದರ್ಶಿ ಕುತ್ಯಾರು ನವೀನ ಶೆಟ್ಟಿ, ಜಿಲ್ಲಾ ಬಿಜೆಪಿ ವಕ್ತಾರೆರ್ ಕೆ ರಾಘವೇಂದ್ರ ಕಿಣಿ, ಪೂರ್ಣಿಮಾ ಸುರೇಶ್ ಪಾಲ್ ಪಡೆದಿತ್ತೆರ್.
ಪಣಂಬೂರು: ಮಡಿಕೇರಿದ ಒಂಜಿ ಜನ ಪಣಂಬೂರು ಪೊಲೀಸ್ ಠಾಣೆ ವ್ಯಾಪ್ತಿದ ಬಬ್ಬು ಸ್ವಾಮಿ ದೈವೊಲ್ಯಡ್ ಬಲ್ಲ್ ಪಾಡೊಂದು ತೀರ್ ಪೋಯಿನ ಘಟನೆ ನಡತ್ ದ್ಂಡ್.
ತೀರ್ ಪೋಯಿನಾರ್ ಕೊಡಗು ಜಿಲ್ಲೆ ಮಡಿಕೇರಿ ತಾಲೂಕ್ ದ ಗೋಪಾಲ (64) ಪಂದ್ ತೆರಿದ್ ಬೈದ್ಂಡ್. ಮೆರೆನ ಸಾವುಗ್ ನಿಜವಾಯಿನ ಕಾರಣ ತೆರಿದ್ ಬೈದಿಜಿ. ಈ ಘಟನೆಗ್ ಸಂಬಂಧ ಪಟ್ಟಿನಂಚೆನೆ ಪಣಂಬೂರು ಪೊಲೀಸೆರ್ ಜಾಗೆ ಪರಿಶೀಲನೆ ನಡಪಾದ್ ಕೇಸ್ ದಾಖಲ್ ಮಲ್ದೆರ್.
ಮುಲ್ಕಿ: ಕೇಂದ್ರ ಸರಕಾರದ ರಾಷ್ಟ್ರೀಯ ಹೆದ್ದಾರಿ ಸಚಿವಾಲಯದ ವ್ಯಾಪ್ತಿಡ್ 1934 ರಲ್ಲಿ ರಚನೆ ಆಯಿನ ಇಂಜಿನಿಯರ್ಸ್ ಬೊಕ್ಕ ತಾಂತ್ರಿಕ ಪರಿಣಿತರ ಸದಸ್ಯೆರ್ ಇಪ್ಪುನ ಉನ್ನತ ಸಮಿತಿ, ಇಂಡಿಯನ್ ರೋಡ್ಸ್ ಕಾಂಗ್ರೆಸ್ ( ಐ ಆರ್ ಸಿ) ದ ಸದಸ್ಯೆರಾದ್ ಮುಲ್ಕಿ ಇಂಜಿನಿಯರ್ಸ್ ಅಸೋಸಿಯೇಷನ್‌ದ ಅಧ್ಯಕ್ಷೆರ್ ಮುಲ್ಕಿ ಕೆ. ಜೀವನ್ ಶೆಟ್ಟಿ ಮೇರ್ ಆಯ್ಕೆ ಆತೆರ್.
ದೇಶದ ಹೆದ್ದಾರಿದ ವಿಷಯಡ್ ಈ ಸಮಿತಿ ಅನುಭವ ಬೊಕ್ಕ ಸಲಹೆನ್ ಸದಸ್ಯರೆರ್ದ್‌ ಪಡೆಯೊಂದು ಕುಂದು ಕೊರತೆ ನಿವಾರಿಸಾದ್ ದೇಶದ ಅಭಿವೃದ್ಧಿದ ಬೇಲೆ ಮಲ್ಪೆರೆ ಜೀವನ್ ಶೆಟ್ರೆಗ್ ಐಆರ್‌ ಸಿದ ಸದಸ್ಯತ್ವ ಕೊರ್ತುಂಡು.
ಬೈಂದೂರು ಬಿಜೆಪಿ ಟಿಕೆಟ್ ದೆಪ್ಪಾದ್ ಕೊರ್ಪೆ ಪಂದ್ ಉದ್ಯಮಿ ಗೋವಿಂದ್ ಬಾಬು ಪೂಜಾರಿಡ ಕೋಟಿಗಟ್ಲೆ ಕಾಸ್ ಪೀಂಕಾದ್ ವಂಚನೆ ಮಲ್ತ್‌ ಇತ್ತಿನ ಚೈತ್ರಾ ಪ್ರಕರಣೊಡು ಇತ್ತೆ ವಿಚಾರಣೆಗ್ ಬರಿಯೆರೆ ವಜ್ರದೇಹಿ ಸ್ವಾಮಿಲೆಗ್ ಬೆಂಗ್ಳೂರ್ ಸಿಸಿಬಿ ಪೊಲೀಸೆರ್ ನೋಟಿಸ್ ಕೊರ್ತೆರ್.
ಕುಡ್ಲದ ಗುರುಪುರೊಟುಪ್ಪುನ ವಜ್ರದೇಹಿ ಮಠೊತ ರಾಜಶೇಖರಾನಂದ ಸ್ವಾಮಿಲೆಗ್ ನೋಟೀಸ್ ಕಡಪುರ್ದ್, ದುಂಬುದ ದಿನೊಟು ಸ್ವಾಮೀಜಿ ವಿಚಾರಣೆಗ್ ಹಾಜಿರಾವರೆ ಉಲ್ಲೆರ್ ಪಂದ್ ತೆರಿದ್ ಬೈದ್ಂಡ್.
