ಸುಳ್ಯ ದ ಸುದ್ದಿ | Sullia News

ಹುಷಾರ್ ದಾoತೆ ತೀರ್ ಪೋಯೆರ್ ಹಿರಿಯ ಪತ್ರಕರ್ತೆ ಸುರೇಂದ್ರ ಶೆಟ್ಟಿ

ಕುಡ್ಲ, ಮೇ 04 : ಹಿರಿಯ ಪತ್ರಕರ್ತೆರ್, ಕನ್ನಡಪ್ರಭ ಕುಡ್ಲ ಬ್ಯೂರೊದ ಮಾಜಿ ಮುಖ್ಯಸ್ಥೆರ್ ಸುರೇಂದ್ರ ಶೆಟ್ಟಿ (57) ಮೇರ್ ಒಂತೆ ದಿನತ್ತ ಅನಾರೋಗ್ಯಡ್ ಅಂಗಾರೆದಾನಿ ಖಾಸಗಿ ಆಸ್ಪತ್ರೆಡ್ ತೀರ್ ಪೋಯೆರ್.

ಬ್ರಹ್ಮಾವರದ ಆವರ್ಸೆ ಪಡುಮನೆ ಮೂಲದ ಸುರೇಂದ್ರ ಶೆಟ್ಟಿ ಮಂಗಳೂರು ವಿಶ್ವವಿದ್ಯಾನಿಲಯದ ಸಮೂಹ ಸಂವಹನ ಬೊಕ್ಕ ಪತ್ರಿಕೋದ್ಯಮ ವಿಭಾಗೊಡು ಸ್ನಾತಕೋತ್ತರ ಪದವಿ ಪಡೆತೆರ್, ಮ್ಯಾಮ್ ಸಂಘಟನೆದ ಸ್ಥಾಪಕ ಗೌರವಾಧ್ಯಕ್ಷೆರ್ ಆದಿತ್ತೆರ್.

ಮುಂಗಾರು, ಸಂಯುಕ್ತ ಕರ್ನಾಟಕ, ಕನ್ನಡಪ್ರಭ, ವಿಜಯ ಕರ್ನಾಟಕ, ವಾರ್ತಾ ಭಾರತಿ ಇಂಚಿನ ಮಲ್ಲ ಮಲ್ಲ ಪತ್ರಿಕೆಲೆಡ್ ಕೆಲಸ ಮಲ್ದೆರ್ , ಇಂಚೊಗು ಕನ್ನಡಪರ ಪತ್ರಿಕೆದ ಕುಡ್ಲದ ಮುಖ್ಯಸ್ಥರಾದ್ ಕೆಲಸ ಮಲ್ತಿತ್ತೆರ್. ಆರ್ ಬುಡೆದಿ, ಮಗಲ್ ಬೊಕ್ಕ ಕುಟುಂಬಿಕೆ‌ರ್ ಅಂಚೆನೆ ಮಲ್ಲ ಸಂಖ್ಯೆದ ಮಾಧ್ಯಮ ಮಿತ್ರೆರೆನ್ ಬುರ್ದು ದೇವೆರೆ ಪಾದ ಸೇರ್ದೆರ್.

ಮುಲ್ಕಿ- ಬೆದ್ರ ಬ್ಲಾಕ್ ಕಾಂಗ್ರೆಸ್ ರ್ದ್ ಕೊರೊನಾ ಸಂತ್ರಸ್ತೆರೆಗ್ ಧರ್ಮಾರ್ಥ ಆಂಬುಲೆನ್ಸ್

ಮುಲ್ಕಿ : ಕೊರೊನಾ ಸೀಕ್ ದಕಲೆನ ಸೇವೆಗಾದ್ ಮುಲ್ಕಿ ಬೆದ್ರ ಬ್ಲಾಕ್ ಕಾಂಗ್ರೆಸ್ ವತಿರ್ದ್ ಧರ್ಮಾರ್ಥ ಆಂಬುಲೆನ್ಸ್ ಸೇವೆಗ್ ಕುಡ್ಲದ ಮಲ್ಲಿಕಟ್ಟೆದ ಕಾಂಗ್ರೆಸ್ ಕಚೇರಿದಲ್ಪ ಸೋಮಾರ ಚಾಲನೆ ತಿಕ್ ದ್ಂಡ್.ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಯುವ ನಾಯಕೆರ್, ಮುಲ್ಕಿ- ಬೆದ್ರ ಕ್ಷೇತ್ರದ ಉಸ್ತುವಾರಿ ಮಿಥುನ್ ರೈ ಈ ಲೇಸ್ ಡ್ ಪಾಲ್ ಪಡೆಯೆರ್.
ಮಾಜಿ ಸಚಿವೆರ್ ಅಭಯಚಂದ್ರ ಜೈನ್ ಈ ವಿಚಾರೊಡು ಸುದ್ದಿಗೋಷ್ಠಿಡ್ ಪಾತೆರ್ದ್, ಬಡವೆರೆನ ಸೇವೆ ಮಲ್ಪರೆ ಮಾಜಿ ಪ್ರಧಾನಿ ದಿ. ಇಂದಿರಾ ಗಾಂಧಿ ಪ್ರೇರಣೆ. ಕೊರೊನಾದ ಪೊರ್ತುಡು ಆಸ್ಪತ್ರೆ ಸೇರ್ಸಾವರೆ ಅಂಬುಲೆನ್ಸ್ ನ್ ಉಚಿತವಾದ್ ಕೊರೊಂದುಲ್ಲ ಪಂಡೆರ್.
ಈ ಅಂಬುಲೆನ್ಸ್ ಗ್ ಯಾನ್ 50 ಸಾರ ರೂಪಾಯಿ, ಉದ್ಯಮಿ ಶ್ರೀಪತಿ ಆಚಾರ್ಯ 50 ಸಾರ ರೂಪಾಯಿ ದೇಣಿಗೆ ಕೊರ್ತ. ಬೆದ್ರದ ಸಿ.ಎಚ್. ಮೆಡಿಕಲ್ಸ್ ದಕುಲು ಆಂಬುಲೆನ್ಸ್ ಡ್ ಆಕ್ಸಿಜನ್ ಜೋಡಣೆ ಮಲ್ದೆರ್. ಸೌಹಾರ್ದ ಫ್ರೆಂಡ್ಸ್ ಕ್ಲಬ್ ದಕುಲು ಈ ಆಂಬುಲೆನ್ಸ್ ನ್ ರೋಗಿನಕ್ಲೆನಡೆ ಮುಟ್ಟಾವುನ ಕೆಲಸ ಮಲ್ತೊಂದದುಲ್ಲೆರ್ ಪಂಡ್ ದ್ ಅಭಯಚಂದ್ರ ಜೈನ್ ತೆರಿಪಾಯೆರ್.

ಬಂಟ್ವಾಳ ಪೇಂಟೆಡ್ ಜಾಸ್ತಿ ಆವೊಂದು ಉಪ್ಪುನ ಗಾಡಿಲೆದ ಸಂಚಾರ

ಬಂಟ್ವಾಳ, ಮೇ 03: : ಕೊರೊನಾ ನಿಯಂತ್ರಣದ ದೃಷ್ಟಿರ್ದ್ ಸರಕಾರ ಜಾರಿ ಮಲ್ದಿನ ಲಾಕ್‌ಡೌನ್‌ ಮಾದರಿದ ಕರ್ಫ್ಯೂ 4ನೇ ದಿನಲಾ ದುಂಬು ಬೈದುಂಡು. ಆಂಡ ಕಾಂಡೆದ ಪೊರ್ತು ಅಗತ್ಯ ವಸ್ತುಲೆನ ಖರೀದಿದ ನೆವಟ್ಟ್ ದಿನೇ ದಿನೇ ವಾಹನದ ಸವಾರಿ ಜಾಸ್ತಿ ಆವೊಂದು ಉಂಡು.ಶನಿವಾರಲಾ ಇಂಚನೇ ಗಾಡಿ ಪೋವೊಂದು ಇತ್ತುಂಡು ಇಂಚಾದ್ ಕಾಂಡೆ ಬಂಟ್ವಾಳ ಪೇಂಟೆಡ್ ಸಂಚಾರದೊತ್ತಡ ತೊಜಿದ್ ಬತ್ತುಂಡು . ಪೇಂಟೆದ ಬಿ.ಸಿ.ರೋಡ್‌, ಬಂಟ್ವಾಳ ಪೇಟೆ, ಕಲ್ಲಡ್ಕ, ಮೆಲ್ಕಾರ್‌, ವಿಟ್ಲ, ಮಾಣಿ, ಕೈಕಂಬ, ಫರಂಗಿಪೇಟೆ, ವಾಮದಪದವು, ಸಿದ್ದಕಟ್ಟೆ, ಪುಂಜಾಲಕಟ್ಟೆ ಇಂಚಿದ ಜಾಗೆಡ್ ಜಾಸ್ತಿ ಗಾಡಿ ಪೋವೊಂದು ಇತ್ತುಂಡು.

ನಡ ಗ್ರಾಮದ ಗಡಾಯಿಕಲ್ಲ್ ಡ್ ಬಂಡೆಕಲ್ಲ್ ದ ಒಂಜಿ ಪಾಲ್ ತುಂಡು : ಪೋಡಿದ್ ಪೋಯಿನ ಗ್ರಾಮಸ್ಥೆರ್

ಬೆಳ್ತಂಗಡಿ, ಮೇ 03 : ಬೆಳ್ತಂಗಡಿ ಪೇಂಟೆದ ಇತಿಹಾಸ ಪ್ರಸಿದ್ಧ ನಡ ಗ್ರಾಮದ ಗಡಾಯಿಕಲ್ಲ ಡ್ ಕೋಡೆ ಕಾಂಡೆ ಬಾರಿ ಶಬ್ದದೊಟ್ಟುಗು ಬಂಡೆಕಲ್ಲ್ ದ ಒಂಜಿ ಪಾಲ್ ತುಂಡಾದ್ ತಿರ್ತ್ ಬೂರ್ದುಂಡು.

ರಾತ್ರಿ ಭಾರೀ ಬರ್ಸ ಬೈದಿನೇರ್ದಾವರ ತೆಡಿಲ್ ಆಕ್ ದ್ ದು ಬಂಡೆ ತುಂಡಾದ್ ತಿರ್ತ್ ಬೂರ್ದು ಉಪ್ಪು ಪಂದ್ ಕೈತಲ್ ದಕುಲು ಪಂಡೆರ್. . ಕರಿನ ವರ್ಷಲಾ ಇಂಚನೇ ಬಂಡೆದ ತುಂಡೊಂಜಿ ಬೂರ್ದು ಜನಕ್ಲೆಗ್ ಆತಂಕ ಆದಿತ್ತುಂಡು.

ಅರಣ್ಯ ಇಲಾಖೆದ ಅಧಿಕಾರಿಲು ಈ ಬಗ್ಗೆ ಮಾಹಿತಿ ಪಡೆತೆರ್ . ಸ್ಫೋಟದ ಶಬ್ದ ಸುಮಾರು 1 ಕಿ.ಮೀ ರ್ದ್ ಜಾಸ್ತಿ ದೂರ ಕೇಂದುಂಡು ಪಂದ್ ಕೈತಲ್ ದಕುಲು ಪಂತೆರ್.

ಎಸ್ಸೆಸ್ಸೆಲ್ಸಿ ಫಲಿತಾಂಶಡ್ ದಾಖಲೆ ಮಲ್ಪುನ ನೆಲೆಟ್ಟ್ ಪಾಸಿಂಗ್ ಪ್ಯಾಕೇಜ್ ಅಭಿಯಾನ

ಕರ್ನಾಟಕ, ಮೇ 03: ಎಸ್ಸೆಸ್ಸೆಲ್ಸಿ ಫಲಿತಾಂಶಡ್ ದಾಖಲೆ ಮಲ್ಪುನ ನೆಲೆಟ್ಟ್ 5 ವರ್ಷ ಪಿರವು ಮಿಶನ್ 90 ಪ್ಲಸ್ ಜಾರಿ ಕಂತಿನ ರಾಜ್ಯಡೇ ಪೊಸ ಹುಮ್ಮಸ್ ಮೂಡಾಯಿನ ಪುತ್ತೂರು ಪೇಂಟೆಡ್ ಈ ಸಲ ಕುಡೊಂಜಿ ವಿನೂತನ ಅಭಿಯಾನ ನಡತೊಂದು ಉಂಡು . ಉತ್ತೀರ್ಣವೇ ಕಷ್ಟ ಪನ್ಪಿನ ಸ್ಥಿತಿಟುಪ್ಪುನ ಜೋಕುಲು ಒವ್ವೆ ಪೋಡಿಗೆ ಇಜ್ಜಂದೆ ಪಾಸ್ ಆವೊಡು ಪನ್ಪಿ ಕಾರಣಗ್ ಪಾಸಿಂಗ್ ಪ್ಯಾಕೇಜ್ ಮಲ್ದೆರ್ , ನೆತ್ತ ಅಡಿಟ್ ಮಸ್ತ್ ಆಂದೋಲನ ನಡಪಾವೊಂದು ಉಲ್ಲೆರ್.

24 ಸರಕಾರಿ ಪ್ರೌಢಶಾಲೆ, 22 ಅನುದಾನಿತ ಪ್ರೌಢಶಾಲೆ, ಮತ್ತು 34 ಅನುದಾನ ರಹಿತ ಪ್ರೌಢಶಾಲೆ, 80 ಪ್ರೌಢಶಾಲೆರ್ದ್ ತಲಾ 5078 ವಿದ್ಯಾರ್ಥಿಲು ಈ ಸಲ ಪರೀಕ್ಷೆಗೆ ಬರೆಯೊಂದು ಉಲ್ಲೆರ್ .

ಲಾಕ್ ಡೌನ್ ಸಂತ್ರಸ್ತೆರೆಗ್ ಮುಲ್ಕಿ ಯುವ ಕಾಂಗ್ರೆಸ್ ರ್ದ್ ವಣಸ್ ದ ವ್ಯವಸ್ಥೆ

ಮುಲ್ಕಿ : ಲಾಕ್ ಡೌನ್ ದ ಪೊರ್ತುಡು ಮಾರ್ಗದ ಬರಿಟ್ಟ್ ಕುಲ್ದಿನ ನಿರಾಶ್ರಿತೆರ್, ಅಂಗವಿಕಲೆರ್, ದೂರದ ಊರುಗು ನಡತೊಂದು ಪೋಪಿನಕ್ಲೆಗ್ ಬೊಕ್ಕ ಬಡಪತ್ತ್ ದಕ್ಲೆಗ್ ವಣಸ್, ತಿಂಡಿದ ವ್ಯವಸ್ಥೆನ್ ಮುಲ್ಕಿ ಬ್ಲಾಕ್ ಯುವ ಕಾಂಗ್ರೆಸ್ ಕರಿನ ಮೂಜಿ ದಿನೊರ್ದಿಂಚಿ ವ್ಯವಸ್ಥೆ ಮಲ್ದ್ಂಡ್.
ಕೋವಿಡ್ ದ ರಡ್ಡನೇ ಲಾಕ್ ಡೌನ್ ದ ಕಾರಣೊಡು ವಣಸ್ ತೆನಸ್ ದಾಂತಿನ ಬಡವರೆಗ್, ಅಂಗವಿಕಲೆರೆಗ್ ಎಂಕುಲು ಈ ವ್ಯವಸ್ಥೆ ಮಲ್ತ್ ದ.

ಒರಿ ಒರಿಯೆ ಇತ್ತಿನಕ್ಲೆಗ್ಲ ವಣಸ್, ತಿಂಡಿದ ವ್ಯವಸ್ಥೆ ಮಲ್ತೊಂದುಲ್ಲ ಪಂಡ್ ದ್ ಯುವ ಕಾಂಗ್ರೆಸ್ ಅಧ್ಯಕ್ಷೆರ್ ಅಶೋಕ್ ಪೂಜಾರ್ ಪಂಡೆರ್.ಮೂಲ್ಕಿ ನಗರ ಪಂಚಾಯತ್ ಸದಸ್ಯೆರ್ ಯೋಗೀಶ್ ಕೋಟ್ಯಾನ್, ಕಾಂಗ್ರೆಸ್ ದ ಹಿಂದುಳಿದ ವರ್ಗದ ಕಾರ್ಯದರ್ಶಿ ಪ್ರವೀಣ್ ಬೊಳ್ಳೂರು, ಕ್ಷೇತ್ರದ ಇಂಟಕ್ ಅಧ್ಯಕ್ಷೆರ್ ಮೋಹನ್ ಕೋಟ್ಯಾನ್ ಶಿಮಂತೂರು, ಧರ್ಮಾನಂದ ಶೆಟ್ಟಿಗಾರ್ ತೋಕೂರು, ಲೋಕೇಶ್ ಕೋಟ್ಯಾನ್ ಮೊಕುಲು ಮಾತ ಇತ್ತೆರ್.