ಬೊಲ್ತೆರ್ ಸುದ್ದಿ | Belthangady News

ಕುಂದಾಪುರದ ಭಾರತೀಯ ರೆಡ್‌ಕ್ರಾಸ್ ಸಂಸ್ಥೆಡ್ ನೆತ್ತೆರ್ ಗ್ ಕೊರತೆ ಇಜ್ಜಿ : ಜಯಕರ ಶೆಟ್ಟಿ

ಕುಂದಾಪುರ, ಮೇ 01: : ಕೇಂದ್ರ ಸರ್ಕಾರದ ಆದೇಶದ 18 ವರ್ಷ ಮಿತ್ತ್ ದಕ್ಲೆಗ್ ಕೋವಿಡ್ ಲಸಿಕೆ ಪಾಡುನೆರ್ದಾವರ ಲಸಿಕೆ ಪಡೆಯಿನ 28 ದಿನ ಮುಟ ನೆತ್ತೆರ್ ದಾನ ಮಲ್ಪರೆ ಅವಕಾಶ ಇಜ್ಜಂದಿನೇರ್ದಾವರ ಕುಂದಾಪುರದ ಭಾರತೀಯ ರೆಡ್‌ಕ್ರಾಸ್ ಸಂಸ್ಥೆಡ್ ನೆತ್ತೆರ್ ಗ್ ಕೊರತೆ ಉಂಡು ಪಂದ್ ಕೆಲವೊಂಜಿ ಸಾಮಾಜಿಕ ಜಾಲತಾಣಡ್ ಬೈದಿನಂಚಿನ

ವರದಿನ್ ಕುಂದಾಪುರದ ರೆಡ್‌ಕ್ರಾಸ್ ಸಂಸ್ಥೆದ ಗುರ್ಕಾರ್ಲಾಯಿನ ಜಯಕರ ಶೆಟ್ಟಿ ತೆರಿಪಾಯೆರ್.ಕುಂದಾಪುರದ ಭಾರತೀಯ ರೆಡ್ ಕ್ರಾಸ್ ಸಂಸ್ಥೆಡ್ ಸದ್ಯ ನೆತ್ತೆರ್ ಕೊರತೆ ಇಜ್ಜಿ . 18 ವರ್ಷ ಮಿತ್ತ್ ದಕುಲು , ಕೋವಿಡ್ ಲಸಿಕೆ ಪಡೆಯಿನಕುಲು 28 ದಿನರ್ದ್ ಬೊಕ್ಕ ನೆತ್ತೆರ್ ದಾನ ಮಲ್ಪೋಲಿ ಒಂಜಿ ಲಸಿಕೆ ಪಡೆಯಿ ಬೊಕ್ಕ ನನೊಂಜಿ ಲಸಿಕೆ ಪಡೆಯರೆ 45 ದಿನ ಅಂತರ ಉಪ್ಪೊಡು . ಐತ ನಡುಟು ಮೆಕುಲು ನೆತ್ತೆರ್ ದಾನ ಮಲ್ಪೋಲಿ ಪಂದ್ ಪಂಡೆರ್.

ರಾಜ್ಯಡ್ ಕೋವಿಡ್ ರಿಲೀಫ್ ಟಾಸ್ಕ್ ಫೋರ್ಸ್ ಸುರು

ಕುಡ್ಲ, ಮೇ 02: ರಾಜ್ಯಡ್ ಕೋವಿಡ್ ರಡ್ಡನೇ ಅಲೆತ ತೀವ್ರ ಸ್ವರೂಪನ್ ಪಡೆಯೊಂದು ಉಪ್ಪುನ ನೆಲೆಟ್ಟ್ ಜಮಾಅತೆ ಇಸ್ಲಾಮೀ ಹಿಂದ್‍ದ ರಾಜ್ಯ ಘಟಕ ತನ್ನ ಅಂಗಸಂಸ್ಥೆಲಾಯಿನ ಹುಮ್ಯಾನಿಟೇರಿಯನ್ ರಿಲೀಫ್ ಸೊಸೈಟಿ (ಹೆಚ್.ಆರ್.ಎಸ್.), ಎಸ್.ಐ.ಓ., ಸಾಲಿಡಾರಿಟಿ ಯೂತ್ ಮೂವ್‍ಮೆಂಟ್, ಡಾಕ್ಟರ್ಸ್ ಫಾರ್ ಹುಮ್ಯಾನಿಟಿ ಬೊಕ್ಕ ಫಾರ್ವರ್ಡ್ ಟ್ರಸ್ಟ್- ಮೆಕ್ಲೆನ ಒಟ್ಟು ಸೇರಿಗೆಡ್ ರಾಜ್ಯಡ್ ಕೋವಿಡ್ ರಿಲೀಫ್ ಟಾಸ್ಕ್ ಫೋರ್ಸ್ ಸುರು ಮಲ್ದೆರ್ .

ಈ ಟಾಸ್ಕ್ ಫೋರ್ಸ್ಡ್ ರಾಜ್ಯದ ಬೇತೆ ಬೇತೆ ಭಾಗದ ಸುಮಾರ್ 1500ರ್ದ್ ಲಾ ಜಾಸ್ತಿ ಸ್ವಯಂ ಸೇವಕೆರ್ ಬೇಲೆ ಮಲ್ತೊಂದು ಉಲ್ಲೆರ್.

ಟಾಸ್ಕ್ ಫೋರ್ಸ್ಡ್ ಮೆಡಿಕಲ್ ಎಮರ್ಜೆನ್ಸಿ ಫೋರ್ಸ್, ರಿಲೀಫ್ ವರ್ಕ್ ಫೋರ್ಸ್ ಬೊಕ್ಕ ವಾರ್ ರೂಮ್ ವರ್ಕ್‍ ಫೋರ್ಸ್‍ ಪನ್ಪಿನ 3 ವಿಭಾಗ ಉಂಡು ವ್ಯವಸ್ಥಿತವಾದ್ ಮೆಕುಲು ಬೇಲೆ ಮಲ್ತೊಂದು ಉಲ್ಲೆರ್.

‘ಸಹಾಯ್’ ತುರ್ತು ಸೇವಾ ಕೂಟಗ್ ಅಧಿಕೃತ ಚಾಲನೆ

ಕುಡ್ಲ, ಮೇ 02: ಕರ್ನಾಟಕ ಮುಸ್ಲಿಂ ಜಮಾಅತ್ ಅಧೀನಡ್ ರಾಜ್ಯಡ್ ಬೇಲೆ ಮಲ್ಪರೆ ಉಪ್ಪುನ ‘ಸಹಾಯ್’ ತುರ್ತು ಸೇವಾ ಕೂಟಗ್ ದಕ್ಷಿಣ ಕನ್ನಡ ಜಿಲ್ಲೆಡ್ ಅಧಿಕೃತ ಚಾಲನೆ ಕೊರಿಯೆರ್ .

ಸಯ್ಯಿದ್ ಶಿಹಾಬುದ್ದೀನ್ ತಂಙಳ್ ಮದಕ ಪ್ರಾರ್ಥನೆಗ್ ಚಾಲನೆ ಕೊರಿಯೆರ್.ಎಸ್.ವೈ.ಎಸ್ ರಾಜ್ಯ ಪ್ರಧಾನ ಕಾರ್ಯದರ್ಶಿ ಡಾ.ಎಮ್ಮೆಸ್ಸೆಂ ಅಬ್ದುರ್ರಶೀದ್ ಝೈನಿ ಲೇಸ್ ದ ಉದಿಪನ ಮಲ್ತೆರ್ ಲೇಸ್ ದ ಗುರ್ಕಾರ್ಮೆನ್ . ವಯಿಸೊಂದಿನ ಕರ್ನಾಟಕ ಮುಸ್ಲಿಂ ಜಮಾಅತ್ ರಾಜ್ಯ ಪ್ರಧಾನ ಕಾರ್ಯದರ್ಶಿ ಶಾಫಿ ಸ‌ಅದಿ ಬೆಂಗಳೂರು ವಿಷಯ ಮಂಡಿಸಾದ್ , ತುರ್ತು ಸೇವಾ ತಂಡದ ಅನಿವಾರ್ಯತೆ, ಕಾರ್ಯಾಚರಣೆ ಬೊಕ್ಕ ಯೋಜನೆದ ಬಗ್ಗೆ ಪಾತೆರಿಯೆರ್.

ಆಧ್ಯಾತ್ಮಿಕ ನಾಯಕೆರ್ , ಕರ್ನಾಟಕ ಮುಸ್ಲಿಂ ಜಮಾಅತ್ ದ ಒತ್ತುಗುರ್ಕಾರ್ಲಾಯಿನ ಹಝ್ರತ್ ಮುಹಮ್ಮದ್ ಫಾಝಿಲ್ ರಝ್ವಿ ಕಾವಳಕಟ್ಟೆ ಮೇರ್ ‘ಸಹಾಯ್’ ತುರ್ತು ಸೇವಾ ತಂಡದ ಪುದರ್ ಬೊಕ್ಕ ಲೋಗೋ ಬುಡುಗಡೆ ಮಲ್ತೆರ್ .

ಪುತ್ತೂರು ಕೆಸ್ಸಾರ್ಟಿಸಿ ಘಟಕರ್ದ್ ಬಸ್ ಚಾಲನೆ

ಪುತ್ತೂರು, ಮೇ 02: ಕೋವಿಡ್ ಕರ್ಫ್ಯೂ ನೆಲೆಟ್ಟ್ ಕೆಸ್ಸಾರ್ಟಿಸಿ ಬಸ್ಸುದ ಓಡಾಟ ಉಂತಾದೆರ್ ಬಸ್ ಮಾತಾ ಘಟಕಡೆ ಉಂತುನ ಮುಖೇನ ಆಪಿನoಚಿನ  ತಾಂತ್ರಿಕ ಸಮಸ್ಯೆಲೆನ್ ನಿವಾರಿಸಾವುನ ನೆಲೆಟ್ಟ್ ಪುತ್ತೂರು ಕೆಸ್ಸಾರ್ಟಿಸಿ ಘಟಕರ್ದ್ ಪ್ರತಿದಿನ 30 ಬಸ್ಸುಲೆನ್ ಪಿದಾಯಿ ದೆತ್ತ್ ದ್ ಬಸ್ಸು ನಿಲ್ದಾಣದ ಮುಟ ಸಂಚರಿಸಾದ್ ಐರ್ದ್ ಬೊಕ್ಕ ಕುಡ ಘಟಕಡ್ ಉಂತಾವೊಡು ಪಂದ್ ಆದೇಶ ಕೊರ್ತೆರ್.

ಕೋವಿಡ್ ನಿಯಮ‌ ಉಲ್ಲಂಘನೆ : ವಲಚ್ಚಿಲ್ ಎಕ್ಸ್​ಪರ್ಟ್ ಕಾಲೇಜ್ದ ಆಡಳಿತ ಮಂಡಳಿದ ವಿರುದ್ಧ ಪ್ರಕರಣ

ಕುಡ್ಲ, ಮೇ 01: ಸರ್ಕಾರದ ನಿಯಮ‌ ಉಲ್ಲಂಘನೆ ಮಲ್ತ್ ದ್ ದ್ವಿತೀಯ ಪಿಯುಸಿದ ಜೋಕ್ಲೆನ್ ಹಾಸ್ಟೆಲ್ಡ್ ದೀತಿನೆಕ್ಕ್ ಕುಡ್ಲದ ವಲಚ್ಚಿಲ್ ಎಕ್ಸ್​ಪರ್ಟ್ ಕಾಲೇಜ್ ದ ಆಡಳಿತ ಮಂಡಳಿದ ವಿರುದ್ಧ ಮಂಗಳೂರು ಗ್ರಾಮಾಂತರ ಠಾಣೆಡ್ ಪ್ರಕರಣ ದಾಖಲಾತುಂಡು .

ಎಕ್ಸ್​ಪರ್ಟ್ ಕಾಲೇಜ್ದ ಆಡಳಿತ ಸಂಸ್ಥೆದ ದ್ವಿತೀಯ ಪಿಯುಸಿದ 30 ಜೋಕ್ಲೆನ್ ವಿದ್ಯಾಸಂಸ್ಥೆಡ್ ದೀದಿತ್ತೆರ್ ಮೆಕ್ಲೆನ , ಪೋಷಕೆರ್ ಜೋಕ್ಲೆನ್ ಲೆತೊಂದು ಪೋಯೆರೆ ಪಂದ್ ದೂರದ ಊರುರ್ದು ಬತ್ತಿತ್ತೆರ್.

ರಾಜ್ಯೋಡು ಕೊರೊನಾ ಕರ್ಫ್ಯೂ ಘೋಷಣೆ‌ ಮಲ್ತಿತ್ತುಂಡಲ ಜೋಕ್ಲೆನ್ ಪೋಷಕೆರ್ನಟ್ಟಿಗೆ ಕಡಪಾವಂದೆ ಶೈಕ್ಷಣಿಕ ಚಟುವಟಿಕೆ ನಡಪಾದ್ ಕೋವಿಡ್ ಸಾಂಕ್ರಾಮಿಕ‌ ರೋಗ ತೀವ್ರವಾದ್ ಪಸರೆರೆ ಕಾರಣೆರಾತೆರ್.

ಕುಡ್ಲಡ್ ಬಾರಿ ಬರ್ಸ : ಸುಳ್ಯಡ್ ಆಲಿಕಲ್ಲು ಬರ್ಸ

ಕುಡ್ಲ, ಮೇ 01: ದಕ್ಷಿಣ ಕನ್ನಡ, ಚಿಕ್ಕಮಗಳೂರು ಪೇಂಟೆಡ್ ಕೆಲವು ಕಡೆ ಗುರುವಾರ ಬಾರಿ ಬರ್ಸ ಬೈದುಂಡು

ದಕ್ಷಿಣ ಕನ್ನಡ ಜಿಲ್ಲೆದ ಕಡಬ, ಸುಳ್ಯ ಪೇಂಟೆಡ್ ತೆಡಿಲ್ ದೊಟ್ಟುಗು ಆಲಿಕಲ್ಲು ಬರ್ಸ ಬೈದುಂಡು . ಕುಕ್ಕೆ ಸುಬ್ರಹ್ಮಣ್ಯ, ಬಿಳಿನೆಲೆ, ನೂಜಿಬಾಳ್ತಿಲ, ರೆಂಜಿಲಾಡಿ, ಇಚ್ಲಂಪಾಡಿ, ಕಡ್ಯ ಕೊಣಾಜೆ, ಬಳ್ಪ, ಯೇನೆಕಲ್ಲು, ಐನೆಕಿದು, ಸುಳ್ಯ ತಾಲೂಕಿನ ಪಂಜ, ಕೊಲ್ಲಮೊಗ್ರು, ಹರಿಹರ ಪಲ್ಲತಡ್ಕ, ಕಲ್ಮಕಾರು ವ್ಯಾಪ್ತಿಡ್ ಬರ್ಸ ಬೈದುಂಡು.

ಸಂಪಾಜೆ ಭಾಗಡ್ ಲಾ ಬರ್ಸ ಬೈದುಂಡು. ಕಲ್ಲಾಜೆ, ಕಲ್ಮಡ್ಕ, ಪಂಜ, ಈಶ್ವರಮಂಗಲ, ಕೊಯಿಲ, ಉಜಿರೆ, ಪಂಜಿಕಲ್ಲು ಪೆರಾಜೆ,ಚಿಕ್ಕಮಗಳೂರು ಜಿಲ್ಲೆದ ಕೊಟ್ಟಿಗೆಹಾರ, ಕಳಸ, ಕೊಪ್ಪಡ್ , ತೆಡಿಲ್ ದೊಟ್ಟುಗು ಭಾರಿ ಬರ್ಸ ಬೈದುಂಡು.

ವಿಮಾನ ನಿಲ್ದಾಣಡ್ ದಿಢೀರ್ ಪಾರ್ಕಿಂಗ್ ಶುಲ್ಕಡ್ ಬದಲಾವಣೆ : ಪ್ರಯಾಣಿಕೆರ್ನ ಆಕ್ರೋಶ

ಕುಡ್ಲ, ಮೇ 01:ಕುಡ್ಲ ವಿಮಾನ ನಿಲ್ದಾಣದ ನಿರ್ವಹಣೆದ ಗುತ್ತಿಗೆ ಪಡೆಯೊಂದಿನ ಖಾಸಗಿ ಕಂಪೆನಿ ವಿಮಾನ ನಿಲ್ದಾಣದ ಗಾಡಿ ಉಂತಾವುನ ಪನವುಡು ಗರಿಷ್ಠ ಪ್ರಮಾಣಡ್ ಜಾಸ್ತಿ ಮಲ್ದಿನವು ವಾಹನ ಚಾಲಕೆರ್ನ ಬೊಕ್ಕ ಗ್ರಾಹಕೆರ್ನ ಆಕ್ರೋಶಗ್ ಕಾರಣ ಆತುಂಡು. ವಿಮಾನ ನಿಲ್ದಾಣನ್ ಗುತ್ತಿಗೆ ಪಡೆಯೊಂದಿನ ಅದಾನಿ ಕಂಪೆನಿ ಮೇ 1, ರ್ದ್ ಪೊಸ ಪಾರ್ಕಿಂಗ್ ದ ಪನವು ಪಾಡ್ದುಂಡು.

ವಿಮಾನ ನಿಲ್ದಾಣಡ್ ದಿಢೀರ್ ಪಾರ್ಕಿಂಗ್ ಶುಲ್ಕ ಜಾಸ್ತಿ ಮಲ್ದಿನವು ಕೊರೋನ ಸಂಕಷ್ಟದ ಪೊರ್ತುಡು ಜನಕ್ಲೆನ ಗಾಯದ ಮಿತ್ತ್ ನನೊಂಜಿ ಬರೆ ಪಾರ್ದಿಲಕ ಆತುಂಡು ಪಂದ್ ಪ್ರಯಾಣಿಕೆರ್ ಆಕ್ರೋಶ ವ್ಯಕ್ತ ಮಲ್ದೆರ್.