ಪುತ್ತೂರ್ದ ಸುದ್ದಿ | Puttur News

ಕುಕ್ಕೆ ಸುಬ್ರಹ್ಮಣ್ಯ ದೇವಾಲಯದ ಬೇಲೆದಕ್ಲೆಗ್‌ ಎಚ್ಚಿಗೆ ಸಂಬಳ

ಸುಬ್ರಹ್ಮಣ್ಯ: ಕುಕ್ಕೆ ಸುಬ್ರಹ್ಮಣ್ಯ ದೇವಾಲಯದ ಸುಮಾರ್ 225 ಜನ ಪಿಂಚಣಿ ರಹಿತ ಕಾಯಂ ಬೇಲೆದಕ್ಲೆಗ್ ಸಂಬಳಡ್ ಶೇಕಡಾ 17% ಎಚ್ಚ ಮಲ್ತ್‌ ಆದೇಶನ್ ಕೊರ್ತೆರ್.

ಕುಕ್ಕೆ ಸುಬ್ರಹ್ಮಣ್ಯ ದೇವಾಲಯದ ಟ್ರಸ್ಟಿ ಶ್ರೀವತ್ಸ ಅರೆನ ಮನವಿದಂಚ ದೇವಾಲಯದ 225 ಬೇಲೆದಕ್ಲೆಗ್ ಏ.1 ರ್ದ್ ಶೇಕಡಾ 17% ಸಂಬಳ ಎಚ್ಚ ಮಲ್ಪೆರೆ ಧಾರ್ಮಿಕ ದತ್ತಿ ಇಲಾಖೆ ಆದೇಶ ಕೊರ್ತುಂಡು.

ಹಿಂ.ಜಾ.ವೇ. ಪುತ್ತೂರು ಜಿಲ್ಲಾ ಸಂಯೋಜಕೆರಾದ್ ಮೋಹನ್ ದಾಸ್ ಕಾಣಿಯೂರು ಆಯ್ಕೆ

ಪುತ್ತೂರು : ಹಿಂದೂ ಜಾಗರಣ ವೇದಿಕೆ ಪುತ್ತೂರು ಜಿಲ್ಲಾ ಸಂಯೋಜಕೆರಾದ್ ಮೋಹನ್ ದಾಸ್ ಕಾಣಿಯೂರು, ಸಹ ಸಂಯೋಜಕೆರಾದ್ ಭರತ್ ಈಶ್ವರಮಂಗಲ, ದಿನೇಶ್ ಪಂಜಿಗ ಬೊಕ್ಕ ಹಿಂದೂ ಯುವ ಆಯಾಮದ ಪ್ರಮುಖ್ ಆದ್ ನಿಕೇಶ್ ಸುಳ್ಯ ಮೊಕುಲೆನ್ ಹಿಂದೂ ಜಾಗರಣ ವೇದಿಕೆ ಕುಡ್ಲ ಬೈಠಕ್‌ಡ್‌ ಆಯ್ಕೆ ಮಲ್ತೆರ್.

ಹಿಂ.ಜಾ.ವೇ ಪ್ರಾಂತ ಸಂಯೋಜಕೆರಾದ್ ಕೇಶವ ಮೂರ್ತಿ, ಸಹ ಸಂಯೋಜಕೆರಾದ್ ಸತೀಶ್ ದಾವಣಗೆರೆ, ಸಂಪರ್ಕ ಪ್ರಮುಖ್ ಹರೀಶ್ ಕುಡ್ಲ, ನಿಧಿ ಪ್ರಮುಖ್ ರವಿರಾಜ್ ಕಡಬ ಅರೆನ ಅನುಪಸ್ಥಿತಿಟ್‌ ಆಯ್ಕೆ ಮಲ್ತೆರ್‌ ಪಂದ್‌ ತೆರಿದ್‌ ಬೈದುಂಡ್.

ಟೀಮ್ ಕಲ್ಲೇಗ ಟೈಗರ್ಸ್ 6 ನೇ ವರ್ಷದ ‘ಪಿಲಿ ಏಸ’ ಲೆಪ್ಪೋಲೆ ಬುಡುಗಡೆ

ಪುತ್ತೂರು: ಟೀಮ್ ಕಲ್ಲೇಗ ಟೈಗರ್ಸ್ 6ನೇ ವರ್ಷದ ‘ಪಿಲಿ ಏಸ’ ದ ಆಮಂತ್ರಣ ಪತ್ರಿಕೆ ಬುಡುಗಡೆ ಸೆ.27 ದಾನಿ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನಡ್‌ ನಡತ್‌ಂಡ್.‌

ಅ.19 ದಾನಿ ರಾತ್ರೆ ಊದು ಪೂಜೆ ಆದ್, ಬೊಕ್ಕ ಅ. 20 ದಾನಿ ಕಲ್ಲೇಗ ಶ್ರೀ ಕಲ್ಕುಡ ದೈವಸ್ಧಾನಡ್‌ ಪಿಲಿ ಜಪ್ಪುನ ಕಾರ್ಯಕ್ರಮ ನಡಪರೆ ಉಂಡು. ಕರಿನ ಸರ್ತಿ ನಡತ್ತಿನ ‘ಪಿಲಿಗೊಬ್ಬುಡು ಪುತ್ತೂರುದ ಇತಿಹಾಸಡೆ ಸುರುತ ಸರ್ತಿ ಸುಮಾರು 60 ಪಿಲಿಕುಲು ಬಣ್ಣ ಪಾರ್ದ್‌ ತಾಸೆದ ಪೆಟ್ಟ್‌ಗ್‌ ನಲ್ತ್‌ದ್‌ ಇತಿಹಾಸ ನಿರ್ಮಾಣ ಮಲ್ತ್ ದ್ಂಡ್. ನೆತ್ತ ಒಟ್ಟಿಗೆ ಕರಿನ ವರ್ಷ ಬಿಗ್‌ಬಾಸ್ ವೇದಿಕೆಡ್ ಪಿಲಿ ಏಸ ಪಾರ್ದ್‌ ಪುಗರ್ತೆನ್‌ ಪಡೆಯೊಂದೆರ್.

ಸೆ.30: ತಾ|ಅಮೆಚೂರ್ ಕಬಡ್ಡಿ ಅಸೋಸಿಯೇಶನ್‌ರ್ದ್ ಕಬಡ್ಡಿ ಪಂದ್ಯಾಟ

ಪುತ್ತೂರು: ಕರ್ನಾಟಕ ರಾಜ್ಯ ಅಮೆಚೂರ್ ಕಬಡ್ಡಿ ಅಸೋಸಿಯೇಶನ್, ದ.ಕ. ಜಿಲ್ಲಾ ಅಮೆಚೂರ್ ಕಬಡ್ಡಿ ಅಸೋಸಿಯೇಶನ್ ಬೊಕ್ಕ ತಾಲೂಕು ಅಮೆಚೂರ್ ಕಬಡ್ಡಿ ಅಸೋಸಿಯೇಶನ್‌ದ ಮುತಾಲಿಕೆಡ್ ಶ್ರೀ ಗಣೇಶೋತ್ಸವದ ಪ್ರಯುಕ್ತ ನಡಪುನ ಮ್ಯಾಟ್ ಅಂಕಣದ ಆಹ್ವಾನಿತ ತಂಡಲೆದ ಆಂಜೊವ್‌ ನಕ್ಲೆನ ವಿಭಾಗದ ಪ್ರೊ ಕಬಡ್ಡಿ ಮಾದರಿದ ಕಬಡ್ಡಿ ಪಂದ್ಯಾಟ ಸೆ.30 ರಂದು ಕಿಲ್ಲೆ ಮೈದಾನಡ್‌ ನಡಪರೆ ಉಂಡು.

ಪಂದ್ಯಾಟಡ್ ಆಹ್ವಾನಿತ ಬಲಿಷ್ಟ 12 ತಂಡಲು ಪಾಲ್‌ ಪಡೆಯರೆ ಉಲ್ಲೆರ್.‌ ಪಂದ್ಯಾಟ ಕಾಂಡೆ 9 ರ್ದ್‌ ರಾತ್ರೆ 9 ಗಂಟೆ ಮುಟ ಪಂದ್ಯಾಟ ನಡಪೆರೆ ಉಂಡು. ಡಿಜಿಟಲ್ ಕ್ಲಾಕ್ ಸಿಸ್ಟಮ್, ಮಲ್ಲ ಪರದೆ, ಕಬಡ್ಡಿ ತೂವೆರೆ ಗ್ಯಾಲರಿ ವ್ಯವಸ್ಥೆನ್‌ ಮಲ್ತ್‌ದೆರ್.‌ 10 ಸಾವಿರರ್ದ್‌ ಜಾಸ್ತಿ ಪ್ರೇಕ್ಷಕೆರ ಬರ್ಪುನ ನಿರೀಕ್ಷೆ ಉಂಡು

ಗೆಂದಿನಕ್ಲೆಗ್ ಸುರುತ ಇನಾಮು ರೂ.50 ಸಾವಿರ ರೂ., ಶಾಶ್ವತ ಫಲಕ, ರಡ್ಡನೆ ಇನಾಮು ರೂ.30 ಸಾವಿರ ರೂ. ಬೊಕ್ಕ ಶಾಶ್ವತ ಫಲಕ, ಮೂಜನೆ ಇನಾಮು ಬೊಕ್ಕ ನಾಲನೇ ಇನಾಮು ರೂ.20 ಸಾವಿರ ಬೊಕ್ಕ ಶಾಶ್ವತ ಫಲಕ ಅತಂದೆ ವೈಯಕ್ತಿಕ ಬಹುಮಾನಲ ಪಂದ್ಯಾಟಡ್‌ ಉಂಡು. ಪಾಪ್ಯುಲರ್ ಐಸ್‌ಕ್ರೀಂ ದಕ್ಲೆನ ಅಂದಾಜಿ ರೂ.40 ಸಾವಿರ ಪ್ರಾಯೋಜಕತ್ವದ ಆಕರ್ಷಕ ಟ್ರೋಫಿ, ಅಂಚನೆ ಪುತ್ತೂರು ಸಾರ್ವಜನಿಕ ಸರಕಾರಿ ಆಸ್ಪತ್ರೆದ ಡಾಕ್ಟರ್‌ ನಕ್ಲೆಗ್‌ ಮಾನಾದಿಗೆ, ‘ಡಿ’ ಗ್ರೂಪ್ ನೌಕರೆಗ್ ಸಮವಸ್ತ್ರ ವಿತರಣೆ ಈ ಪೊರ್ತುಡು ನಡಪರೆ ಉಂಡು.

ಪರ್ಲಡ್ಕ ಚಂದ್ರನಾಥ ಆಚಾರ್ಯರೆಗ್ ಡಾ.ಕೋಟ ಶಿವರಾಮ ಕಾರಂತ ಬಾಲವನ ಪ್ರಶಸ್ತಿ

ಪುತ್ತೂರು: ಕನ್ನಡ ಬೊಕ್ಕ ಸಂಸ್ಕೃತಿ ಇಲಾಖೆ ಬೆಂಗಳೂರು, ಡಾ. ಕೋಟ ಶಿವರಾಮ ಕಾರಂತ ಬಾಲವನ, ಪರ್ಲಡ್ಕ, ಸುತ್ತೂರು, ಸಹಾಯಕ ಆಯುಕ್ತರ ಕಾರ್ಯಾಲಯ ಪುತ್ತೂರು ನೆತ್ತ ಮುತಾಲಿಕೆಡ್ ದಿ.ಕುರುಂಜಿ ವೆಂಕಟರಮಣ ಗೌಡ ಅರೆನ ಶಾಶ್ವತ ಕೊಡುಗೆಡ್ ಪ್ರತಿ ವರ್ಷ ಕೊರ್ಪುನ ಬಾಲವನ ಪ್ರಶಸ್ತಿ 2023 ಕ್ಕ್ ಬೆಂಗಳೂರ್ದ ಖ್ಯಾತ ವರ್ಣ ಚಿತ್ರ ಕಲಾವಿದೆರ್ ಪುತ್ತೂರು ಪರ್ಲಡ್ಕ ನಿವಾಸಿ ಕೆ.ಚಂದ್ರನಾಥ ಆಚಾರ್ಯ ಆಯ್ಕೆಯಾತೆರ್.

ಪುತ್ತೂರು ಶಾಸಕೆರ್ ಅಶೋಕ್ ಕುಮಾರ್ ರೈ ಕೋಡಿಂಬಾಡಿ ಅರೆನ ಗುರ್ಕಾರ್ಮೆಡ್ ಐನ್‌ ಜನತ ಸಮಿತಿ ಮಲ್ತ್‌ದ್ ಈ ಪ್ರಶಸ್ತಿನ್ ಅ.10 ದಾನಿ ಬಾಲವನಡ್‌ ನಡಪುನ ಕಾರಂತ ಜನ್ಮದಿನೋತ್ಸವದಾನಿ ಪ್ರದಾನ ಮಲ್ಪುವೆರ್.

ಆಯ್ಕೆ ಸಮಿತಿಡ್ ಸಹಾಯಕ ಆಯುಕ್ತೆರ್ ಗಿರೀಶ್ ನಂದನ್ ಎಂ, ಸರಕಾರಿ ಪ್ರಥಮ ದರ್ಜೆ ಕಾಲೇಜ್‌ ದ ಪ್ರಾಂಶುಪಾಲೆರ್ ಡಾ. ವರದರಾಜ ಚಂದ್ರಗಿರಿ, ನ್ಯಾಯವಾದಿ ಬೆಟ್ಟ ಈಶ್ವರ ಭಟ್, ಕನ್ನಡ ಸಾಹಿತ್ಯ ಪರಿಷತ್ ಪುತ್ತೂರು ಘಟಕದ ಗುರ್ಕಾರ್ಲು ಪುತ್ತೂರು ಉಮೇಶ್ ನಾಯಕ್ ಇತ್ತೆರ್.

ಈ ಪ್ರಶಸ್ತಿ 25 ಸಾವಿರ ರೂ. ಇನಾಮು ಕಾರಂತೆರ್ನ ಸ್ಮರಣಿಕೆ ಬೊಕ್ಕ ಪ್ರಶಸ್ತಿ ಪತ್ರನ್‌ ಈ ಪೊರ್ತುಡು ಕೊರಿಯೆರೆ ಉಲ್ಲೆರ್.‌

ಬೊಳುವಾರು ಕ್ಷೇತ್ರಡ್ ಪ್ರಶ್ನಾಚಿಂತನೆ ಅಂಗವಾದ್ ವಿಶೇಷ ದುರ್ಗಾಪೂಜೆ‌

ಪುತ್ತೂರು: ಬೊಳುವಾರು ಶ್ರೀ ದುರ್ಗಾಪರಮೇಶ್ವರಿ ಉಳ್ಳಾಳ್ತಿ ಮಲರಾಯ ಸಪರಿವಾರ ಕ್ಷೇತ್ರದಡ್ ಕ್ಷೇತ್ರದ ಬಗೆಟ್ ಈ ದುಂಬು ನಡತ್ತಿನ ಪ್ರಶ್ನಾಚಿಂತನೆದ ಪರಿಹಾರ ಅಂಗವಾದ್ ಸೆ.27ರಂದು ಕ್ಷೇತ್ರಡ್ ವಿಶೇಷ ಪೂಜೆ ನಡತ್‌ಂಡ್.

ಬ್ರಹ್ಮಶ್ರೀ ಕೆಮ್ಮಿಂಜೆ ನಾಗೇಶ ತಂತ್ರಿಲು, ವೇದಮೂರ್ತಿ ಶ್ರೀಧರ್ ಭಟ್ ಕಬಕ ಪೌರೋಹಿತ್ಯಡ್‌ ಕಾಂಡೆ ದೇವರೆಗ್ ಪ್ರಾರ್ಥನೆ, ಗಣಪತಿ ಹೋಮ ಆದ್ ನಾಗದೇವರಿಗೆ ತಂಬಿಲ, ಪರಿವಾರ ದೈವಲೆಗ್ ತಂಬಿಲ ಸೇವೆ ನಡತ್‌ಂಡ್. ಬಯ್ಯಗ್ ಕ್ಷೇತ್ರದ ಭಜನಾ ಸೇವಾ ತಂಡರ್ದ್ ಭಜನಾ ಸಂಕೀರ್ತನೆ, ರಾತ್ರೆ ವಿಶೇಷ ದುರ್ಗಾಪೂಜೆ ನಡತ್‌ದ್ ಪ್ರಸಾದ ವಿತರಣೆ, ಅನ್ನಸಂತರ್ಪಣೆ ನಡತ್‌ಂಡ್.

ಕ್ಷೇತ್ರ ಪವಿತ್ರಪಾಣಿ ಬಾಲಸುಬ್ರಹ್ಮಣ್ಯ ಭಟ್, ಅರ್ಚಕೆರ್ ಶಂಕರನಾರಾಯಣ್ ಭಟ್, ಕ್ಷೇತ್ರ ವಿಶ್ವಸ್ಥ ಮಂಡಳಿ ಗುರ್ಕಾರ್ಲು ಪ್ರವೀಣ್ ನಾಯಕ್ ಬೊಳುವಾರು, ಪ್ರಧಾನ ಕಾರ್ಯದರ್ಶಿ ವಿ.ಕೆ.ಶೆಟ್ಟಿ, ಕೋಶಾಧಿಕಾರಿ ಪ್ರಸನ್ನ ಬಲ್ಲಾಳ್, ಟ್ರಸ್ಟಿಲಾಯಿನ ಮನೋಹರ್ ರೈ, ದಿನೇಶ್ ಗೌಡ ಕರ್ಮಲ, ಪುಷ್ಪಲತಾ ಬಿ. ಪೂಜಾರಿ, ಜಲಜಾಕ್ಷಿ ಎನ್ ಹೆಗ್ಡೆ, ನಗರಸಭೆ ಸದಸ್ಯೆರ್ ಸಂತೋಷ್‌ಕುಮಾರ್ ಬೊಳುವಾರು ಸ್ಥಳೀಯ ಭಕ್ತಾದಿಲು ಇತ್ತೆರ್.

ಅಕ್ಷಯ ಕಾಲೇಜ್‌ದ ವಚನ್ ಗ್ “ಮಿಸ್ಟರ್‌ ಕರ್ನಾಟಕ” ಕಿರೀಟ

ಪುತ್ತೂರು: ಬೆಂಗಳೂರುಡ್‌ ಎನ್.ಬಿ ಮಾಡೆಲ್‌ ಮ್ಯಾನೇಜ್‌ಮೆಂಟ್‌ ಸಂಸ್ಥೆದ ಮುತಾಲಿಕೆಡ್‌ ನಡತಿನ ಮಿಸ್ಟರ್-ಮಿಸ್‌ ಟೀನ್‌ ಸೌಂದರ್ಯ ಸ್ಪರ್ಧೆಡ್‌ ಮಿಸ್ಟರ್‌ ಕರ್ನಾಟಕ ವಿಭಾಗಡ್‌ ಪುತ್ತೂರು ಅಕ್ಷಯ ಕಾಲೇಜ್‌ದ ಕಲ್ಪಾರ್ಥಿ ವಚನ್‌ ಎಸ್‌. ಮೇರ್ ಗೆಂದ್ ದ್ ಕಿರೀಟ ಪಡೆಯೊಂದೆರ್.‌

ಉಬಾರ್‌ ಪೆರಿಯಡ್ಕ ನಿವಾಸಿಲಾಯಿನ ಶೇಖರ ಪೂಜಾರಿ ಬೊಕ್ಕ ರೂಪ ದಂಪತಿಲೆನ ಮಗೆಯಾಯಿನ ಮೆರ್‌ ಪುತ್ತೂರು ಅಕ್ಷಯ ಕಾಲೇಜ್‌ಡ್‌ ಮೂಜನೇ ವರ್ಷದ ಫ್ಯಾಷನ್‌ ಡಿಸೈನ್‌ ಕೋರ್ಸ್ ಕಲ್ತೊಂದುಲ್ಲೆರ್.

ಒಟ್ಟುಗು 3 ವಿಭಾಗದ ಪಂತೊಡು 35 ಸ್ಪರ್ಧಿಲು ಪಾಲ್‌ ಪಡೆದಿತ್ತೆರ್.

ಕುಡ್ಲ: ಅಮಲ್ ದ ಸೊತ್ತು ಮಾರೊಂದಿತ್ತಿನ ಸುಳ್ಯದ ಕಲ್ಪಾರ್ಥಿ ಅರೆಸ್ಟ್‌

ಕುಡ್ಲ: ಕುಡ್ಲದ ಪೇಂಟೆದ ಬೆಂದೂರುವೆಲ್‌ ಪರಿಸರಡ್‌ ಅಮಲ್ ದ ಸೊತ್ತುನು ಮಾರೊಂದಿತ್ತಿನ ಕಲ್ಪಾರ್ಥಿನ್‌ ಸಿಸಿಬಿ ಪೊಲೀಸೆರ್‌ ಅರೆಸ್ಟ್‌ ಮಲ್ತ್‌ದೆರ್.‌

ಪೇಂಟೆದ ಕಾಲೇಜ್‌ ಒಂಜೆಟ್ಟ್‌ ಪದವಿ ಕಲ್ಪಾರ್ಥಿ ಸುಳ್ಯ ತಾಲೂಕುದ ಅಜ್ಞಾವರ ಗ್ರಾಮದ ಲುಕ್ಕಾನುಲ್‌ ಹಕೀಂ(22ವ) ಅರೆಸ್ಟ್‌ ಆಯಿನ ಆರೋಪಿ. 1 ಲಕ್ಷ 25 ಸಾವಿರದ 25 ಗ್ರಾಂ ಎಂಡಿಎಂಎ ವಶಕ್ಕ್‌ ಪಡೆಯೊಂದೆರ್.‌ ನೆತ್ತ ಒಟ್ಟಿಗೆ ಮೊಬೈಲ್‌ ಪೋನ್‌, ಡಿಜಿಟಲ್‌ ತೂಕ ಸೇರಿನಂಚ ಒಟ್ಟು 1 ಲಕ್ಷ 60 ಸಾವಿರ ಮೌಲ್ಯದ ವಸ್ತುಲೆನ್‌ ಸಿಸಿಬಿ ಪೊಲೀಸೆರ್‌ ವಶಕ್‌ ಪಡೆಯೊಂದೆರ್.‌

ಸಾರ್ವಜನಿಕೆರೆಗ್‌ ಬೊಕ್ಕ ಕಲ್ಪಾರ್ಥಿಲೆಗ್‌ ಮಾದಕ ಸೊತ್ತುಲೆನ್ ಮಾರಾಟ ಮಾಲ್ತೊಂದು ಇತ್ತಿನ ಮಾಹಿತಿನ್ ತೆರಿಯೊಂದು ಸಿಸಿಬಿ ಪೊಲೀಸೆರ್‌ ಕಾರ್ಯಾಚರಣೆ ಮಲ್ತ್‌ದ್‌ ಆರೋಪಿನ್‌ ಅರೆಸ್ಟ್‌ ಮಲ್ತ್‌ದೆರ್.‌ ಕುಡ್ಲ ಪೂರ್ವ ಪೊಲೀಸ್‌ ಸ್ಟೇಷನ್‌ಡ್‌ ಕೇಸ್ ದಾಖಲಾತ್‌ಂಡ್‌.

ಕಾಟುಕುಕ್ಕೆ ಕ್ಷೇತ್ರಡ್ ಪುತ್ತೂರು ಶಾಸಕೆರ್ ಅಶೋಕ್ ಕುಮಾರ್ ರೈಗ್ ಅಭಿಮಾನಿಲೆರ್ದ್ ಪೌರ ಸನ್ಮಾನ‌

ಪೆರ್ಲ: ಇತಿಹಾಸ ಪ್ರಸಿದ್ಧ ಕಾಟುಕುಕ್ಕೆ ಶ್ರೀಸುಬ್ರಾಯ ಕ್ಷೇತ್ರಗ್ ಪುತ್ತೂರು ಶಾಸಕೆರಾಯಿನ ಅಶೋಕ್ ಕುಮಾರ್ ರೈ ಭೇಟಿ ಕೊರಿಯೆರ್. ವಿಧಾನ ಸಭಾ ವೋಟ್‌ದ ಪೊರ್ತುಡು ಅಶೋಕ್‌ ರೈ ಗೆಂದೆರೆ ಅಭಿಮಾನಿಲು ಪ್ರಾರ್ಥನೆ ಮಲ್ತ್‌ ಇತ್ತಿನ ಪರಕೆನ್‌ ಸಂದಾಯೆರೆ ಕಾಟುಕುಕ್ಕೆ ಕ್ಷೇತ್ರಕ್ಕೆ ಬತ್ತಿತೆರ್. ಈ ಪೊರ್ತುಡು ಕಾಟುಕುಕ್ಕೆದ ಅಭಿಮಾನಿ ಬಳಗದ ಪರವಾದ್ ಪೌರ ಮಾನಾದಿಗೆ ಮಲ್ತೆರ್.

ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ತಾರನಾಥ ರೈ ಪಡ್ಡಂಬೈಲು, ಮಾಜಿ ಆಡಳಿತ ಮೊಕ್ತೇಸರೆರ್ ನಾರಾಯಣ, ಉತ್ಸವ ಆಚರಣಾ ಸಮಿತಿ ಗುರ್ಕಾರ್ಲು ಪುರುಷೋತ್ತಮ ಭಟ್ ಮಿತ್ತೂರು ಇತ್ತೆರ್. ಎಣ್ಮಕಜೆ ಗ್ರಾಮ ಪಂಚಾಯತಿ ಅಭಿವೃದ್ಧಿ ಸ್ಥಾಯಿ ಸಮಿತಿದ ಗುರ್ಕಾರ್ಲು ಬಿ.ಎಸ್.ಗಾಂಭೀರ್ ಎದ್ಕೊಂದು ದೀಪಕ್ ಭಂಡಾರದ ಮನೆ ಸೊಲ್ಮೆ ಸಂದಾಯ ಮಲ್ತೆರ್. ಈ ಪೊರ್ತುಡು ಕ್ಷೇತ್ರ ಅಭಿವೃದ್ಧಿ ಕಾರ್ಯಗ್‌ ಕರ್ನಾಟಕ ಸರಕಾರರ್ದ್ ಪೂರಕ ಯೋಜನೆಲೆನ್‌ ಕೊರೊಡು ಪಂದ್ ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ತಾರನಾಥ ರೈ ಬಿನ್ನಾಪು ಮಲ್ತೆರ್. ಅಂಚೆನೆ ಪಡ್ಡಂಬೈಲು ಬೊಕ್ಕ ಅಡ್ಕಸ್ಥಳ -ಕಾಟುಕುಕ್ಕೆ ಮುಖೇನ ಆರ್ಲಪದವು ಪುತ್ತೂರುಗ್ ಸರಕಾರಿ ಬಸ್ ಮಂಜೂರು ಮಲ್ಪೊಡು ಪಂದ್ ನಾಗರಿಕೆರ್ನ ಪರವಾದ್ ಬಿ.ಎಸ್.ಗಾಂಭೀರ್ ಶಾಸಕೆರೆಗ್‌ ಮನವಿ ಕೊರಿಯೆರ್.