ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಜೆಸಿಐ ಕಲ್ಯಾಣಪುರದ ಒಟ್ಟುಸೇರಿಗೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 42ನೇ ಸಂಚಿಕೆ ಜ.23 ಅಂಗಾರೆ ಬಯ್ಯಗ್ 5.30 ಕ್ಕ್ ಪ್ರಸಾರ ಆಂಡ್.
ಈ ಲೇಸ್ ಡ್ ಶಿಕ್ಷಕೆರ್ ಬೊಕ್ಕ ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರ್. ಜ.24 ಕ್ಕ್ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು. ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಅಯೋಧ್ಯೆದ ಶ್ರೀ ರಾಮನ ಮಂದಿರ ಭಾರಿ ಪೊರ್ಲು ತೋಜೊಂದು ಇತ್ತ್ಂಡ್. ಮಂದಿರದೊಲಯಿದ ಶ್ರೀ ರಾಮನ ಬಿಂಬದ ಪ್ರಾಣಪ್ರತಿಷ್ಠೆ ಶ್ರದ್ಧಾ ಭಕ್ತಿಡ್ ನಡತ್ಂಡ್ ಪಂದ್ ಈ ಲೇಸ್ ಡ್ ಪಾಲ್ ಪಡೆಯಿನ ಧರ್ಮಸ್ಥಳದ ಧರ್ಮಾಧಿಕಾರಿ ಡಾ| ವೀರೇಂದ್ರ ಹೆಗ್ಗಡೆರ್ ತೆರಿಪಾದೆರ್.
ಈ ಲೇಸ್ ಡ್ ಪುಗರ್ತೆದ ಮಠಾಧಿಪತಿಲು ಬೊಕ್ಕ ಮಾತ ರಂಗದ ಪ್ರಮುಖೆರ್ ಪಾಲ್ ಪಡೆದಿತ್ತೆರ್. ಈ ಲೇಸ್ ಶಿಸ್ತುಡು ನಡತ್ಂಡ್. ಅಯೋಧ್ಯೆದ ಪೇಂಟೆನ್ ಬಣ್ಣ ನಣ್ಣದ ಪೂ ಪುರ್ಪಲೆರ್ದ್ ಶೃಂಗಾರ ಮಲ್ತ್ ದಿತ್ತೆರ್. ಅಲ್ಪಲ್ಪ ಸ್ವಾಗತ ನೃತ್ಯಲ ನಡತೊಂದು ಇತ್ತ್ಂಡ್. ಮಾತ ರೀತಿಡ್ಲಾ ಲೇಸ್ ಪೊರ್ಲುಡು ನಡತ್ಂಡ್.
ರಾಮಮಂದಿರದ ಎದುರುಡು ಕುಲ್ದಿನ ಮಾತ ಸಂತೆರೆಗ್ ಆಡೆಗೆ ತೆನಸ್, ಪಾನೀಯನ್ ಪಟ್ಟಿಯೆರ್. ಅಲ್ಪದ ಹವಾಮಾನಡ್ ಚಳಿ ಇತ್ತ್ಂಡ್, ಆಂಡಲ ಆತ್ಮೀಯವಾಯಿನ ಸ್ವಾಗತ ಬೊಕ್ಕ ವ್ಯವಸ್ಥಿತವಾಯಿನ ಲೇಸ್ ರ್ದ್ ಎಂಕ್ಲೆಗ್ ಮಾತ ಆತ್ ತೊಂದರೆ ಆಯಿಜಿ. ಪಿದಯಿ ಕುಲ್ದಿನಕ್ಲೆಗ್ ಟಿ.ವಿ. ಪರದೆದ ಮುಕೇನ ಉಲಯಿ ನಡಪುನ ಪೂಜೆದ ವಿಧಿ-ವಿಧಾನನ್ ತೂಪಾವೊಂದು ಇತ್ತೆರ್.
ಈ ಪ್ರಾಣಪ್ರತಿಷ್ಠೆ ಲೇಸ್ ರ್ದ್ ಮಹಾತ್ಮೆರ್ ಮಾತೆರ್ಲಾ ಪ್ರಸನ್ನರಾದ್ ಪೋತೆರ್. ಈ ಲೇಸ್ ರ್ದ್ ಅಲ್ಪಲ್ಪ ಪ್ರಯಾಣಗ್ ತೊಂದರೆ ಆದಿತ್ತ್ಂಡ್. ಜ.23 ರ್ದ್ ರಾಮ ಮಂದಿರಗ್ ಮುಕ್ತ ದರ್ಶನ ಪಂದ್ ಘೋಷಣೆ ಮಲ್ದೆರ್. ಮಾನಾದಿಗೆದ ಪ್ರಧಾನಮಂತ್ರಿ ನರೇಂದ್ರ ಮೋದಿಜೀ ಮೇರ್ ಮಾತೆರೆನ್ಲಾ ಉದ್ಧೇಶಿಸಾದ್ ಪಾತೆರಿಯೆರ್. ಬೊಕ್ಕ ಮಾತ ಸಂತೆರೆನ ಕೈತಡೆ ಬತ್ತ್ ದ್ ಮಾತೆರೆನ್ಲಾ ಗೌರವರ್ದ್ ಪಾತೆರಿಯೆರ್ ಪಂದ್ ಡಾ| ಡಿ. ವೀರೇಂದ್ರ ಹೆಗ್ಗಡೆರ್ ಪಂಡೆರ್.
ಕುಡ್ಲ: ತೆಂಕು ಬಡಗು ಕಲಾ ಸವ್ಯಸಾಚಿ ನಾಟ್ಯ ಮಯೂರ ರಕ್ಷಿತ್ ಶೆಟ್ಟಿ ಪಡ್ರೆ ಮೇರ್ ಪುಗರ್ತೆದ ಕುಂದೇಶ್ವರ ಸಮ್ಮಾನ್ ಪ್ರಶಸ್ತಿಗ್ ಆಯ್ಕೆ ಆತೆರ್.
ಕಾರ್ಲದ ಹಿರ್ಗಾನ ಶ್ರೀ ಕುಂದೇಶ್ವರ ದೇವಲ್ಯಡ್ ಜ.21 ಕ್ಕ್ ನಡಪುನ ವರ್ಷಾವಧಿ ಜಾತ್ರೋಚ್ಚಯದ ಪೊರ್ತುಡು ರಾತ್ರೆ ಪ್ರಶಸ್ತಿ ಪ್ರದಾನ ಮಲ್ತೆರ್. ಶಾಸಕೆರ್ ವಿ. ಸುನಿಲ್ ಕುಮಾರ್ ಬೊಕ್ಕ ಚಲನಚಿತ್ರ ನಟೆ ವಿಘ್ನೇಶ್ ಎಂ. ಪಾಲ್ ಪಡೆದಿತ್ತೆರ್.
ಈ ಪೊರ್ತುಡು ರಕ್ಷಿತ್ ಪಡ್ರೆ ಮೇರ್ ಅಭಿನಯ ಮಲ್ತಿನ ಶ್ವೇತಕುಮಾರ ಚರಿತ್ರೆ ಯಕ್ಷನಾಟಕ ಪ್ರದರ್ಶನ ಅವೆರೆ ಉಂಡು ಪಂದ್ ಕಾರ್ಯಕ್ರಮ ಸಂಯೋಜಕೆರ್ ಜಿತೇಂದ್ರ ಕುಂದೇಶ್ವರ ತೆರಿಪಾದೆರ್.
ಬಪ್ಪನಾಡ್, ಸಸಿಹಿತ್ಲು, ಹೊಸನಗರ, ಎಡನೀರು ಮೇಳಡ್ ಕಲಾಸೇವೆ ಮಲ್ತ್ ದ್ ಇತ್ತೆ ಹನುಮಗಿರಿ ಮೇಳಡ್ ತಿರುಗಾಟ ಮಲ್ತೊಂದು ಇಪ್ಪುನ ನಾಟ್ಯ ಮಯೂರ, ಯಕ್ಷ ಚೈತನ್ಯ ಬಿರುದಾಂಕಿತ ಪಡ್ರೆ ಮೇರ್, 20 ಕಡೆಟ್ಟ್ ಜೋಕುಲೆಗಾದ್ ಯಕ್ಷಗಾನ ಕ್ಲಾಸ್ ನಡಪುನ ಮುಕೇನ ಯಕ್ಷಗಾನ ಒರಿಪಾದ್, ಬುಲೆಪಾವೊನ ಬೇಲೆ ಮಲ್ತೊಂದು ಉಲ್ಲೆರ್.
ಸುದರ್ಶನ, ಅಭಿಮನ್ಯು, ಮೇನಕೆ, ಭ್ರಮರ ಕುಂತಳೆ, ಸುಭದ್ರೆ, ಪ್ರಭಾವತಿ, ಕೃಷ್ಣ, ಶ್ರೀದೇವಿ, ಅಶ್ವತ್ಥಾಮ, ಸೀತೆ, ಮೋಹಿನಿ, ಮೀನಾಕ್ಷಿ ಮೆರೆಗ್ ಪುಗರ್ತೆ ಕನತ್ ದ್ ಕೊರಿನ ಪಾತ್ರಲು. ಎಂ ಎಸ್ಸಿ ಕಂಪ್ಯೂಟರ್ ಸೈನ್ಸ್ ಪದವೀಧರೆ ಆಯಿನ ಮೇರ್ ಭರತನಾಟ್ಯಡ್ ಪ್ರವೀಣೆರ್. ಗ್ಲಾಸ್ ಪೇಂಟಿಂಗ್, ರಂಗೋಲಿಡ್ಲಾ ಸಾಧನೆ ಮಲ್ದೆರ್.
ಜ.21-23 ಮುಟ್ಟ ಕುಂದೇಶ್ವರ ಜಾತ್ರೆ:
ಜ.21 ಕ್ಕ್ ಬೊಲ್ಪುಗು ಪ್ರಾರ್ತನೆ, ತೋರಣ ಮೂರ್ತ ಗಣಯಾಗ, ಮಹಾಪೂಜೆ, ಬಯ್ಯಗ್ ಆರಾಧನ ಪೂಜೆ, ರಾತ್ರೆ ಸಾಯಿಶಕ್ತಿ ಕಲಾ ಬಳಗ ಕುಡ್ಲ ಕೂಟದಕ್ಲೆರ್ದ್ ಶ್ವೇತ ಕುಮಾರ ಚರಿತ್ರೆ ಪನ್ಪುನ ವಿಶಿಷ್ಟ ಯಕ್ಷನಾಟಕ ಪ್ರದರ್ಶನ ಆಂಡ್.
ಜ.22 ಕ್ಕ್ ಬೊಲ್ಪುಗು ಪಂಚವಿಂಶತಿ ಕಲಾಧಿವಾಸ, ಅಧಿವಾಸ ಹೋಮ, ಕಲಶಾಭಿಷೇಕ, ಮಹಾಪೂಜೆ, ಕೊಡಿ ಏರ್ಂಡ್, ಬೊಕ್ಕ ಅವಸ್ತುತ ಬಲಿ, ಪಲ್ಲಪೂಜೆ, ಬಯ್ಯಗ್ ಮಹೋಚ್ಚಯ, ಉಚ್ಚಯ ಬಲಿ, ಅವಭೃತ ಕಟ್ಟೆಪೂಜೆ, ದೈವ ಭೇಟಿ, ಅಗ್ನಿಕೇಳಿ, ರಂಗಪೂಜೆಯಾದ್ ಕೊಡಿ ಜಾಯೆರ್.
ಜ.23 ಕ್ಕ್ ನವಕಪ್ರಧಾನ ಹೋಮ, ಸಂಪ್ರೋಕ್ಷಣೆ ಬೊಕ್ಕ ಪ್ರಸಾದ ಪಟ್ಟಿಯೆರೆ ಉಂಡು. ಈ ಧಾರ್ಮಿಕ ಲೇಸ್ ಲು ಕೌಡೂರು ವೇ.ಮೂ. ಭಗೀರಥ ಭಟ್, ಕುಂದೇಶ್ವರ ಕೃಷ್ಣರಾಜೇಂದ್ರ ಭಟ್, ರವೀಂದ್ರ ಭಟ್ ಮುತಾಲಿಕೆಡ್ ನಡಪುಂಡು.
ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ಯೋಗ ಸುಯೋಗ ಸರಣಿ ಲೇಸ್ ದ 43ನೇ ಸಂಚಿಕೆ ಜ. 22 ಸೋಮಾರ ಬಯ್ಯಗ್ 4.15 ಕ್ಕ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಒಡಿಪು ಚಿಟ್ಪಾಡಿದ ಶ್ರೀ ಗುರುಕೃಪಾ ಯೋಗ ವಿದ್ಯಾ ಪ್ರತಿಷ್ಠಾನದ ಯೋಗ ಶಿಕ್ಷಕೆರ್ ಆರ್ ಶಿವಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್. ಜ.23 ಕ್ಕ್ ಮಧ್ಯಾಹ್ನ 12.15 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಐಫೋನ್ ಡ್ ರೇಡಿಯೋ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಅಡ್ವೆ-ನಂದಿಕೂರು “ಕೋಟಿ- ಚೆನ್ನಯ” ಜೋಡುಕರೆ ಕಂಬುಲ ಜ.20 ಸನಿಯಾರ ನಡತ್ಂಡ್.
ಈ ಕಂಬುಲ ಕೂಟಡ್ ಗೆಂದಿನಕ್ಲೆನ ಪೊಲಬು ಇಂಚ ಉಂಡು:
ಕನೆಪಲಯಿ: 9 ಜತೆ
ಅಡ್ಡ ಪಲಯಿ: 3 ಜತೆ
ಬಲ್ಲ್ ದ ಮಲ್ಲ: 17 ಜತೆ
ನಾಯೆರ್ ದ ಮಲ್ಲ: 30 ಜತೆ
ಬಲ್ಲ್ ದ ಎಲ್ಯ: 21 ಜತೆ
ನಾಯೆರ್ ದ ಎಲ್ಯ: 84 ಜತೆ
ಒಟ್ಟು 164 ಜತೆ ಇತ್ತ್ಂಡ್.
ಕನೆಪಲಯಿ:
ಸುರುತ್ತ ಇನಾಮು: ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಬೈಂದೂರು ಮಹೇಶ್ ಪೂಜಾರಿ,
ಸೂಡ ಹಳೆಮನೆ ಅಜಿತ್ ಕುಮಾರ್ ಶೆಟ್ಟಿ
ಪಲಯಿ ಮುಟ್ಟಿನಾರ್: ತೆಕ್ಕಟ್ಟೆ ಸುಧೀರ್ ದೇವಾಡಿಗ
ಅಡ್ಡ ಪಲಯಿ:
ಸುರುತ್ತ ಇನಾಮು: ಬೋಳಾರ ತ್ರಿಶಾಲ್ ಕೆ ಪೂಜಾರಿ
ಪಲಯಿ ಮುಟ್ಟಿನಾರ್: ಸಾವ್ಯ ಗಂಗಯ್ಯ ಪೂಜಾರಿ
ರಡ್ಡನೇ ಇನಾಮು: ನಾರಾವಿ ಯುವರಾಜ್ ಜೈನ್
ಪಲಯಿ ಮುಟ್ಟಿನಾರ್: ಭಟ್ಕಳ ಹರೀಶ್
ಬಲ್ಲ್ ದ ಮಲ್ಲ:
ಸುರುತ್ತ ಇನಾಮು: ನಂದಳಿಕೆ ಶ್ರೀಕಾಂತ್ ಭಟ್ “ಎ”
ಗಿಡತಿನಾರ್: ಬಂಬ್ರಾಣಬೈಲು ವಂದಿತ್ ಶೆಟ್ಟಿ
ರಡ್ಡನೇ ಇನಾಮು: ನಂದಳಿಕೆ ಶ್ರೀಕಾಂತ್ ಭಟ್ “ಬಿ”
ಗಿಡತಿನಾರ್: ಕಾವೂರು ದೋಟ ಸುದರ್ಶನ್
ಬಲ್ಲ್ ದ ಎಲ್ಯ:
ಸುರುತ್ತ ಇನಾಮು: ಕಲ್ಯ ಮಿತ್ತಬೆಟ್ಟು ಶ್ರೀಧರ ಪೂಜಾರಿ
ಗಿಡತಿನಾರ್: ಮಿಜಾರು ಅಶ್ವಥಪುರ ಶ್ರೀನಿವಾಸ ಗೌಡ
ರಡ್ಡನೇ ಇನಾಮು: ಸುರತ್ಕಲ್ ಪಾಂಚಜನ್ಯ ಯೋಗಿಶ್ ಪೂಜಾರಿ
ಗಿಡತಿನಾರ್: ಮಾಸ್ತಿಕಟ್ಟೆ ಸ್ವರೂಪ್
ನಾಯೆರ್ ದ ಮಲ್ಲ:
ಸುರುತ್ತ ಇನಾಮು: ಬೋಳದಗುತ್ತು ಸತೀಶ್ ಶೆಟ್ಟಿ “ಎ”
ಗಿಡತಿನಾರ್: ನತೀಶ್ ಬಾರಾಡಿ
ರಡ್ಡನೇ ಇನಾಮು: ಕಕ್ಕೆಪದವು ಪೆಂರ್ಗಾಲು ಕೃತಿಕ್ ಬಾಬು ವೆಂಕಪ್ಪ ಗೌಡ
ಗಿಡತಿನಾರ್: ಪೆಂರ್ಗಾಲು ಕೃತಿಕ್ ಗೌಡ
ನಾಯೆರ್ ದ ಎಲ್ಯ:
ಸುರುತ್ತ ಇನಾಮು: ಎರ್ಮಾಳ್ ಪುಚ್ಚೊಟ್ಟುಬೂಡು ಬಾಲಚಂದ್ರ ಲೋಕಯ್ಯ ಶೆಟ್ಟಿ
ಗಿಡತಿನಾರ್: ನಕ್ರೆ ಪವನ್ ಮಡಿವಾಳ
ರಡ್ಡನೇ ಇನಾಮು: ತೊಡಾರು ಪಂಚಶಕ್ತಿ ಬಾರ್ದಿಲ ಶ್ಲೋಕ್ ರಂಜಿತ್ ಪೂಜಾರಿ
ಗಿಡತಿನಾರ್: ಪೆಂರ್ಗಾಲು ಕೃತಿಕ್ ಗೌಡ
ಕುಡ್ಲ: ಬಜ್ಜೆಯಿ ತೋಟದ ನಷ್ಟಗ್ ಬೇಜಾರಾದ್ ಗೃಹಪ್ರವೇಶ ಧಾರಾವಾಹಿ ನಟಿ ದಿವ್ಯಶ್ರೀ ನಾಯಕ್ ಸುಳ್ಯ ಮೆರೆನ ಪೊಪ್ಪ ಆತ್ಮಹತ್ಯೆ ಮಲ್ತೊಂದೆರ್.
ಯಕ್ಷಗಾನದ ಹಿಮ್ಮೇಳಡ್ ಚೆಂಡೆ ಮದ್ದಳೆ ವಾದಕೆರಾಯಿನ ನಾರಾಯಣ ನಾಯಕ್ ಮೆರೆಗ್ ಬೊಡೆದಿ, ರಡ್ಡ್ ಪೊಣ್ಣು ಜೋಕುಲು ಉಲ್ಲೆರ್.
ಎಡ್ಡೆ ಕೃಷಿಕೆರಾಯಿನ ನಾರಾಯಣ ನಾಯಕ್ ಮೆರೆನ ಬಜ್ಜೆಯಿ ತೋಟಗ್ ಮಂಜಲ್ ರೋಗ ಬತ್ತ್ ದ್ ಸರ್ವನಾಶ ಆತ್ಂಡ್. ಅತ್ತಂದೆ ಮೆರೆನ ರಬ್ಬರ್ ತೋಟದ ಇಳುವರಿಲ ಕಮ್ಮಿ ಆದ್ ಜೀವನ ಮಲ್ಪೆರೆ ಕಷ್ಟ ಆದಿತ್ತ್ಂಡ್. ಅಂಚಾದ್ ಮೇರ್ ಆತ್ಮಹತ್ಯೆ ಮಲ್ತೊಂದೆರ್ ಪಂದ್ ಡೆತ್ ನೋಟ್ ಬರೆತೆರ್.
ರಾಷ್ಟ್ರೀಯ ವಿಮಾ ನಿಗಮಡ್ (NIC) ಖಾಲಿ ಇಪ್ಪುನ 274 ಬೇಲೆಗ್ ಅರ್ಜಿ ಸಂದಾಯೆರೆ ಇನಿಯೇ ಅಕೇರಿದ ದಿನ ಆತ್ಂಡ್.
ನೆಟ್ಟ್ ಕಾನೂನು, ಹಣಕಾಸು, IT, ಸಾಮಾನ್ಯ ಅಧಿಕಾರಿ ಬೇಲೆ ಉಂಡು. 2 ಹಂತದ ಪರೀಕ್ಷೆ ಸಂದರ್ಶನದ ಮಿತ್ತ್ ಅಭ್ಯರ್ಥಿಲೆಗ್ ಆಯ್ಕೆ ಮಲ್ಪೆರೆ ಆಪುಂಡು.
ಅಭ್ಯರ್ಥಿಲೆನ ಪ್ರಾಯ 21-30 ವರ್ಷದೊಲಯಿ ಇಪ್ಪೊಡು. ತಿಂಗೊಲ್ ಗ್ 85 ಸಾರ ರೂ. ಉಂಡು. ಎಚ್ಚದ ಪೊಲಬುಗಾದ್ https://nationalinsurance.nic.co.in ಗ್ ಭೇಟಿ ಕೊರೊಲಿ.
ಅಯೋಧ್ಯೆಡ್ ಪೊಸತಾದ್ ನಿರ್ಮಾಣ ಆಯಿನ ಶ್ರೀರಾಮ ಮಂದಿರಡ್ ಶ್ರೀರಾಮ ಲಲ್ಲಾನ ಮೂರ್ತಿಗ್ ಪ್ರಾಣ ಪ್ರತಿಷ್ಠಾಪನೆ ಮಲ್ಪುನ ಮುಕೇನ ನರೇಂದ್ರ ಮೋದಿನ ಉಪಸ್ಥಿತಿಡ್ ಮಂದಿರನ್ ಉದಿಪನ ಮಲ್ತೆರ್.
ಮಧ್ಯಾಹ್ನ 12:29:03 ರ್ದ್ 12.30:35 ಮುಟ್ಟ ರಾಮಲಲ್ಲಾನ ವಿಗ್ರಹದ ಪ್ರಾಣ ಪ್ರತಿಷ್ಠಾನೆದ ವಿಧಿವಿಧಾನಲೆನ್ ಪ್ರಧಾನ ಅರ್ಚಕೆರ್ ಮಲ್ತೆರ್. ಪ್ರಧಾನಿ ನರೇಂದ್ರ ಮೋದಿ ಮೇರ್ ರಾಮಲಲ್ಲಾ ವಿಗ್ರಹದ ಪ್ರಾಣ ಪ್ರತಿಷ್ಠಾ ಲೇಸ್ ಡ್ ಪಾಲ್ ಪಡೆದಿತ್ತೆರ್. ಸೂರ್ಯೋದಯ ಬೊಕ್ಕ ಸೂರ್ಯಾಸ್ತದ ನಡುಟ್ಟ್ ಪ್ರತಿದಿನ ಒರ ನಡಪುನ 48 ನಿಮಿಷದ ‘ಅಭಿಜೀತ್ ಲಗ್ನ ಮೂರ್ತ’ಡ್ ಈ 84 ಸೆಕೆಂಡು ಮಸ್ತ್ ಪವಿತ್ರ ಪಂದ್ ನಂಬುವೆರ್.
ಈ ಪೊರ್ತುಡು ಆರೆಸ್ಸೆಸ್ ಮುಖ್ಯಸ್ಥೆರ್ ಮೋಹನ್ ಭಾಗವತ್, ಸಿಎಂ ಆದಿತ್ಯನಾಥ್ ಯೋಗಿ,ರಾಜ್ಯಪಾಕೆರ್ ಪಾಲ್ ಪಡೆದಿತ್ತೆರ್.
ಬೆದ್ರ: ನಂಬಿಕೆ, ಪರಂಪರೆ, ಕಟ್ಟು ಕಟ್ಟಳೆ, ಪದ್ಧತಿ, ಆಚರಣೆ ಬೊಕ್ಕ ಧಾರ್ಮಿಕ ವಿಚಾರಧಾರೆನ್ ಕಾನೂನುದೊಟ್ಟಿಗೆ ಸೇರಾಯೆರೆ ಬಲ್ಲಿ. ಪಿರಾಕ್ ದ ದೈವೊಲ್ಯದ ಅಡಿ ಮುಟ್ಟ ಜೆಸಿಬಿ ಯಂತ್ರದ ಮುಕೇನ ಅಪಾಯಕಾರಿಯಾದ್ ಒಗ್ಗುದು ಧಾರ್ಮಿಕ ನಂಬಿಕೆಗ್ ಅಡ್ಡಿ ಮಲ್ತಿನೆಕ್ಕ್ ಖಂಡಿಸಾವೆ. ಅಪರಾಧಿಲೆನ ಬಗೆಟ್ಟ್ ಪೊಲೀಸೆರ್ ಮೃದು ಆದ್ ಇಪ್ಪುನೇ ಸರಿ ಅತ್ತ್, ಈ ಬಗೆಟ್ಟ್ ಪೊಲೀಸ್ ಕಮೀಷನ್ ನ್ ಸ್ವತಃ ಭೇಟಿಯಾದ್ ನಿಷ್ಪಕ್ಷ ತನಿಖೆಗ್ ಆಗ್ರಹ ಮಲ್ಪುವ ಪಂದ್ ಶಾಸಕೆರ್ ಉಮಾನಾಥ ಕೋಟ್ಯಾನ್ ಪಂಡೆರ್.
ಇಂಚಿಪ್ಪಗ್ ಕರಿಂಜೆ ದೈವಕುಮಾರ ಕೊಡಮಂದಾಯ ಬ್ರಹ್ಮಬೈದರ್ಕಳ ದೈವೊಲ್ಯ ಶ್ರೀ ಕ್ಷೇತ್ರ ಉಳ್ಳಾಲ್ದ ಕೋಟೆದ ದೈವೊಲ್ಯಗ್ ಉದ್ಯಮಿಯೊರಿ ತೊಂದರೆ ಮಲ್ತಿನ ಘಟನೆನ್ ಖಂಡಿಸಾದ್ ಐತಾರ ಕರಿಂಜೆಡ್ ನಡತಿನ ಸಾರ್ವಜನಿಕ ಸಭೆಟ್ಟ್ ಪಾತೆರಿಯೆರ್.
ಈ ಕೇಸ್ ಅಕೇರಿದ ತೀರ್ಮಾನಗ್ ಬರ್ಪುನ ಮುಟ್ಟ ಊರುದ ಜಾತ್ರೆ, ಗ್ರಾಮಡ್ ದೈವೊಗ್ ಸಂಬಂಧಪಟ್ಟಿನ ಕೋಲ, బలి ಉಚ್ಚಯನ್ ನಡಪಾವೊಜಿ ಪಂದ್ ಸರ್ವಾನುಮತರ್ದ್ ಸಭೆಟ್ಟ್ ತೀರ್ಮಾನ ಮಲ್ತೆರ್.
ಅಪರಾಧಿಲು ರಾಜಾರೋಷವಾದ್ ತಿರ್ಗೊಂದು ಇಪ್ಪುನವು ನಾಗರಿಕ ಸಮಾಜ ತರೆ ತಗ್ಗವುಲೆಕ್ಕ ಆತ್ಂಡ್. ವಿಕೃತಿ ಮೆರೆಯಿನಕ್ಲೆಗ್ ಸದ್ಭುದ್ಧಿ ಪ್ರಾಪ್ತಿ ಅವಡ್ ಪಂದ್ ಪ್ರಾರ್ತನೆ ಮಲ್ತೆರ್.
ಸಭೆತ್ತ ಗುರ್ಕಾರ್ಮೆನ್ ಕರಿಂಜೆಗುತ್ತು ಕೃಷ್ಣರಾಜ ಹೆಗ್ಡೆ ಒಯಿಸ್ ದಿತ್ತೆರ್. ಮಾರೂರು ಖಂಡಿಗ ರಾಮದಾಸ ಅಸ್ರಣ್ಣ ಮೇರ್ ಪ್ರಾಸ್ತಾವಿಕವಾದ್ ಪಾತೆರಿಯೆರ್.
ಈ ಪೊರ್ತುಡು ಕೈತಲ್ ದಕುಲು ಕೆ.ಶ್ರೀಪತಿ ಭಟ್, ರಾಜ್ಯ ರೈತ ಸಂಘಟನೆದ ಮನೋಹರ ಶೆಟ್ಟಿ ಕುಪ್ಪೆಪದವು, ಆಲಂಗಾರು ಗುತ್ತು ಶ್ರೀನಿವಾಸ ಆಳ್ವ ಬೊಕ್ಕ ಗ್ರಾಮದ ಗುತ್ತು ಬರ್ಕೆ ಇಲ್ಲದಕುಲು ಪಾಲ್ ಪಡೆದಿತ್ತೆರ್.
ಗುಜರಾತ್: ಸೂರತ್ ದ 14 ವರ್ಷದ ಭಾವಿಕಾ ಮಹೇಶ್ವರಿ ಪನ್ಪುನ ಪೊಣ್ಣು ಅಯೋಧ್ಯೆ ರಾಮಮಂದಿರ ನಿರ್ಮಾಣಗಾದ್ 52 ಲಕ್ಷ ರೂ. ದೇಣಿಗೆ ಕೊರ್ತೆರ್.
ಜನಕುಲು ಮಂದಿರ ನಿರ್ಮಾಣಗ್ ದೇಣಿಗೆ ಕೊರ್ತೆರ್ ಪಂದ್ ತೆರಿನ ಭಾವಿಕಾ ಬಲರಾಮನ ಕಥೆನ್ ಓದಿಯೆರೆ ಸುರು ಮಲ್ತೆರ್. ಮೂಜಿ ವರ್ಷಡ್ 50 ಸಾರ ಕಿ.ಮೀ ಮೇರ್ ಪ್ರಯಾಣ ಮಲ್ತ್ ದ್ ಸಾರ್ವಜನಿಕ ಸಭೆಟ್ಟ್ 300 ರ್ದ್ ಎಚ್ಚ ಪ್ರದರ್ಶನನ್ ಕೊರಿಯೆರ್. ಆವೆರ್ದ್ ತಿಕಿನ ಕಾಸ್ ನ್ ಮಂದಿರ ನಿರ್ಮಾಣಗ್ ದೇಣಿಗೆಯಾದ್ ಕೊರಿಯೆರ್.
