ಅಯೋಧ್ಯೆದ ಪೊಸ ರಾಮ ಮಂದಿರಡ್ ಜ.23 ರ್ದೆ ಮಂಡಲೋಚ್ಚಯ ಸುರು ಆತ್ಂಡ್.
48 ದಿನತ್ತ ಈ ಲೇಸ್ ನ್ ಶ್ರೀ ರಾಮ ಜನ್ಮಭೂಮಿ ತೀರ್ಥ ಕ್ಷೇತ್ರದ ಟ್ರಸ್ಟಿಲಾಯಿನ ಪೇಜಾವರ ಶ್ರೀ ನಡಪಾದ್ ಕೊರ್ಪೆರ್.
ಪೂರ್ಣಪ್ರಜ್ಞಾ ವಿದ್ಯಾಪೀಠದ ಮುತಾಲಿಕೆಡ್ ನಡಪುನ ಈ ಧಾರ್ಮಿಕ ವಿಧಿವಿಧಾನ ಲೇಸ್ ದ ಪೊರ್ತುಡು ಪ್ರತಿದಿನ ಹೋಮ, ಹವನ, ಕಲಶಾಭಿಷೇಕ, ರಾಮನ ಮೂರ್ತಿಗ್ ತತ್ವನ್ಯಾಸ ನಡಪುಂಡು. ಅಕೇರಿದ 4 ದಿನ ಸಹಸ್ರ ಕಲಶಾಭಿಷೇಕ ನಡಪರೆ ಉಂಡು.
ಮಣಿಪಾಲ: ರೇಡಿಯೊ ಮಣಿಪಾಲ್ ಡ್ ಚಿಣ್ಣರ ದನಿ ಲೇಸ್ ದ 29ನೇ ಸಂಚಿಕೆ ಜ.24 ಬುದಾರ ಬಯ್ಯಗ್ ಪ್ರಸಾರ ಆಪುಂಡು.
ಈ ಲೇಸ್ ಡ್ ಬಾಲ ಪ್ರತಿಭೆ ದಿಯಾ ಉದಯ್ ಮುಲ್ಕಿ ಪಾಲ್ ಪಡೆಯೆರೆ ಉಲ್ಲೆರ್. ಜ.25 ಗುರುವಾರ ಮಧ್ಯಾಹ್ನ 1.30 ಕ್ಕ್ ಕುಡೊರ ಪ್ರಸಾರ ಆಪುಂಡು.
ಈ ಲೇಸ್ ನ್ ರೇಡಿಯೊ ಮಾತ್ರ ಅತ್ತಂದೆ ಆಂಡ್ರಾಯ್ಡ್ ಫೋನ್ ಬೊಕ್ಕ ಮತ್ತು ಐಫೋನ್ ಡ್ ರೇಡಿಯೊ ಮಣಿಪಾಲ್ ಆಪ್ ಡೌನ್ಲೋಡ್ ಮಲ್ತ್ ದ್ ಕೇನೊಲಿ ಪಂದ್ ರೇಡಿಯೊ ಮಣಿಪಾಲ್ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.
ಕುಡ್ಲದ ಮಣ್ಣಗುಡ್ಡೆಡ್ ತುಳು ಅಧ್ಯಯನ ಕೇಂದ್ರ “ಸಿರಿ ತುಪ್ಪೆ” ಇಂಚಿಪ್ಪಗ್ ಉದಿಪನ ಆಂಡ್.
IXE ಇನ್ಸ್ಟಿಟ್ಯೂಷನ್ ದ ಈ ತುಳು ಅಧ್ಯಯನ ಕೇಂದ್ರನ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಗುರ್ಕಾರೆ ದಯಾನಂದ ಜಿ ಕತ್ತಲ್ಸಾರ್ ಉದಿಪನ ಮಲ್ತ್ ದ್ , ಇತ್ತೆದ ಜಗತ್ತ್ ಡ್ ತುಳುನಾಡು ತುಳು ಸಂಸ್ಕೃತಿದ ಅಧ್ಯಯನದ ಮಹತ್ವನ್ ತೆರಿಪಾಯೆರ್.
ಮಲ್ಲ ಬಿನ್ನೆರಾದ್ ಪಾಲ್ ಪಡೆಯಿನ ಬಂಟ್ವಾಳ ಪೇಂಟೆ ಅಭಿವೃದ್ಧಿ ಪ್ರಾಧಿಕಾರದ ಮಾಜಿ ಗುರ್ಕಾರೆ ದೇವದಾಸ್ ಶೆಟ್ಟಿ ಸಂಸ್ಥೆಗ್ ಎಡ್ಡೆಪ್ಪು ಬಯಕಿಯೆರ್.
ಸಿರಿ ತುಪ್ಪೆ ಅಧ್ಯಯನ ಕೇಂದ್ರ ತುಳು ಭಾಷೆ, ತುಳು ಲಿಪಿ, ತುಳು ಸಂಸ್ಕೃತಿ, ದೈವಾರಾಧನೆ, ತುಳು ನಿರೂಪನೆ ಇಂಚ ತುಳು ಭಾಷೆ ತುಳುನಾಡ್ ಗ್ ಸಂಬಂಧಪಟ್ಟಿನ ವಿಚಾರದ ಬಗೆಟ್ಟ್ ಅಧ್ಯಯನ ಮಲ್ಪುನ ಸಂಸ್ಥೆ ಆತ್ಂಡ್. ಅಧ್ಯಯನ ಬಯಕುನ ಅಭ್ಯರ್ಥಿಲೆಗ್ ಮುಕ್ತ ಅವಕಾಶ ಉಂಡು ಪಂದ್ ಸಂಸ್ಥೆದ ಮುಖ್ಯಸ್ಥೆರ್ ರೋಹಿತ್ ಪೊಳಲಿ ತೆರಿಪಾಯೆರ್.
ಲೇಸ್ ಡ್ ಕರ್ನಾಟಕ ತುಳು ಸಾಹಿತ್ಯ ಅಕಾಡೆಮಿದ ಮಾಜಿ ಸದಸ್ಯೆರ್ ನಾಗೇಶ್ ಕುಲಾಲ್, ತುಳು ಶಿಕ್ಷಕೆರ್ ಅಕ್ಷಯ್ ಪೇಜಾವರ, ಸಂಸ್ಥೆದ ನಿರ್ದೇಶಕಿ ವಿಶ್ರುತ ಪ್ರಜ್ವಲ್ ಪಾಲ್ ಪಡೆದಿತ್ತೆರ್.
ಬೊಲ್ತೇರ್: ನಾಳ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಜ.22-30 ಮುಟ್ಟ ವರ್ಷಾವಧಿ ಜಾತ್ರೆ, ಪೊಸ ಚಂದ್ರಮಂಡಲ ತೇರ್ ಬೊಕ್ಕ ಪಲ್ಲಕ್ಕಿ ಸಮರ್ಪಣೆ ನಡಪರೆ ಉಂಡು.
ಈ ಲೇಸ್ ದೇವಲ್ಯದ ತಂತ್ರಿಲಾಯಿನ ಬ್ರಹ್ಮಶ್ರೀ ಬಾಲಕೃಷ್ಣ ಪಾಂಗಾಣ್ಣಾಯ ಮೆರೆನ ಮಾರ್ಗದರ್ಶನಡ್ ನಡಪರೆ ಉಂಡು.
ಜ.22 ಸೋಮಾರ ಬಯ್ಯಗ್ ವಾಸ್ತುಹೋಮ, ವಾಸ್ತುಪೂಜೆ, ಪ್ರಸಾದ ವಿತರಣೆ ಆಂಡ್.
ಜ.23 ಅಂಗಾರೆ ಬೊಲ್ಪುಗು ಪಂಚಾಮೃತ ಅಭಿಷೇಕ, ಕಲಶಾಭಿಷೇಕ, ಮಹಾಪೂಜೆ ನಡತ್ಂಡ್.
ಜ.24 ಬುದಾರ ಬೊಲ್ಪುಗು ಪುದೆಕಾಣಿಕೆ ಸಮರ್ಪಣೆ, ಕೊಡಿ ಏರ್ಂಡ್, ಮಧ್ಯಾಹ್ನ ಮಹಾಪೂಜೆ, ಅನ್ನ ಪ್ರಸಾದ ಸೇವೆ ನಡತ್ಂಡ್. ಬಯ್ಯಗ್ ದೇವೆರೆನ ಬಲಿ ಪಿದಾಡ್ ದ್ ಉಚ್ಚಯ, ವಸಂತಕಟ್ಟೆ ಪೂಜೆ, ಮಹಾಪೂಜೆ, ನಿತ್ಯಬಲಿ, ದೀಪದ ಬಲಿ ನಡಪರೆ ಉಂಡು.
ಜ.25 ಗುರುವಾರ ಬೊಲ್ಪುಗು ಉಷಾಕಾಲ ಪೂಜೆ, ಅಲಂಕಾರ ಪೂಜೆ, ಮಧ್ಯಾಹ್ನ ಮಹಾಪೂಜೆ, ನಿತ್ಯಬಲಿ, ಅನ್ನ ಪ್ರಸಾದ ಸೇವೆ, ಬಯ್ಯಗ್ ಕೆರೆಕಟ್ಟೆ ಉಚ್ಚಯ, ಮಹಾಪೂಜೆ, ನಿತ್ಯಬಲಿ, ದೀಪದ ಬಲಿ ರಾತ್ರೆ ಮೋಕೆದ ಕಲಾವಿದೆರೆರ್ದ್ ಕಾಸ್ ದ ಕಸರತ್ತ್ ತುಳು ನಾಟಕ ನಡಪರೆ ಉಂಡು.
ಜ.26 ಸುಕ್ರಾರ ಬೊಲ್ಪುಗು ಅಲಂಕಾರ ಪೂಜೆ, ಮಧ್ಯಾಹ್ನ ಮಹಾಪೂಜೆ, ನಿತ್ಯಬಲಿ, ಬಯ್ಯಗ್ ದೇವೆರೆನ ಬಲಿ ಪಿದಾಡ್ ದ್ ಚಂದ್ರಮಂಡಲ ಉಚ್ಚಯ, ಕಟ್ಟೆಪೂಜೆ, ಮಹಾಪೂಜೆ ದೀಪದ ಬಲಿ, ಧಾರ್ಮಿಕ ಸಭಾ ಲೇಸ್ ನಡಪರೆ ಉಂಡು.
ಜ.27 ಸನಿಯಾರ ಬೊಲ್ಪುಗು ದೇವೆರೆನ ಬಲಿ ಉಚ್ಚಯ ಪಿದಾಡಿಯೆರೆ, ಮಧ್ಯಾಹ್ನ ದೇವೆರೆನ ದರ್ಶನ ಬಲಿ, ಬಟ್ಟಲ್ ಕಾಣಿಕೆ, ಮಹಾಪೂಜೆ, ಬಯ್ಯಗ್ ಶ್ರೀ ಕೊಡಮಣಿತ್ತಾಯ ಬೊಕ್ಕ ಪಿಲಿಚಾಮುಂಡಿ ದೈವೊಲೆನ ಭಂಡಾರ ಜಪ್ಪೆರೆ, ರಥಕಲಶ, ರಾತ್ರೆ ದೇವೆರೆನ ಉಚ್ಚಯ ಬಲಿ, ಕೊಡಮಣಿತ್ತಾಯ ದೈವೊದ ಗಗ್ಗರ ಸೇವೆ, ತೇರ್ ಉಚ್ಚಯ, ಶ್ರೀ ಭೂತ ಬಲಿ, ಸಾಂಸ್ಕೃತಿಕ ಲೇಸ್ ನೃತ್ಯ ವೈಭವ ನಡಪರೆ ಉಂಡು.
ಜ.28 ಐತಾರ ಬೊಲ್ಪುಗು ಕವಾಟೋದ್ಘಾಟನೆ, ಮಹಾಪೂಜೆ, ಮಧ್ಯಾಹ್ನ ಅನ್ನ ಪ್ರಸಾದ ಸೇವೆ, ಬಯ್ಯಗ್ ಕೊಡಿ ಜಾವೆರೆ, ಮಹಾಪೂಜೆ, ಯಕ್ಷಗಾನ ತಾಳಮದ್ದಳೆ, ಸಾಂಸ್ಕೃತಿಕ ಲೇಸ್ ಕಣಿಯೂರು ಮಹಾವಿಷ್ಣು ಕಲಾಕೂಟದಕ್ಲೆರ್ದ್ ಬುಡ್ದು ಪಾಡೊಡ್ಚಿ ತುಳು ನಾಟಕ ನಡಪರೆ ಉಂಡು.
ಜ.29 ಸೋಮಾರ ಬೊಲ್ಪುಗು ಕಲಶಾಭಿಷೇಕ, ಮಹಾಪೂಜೆ, ಬಯ್ಯಗ್ ರಂಗಪೂಜೆ ರಾತ್ರೆ ಊರುದ ಹವ್ಯಾಸಿ ಕಲಾವಿದೆರೆರ್ದ್ “ಅಣ್ಣಡ ತಾಂಟೊರ್ಚಿ” ತುಳು ನಾಟಕ ನಡಪರೆ ಉಂಡು.
ಜ.30 ಅಂಗಾರೆ ರಾತ್ರೆ ನಾಳ ಶ್ರೀ ದುರ್ಗಾಪರಮೇಶ್ವರೀ ಕೃಪಾಪೋಷಿತ ದಶಾವತಾರ ಯಕ್ಷಗಾನ ಮಂಡಳಿದಕ್ಲೆರ್ದ್ ಪಾಪಣ್ಣ ವಿಜಯ ಗುಣ ಸುಂದರಿ ಆಟ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ದೇವಲ್ಯದ ಗುರ್ಕಾರೆ ಭುವನೇಶ್ ಗೇರುಕಟ್ಟೆ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಬೊಲ್ತೇರ್: ಅಂಗಣದಗುಡ್ಡೆ ಕುದ್ಯಾಡಿ ಗ್ರಾಮದ ಬರಾಯ ಶ್ರೀ ದೈವ ಕೊಡಮಣಿತ್ತಾಯ ದೈವೊಲ್ಯ ಬೊಕ್ಕ ಶ್ರೀ ಬ್ರಹ್ಮಬೈದರ್ಕಳ ಗರಡಿಡ್ ವರ್ಷಾವಧಿ ಜಾತ್ರೆ ಜ.25 ಬೊಕ್ಕ 26 ಕ್ಕ್ ನಡಪರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್, ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವೊಲೆನ ಕೃಪೆಗ್ ಪಾತ್ರರಾವೊಡು ಪಂದ್ ಮಾನಾದಿಗೆದ ಗುರ್ಕಾರೆ ಕೊರಗಪ್ಪ ಪೂಜಾರಿ ಕೊಡಿಬಾಳೆ, ಜಾತ್ರೋಚ್ಚಯ ಸಮಿತಿ, ಜೀರ್ಣೋದ್ಧಾರ ಸಮಿತಿದ ಪದುಕೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಮಲ್ಪೆ ವಲಯದ ಸ್ವಸಹಾಯ ಗುಂಪುಲೆನ ಪದಗ್ರಹಣ ಲೇಸ್ ತೊಟ್ಟಂ ಗಣೇಶ ವೇದಿಕೆಡ್ ನಡತ್ಂಡ್.
ಈ ಲೇಸ್ ದ ಉದಿಪನನ್ ಒಡಿಪು ಶಾಸಕೆರ್ ಯಶಪಾಲ್ ಸುವರ್ಣ ಮಲ್ತೆರ್. ಈ ಪೊರ್ತುಡು ಮಲ್ಪೆ ಜನಜಾಗೃತಿ ಗುರ್ಕಾರೆ, ನೇಜಾರು ಭಗವತಿ ತೀಯ ಸಮಾಜದ ಗುರ್ಕಾರೆ ಪ್ರಶಾಂತ್ ಕೆ ಸಾಲಿಯಾನ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದಿತ್ತೆರ್.
ಮಹಾರಾಷ್ಟ್ರದ ನಾಸಿಕ್ ಡ್ ಶ್ರೀ ರಾಮ ಭಕ್ತೆರೆನ ಮುತಾಲಿಕೆಡ್ ಅಯೋಧ್ಯೆ ಶ್ರೀ ಬಾಲ ರಾಮನ ಪ್ರಾಣ ಪ್ರತಿಷ್ಠಾನದ ದಿನ (ಜ.22) ಶ್ರೀ ರಾಮ ವೈಭವ ಪನ್ಪಿನ ಧಾರ್ಮಿಕ ಲೇಸ್ ಗೌಜಿಡ್ ನಡತ್ಂಡ್.
ಅಂಚೆನೆ ಶ್ರೀ ರಾಮ ದೇವೆರೆನ ಭಾಗವತ ಕಥೆ, ಭಕ್ತಿಸುಗಿಪು ಬೊಕ್ಕ ಭಜನೆ ನಡತ್ಂಡ್. ಈ ಲೇಸ್ ಡ್ ರಾಮಭಕ್ತೆರ್ ಭಾರೀ ಮಲ್ಲ ಸಂಖ್ಯೆಡ್ ಸೇರ್ದ್ ಶ್ರೀ ರಾಮದೇವೆರೆನ ಕೃಪೆಗ್ ಪಾತ್ರರಾಯೆರ್.
ಕುಡ್ಲ: ಪುಗರ್ತೆದ ಕುಡ್ಲದ ಕದ್ರಿ ಶ್ರೀ ಮಂಜುನಾಥ ದೇವಲ್ಯದ ವರ್ಷಾವಧಿ ಜಾತ್ರೋಚ್ಚಯ, ಮಲ್ಲ ತೇರ್ ಉಚ್ಚಯ ಜ.22 ಸೋಮಾರ ಗೌಜಿಡ್ ನಡತ್ಂಡ್.
ಈ ಉಚ್ಚಯಡ್ ಮಲ್ಲಿಕಾ ಕಲಾವೃಂದದ ದುಂಬಾತ್ತಿಗೆಡ್ ಸುದೇಶ್ ಜೈನ್ ಮಕ್ಕಿಮನೆ ಮುತಾಲಿಕೆದ ಮಕ್ಕಿಮನೆ ಕಲಾವೃಂದ ಕುಡ್ಲ ಕೂಟದಕ್ಲೆರ್ದ್ ಸಾಂಸ್ಕ್ರತಿಕ ಲೇಸ್ ನಡತ್ಂಡ್.
ಈ ಪೊರ್ತುಡು ಡಾ.ಎ. ಜನಾರ್ಧನ ಶೆಟ್ಟಿ, ಪ್ರದೀಪ್ ಕುಮಾರ್ ಕಲ್ಕೂರ, ಸುಧಾಕರ ರಾವ್ ಪೇಜಾವರ, ಸನತ್ ಕುಮಾರ್ ಜೈನ್, ನವನೀತ್ ಶೆಟ್ಟಿ ಕದ್ರಿ, ಪ್ರಭಾಕರ ರಾವ್ ಪೇಜಾವರ ಪಾಲ್ ಪಡೆದ್ ಕಲಾವಿದೆರೆಗ್ ಮಾನಾದಿಗೆ ಮಲ್ತೆರ್.
ರೇಖಾ ರಂಜಿತ್ ಕದ್ರಿ ಲೇಸ್ ಸುಧಾರಿಕೆ ಮಲ್ತೆರ್. ಶ್ರೀಕಾಂತ್ ಕೊಂಡಾಣ, ಶ್ರೇಯಾ ಭಟ್, ಭಾಗ್ಯಶ್ರೀ ಭಟ್ ಸಹಕಾರ ಕೊರಿಯೆರ್.
ಅಯೋಧ್ಯೆಡ್ ಶ್ರೀ ರಾಮಗ್ ಪ್ರಾಣ ಪ್ರತಿಷ್ಠಾಪನೆ ನಡತಿನ ದಿನ (ಜ.22) ಶ್ರೀ ರಾಮ ದೇವೆರೆನ ಮಂದಿರಗ್ ಕಟೀಲ್ ಡ್ ಕೆಸರ್ ಕಲ್ಲ್ ಪಾಡಿಯೆರ್.
ಈ ಲೇಸ್ ನ್ ಕಟೀಲ್ ದೇವಲ್ಯದ ಅರ್ಚಕೆರ್ ಅನಂತ ಪದ್ಮನಾಭ ಅಸ್ರಣ್ಣ, ದೇವಿಕುಮಾರ ಅಸ್ರಣ್ಣ ಕಟೀಲ್ ಬೊಕ್ಕ ರಾಮ ಗೋಪಾಲ್ ಕೆ.ಕೊಂಡೇಲ, ಸುಧೆಂದ್ರ ಅಮ್ಮಣ್ಣಯ್ಯ ಮೊಕುಲು ತುಡರ್ ಅರ್ಲಾದ್ ಪೂಜೆ ಸಂದಾಯೆರ್.
ಈ ಪೊರ್ತುಡು ಊರುದ ಮಲ್ಲ ಬಿನ್ನೆರ್ ದೇವಿ ಪ್ರಸಾದ್ ಶೆಟ್ಟಿ, ವಿಜಯ್ ಶೆಟ್ಟಿ ಅಜಾರು, ತಿಮ್ಮಪ್ಪ ಕೋಟ್ಯಾನ್ ಕಟೀಲ್, ಶಶಿಧರ್ ಶೆಟ್ಟಿ ಮಿತ್ತಬೈಲ್, ಕಿರಣ್ ಶೆಟ್ಟಿ ಕೊಡೆತ್ತೂರು, ಸದಾಶಿವ ಮುಕ್ಕಾಲ್ದಿ, “ಗಿಡಿಗೆರೆ “, ರಾಮದಾಸ್ ಕಾಮತ್ ಕಟೀಲ್, ನಾರಾಯಣ ಕುಲಾಲ್ ಮಲ್ಲಿಗೆಯಂಗಡಿ, ಪ್ರಸಾದ್ ಶೆಟ್ಟಿ ಕಿನ್ನ ಚಿಲ್ , ಸದಾಶಿವ ಆಚಾರ್ಯ, ಹಿಂದೂ ಮುಖಂಡೆರ್ ಸೂರಜ್ ಕೊಂಡೇಲ, ಶ್ರೀ ರಾಮ ಮಂದಿರದ ಜೀರ್ಣೋದ್ಧಾರ ಸಮಿತಿದ ಗುರ್ಕಾರೆ ಗಣೇಶ್ ಆಚಾರ್ಯ ಮಲ್ಲಿಗೆಯಂಗಡಿ, ಪದುಕೆರ್ ಬೊಕ್ಕ ಭಕ್ತೆರ್ ಪಾಲ್ ಪಡೆದಿತ್ತೆರ್.
ಬಂಟ್ವಾಳ: ಪಂಜಿಕಲ್ಲ್ ಬಾಲೇಶ್ವರ ಶ್ರೀ ಕೊಡಮಣಿತ್ತಾಯ ಬ್ರಹ್ಮಬೈದರ್ಕಳ ಗರಡಿಡ್ ಜ.21 ಕ್ಕ್ ಸುರು ಆಯಿನ ಬ್ರಹ್ಮ ಬೈದರ್ಕಳ ಜಾತ್ರೆ (ಜ.24) ಇನಿ ಸಂಪನ್ನ ಆಪುಂಡು.
ಜ.21 ಐತಾರ ಬಯ್ಯಗ್ ಬಾಲೇಶ್ವರ ಗರಡಿಡ್ ಅಂಕ ಚೆಂಡ್, ನವಕ ಪ್ರಧಾನ ಕಲಶ, ಕೊಡಿ ಏರ್ಂಡ್. ರಾತ್ರೆ ಸಾಂಸ್ಕೃತಿಕ ಲೇಸ್, ಪಂಜಿಕಲ್ ಗುತ್ತುರ್ದ್ ಕೊಡಮಣಿತ್ತಾಯ ದೈವೊದ ಭಂಡಾರ ಬತ್ತ್ಂಡ್. ಅವ್ವೆ ಪೊರ್ತುಡು ಕೇಲ್ದೋಡಿಗುತ್ತು ಕೋಟಿ ಪೂಜಾರಿ ಮೆರೆನ ಇಲ್ಲಲ್ ರ್ದ್ ಬೈದರ್ಕಳ ಭಂಡಾರ ಬತ್ತ್ ದ್ ಪಂಜಿಕಲ್ ಗುತ್ತುದ ಕೈತಲ್ ಕೊಡಮಣಿತ್ತಾಯ ದೈವದೊಟ್ಟಿಗೆ ಸೇರ್ದ್ ಬಾಲೇಶ್ವರ ಗರಡಿಗ್ ಬತ್ತ್ಂಡ್. ಬೊಕ್ಕ ತೆಲಿಕೆದ ಕಲಾವಿದೆರ್ ಕೊಯಿಲ ಮೊಕ್ಲೆರ್ದ್ ಗೆಂದ ಗಿಡಿ ತುಳು ನಾಟಕ ನಡತ್ಂಡ್.
ಜ.22 ಸೋಮಾರ ಬಯ್ಯಗ್ ಸಂಕ್ರಾಂತಿ ಸೇವೆ, ಅಂಕ ಚೆಂಡ್, ರಾತ್ರೆ ಕೇಲ್ದೋಡಿಗುತ್ತುರ್ದ್ ಶ್ರೀ ದೈವೊದ ಭಂಡಾರ ಬತ್ತ್ ದ್ ನೇಮ, ಕೊಡಮಣಿತ್ತಾಯ ದೈವೊಗ್ ಸರ್ವಬಲಿ ನಡತ್ಂಡ್. ಬೊಕ್ಕ ಕಲ್ಲಡ್ಕ ವಿಠಲ್ ನಾಯ್ಕ್ ಮೆರೆರ್ದ್ ಗೀತಾ ಸಾಹಿತ್ಯ ಸಂಭ್ರಮ ನಡತ್ಂಡ್.
ಜ.23 ಅಂಗಾರೆ ಬಯ್ಯಗ್ ಅಂಕ ಚೆಂಡ್, ರಾತ್ರೆ ಕೊಡಮಣಿತ್ತಾಯ ಬ್ರಹ್ಮಬೈದೆರ್ಲೆಗ್ ಗ್ರಾಮ ಸಂಕ್ರಾಂತಿ ಸೇವೆ, ರಾತ್ರೆ ಶ್ರೀ ಆದಿನಾಥ ಸ್ವಾಮಿ ಬಸದಿಡ್ ಪಂಚಾಮೃತ ಅಭಿಷೇಕ, ಕೊಡಮಣಿತ್ತಾಯ ದೈವೊದ ನೇಮ, ಬ್ರಹ್ಮಬಲಿ, ಇರುಳು ದೈವೊಲೆಗ್ ನೇಮ ನಡತ್ಂಡ್.
ಜ.24 ಬುದಾರ (ಇನಿ) ಬಯ್ಯಗ್ ಬೈದರ್ಕಳ ಬಲಿ, ಬೈದರ್ಕಳ ಬಾಕಿಮಾರ್ ಕಂಡಗ್ ಜಪ್ಪೆರೆ, ಕೊಡಮಣಿತ್ತಾಯ ಬೈದರ್ಕಳ ಕಡಸಾಲೆ ಬಲಿ, ಬಾಕಿಮಾರ್ ಗ್ ಸುರ್ಯ ಕೊರಿಯೆರೆ, ಬ್ರಹ್ಮರ ಬಲಿ, ಬೈದರ್ಕಳ ಪಾತ್ರಿಲು ದರ್ಶನ ಆದ್ ಸುರ್ಯ ಪಾಡಿಯೆರೆ ಉಂಡು. ಮಾಯಾಂದಾಲ್ ದೇವಿನ ಉಚ್ಚಯ ಆದ್ ಕೊಡಿ ಜಾವೆರೆ ಉಂಡು.
ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್ ಸಿರಿಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೈವ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಬಿ ಭರತ್ ಕುಮಾರ್ ರೈ ಪೀರ್ದಬೆಟ್ಟುಗುತ್ತು, ರಘಚಂದ್ರ ಚೌಟ ಬಾಲೇಶ್ವರಗುತ್ತು, ಕೋಟಿ ಪೂಜಾರಿ ಕೇಲ್ದೋಡಿಗುತ್ತು, ಸುರೇಖಾ ಸುರೇಂದ್ರ ಆರಿಗ ಪಂಜಿಕಲ್ಲುಗುತ್ತು ಮಾಗಣೆ, ಬೊಕ್ಕ ಶ್ರೀ ಕೊಡಮಣಿತ್ತಾಯ ಬ್ರಹ್ಮಬೈದರ್ಕಳ ಗರಡಿದ ಜೀರ್ಣೋದ್ಧಾರ ಸಮಿತಿ, ಬ್ರಹ್ಮಬೈದರ್ಕಳ ಗರಡಿ ಸೇವಾ ಸಮಿತಿ, ಗರಡಿ ಫ್ರೆಂಡ್ಸ್ ಕ್ಲಬ್ ಬೊಕ್ಕ ಗ್ರಾಮಸ್ಥೆರ್ ಲೆಪ್ಪೋಲೆಡ್ ತೆರಿಪಾದೆರ್.
