Fri. Nov 20th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

Udupi Akhila Bharatiya Vidyarthi Parishad conduct awareness program on elections ಒಡಿಪು ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ ವತಿರ್ದ್ ಓಟುದ ಜಾಗೃತಿ

ಅಖಿಲ ಭಾರತೀಯ ವಿದ್ಯಾರ್ಥಿ ಪರಿಷತ್ ಒಡಿಪು ಜಿಲ್ಲೆದ ವತಿರ್ದ್ ವಿಧಾನಸಭೆ ಓಟುದ ಜಾಗೃತಿಗಾದ್ ಕಾರ್ಲದ ಬೇತೆ ಬೇತೆ ಪ್ರಮುಖ ಮಾರ್ಗಡ್ 100% ಓಟು ಪಾಡೊಡು ಪಂದ್ ಸಾರ್ವಜನಿಕೆರೆಡ ಜಾಗೃತಿ ಮೂಡಿಸಾವುನ ಸೈನ್ ಸಂಗ್ರಹ ಅಭಿಯಾನ ಬೊಕ್ಕ ಪೇಂಟೆದ ಬೇತೆ ಬೇತೆ ಕಾಲೇಜ್ ಡ್ ಓಟುದ ಜಾಗೃತಿ ಬೊಕ್ಕ ಸೈನ್ ಸಂಗ್ರಹ ಅಭಿಯಾನ ಬೊಕ್ಕ ಕರಪತ್ರನ್ ಕೊರಿಯೆರ್.

ವಿದ್ಯಾರ್ಥಿಲೆರ್ದ್ ಎಂಕ್ಲೆನ ಹಕ್ಕ್, ಎಂಕ್ಲೆನ ಓಟು. ಎಂಕ್ಲೆನ ಭವಿಷ್ಯ. ಎಂಕ್ಲೆನ ವೋಟು ಮಾರಿಯೆರೆ ಇಜ್ಜಿ ಪನ್ಪುನ ಸುಮಾರ್ ಘೋಷಣೆ ಪಾಡೊಂಡು ಸಮಾಜಗ್ ಓಟು ಪಾಡುಲೆಕ್ಕ ಮಲ್ತೆರ್.

ಈ ಪೊರ್ತುಡು ವಿದ್ಯಾರ್ಥಿ ಪರಿಷತ್ ಹಿರಿಯ ಕಾರ್ಯಕರ್ತೆ ಶಶಾಂಕ್ ಶ್ರೀವತಾಯ, ಶೀತಲ್ ಕುಮಾರ್ ಜೈನ್, ಜಿಲ್ಲಾ ಸಂಘಟನಾ ಕಾರ್ಯದರ್ಶಿ ಅಜಯ್ ಪ್ರಭು, ವಿಭಾಗ ಸೇವಾ ಪ್ರಮುಖ ಆಶಿಶ್ ಶೆಟ್ಟಿ ಬೋಳ, ಜಿಲ್ಲಾ ಸಂಚಲಕ್ ಯುಕೇಶ್, ಶಿವರುದ್ರ ಪಾಟೀಲ್, ಬೊಕ್ಕ ಶ್ರೇಯಸ್ ಇತ್ತೆರ್.

Lionel Messi is the sportsperson of the year -2023 ಲಯೊನೆಲ್ ಮೆಸ್ಸಿಗ್ 2023ನೇ ವರ್ಷದ ಕ್ರೀಡಾಪಟು ಪ್ರಶಸ್ತಿ

ಪ್ಯಾರಿಸ್: ಅರ್ಜೆಂಟೀನಾ ಫುಟ್‌ಬಾಲ್ ಕೂಟದ ನಾಯಕೆ ಲಯೊನೆಲ್ ಮೆಸ್ಸಿ, ಪುಗರ್ತೆದ ಲಾರೆನ್ ವರ್ಷದ ಕ್ರೀಡಾಪಟು ಪ್ರಶಸ್ತಿನ್ ಪಡೆತೆರ್.

ಫುಟ್‌ಬಾಲ್ ವಿಶ್ವಕಪ್ ಗೆಂದಿನ ನಾಯಕೆ ಮೆಸ್ಸಿ, ಅರ್ಜೆಂಟೀನಾದ ಪರವಾದ್ ಲಾರೆಸ್ ವರ್ಷದ ವಿಶ್ವ ಕೂಟ ಪ್ರಶಸ್ತಿನ್ ಪಡೆಂಡ್.

ಈ ಮುಖೇನ ಒಂಜೇ ಸಾಲ್ ಡ್ ಲಾರೆಸ್ ವರ್ಷದ ಕ್ರೀಡಾಪಟು ಬೊಕ್ಕ ವರ್ಷದ ತಂಡ ಪ್ರಶಸ್ತಿ ಗೆಂದಿನ ಸುರುತ್ತ ಕ್ರೀಡಾಪಟು ಆತೆರ್.

ನೆತ್ತೊಟ್ಟಿಗೆ ಮೆಸ್ಸಿ, ರಡ್ಡನೇ ಸರ್ತಿ ಲಾರೆಸ್ ವರ್ಷದ ಕ್ರೀಡಾಪಟು ಗೆಂದಿನ ಸಾಧನೆ ಮಲ್ದೆರ್. ನೇರ್ದ್ ದುಂಬು 2020ಟ್ಟ್ ದಿಗ್ಗಜ ಫಾರ್ಮುಲಾ ಒನ್ ಚಾಲಕೆರ್ ಲೂಯಿಸ್ ಹ್ಯಾಮಿಲ್ಟನ್ ನೊಟ್ಟಿಗೆ ಪುಗರ್ತೆದ ಪ್ರಶಸ್ತಿ ಗೆಂದ್ ದಿತ್ತೆರ್.

Radio Manipal to air Hombelaku – A series on Personality development ರೇಡಿಯೊ ಮಣಿಪಾಲ್ ಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhzಡ್ ಜೆಸಿಐ ಕಲ್ಯಾಣಪುರದ ಮುತಾಲಿಕೆಡ್ ಹೊಂಬೆಳಕು-ವ್ಯಕ್ತಿತ್ವ ವಿಕಸನ ಸರಣಿ ಲೇಸ್ ದ 6ನೇ ಸಂಚಿಕೆ ಮೇ9 ಅಂಗಾರೆ ಬಯ್ಯಗ್ 5.30ಕ್ಕ್ ಪ್ರಸಾರ ಆಪುಂಡು.

ಈ ಲೇಸ್ ಡ್ ಶಿಕ್ಷಕೆರ್, ಬರವುಗಾರೆ ನರೇಂದ್ರ ಕುಮಾರ್ ಕೋಟ ಪಾಲ್ ಪಡೆಯೆರೆ ಉಲ್ಲೆರ್. ನನ ಮೇ10 ಕ್ಕ್ ಮಧ್ಯಾಹ್ನ 1.30ಕ್ಕ್ ಕುಡೊರ ಪ್ರಸಾರ ಆಪುಂಡು.

May 20 th – 25th: Bhadrakali temple,Benjanapadav -Brahmakalasha celebration ಮೇ20-25: ಬೆಂಜನಪದವು ಶ್ರೀ ಭದ್ರಕಾಳೀ ದೇವಲ್ಯಡ್ ಬ್ರಹ್ಮಕಲಶ ಉಚ್ಚಯ

ಬಂಟ್ವಾಳ: ಬೆಂಜನಪದವು ಶ್ರೀ ಭದ್ರಕಾಳೀ ದೇವಲ್ಯಡ್ ಪುನರ್ ಪ್ರತಿಷ್ಠಾ ಬ್ರಹ್ಮಕಲಶ ಉಚ್ಚಯ ಮೇ20-25 ಮುಟ್ಟ ನಡಪರೆ ಉಂಡು.

ಶ್ರೀ ಕ್ಷೇತ್ರದ ತಂತ್ರಿಲು ಲೋಕೇಶ್ ಶಾಂತಿ ಮೆರೆನ ಮುತಾಲಿಕೆಡ್ ಲೇಸ್ ದ ವೈದಿಕ, ಧಾರ್ಮಿಕ ವಿಧಿ ವಿಧಾನಲು ನಡಪರೆ ಉಂಡು.

ಮೇ20 ಸನಿಯಾರ ಬೊಲ್ಪುಗು ಸಾಮೂಹಿಕ ದೇವೆರೆನ ಪ್ರಾರ್ತನೆ, ತುಡರ್ ಅರ್ಲಾವೆರೆ, ತೋರಣ ಮೂರ್ತ, ಗಣಹೋಮ, ಉಗ್ರಾಣ ಮೂರ್ತ, ಮಧ್ಯಾಹ್ನ ಭಜನೆ ಬಯ್ಯಗ್ ವಾಸ್ತುಹೋಮ, ವಾಸ್ತು ಪೂಜೆ, ವಾಸ್ತು ಬಲಿ, ಸಾಂಸ್ಕೃತಿಕ ಲೇಸ್ ದ ಉದಿಪನ, ಬೆಂಜನಪದವು ರಾಮನಗರ ಬಾಲ ಪ್ರತಿಭೆಲೆರ್ದ್ ಸಾಂಸ್ಕೃತಿಕ ಲೇಸ್, ವಿನೋದ್ ರಾಜ್ ಸಾರಥ್ಯಡ್ ನೃತ್ಯ ಗಾನ ಸಂಭ್ರಮ, ರಾತ್ರೆ ಮಂಜೇಶ್ವರದ ಶಾರದಾ ಕಲಾ ಆರ್ಟ್ಸ್ ಕೂಟದ ಐಸಿರಿ ಕಲಾವಿದೆರೆರ್ದ್ ಬಂಜಿಗ್ ಹಾಕೊಡ್ಚಿ ನಾಟಕ ನಡಪರೆ ಉಂಡು.

ಮೇ21 ಐತಾರ ಬೊಲ್ಪುಗು ಗಣಹೋಮ, ಮಧ್ಯಾಹ್ನ ಭಜನೆ, ಪುದೆಕಾಣಿಕೆ ಮೆರವಣಿಗೆ, ಬಯ್ಯಗ್ ಧರ್ಮಸಭೆ, ಬೊಕ್ಕ ಸಾಂಸ್ಕೃತಿಕ ಲೇಸ್ ದ ಅಂಗವಾದ್ ನೃತ್ಯಂ ಗುರುಪುರ ಕೈಕಂಬ ಶಾಖೆ ಮೊಕ್ಲೆರ್ದ್ ನೃತ್ಯಾರ್ಪಣಂ, ರಾತ್ರೆ ವಿಠಲ್ ನಾಯಕ್ ಕಲ್ಲಡ್ಕ ಬೊಕ್ಕ ಕೂಟದಕ್ಲೆರ್ದ್ ಗೀತಾ ಸಾಹಿತ್ಯ ಸಂಭ್ರಮ, ಅಶೋಕ್ ಪೊಳಲಿ ಮೆರೆರ್ದ್ ಬೇತೆ ಬೇತೆ ಶೈಲಿದ ನೃತ್ಯ ನಡಪರೆ ಉಂಡು.

ಮೇ22 ಸೋಮಾರ ಬೊಲ್ಪುಗು ಗಣಹೋಮ, ತ್ರಿಕಾಲ ಭಗವತಿ ಸೇವೆ, ಶಿಖರ ಪ್ರತಿಷ್ಠೆ, ಕಲಶಾಭಿಷೇಕ, ಶ್ರೀ ಭದ್ರಕಾಳೀ, ಗಣಪತಿ, ಧರ್ಮಶಾಸ್ತ ದೇವೆರೆನ ಬೊಕ್ಕ ಅಣ್ಣಪ್ಪ ಪಂಜುರ್ಲಿ, ಧೂಮಾವತಿ ಬಂಟ ದೈವೊಲೆನ ಬಿಂಬ ಪುನರ್ ಪ್ರತಿಷ್ಠೆ, ಕಲ್ಕುಡ ಕಲ್ಲುರ್ಟಿ, ಮಂತ್ರದೇವತೆ, ಗುಳಿಗ ದೈವೊಲೆನ ಬಿಂಬ ಸ್ಥಾಪನೆ, ಮಧ್ಯಾಹ್ನ ಭಜನೆ, ಯಶವಂತ ಸ್ನೇಹಗಿರಿ ಬೊಕ್ಕ ಕೂಟದಕ್ಲೆರ್ದ್ ಭಕ್ತಿ ರಸಮಂಜರಿ, ಬಯ್ಯಗ್ ಶ್ರೀಚಕ್ರ ಪೂಜೆ, ಧರ್ಮಸಭೆ, ಬೊಕ್ಕ ಅಂಗನವಾಡಿ ಕೇಂದ್ರ ಬೆಂಜನಪದವು ಬೊಕ್ಕ ಕೈತಲ್ ದ ಪ್ರತಿಭೆಲೆರ್ದ್ ಸಾಂಸ್ಕೃತಿಕ ಲೇಸ್, ರಾತ್ರೆ ಕೆನರಾ ಇಂಜಿನಿಯರಿಂಗ್ ಕಾಲೇಜ್ ಬೆಂಜನಪದವು ಮುಲ್ಪದ ಕಲ್ಪಾರ್ಥಿಲೆರ್ದ್ ಸಾಂಸ್ಕೃತಿಕ ಲೇಸ್ ನಡಪರೆ ಉಂಡು.

ಮೇ23 ಅಂಗಾರೆ ಬೊಲ್ಪುಗು ಗಣಹೋಮ, ತ್ರಿಕಾಲ ಭಗವತಿ ಸೇವೆ, ನವ ಕಲಶ ಪ್ರಧಾನ ಹೋಮ, ಪಂಚಾಮೃತ ಅಭಿಷೇಕ, ಕಲಶಾಭಿಷೇಕ, ಆಶ್ಲೇಷ ಬಲಿ ಮಧ್ಯಾಹ್ನ ಮಹಾಪೂಜೆ, ಭಜನೆ, ಬಯ್ಯಗ್ ಕುಂಭೇಶ-ಕರ್ಕರಿ ಕಲಶ ಪೂಜೆ, ಬ್ರಹ್ಮಕಲಶ ಪೂಜೆ, ಪರಿಕಲಶ ಪೂಜೆ, ರಾತ್ರೆ ಕಟೀಲ್ ಮೇಳದಕ್ಲೆರ್ದ್ ರಾಣಿ ಶಶಿಪ್ರಭಾ- ರತಿ ಕಲ್ಯಾಣ ಆಟ ನಡಪರೆ ಉಂಡು.

ಮೇ24 ಬುಧಾರ ಬೊಲ್ಪುಗು ಗಣಹೋಮ, ಶ್ರೀ ಭದ್ರಕಾಳೀ ಅಮ್ಮಗ್ ಬ್ರಹ್ಮಕಲಶ ಉಚ್ಚಯ, ಗಣಪತಿ, ಧರ್ಮಶಾಸ್ತ್ರ ದೇವೆರೆಗ್ ಬ್ರಹ್ಮಕಲಶಾಭಿಷೇಕ, ಅಣ್ಣಪ್ಪ ಪಂಜುರ್ಲಿ, ಧೂಮಾವತಿ ಬಂಟ ದೈವೊಲೆಗ್ ಕಲಶಾಭಿಷೇಕ, ಕಲ್ಕುಡ ಕಲ್ಲುರ್ಟಿ, ಮಂತ್ರದೇವತೆ, ಗುಳಿಗ ಸಾನಿಧ್ಯಡ್ ನವ ಕಲಶಾಭಿಷೇಕ, ಭದ್ರಕಾಳೀ ಅಮ್ಮಗ್ ಪ್ರಸನ್ನ ಪೂಜೆ, ಭಜನೆ, ಮಧ್ಯಾಹ್ನ ಮಹಾಪೂಜೆ, ದರ್ಶನ ಸೇವೆ, ಪಲ್ಲಸೇವೆ, ಅನ್ನಸಂತರ್ಪಣೆ, ಬೊಕ್ಕ ಪುತ್ತೂರ್ ಜಗದೀಶ್ ಆಚಾರ್ಯ ಕೂಟದಕ್ಲೆರ್ದ್ ಸಂಗೀತ ಗಾನ ಸಂಭ್ರಮ ಬಯ್ಯಗ್ ದುರ್ಗಾ ನಮಸ್ಕಾರ ಪೂಜೆ, ಬೊಕ್ಕ ಧರ್ಮಸಭೆ ರಾತ್ರೆ ಮಹಾಪೂಜೆ, ಬಲಿ ಉಚ್ಚಯ, ಬೊಕ್ಕ ಕಿಶೋರ್ ಡಿ ಶೆಟ್ಟಿ ಸಾರಥ್ಯದ ಗರುಡ ಪಂಚೆಮಿ ನಾಟಕ ನಡಪರೆ ಉಂಡು.

ಮೇ25 ಗುರುವಾರ ಬೊಲ್ಪುಗು ಗಣಹೋಮ,
ಬಯ್ಯಗ್ ಅಣ್ಣಪ್ಪ ಪಂಜುರ್ಲಿ, ಧೂಮಾವತಿ ಬಂಟ ದೈವೊಲೆಗ್ ನೇಮ, ರಾತ್ರೆ ನವ ಚಂಡಿಯಾಗ, ಮಹಾಪೂಜೆ, ಬೊಕ್ಕ ಕಾಳಭಂಡಾಸುರ ಗುಳಿಗ, ಕಲ್ಕುಡ ಕಲ್ಲುರ್ಟಿ, ಮಂತ್ರದೇವತೆ ದೈವೊಲೆಗ್ ಕೋಲ ಬಲಿ ಸೇವೆ ನಡಪರೆ ಉಂಡು.

ಈ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ಪ್ರಸಾದ ದೆತೊಂದು ಶ್ರೀ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಬ್ರಹ್ಮಕಲಶ ಉಚ್ಚಯ ಸಮಿತಿದ ಅಧ್ಯಕ್ಷೆರ್ ಭುವನೇಶ್ ಪಚ್ಚಿನಡ್ಕ, ಗೌರವಾಧ್ಯಕ್ಷೆರ್ ಕಿಶೋರ್ ಕುಮಾರ್ ದಂಡಕೇರಿ, ಶ್ರೀ ಭದ್ರಕಾಳೀ ಸೇವಾ ಸಮಿತಿದ ಅಧ್ಯಕ್ಷೆರ್, ಧರ್ಮದರ್ಶಿಲು ರಮೇಶ್ ಬಿ. ಬೆಂಜನಪದವು, ಗೌರವಾಧ್ಯಕ್ಷೆರ್ ಈಶ್ವರ ಬೆಳ್ಚಡ ಬೆಂಜನಪದವು, ಪುನರ್ ನಿರ್ಮಾಣ ಸಮಿತಿದ ಅಧ್ಯಕ್ಷೆರ್ ಕೆ.ಪಿ ಶೆಟ್ಟಿ ಮೊಡಂಕಾಪು ಗುತ್ತು ಲೆಪ್ಪೋಲೆಡ್ ತೆರಿಪಾದೆರ್.

Mobiles and other e – gadgets not allowed at vote counting centres ವೋಟುದ ಗೆನ್ಪುನಡೆಗ್ ಮೊಬೈಲ್, ಇ-ಗ್ಯಾಜೆಟ್‌ ಕನಯೆರೆ ಇಜ್ಜಿ

ಕುಡ್ಲ: ಸಾರ್ವತ್ರಿಕ ಕರ್ನಾಟಕ ವಿಧಾನಸಭೆ ವೋಟು- 2023ಕ್ಕ್ ಸಂಬಂಧ ಪಟ್ಟಿನಂಚೆನೆ ಮೇ10ಕ್ಕ್ ವೋಟು ನಡಪರೆ ಉಂಡು.

ಈ ವೋಟುದ ಲೆಕ್ಕ ಮೇ13 ಕ್ಕ್ ಸುರತ್ಕಲ್‌ಡ್ ಇಪ್ಪುನ ಎನ್.ಐ.ಟಿ.ಕೆಡ್ ನಡಪರೆ ಉಂಡು. ವೋಟುದ ಲೆಕ್ಕದ ದಿನತಾನಿ ಜನಪ್ರತಿನಿಧಿಲು, ವೋಟುದ ಏಜೆಂಟ್ ನಕುಲು ರ್, ವೋಟು ಲೆಕ್ಕ ಮಲ್ಪುನ ಏಜೆಂಟ್‌ಲು, ಬೊಕ್ಕ ವೋಟು ಲೆಕ್ಕ ಮಲ್ಪೆರೆ ನಿಯೋಜನೆ ಮಲ್ತಿನ ಮೇಲ್ವಿಚಾರಕೆರ್, ಸಹಾಯಕೆರ್, ಗ್ರೂಪ್ ಡಿ ಸಿಬ್ಬಂದಿಲು ವೋಟು ಲೆಕ್ಕ ಮಲ್ಪುನ ಕೇಂದ್ರದ ಚಾವಡಿದುಲಯಿ ಬನ್ನಗ ಮೊಬೈಲ್, ಎಲೆಕ್ಟ್ರಾನಿಕ್ಸ್ ವಾಚ್, ಬೊಕ್ಕ ಬೇತೆ ಡಿಜಿಟಲ್ ತಂತ್ರಜ್ಞಾನದ ಉಪಕರಣ ಕನಯೆರೆ ಬಲ್ಲಿ.

ಈ ಮಾರ್ಗಸೂಚಿನ್ ಕಡ್ಡಾಯವಾದ್ ಪಾಲಿಸಾವೊಡು. ಬೊಕ್ಕ ಈ ಆದೇಶನ್ ಉಲ್ಲಂಘನೆ ಮಲ್ತ್ಂಡ ಪ್ರಜಾಪ್ರತಿನಿಧಿ ಕಾಯ್ದೆ 1951ತ್ತ ಕಲಂ 126 ಬೊಕ್ಕ ಭಾರತೀಯ ದಂಡ ಸಂಹಿತೆದ ಕಾಯ್ದೆದಡಿಟ್ ಕ್ರಮ ದೆತೊನಿಯೆರೆ ಆಪುಂಡು ಪಂದ್ ಜಿಲ್ಲಾ ಚುನಾವಣಾಧಿಕಾರಿ ಬೊಕ್ಕ ಜಿಲ್ಲಾಧಿಕಾರಿ ರವಿಕುಮಾರ್ ಎಂ.ಆರ್. ಮೇರ್ ಪ್ರಕಟಣೆಡ್ ತೆರಿಪಾದೆರ್.

A media centre opened for Brahmakalashotsava celebration of Subramanya temple, Tokur ತೋಕೂರು ಬ್ರಹ್ಮಕಲಶೊಗು ಮಾಧ್ಯಮ ಕೇಂದ್ರ ಉದಿಪನ

ಹಳೆಯಂಗಡಿ : ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ದೇವಲ್ಯದ ಪುನರ್ ಪ್ರತಿಷ್ಠೆ, ಬ್ರಹ್ಮಕಲಶ ಬೊಕ್ಕ ನಾಗಮಂಡಲ ಉಚ್ಚಯದ ನಿಲೆಟ್ಟ್ ಮಾಧ್ಯಮ ಕೇಂದ್ರದ ಉದಿಪನದ ಲೇಸ್ ಮೇ 7 ಐತಾರ ನಡತ್ಂಡ್.

ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಸ್ಪೋರ್ಟ್ಸ್ ಕ್ಲಬ್ ದ ಚಾವಡಿಡ್ ಹಿರಿಯ ಪತ್ರಕರ್ತೆರ್ ರಮೇಶ್ ಅಮೀನ್ ಬೊಂಬೈ ಮೇರ್ ಬೊಲ್ಪು ಅರ್ಲಾದ್ ಮಾಧ್ಯಮ ಕೇಂದ್ರಗ್ ಚಾಲನೆ ಕೊರಿಯೆರ್.

ಈ ಪೊರ್ತುಡು ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು, ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್, ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್ ಕುಮಾರ್ ಹೆಗ್ಡೆ, ಪ್ರಧಾನ ಕಾರ್ಯ ದರ್ಶಿ ರಾಮಣ್ಣ ದೇವಾಡಿಗ, ಸಂಚಾಲಕೆರ್ ಡಾ. ಸೋಂದಾ ಭಾಸ್ಕರ ಭಟ್, ಅರ್ಚಕೆರಾಯಿನ ಟಿ.ಕೆ.ಮಧುಸೂದನ ಆಚಾರ್ಯ, ಪಿ.ಸಿ.ಕೋಟ್ಯಾನ್, ಧನಂಜಯ ಶೆಟ್ಟಿಗಾರ್, ವಿಜಯ ಶೆಟ್ಟಿ, ಮಾಧ್ಯಮ ಸಮಿತಿದ ಸಂಚಾಲಕೆರಾಯಿನ ನಿಶಾಂತ್ ಶೆಟ್ಟಿ, ಎಚ್ಕೆ ಹೆಜ್ಮಾಡಿ, ನರೇಂದ್ರ ಕೆರೆಕಾಡು, ಗಣೇಶ್ ದೇವಾಡಿಗ ಪಂಜ ಮೊಕುಲು ಮಾತ ಇತ್ತೆರ್.

May 10th -23rd : Shri Subramanya temple,Tokur-Brahmakalashotsava and Nagamandala celebration ಮೇ 10- 23 ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಲ್ಯಡ್ ಬ್ರಹ್ಮಕಲಶ, ನಾಗಮಂಡಲ ಉಚ್ಚಯದ ಗೌಜಿ

ಹಳೆಯಂಗಡಿ: ಸುಮಾರ್ 36 ವರ್ಷೊರ್ದು ಬೊಕ್ಕ ಅಂದಾಜಿ 10 ಕೋಟಿ ರೂ. ಖರ್ಚಿಡ್ ಜೀರ್ಣೋದ್ಧಾರ ಆಯಿನ ತೋಕೂರು ಶ್ರೀ ಸುಬ್ರಹ್ಮಣ್ಯ ಮಹಾಗಣಪತಿ ಶಿಲಾಮಯ ದೇವಲ್ಯಡ್ ಮೇ 10 ಬುಧಾರರ್ದ್ 23 ಅಂಗಾರೆ ಮುಟ್ಟ ದೇವೆರ್ನ ಪುನರ್ ಪ್ರತಿಷ್ಠೆ, ಬ್ರಹ್ಮಕುಂಭಾಭಿಷೇಕ ಅಂಚೆನೆ ನಾಗಮಂಡಲ ಉಚ್ಚಯ ಬೇತೆ ಬೇತೆ ರೀತಿದ ಧಾರ್ಮಿಕ ಅಂಚೆನೆ ಸಾಂಸ್ಕೃತಿಕ ಕಾರ್ಯಕ್ರಮದ ಒಟ್ಟುಗು ನಡಪರೆ ಉಂಡು ಪಂದ್ ದೇವಸ್ಥಾನದ ಜೀರ್ಣೋದ್ಧಾರ ಸಮಿತಿದ ಅಧ್ಯಕ್ಷೆರ್ ಧರ್ಮದರ್ಶಿ ಹರಿಕೃಷ್ಣ ಪುನರೂರು ತೆರಿಪಾಯೆರ್.

ಆರ್ ತೋಕೂರು ಶ್ರೀ ಸುಬ್ರಹ್ಮಣ್ಯ ದೇವಸ್ಥಾನದ ಶ್ರೀ ಸುಬ್ರಹ್ಮಣ್ಯ ಸಭಾಂಗಣದ ಚಾವಡಿಡ್ ಐತಾರ (ಮೇ 7) ನಡತಿನ ಸುದ್ದಿಗೋಷ್ಠಿಡ್ ಈ ವಿಷಯ ಪಂಡೆರ್.

ಜೀರ್ಣೋದ್ಧಾರದ ಬೇಲೆರ್ದ್ ದುಂಬು ದೇವೆರ್ನ ಮೂಲ ಮೂರ್ತಿನ್ ಬಾಲಾಲಯಡ್ ಪ್ರತಿಷ್ಠೆ ಮಲ್ತ್ ದ್ ನಿತ್ಯ ಪೂಜೆ ಆವೊಂದುಂಡು. ಮೇ 10ರ್ದ್ ಸುರುವಾಪಿನ ಈ ಲೇಸ್ ಡ್ ಮುಖ್ಯವಾದ್ ಮೇ 12 ಕ್ಕ್ ಶ್ರೀ ಸುಬ್ರಹ್ಮಣ್ಯ ದೇವರ್ನ ಪ್ರತಿಷ್ಠೆ, 14 ಕ್ಕ್ ಶ್ರೀ ಮಹಾಗಣಪತಿ ಬೊಕ್ಕ ಶ್ರೀ ದುರ್ಗಾದೇವಿನ ಪ್ರತಿಷ್ಠೆ, 17 ಕ್ಕ್ ಶ್ರೀ ಮಹಾಗಣಪತಿ ಅಂಚೆನೆ ಶ್ರೀ ದುರ್ಗಾದೇವಿನ ಕಲಶಾಭಿಷೇಕ, 21ಕ್ಕ್ ಶ್ರೀ ಸುಬ್ರಹ್ಮಣ್ಯ ದೇವರೆಗ್ ಬ್ರಹ್ಮಕುಂಭಾಭಿಷೇಕ, ಪಗೆಲ್ ತೇರ್ , ಮಹಾ ಅನ್ನಸಂತರ್ಪಣೆ, 22 ಕ್ಕ್ ಕ್ಷೇತ್ರದ ಕಾಂತೇರಿ ಜುಮಾದಿ ದೈವದ ನೇಮ, 23ಕ್ಕೆ ನಾಗ ಮಂಡಲ ನಡಪರೆ ಉಂಡು ಪಂದ್ ತೆರಿಪಾಯೆರ್.

ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಸಂತೋಷ್‌ ಕುಮಾರ್ ಹೆಗ್ಡೆ ಪಾತೆರ್ದ್, ಭಕ್ತೆರ್ನ ಕರಸೇವೆದ ಶ್ರಮರ್ದಾತ್ರ ಅಂಚೆನೆ ಮಸ್ತ್ ದಾನಿಲೆನ ಸಾಕಾರೊಡು ಸುರುತ್ತ ಪಂತೆಡ್ ಮಲ್ಲ ಮಟ್ಟ್ ದ ಬೇಲೆಲು ಆತ್ಂಡ್. ಆತ್ಂಡ್. ಬ್ರಹ್ಮಕಲಶದ ಪೊರ್ತುಡು ಪ್ರತಿನಿತ್ಯ ಕಾಂಡೆ ಉಪಾಹಾರ ಬೊಕ್ಕ ರಡ್ಡ್ ಪೊರ್ತು ಅನ್ನಸಂತರ್ಪಣೆ ನಡಪರೆ ಉಂಡು. ಬ್ರಹ್ಮಕಲಶೋತ್ಸವ ಬೊಕ್ಕ ನಾಗಮಂಡಲದಾನಿ ಒಂಜಿ ಲಕ್ಷ ಜನ ಸೇರುನ ಅಂದಾಜಿ ಉಂಡು.ಅಯಿತ್ತ ನಿರ್ವಹಣೆಗಾದ್ ಕೆಲವು ಉಪ ಸಮಿತಿಲೆನ್ ಮಲ್ತ್ ದ್ಂಡ್ ಪಂಡೆರ್.

ವ್ಯವಸ್ಥಾಪನಾ ಸಮಿತಿದ ಅಧ್ಯಕ್ಷೆರ್ ಹರಿದಾಸ್ ಭಟ್ ಪಾತೆರ್ದ್, ಸರಕಾರರ್ದ್ ದೇವಸ್ಥಾನಗ್ ಒಂಜಿ ಕೋಟಿ ರೂ.ದ ಸಕಾಯ ಬೇತೆ ಬೇತೆ ಯೋಜನೆ ಮುಕೇನ ಅನುಷ್ಠಾನಗ್ ಬರಿಯರೆ ಉಂಡು. 2022ನೇ ಎಪ್ರಿಲ್ 22ಕ್ಕ್ ಸುರೂತ್ತ ಪಂತೆದ ಜೀರ್ಣೋದ್ಧಾರದ ಬೇಲೆ ಸುರುವಾತ್ಂಡ್. ದುಂಬುದ ಪಂತೆಡ್ ನನಾತ್ ಬೇಲೆ ಆವರೆ ಉಂಡು. ಬ್ರಹ್ಮಕಲಶದ ಪೊರ್ತುಡು ಭಕ್ತೆರೆಗ್ ದೇವೆರ್ನ ದರ್ಶನಗ್ ತಡೆ ಆವಂದಿಲೆಕ ವ್ಯವಸ್ಥೆ ಮಲ್ದ್ಂಡ್. ಬೇತೆ ಬೇತೆ ಕಡೆಟ್ಟ್ ಅ ವಿಶಾಲವಾಯಿನ ಪಾರ್ಕಿಂಗ್ ಜಾಗೆ, ಅನ್ನದಾನದ ಜಾಗೆ,ಬ್ಯಾರ ವೈವಾಟ್ ಗ್ ಅಂಚೆನೆ ಸಾಂಸ್ಕೃತಿಕ ಬೊಕ್ಕ ಧಾರ್ಮಿಕ ಕಾರ್ಯಕ್ರಮಕ್ಕ್ ವ್ಯವಸ್ಥೆ ಆತ್ಂಡ್. ಪರ ಊರು, ಪರದೇಶೊರ್ದು ಭಕ್ತೆರ್ ಬರ್ಪಿನ ನಿರೀಕ್ಷೆ ಉಂಡು.ಒಟ್ಟಾರೆ 36 ವರ್ಷರ್ದ್ ಬೊಕ್ಕ ಬ್ರಹ್ಮಕಲಶ ಬೊಕ್ಕ ನಾಗಮಂಡಲ ನಡಪುನವು ವಿಶೇಷ ಪಂದ್ ಆರ್ ಪಂಡೆರ್.

ಸುದ್ದಿಗೋಷ್ಠಿಡ್ ಸಂಚಾಲಕೆರ್ ಡಾ.ಸೋಂದಾ ಭಾಸ್ಕರ ಭಟ್, ಪ್ರಧಾನ ಕಾರ್ಯದರ್ಶಿ ರಾಮಣ್ಣ ದೇವಾಡಿಗ ಮುಂಬೈ ಇತ್ತೆರ್.

ತುಳು ಬಾಸೆನ್ ಸಂವಿಧಾನದ 8 ನೇ ಪರಿಚ್ಚೇದಗ್ ಸೇರ್ಸಾವುನ ಭರವಸೆ ಕೊರಿಯೆರ್ ಪ್ರಿಯಾಂಕಾ ಗಾಂಧಿ

ಮುಲ್ಕಿ : ಕಾಂಗ್ರೆಸ್ ಪಕ್ಷ ಈ ಸರ್ತಿ ಅಧಿಕಾರೊಗು ಬತ್ತ್ಂಡ ತುಳು ಬಾಸೆನ್ ಸಂವಿಧಾನದ 8 ನೇ ಪರಿಚ್ಚೇದಗ್ ಸೇರ್ಸಾವರೆ ಪ್ರಯತ್ನ ಬರ್ಪ ಪಂದ್ ಮಾಜಿ‌ಪ್ರಧಾನಿ ದಿ. ಇಂದಿರಾಗಾಂಧಿ ಮೆರೆನ ಪುಲ್ಲಿ, ಎಐಸಿಸಿ ಪ್ರಧಾನ ಕಾರ್ಯದರ್ಶಿ ಪ್ರಿಯಾಂಕಾ ಗಾಂಧಿ ಭರವಸೆ ಕೊರಿಯೆರ್.

ಮುಲ್ಕಿ ಕೈತಲ್ದ ಕೊಲ್ನಾಡ್ ದ ರಾಜ್ಯ ಕೃಷಿ ಸಿರಿ ಮೇಳದ ಮೈದಾನಡ್ ಐತಾರ ನಡತಿನ ಕಾಂಗ್ರೆಸ್ ಪಕ್ಷದ ಪ್ರಚಾರ ಸಭೆಟ್ಟ್ ಪಾತೆರಿಯೆರ್.

“ನಮಸ್ಕಾರ ತುಳುನಾಡು, ಮಾತೆರೆಗ್ಲ ಎನ್ನ ಮೋಕೆದ ಸೊಲ್ಮೆಲು” ಪಂದ್ ಭಾಷಣ ಸುರು ಮಲ್ತಿನ ಪ್ರಿಯಾಂಕಾ ಗಾಂಧಿಗ್ ಭಾರಿ ಸಂಖ್ಯೆಡ್ ಸೇರ್ದಿನ ಜನಕುಲು ತಾಟಿದ ಶಬ್ದದ ಒರುಟ್ಟು ಸ್ವಾಗತ ಮಲ್ತೆರ್.

ಉಂದೆನ್ ತೂದು ಕುಷಿ ಆಯಿನ ಪ್ರಿಯಾಂಕಾ ಗಾಂಧಿ, ಕಾಂಗ್ರೆಸ್ ಪಕ್ಷ ಅಧಿಕಾರೊಗು ಬತ್ತಿ ಬೊಕ್ಕ ಕೊರ್ತಿನ ಗ್ಯಾರಂಟಿಲೆನ್ ಖಂಡಿತ ಮಲ್ಪಾದ್ ಕೊರ್ಪುಂಡು. ಮೀನುಗಾರೆರೆಗ್ 10 ಲಕ್ಷ ರೂ. ವಿಮೆ, ಮೀನುಗಾರ ಪೊಂಜೊವುಲೆಗ್ 1 ಲಕ್ಷ ರೂ. ಬಡ್ಡಿ ದಾಂತೆ ಸಾಲ, ಬ್ರಹ್ಮಶ್ರೀ ನಾರಾಯಣ ಗುರು ಅಭಿವೃದ್ಧಿ ನಿಗಮ ಸ್ಥಾಪನೆ ಮಲ್ತ್ ದ್ 1250 ಕೋಟಿ ನಿಧಿ ಅಂಚೆನೆ ಕುಡ್ಲಡ್ ಪ್ರವಾಸೋದ್ಯಮ ಅಭಿವೃದ್ಧಿಗಾಗಿ ಬಂಗಾರ್ ಬೊಕ್ಕ ವಜ್ರದ ಪಾರ್ಕ್ ನಿರ್ಮಾಣ ಮಲ್ಪುವ ಪಂಡೆರ್.

ಕೇಂದ್ರ ಬೊಕ್ಕ ರಾಜ್ಯ ಬಿಜೆಪಿ ಸರ್ಕಾರ ರಾಜ್ಯದ ಜನಕ್ಲೆನ ಕಷ್ಟ ಸುಖತ್ತ ಬಗೆಟ್ಟ್ ಪಾತೆರುಜಿ. ಕಾಲಿ ಕಮಿಷನ್ ಬಗೆಟ್ಟ್ ಚಿಂತನೆ ಮಲ್ತೊಂದುಂಡು. ಅಭಿವೃದ್ಧಿ ದ ವಿಷಯ ಅಕ್ಲೆಗ್ ಪನರೆ ದಾಲಾ ಇಜ್ಜಿ. ಕುಡ ಕರ್ನಾಟಕದ ಬ್ರ್ಯಾಂಡ್ ನಂದಿನಿನ್ ಮಾರ್ರೆ ತೂಪೆರ್. ಒಂಚೊ್ಉ ಮುಲ್ಕಿಗ್ ಬತ್ತಿನ ಪ್ರಧಾನಿ ಜನಕ್ಲೆನ ಸಮಸ್ಯೆದ ಬಗ್ಗೆ ಮೌನ ಆದಿತ್ತೆರ್ ಪಂದ್ ಪ್ರಿಯಾಂಕಾ ಆರೋಪ ಮಲ್ತೆರ್.

ಮಿಥುನ್ ರೈ ಮೇರ್ ಪ್ರಿಯಾಂಕಾ ಗಾಂಧಿ ಮೆರೆಗ್ ನೆಂಪುದ ಉಡಿಗಿರೆಯಾದ್ ಬಪ್ಪನಾಡ್ ದ ದೇವಿನ ಫೊಟೊ ಅಂಚೆನೆ ತುಳುನಾಡ್ ದ ಪುಗರ್ತೆದ ಕಲೆ ಪಿಲಿ ನಲಿಕೆದ ಪರಿಚಯೊಗಾದ್ ಮಂಡೆ ಪಿಲಿತ್ತ ಕಲಾಕೃತಿನ್ ಕೊರಿಯೆರ್.ಅಂಚೆನೆ ತುಳುಮಣ್ಣ್ ದ್ ಜಾನಪದ ಕ್ರೀಡೆ ಕಂಬುಲದ ಪ್ರೋತ್ಸಾದ ರೂಪೊಡು ಕಂಬುಲ ಕ್ಷೇತ್ರದ “ಹುಸೇನ್ ಬೋಲ್ಟ್” ಪುಗರ್ತೆ ಪಡೆದಿನ ಮಿಜಾರ್ ಶೇಖರ ಗೌಡ ಮೇರ್ ಕಂಬುಲದ ಬೆತ್ತನ್ ಕಾಣಿಕೆಯಾದ್ ಕೊರಿಯೆರ್.

ಮತ್ತರ್ಮೆಡ್ ಕೇಂದ್ರದ ಮಾಜಿ ಸಚಿವೆರಾಯಿನ ಜನಾರ್ದನ ಪೂಜಾರಿ, ಮಾಜಿ ಸಚಿವೆರ್ ಅಭಯಚಂದ್ರ ಜೈನ್, ಎಐಸಿಸಿ ಮುಖಂಡೆರಾಯಿನ ಚರಣ್ ಸಿಂಗ್ ಸಾವ್ರಾ, ರೋಜಿ ಜಾನ್, ಅಜಯ್ ಕುಮಾರ್, ಮಂಜುನಾಥ ಭಂಡಾರಿ, ಶಕುಂತಳಾ ಶೆಟ್ಟಿ, ಮಮತಾ ಗಟ್ಟಿ, ಕುಡ್ಲ ಉತ್ತರ ಕ್ಷೇತ್ರದ ಅಭ್ಯರ್ಥಿ ಇನಾಯತ್ ಅಲಿ, ಮುಲ್ಕಿ ಬೆದ್ರ ಕ್ಷೇತ್ರದ ಮಿಥುನ್ ರೈ, ದಕ ಜಿಲ್ಲಾ ಕಾಂಗ್ರೆಸ್ ಅಧ್ಯಕ್ಷೆರ್ ಹರೀಶ್ ಕುಮಾರ್, ಕೆಪಿಸಿಸಿ ಪ್ರಧಾನ ಕಾರ್ಯದರ್ಶಿ ಪದ್ಮರಾಜ್ ಆರ್ ಇತ್ತೆರ್.

ನೆಟ್ಟ್ ರ್ದ್ ದುಂಬು ಮಧ್ಯಾಹ್ನ 3 ಗಂಟೆಗ್ ಹೆಲಿಕಾಪ್ಟರ್ ಕಾರ್ನಾಡ್ ಗಾಂಧಿ ಮೈದಾನಗ್ ಹೆಲಿಕಾಪ್ಟರ್ ಡ್ ಬತ್ತಿನ ಪ್ರಿಯಾಂಕಾ ಮೆರೆನ್ ಮಿಥುನ್ ರೈ ಎದ್ಕೊಂಡೆರ್. ಬೊಕ್ಕ ಕಾರ್ ಡ್ ಝೀರೊ ಟ್ರಾಫಿಕ್ ಡ್ ಕೊಲ್ನಾಡ್ ದ ಸಭಾ ವೇದಿಕೆಗ್ ಪೋಯೆರ್. ಭಾರಿ ಸಂಖ್ಯೆಡ್ ಬತ್ತಿನ ಅಭಿಮಾನಿಲು ಬೊಕ್ಕ ಕಾರ್ಯಕರ್ತೆರ್ ಜೈ ಪಾಡ್ದ್ ಗೌರವ ಕೊರಿಯೆರ್.

ಇನಿ ಬೆಂಗ್ಲೂರ್ ಡ್ ಪ್ರಿಯಾಂಕಾ ಗಾಂಧಿ ರೋಡ್ ಶೋ

ಕಾಂಗ್ರೆಸ್ ನಾಯಕಿ ಪ್ರಿಯಾಂಕಾ ಗಾಂಧಿ ಇನಿ ಬೆಂಗ್ಲೂರ್ ಡ್ ರೋಡ್ ಶೋ ಮಲ್ಪರೆ ಉಲ್ಲೆರ್.

ಚಿಕ್ಕಪೇಟೆ ಬೊಕ್ಕ ವಿಜಯನಗರ ಕ್ಷೇತ್ರದ ವ್ಯಾಪ್ತಿಡ್ ರೋಡ್ ಶೋ ಮಲ್ಪುನ ಎಐಸಿಸಿ ಪ್ರಧಾನ ಕಾರ್ಯದರ್ಶಿ ತನ್ನ ಅಭ್ಯರ್ಥಿಲೆನ ಪರ ವೋಟು ಕೆನಿಯೆರೆ ಉಲ್ಲೆರ್.

ಬೊಲ್ಪುಗು 10.30 ರ್ದ್ 11.30 ಮುಟ್ಟ ಚಿಕ್ಕಪೇಟೆ ಕ್ಷೇತ್ರ ಬೊಕ್ಕ 11.45 ರ್ದ್ 1.15 ಮುಟ್ಟ ವಿಜಯನಗರ ಕ್ಷೇತ್ರಡ್ ಸಂಚಾರ ಮಲ್ಪುವೆರ್. ರೋಡ್ ಶೋ ನಡಪುನ ಪ್ರದೇಶಡ್ ಮಾರ್ಗ ಸಂಚಾರನ್ ಒಂತೆ ಪೊರ್ತು ಉಂತಾದೆರ್.

ಎಸ್ ಎಸ್ ಎಲ್ ಸಿ ರಿಸಲ್ಟ್ ಪ್ರಕಟ: 4 ಜನಕ್ಕ್ 625/625

ಬೆಂಗ್ಲೂರ್: 2022-23 ನೇ ಸಾಲ್ ದ ಎಸ್ ಎಸ್ ಎಲ್ ಸಿ ರಿಸಲ್ಟ್ ಇನಿ ಪ್ರಕಟ ಆತ್ಂಡ್.

ಈ ಸರ್ತಿ 83.89 ದಾತ್ ರಿಸಲ್ಟ್ ದಾಖಲ್ ಆತ್ಂಡ್. ನೆಟ್ಟ್ ನಾಲ್ ಕಲ್ಪಾರ್ಥಿಲು 625 ಟ್ಟ್ 625 ಮಾರ್ಕ್ ಪಡೆತೆರ್. ಈ ರಿಸಲ್ಟ್ ನ್ ಮಲ್ಲೇಶ್ವರಂಡ್ ಇಪ್ಪುನ ಪ್ರೌಢ ಶಿಕ್ಷಣ ಬೊಕ್ಕ ಮೌಲ್ಯ ನಿರ್ಣಯ ಮಂಡಳಿ (ಕೆಎಸ್ ಇಎಬಿ) ಪತ್ರಿಕಾಗೋಷ್ಟಿಡ್ ಪ್ರಕಟ ಮಲ್ದ್ಂಡ್.

ಭೂಮಿಕಾ ಪೈ ನ್ಯೂ ಮೆಕಾಲೆ ಇಂಗ್ಲಿಷ್ ಹೈಸ್ಕೂಲ್ ಹೊಸೂರು, ಯಶಸ್ ಗೌಡ ಬಾಲಗಂಗಾಧರ ಶಾಲೆ ಚಿಕ್ಕಬಳ್ಳಾಪುರ, ಅನುಪಮ ಶ್ರೀ ಶೈಲಾ ಬೆಳಗಾವಿ, ಬೀಮನ್ ಗೌಡ ಬೀರಾದಾರ್ ಆಕ್ಸ್‌ಫರ್ಡ್ ಇಂಗ್ಲೀಷ್ ಹೈಸ್ಕೂಲ್ ಮುದ್ದೇಬಿಹಾಳ್ 625 ಟ್ಟ್ 625 ಮಾರ್ಕ್ ಪಡೆತೆರ್.

ಈ ಸರ್ತಿ ಸುರುತ್ತ ಭಾಷೆಡ್ 14,923 ಜೋಕುಲು 125ಕ್ಕ್ 125 ಮಾರ್ಕ್ ಪಡೆತೆರ್. ರಡ್ಡನೇ ಭಾಷೆಡ್ 9754 ಜೋಕುಲು ಔಟ್ ಆಫ್ ಔಟ್ ದೆತ್ತ್ಂಡ, ಮೂಜಿನೇ ಭಾಷೆಡ್ 16170, ಗಣಿತ 2132, ವಿಜ್ಞಾನ 983, ಸಮಾಜ ವಿಜ್ಞಾನಡ್ 8311 ಕಲ್ಪಾರ್ಥಿಲು ನೂದೆಕ್ಕ್ ನೂದು ಮಾರ್ಕ್ ಪಡೆತೆರ್. ಒಟ್ಟು 8,35,102 ಕಲ್ಪಾರ್ಥಿಲು ಪರೀಕ್ಷೆಗ್ ಹಾಜರಾತೆರ್. ಆಯಿಟ್ಟ್ 7 ಲಕ್ಷದ 619 ಕಲ್ಪಾರ್ಥಿಲು ಪಾಸಾತೆರ್.

ವಾ ಜಿಲ್ಲೆಗ್ ಏತ್ನೆ ತಾನ..?

ಚಿತ್ರದುರ್ಗಗ್ 1ನೇ ತಾನ 96.8%
ಮಂಡ್ಯಗ್ 2ನೇ ತಾನ 96.74%
ಹಾಸನಗ್ 3ನೇ ತಾನ 96.68 %
ಬೆಂಗ್ಲೂರ್ ಗ್ರಾಮೀಣಗ್ 4ನೇ ತಾನ 96.48%
ಚಿಕ್ಕಬಳ್ಳಾಪುರಗ್ 5ನೇ ತಾನ 96.48%
ಕೋಲಾರಗ್ 6ನೇ ತಾನ 94.6%
ಚಾಮರಾಜನಗರಗ್ 7ನೇ ತಾನ 96.15%
ಮಧುಗಿರಿಗ್ 8ನೇ ತಾನ 93.23%
ಕೊಡಗುಗ್ 9ನೇ ತಾನ 93.19%
ವಿಜಯನಗರಗ್ 10ನೇ ತಾನ 91.41%
ವಿಜಯಪುರಗ್ 11ನೇ ತಾನ 91.23%
ಚಿಕ್ಕೋಡಿಗ್ 12ನೇ ತಾನ 91.07%
ಉತ್ತರ ಕನ್ನಡಗ್ 13ನೇ ತಾನ 90.53%
ದಾವಣಗೆರೆಗ್ 14ನೇ ತಾನ 90.43%
ಕೊಪ್ಪಳಗ್ 15ನೇ ತಾನ 90.27%
ಮೈಸೂರ್ ಗ್ 16ನೇ ತಾನ 89.75%
ಚಿಕ್ಕಮಗಳೂರ್ ಗ್ 17ನೇ ತಾನ 89.69%
ಒಡಿಪುಗ್ 18ನೇ ತಾನ 89.49%
ದಕ್ಷಿಣ ಕನ್ನಡಗ್ 19ನೇ ತಾನ 89.47%
ತುಮಕೂರುಗ್ 20ನೇ ತಾನ 89.43%
ರಾಮನಗರಗ್ 21ನೇ ತಾನ 89.42%
ಹಾವೇರಿಗ್ 22ನೇ ತಾನ 89.11%
ಶಿರಸಿಗ್ 23ನೇ ತಾನ 89.39%
ಧಾರವಾಡಗ್ 24ನೇ ತಾನ 86.55%
ಗದಗಗ್ 25ನೇ ತಾನ 86.51%
ಬೆಳಗಾವಿಗ್ 26 ನೇ ತಾನ 85.85%
ಬಾಗಲಕೋಟೆಗ್ 27 ನೇ ತಾನ 85.14%
ಕಲಬುರಗಿಗ್ 28 ನೇ ತಾನ 84.51%
ಶಿವಮೊಗ್ಗಗ್ 29 ನೇ ತಾನ 84.04%
ರಾಯಚೂರುಗ್ 30 ನೇ ತಾನ 84.02%
ಬಳ್ಳಾರಿಗ್ 31ನೇ ತಾನ 81.54%
ಬೆಂಗ್ಲೂರ್ ಉತ್ತರಗ್ 32 ನೇ ತಾನ 80.93%
ಬೆಂಗ್ಲೂರ್ ದಕ್ಷಿಣಗ್ 33ನೇ ತಾನ 78.73%
ಬೀದರ್ ಗ್ 34ನೇ ತಾನ 78.95%
ಯಾದಗಿರಿಗ್ 35ನೇ ತಾನ 75.49% ರಿಸಲ್ಟ್ ಬೈದ್ಂಡ್.

ಅಂಚೆನೆ ಕಲ್ಪಾರ್ಥಿಲು ರಿಸಲ್ಟ್ ನ್ ಅಧಿಕೃತ ವೆಬ್‌ಸೈಟ್‌: https://kseab.karnataka.gov.in/ ಅತ್ತಂಡ https://karresults.nic.in/ ತೂವೊಲಿ.

You Missed