ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಎ.12-21: ಬಿರ್ಲಾಗೇಟ್ ಶಹಾಡ್ ಶ್ರೀ ಮೂಕಾಂಬಿಕಾ ದೇವಸ್ಥಾನಡ್ 69ನೇ ವರ್ಷದ ವರ್ಧಂತಿ ಉಚ್ಚಯದ ಲೆಕ್ಕೊಡು ಸಾಮೂಹಿಕ ಚಂಡಿಕಾಯಾಗ

ಬಿರ್ಲಾಗೇಟ್ ಶಹಾಡ್ ಶ್ರೀ ಮೂಕಾಂಬಿಕಾ ದೇವಸ್ಥಾನಡ್ 69ನೇ ವರ್ಷದ ಉಚ್ಚಯ, 9 ನೇ ವರ್ಧಂತಿ ಉಚ್ಚಯದ ಲೆಕ್ಕೊಡು ಭಜನೆ, ಸಾಮೂಹಿಕ ಚಂಡಿಕಾಯಾಗ ಎ.12-21 ಮುಟ್ಟ ನಡಪರೆ ಉಂಡು.

ಡೊಂಬಿವಲಿದ ಶ್ರೀ ಶಂಕರನಾರಾಯಣ ತಂತ್ರಿಲೆನ ಮುತಾಲಿಕೆಡ್ ಈ ಲೇಸ್ ನಡತೊಂದುಂಡು.

ಎ.12 ಸುಕ್ರಾರ ಬೊಲ್ಪುಗು ಸಾಮೂಹಿಕ ಪ್ರಾರ್ತನೆ, ತೋರಣ ಮೂರ್ತ, ಉಗ್ರಾಣ ಮೂರ್ತ, ಮಹಾಗಣಪತಿ ಹೋಮ, ಮಹಾಪೂಜೆ, ಬಯ್ಯಗ್ ಭಜನೆ ನಡತ್ಂಡ್.

ಎ.13-16 ಮುಟ್ಟ ಪ್ರತಿದಿನೊಲ ಬಯ್ಯಗ್ ಭಜನೆ ನಡತ್ಂಡ್.

ಎ.17 ಬೊಲ್ಪುಗು ರಾಮನವಮಿದ ಲೆಕ್ಕೊಡು ಅಖಂಡ 12 ಗಂಟೆದ ಕಾಲ ಭಜನೆ, ಹೋಮ, ಬಯ್ಯಗ್ ಅಭಿಷೇಕ ಪೂಜೆ, ಶ್ರೀ ಗುರು ಪಾದುಕಾ ಪೂಜೆ ನಡತ್ಂಡ್.

ಎ.18 ಬೊಲ್ಪುಗು ಮಹಾಗಣಪತಿ ಹೋಮ, ನವಗ್ರಹ ಶಾಂತಿ ನಡತ್ಂಡ್. ಬಯ್ಯಗ್ ರಾಕ್ಷೋಘ್ನ ಹೋಮ, ವಾಸ್ತುಪೂಜೆ, ವಾಸ್ತುಬಲಿ, ಭಜನೆ ನಡಪರೆ ಉಂಡು.

ಎ.19 ಸುಕ್ರಾರ ಬೊಲ್ಪುಗು 108 ಬೊಂಡದಾಭಿಷೇಕ, ತುಲಾಭಾರ ಸೇವೆ, ನವಗ್ರಹ ಶಾಂತಿ, ಪ್ರಧಾನ ಹೋಮ, ಅನ್ನ ಪ್ರಸಾದ ಸೇವೆ ಬಯ್ಯಗ್ 25 ತ್ತ ಕಲಶಾಭಿಷೇಕ, ಪ್ರಧಾನ ಹೋಮ, ಮಹಾಪೂಜೆ, ಪಲ್ಲಪೂಜೆ, ಅನ್ನ ಪ್ರಸಾದ ಸೇವೆ, ತೇರ್ ಉಚ್ಚಯ ಬಲಿ, ತೇರ್ ಒಯಿಪೆರೆ, ಸಾಮೂಹಿಕ ರಂಗಪೂಜೆ, ಮಹಾಪೂಜೆ ನಡಪರೆ ಉಂಡು.

ಎ.20 ಐತಾರ ಬೊಲ್ಪುಗು ಸಾಮೂಹಿಕ ಚಂಡಿಕಾಯಾಗ, ದಂಪತೀ ಪೂಜೆ, ಮಹಾಪೂಜೆ, ಪಲ್ಲಪೂಜೆ, ಧಾರ್ಮಿಕ ಸಭಾ ಲೇಸ್, ಅನ್ನ ಪ್ರಸಾದ ಸೇವೆ, ಬಯ್ಯಗ್ ಶೋಭಾಯಾತ್ರೆ, ಕಟ್ಟೆಪೂಜೆ, ಶ್ರೀ ಕಟೀಲ್ ಕ್ಷೇತ್ರ ಮಹಾತ್ಮೆ ಯಕ್ಷಗಾನ ನಡಪರೆ ಉಂಡು.

ಎ.21 ಐತಾರ ಬೊಲ್ಪುಗು ಪ್ರಧಾನ ಹೋಮ, ಪಂಚಾಮೃತಾಭಿಷೇಕ, ಕಲಶಾಭಿಷೇಕ, ಮಹಾಪೂಜೆ ನಡಪರೆ ಉಂಡು.

ಬೊಂಬೈ ರಾಮ ರಾಜ ಕ್ಷತ್ರಿಯ ಸಂಘದ ಸದಸ್ಯೆರ್, ಅತಿಥಿ ಕಲಾವಿದೆರೆನ ಒಟ್ಟುಸೇರಿಗೆಡ್ ಶ್ರೀ ರಾಮ ನವಮಿದ ಲೆಕ್ಕೊಡು ಅಜ್ಜಿ ಸುಕ್ಕಮ್ಮಾ ಕನ್ನಡ ನಾಟಕ

ಬೊಂಬೈ ರಾಮ ರಾಜ ಕ್ಷತ್ರಿಯ ಸಂಘದ ಸದಸ್ಯೆರ್ ಬೊಕ್ಕ ಅತಿಥಿ ಕಲಾವಿದೆರೆನ ಒಟ್ಟುಸೇರಿಗೆಡ್ ಶ್ರೀ ರಾಮ ನವಮಿದ ಲೆಕ್ಕೊಡು ಅಜ್ಜಿ ಸುಕ್ಕಮ್ಮಾ ಕನ್ನಡ ನಾಟಕ ಎ.17 ಬುದಾರ (ಇನಿ) ಅಂಧೇರಿ ಪೂರ್ವ ಕಾಮಗಾರ್ ಭವನಡ್ ನಡಪರೆ ಉಂಡು.

ನಿರ್ದೇಶನ, ನಟನೆ, ರಂಗ ಸಜ್ಜಿಕೆದ ಹಾಸ್ಯ ಚಕ್ರವರ್ತಿ ಬಿರ್ದ್ ಪಡೆಯಿನ, ಧಾರವಾಹಿ ನಟೆ ಅಶೋಕ್ ಕೊಡ್ಯಡ್ಕ, ತುಳು ನಾಟಕ ಬರವುದ ಬೊಳ್ಳಿ ರಾಜೇಶ್ ಆಚಾರ್ಯ, ಕನ್ನಡಗ್ ಅನುವಾದ ಪ್ರಭಾಕರ ನಾಯ್ಕ ಮಲ್ದೆರ್.

ಎ.18-21: ಬಾವಲಿಗುರಿ ಭಗವಾನ್ ಶ್ರೀ ಬಬ್ಬು ಸ್ವಾಮಿ ಸೇವಾ ಸಮಿತಿದ 17ನೇ ವರ್ಷದ ಕೋರ್ದಬ್ಬು ತನ್ನಿಮಾನಿಗ ಪರಿವಾರ ದೈವೊಲೆನ ನೇಮ

Lಪಾವೂರು: ಬಾವಲಿಗುರಿ ಭಗವಾನ್ ಶ್ರೀ ಬಬ್ಬು ಸ್ವಾಮಿ ಸೇವಾ ಸಮಿತಿದ 17ನೇ ವರ್ಷದ ಕೋರ್ದಬ್ಬು ತನ್ನಿಮಾನಿಗ ಪರಿವಾರ ದೈವೊಲೆನ ನೇಮ ಎ.18-21 ಮುಟ್ಟ ನಡಪರೆ ಉಂಡು.

ಎ.18 ಗುರುವಾರ (ಇನಿ) ಬೊಲ್ಪುಗು ಗಣಹೋಮ ನಡತ್ಂಡ್. ಬಯ್ಯಗ್ ಸೀತಾರಾಮ ಆಚಾರ್ಯೆರೆನ ಪೌರೋಹಿತ್ಯಡ್ ಶ್ರೀ ಸತ್ಯನಾರಾಯಣ ಪೂಜೆ, ಅನ್ನ ಪ್ರಸಾದ ಸೇವೆ ರಾತ್ರೆ ಸಾಂಸ್ಕೃತಿಕ ಲೇಸ್, ಕೈತಲ್ದ ಪ್ರತಿಭೆಲೆರ್ದ್ ನೃತ್ಯ ಬೊಕ್ಕ ಧಾರ್ಮಿಕ ಸಭೆ, ಕಲ್ಜಿಗದ ಮಾಯ್ಕಾರೆ ಪಂಜುರ್ಲಿ ತುಳು ನಾಟಕ ನಡಪರೆ ಉಂಡು.

ಎ.19 ಸುಕ್ರಾರ ರಾತ್ರೆ ದೈವೊಲೆನ ಭಂಡಾರ ಏರುಂಡು. ಬೊಕ್ಕ ಜಾಗೆದ ಗುಳಿಗೆ ಬೊಕ್ಕ ಬಬ್ಬುಸ್ವಾಮಿ, ತನ್ನಿಮಾನಿಗ ದೈವೊದ ನೇಮ ನಡಪರೆ ಉಂಡು.

ಎ.20 ಸನಿಯಾರ ರಾತ್ರೆ ಪಂಜುರ್ಲಿ, ಗುಳಿಗ ಬೊಕ್ಕ ಚಾಮುಂಡಿ ಬೊಕ್ಕ ಕತ್ತಲಕಾಣದ ಗುಳಿಗನ ನೇಮ ನಡಪರೆ ಉಂಡು.

ಎ.21 ಐತಾರ ಬೊಲ್ಪುಗು ರಾಹು ಗುಳಿಗ ನೇಮ ನಡಪರೆ ಉಂಡು.

ಈ ಲೇಸ್ ಡ್ ಭಕ್ತೆರ್ ಮಾತೆರ್ಲಾ ಪಾಲ್ ಪಡೆದ್, ಗಂಧ ಪ್ರಸಾದ ದೆತೊಂದು, ಶ್ರೀ ದೇವೆರೆನ ಬೊಕ್ಕ ದೈವೊದ ಕೃಪೆಗ್ ಪಾತ್ರರಾವೊಡು ಪಂದ್ ಗುರಿಕಾರೆರ್ ಬೊಕ್ಕ ಪತ್ತ್ ಸಮಸ್ತೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಮಸ್ಕತ್ ಡ್ ಒಮಾನ್ ಬಿಲ್ಲವಾಸ್ ಕೂಟದ ಮುತಾಲಿಕೆಡ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಯಕ್ಷಗಾನ ಪ್ರದರ್ಶನ

ಮಸ್ಕತ್ ದ ರೂವಿ ಅಲ್ ಫಲಾಜ್ ಹೋಟೆಲ್ ದ ಗ್ರ್ಯಾಂಡ್ ಹಾಲ್ ಡ್ ಎ.19 ಕ್ಕ್ ಮಧ್ಯಾಹ್ನ 3:15 ರ್ದ್ ಒಮಾನ್ ಬಿಲ್ಲವಾಸ್ ಕೂಟದ ಮುತಾಲಿಕೆಡ್ ಶ್ರೀ ಗೆಜ್ಜೆಗಿರಿ ಮೇಳದಕ್ಲೆರ್ದ್ ಶ್ರೀ ಗೆಜ್ಜೆಗಿರಿ ಕ್ಷೇತ್ರ ಮಹಾತ್ಮೆ ಯಕ್ಷಗಾನ ಪ್ರದರ್ಶನ ನಡಪರೆ ಉಂಡು.

ನೆತ್ತ ಸಲುವಾದ್ ಕುಡ್ಲದ ಅಂತರಾಷ್ಟ್ರೀಯ ಇಮಾನ ನಿಲ್ದಾಣರ್ದ್ ಇನಿ ಮಸ್ಕತ್ ಗ್ ಬತ್ತಿನ ಶ್ರೀ ಗೆಜ್ಜೆಗಿರಿ ಮೇಳದ ಕಲಾವಿದೆರೆನ್ ಬೊಕ್ಕ ಊರುದ ಬಿನ್ನೆರೆನ್ ಮಸ್ಕತ್ ದ ಇಮಾನ ನಿಲ್ದಾಣಡ್ ಒಮಾನ್ ಬಿಲ್ಲವಾಸ್ ಕೂಟದ ಅಧ್ಯಕ್ಷೆರ್ ಸುಜಿತ್ ಅಂಚನ್ ಪಾಂಗಾಳ ಬೊಕ್ಕ ಗೆಜ್ಜೆಗಿರಿ ಮೇಳದ ವ್ಯವಸ್ಥಾಪಕೆರ್ ಪ್ರಶಾಂತ್ ಪೂಜಾರಿ ಪಜೀರ್ ಮಸ್ಕತ್ ಮೇರ್ ಎದ್ಕೊನಿಯೆರ್.

ಈ ಪೊರ್ತುಡು ಸುಕುಮಾರ್ ಅಂಚನ್ ಪಾಂಗಾಳ, ಭಾಸ್ಕರ ಕೋಟ್ಯಾನ್, ತಿಲಕ್ ಸುವರ್ಣ, ಜಿತೇಶ್
ಪೂಜಾರಿ ಪಾಲ್ ಪಡೆದಿತ್ತೆರ್.

ಎ.20: ಸುರತ್ಕಲ್ ಅಮೃತೇಶ್ವರ ನಾಟ್ಯಾಲಯ (ರಿ.)ದ “ಶಿವಾರ್ಪಣಂ” ನೃತ್ಯ ನಮನ

ಕುಡ್ಲ: ಸುರತ್ಕಲ್ ಅಮೃತೇಶ್ವರ ನಾಟ್ಯಾಲಯ (ರಿ.) ದಕ್ಲೆರ್ದ್ ಶಿವಾರ್ಪಣಂ ನೃತ್ಯ ನಮನ ಲೇಸ್ ಎ.20 ಸುರತ್ಕಲ್ ಬಂಟರ ಭವನಡ್ ನಡಪರೆ ಉಂಡು.

ಬಯ್ಯಗ್ ತುಡರ್ ಅರ್ಲಾದ್ ಲೇಸ್ ಉದಿಪನ ಆವರೆ ಉಂಡು. ಭರತನಾಟ್ಯ, ಶಕ್ತಿಪೀಠ ನೃತ್ಯರೂಪಕ, ಸಭಾ ಲೇಸ್, ಜಾನಪದ ನೃತ್ಯಲು, ಶಿವ ನಮನ ನಡಪರೆ ಉಂಡು.

ಸಭಾ ಕಾರ್ಯಕ್ರಮನ್ ಕರ್ನಾಟಕ ಕಲಾ ತಿಲಕ ಗುರು ಉಳ್ಳಾಲ್ ಮೋಹನ್ ಕುಮಾರ್ ತುಡರ್ ಅರ್ಲಾದ್ ಉದಿಪನ ಮಲ್ಪುವೆರ್. ಸಸಿಹಿತ್ಲು ಭಗವತೀ ಕ್ಷೇತ್ರದ ಅನುವಂಶಿಕ ಮೊಕ್ತೇಸರೆರ್ ಶ್ರೀನಿವಾಸ ಯಾನೆ ಅಪ್ಪು ಪೂಜಾರಿ ಆಶೀರ್ವಚನ ಕೊರಿಯೆರೆ ಉಲ್ಲೆರ್.

ಈ ಲೇಸ್ ದ ಗುರ್ಕಾರ್ಮೆನ್ ಸುರತ್ಕಲ್ ಬಂಟರ ಸಂಘದ ಅಧ್ಯಕ್ಷೆರ್ ಲೋಕಯ್ಯ ಶೆಟ್ಟಿ ಒಯಿಸೊನ್ವೆರ್. ಗೌರವ ಉಪಸ್ಥಿತಿಡ್ ಸಸಿಹಿತ್ಲು ರಂಗ ಸುದರ್ಶನದ ನಿರ್ದೇಶಕೆರ್ ಪರಮಾನಂದ ಸಾಲ್ಯಾನ್ ಪಾಲ್ ಪಡೆಯೆರೆ ಉಲ್ಲೆರ್.

ಹೊಸಬೆಟ್ಟು ಕುಳಾಯಿ ಶ್ರೀ ಶಾರದಾ ನಾಟ್ಯಾಲಯದ ವಿದುಷಿ ಭಾರತೀ ಸುರೇಶ್ ಶುಭನುಡಿ ಕೊರಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್ ಜನಪದ ವಿದ್ವಾಂಸೆರ್ ಕೆ.ಕೆ ಪೇಜಾವರ, ವಾಮಂಜೂರು ಶ್ರೀದುರ್ಗಾ ಕನ್ಸ್ ಟ್ರಕ್ಷನ್ ದ ಸತೀಶ್ ಶೆಟ್ಟಿ ಮೂಡುಜಪ್ಪು ಗುತ್ತು ಪಾಲ್ ಪಡೆಯೆರೆ ಉಲ್ಲೆರ್.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆವೊಡು ಪಂದ್ ಅಮೃತೇಶ್ವರ ನಾಟ್ಯಾಲಯದ ನಿರ್ದೇಶಕಿ ವಿದುಷಿ ಚಿತ್ರಾಕ್ಷಿ ಅಜಿತ್ ಕುಮಾರ್, ಅಧ್ಯಕ್ಷೆರ್, ವಿದ್ಯಾರ್ಥಿಲು, ಪೋಷಕೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಎ.18,19: ಭಾರೀ ಬರ್ಸದ ಅಂದಾಜಿ: ಯೆಲ್ಲೊ ಅಲರ್ಟ್‌ ಘೋಷಣೆ

ಚಿಕ್ಕಮಗಳೂರು: ರಾಜ್ಯದ ಮಾತ ಜಿಲ್ಲೆಡ್ ಎ.18 ಬೊಕ್ಕ 19 ಕ್ಕ್ ಭಾರೀ ಬರ್ಸ ಬರ್ಪಿನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆ ಮುನ್ಸೂಚನೆ ಕೊರ್ತುಂಡು.

ಈ ರಡ್ಡ್ ದಿನ ಮಾತ 31 ಜಿಲ್ಲೆಲೆಗ್ ಐಎಂಡಿ ಯೆಲ್ಲೋ ಅಲರ್ಟ್ ಘೋಷಣೆ ಮಲ್ದ್ಂಡ್.

ಪ್ರತಿ ಗಂಟೆಗ್ 30-40 ಕಿ.ಮೀ. ದೂರಡ್ ಗಾಳಿ ಬೀಜುನ ಅಂದಾಜಿ ಉಂಡು ಪಂದ್ ಹವಾಮಾನ ಇಲಾಖೆರ್ದ್ ಮುನ್ನೆಚ್ಚರಿಕೆ ಕೊರ್ತುಂಡು.

ಬಳ್ಳಾರಿ, ಚಿಕ್ಕಮಗಳೂರು, ಹಾಸನ, ಕೊಡಗು ಬೊಕ್ಕ ಮೈಸೂರ್ ಜಿಲ್ಲೆದ ಕೆಲವು ಭಾಗಡ್ ಅಂಗಾರೆ ಒಂತೆ ಬರ್ಸ ಬರ್ಪುನ ಅಂದಾಜಿ ಉಂಡು ಪಂದ್ ತೆರಿದ್ ಬೈದ್ಂಡ್.

ಉತ್ತರ ಒಳನಾಡು ಬೊಕ್ಕ ಮಲೆನಾಡು ಭಾಗದ ಕೆಲವು ಪ್ರದೇಶಲೆಡ್ ಬುದಾರ ಬರ್ಸ ಬರ್ಪುಂಡು ಪಂದ್ ಪೊಲಬು ಕೊರ್ತುಂಡು ಪಂದ್ ತೆರಿದ್ ಬೈದ್ಂಡ್.

ಚುನಾವಣಾ ಉಸ್ತುವಾರಿಯಾದ್ ಮಹಮ್ಮದ್ ಹನೀಫ್ ಉಜಿರೆ ನೇಮಕ

ಬೊಲ್ತೇರ್ ವಿಧಾನ ಸಭಾ ಕ್ಷೇತ್ರದ ಗ್ರಾಮೀಣ ಬ್ಲಾಕ್ ಗ್ ಜಿಲ್ಲಾ ಅಲ್ಪಸಂಖ್ಯಾತ ಘಟಕರ್ದ್ ಚುನಾವಣಾ ಉಸ್ತುವಾರಿಯಾದ್ ಮಹಮ್ಮದ್ ಹನೀಫ್ ಉಜಿರೆ ನೇಮಕ ಆತೆರ್.

ಮೆರೆನ್ ಜಿಲ್ಲಾಧ್ಯಕ್ಷೆರ್ ಶಾಹುಲ್ ಹಮೀದ್ ಕೆ.ಕೆ ನೇಮಕ ಮಲ್ದೆರ್. ಮೇರ್ ದ.ಕ ಜಿಲ್ಲಾ ವಕ್ಫ್ ಸಲಹಾ ಸಮಿತಿದ ಮಾಜಿ ಸದಸ್ಯೆರಾದ್, ಜಿಲ್ಲಾ ಅಲ್ಪಸಂಖ್ಯಾತ ಘಟಕದ ಉಪಾಧ್ಯಕ್ಷೆರಾದ್ ಕೆಲಸ ಮಲ್ತೊಂದು ಉಲ್ಲೆರ್.

ಎ.22-30: ತಿಬಾರ್ ಶ್ರೀ ಕೊಡಮಣಿತ್ತಾಯ ದೈವಸ್ಥಾನಡ್ ಬ್ರಹ್ಮಕುಂಭಾಭಿಷೇಕ, ನಾಗಮಂಡಲ, ವಿಶೇಷ ಜಾತ್ರೆ

ಸುರತ್ಕಲ್: 1976 ನೇ ಇಸ್ವಿಡ್ ಶಿಬರೂರುಗುತ್ತು ಮುದ್ದಣ್ಣ ಶೆಟ್ರೆನ ಮುತುವರ್ಜಿಡ್ ಶಿಬರೂರು ಶ್ರೀ ಕೊಡಮಣಿತ್ತಾಯ ಕ್ಷೇತ್ರ ಸಂಪೂರ್ಣ ನವೀಕರಣ ಆದ್ 2010ನೇ ಇಸ್ವಿಡ್ ಕೊಂಜಾಲಗುತ್ತು ಪ್ರಭಾಕರ ಶೆಟ್ರೆನ ನೇತೃತ್ವಡ್ ಊರು- ಪರವೂರುದಕ್ಲೆನ ಸಹಕಾರಡ್ ನವೀಕರಣ ಆದಿತ್ತ್ ದ್, 2024 ನೇ ಇಸ್ವಿಡ್ ಕುಡೊರ ಸುಮಾರ್ 9 ಕೋಟಿ ರೂ. ಕರ್ಚಿಡ್ ಸಂಪೂರ್ಣ ಜೀರ್ಣೋದ್ಧಾರ ಆದ್ ಉಂದುವೇ ಎ.22 ಸೋಮಾರರ್ದ್ ಎ.30 ಅಂಗಾರೆ ಮುಟ್ಟ ಬ್ರಹ್ಮಕುಂಭಾಭಿಷೇಕ ಅಂಚೆನೆ ಅಷ್ಟಪವಿತ್ರ ನಾಗಮಂಡಲ ಸೇವೆ ಬೊಕ್ಕ ವಿಶೇಷ ಜಾತ್ರಾ ಮಹೋತ್ಸವ ನಡಪರೆ ಉಂಡು ಪಂದ್ ತಿಬಾರ್ ಗುತ್ತಿನಾರ್ ಶಿಬರೂರುಗುತ್ತು ಉಮೇಶ್ ಎನ್. ಶೆಟ್ರ್ ತೆರಿಪಾಯೆರ್.

ಆರ್ ಶ್ರೀ ಕ್ಷೇತ್ರದ ಅಂಗಣೊಡು ಅಂಗಾರೆ ನಡತಿನ ಪತ್ರಿಕಾಗೋಷ್ಠಿಡ್ ಪಾತೆರ್ದ್, ಬ್ರಹ್ಮಕಲಶ ಬೊಕ್ಕ ನಾಗಮಂಡಲ ಒಟ್ಟುಗೆ ಆಪಿನವು ಈ ಜಾಗೆದ ವಿಶೇಷ.ಇದಮುಟ್ಟ ನಾಲ್ ಸರ್ತಿ ನಾಗಮಂಡಲ ಆತ್ಂಡ್. ಈ ಸರ್ತಿ 5 ನೇ ನಾಗಮಂಡಲ. ನೆಕ್ಕ್ ಬೋಡಾದ್ ಭಾರಿ ಮಲ್ಲ ಮಟ್ಟ್ ಡ್ ತಯಾರಿ ನಡತೊಂದಿತ್ತ್ ದ್ ಈ ದಿನೊಕ್ಲೆಡ್ 3-4 ಭಕ್ತೆರ್ ಪಾಲ್ ಪಡೆಯುನ ನಿರೀಕ್ಷೆ ಉಂಡು ಪಂದ್ ಪಂಡೆರ್.

ಕ್ಷೇತ್ರದ ತಂತ್ರಿಲಾಯಿನ ವೇದವ್ಯಾಸ ತಂತ್ರಿಲು ಪಾತೆರ್ದ್, ಕ್ಷೇತ್ರಡ್ ಪೊಸ ಧ್ವಜಸ್ತಂಭ, ಪೊಸ ಸಾನ, ಪೊಸ ಗೋಪುರ, ಸುತ್ತುಪೌಳಿ ನಿರ್ಮಾಣ ಇಂಚ ಸಮಗ್ರ ಜೀರ್ಣೋದ್ಧಾರ ಆದ್ ಎ.22ರ್ದ್ ಪೂಜಾ ವಿಧಿಕ್ಕುಲು ಸುರುವಾಪುಂಡು. ಎ. 26 ಕ್ಕ್ ಬ್ರಹ್ಮಕಲಶ ಬೊಕ್ಕ ನಾಗಮಂಡಲದ ವೈದಿಕ ವಿಧಿ ನಡಪರೆ ಉಂಡು ಪಂದ್ ತೆರಿಪಾಯೆರ್.

ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಅಧ್ಯಕ್ಷೆರ್ ಕೋಂಜಾಲಗುತ್ತು ಪ್ರಭಾಕರ ಎಸ್ ಶೆಟ್ರ್ ಪಾತೆರ್ದ್, 2010 ನೇ ಇಸ್ವಿದ ಬ್ರಹ್ಮಕಲಶ ಸಮಿತಿದ ಅಧ್ಯಕ್ಷೆ ಆದಿತ್ತಿನ ಎನನ್ 2024 ನೇ ಇಸ್ವಿದ ಬ್ರಹ್ಮಕಲಶ ಸಮಿತಿದ ಅಧ್ಯಕ್ಷೆಯಾದ್ ಆಯ್ಕೆ ಮಲ್ದಿನ ನಿಕ್ಲೆನ ಪ್ರೀತಿ, ಮೋಕ್ಯೆ ಮಲ್ಲೆ. ಆ ಕೊಡಮಂದಾಯೆನೇ ಆ ಯೋಗ್ಯತೆನ್ ಎಂಕ್ ಕೊರ್ಪಾದಿನಿಂದ್ ಎನ್ನುವೆ ಪಂದ್ ಪಂಡೆರ್.

ಮೊಕ್ತೇಸರೆರ್ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಪ್ರಧಾನ ಕಾರ್ಯದರ್ಶಿ ಎಂ.ಮಧುಕರ ಅಮೀನ್ ಪಾತೆರ್ದ್, ಅಂದಾಜಿ 9 ಕೋಟಿ ರೂ. ಕರ್ಚಿಡ್ ಈ ಕ್ಷೇತ್ರ ಜೀರ್ಣೋದ್ಧಾರ ಆವೊಂದುಂಡು. ಸುಮಾರ್ 8 ತಿಂಗೊಲುರ್ದಿಂಚಿ
3.5 ಕೋಟಿ ರೂ.ದ ಸಿವಿಲ್ ಕಾಮಗಾರಿ ಅಂಚೆನೆ 5 ಕೋಟಿ ರೂ.ದ ನಿರ್ಮಾಣ ಕಾಮಗಾರಿ ಆತ್ಂಡ್. ಹೆಬ್ರಿರ್ದ್ ಮರ ಕನತ್ ದ್ 50 ಲಕ್ಷ ರೂ.ಡ್ ಕೊಡಿಮರ ನಿರ್ಮಾಣ ಆತ್ಂಡ್. ಬೇಲೆದಕುಲು, ಊರುದಕುಲು ರಾತ್ರೆ ಪಗೆಲ್ ಬೇಲೆ ಮಲ್ತೊಂದುಲ್ಲೆರ್. ಪ್ರತಿಯೊರಿಯಗ್ಲ ಶ್ರೀ ಕ್ಷೇತ್ರದ ಅನುಗ್ರಹ ತಿಕ್ಕುಲೆಕ ಮಾತೆರ್ಲ ಬೇಲೆ ಮಲ್ತೊಂದುಲ್ಲ ಪಂದ್ ಪಂಡೆರ್.

ಎ.25 : ಬೊಳ್ಳಿದ ಕಲಶ ಸಮರ್ಪಣೆ

ಬಾಲಿವುಡ್ ನಟಿ, ಉದ್ಯಮಿ ಶಿಲ್ಪಾ ಶೆಟ್ಟಿ ಮೇರ್ ಬ್ರಹ್ಮಕಲಶೊಗು ಕೊರ್ತಿನ ಬೊಳ್ಳಿದ ಕಲಶ ಸಮರ್ಪಣೆ ಲೇಸ್ ಎ.25 ಕ್ಕ್ ನಡಪರೆ ಉಂಡು. ಎ.27 ಕ್ಕ್ 1000 ಜೋಕುಲೆರ್ದ್ ಕುಣಿತ ಭಜನೆ ನಡಪರೆ ಉಂಡು. ಆನಂದ ಗುರೂಜಿ ಭಜನೆಗ್ ಚಾಲನೆ ಕೊರಿಯರೆ ಉಲ್ಲೆರ್. ಎ.22-24 ಮುಟ್ಟ ಮಾತಾ ಕಡೆರ್ದ್ ಲ ಹೊರೆ ಕಾಣಿಕೆ ಬರಿಯರೆ ಉಂಡು ಪಂದ್ ಮಧುಕರ ಅಮೀನ್ ಪಂಡೆರ್.

ಎ.19 ಕಟೀಲ್ ರ್ದ್ ಬಂಗಾರ್ ದ ಪಲ್ಲಕ್ಕಿ ಮೆರವಣಿಗೆ

ತಿಬಾರ ಕೊಡಮಣಿತ್ತಾಯಗ್ ಬಂಗಾರ್ ದ ಪಲ್ಲಕ್ಕಿ ಸಮರ್ಪಣೆ ಮಲ್ಪುನ ಭಕ್ತೆರೆನ ಸಂಕಲ್ಪ ಸಾಕಾರ ಆವೊಂದುಂಡು. ಎ.19ಗು ಬಯ್ಯಡ್ 5 ಗಂಟೆಗ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರಿನ ನಡೆರ್ದ್ ಬಂಗಾರ್ ದ ಪಲ್ಲಕ್ಕಿ ಮೆರವಣಿಗೆಗ್ ಪಲಿಮಾರು ಮಠಾಧೀಶೆರ್ ವಿದ್ಯಾಧೀಶ ಸ್ವಾಮೀಜಿ ಚಾಲನೆ ಕೊರಿಯರೆ ಉಲ್ಲೆರ್. ಓಟುದ ನೀತಿ ಸಂಹಿತೆ ಜಾರಿ ಆಯಿನೆರ್ದಾವರ ಕ್ಷೇತ್ರಡ್ ಇತ್ತಿನ ಬಂಗಾರ್ ನ್ ಗಲಸರೆ ಅವಕಾಶ ಇಜ್ಜಾಂದಿನ ಪೊರ್ತುಡು ಮಾತ ಭಕ್ತೆರ್ ಲ ಸೇರ್ದ್ ಅಕ್ಲೆಕ್ಲೆನ ಬಂಗಾರ್ ನ್ ಪಲ್ಲಕ್ಕಿ ಮಲ್ಪರೆ ಕೊರ್ತೆರ್. ಅಂಚ ಪಲ್ಲಕ್ಕಿಗ್ ಬೋಡಿತ್ತಿನ ಸುಮಾರ್ 2 ಕೆಜಿ ದಾತ್ ಬಂಗಾರ್ ಸಂಗ್ರಹ ಆತ್ಂಡ್.

ಅವ್ವೇ ದಿನ ಉಲ್ಲಂಜೆ ಕ್ರಾಸ್ ಡ್ ಕುಡ್ಲದ ಉದ್ಯಮಿ ಕಟ್ಟಾದಿನ ಸ್ವಾಗತ ಗೋಪುರ ಉದಿಪನ ಆವರೆ ಉಂಡು. ಪ್ರತಿದಿನಲ ಭಕ್ತೆರೆಗ್ ಉಪಾಹಾರ, ಅನ್ನಸಂತರ್ಪಣೆ,ಬಯ್ಯಡ್ ಧರ್ಮಸಭೆ, ಸಾಂಸ್ಕೃತಿಕ ಕಾರ್ಯಕ್ರಮ ನಡಪರೆ ಉಂಡು.ಧರ್ಮ ಸಭೆಟ್ಟ್ ಸ್ವಾಮೀಜಿನಕುಲು, ಧಾರ್ಮಿಕ ಮುಖಂಡೆರ್, ಗಣ್ಯೆರ್ ಪಾಲ್ ಪಡೆಯರೆ ಉಲ್ಲೆರ್ ಪಂದ್ ಜೀರ್ಣೋದ್ಧಾರ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಕಾರ್ಯಾಧ್ಯಕ್ಷೆರ್ ಪ್ರದ್ಯುಮ್ನರಾವ್ ಕೈಯೂರುಗುತ್ತು ತೆರಿಪಾಯೆರ್.

ಪತ್ರಿಕಾಗೋಷ್ಠಿಡ್ ಜೀರ್ಣೋದ್ಧಾರ ಸಮಿತಿ ಬೊಕ್ಕ ಬ್ರಹ್ಮಕಲಶೋತ್ಸವ ಸಮಿತಿದ ಪ್ರಧಾನ ಸಂಚಾಲಕೆರ್
ಸುಬ್ರಮಣ್ಯ ಪ್ರಸಾದ್ ಕೋರ್ಯಾರು, ತುಕಾರಾಮ ಶೆಟ್ಟಿ ಪರ್ಲಬೈಲುಗುತ್ತು, ಶಿವಾನಂದ ಶೆಟ್ಟಿ ಪಡುಮನೆ, ಮಾಧ್ಯಮ ವಿಭಾಗದ ಮುಖ್ಯಸ್ಥೆರ್ ಜಗನ್ನಾಥ ಶೆಟ್ಟಿ ಬಾಳ, ಸುರೇಂದ್ರ ಶೆಟ್ಟಿ ಇತ್ತೆರ್.

ಗೋರೆಗಾಂವ್ ಕರ್ನಾಟಕ ಸಂಘದ ತುಳು ಪರ್ಬ ದತ್ತಿ ನಿಧಿ ಲೇಸ್

ಬೊಂಬೈ: ಬಿಸು ಪರ್ಬನ್ ಇತ್ತೆದ ಕಾಲಡ್ ದೇಶ ಇಡೀ ಆಚರಣೆ ಮಲ್ಪುವೆರ್. ಉಂದು ಪ್ರಕೃತಿದ ಆಚರಣೆ. ದೇಶದ ಬೇತೆ ಬೇತೆ ರಾಜ್ಯಲೆಡ್ ಬೇತೆ ಬೇತೆ ಪುದರ್ ಡ್ ಈ ಪರ್ಬನ್ ಆಚರಣೆ ಮಲ್ಪುವೆರ್. ಈ ಪರ್ಬ ತುಳುನಾಡ್ ದ ಸಂಸ್ಕ್ರತಿನ್ ಒರಿಪಾದ್ ಬುಲೆಪಾವುನ ಲೇಸ್ ಪಂದ್ ಮಲಾಡ್ ಶ್ರೀ ವರಮಹಾಲಕ್ಷ್ಮಿ ಪೂಜಾ ಸಮಿತಿದ ಮಹಿಳಾ ವಿಭಾಗದ ಕಾರ್ಯಾಧ್ಯಕ್ಷೆರ್, ಕುಲಾಲ ಸಂಘ ಬೊಂಬೈದ ಚರ್ಚ್ ಗೇಟ್ – ದಹಿಸರ್ ಕೈತಲ್ದ ಸಮಿತಿದ ಉಪಕಾರ್ಯಾಧ್ಯಕ್ಷೆರ್ ರತ್ನಾ ಡಿ. ಕುಲಾಲ್ ಪಂಡೆರ್.

ಗೋರೆಗಾಂವ್ ಕರ್ನಾಟಕ ಸಂಘ ಬೊಕ್ಕ ಸಂಘದ ಯುವ ವಿಭಾಗದ ಒಟ್ಟುಸೇರಿಗೆಡ್ ಎ.14 ಕ್ಕ್ ಬಿಸು ಪರ್ಬದ ಲೆಕ್ಕೊಡು ನಿಟ್ಟೆ ಸುಧಾಕರ ಶೆಟ್ಟಿ ಬೊಕ್ಕ ಎಸ್. ಜೆ. ಶೆಟ್ಟಿ ನೆಂಪುಗಾದ್ ಜಯಕರ ದೇಜಪ್ಪ ಪೂಜಾರಿ ವೇದಿಕೆಡ್ ತುಳು ಪರ್ಬ ದತ್ತಿನಿಧಿ ಲೇಸ್ ಗೋರೆಗಾಂವ್ ಪಶ್ಚಿಮದ ಆರೇ ರೋಡ್‌ ಡ್ ಇಪ್ಪುನ ಕೇಶವ ಗೋರೆ ಸ್ಮಾರಕ ಟ್ರಸ್ಟ್ ದ ರಡ್ಡನೇ ಮಾಳಿಗೆದ ಸಭಾಗೃಹಡ್ ಸಂಘದ ಅಧ್ಯಕ್ಷೆರ್ ನಿತ್ಯಾನಂದ ಕೋಟ್ಯಾನ್ ಮೆರೆನ ಅಧ್ಯಕ್ಷತೆಡ್ ನಡತ್ಂಡ್.

ಮಲ್ಲ ಬಿನ್ನೆರಾದ್ ಬತ್ತಿನ ರತ್ನಾ ಡಿ. ಕುಲಾಲ್ ಮೇರ್ ಪಾತೆರ್ದ್, ಬಿಸು ಪರ್ಬ ತುಳು ಪರ್ಬ ಆತ್ಂಡ್. ನೆತ್ತ ಆಚರಣೆ ಕಮ್ಮಿ ಆದಿತ್ತ್ಂಡಲ ಇಂಚಿನ ಸಂಘಟನೆಲೆನ ಮುಕೇನ ಗೌಜಿಡ್ ಆಚರಣೆ ಆವೊಂದುಂಡು. ಯುಗದ ಸುರುನೇ ಯುಗಾದಿ. ಕರಿದ್ ಪೋಯಿನೆನ್ ಮರತ್ ದ್ ಪೊಸತ್ ನ್ ಸ್ವಾಗತಿಸಾವುನ ಪರ್ಬನೇ ಯುಗಾದಿ. ಗೋರೆಗಾಂವ್ ಕರ್ನಾಟಕ ಸಂಘ ಬಿಸು ಪರ್ಬದ ಪೊರ್ತುಡು ತುಳು ಪರ್ಬದ ಮುಕೇನ ತುಳು ಕನ್ನಡಿಗೆರೆನ್ ಒಂಜಿ ಕಡೆ ಸೇರ್ಸಾದ್ ನಮ್ಮ ಭಾಷೆ ಸಂಸ್ಕೃತಿನ್ ಎಚ್ಚ ಮಲ್ತೊಂದು ಉಂಡು. ನನ ಸಂಘದ ಪೊಸ ವಿಶಾಲವಾಯಿನ ಸಭಾಗೃಹಡ್ ಸಂಘದ ಇಂಚಿನ ಲೇಸ್ ನಡಪುಲೆಕ್ಕ ಅವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.

ಚಾವಡಿಡ್ ಇತ್ತಿನ ಸಂಘದ ಟ್ರಸ್ಟಿಲು ದೇವಲ್ಕುಂದ ಭಾಸ್ಕರ ಶೆಟ್ಟಿ ತುಡರ್ ಅರ್ಲಾದ್ ಲೇಸ್ ಗ್ ಚಾಲನೆ ಕೊರಿಯೆರ್.

ಅಧ್ಯಕ್ಷತೆನ್ ಒಯಿಸೊಂದು ಸಂಘದ ಅಧ್ಯಕ್ಷೆರ್ ನಿತ್ಯಾನಂದ ಕೋಟ್ಯಾನ್ ಪಾತೆರ್ದ್, ಇನಿ ಮಲ್ಲ ಬಿನ್ನೆರ್ ರತ್ನ ಕುಲಾಲ್ ಮೇರ್ ತನ್ನ ಮುತ್ತುದಂಚಿನ ಪಾತೆರರ್ದ್ ನಮಕ್ ಎಡ್ಡೆ ಬಯಕಿಯೆರ್. ತುಳು ಪರ್ಬ ಲೇಸ್ ದ ಮುಕೇನ ನಮ ಮಾತೆರ್ಲಾ ಇನಿ ಒಗ್ಗಟ್ಟಾತ, ಪೊಸ ಪ್ರತಿಭೆಲೆಗ್ ಅವಕಾಶ ಕೊರ್ಪುಲೆಕ್ಕ ಆವಡ್, ಗೋರೆಗಾಂವ್ ಪೂರ್ವದ ತುಳು ಕನ್ನಡಿಗೆರ್ ಸಂಘಡ್ ಕ್ರಿಯಾಶೀಲತೆರ್. ಅಭಿವೃದ್ಧಿದಂಚಿ ಪೋವೊಂದು ಇಪ್ಪುನ ಸಂಘದ ಕಟ್ವಾನದ ಪುನರ್ ನಿರ್ಮಾಣ ಆವೊಂದುಂಡು. ಸಂಘದ ಕಾರ್ಯಾಲಯದ ಕೊರತೆರ್ದ್ ಸದಸ್ಯೆರ್ ದೂರ ಅಯೆರೆ ಬಲ್ಲಿ ಪಂದ್ ಇನಿ ಬೊಲ್ಪುಗು ತಾತ್ಕಾಲಿಕವಾದ್ ಗೋರೆಗಾಂವ್ ಪಶ್ಚಿಮ, ಜವಾಹರ್ ನಗರದ ಎಸ್ ವಿ ರೋಡ್ ಲಕ್ಷಿ ನಿವಾಸಡ್ ಸಂಘಗ್ ಪೊಸ ಕಾರ್ಯಾಲಯನ್ ಉದಿಪನ ಮಲ್ತ್ಂದ ಪಂದ್ ಮಾತೆರೆಗ್ಲಾ ಬಿಸು ಪರ್ಬದ ಎಡ್ಡೆಪ್ಪು ಸಂದಾಯೆರ್.

ಚಾವಡಿಡ್ ಪ್ರಧಾನ ಕಾರ್ಯದರ್ಶಿ ಸರಿತಾ ಸುರೇಶ್ ನಾಯಕ್, ಉಪಾಧ್ಯಕ್ಷೆರ್ ವಿಶ್ವನಾಥ ಕೆ. ಶೆಟ್ಟಿ ಬೊಕ್ಕ ಯುವ ವಿಭಾಗದ ಕಾರ್ಯಾಧ್ಯಕ್ಷೆರ್ ಶಿವಾನಿ ಎಚ್. ಆಚಾರ್ಯ ಇತ್ತೆರ್.

ಸಂಘದ ಸದಸ್ಯೆರ್ದ್, ಸಂಘದ ಗ್ರಂಥಾಲಯದ ಸದಸ್ಯೆರ್ದ್ ಬೊಕ್ಕ ಯುವ ವಿಭಾಗದ ಸದಸ್ಯೆರ್ದ್ ಬೇತೆ ಬೇತೆ ಲೇಸ್ ನಡತ್ಂಡ್. ಗೌರವ ಪ್ರಧಾನ ಕಾರ್ಯದರ್ಶಿ ಸರಿತಾ ಸುರೇಶ್ ನಾಯಕ್ ಬೊಕ್ಕ ಪ್ರಮೀಳಾ ಆಚಾರ್ಯ ಲೇಸ್ ನ್ ಸುಧಾರಿಕೆ ಮಲ್ತೆರ್. ಜತೆ ಕಾರ್ಯದರ್ಶಿ ಶಾಂತ ಎನ್ ಶೆಟ್ಟಿ ಸಂಘದ ಚಟುವಟಿಕೆಲೆನ ಬಗೆಟ್ಟ್ ಪೊಲಬು ಕೊರಿಯೆರ್.

ಯುವ ವಿಭಾಗದ ಶಕುಂತಲಾ ಆಚಾರ್ಯ ಮೇರ್ ತುಳುನಾಡ್ ದ ಬಗೆಟ್ಟ್ ಸಂಕ್ಷಿಪ್ತವಾದ್ ಪಾತೆರಿಯೆರ್. ಸಂಘದ ಯುವ ವಿಭಾಗದ ಮಾಜಿ ಕಾರ್ಯಾಧ್ಯಕ್ಷೆರ್ ಸುಚಲತಾ ಪೂಜಾರಿ, ವಿದ್ಯಾ ಆಚಾರ್ಯ, ಹರಿಣಾಕ್ಷಿ ಶೆಟ್ಟಿ, ಸುಗುಣಾ ಎಸ್. ಬಂಗೇರ ಲೇಸ್ ದ ಯಶಸ್ಸ್ ಗ್ ಸಹಕಾರ ಕೊರಿಯೆರ್. ಮಾನ್ವಿ ಶೆಟ್ಟಿ ಸೊಲ್ಮೆ ಸಂದಾಯೆರ್. ಸಂಘದ ಸದಸ್ಯೆರ್ ಪರಿಸರದ ತುಳು ಕನ್ನಡಿಗೆರ್ ಬೊಕ್ಕ ಮಲಾಡ್ ಶ್ರೀ ವರಮಹಾಲಕ್ಷ್ಮಿ ಪೂಜಾ ಸಮಿತಿದ ಮಹಿಳಾ ವಿಭಾಗದ ಸದಸ್ಯೆರ್ ಎಚ್ಚದ ಸಂಖ್ಯೆಡ್ ಪಾಲ್ ಪಡೆದಿತ್ತೆರ್.

ರೋಟರಿ ವಲಯ ಅಧಿಕಾರಿಯಾದ್ ವಿಶ್ವನಾಥ ನಡುತೋಟ ನೇಮಕ

ರೋಟರಿ ಜಿಲ್ಲೆ 31,81 ವಲಯ 5 ತ್ತ 2024-25 ನೇ ಸಾಲ್ ಗ್ ಜೋನಲ್ ಲೆಫ್ಟಿನೆಂಟ್ ಆದ್ ಸುಬ್ರಹ್ಮಣ್ಯ ರೋಟರಿ ಕ್ಲಬ್ ದ ಪೂರ್ವಾಧ್ಯಕ್ಷೆರ್ ರೊ.ವಿಶ್ವನಾಥ ನಡುತೋಟ ಮೇರ್ ನೇಮಕ ಆತೆರ್.

ಮೆರೆನ ಅಧ್ಯಕ್ಷ ಅವಧಿಡ್ ಸುಬ್ರಹ್ಮಣ್ಯ ರೋಟರಿ ಕ್ಲಬ್ ಗ್ ಸುರುತ್ತ ಸರ್ತಿ ಅಂತರರಾಷ್ಟ್ರೀಯ ಸೈಟೇಶನ್ ಅವಾರ್ಡ್ ಬೈದ್ಂಡ್. ಮೇರ್ ಜೆಸಿಐ ಸುಬ್ರಹ್ಮಣ್ಯ ಕುಕ್ಕೆ ಸ್ಥಾಪಕ ಅಧ್ಯಕ್ಷೆರ್ ಸೀನಿಯರ್ ಚೇಂಬರ್ ಇಂಟರ್ ನ್ಯಾಷನಲ್ ಸುಬ್ರಹ್ಮಣ್ಯ ಲಿಜೆನ್ ದ ಸ್ಥಾಪಕ ಅಧ್ಯಕ್ಷೆರ್ ಬೊಕ್ಕ ಸುಬ್ರಹ್ಮಣ್ಯ ಪ್ರೆಸ್ ಕ್ಲಬ್ ದ ಸ್ಥಾಪಕ ಅಧ್ಯಕ್ಷೆರ್ ಆತೆರ್.