Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಸುಬ್ರಹ್ಮಣ್ಯ ಪ್ರೆಸ್ ಕ್ಲಬ್ ರಚನೆ; ವಿಶ್ವನಾಥ ನಡುತೋಟ ಅಧ್ಯಕ್ಷೆರ್

ಜಿಲ್ಲಾ ನೋಂದಣಾಧಿಕಾರಿ ಮೆರೆರ್ದ್ ನೋಂದಾವಣೆ ಆದ್ ಪೊಸತಾದ್ ಉಂಡಾಯಿನ ಸುಬ್ರಹ್ಮಣ್ಯ ಪ್ರೆಸ್ ಕ್ಲಬ್ ದ ಅಧ್ಯಕ್ಷೆರಾದ್ ಸಂಯುಕ್ತ ಕರ್ನಾಟಕ ಪತ್ರಿಕೆದ ವರದಿಗಾರೆ ವಿಶ್ವನಾಥ ನಡುತೋಟ, ಕಾರ್ಯದರ್ಶಿಯಾದ್ ವಿಜಯವಾಣಿ, ಹೊಸ ದಿಗಂತ ಪತ್ರಿಕೆದ ರತ್ನಾಕರ ಸುಬ್ರಹ್ಮಣ್ಯ ನೇಮಕ ಆತೆರ್.

ಉಪಾಧ್ಯಕ್ಷೆರಾದ್ ಪ್ರಜಾವಾಣಿ ಪತ್ರಿಕೆದ ಲೋಕೇಶ್ ಬಿ ಎನ್, ಕೋಶಾಧಿಕಾರಿಯಾದ್ ವಿಜಯ ಕರ್ನಾಟಕ, ಕನ್ನಡ ಪ್ರಭ ಪತ್ರಿಕೆದ ಪ್ರಕಾಶ್ ಸುಬ್ರಹ್ಮಣ್ಯ, ನಿರ್ದೇಶಕೆರಾದ್ ಉದಯವಾಣಿ ಪತ್ರಿಕೆದ ದಯಾನಂದ ಕಲ್ಲಾರ್, ಸುದ್ದಿ ಬಿಡುಗಡೆ ಪತ್ರಿಕೆದ ಶಿವರಾಮ ಕಜೆಮೂಲೆ, ಚಾನೆಲ್ 9 ನ್ಯೂಸ್ ಬಂಟ್ವಾಳದ ಶಿವ ಭಟ್, ವಿಶ್ವವಾಣಿ ಬೊಕ್ಕ ದಿಗ್ವಿಜಯದ ಸಂತೋಷ್ ಸುಬ್ರಹ್ಮಣ್ಯ, ಸ್ಪೀಡ್ ನ್ಯೂಸ್ ದ ನಾಗೇಶ್ ಮಡಿವಾಳ, ಕಹಳೆ ನ್ಯೂಸ್ ದ ಸುಪ್ರೀತ್ ಗೌಡ ನೇಮಕ ಆತೆರ್.

ತುಳುನಾಡ ಬಂಟ ಮಹಿಳಾ ಸಂಘದ ನಿರೆಲ್ಡ್ ಆಟಿಡೊಂಜಿ ದಿನ

ಮುಲ್ಕಿ : ಆನಿದ ಕಾಲದ ಆಟಿದ ತಿಂಗೊಲ್ದ ಬಂಗದ ದಿನೊಕ್ಲೆಡ್ ಇಲ್ಲದ ಅಪ್ಪೆಲ್ಲು ಆರ್ಥಿಕ ತಜ್ಞೆರ್ (ಇಕನಾಮಿಸ್ಟ್) ಲೆಕ ಪನವು ಬೊಕ್ಕ ಇಲ್ಲ್ ನ್ ಭಾರಿ ಜಾಗ್ ರ್ತೆಡ್ ನಡಪಾವೊಂದಿತ್ತೆರ್ ಪಂದ್ ಶಿಕ್ಷಕಿ ಅರ್ಪಿತಾ ಶೆಟ್ಟಿ ಮೇರ್ ಪಂಡೆರ್.

ಆರ್ ತುಳುನಾಡ ಬಂಟ ಮಹಿಳಾ ಸಂಘದ ಮುತಾಲಿಕೆಡ್ ಮುಲ್ಕಿ ಕೆಂಚನಕೆರೆತ್ತ ಅಂಬಾ ನಿವಾಸದ ಮೊಗಂಟೆಡ್ ಬುಧಾರ ನಡತಿನ “ಆಟಿಡೊಂಜಿ ದಿನ’ ಲೇಸ್ ಡ್ ಮಲ್ಲ ಬಿನ್ನೆರಾದ್ ಪಾಲ್ ಪಡೆದ್ ಪಾತೆರಿಯೆರ್.

ಆನಿದ ಕಾಲೊಡು ತುಳುನಾಡ ಅಪ್ಪೆಲ್ಲೆಗ್ ಪನವುನು ಕರ್ಚಿ ಮಲ್ಪುನೆರ್ದ್ ಲ ಅವೆನ್ ಒರಿಪುನ ಮನೋಭಾವ ಜಾಸ್ತಿ ಇತ್ತ್ಂಡ್. ತುರೆತ್ತ ಓಡುದ ಉಲಯಿ, ಅರಿತ್ತ ಗೋಣಿದುಲಯಿ ಪನವು ದೀವೊಂದಿತ್ತೆರ್. ಕುತ್ತಟ್ಟೊಡು ಅರಿ, ತಾರಾಯಿ ನ್ ದೀದ್ ಬಂಗದ ಕಾಲೊಡು ಗಲಸರೆ ಕೊರ್ದು ಜೀವನ ಕರಿತೊಂದಿತ್ತೆರ್. ಅಂಚೆನೆ ನಿಕುಲು ಬಂಟ ಮಹಿಳಾ ಸಂಘದಕುಲು ಒಟ್ಟು ಸೇರ್ದ್ ಎಲ್ಯ ಮಟ್ಟ್ ದ ಸಹಕಾರಿ ಕೂಟ ಮಲ್ತೊಂದು 65 ಲಕ್ಷ ರೂ. ಮುಟ್ಟ ವೈವಾಟ್ ಮಲ್ಪುನವು ಸುಲಭದ ಬೇಲೆ ಅತ್ತ್, ನಿಕ್ಲೆನ ಈ ಸಾಧನೆ ಮೆಚ್ಚೊಡಾಯಿನವು ಪಂಡೆರ್.

ಸಮಾಜಸೇವಕಿ ಸಾವಿತ್ರಿ ಶೆಟ್ಟಿ , ಅರ್ಪಿತಾ ಶೆಟ್ಟಿ ಮೊಕುಲು ಚೆನ್ನೆ ಗೊಬ್ಬು ಗೊಬ್ಬುದು ಲೇಸ್ ಉದಿಪನ ಮಲ್ತೆರ್. ಬೊಕ್ಕ ಅರ್ಪಿತಾ ಶೆಟ್ಟಿ ಮೆರೆಗ್ ತಮ್ಮನ ನಡತ್ಂಡ್. ಅವ್ವತ್ತಾಂದೆ ಬಂಟ ಸಮಾಜದ ಬಡಪತ್ತ್ ದ ಪ್ರತಿಭಾವಂತ ರಡ್ಡ್ ಜನ ವಿದ್ಯಾರ್ಥಿ ಲೆಗ್ ಮಾನಾದಿಗೆ ಮಲ್ತೆರ್.

ಈ ಪೊರ್ತುಡು ಪಾತೆರಿನ ತುಳುನಾಡ ಬಂಟ ಮಹಿಳಾ ಸಂಘದ ಅಧ್ಯಕ್ಷೆರ್ ಶಮೀನಾ ಆಳ್ವ , ಸಂಘದ ವತಿರ್ದ್ ಸದಸ್ಯೆರೆಗ್ ಈ ಸರ್ತಿ ವರ್ಷ 27 ಲಕ್ಷ ರೂ.ಮುಟ್ಟ ಸಾಲ ಕೊರ್ತ. ಕರಿನ ವರ್ಷ 65-70 ಲಕ್ಷ ರೂ. ಸಾಲ ಕೊರ್ದಿತ್ತ. ಒವ್ವೇ ರೀತಿದ ಸೊತ್ತುಲೆನ್ ಅಡವು ದೆತೊನಂದೆ ಸದಸ್ಯೆರೆಗ್ ಸಾಲ ಕೊರೊಂದುಲ್ಲ. ನೆರ್ದ್ ಮಸ್ತ್ ಜನಕ್ಕ್ ಉಪಯೋಗ ಆತ್ಂಡ್ ಪಂದ್ ಪಂಡೆರ್.

ಕಾರ್ಯದರ್ಶಿ ಕುಸುಮಾ ಶೆಟ್ಟಿ, ಉಪಾಧ್ಯಕ್ಷೆರ್ ರೋಹಿಣಿ ಶೆಟ್ಟಿ, ಕೋಶಾಧಿಕಾರಿ ಜ್ಯೋತಿ ಶೆಟ್ಟಿ, ಅಮೂಲ್ಯ ಶೆಟ್ಟಿ, ಭಾರತಿ ಶೆಟ್ಟಿ ಮಿತ್ತರ್ಮೆಡ್ ಇತ್ತೆರ್. ಸಂಘದ ಮಾತಾ ಸದಸ್ಯೆರ್ ಲೇಸ್ ಡ್ ಪಾಲ್ ಪಡೆದಿತ್ತೆರ್.

ತುಳುನಾಡ ಬಂಟ ಮಹಿಳಾ ಸಂಘದ ಸದಸ್ಯೆರ್ ಬತ್ತಿನ ಬಿನ್ನೆರೆಗ್ ಬೆಲ್ಲದ ಕಷಾಯ ಬೊಕ್ಕ ಸಾಂತನಿ ಕೊರ್ದು ಎದ್ಕೊನಿಯೆರ್. ಲೇಸ್ ದ ಅಕೇರಿಗ್ ಅಕಲ್ನಕಲ್ನ ಇಲ್ಲಡ್ ತಯಾರ್ ಮಲ್ತ್ ದ್ ಕನದಿನ ಆಟಿದ ವನಸ್ ತೆನಸ್ ನ್ ಮಾತೆರೆಗ್ಲ ಪಟ್ ದ್ ಕುಷಿ ಪಡೆಯೆರ್.

ರೇಡಿಯೊ ಮಣಿಪಾಲ್ ಡ್ ತುಳುವೆರೆ ಜಾಲ್ ಸರಣಿ ಲೇಸ್

ಮಣಿಪಾಲ: ರೇಡಿಯೊ ಮಣಿಪಾಲ್ 90.4 Mhz ಡ್ ತುಳುವೆರೆ ಜಾಲ್ ಸರಣಿ ಲೇಸ್ ಆ.16 ಬುಧಾರ ಬಯ್ಯಗ್ 5.10 ಕ್ಕ್ ಪ್ರಸಾರ ಆಂಡ್.

ಈ ಲೇಸ್ ಡ್ ಲೇಖಕೆರ್, ಉಪನ್ಯಾಸಕೆರ್ ವಾಸಂತಿ ಅಂಬಲ್ಪಾಡಿ ಪಾಲ್ ಪಡೆದ್ ತುಳುವೆರೆ ಆಟಿ ತಿಂಗೊಲು ಪನ್ಪುನ ಇಸಯದ ಬಗೆಟ್ಟ್ ಪಾತೆರಿಯೆರ್. ಆ.17 ಮಧ್ಯಾಹ್ನ 1.10 ಕ್ಕ್ ಕುಡೊರ ಪ್ರಸಾರ ಆಪುಂಡು.

ಅಂಚೆನೆ ಆಂಡ್ರಾಯ್ಡ್ ಫೋನ್ ದ https://play.google.com/store/apps/details?id=com.atc.radiomanipal ಬೊಕ್ಕ ಐಫೋನ್ ದ https://itunes.apple.com/app/id6447231815 ಲಿಂಕ್ ದ ಮುಖೇನ ರೇಡಿಯೊ ಮಣಿಪಾಲ್ ಆ್ಯಪ್ ನ್ ಡೌನ್‌ಲೋಡ್ ಮಲ್ತ್ ದ್ ಈ ಲೇಸ್ ನ್ ಕೇನೊಲಿ ಪಂದ್ ಮಣಿಪಾಲ ಮಾಹೆದ ಮಣಿಪಾಲ್ ಇನ್ ಸ್ಟಿಟ್ಯೂಟ್ ಆಫ್ ಕಮ್ಯುನಿಕೇಶನ್ ಕ್ಯಾಂಪಸ್ ಡ್ ಇಪ್ಪುನ ರೇಡಿಯೊ ಸಮುದಾಯ ಬಾನುಲಿ ಕೇಂದ್ರದ ಪ್ರಕಟಣೆ ತೆರಿಪಾದ್ಂಡ್.

ನೇಜಿಗುರಿಟ್ಟ್ ಗೌಜಿಡ್ ನಡತ್ಂಡ್ ಸ್ವಾತಂತ್ರ್ಯ ಉಚ್ಚಯ

ನೇಜಿಗುರಿ ಅಂಗನವಾಡಿ ಕೇಂದ್ರಡ್ 76ನೇ ಸ್ವಾತಂತ್ರ್ಯೋತ್ಸವ ಗೌಜಿಡ್ ನಡತ್ಂಡ್.

ಈ ಲೇಸ್ ಡ್ ಸಮಾಜ ಸೇವಕೆರ್ ಶುಭಕರ ಮುಗ್ರೋಡಿ ರಾಷ್ಟ್ರದ ಕೊಡಿನ್ ರಾಪಾಯೆರ್.

ಚಾವಡಿಡ್ ಬಿನ್ನೆರಾದ್ ಶಿವಶಕ್ತಿ ಫ್ರೆಂಡ್ಸ್ ಕ್ಲಬ್ ದ ಅಧ್ಯಕ್ಷೆರ್ ಭರತ್, ಶಕ್ತಿನಗರ ಆರೋಗ್ಯ ಕೇಂದ್ರದ ಹೇಮಾ, ಸಮಾಜ ಸೇವಕೆರ್ ರವಿ ಕುಕ್ಯಾನ್, ಆಶಾ ಕಾರ್ಯಕರ್ತೆ ಚಂದ್ರಿಕ, ನೇಜಿಗುರಿ ಗುಂಪುದ ಅಧ್ಯಕ್ಷೆರ್ ಅರುಣ್ ಡಿಸೋಜ ಇತ್ತೆರ್.

ಶಿಕ್ಷಕಿ ತೀರ್ಥ ಸಭೆನ್ ಉದ್ದೇಶಿಸಾದ್ ಪಾತೆರ್ದ್, ಲೇಸ್ ಗ್ ಬೊಕ್ಕ ಸ್ವಾತಂತ್ರ್ಯೋತ್ಸವಗ್ ಎಡ್ಡೆಪ್ಪು ಬಯಕಿಯೆರ್. ಚೈತ್ರ ಬೊಕ್ಕ ಹೇಮಾ ಮೊಕ್ಲೆಗ್ ಬಿನ್ನೆರೆನ ಎದುರುಡ್ ಮಾನಾದಿಗೆ ನಡತ್ಂಡ್. ಗೊಬ್ಬುದ ಪಂತೊಡು ಗೆಂದಿನ ಜೋಕುಲೆಗ್ ಇನಾಮು ಕೊರ್ದು ಪ್ರೋತ್ಸಾಹ ಮಲ್ತೆರ್. ಚೈತ್ರ ಮೇರ್ ಲೇಸ್ ದ ಸುಧಾರಿಕೆ ಮಲ್ತೆರ್. ಅಂಗನವಾಡಿದ ಟೀಚರ್ ಹರಿಣಿ ಎದ್ಕೊನಿಯೆರ್.
ಶ್ಯಾಮಲ ಸೊಲ್ಮೆ ಸಂದಾಯೆರ್. ಬೊಕ್ಕ ಬತ್ತಿನ ಮಾತೆರೆಗ್ಲಾ ಚೀಪೆ ತೆನಸ್ ಪಟ್ಟಿಯೆರ್.

ಕೋಡಿಂಬಾಡಿ ಗ್ರಾ.ಪಂ ಗುರ್ಕಾರ್ದಿ ಆದ್ ಮಲ್ಲಿಕಾ ಅಶೋಕ್, ಒತ್ತು ಗುರ್ಕಾರೆ ಜಯಪ್ರಕಾಶ್ ಬದಿನಾರು

ಉಬಾರ್: ಕೋಡಿಂಬಾಡಿ ಗ್ರಾ.ಪಂ ದ ಗುರ್ಕಾರ್ದಿ ಆದ್ ಕಾಂಗ್ರೆಸ್ ಬೆಂಬಲಿತ ಸದಸ್ಯೆ ಮಲ್ಲಿಕಾ ಅಶೋಕ್ ಪೂಜಾರಿ ಅಂಚನೆ ಒತ್ತು ಗುರ್ಕಾರೆ ಆದ್ ಕಾಂಗ್ರೆಸ್ ಬೆಂಬಲಿತ ಸದಸ್ಯೆರ್ ಜಯಪ್ರಕಾಶ್ ಬದಿನಾರು ಆಯ್ಕೆ ಆತೆರ್.

11 ಸದಸ್ಯ ಬಲ ಇಪ್ಪುನ ಈ ಪಂಚಾಯತ್‌ಡ್ ಗುರ್ಕಾರ್ದಿ ಸ್ಥಾನಗ್ ಸಾಮಾನ್ಯ ಮಹಿಳೆ, ಒತ್ತು ಗುರ್ಕಾರೆ ಸ್ಥಾನಗ್ ಹಿಂದುಳಿದ ವರ್ಗ(ಎ) ಮೀಸಲಾತಿ ಬತ್‌ದ್ ಇತ್‌ಂಡ್.

11 ಜನಟ್ 6 ಜನ ಬಿಜೆಪಿ ಬೆಂಬಲಿತ ಸದಸ್ಯೆರ್, 5 ಕಾಂಗ್ರೆಸ್ ಬೆಂಬಲಿತ ಸದಸ್ಯೆರ್ ಉಲ್ಲೆರ್.

ಉಬಾರ್: ಎಂಡಿಎಂಎ ಮಾದಕ ವಸ್ತ್ ಮಾರಾಟ- ರಡ್ಡ್ ಜನ ಅರೆಸ್ಟ್

ಉಬಾರ್: ಎಂಡಿಎಂಎ ಮಾದಕ ವಸ್ತ್ ಮಾರಾಟ ಮಲ್ತೊಂದು ಇತ್ತಿನ ಆರೋಪಿಲೆನ್ ಪೊಲೀಸೆರ್ ವಶಕ್ ಪಡೆಯೊಂದಿನ ಘಟನೆ ಉಬಾರ್‌ದ ಕೂಟೇಲ್‌ಡ್ ನಡತ್‌ಂಡ್.

ಬಜತ್ತೂರು ನಿವಾಸಿ ಲತೀಫ್ ಬಿ.ಎ(35ವ), ಬೊಲ್ತೆರ್ ಕೊಕ್ಕಡ ನಿವಾಸಿ ಬಿ ಜುನೈದ್(20) ಅರೆಸ್ಟ್ ಆಯಿನ ಆರೋಪಿಲು.

ಕೂಟೇಲ್‌ದಲ್ಪ ಉಬಾರ್ ಠಾಣಾ ಪೊಲೀಸೆರ್ ಗಾಡಿಲೆನ್ ಚೆಕ್ಕಿಂಗ್ ಮಲ್ಪುನಗ ಅವ್ವೆ ಮಾರ್ಗಡ್ ಬತ್ತಿನ ಸ್ಕಾರ್ಪಿಯೋ ಗಾಡಿನ್ ಉಂತಾಯೆರೆ ಪನ್ನಗ ರಡ್ಡ ಜನ ಪರಾರಿ ಆಯರೆ ಪ್ರಯತ್ನ ಮಲ್ತೆರ್. ಅಲ್ಪ ಇತ್ತಿನ ಪೊಲೀಸೆರ್ ವಿಚಾರಣೆ ಮಲ್ಪುನಗ ಅಂದಾಜ್ 6000/- 3.2 ಮಿಲಿ ಗ್ರಾಂ ಮಾದಕ ವಸ್ತ್ ಪತ್ತೆ ಆತ್‌ಂಡ್.

ನೆತ್ತ ಬಗ್ಗೆ ಉಬಾರ್ ಪೊಲೀಸ್ ಠಾಣೆಡ್ ದೂರು ದಾಖಲಾತ್‌ಂಡ್.

ಆ.20 : ಅಟ್ಟಿ ಮಲ್ಲಿಗೆ ಬಪ್ಪನಾಡ್ ದೇವಿಗ್ “ತುಳು ಭಕ್ತಿ ಸುಗಿಪು” ಬುಡುಗಡೆ

ದಯಾ ಕ್ರಿಯೇಷನ್ಸ್ ಬಾಯಾರು ಅರ್ಪಣೆ ಮಲ್ತಿನ “ಅಟ್ಟಿ ಮಲ್ಲಿಗೆ ಬಪ್ಪನಾಡ್ ದೇವಿಗ್” ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರಿ ಅಮ್ಮನ ತುಳು ಭಕ್ತಿ ಸುಗಿಪು ಆ.20 ದಾನಿ ಐತಾರ ಬಿಡುಗಡೆ ಆವೆರುಂಡು.

ಈ ತುಳು ಭಕ್ತಿ ಸುಗಿಪುಗ್ ಹರ್ಷಲ್ ಶೆಟ್ಟಿ ಕಲ್ಲಮುಂಡ್ಕೂರು ಸಾಹಿತ್ಯ ಬರೆತೆರ್. ರಕ್ಷಿತಾ ಪೂಜಾರಿ ಗಾಯನಡ್, ಸಾನ್ವಿ ಪುತ್ತೂರು ಅಭಿನಯಡ್ ಕಿಶೋರ್ ಬೊಲ್ತೆರ್ ಛಾಯಾಗ್ರಹಣ & ಸಂಕಲನಡ್ ದಯಾನಂದ ಅಮೀನ್ ಬಾಯಾರು ಸಮಗ್ರ ನಿರ್ವಹಣೆನ್ ಮಲ್ತ್ ದೆರ್.

ದಯಾ ಕ್ರಿಯೇಷನ್ಸ್ ದ ಯೂ ಟ್ಯೂಬ್ ಚಾನೆಲ್‌ಡ್ ಈ ತುಳು ಭಕ್ತಿ ಸುಗಿಪು ಬಿಡುಗಡೆ ಆವೆರುಂಡು ಪಂದ್ ತೆರಿಪಾದೆರ್.

ಸೆ.3: ಸೌಜನ್ಯಗ್ ನ್ಯಾಯೊಗಾದ್ ಪ್ರಜಾಪ್ರಭುತ್ವ ವೇದಿಕೆದ ಮುತಾಲಿಕೆಡ್ ಪ್ರತಿಭಟನೆ

ಬೊಲ್ತೇರ್: ಕು. ಸೌಜನ್ಯ ಕೇಸ್ ಆದ್ 11 ವರ್ಷ ಆಂಡಲ ಕೆರ್ನ ನಿಜವಾಯಿನ ಆರೋಪಿಲೆನ್ ಪತ್ತೆ ಮಲ್ತ್ ದ್ ಕಾನೂನುದ ಅಡಿಟ್ ಕಠಿಣ ಶಿಕ್ಷೆ ಕೊರಿಯೆರೆ ಸಂಬಂಧ ಪಟ್ಟಿನ ಇಲಾಖೆ ವಿಫಲ ಆತ್‌ಂಡ್. ನಿಜವಾಯಿನ ಆರೋಪಿಲೆನ್ ಪತ್ತೆ ಮಲ್ಪುನಂಚ ಸೆ.3 ತಾರೀಕ್ ದಾನಿ ಬೊಲ್ತೇರ್ ತಾಲೂಕು ಮೈದಾನಡ್ ಪ್ರಜಾಪ್ರಭುತ್ವ ವೇದಿಕೆ ದ ಮುತಾಲಿಕೆಡ್ ಮಲ್ಲ ಮಟ್ಟ್ ದ ಪ್ರತಿಭಟನಾ ಸಭೆ ನಡಪರೆ ಉಂಡು ಪಂದ್ ಪ್ರಜಾಪ್ರಭುತ್ವ ವೇದಿಕೆದ ತಾಲೂಕು ಅಧ್ಯಕ್ಷೆರ್ ಮಹೇಶ್ ಶೆಟ್ಟಿ ತಿಮರೋಡಿ ತೆರಿಪಾದೆರ್.

ಆ.16 ದಾನಿ ಬೊಲ್ತೆರ್‌ದ ಶ್ರೀ ಗುರುನಾರಾಯಣ ಸಂಕೀರ್ಣಡ್ ನಡತಿನ ಪತ್ರಿಕಾ ಗೋಷ್ಟಿಡ್ ಪಾತೆರ್ನ ಆರ್ ಕರಿನ 11 ವರ್ಷರ್ದ್ ಹೋರಾಟನ್ ಮಲ್ತೊಂದು ಬರೊಂದು ಉಲ್ಲ, ಇತ್ತೆ ಎಂಕ್ಲೆನ ಹೋರಾಟಗ್ ಶಕ್ತಿ ಬೈದುಂಡ್. ಶೇ.77 ಜನ ಸೌಜನ್ಯ ಪರ, ನ್ಯಾಯದ ಪರ ಉಲ್ಲೆರ್. ಈ ಪ್ರತಿಭಟನೆಗ್ ಬರಿಯೆರೆ ಏರೆನ್ಲ ಒತ್ತಾಯ ಮಲ್ಪುಜ, ಅಂಗಡಿ, ಆಟೋ ರಿಕ್ಷಾ ಬಂದ್ ಮಲ್ತ್ ಬರಿಯೆರೆ ಒತ್ತಾಯ ಮಲ್ಪುಜ ಸ್ವಯಂ ಪ್ರೇರಿತವಾದ್ ಶಾಂತಿಯುತ ಹೋರಾಟ ಮಲ್ತ್ ಸೌಜನ್ಯ ಕುಟುಂಬಗ್ ನ್ಯಾಯಗ್ ಹೋರಾಟ ಮಲ್ಪೊಡು ಪಂದ್ ತೆರಿಪಾಯೆರ್.

ಲೇಡೀಸ್ ಬ್ಯೂಟಿ ಅಸೋಸಿಯೇಶನ್ ದ ನಿರೆಲ್ ಡ್ ಆಟಿದ ಐಸಿರ ಲೇಸ್

ಕುಡ್ಲ ಲೇಡೀಸ್ ಬ್ಯೂಟಿ ಅಸೋಸಿಯೇಶನ್ ದ ಮುತಾಲಿಕೆಡ್ ಆಟಿದ ಐಸಿರ ಲೇಸ್ ಆ.13 ಐತಾರ ಕದ್ರಿಪಾರ್ಕ್ ಡ್ ಇಪ್ಪುನ ಲಯನ್ಸ್ ಕ್ಲಬ್ ದ ಚಾವಡಿಡ್ ನಡತ್ಂಡ್.

ಎಂಆರ್ ಪಿಎಲ್ ನಿವೃತ್ತ ಅಧಿಕಾರಿ ವೀಣಾ ಶೆಟ್ಟಿ ಲೇಸ್ ದ ಉದಿಪನ ಮಲ್ತ್ ದ್ ಪಾತೆರ್ದ್,‌ನಮ್ಮ ಮನಸ್ ಗ್ ಪ್ರಾಯ ಇಜ್ಜಿ. ಮನಸ್ ಡ್ ನಮ ಜವನೆರ್ ಆದಿತ್ತ್ಂಡ ಮಾತ ಬೇಲೆ ಡ್ ಲ ಸಕ್ರಿಯೆರಾದ್ ಇಪ್ಪರೆ ಸಾಧ್ಯ ಆಪುಂಡು ಪಂದ್ ಪಂಡೆರ್.

ಈ ಲೇಸ್ ದ ಗುರ್ಕಾರ್ಮೆನ್ ಒಯಿಸೊನ್ನ ಕುಡ್ಲ ಲೇಡಿಸ್ ಬ್ಯೂಟಿ ಅಸೋಸಿಯೇಶನ್ ದ ಗುರ್ಕಾರ್ದಿ ಬಬಿತ ಯು ಶೆಟ್ಟಿ ಪಾತೆರ್ದ್, ದುಂಬು ಮರ್ದ್ ದ ಸೊತ್ತುವಾದ್ ಗಲಸೊಂದು ಇತ್ತಿನ ಪ್ರಕೃತಿಡ್ ತಿಕ್ಕುನ ಸೊತ್ತುಲು ಇತ್ತೆದ ಜೋಕುಲೆಗ್ ಇಷ್ಟ ಆಪುಜಿ. ದುಂಬುದಕುಲು ಬಂಜಿದ ಬಡವುಗ್ ತಿನೊಂದು ಇತ್ತ್ಂಡ, ಇತ್ತೆದಕುಲು ನಾಲಯಿದ ರುಚಿಕ್ ತಿನ್ಪೆರ್. ಅಂಚಿನ ಸೊತ್ತುಲೆನ ಮಹತ್ವನ್ ನಮ ನಮ್ಮ ನನದ ಪೀಳಿಗೆಗ್ ತೆರಿಪಾವೊನ ಅಗತ್ಯ ಉಂಡು ಪಂದ್ ಪಂಡೆರ್.

ಕಬಿ, ಸಾಹಿತಿ, ಕಲ್ಪಾರ್ಥಿ ಶಾರದಾ ಹೈಸ್ಕೂಲ್ ಪಾಣೇರ್ ದ ಸುಧಾನಾಗೇಶ್ , ಆಟಿ ತಿಂಗೊಲ್ದ ಮಹತ್ವ ತೆರಿಪಾಯೆರ್.

ಈ ಪೊರ್ತುಡು ಚಾವಡಿಡ್ ಕಾರ್ಯದರ್ಶಿ ಫರ್ಜಾನ, ಜೀನಾ ಸಿಕ್ವೆರಾ, ಉಪಾಧ್ಯಕ್ಷೆರ್ ಸುಲತಾ, ಕುಡ್ಲ ಲೇಡಿಸ್ ಬ್ಯೂಟಿ ಅಸೋಸಿಯೇಶನ್ ದಕುಲು ಬೊಕ್ಕ ಪುತ್ತೂರ್ ವಲಯದ ಪದಾಧಿಕಾರಿಲು, ಸದಸ್ಯೆರ್ ಇತ್ತೆರ್.

ಮೇಕಪ್ ದ ಸೊತ್ತುಲೆನ ಪ್ರದರ್ಶನ ಬೊಕ್ಕ ಕಮ್ಮಿ ಕಿರಯಡ್ ಮಾರಾಟ ಮಲ್ಪುನ ಲೇಸ್ ನ್ ಆಯೋಜನೆ ಮಲ್ತ್ ದ್ ಇತ್ತೆರ್. ಬೊಕ್ಕ ಆಟಿ ತಿಂಗೊಲ್ ಡ್ ಗಲಸುನ ತಿಂಡಿ ತೆನಸ್ ಲೆನ್ ಬತ್ತಿನ ಮಾತೆರೆಗ್ಲಾ ಬಲಸಿಯೆರ್.

ಪಂಜ ಕೊಯಿಕುಡೆ ಶ್ರೀ ವಿಠೋಬ ಭಜನಾ ಮಂದಿರಡ್ ಸ್ವಾತಂತ್ರ್ಯ ಉಚ್ಚಯ

ಪಂಜ ಕೊಯಿಕುಡೆ ಶ್ರೀ ವಿಠೋಬ ಭಜನಾ ಮಂದಿರಡ್ 77ನೇ ವರ್ಷೊದ ಸ್ವಾತಂತ್ರ್ಯ ಉಚ್ಚಯದ ಆಚರಣೆ ನಡತ್ಂಡ್.

ಸಮಾಜಸೇವಕೆರ್, ಉದ್ಯಮಿ ಸದಾನಂದ ಎಂ ಶೆಟ್ರ್ ರಾಷ್ಟ್ರದ ಬಾವುಟನ್ ಏರಾಯೆರ್.

ಈ ಲೇಸ್ ದ ಗುರ್ಕಾರ್ಮೆನ್ ಸತೀಶ್ ಎಂ ಶೆಟ್ಟಿ ಬೈಲಗುತ್ತು ಒಯಿಸ್ ದಿತ್ತೆರ್. ಮಲ್ಲ ಬಿನ್ನೆರಾದ್ ಪಂಜ ಶ್ರೀ ಮಹಾಗಣಪತಿ ಮಂದಿರದ ಸುರೇಶ್ ಭಟ್, ಪಂಜದ ಗುತ್ತುದ ವಿಶ್ವನಾಥ ಶೆಟ್ಟಿ, ಕೆಮ್ರಾಲ್ ಗ್ರಾಮ ಪಂಚಾಯತ್ ಉಪಾಧ್ಯಕ್ಷೆರ್ ಸುರೇಶ್ ಪಂಜ, ಚಾಮುಂಡೇಶ್ವರಿ ಸನ್ನಿಧಿ ಪಂಜದ ಸೀತಾರಾಮ ಅಮೀನ್, ಪಂಜ ಕೊಯಿಕುಡೆ ಶ್ರೀ ಶನೇಶ್ಚರ ಮಂಡಳಿದ ಅಧ್ಯಕ್ಷೆರ್ ನವೀನ್ ಕುಮಾರ್ ಶೆಟ್ಟಿ, ಹಾಲು ಉತ್ಪಾದಕರ ಸಂಘ ಪಂಜ ಕೊಯಿಕುಡೆದ ಅಧ್ಯಕ್ಷೆರ್ ನವೀನ್ ಶೆಟ್ಟಿ ನಲ್ಯಗುತ್ತು, ಪಂಜ ಶಾಲೆದ ಮುಖ್ಯ ಶಿಕ್ಷಕಿ ಐರಿನ್ ಡಿಸೋಜ, ನವಜ್ಯೋತಿ ಮಹಿಳಾ ಮಂಡಲದ ಅಧ್ಯಕ್ಷೆರ್ ಅಮಿತಾ ದೇವಾಡಿಗ, ಕೆಮ್ರಾಲ್ ಗ್ರಾಮ ಪಂಚಾಯತ್ ಸದಸ್ಯೆರ್ ನವೀನ್ ಸಾಲಿಯಾನ್ ಪಾಲ್ ಪಡೆದಿತ್ತೆರ್.

ಈ ಪೊರ್ತುಡು ಸಾಹಿತಿ, ಲೇಖಕೆರ್ ಶಿವಪ್ಪ ಶೆಟ್ಟಿ ಪಡುಮನೆ ಮೊಗಪಾಡಿ ಮೆರೆಗ್ ಮಾನಾದಿಗೆ ಮಲ್ತೆರ್. ಸತೀಶ್ ಎಂ ಶೆಟ್ಟಿ ಬೈಲಗುತ್ತು ಲೇಸ್ ದ ಸುಧಾರಿಕೆ ಮಲ್ತೆರ್. ಪದ್ಮನಾಭ ಪೂಜಾರಿ ಎದ್ಕೊನಿಯೆರ್. ಭರತ್ ಶೆಟ್ಟಿ ಪಂಜ ಸೊಲ್ಮೆ ಸಂದಾಯೆರ್.