Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಬಂಟರ ಮಾತೃ ಸಂಘದ ಕುಡ್ಲ ತಾಲೂಕ್ ಸಮಿತಿರ್ದ್ ಪ್ರತಿಭಾ ಪುರಸ್ಕಾರ

ಕುಡ್ಲ: ಬದ್ ಕ್ ಪನ್ಪಿನ ನೌಕೆಗ್ ಸರಿಯಾತಿನ ದಿಕ್ಸೂಚಿದ ಅಗತ್ಯ ಉಂಡು. ಬೇತೆಕ್ಲೆನ ಸಲಹೆ ಸೂಚನೆ ದೆತೊಂದು ವಿದ್ಯಾರ್ಜನೆ ಮಲ್ತ್ಂಡ ಯಶಸ್ಸ್ ಆಯೆರೆ ಸಾಧ್ಯ ಪಂದ್ ಹೈದರಾಬಾದ್ ಬಂಟರ ಸಂಘದ ಮಾಜಿ ಅಧ್ಯಕ್ಷೆರ್ ರತ್ನಾಕರ ರೈ ಪಂಡೆರ್.

ಮೇರ್ ಬಂಟರ ಯಾನೆ ನಾಡವರ ಮಾತೃ ಸಂಘದ ಕುಡ್ಲ ತಾಲೂಕ್ ಸಮಿತಿದ ಮುತಾಲಿಕೆಡ್ ಬಂಟ್ಸ್ ಹಾಸ್ಟೆಲ್ ದ ಅಮೃತೋತ್ಸವ ಕಟ್ಟಡದ ಚಾವಡಿಡ್ ನಡತಿನ ಸಮಾಜದ ಕಲ್ಪಾರ್ಥಿಲೆಗ್ ಪ್ರತಿಭಾ ಪುರಸ್ಕಾರ ಲೇಸ್ ನ್ ಉದಿಪನ ಮಲ್ತ್ ದ್ ಪಾತೆರಿಯೆರ್.

ರಾಮಕೃಷ್ಣ ಪದವಿ ಕಾಲೇಜ್ ದ ಪ್ರಾಂಶುಪಾಲೆರ್ ಪ್ರೊ. ಬಾಲಕೃಷ್ಣ ಶೆಟ್ಟಿ ಪಾತೆರ್ದ್, ಕಲ್ಪಾರ್ಥಿಲು ಕಲ್ಪುನೆತ್ತೊಟ್ಟಿಗೆ ಸಾಮಾಜಿಕ, ಸಾಂಸ್ಕೃತಿಕ ಬೊಕ್ಕ ಆಧ್ಯಾತ್ಮಿಕ ಇಸಯಲೆಡ್ ಸಕ್ರಿಯ ಆದಿತ್ತ್ಂಡ ಸಮಗ್ರ ವ್ಯಕ್ತಿತ್ವ ಬುಲೆವಣಿಗೆ ಆಪುಂಡು ಪಂದ್ ಪಂಡೆರ್.

ಮಲ್ಲ ಬಿನ್ನೆರ್ ಒಡಿಯೂರು ಸಹಕಾರಿ ಸಂಘದ ಗುರ್ಕಾರ್ಲು ಸುರೇಶ್ ರೈ ಪಾತೆರ್ದ್, ಕಲ್ಪಾರ್ಥಿಲು ದೂರದರ್ಶಿತ್ವ ಇತ್ತ್ ದ್, ಏಪಲ ಪರಿಶ್ರಮ ಪಡೆವೊಡು ಪಂದ್ ಪಂಡೆರ್.

ಗುರ್ಕಾರ್ಮೆನ್ ಒಯಿಸೊನ್ನ ಕುಡ್ಲ ತಾಲೂಕ್ ಸಮಿತಿದ ಸಂಚಾಲಕೆರ್ ವಸಂತ ಶೆಟ್ಟಿ ಪ್ರತಿಭಾ ಪುರಸ್ಕಾರ ಪಡೆಯಿನ ಕಲ್ಪಾರ್ಥಿಲೆಗ್ ಅಭಿನಂದನೆ ಸಂದಾಯೆರ್. ರತ್ನಾಕರ ರೈ ದಂಪತಿಲೆಗ್, ಪ್ರೊ. ಬಾಲಕೃಷ್ಣ ಶೆಟ್ಟಿ ಬೊಕ್ಕ ಸುರೇಶ್ ರೈ ಸನ್ಮಾನ ಮಲ್ತೆರ್. ಪ್ರತಿಭಾ ಪುರಸ್ಕಾರ ಪಡೆಯಿನ ನಿಧಿಶ್ರೀ ಶೆಟ್ಟಿ ಬೊಕ್ಕ ಮಹತಿ ಶೆಟ್ಟಿ ಅಭಿಪ್ರಾಯ ಪಂಡೆರ್.

ಈ ಪೊರ್ತುಡು ಬಂಟರ ಯಾನೆ ನಾಡವರ ಮಾತೃಸಂಘದ ಪ್ರಧಾನ ಕಾರ್ಯದರ್ಶಿ ಕೆ ಎಂ ಶೆಟ್ಟಿ, ಕೋಶಾಧಿಕಾರಿ ರಾಮಮೋಹನ್ ರೈ, ಕಾರ್ಯಕಾರಿ ಸಮಿತಿ ಸದಸ್ಯೆರ್ ನಿಟ್ಟೆಗುತ್ತು ರವಿರಾಜ್ ಶೆಟ್ಟಿ, ಉಲ್ಲಾಸ್ ಶೆಟ್ಟಿ ಪೆರ್ಮುದೆ, ಉಮೇಶ್ ರೈ ಪದವು ಮೇಗಿನಮನೆ, ಮುರಳೀಧರ ಶೆಟ್ಟಿ, ರವೀಂದ್ರನಾಥ ರೈ, ಜಯರಾಯ ಸಾಂತ, ಆನಂದ ಶೆಟ್ಟಿ ಇತ್ತೆರ್.

ಕುಡ್ಲ ತಾಲೂಕ್ ಸಮಿತಿದ ಸಹ ಸಂಚಾಲಕೆರ್ ರತ್ನಾಕರ ಶೆಟ್ಟಿ ಎಕ್ಕಾರ್ ಸೊಲ್ಮೆ ಸಂದಾಯೆರ್.
ಸತೀಶ್ ಶೆಟ್ಟಿ ಕೊಡಿಯಾಲ್ ಬೈಲ್ ಬೊಕ್ಕ ಕಿರಣ್ ಪಕ್ಕಳ ಲೇಸ್ ದ ಸುಧಾರಿಕೆ ಮಲ್ತೆರ್. ಸುಲತಾ ಶೆಟ್ಟಿ ಸಹಕಾರ ಕೊರಿಯೆರ್.

ಪುತ್ತೂರ್‌ ಅಕ್ಷಯ ಕಾಲೇಜ್ ಡ್ ಆಟಿದ ಕೂಟ

ಸಂಪ್ಯ: ಅಕ್ಷಯ ಕಾಲೇಜ್ ಪುತ್ತೂರ್, ರಾಷ್ಟ್ರೀಯ ಸೇವಾ ಯೋಜನೆ ಬೊಕ್ಕ ಐಕ್ಯೂಎಸಿ ನೆತ್ತ ಒಟ್ಟು ಸೇರಿಗೆಡ್ ಆಟಿದ ಕೂಟ ಕಾಲೇಜ್‌ದ ಸಭಾಂಗಣಡ್ ಆ.16 ದಾನಿ ನಡತ್‌ಂಡ್.

ಲೇಸ್‌ದ ಉದಿಪನನ್ ತುಳು ವಿದ್ವಾಂಸೆರ್ ಕೆ.ಕೆ ಪೇಜಾವರ ನಡಪಾಯೆರ್. ಅಕ್ಷಯ ಕಾಲೇಜ್‌ದ ಗುರ್ಕಾರ್ಲು ಜಯಂತ್ ನಡುಬೈಲ್ ಲೇಸ್‌ದ ಗುರ್ಕಾಮೆನ್ ವಹಿಸಾದ್ ಇತ್ತೆರ್. ಮಲ್ಲ ಬಿನ್ನೆರಾದ್ ಕಲ್ಪಾದಿ, ತುಳು ಸಾಹಿತಿ, ಸ.ಹಿ.ಪ್ರಾ. ಶಾಲೆ ಕಣಿಯೂರು ಮುಲ್ತ ರೇಣುಕಾ ಕಣಿಯೂರು, ಅಕ್ಷಯ ಕಾಲೇಜ್‌ದ ನಿರ್ದೇಶಕೆರ್ ಕಲಾವತಿ ಜಯಂತ್ ಪಾಲ್ ಪಡೆದಿತ್ತೆರ್.

ರಾಷ್ಟ್ರೀಯ ಸ್ವಯಂ ಸೇವಾ ಯೋಜನೆದ ಅಧಿಕಾರಿಲು ಕಿಶೋರ್ ಕುಮಾರ್ ರೈ, ಐಕ್ಯೂಎಸಿ ಸಂಯೋಜಕೆರ್ ರಾಕೇಶ್ ಕುಳದಪಾರೆ, ಆಡಳಿತಾಧಿಕಾರಿ ಅರ್ಪಿತ್ ಟಿ.ಎ, ಪ್ರಾಂಶ್‌ಪಾಲೆರ್ ಸಂಪತ್ ಕೆ ಪಕ್ಕಳ ಲೇಸ್‌ಡ್ ಪಾಲ್ ಪಡೆದಿತ್ತೆರ್.

ಕಜ್ಜೊಡು ಇಸೇಸವಾದ್ ಚಾವಡಿಡ್ ಆಟಿ ಕಳೆಂಜೆ, ಸುಗ್ಗಿ ನಲಿಕೆ, ಪಾಡ್ದನೊ, ಪಿಲಿಯೇಸ, ತುಳು ಗೊಬ್ಬುಲು, ಪೊರ್ಲ ಪದೊಕುಲು, ಪುಚ್ಚೆ ಪಜ್ಜೆಡ್ ತುಳುವೆರೆ ತುತ್ತೈತೊದ ಐಸಿರ, ಆಟಿದ ಅಟಿಲಾಯಿನ ಪತ್ರೊಡೆ, ಕನಿಲೆ ಗಸಿ, ತೇಟ್ಲ, ತಜಂಕ್ ಪತ್ರೊಡೆ, ತೇರೆ ಕೊಡಿ ಚಟ್ನಿ, ಪೆಲಕಾಯಿ ಗೂಂಜಿ ಚಟ್ನಿ, ಪೆಲಕಾಯಿ ಪಾಯಸ, ಪೂಂಬೆ ಚಟ್ನಿ ಬೊಕಲಾತ್ 90 ಬಗೆತ ಆಟಿದ ರುಚಿಕುಲು ಈ ಕೂಟಡ್ ಇತ್‌ಂಡ್.

ತುಳು ಲಿಪಿ ಆನ್ ಲೈನ್ ಪರೀಕ್ಷೆಡ್ ಪಂಚಮಿ ಬಿ.ಆರ್ ವಿಶೇಷ ಸಾಧನೆ

ಬೊಲ್ತೆರ್: ತುಳುನಾಡ್ ಅಂಚನೆ ವಿಶ್ವದ ನಾನಾ ಭಾಗಡ್ ಇಪ್ಪುನ ತುಳು ಬಾಷೆದಕ್ಲೆಗ್ ತುಳು ಲಿಪಿತ ಬಗ್ಗೆ ಅರಿವು ಬೊಕ್ಕ ಆಸಕ್ತಿ ಮೂಡಿಸಾವುನ ಉದ್ದೇಶಡ್ “ಜೈ ತುಳುನಾಡ್ (ರಿ)” ಸಂಘಟನೆ ನಡಪಾಯಿನ ತುಳು ಲಿಪಿ ಆನ್-ಲೈನ್ ತರಗತಿಡ್ ಪಾಲ್ ಪಡೆದ್ ಬೊಕ್ಕ ಆನ್-ಲೈನ್ ಪರೀಕ್ಷೆಡ್ ಪಂಚಮಿ ಬಿ.ಆರ್ 100 ಕ್ಕ್ 100 ಅಂಕನ್ ಗಳಿಸಾವುನ ಮುಖೇನ ವಿಶೇಷ ಸಾಧನೆ ಮಲ್ತ್ ದೆರ್.

ದಾರವಾಡಡ್ ಇಪ್ಪುನ ಜೆಜೆಎಸ್ ಮಂಜುನಾಥೇಶ್ವರ ಸೆಂಟ್ರಲ್ ಸ್ಕೂಲ್ 8ನೇ ತರಗಡ್ ಕಲ್ತೊಂದು ಇಪ್ಪುನ ಮೇರ್ ಕಾಸರಗೋಡ್‌ದ ದೇಲಂಪಾಡಿ ಗ್ರಾಮದ ಬಂದ್ಯಡ್ಕ ರಾಜೇಶ್ ಬೊಕ್ಕ ಚಿತ್ರಕಲಾ ದಂಪತಿಲೆನ ಮಗಲ್.

ಬಿಜೆಪಿ ಸಾಮಾಜಿಕ ಜಾಲತಾಣದ ಪ್ರಕೋಷ್ಠದ ಸದಸ್ಯೆ ಪ್ರಶಾಂತ್ ನಾಯ್ಕ್ ಆತ್ಮಹತ್ಯೆ

ಬಂಟ್ವಾಳ: ಬಿಜೆಪಿ ಸಾಮಾಜಿಕ ಜಾಲತಾಣದ ಪ್ರಕೋಷ್ಠ ಬಂಟ್ವಾಳ ಮಂಡಲದ ಸದಸ್ಯೆ, ಪೆರಾಜೆ ಭಾಗದ ಸಕ್ರಿಯ ಕಾರ್ಯಕರ್ತ ಪ್ರಶಾಂತ್ ನಾಯ್ಕ್ ಆತ್ಮಹತ್ಯೆ ಮಲ್ತಿನ ಘಟನೆ ಆ.16 ದಾನಿ ನಡತ್‌ಂಡ್.

ಕೋಡೆ ರಾತ್ರೆ ಇಲ್ಲದ ಕೈತಲ್ದ ಗುವೆಲ್‌ಗ್ ಲಾಗಿದ್ ಆತ್ಮಹತ್ಯೆ ಮಲ್ತೊಂದೆರ್. ಆತ್ಮಹತ್ಯೆಗ್ ಕಾರಣ ತೆರಿದ್ ಬೈದಿಜಿ. ಪ್ರಶಾಂತ್ ನೇರಳಕಟ್ಟೆದ ಸಂಸ್ಥೆಡ್ ಬೇಲೆ ಮಲ್ತೊಂದು ಇತ್ತೆರ್. ಒಂಜಿ ವರ್ಷದ ಪಿರಾವು ಮದಿಮೆ ಆದ್ ಇತ್ತ್ಂಡ್. ಬಿಜೆಪಿದ ಸಕ್ರಿಯ ಕಾರ್ಯಕರ್ತೆ ಆದಿತ್ತಿನ ಮೇರ್ ಪೆರಾಜೆ ಯುವ ವೇದಿಕೆದ ಕಾರ್ಯದರ್ಶಿಯಾದ್, ಪ್ರಸ್ತುತ ಸದಸ್ಯೆರಾದ್ ಕೆಲಸ ಮಲ್ತೊಂದು ಇತ್ತೆರ್.

ತುಳು ಲಿಪಿ ಆನ್ ಲೈನ್ ಪರೀಕ್ಷೆಡ್ ಧನ್ಯಶ್ರೀ ಅಮೀನ್ ವಿಶೇಷ ಸಾಧನೆ

ಬಂಟ್ವಾಳ: ತುಳು ಲಿಪಿತ ಅರಿವು ಬೊಕ್ಕ ಆಸಕ್ತಿ ಪುಟ್ಟಾವುನ ಉದ್ದೇಶಡ್ “ಜೈ ತುಲುನಾಡ್ (ರಿ)” ಸಂಘಟನೆ ನಡಪಾಯಿನ ತುಳು ಲಿಪಿ ಆನ್-ಲೈನ್ ತರಗತಿಡ್ ಪಾಲ್ ಪಡೆದ್ ಬೊಕ್ಕ ಆನ್-ಲೈನ್ ಪರೀಕ್ಷೆಡ್ ಧನ್ಯಶ್ರೀ ಅಮೀನ್ 100 ಕ್ಕ್ 100 ಅಂಕನ್ ಪಡೆದ್ ವಿಶೇಷ ಸಾಧನೆ ಮಲ್ತ್ ದೆರ್.

ಬೆಂಗ್ಲೂರುಡ್ ಸಿ.ಎ ಉದ್ಯೋಗ ಮಲ್ತೊಂದು ಇಪ್ಪುನ ಮೇರ್ ಬಂಟ್ವಾಳ ತಾಲೂಕುದ ಕುಳ ಗ್ರಾಮದ ಕಾರ್ಯಾಡಿ ಗುತ್ತು ವಿಶ್ವನಾಥ ಬೊಕ್ಕ ಸೇವಂತಿ ದಂಪತಿಲೆನ ಮಗಲ್.

ಫ್ರೀ ಬಸ್ ಉಂತುಜಿ, ಸುಳ್ಳು ಸುದ್ದಿ ನಂಬೊಚ್ಚಿ: ಸಚಿವ ರಾಮಲಿಂಗಾ ರೆಡ್ಡಿ

ಪೊಂಜೊವ್ ನಕ್ಲೆಗ್ ಇತ್ತೆ ಕೊರ್ತಿನ ಗ್ಯಾರಂಟಿದ ಪೈಕಿ ಡ್ ಫ್ರೀ ಬಸ್ ಪ್ರಯಾಣದ “ಶಕ್ತಿ ಯೋಜನೆ” ನನಲ ಪತ್ತ್ ವರ್ಷದ ಕಾಲ ಮುಂದುವರಿಯೆರೆ ಉಂಡು ಪಂದ್ ಸಾರಿಗೆ ಸಚಿವೆರ್ ರಾಮಲಿಂಗಾ ರೆಡ್ಡಿ ತೆರಿಪಾದೆರ್.

ಶಕ್ತಿ ಯೋಜನೆ ಉಂತಾವೆರ್ ಪಂದ್ ಸುಳ್ಳು ಸುದ್ದಿಲೆನ್ ಸೋಶಿಯಲ್ ಮೀಡಿಯಾಡ್ ಪಟ್ಟೊಂದುಲ್ಲೆರ್.
ಅಂಚಾದ್ ನೆತ್ತ ಬಗ್ಗೆ ಪಾತೆರ್ನ ಮೇರ್ ‘ಉಂದು ವದಂತಿ, ಒಂಜಿ ಪಕ್ಷದಕುಲ್ ಇಂಚಿನ ವದಂತಿನ್ ಮಲ್ತೊಂದುಲ್ಲೆರ್. ದುಂಬುದ ಸರ್ತಿಲ ಎಂಕುಲೆ ಅಧಿಕಾರಿಗ್ ಬರ್ಪ ಅಂಚಾದ್ 10 ವರ್ಷ ಕಾಲ ಶಕ್ತಿ ಯೋಜನೆ ಮುಂದುವರಿಯುಂಡು ಪಂಡೆರ್.

ಪೊಂಜೊವ್ ನಕುಲ್ ಪಾಸ್ ಮಲ್ಪುನ ಅಗತ್ಯ ಇಜ್ಜಿ ಪಂದ್ ಸ್ಪಷ್ಟ ವಾದ್ ಪಂಡೆರ್. ಫ್ರೀ ಬಸ್ ಬಂದ್ ಆಪಿನ ಸುಳ್ಳು ಸುದ್ದಿಲೆಗ್ ಕೆಬಿ ಕೊರೊಚ್ಚಿ ಪಂದ್ ಸಾರಿಗೆ ಸಚಿವೆರ್ ತೆರಿಪಾದೆರ್.

ಬಿಎಂಟಿಸಿ ಬಸ್ಸ್ ದ ಅಡಿಕ್ಕ್ ಬೂರ್ದು ತೀರ್‌ಪೋಯಿನ ಬಾಲೆ

ಬಿಎಂಟಿಸಿ ಬಸ್ ಬೈಕ್‌ಗ್ ಡಿಕ್ಕಿ ಹಾಕ್‌ದ್ ತಿರ್ತ್ ಬೂರ್ನ ಪೊಣ್ಣುಬಾಲೆ ಬಸ್ ದ ಅಡಿಕ್ ಬೂರ್ದ್ ತೀರ್‌ಪೋಯಿನ ದುರ್ಘಟನೆ ಬೆಂಗ್ಲೂರ್‌ಡ್ ಉತ್ತರ ಹಳ್ಳಿಡ್ ನಡತ್‌ಂಡ್.

ಪೂರ್ವಿ(4ವ) ತೀರ್ ಪೋಯಿನ ಬಾಲೆ.

ಬಾಲೆನ್ ಶಾಲೆಗ್ ಬುಡಿಯೆರೆ ಬೈಕ್ ಡ್ ಪೋನಗ ಬಸ್ ಡಿಕ್ಕಿ ಹಾಕಿನ ರಭಸಗ್ ಬಾಲೆದ ಪೊಪ್ಪ ಎಡತ್ತ ಸೈಡ್ ಗ್ ಬೂರ್ದು, ಬಾಲೆ ಬಲತ್ತ ಸೈಡ್‌ಗ್ ಬೂರ್ದಲ್. ಈ ಪೊರ್ತುಡು ಬಸ್ ಮೈತ ಮಿತ್ತ್ ಪೋದ್ ಅಪಗನೆ ಬಾಲೆ ತೀರ್‌ಪೋತಲ್.

ನೆತ್ತ ಬಗ್ಗೆ ಕುಮಾರ ಸ್ವಾಮಿ ಲೇಔಟ್ ಸಂಚಾರಿ ಠಾಣೆಡ್ ಪ್ರಕರಣ ದಾಖಲಾತ್‌ಂಡ್. ಡ್ರೈವರ್ ನ್ ವಶಕ್ ಪಡೆದ್ ಪೊಲೀಸೆರ್ ತನಿಖೆ ಮಲೊಂದು ಉಲ್ಲೆರ್.

ಹಳೆಯಂಗಡಿ ಶ್ರೀ ವಿದ್ಯಾ ವಿನಾಯಕ ಯುವಕ ಮಂಡಲಡ್ ಸ್ವಾತಂತ್ರ್ಯ ಉಚ್ಚಯ

ಹಳೆಯಂಗಡಿ ಶ್ರೀ ವಿದ್ಯಾ ವಿನಾಯಕ ಯುವಕ ಮಂಡಲ (ರಿ.) ದ ಮುತಾಲಿಕೆಡ್ ಶ್ರೀ ವಿದ್ಯಾವಿನಾಯಕ ರಜತ ಸೇವಾ ಟ್ರಸ್ಟ್ (ರಿ), ಸುವರ್ಣ ಮಹೋತ್ಸವ ಸಮಿತಿ, ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲ, ಯುವತಿ ಬೊಕ್ಕ ಮಹಿಳಾ ಮಂಡಲ (ರಿ.) ದ ಒಟ್ಟುಸೇರಿಗೆಡ್ ಆ.15 ಬೊಲ್ಪುಗು ಸ್ವಾತಂತ್ರ್ಯೋತ್ಸವದ ಅಂಗವಾದ್ ರಾಷ್ಟ್ರ ಕೊಡಿನ್ ರಾಪಾವುನ ಲೇಸ್ ಯುವಕ ಮಂಡಲದ ಚಾವಡಿಡ್ ನಡತ್ಂಡ್.

ಈ ಲೇಸ್ ಗ್ ಬಿನ್ನೆರಾದ್ ಬತ್ತಿನ ದೇಶ ಸೇವೆಡ್ 17 ವರ್ಷ ಸೇವೆ ಸಂದಾಯಿನ ಮಾಜಿ ಸೈನಿಕೆರ್, ನಾಗರಾಜ್ ಬಿ.ಪಡು ಪಣಂಬೂರು ಮೇರ್ ರಾಷ್ಟ್ರ ಕೊಡಿನ್ ರಾಪಾಯೆರ್.

ಬೊಕ್ಕ ಮೆರೆಗ್ ಸಂಸ್ಥೆದ ಪರವಾದ್ ಮಾನಾದಿಗೆ ಮಲ್ತೆರ್. ಬೊಕ್ಕ ಸ್ವಾತಂತ್ರ್ಯ ಚಳವಳಿದ, ಇತಿಹಾಸದ ಬಗೆಟ್ಟ್ ಪೊಲಬು ಕೊರಿಯೆರ್.

ಈ ಪೊರ್ತುಡು ಯುವಕ ಮಂಡಲದ ಅಧ್ಯಕ್ಷೆರ್ ನಾಗೇಶ್ ಟಿ.ಜಿ, ಸುವರ್ಣ ಮಹೋತ್ಸವ ಸಮಿತಿದ ಕಾರ್ಯಾಧ್ಯಕ್ಷೆರ್ ಸುಧಾಕರ ಆರ್ ಅಮೀನ್, ರಜತ ಸೇವಾ ಟ್ರಸ್ಟ್‌ದ ಪ್ರಧಾನ ಕಾರ್ಯದರ್ಶಿ ಸ್ಟ್ಯಾನಿ ಡಿ ಕೋಸ್ತ, ಯುವಕ ಮಂಡಲದ ಪ್ರಧಾನ ಕಾರ್ಯದರ್ಶಿ ಹಿಮಕರ ಕದಿಕೆ, ಮಹಿಳಾ ಮಂಡಳಿದ ಅಧ್ಯಕ್ಷೆರ್ ರೇಷ್ಮಾ, ಯುವತಿ ಮಂಡಲದ ಅಧ್ಯಕ್ಷೆರ್ ಕುಮಾರಿ ರಶ್ವಿತ ಶೆಟ್ಟಿ ಇತ್ತೆರ್.

ಶ್ರೀ ವಿದ್ಯಾವಿನಾಯಕ ಯುವಕ ಮಂಡಲದ ಅಧ್ಯಕ್ಷೆರ್ ನಾಗೇಶ್ ಟಿ ಜಿ ಎದ್ಕೊನಿಯೆರ್. ಕಾರ್ಯದರ್ಶಿ ಹಿಮಕರ್ ಕದಿಕೆ ಸೊಲ್ಮೆ ಸಂದಾಯೆರ್. ಸಲಹಾ ಸಮಿತಿದ ಸದಸ್ಯೆರ್ ಯೋಗೀಶ್ ಪಾವಂಜೆ ಲೇಸ್ ದ ಸುಧಾರಿಕೆ ಮಲ್ತೆರ್. ಸದಸ್ಯೆರ್ ನಿತ್ಯಾನಂದ ಮೇರ್ ಧ್ವಜ ವಂದನಾ ಲೇಸ್ ನಡಪಾದ್ ಕೊರಿಯೆರ್. ಯುವತಿ ಮಂಡಲದ ನಿರ್ಮಿತ, ಕಾತ್ಯಾಯಿನಿ, ಪ್ರತೀಕ್ಷಾ, ನಿಶಾ, ಯಶಸ್ವಿ ದೇಶಭಕ್ತಿ ಗೀತೆ, ಭಾವಗೀತೆ ಪಂಡೆರ್.

ಮಾಣಿಲ ಶ್ರೀ ದುರ್ಗಾಮಹಾಲಕ್ಷ್ಮೀ ಕ್ಷೇತ್ರಡ್ ಶ್ರೀ ಲಕ್ಷ್ಮೀ ಪೂಜೆ, ವರಮಹಾಲಕ್ಷ್ಮೀ ವೃತಾಚರಣೆದ ಬೊಳ್ಳಿಪರ್ಬ ಮಹಾ ಉಚ್ಚಯ

ಬಂಟ್ವಾಳ: ಮಾಣಿಲ ಶ್ರೀ ದುರ್ಗಾಮಹಾಲಕ್ಷ್ಮೀ ಕ್ಷೇತ್ರಡ್ 48 ದಿನತ್ತ ಸಾಮೂಹಿಕ ಶ್ರೀ ಲಕ್ಷ್ಮೀ ಪೂಜೆ ಜುಲೈ 16 ಕ್ಕ್ ಸುರು ಆಯಿನ ಆ.25 ಮುಟ್ಟ, ಬೊಕ್ಕ ವರಮಹಾಲಕ್ಷ್ಮೀ ವೃತಾಚರಣೆದ ಬೊಳ್ಳಿಪರ್ಬ ಮಹಾ ಉಚ್ಚಯ ಆ.25-27 ಮುಟ್ಟ ನಡಪರೆ ಉಂಡು.

ಸಾಮೂಹಿಕ ಶ್ರೀ ಲಕ್ಷ್ಮೀ ಪೂಜೆ ಡಿ‌.ನಯನಕೃಷ್ಣ ಭಟ್ ಜಾಲ್ಸೂರ್ ಮೆರೆನ ವೈದಿಕತ್ವಡ್ ಬೊಕ್ಕ ಸಾಮೂಹಿಕ ವರಮಹಾಲಕ್ಷ್ಮೀ ವೃತಾಚರಣೆ ಶ್ರೀ ಮೋಹನದಾಸ ಪರಮಹಂಸ ಸ್ವಾಮೀಜಿಲೆನ ಮಾರ್ಗದರ್ಶನಡ್ ನಡಪರೆ ಉಂಡು.

ಅಂಚೆನೆ ಈ ಲೇಸ್ ದೊಟ್ಟಿಗೆ ನಾಗದೇವೆರೆನ ಪೂಜೆ, ಗೋಮಾತೆನ ಪೂಜೆ, ವಾಯನದಾನ, ಜೋಕುಲೆಗ್ ವನಸ್ ಕೊರ್ಪುನ, ಯಜ್ಞಯಾಗದಿಲು, ನವಗ್ರಹ ಶಾಂತಿ, ಸಾಮೂಹಿಕ ಕುಂಕುಮಾರ್ಚನೆ, ವಿಷ್ಣುಸಹಸ್ರನಾಮ ಪಠಣ, ದುರ್ಗಾಪೂಜೆ, ಆಶ್ಲೇಷಾ ಬಲಿ, ಮಹಾಪೂಜೆ, ಅನ್ನಪ್ರಸಾದ ಸೇವೆ ನಡಪರೆ ಉಂಡು.

ಈ ಮಾತ ಲೇಸ್ ಗ್ ಮಾತೆರ್ಲಾ ಬತ್ತ್ ದ್ ದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಶ್ರೀ ಮಹಾಲಕ್ಷ್ಮೀ ಮಹಿಳಾ ಸೇವಾ ಸಮಿತಿದ ಅಧ್ಯಕ್ಷೆರ್, ಸರ್ವಸದಸ್ಯೆರ್, ಶ್ರೀಧಾಮ ಮಾಣಿಲ ಶ್ರೀ ವರಮಹಾಲಕ್ಷ್ಮೀ ವೃತಾಚರಣೆ ಬೊಳ್ಳಿಪರ್ಬ ಮಹಾ ಉಚ್ಚಯ ಸಮಿತಿದ ಕಾರ್ಯದರ್ಶಿಲು, ಮಾತ ವಲಯ ಸಮಿತಿಲೆನ ಪದಾಧಿಕಾರಿಲು, ಸರ್ವಸದಸ್ಯೆರ್, ಶ್ರೀಧಾಮ ಮಿತ್ರವೃಂದ ಬೊಕ್ಕ ಶ್ರೀಧಾಮ ಸೇವಾ ಸಮಿತಿದ ಅಧ್ಯಕ್ಷೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ತುಳುನಾಡ್ ದ ಜಾನಪದ ಆಚರಣೆಲು ಭವಿಷ್ಯಗ್ ಬೊಲ್ಪು: ಡಾ.ನಿಂಗಯ್ಯ

ಸುಬ್ರಹ್ಮಣ್ಯ: ಆಧುನಿಕ ಜಂಜಾಟಡ್ ನಮ ಸಾಂಪ್ರದಾಯಿಕ ಆಚರಣೆ ಬೊಕ್ಕ ಜನಪದೀಯ ಇಚಾರಲೆನ್ ತೆರಿವೊಡು. ತುಳುನಾಡ್ ದ ಇಸೇಸ ಸಂಸ್ಕೃತಿದ ಬಗೆಟ್ಟ್ ಜವನೆರೆಗ್ ತೆರಿಪಾದ್ ಅಕ್ಲೆಡ ಜಾಗೃತಿ ಪುಟ್ಟಾವೊಡು. ಪ್ರಾಚೀನ ತುಳುನಾಡ್ ದ ಜನಪದೀಯ ಆಚರಣೆಲು ನಮ್ಮ ಭವಿಷ್ಯಗ್ ದಾರಿದೀಪ ಆವೊಡು. ಆವೆನ್ ನನದ ಪೀಳಿಗೆಲ ಬುಲೆಪಾವೊಡು ಪಂದ್ ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಕಾರ್ಯನಿರ್ವಹಣಾಧಿಕಾರಿ, ಎಸ್‌ಎಸ್‌ಪಿಯು ಕಾಲೇಜ್ ದ ಕಾರ್ಯದರ್ಶಿ ಡಾ.ನಿಂಗಯ್ಯ ಪಂಡೆರ್.

ಮೇರ್ ಮಹತೋಭಾರ ಕುಕ್ಕೆ ಶ್ರೀ ಸುಬ್ರಹ್ಮಣ್ಯ ದೇವಲ್ಯದ ಆಡಳಿತಗ್ ಸಂಬಂಧಪಟ್ಟಿನ ಎಸ್‌ಎಸ್‌ಪಿಯು ಕಾಲೇಜ್ ಡ್ ಸೋಮಾರ ನಡತಿನ ಆಟಿದ ಪರ್ಬನ್ ಉದಿಪನ ಮಲ್ತ್ ದ್ ಪಾತೆರ್ದ್, ತುಳುನಾಡ್ ದ ಆಚರಣೆಲು ಸಂಸ್ಕೃತಿದ ಜ್ಞಾನದ ಕಡಲಾತ್ಂಡ್. ಅತ್ತಂದೆ ಸಂಸ್ಕಾರಲೆನ ಅಭಿವೃದ್ದಿಗ್ ಮುಟ್ಟು ಆತ್ಂಡ್. ಪ್ರಕೃತಿ ವಿಕೃತಿ ಆನಗ ಅವೆನ್ ಪ್ರಕೃತಿರ್ದೆ ಸರಿ ಮಲ್ಪೊಡು ಪನ್ಪುನ ಜಾನಪದ ತತ್ವನ್ ಆಟಿ ತಿಂಗೊಲ್ ತೆರಿಪಾವೊಂಡು ಪಂದ್ ಪಂಡೆರ್.

ಎಸ್‌ಎಸ್‌ಪಿಯು ಕಾಲೇಜ್ ದ ಪ್ರೌಢಶಾಲಾ ವಿಭಾಗದ ಮುಖ್ಯಗುರು ಕೆ.ಯಶವಂತ ರೈ ಪಾತೆರ್ದ್, ತುಳುನಾಡ್ ದ ಆಚರಣೆಲು ಸಂಸ್ಕಾರ ಜ್ಞಾನದ ಸಂಪತ್ತ್ ಆತ್ಂಡ್. ಮುಲ್ಪ ಸಂಪ್ರದಾಯ ನಂಬಿಕೆಲು ಕಡಲ್ ದಲೆಕ್ಕ ಮಲ್ಲ ಉಂಡು. ಬದ್ ಕ್ ಗ್ ಎಡ್ಡೆಂತಿನೆನ್ ತೆರಿಪಾವುಂಡು. ಮಾನವೀಯ ಮೌಲ್ಯ ಇಪ್ಪುನ ನಿರ್ಮಲ ಮನಸ್ ಬೊಕ್ಕ ಆರೋಗ್ಯವಂತ ಜೀವನಗ್ ಹಿರಿಯೆರ್ ನಡಪಾಯಿನ ಆಚರಣೆಲೆನ್ ಏಪಲ ಅನುಕರಣೆ ಮಲ್ಪೊಡು ಪಂದ್ ಪಂಡೆರ್.

ಈ ಪೊರ್ತುಡು ಚಾವಡಿಡ್ ಕಾಲೇಜ್ ದ ಪ್ರಾಂಶುಪಾಲೆರ್ ಸೋಮಶೇಖರ ನಾಯಕ್, ಶಿಕ್ಷಕ ರಕ್ಷಕ ಸಂಘದ ಅಧ್ಯಕ್ಷೆರ್ ರಾಜೇಶ್ ಮಾವಿನಕಟ್ಟೆ, ಸಾಂಸ್ಕೃತಿಕ ಸಂಘದ ಸಂಚಾಲಕಿ ರೇಖಾರಾಣಿ ಸೋಮಶೇಖರ್, ವಿದ್ಯಾರ್ಥಿ ಸಂಘದ ಸಂಚಾಲಕೆರ್ ಜಯಪ್ರಕಾಶ್ ಆರ್, ಸಾಂಸ್ಕೃತಿಕ ಸಂಘದ ಕಾರ್ಯದರ್ಶಿ ಇತ್ತೆರ್.

ಸುರುತ್ತ ಕಲಾ ವಿಭಾಗದ ಮೌಲ್ಯ ಎದ್ಕೊನಿಯೆರ್. ರಡ್ಡನೇ ವಿಜ್ಞಾನ ವಿಭಾಗದ ಪ್ರಜ್ಞಶ್ರೀ ಲೇಸ್ ದ ಸುಧಾರಿಕೆ ಮಲ್ತೆರ್. ಸಾಂಸ್ಕೃತಿಕ ಕೂಟದ ಸಹಸಂಚಾಲಕೆರ್ ರತ್ನಾಕರ ಸುಬ್ರಹ್ಮಣ್ಯ ಸೊಲ್ಮೆ ಸಂದಾಯೆರ್. ಉಪನ್ಯಾಸಕಿ ಶ್ರುತಿ ಯಾಲದಾಳು ಬೊಕ್ಕ ಉಪನ್ಯಾಸಕೆರ್ ಶ್ರೀಧರ್ ಪುತ್ರನ್ ಸಹಕಾರ ಕೊರಿಯೆರ್.