Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಏರೋ ಮಲ್ತಿನ ತಪ್ಪುಗ್ ಕಡಬದ ಯುವಕೆ ಸೌದಿಡ್ ಜೈಲ್ ಪಾಲ್….!!!

ಕಡಬ ತಾಲೂಕ್ ದ ಊತ್ತೂರು ಗ್ರಾಮದ ಮುಜೂರು ದಿ. ಕೆಂಚಪ್ಪ ಗೌಡ ಬೊಕ್ಕ ಹೇಮಾವತಿ ದಂಪತಿನ ಮಗೆ ಚಂದ್ರಶೇಖರ್ ಎಮ್. ಕೆ ಮೇರ್ ರಿಯಾದ್ (ಸೌದಿ ಅರೇಬಿಯಾ) ಅಲ್ಪಾನರ್ ಸೆರಾಮಿಕ್ಸ್ ಪನ್ಪುನ ಕಂಪನಿಡ್ ಕೆಲಸ ಮಲ್ತೊಂದು ಇತ್ತೆರ್. ಹ್ಯಾಕರ್ ನ ಮೋಸದಾಟಗ್ ತಿಕ್ಕಿನ ಚಂದ್ರಶೇಖರ್ ಇತ್ತೆ ಜೈಲ್ ಡ್ ಲಾಕ್ ಆತೆರ್. 2022 ನವೆಂಬರ್‌ರ್ದ್ ರಿಯಾದ್ ಜೈಲ್‌ಡೆ ದಿನ ಕಳೆಯೊಂದು ಉಲ್ಲೆರ್.

ಚಂದ್ರಶೇಖರ್ ಕರಿನ ವರ್ಷ ಮೊಬೈಲ್ ಬೊಕ್ಕ ಸಿಮ್ ದೆತೊನಿಯೆರೆ ರಿಯಾದ್ ಡ್ ಇಪ್ಪುನ ಮೊಬೈಲ್ ಅಂಗಡಿಗ್ ಪೋದ್ ಇತ್ತೆರ್. ಈ ಪೊರ್ತುಡು ಚಂದ್ರಶೇಖರ್ ಅರೆರ್ದ್ 2 ಸಲ ತಂಬ್‌ನ್ ದೆತೊಂದೆರ್. ಒಂಜಿ ವಾರದ ಬೊಕ್ಕ ಆ ಮೊಬೈಲ್ ನಂಬರ್‌ಗ್ ಅರೆಬೀಕ್ ಭಾಷೆಡ್ ಮೆಸೇಜ್ ಬತ್‌ಂಡ್ ಮೆಸೇಜ್‌ನ್ ಕ್ಲಿಕ್ ಮಲ್ತಿನ ಚಂದ್ರಶೇಖರ್ ಸಿಮ್ ದ ಬಗೆಟ್ ಮಾಹಿತಿ ಬೊಕ್ಕ ಓಟಿಪಿ ನ್ ಕೆಂಡೆರ್. ಓಟಿಪಿ ಪನ್ನ ಚಂದ್ರಶೇಖರ್ ಬೊಕ್ಕ ಕೆಲಸಗ್ ಪೋಯೆರ್. ನೆತ್ತ ಒಟ್ಟಿಗೆ ತನ್ನ ಎಂಗೇಜ್ಮೆಂಟ್‌ದ ಬೇಲೆಡ್ ಒಂತೆ ಬ್ಯುಸಿ ಆದ್ ಇತ್ತೆರ್. ನೆತ್ತ ನಡುಟ್ ಒಂಜಿ ದಿನ ಒರಾನೆ ಪೊಲೀಸೆರ್ ಬತ್ತ್ ದ್ ಚಂದ್ರಶೇಖರ್‌ ಮೆರೆನ್ ಅರೆಸ್ಟ್ ಮಲ್ತೆರ್.

ರಿಯಾದ್ ದೇಶದ ಚಂದ್ರಶೇಖರ್ ಅರೆಗ್ ಗೊತ್ತಿಜಂದೆ ಅಲ್ಪದ ಬ್ಯಾಂಕ್ ಒಂಜೆಟ್ ಅಕೌಂಟ್ ಮಲ್ತ್ ಇತ್ತೆರ್. ಬೊಕ್ಕ ಅವ್ವೇ ದೇಶದ ಪೊಂಜೊವ್‌ನ 22 ಸಾವಿರ ಈ ಖಾತೆಗ್ ಜಮೆ ಆಯಿನ ಕೂಡ್ಲೆ ಅವೆರ್ದ್ ಬೇತೆ ದೇಶಗ್ ವರ್ಗಾವಣೆ ಆದ್ ಇತ್ತ್ಂಡ್. ಕಾಸ್ ಕಳೆವೊನ್ನ ಪೊಂಜೊವ್ ಚಂದ್ರಶೇಖರ್‌ನ ಖಾತೆಗ್ ಜಮೆ ಆಯಿನೆನ್ ಗಮನಿಸಾದ್ ಅರೆನ ಮಿತ್ತ್ ದೂರು ಕೊರ್ತೆರ್. ಅಂಚಾದ್ ಪೊಲೀಸೆರ್ ಚಂದ್ರಶೇಖರ್‌ನ್ ಅರೆಸ್ಟ್ ಮಲ್ತ್ ದೆರ್. ಹ್ಯಾಕರ್ ನ ಕಿರುಕುಳರ್ದ್ ಚಂದ್ರಶೇಖರ್ ಜೈಲ್‌ಡ್ ಬಂಧಿ ಆತೆರ್. ಮಗೆ ಬರ್ಪೆ ಪಂದ್ ಅಪ್ಪೆ ಪಕ್ಕಿದಂಚ ಕಾತೊಂದು ಕುಲ್ದೆರ್. ಮಗನ್ ಬುಡ್ಪಾಯೆರೆ ಕರಿನ 8 ತಿಂಗೊಲ್‌ರ್ದ್ ಬಂಗ ಬರೊಂದು ಉಲ್ಲೆರ್. ಚಂದ್ರಶೇಖರ್ ಬೇಲೆ ಮಲ್ತೊಂದು ಇತ್ತಿನ ಕಂಪನಿಲ ನೆತ್ತ ಬಗ್ಗೆ ಒವ್ವೇ ಮಾಹಿತಿಲ ಪನಂದೆ ಅನ್ಯಾಯ ಮಲ್ತೆರ್ ಪಂದ್ ಅಪ್ಪೆ ಕಣ್ಣ ನೀರ್ ಪಾಡೊಂದುಲ್ಲೆರ್.

ಚಂದ್ರಶೇಖರ್ ಮೇರೆನ್ ಜೈಲ್‌ರ್ದ್ ಬುಡ್ಪಾಯೆರೆ ಕೇಂದ್ರ ಸರಕಾರ, ವಿದೇಶಾಂಗ ಸಚಿವೆರ್ ಒತ್ತಡ ಪಾಡೊಡು ಪಂದ್ ದ.ಕ. ಜಿಲ್ಲಾಧಿಕಾರಿನ ಮುಖೇನ ಮನವಿ ಸಲ್ಲಿಸಾದೆರ್. ಈ ಮುಖೇನ ಒವ್ವೆ ತಪ್ಪು ಮಲ್ಪಂದೆ ಸೆರೆವಾಸ ಅನುಭವಿಸೊಂದು ಇಪ್ಪುನ ಚಂದ್ರಶೇಖರ್‌ಗ್ ನ್ಯಾಯ ಒದಗಾವುನಂಚ ಎಂಡೊ ವಿರೋಧಿ ಹೋರಾಟ ಸಮಿತಿ ಆಗ್ರಹಿಸಾದುಂಡು.

ಇನಿ ಬಿಜೆಪಿ ಸಭೆ

ರಾಜ್ಯ ಸರ್ಕಾರ NEP ಕ್ಯಾನ್ಸಲ್ ಮಲ್ತಿನ ಬಗೆಟ್ಟ್ ಬೊಕ್ಕ ಶಿಕ್ಷಣ ಕ್ಷೇತ್ರಡ್ CSR ಹೂಡಿಕೆ ಇಚಾರ ಸೇರಿನಂಚೆನೆ ಸಿದ್ದರಾಮಯ್ಯ ಮೆರೆನ ಸರ್ಕಾರದ ಬೇತೆ ಬೇತೆ ನಿರ್ಧಾರಲೆನ ಬಗೆಟ್ಟ್ ಚರ್ಚೆ ನಡಪಾಯೆರೆ ಬಿಜೆಪಿ ವಿಧಾನಪರಿಷತ್ ಸದಸ್ಯೆರ್, ಮಾಜಿ ಸಚಿವೆರ್ ಬೊಕ್ಕ ಶಿಕ್ಷಣ ಕ್ಷೇತ್ರದ ತಜ್ಞೆರ್ ಸಭೆ ನಡಪಾಯೆರೆ ಉಲ್ಲೆರ್.

ಇನಿ ನಡಪುನ ಈ ಸಭೆಟ್ಟ್ ‌ಮಾಜಿ ಶಿಕ್ಷಣ ಸಚಿವೆರ್ ಬಿಸಿ ನಾಗೇಶ್, ಮಾಜಿ ಸಚಿವೆರ್ ಕೋಟಾ ಶ್ರೀನಿವಾಸ ಪೂಜಾರಿ, ಮಾಜಿ ಸ್ಪೀಕರ್‌ ವಿಶ್ವೇಶ್ವರ ಹೆಗಡೆ ಕಾಂಗೇರಿ‌ ಮೊಕುಲು ಪಾಲ್ ಪಡೆಯೆರೆ ಉಲ್ಲೆರ್.

ಒಂಜೇ ಜಿಲ್ಲೆಡ್ 13 ಸರ್ಕಾರಿ ಶಾಲೆಲು ಬಂದ್

ಜೋಕುಲೆನ ಹಾಜರಾತಿ ಸೊನ್ನೆ ಇಪ್ಪುರ್ನೆದಾವೆರ ಚಾಮರಾಜನಗರ ಜಿಲ್ಲೆದ 13 ಸರ್ಕಾರಿ ಪ್ರಾಥಮಿಕ ಶಾಲೆನ್ ಸರ್ಕಾರ ಮುಚ್ಚಿದ್ಂಡ್ ಪಂದ್ ಶಿಕ್ಷಣ ಇಲಾಖೆದ ಉಪ ನಿರ್ದೇಶಕೆರ್ ರಾಮಚಂದ್ರ ರಾಜೇ ಅರಸ್ ತೆರಿಪಾದೆರ್.

ಶಾಲೆಡ್ ಮೂಲಭೂತ ಸೌಕರ್ಯ ಇಜ್ಜಂದಿರ್ನೆದಾವೆರ ಜೋಕುಲೆನ್ ಸರ್ಕಾರಿ ಶಾಲೆಗ್ ಸೇರ್ಸಾಯೆರೆ ಪೋಷಕೆರ್ ಪಿರ ಜಾರೊಂದು ಉಲ್ಲೆರ್. ಅಂಚಾದ್ ಸರ್ಕಾರ ಮೂಲಭೂತ ಸೌಕರ್ಯನ್ ಎಚ್ಚ ಮಲ್ತ್ಂಡ ಜೋಕುಲೆನ ಹಾಜರಾತಿ ಎಚ್ಚಾಪುಂಡು. ಈ ಬಗೆಟ್ಟ್ ಸರ್ಕಾರಗ್ ತೆರಿಪಾದ್ಂಡ್ ಪಂದ್ ಪಂಡೆರ್.

ಇನಿ ಸೋಣದ ಸುರುತ್ತ ಸುಕ್ರಾರ

ಇನಿ ಸೋಣದ ಸುರುತ್ತ ಸುಕ್ರಾರ. ಮುತ್ತೈದೆರೆಗ್ ಮಸ್ತ್ ಇಸೇಸವಾಯಿನ ದಿನ ಆತ್ಂಡ್. ಇನಿ ಮೊಕುಲು ಲಕ್ಷ್ಮೀ ವ್ರತನ್ ಮಲ್ಪುವೆರ್.

ಈ ದಿನ ಲಕ್ಷ್ಮೀನ್ ಆರಾಧನೆ ಮಲ್ತ್ಂಡ ಇಲ್ಲಲ್ ಸಂಪತ್ತ್ ಎಚ್ಚಾಪುಂಡು. ‌ಆರ್ಥಿಕ ಸಂಕಷ್ಟ ಇತ್ತಿನಕುಲು ಉಪವಾಸ ಇತ್ತ್ ದ್, ಲಕ್ಷ್ಮೀ ದೇವಿನ್ ಪೂಜೆ ಮಲ್ಪುವೆರ್. ಇಂಚಾ ಮಲ್ತ್ಂಡ, ದಾರಿದ್ರ್ಯ ದೂರವಾದ್ ಕೆಲಸ ಕಾರ್ಯಲು ಯಶಸ್ವಿಯಾದ್ ಆಪುಂಡು. ಸಂಪತ್ತ್ ಎಚ್ಚಾಪುಂಡು ಪಂದ್ ಶಾಸ್ತ್ರಜ್ಞೆರ್ ಪನ್ಪೆರ್.

ಡಿಸೆಂಬರ್ ಡ್ ಪ್ರೊ ಕಬಡ್ಡಿ ಪಂತೊ

ಪ್ರೊ ಕಬಡ್ಡಿ ಲೀಗ್ ದ 10 ನೇ ಸೀಸನ್ ಈ ವರ್ಷದ ಡಿಸೆಂಬರ್ 2 ರ್ದ್ ಸುರು ಆಪುಂಡು ಪಂದ್ ಲೀಗ್ ದ ಕಮಿಷನರ್ ಅನುಪಮ್ ಗೋಸ್ವಾಮಿ ತೆರಿಪಾದೆರ್.

ಈ ಸರ್ತಿದ ಪ್ರೊ ಕಬಡ್ಡಿ ಸೀಸನ್ ದ ವೇಳಾಪಟ್ಟಿನ್ ಆಯಿನಾತ್ ಬೇಗಡೇ ಬುಡುಗಡೆ ಮಲ್ಪುವ. ಈ ಸರ್ತಿ ದೇಶದ 12 ನಗರಡ್ ಪಿಕೆಎಲ್ ಪಂತೊನ್ ಆಯೋಜನೆ ಮಲ್ಪುನ ವ್ಯವಸ್ಥೆ ಮಲ್ಪರೆ ಉಂಡು ಪಂದ್ ಪಂತೆರ್.

NTR ಚಿತ್ರ ಇಪ್ಪುನ 100 ರೂ. ಪಾವೊಲಿ ಬುಡುಗಡೆ

ತೆಲುಗು ದೇಶಂ ಪಕ್ಷದ ಸಂಸ್ಥಾಪಕೆರ್, ನಟೆ ದಿ.ಎನ್ ಟಿ ರಾಮರಾಮ್ ಮೆರೆನ ಜನ್ಮ ಶತಮಾನೋತ್ಸವದ ಅಂಗವಾದ್ ಮೆರೆನ ಚಿತ್ರ ಇಪ್ಪುನ 100 ರೂ.ದ ಪಾವೊಲಿನ್ ಬುಡುಗಡೆ ಮಲ್ಪರೆ ಉಲ್ಲ ಪಂದ್ ಮೆರೆನ ಮಗಲ್ ಪುರಂದೇಶ್ವರಿ ಪಂಡೆರ್.

ಆ.28 ಕ್ಕ್ ಡೆಲ್ಲಿಡ್ ನಡಪರೆ ಇಪ್ಪುನ ಲೇಸ್ ಡ್ ರಾಷ್ಟ್ರಪತಿ ದ್ರೌಪದಿ ಮುರ್ಮು ಮೇರ್ ಈ ಪಾವೊಲಿನ್ ಬುಡುಗಡೆ ಮಲ್ಪರೆ ಉಲ್ಲೆರ್. ಬುಡುಗಡೆ ಆಪುನ ಈ ಪಾವೊಲಿಡ್ 50% ಬೊಳ್ಳಿ, 40% ತಾಮ್ರ, 5% ನಿಕಲ್, ಬೊಕ್ಕ 5% ಸತು ಉಂಡು.

ಮಾಜಿ ಶಾಸಕ ವಸಂತ ಬಂಗೇರ ಡಿ.ಕೆ ಶಿವಕುಮಾರ್ ಭೇಟಿ

ಬೊಲ್ತೆರ್: ಮಾಜಿ ಶಾಸಕೆರ್ ವಸಂತ ಬಂಗೇರ ಕರ್ನಾಟಕ ರಾಜ್ಯ ಸರಕಾರದ ಉಪಮುಖ್ಯಮಂತ್ರಿ ಬೊಕ್ಕ ಕೆಪಿಸಿಸಿ ಅಧ್ಯಕ್ಷೆರಾಯಿನ ಡಿ.ಕೆ ಶಿವಕುಮಾರ್ ಮೇರೆನ್ ಆ.17 ದಾನಿ ಭೇಟಿ ಮಲ್ತೆರ್.

ತಾಲೂಕುದ ಅಭಿವೃದ್ಧಿ ಕಾರ್ಯದ ಬಗ್ಗೆ ಬೊಕ್ಕ ಪಕ್ಷ ಸಂಘಟನೆದ ಬಗ್ಗೆ ಚರ್ಚೆ ಮಲ್ತೆರ್.

ಕೆಮ್ರಾಲ್ ಗ್ರಾ.ಪಂ ಗುರ್ಕಾರೆ ಆದ್ ಮಯ್ಯದ್ದಿ ಪಕ್ಷಿಕೆರೆ ಒತ್ತು ಗುರ್ಕಾರ್ದಿ ಆದ್ ಶೋಭಾ ಆಯ್ಕೆ

ಮೂಲ್ಕಿ: ಕೆಮ್ರಾಲ್ ಗ್ರಾ.ಪಂ ದ ರಡ್ಡನೇ ಅವಧಿದ ಗುರ್ಕಾರೆ ಆದ್ ಕಾಂಗ್ರೆಸ್ ದ ಮಯ್ಯದ್ದಿ ಪಕ್ಷಿಕೆರೆ ಬೊಕ್ಕ ಒತ್ತು ಗುರ್ಕಾರ್ದಿ ಆದ್ ಬಿಜೆಪಿದ ಶೋಭಾ ಮೇರ್ ಆಯ್ಕೆ ಆತೆರ್.

ಈ ಪಂಚಾಯತ್‌ಡ್ ಒಟ್ಟು 17 ವಾರ್ಡ್ ಇತ್ತ್ ದ್ 10 ಕಾಂಗ್ರೆಸ್ ಬೆಂಬಲಿತ ಅಭ್ಯರ್ಥಿ, 7 ಬಿಜೆಪಿ ಬೆಂಬಲಿತ ಅಭ್ಯರ್ಥಿ ಉಲ್ಲೆರ್. ಸರಕಾರದ ನಿಯಮದಂಚ ಗುರ್ಕಾರೆ ಸ್ಥಾನಗ್ ಹಿಂದುಳಿದ ವರ್ಗ(ಎ) ಸ್ಥಾನಗ್ ಮೀಸಲ್ ಇತ್ತ್ ದ್ ಗುರ್ಕಾರೆ ಸ್ಥಾನಗ್ ನಡತಿನ ಚುನಾವಣೆಡ್ ಕಾಂಗ್ರೆಸ್ ಅಭ್ಯರ್ಥಿ ಮಯ್ಯದ್ದಿ ಮೇರ್ ಬಿಜೆಪಿ ಅಭ್ಯರ್ಥಿ ಮಾಲತಿನ್ 11-6 ವೋಟ್‌ಡ್ ಸೋಲ್ಪಾದ್ ಗೆಂದಿಯೆರ್. ಬಿಜೆಪಿ ಬೆಂಬಲಿತ ಅಭ್ಯರ್ಥಿ ಕಾಂಗ್ರೆಸ್ ಬೆಂಬಲಿತ ಅಭ್ಯರ್ಥಿಗ್ ವೋಟ್ ಪಾಡ್ದುನವು ವಿಶೇಷ.

ಚುನಾವಣಾ ಅಧಿಕಾರಿಯಾದ್ ವಯಸ್ಕರ ಶಿಕ್ಷಣಾಧಿಕಾರಿ ಲೋಕೇಶ್ ಸಿ, ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಅರುಣ್ ಪ್ರದೀಪ್ ಡಿಸೋಜಾ, ಕಾರ್ಯದರ್ಶಿ ಕೇಶವ ದೇವಾಡಿಗ ಈ ಪೊರ್ತುಡ್ ಸಹಕಾರ ಕೊರ್ತೆರ್.

ಪಡಿತರ ಚೀಟಿ ತಿದ್ದುಪಡಿಗ್ ಅವಕಾಶ

ಪಡಿತರ ಚೀಟಿ ತಿದ್ದುಪಡಿಗ್ ಅರ್ಜಿ ಸಲ್ಲಿಸಾಯೆರೆ ಆ.18 ರ್ದ್ ಆ.21 ಮುಟ ಮದ್ಯಾಹ್ನ 12 ಗಂಟೆರ್ದ್ ಬಯ್ಯ 4 ಗಂಟೆ ಮುಟ ಅವಕಾಶ ಕಲ್ಪಿಸಾದೆರ್.

ಆ.18, ಆ.19 ದಾನಿ ತುರ್ತು ಚಿಕಿತ್ಸೆಗಾದ್ ಬಿಪಿಎಲ್ ಕಾರ್ಡ್ ಡ್ ಪುದರ್ ಸೇರ್ಪಾಯಿನ ಅರ್ಜಿದ ವಿಲೇವಾರಿಗ್ ಆಯಾ ತಾಲೂಕುದ ಆಹಾರ ನಿರೀಕ್ಷೆಕೆರೆಗ್ ಅವಕಾಶ ಕಲ್ಪಿಸಾದೆರ್.

ಆ.27: ಕೊರಮ್ಮ ತುಳು ಪಿಚ್ಚರ್ ಬೆಂಗ್ಲೂರ್ ಡ್ ಬುಡುಗಡೆ

ಶಿವಧ್ವಜ್ ಶೆಟ್ಟಿ ಕಥೆ, ಚಿತ್ರಕಥೆ, ನಿರ್ದೇಶನದ ಕೊರಮ್ಮ ತುಳು ಪಿಚ್ಚರ್ ಆಗಸ್ಟ್ 27 ಕ್ಕ್ ಕಾಂಡೆ 11ಗಂಟೆರ್ದ್ ಮಧ್ಯಾಹ್ನ 3 ಗಂಟೆ ಮುಟ್ಟ ಬಂಟರಸಂಘ ವಿಜಯನಗರದ ಬೆಂಗ್ಲೂರ್ ಡ್ ಬುಡುಗಡೆ ಆಯೆರೆ ಉಂಡು.

ಈ ಪಿಚ್ಚರ್ ಗ್ ಈಶ್ವರಿದಾಸ್ ಶೆಟ್ಟಿ, ರಾಜೇಶ್ವರಿ ರೈ ನಿರ್ಮಾಪಕೆರಾತೆರ್. ಕ್ಯಾಮರ ಮ್ಯಾನ್ ಸುರೇಶ್ ಬೈರಸಂದ್ರ, ಸಂಗೀತ ಶಿನೋಯ್ ವಿ ಜೋಸೆಫ್, ಸಂಕಲನ ಗಣೇಶ್ ನೀರ್ಚಾಲ್, ಸಂಭಾಷಣೆ ಶ್ರೀನಿಧಿ ಡಿ.ಎಸ್, ಅನುವಾದ ಬೊಕ್ಕ ಸಾಹಿತ್ಯ ಕೆ. ಮಹೇಂದ್ರನಾಥ್ ಸಾಲೆತ್ತೂರ್, ಕಲೆ ಸಂತೋಷ್ ಪೂಜಾರಿ ವೇಣೂರ್, ಸಹ ನಿರ್ದೇಶನ ಹರ್ಸಿವ್ ಭಗೀರ, ಪ್ರಸಾದನ ಕುಮಾರ್ ನೊಣವಿನಕೆರೆ, ನಿರ್ಮಾಣ, ನಿರ್ವಹಣೆ ವೀರೇಶ್ ಎಸ್ ಎ, ಕಲೆ ಪರಿಕಾರಲು ಸುಧಾಕರ ಶೆಟ್ಟಿ, ಪ್ರಚಾರ ವಿನ್ಯಾಸ ಯಶ್ವಿನ್ ಕೆ. ಶೆಟ್ಟಿಗಾರ್ ಮಲ್ದೆರ್.

You Missed