Tue. Nov 17th, 2026

ಟೈಮ್ಸ್ ಆಫ್ ಕುಡ್ಲ ತುಳು ನ್ಯೂಸ್ Times of Kudla Tulu News

ಆನೇಕಲ್: 3 ಶಾಲೆದ ಜೋಕುಲೆಗ್ ಯುನಿಫಾರ್ಮ್ ಪಟ್ಟುನ ಲೇಸ್

ಬೆಂಗ್ಲೂರು : 77 ನೇ ಸ್ವಾತಂತ್ರ್ಯ ದಿನಾಚರಣೆದ ಲೆಕ್ಕೊಡು ಬೆಂಗ್ಲೂರ್ ದ ಆನೇಕಲ್ ತಾಲೂಕ್ ದ 3 ಶಾಲೆದ ಜೋಕುಲೆಗ್ ಶಾಲೆಗ್ ಬೋಡಾಯಿನ ಸೊತ್ತುಲೆನ್ ಆ.15 ಕ್ಕ್ ಪಟ್ಟುನ ಲೇಸ್ ನಡತ್ಂಡ್.

ಸ.ಹಿ.ಪ್ರಾ.ಶಾಲೆ ಸಮಂದೂರುದ ಜೋಕುಲೆಗ್ ಯುನಿಫಾರ್ಮ್, ಟೈ, ಬೆಲ್ಟ್, ಬ್ಯಾಗ್, ಸ್ಟೀಲ್ ದ ಬಟ್ಟಲ್, ನೀರ್ ದ ಬಾಟಲ್, ನೋಟ್ ಬುಕ್, ಲೇಖನ ಸಾಮಗ್ರಿ, ಜಾಮೆಟ್ರಿ ಬಾಕ್ಸ್ ಬೊಕ್ಕ ಕೆಲವು ಪಂತೊಡು ಗೆಂದಿನಕ್ಲೆಗ್ ಇನಾಮುನ್ ಪಟ್ಟಿಯೆರ್.

ಸ.ಕಿ.ಪ್ರಾ. ಶಾಲೆ ಪಂಪ್ ಹೌಸ್, ಆನೇಕಲ್ ಟೌನ್ ಬೊಕ್ಕ ಸ.ಕಿ.ಪ್ರಾ.ಶಾಲೆ ಗಾಂಧಿನಗರದ ಜೋಕುಲೆಗ್ ಯುನಿಫಾರ್ಮ್, ಟೈ, ಬೆಲ್ಟ್, ಜಾಮಿಟ್ರಿ ಬಾಕ್ಸ್ ನ್ ಕೊರಿಯೆರ್.

ಸವಿತಾ ಸುಧಾಕರ್ ಶೆಟ್ಟಿ ಮೆರೆನ ಮುತಾಲಿಕೆಡ್, ಸುಧಾಕರ್ ಶೆಟ್ಟಿ, ಮುಯೂರ್ ಶೆಟ್ಟಿ, ಜಯದೀಪ್ ಬಂಟ್ವಾಳ, ಪ್ರಶಾಂತ್ ನಾಯ್ಕ್, ಸುನಿಲ್ ಅರಂಘಟ್, ಶ್ರೀರಾಜ್ ಶೆಟ್ಟಿ, ಪ್ರವೀಣ್ ಆರ್, ಪ್ರೀತಿ ಶ್ರೀನಿವಾಸ್ ಜೋಯಿಸ್, ವಿದ್ಯಾ, ಹರೀಶ್ ಶೆಟ್ಟಿ, ಶಂಕರ್ ಮುಲ್ಕಿ, ಶೈಲೇಶ್ ಶೆಟ್ಟಿ ಬೊಕ್ಕ ಸಂಪತ್ ಶೆಟ್ಟಿ ಮೊಕುಲು ಸಕಾಯ ಮಲ್ದೆರ್.

ಅಮೃತಸಂಜೀವಿನಿ ಸಂಸ್ಥೆದ 8ನೇ ವರ್ಷೊದ ಉಚ್ಚಯದ ಲೆಕ್ಕೊಡು 12 ಬಡಪತ್ತ್ ದ ಕುಟುಂಬಗ್ ಪನವುದ ಸಕಾಯ

ಕುಡ್ಲ : ಅಮೃತಸಂಜೀವಿನಿ (ರಿ.) ಸಂಸ್ಥೆದ 8ನೇ ವರ್ಷೊದ ವಾರ್ಷಿಕ ಉಚ್ಚಯದ ಲೆಕ್ಕೊಡು 12 ಬಡಪತ್ತ್ ದ ಕುಟುಂಬಗ್ ಬೊಕ್ಕ ಹನುಮ ಬಾಲಸಂರಕ್ಷಣಾ ಕೇಂದ್ರ ಗುರುಪುರದ ಆಶ್ರಮಗ್ ಒಟ್ಟು 3 ಲಕ್ಷದ 75 ಸಾರ ರೂ. ಪನವುದ ಸಹಾಯನ್ ವಜ್ರದೇಹಿ ಮಠಟ್ಟ್ ಮಲ್ತೆರ್.‌

ಸಂಸ್ಥೆದ ಮಾರ್ಗದರ್ಶಕೆರ್ ಶ್ರೀ ರಾಜಶೇಖರಾನಂದ ಸ್ವಾಮೀಜಿಲು ಆಶೀರ್ವಚನ ಕೊರ್ದು ಎಡ್ಡೆಪ್ಪು ಬಯಕಿಯೆರ್. ಈ ಪೊರ್ತುಡು ಅಮೃತ ಸಂಜೀವಿನಿದ ಸದಸ್ಯೆರ್ ಇತ್ತೆರ್.

ಮೀನ್ ತಿಂದ್ಂಡ ಐಶ್ವರ್ಯ ರೈಲೆಕ ಕಣ್ಣ್ !

ಮಾಜಿ ಭುವಮ ಸುಂದರಿ, ಬಾಲಿವುಡ್ ನಟಿ, ಐಶ್ವರ್ಯ ರೈ ಮೆರೆನ ಪೊರ್ಲುದ ಕಣ್ಣ್ ಲೆನ ಬಗೆಟ್ಟ್ ಮಹಾರಾಷ್ಟ್ರ ಸಚಿವೆರ್ ವಿಜಯ್ ಕುಮಾರ್ ಗವಿತ್ ಕೊರ್ನ ಹೇಳಿಕೆ ಇತ್ತೆ ಸಂಚಲನಗ್ ಕಾರಣ ಆತ್ಂಡ್.

ಮೀನ್ ತಿಂದ್ಂಡ ಐಶ್ವರ್ಯ ರೈ ಲೆಕ್ಕ ಪೊರ್ಲುದ ಕಣ್ಣ್ ಪಡೆವೊಲಿ ಪಂದ್ ಮೇರ್ ಪಂತೆರ್. ಐಶ್ವರ್ಯ ರೈ ಪ್ರತಿದಿನೊಲ ಮೀನ್ ತಿನ್ಪೆರ್. ಅಂಚಾದ್ ಪೊರ್ಲುದ ಕಣ್ಣ್ ಉಂಡು. ಮೇರ್ ದುಂಬು ಕುಡ್ಲಡ್ ಇತ್ತೆರ್. ಮೀನ್ ತಿಂ‌ದಿನೆರ್ದೆ ಮೆರೆನ ಕಣ್ಣ್ ಅಂಚ ಉಂಡು ಪಂದ್ ಪಂತೆರ್.

ರಾಷ್ಟ್ರೀಯ ಬಿಲ್ಲವರ ಮಹಾಮಂಡಲದ ಅಧ್ಯಕ್ಷೆರಾದ್ ರಾಜಶೇಖರ ಕೋಟ್ಯಾನ್ ಆಯ್ಕೆ

ಮುಲ್ಕಿ: ಬಿಲ್ಲವರ ಮಹಾಮಂಡಲದ 2022 – 23ನೇ ವರ್ಷದ ವಾರ್ಷಿಕ ಮಹಾಸಭೆ ಆ. 20 ಐತಾರ ಬೊಲ್ಪುಗು ಮಹಾಮಂಡಲದ ಚಾವಡಿಡ್ ಅಧ್ಯಕ್ಷೆರ್ ಡಾ. ರಾಜಶೇಖರ್ ಕೋಟ್ಯಾನ್ ಮೆರೆನ ಗುರ್ಕಾರ್ಮೆಡ್ ನಡತ್ಂಡ್.

ಸುರುಕ್ಕು ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ ಭಾವಚಿತ್ರಗ್ ಬೊಲ್ಪು ಅರ್ಲಾದ್ , ಪ್ರಾರ್ಥನೆ ಮಲ್ತ್ ದ್ ಸಭೆ ಸುರುಮಲ್ತೆರ್.

ಗೌರವ ಪ್ರಧಾನ ಕಾರ್ಯದರ್ಶಿ ವಿಜಯ ಕುಮಾರ್ ಕುಬೆವೂರು ವಾರ್ಷಿಕ ವರದಿನ್ ಓದು ಪಂಡೆರ್. ಕೋಶಾಧಿಕಾರಿ ಕೆ ಪ್ರಭಾಕರ ಬಂಗೇರ ಕಾರ್ಕಳ ವಾರ್ಷಿಕ ಲೆಕ್ಕಪತ್ರ ಬೊಕ್ಕ ಮುಂಗಡ ಪತ್ರ ಓದಿಯೆರ್ .

ಈ ಪೊರ್ತುಡು ಸಮಾಜ ಸೇವಕೆರ್, ಅತ್ಯುತ್ತಮ ಸಂಘಟಕೆರ್ ಚಿಕ್ಕಮಗಳೂರು ಶಿರವಾಸೆ ವಾಸು ಪೂಜಾರಿ ಮೆರೆನ್ ಬಿಲ್ಲವ ಸಂಘಟನಾ ಚತುರ ಪ್ರಶಸ್ತಿ ಕೊರ್ದು ಮಾನಾದಿಗೆ ಮಲ್ತೆರ್.

ಪದ್ಮರಾಜ್ ಆರ್. ಮಂಗಳೂರು , ಬಿ. ಎನ್. ಶಂಕರ ಪೂಜಾರಿ ಕಟ್ಪಾಡಿ ಅಭಿಪ್ರಾಯ ಪಟ್ಟೊಂಡೆರ್. ದುಂಬುದ 2 ವರ್ಷದ ಅವಧಿಗ್ 30 ಸದಸ್ಯೆರ್ನ ಕಾರ್ಯಕಾರಿ ಸಮಿತಿ ರಚನೆ ಮಲ್ತೆರ್.

ಅಧ್ಯಕ್ಷೆರಾದ್ ಡಾ. ರಾಜಶೇಖರ್ ಕೋಟ್ಯಾನ್ ಪಿರ ಆಯ್ಕೆ ಆಯೆರ್. ಉಪಾಧ್ಯಕ್ಷೆರಾದ್ ಸೂರ್ಯಕಾಂತ್ ಜಯ ಸುವರ್ಣ ಬೊಕ್ಕ ಹರೀಶ್ ಡಿ ಸಾಲ್ಯಾನ್ ಬಜೆಗೋಳಿ, ಗೌರವ ಪ್ರಧಾನ ಕಾರ್ಯದರ್ಶಿಯಾದ್ ಬಾಳ ಗಂಗಾಧರ ಪೂಜಾರಿ ಚೇಳಾಯಿರು, ಜೊತೆ ಕಾರ್ಯದರ್ಶಿಲಾದ್ ಗಣೇಶ್ ಪೂಜಾರಿ ಗಂಜಿಮಠ ಬೊಕ್ಕ ಶಿವಾಜಿ ಸುವರ್ಣ ಬೆಳ್ಳೆ, ಕೋಶಾಧಿಕಾರಿಯಾದ್ ಕೆ. ಪ್ರಭಾಕರ ಬಂಗೇರ ಕಾರ್ಕಳ, ಜೊತೆ ಕೋಶಾಧಿಕಾರಿ ಗಣೇಶ ಎಲ್. ಪೂಜಾರಿ ಬೈಂದೂರ್ ಆಯ್ಕೆ ಆತೆರ್.

ಆಯ್ಕೆ ಪ್ರಕ್ರಿಯೆನ್ ಚಂದ್ರಶೇಖರ ಸುವರ್ಣ ಮೈಸೂರು ಬೊಕ್ಕ ಹರಿಶ್ಚಂದ್ರ ಅಮೀನ್ ಕಟ್ಪಾಡಿ ನಡಪಾದ್ ಕೊರಿಯೆರ್. ಜೊತೆ ಕಾರ್ಯದರ್ಶಿ ಗಣೇಶ್ ಎಲ್ ಪೂಜಾರಿ ಬೈಂದೂರು ಸೊಲ್ಮೆ ಸಂದಾಯೆರ್.

ಮಂಜೇಶ್ವರ ಶ್ರೀ ಕೀರ್ತೇಶ್ವರ ದೇವಸ್ಥಾನದ ಜೀರ್ಣೋದ್ಧಾರದ ವಿಜ್ಞಾಪನಾ ಪತ್ರ ಬುಡುಗಡೆ, ನಿಧಿ ಸಂಗ್ರಹಗ್ ಚಾಲನೆ

ಮಂಜೇಶ್ವರ: ಇತ್ತೆದ ಕಾಲಘಟ್ಟಡ್ ಅಜೀರ್ಣಾವಸ್ಥೆಡ್ ಅನೇಕ ದೈವ, ದೇವಸ್ಥಾನಲು ಆದ್ ಊರುಡು ಅಭಿವೃದ್ಧಿನ್ ತೋಜಿದುಂಡು. ಅನೇಕ ಕುಟುಂಬಲು ನೆಮ್ಮದಿದ ಜೀವನ ನಡಪಾವೊಂದುಂಡು. ಈ ಸರ್ತಿ ಕೀರ್ತೇಶ್ವರ ದೇವೆರ್ನ ಆಲಯ ಜೀರ್ಣೋದ್ದಾರ ಆದ್, ಸದಾಶಿವ ದೇವೆರ್ ಪ್ರತಿಷ್ಠಾಪನೆ ಆದ್ ಬ್ರಹ್ಮಕಲಶೋತ್ಸವ ನಡಪರೆ ಉಂಡು ಪಂದ್ ಬ್ರಹ್ಮ ಶ್ರೀ ವೇದಮೂರ್ತಿ ಬಡಾಜೆ ಬೂಡು ಶ್ರೀ ಗೋಪಾಲಕೃಷ್ಣ ತಂತ್ರಿ ಪಂಡೆರ್.

ಮೇರ್ ಮಂಜೇಶ್ವರ ಶ್ರೀ ಕೀರ್ತೇಶ್ವರ ಸದಾಶಿವ ದೇವಸ್ಥಾನದ “ಜೀರ್ಣೋದ್ಧಾರ ಲೇಸ್‌ದ ವಿಜ್ಞಾಪನಾ ಪತ್ರ ಬಿಡುಗಡೆ ಬೊಕ್ಕ ನಿಧಿ ಸಂಗ್ರಹಣೆಗೆ ಚಾಲನೆ” ಲೇಸ್‌ನ್ ಆ.19 ಶನಿವಾರದಾನಿ ಬೊಲ್ಪುಗು ದೀಪ ಉದಿಪನ ಮಲ್ತ್ ಪಾತೆರಿಯೆರ್.


ಮಾತೆರ್ಲ ಜೀರ್ಣೋದ್ಧಾರದ ಕಾರ್ಯಗ್ ತನರ್ದ್ ಆಯಿನ ಸೇವೆನ್ ಸಮರ್ಪಣಾ ಮನೋಭಾವರ್ದ್ ದೇವೆರೆಗ್ ಸಮರ್ಪನೆ ಮಲ್ತ್ಂಡ ನಮ್ಮ ಜೀವನಡ್ ದೈವ, ದೇವೆರೆನ ಅಭಯ ಹಸ್ತ ಇಪ್ಪುಂಡು. ದುಂಬುದ ದಿನಟ್ ಮೂಲು ನಡಪುನ ಜೀರ್ಣೋದ್ಧಾರ ಕಾರ್ಯ ಬೊಕ್ಕ ಕ್ಷೇತ್ರದ ಅಭಿವೃದ್ಧಿ ಕಾರ್ಯ ಪ್ರಗತಿದ ಪಜ್ಜೆಡ್ ಸಾಗಡ್ ಪಂದ್ ಎಡ್ಡೆಪ್ಪು ಬಯಕ್‌ದ್ ಜೀರ್ಣೋದ್ಧಾರ ಕಾರ್ಯಕ್ರಮದ ವಿಜ್ಞಾಪನಾ ಪತ್ರ ಬುಡುಗಡೆ ಮಲ್ತಿನ ಬೊಕ್ಕ ನಿಧಿ ಸಂಗ್ರಹಣೆಗೆ ಚಾಲನೆ ಕೊರಿಯೆರ್.


ಲೇಸ್‌ದ ಗುರ್ಕಾರ್ಮೆನ್ ಕ್ಷೇತ್ರದ ಅಧ್ಯಕ್ಷೆ ರಾಯಿನ ತುಕಾರಾಮ ಕುಂಬಳೆ ವಹಿಸ್‌ದಿತ್ತೆರ್.
ಚಾವಡಿಡ್ ಉದ್ಯಾವರ ಮಾಡ ಶ್ರೀ ಅರಸು ಮಂಜೀಷ್ಣಾರ್ ದೈವ ಕ್ಷೇತ್ರದ ಅಣ್ಣ ದೈವದ ಪಾತ್ರಿ ರಾಜ ಬೆಲ್ಚಪ್ಪಾಡ, ತಮ್ಮ ದೈವದ ಪಾತ್ರಿ ತಿಮಿರಿ ಬೆಲ್ಚಪ್ಪಾಡ, ತಮ್ಮ ದೈವದ ಅರ್ಚಕೆರ್ ಬೀರು ಚೌಟ, ಮುಂಡತ್ತಾಯ ದೈವದ ಪಾತ್ರಿ ಮಂಜು ಬೆಲ್ಚಪ್ಪಾಡ, ಸಮಾಜದ ಗುರಿಕಾರೆರಾಯಿನ ಸುನಿಲ್ ಗುರಿಕಾರ, ಕ್ಷೇತ್ರದ ಜೀರ್ಣೋದ್ದಾರ ಸಮಿತಿ ಅಧ್ಯಕ್ಷೆರ್ ದಯಾನಂದ ಬಂಗೇರ, ಕ್ಷೇತ್ರದ ಪುತ್ತೂರು ತಾಲೂಕು ಗಾಣಿಗ ಸಂಘ ಸಮಿತಿ ಅಧ್ಯಕ್ಷೆರ್ ಹರಿ ರಾಮಚಂದ್ರ, ಉಳ್ಳಾಲ ತಾಲೂಕು ಗಾಣಿಗ ಸಂಘದ ಅಧ್ಯಕ್ಷೆರ್ ಎಚ್. ಪ್ರಕಾಶ್, ರಮೇಶ್ ಉಳ್ಳಾಲ, ಕ್ಷೇತ್ರದ ಅರ್ಚಕೆರ್ ರವೀಶ್ ಭಟ್, ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ಲಕ್ಷ್ಮಣ ಐಲ, ಉದಯ ಪೂಜಾರಿ ಹೊಸಹಿತ್ಲು, ಕ್ಷೇತ್ರದ ಆಡಳಿತ ಮೊಕ್ತೇಸರೆರ್ ವಿಶ್ವನಾಥ ಪೊಯ್ಯೆಕಂಡ, ಬೊಕ್ಕ ವಲಯ ಸಮಿತಿ ಅಧ್ಯಕ್ಷೆರ್ ಈ ಪೊರ್ತುಡು ಮಿತ್ತರ್ಮೆದ ಚಾವಡಿಡ್ ಇತ್ತೆರ್.


ಜೀರ್ಣೋದ್ದಾರ ಸಮಿತಿ ಕಾರ್ಯಾಧ್ಯಕ್ಷೆರ್ ದಿನೇಶ್ ನಟ್ಟಿಬೈಲ್ ಲೇಸ್‌ಗ್ ಎದ್ಕೊಂದು, ಧಾರ್ಮಿಕ ಮುಂದಾಳು ಹರೀಶ್ ಶೆಟ್ಟಿ ಮಾಡ ಲೇಸ್‌ದ ಸುಧಾರಿಕೆ ಮಲ್ತ್, ಜೀರ್ಣೋದ್ದಾರ ಸಮಿತಿದ ಪ್ರಧಾನ ಕಾರ್ಯದರ್ಶಿ ಪ್ರದೀಶ್ ಅಂಜರೆ ಸೊಲ್ಮೆ ಸಂದಾಯೆರ್.

ಆ.20: ಪಣೋಲಿಬೈಲ್‌ಡ್ ಅಗೇಲ್ ಸೇವೆ ಇಜ್ಜಿ

ಪಣೋಲಿಬೈಲ್ ಶ್ರೀ ಕಲ್ಲುರ್ಟಿ ದೈವಸ್ಥಾನಡ್ ಆ.20 ದಾನಿ ಐತಾರ ಅಗೇಲ್ ಸೇವೆ ಬೊಕ್ಕ ಕೋಲ ಸೇವೆ ಇಜ್ಜಿ ಪಂದ್ ಆಡಳಿತ ಮಂಡಳಿ ಪ್ರಕಟನೆಡ್ ತೆರಿಪಾದ್ಂಡ್.

ಪಣೋಲಿಬೈಲ್ ಶ್ರೀ ಕಲ್ಲುರ್ಟಿ ದೈವಸ್ಥಾನಡ್ ಆ.21 ದಾನಿ ಸೋಮವಾರ ನಾಗರ ಪಂಚೆಮಿದ ಹಿನ್ನೆಲೆಡ್ ಆ.20 ದಾನಿ ಅಗೇಲ್ ಬೊಕ್ಕ ಕೋಲ ಸೇವೆ ಇಪ್ಪುಜಿ.

ಆ. 24 : ಸೌಜನ್ಯಗ್ ನ್ಯಾಯ ಕೊರ್ಪಾವರೆ ಬಪ್ಪನಾಡ್ ಡ್ ಪ್ರಾರ್ಥನೆ, ಮುಲ್ಕಿಡ್ ಮಲ್ಲ ಪ್ರತಿಭಟನೆ

ಮುಲ್ಕಿ: ತಾಲ್ಲೂಕು ಸೌಜನ್ಯ ಹೋರಾಟ ಸಮಿತಿದ ಮುಕೇನ ಆಗಸ್ಟ್ 24 ಗುರುವಾರ ಮಧ್ಯಾಹ್ನ 3 ಗಂಟೆಗ್ ಸೌಜನ್ಯ ಪ್ರಕರಣದ ತನಿಖೆಗಾದ್ ಮುಲ್ಕಿಡ್ ಮಲ್ಲ ಮಟ್ಟ್ ದ ಪ್ರತಿಭಟನೆ ನಡಪರೆ ಉಂಡು. ಸೌಜನ್ಯ ಪರ ಹೋರಾಟ ಸಂಘಟನೆ ಮಲ್ತಿನ ಮಹೇಶ್ ಶೆಟ್ಟಿ ತಿಮರೋಡಿ ಬೊಕ್ಕ ಪ್ರಮೋದ್ ಮುತಾಲಿಕ್ ಪಾಲ್ ಪಡೆಯುನ ನಿರೀಕ್ಷೆ ಉಂಡು. ಬಸ್ ಸ್ಟ್ಯಾಂಡ್ ರ್ದ್ ಬೃಹತ್ ಪ್ರತಿಭಟನೆದ ಬೊಕ್ಕ ಪ್ರಕರಣದ ಸೂಕ್ತ ತನಿಖೆಗ್ ಆಗ್ರಹಿಸಾದ್ ತಾಲ್ಲೂಕು ತಹಶೀಲ್ದಾರ್ ಗ್ ಮನವಿ ಸಲ್ಲಿಸಾದ್ ಮುಲ್ಕಿ ಸೀಮೆದ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಪ್ರಕರಣದ ಆರೋಪಿಲೆಗ್ ಸೂಕ್ತ ಶಿಕ್ಷೆ ಕೊರ್ಪುನಂಚ ವಿಶೇಷ ಪ್ರಾರ್ಥನೆ ಸಲ್ಲಿಸಾಯೆರೆ ಉಂಡು ಪಂದ್ ಸಾಮಾಜಿಕ ಕಾರ್ಯಕರ್ತೆರ್ ನವೀನ್ ಪುತ್ರನ್ ತೆರಿಪಾಯೆರ್.

ಮುಲ್ಕಿ ಹೋಟೆಲ್ ಆದಿಧನ್ ಸಭಾಂಗಣಡ್ ಇಂಚೊಗು ನಡತಿನ ತಾಲೂಕು ಹೋರಾಟ ಸಮಿತಿದ ಸಭೆಟ್ಟ್ ಈ ವಿಷಯ ಪಂಡೆರ್.

ಮುಲ್ಕಿ ನ.ಪಂ ಸದಸ್ಯೆರ್ ಶೈಲೇಶ್ ಪಾತೆರ್ದ್ ಸೌಜನ್ಯ ಪ್ರಕರಣದ ಸೂಕ್ತ ತನಿಖೆಗ್ ಆಗ್ರಹಿಸಾದ್ ಹೋರಾಟ ಸಮಿತಿದ ಸಭೆಕ್ ವ್ಯಾಪಕ ಬೆಂಬಲ ವ್ಯಕ್ತವಾತ್ಂಡ್., ರಾಜಕೀಯ ರಹಿತವಾದ ಮಲ್ಲ ಪ್ರತಿಭಟನೆ ನಡಪರೆ ಉಂಡು ಪಂಡೆರ್.

ಸೌಜನ್ಯ ನ ಇಲ್ಲದಕ್ಲೆಗ್ ನ್ಯಾಯ ತಿಕ್ಕೊಡಾಂಡ ಸಂಘಟನಾತ್ಮಕ ಹೋರಾಟ ಅಗತ್ಯ ಪಂದ್ ಪಂಡಿನ
ಮುಲ್ಕಿ ನಗರ ಪಂಚಾಯತ್ ಸದಸ್ಯೆರ್ ಹರ್ಷರಾಜ ಶೆಟ್ಟಿ, ಪ್ರತಿಭಟನೆ ಡ್ ಒವ್ವೆ ಸಂಘ-ಸಂಸ್ಥೆ, ದೇವಸ್ಥಾನದ ಬೊಕ್ಕ ವೈಯಕ್ತಿಕ ತೇಜೋವಧೆಗೆ ಅವಕಾಶ ಇಜ್ಜಿ. ಬಾಲೆ ಸೌಜನ್ಯಗ್ ನ್ಯಾಯ ತಿಕ್ಕರೆ ಒಗ್ಗಟ್ಟಾದ್ ಸಮಿತಿ ಮಲ್ಪುಗ ಪಂಡೆರ್.

ಈ ಪೊರ್ತುಡು ಸಾಮಾಜಿಕ ಕಾರ್ಯಕರ್ತೆರಾಯಿನ ಜನಾರ್ದನ ಬಂಗೇರ ಕೆಎಸ್ ರಾವ್ ನಗರ, ಸಂದೀಪ್ ಚಿತ್ರಾಪು, ಪೂರ್ಣಿಮಾ, ರೋಹಿಣಿ, ಪಡುಪಣಂಬೂರು ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ಕುಸುಮಾ ಚಂದ್ರಶೇಖರ್ , ದಿನೇಶ್ ಕೊಲ್ನಾಡು ಪಾತೆರ್ದ್ ವಿವಿಧ ಸಮಿತಿನ್ ರಚನೆ ಮಲ್ತ್ ದುಂಬುದ ಹೋರಾಟದ ಬಗ್ಗೆ ರೂಪುರೇಷೆನ್ ಮಲ್ತ್ ದ್ ಒಗ್ಗಟ್ ದ ಹೋರಾಟಗ್ ತೀರ್ಮಾನ ಮಲ್ತೆರ್.

ಥಾಣೆ : 77 ನೇ ವರ್ಷದ ಸ್ವಾತಂತ್ರ್ಯ ದಿನಾಚರಣೆ

ಥಾಣೆ ಜಿಲ್ಲಾ ‌ಶಿವಸೇನಾ ದಕ್ಷಿಣ ಭಾರತೀಯ ಘಟಕ ಬೊಕ್ಕ ಶ್ರೀ ಮೂಕಾಂಬಿಕಾ ಸೋಷಿಯಲ್ ವೆಲ್ಫೇರ್ ಫೌಂಡೇಶನ್ ಮುತಾಲಿಕೆ ಡ್ 77 ನೇ ಸ್ವಾತಂತ್ರ್ಯ ದಿನಾಚರಣೆ ಡೊಂಬಿವಲಿದ ಆಯಿರೆಗಾವ್ ಸಂಘದ ಕಾರ್ಯಾಲಯಡ್ ಆಚರಣೆ ಮಲ್ತೆರ್.

 

ಈ ಪೊರ್ತುಡ್ ಥಾಣೆ ಜಿಲ್ಲಾ ಶಿವಸೇನಾ ದಕ್ಷಿಣ ಭಾರತ ಘಟಕದ ಸಂಪರ್ಕ ಪ್ರಮುಖ ಸುಭಾಷ್ ಶೆಟ್ಟಿ ಇನ್ನಂಜೆ, ಮಹಿಳಾ ಘಟಕದ ಕಾರ್ಯಾಧ್ಯಕ್ಷೆರ್ ಅನುಪಮಾ ಶೆಟ್ಟಿ ಬೊಕ್ಕ ಮಾತಾ ಪದಾಧಿಕಾರಿಲು ಈ ಪೊರ್ತುಡ್ ಇತ್ತೆರ್.

ಶ್ರೀ ಮೂಕಾಂಬಿಕಾ ಸೋಷಿಯಲ್ ವೆಲ್ಫೇರ್ ಫೌಂಡೇಶನ್ ಮುತಾಲಿಕೆಡ್ ಡೊಂಬಿವಲಿ ನಿವಾಸಿ ಚಂದ್ರಹಾಸ ಪುತ್ರನ್ ಬೊಕ್ಕ ಸವಿತಾ ಸಿ ಪುತ್ರನ್ ಮೇರ್ ನ ಮಗೆ ಡೊಂಬಿವಲಿದ ಐ ಈ ಎಸ್ ಶಾಲೆಡ್ ಕಲ್ತೊಂದು ಇತ್ ದ್ ಅಂತಾರಾಷ್ಟ್ರೀಯ ಮಟ್ಟ ಡ್ ಡೊಂಬಿವಲಿಗ್ ಕೀರ್ತಿ ಕನತಿನ ಮಾಸ್ಟರ್ ಈಶಾನ್ ಚಂದ್ರಹಾಸ್ ಪುತ್ರನ್ ಮೇರೆನ್ ಮಾನಾದಿಗೆ ಮಲ್ತೆರ್. ಯುನೈಟೆಡ್ ಸ್ಟೇಟ್ಸ್ ಒಲಿಂಪಿಕ್ಸ್ ಬೊಕ್ಕ ಪ್ಯಾರಾಲಿಂಪಿಕ್ ಮ್ಯೂಸಿಯಂಡ್ ಪಾಲ್ ಪಡೆತೆರ್.

ರಾಜ್ಯ ಮಟ್ಟದ ಸ್ಪರ್ಧೆ ಡ್ 10 ಬಂಗಾರ್ 3 ಬೊಳ್ಳಿ 2 ಕಂಚ್ ದ ಪದಕ, ರಾಷ್ಟ್ರ ಮಟ್ಟದ ಸ್ಪರ್ಧೆ ಡ್ 13 ಬಂಗಾರ್, 3 ಬೊಳ್ಳಿ ಪದಕ, ಥೈಲ್ಯಾಂಡ್ ಕ್ವೀನ್ಸ್ ಕಪ್ ಚಾಂಪಿಯನ್‌ಶಿಪ್ ಡ್ 2 ಕಂಚ್ ದ ಪದಕ, ವಿಶ್ವ ಜಂಪ್ ರೋಪ್ ಚಾಂಪಿಯನ್‌ಶಿಪ್ ಡ್ 2 ಬಂಗಾರ್ 3 ಕಂಚ್ ದ ಪದಕ ಬೊಕ್ಕ ಮಹಾರಾಷ್ಟ್ರ ಜಂಪ್ ರೋಪ್ ಅಸೋಸಿಯೇಷನ್‌ ರ್ದ್ ವರ್ಷದ ಅತ್ಯುತ್ತಮ ಆಟಗಾರ ಪ್ರಶಸ್ತಿ ನ್ ಪಡೆಯೊಂದೆರ್.

ಶಿವಸೇನಾ ದಕ್ಷಿಣ ಭಾರತೀಯ ಘಟಕದ ಬೊಕ್ಕ ಶ್ರೀ ಮೂಕಾಂಬಿಕಾ ಸೋಷಿಯಲ್ ವೆಲ್ಫೇರ್ ಫೌಂಡೇಶನ್ ದ ಸದಸ್ಯೆರ್ ಹೆಚ್ಚಿನ ಸಂಖ್ಯೆ ಡ್ ಪಾಲ್ ಪಡೆದ್ ಇತ್ತೆರ್.

ಕಾರ್ಯಾಧ್ಯಕ್ಷೆ ಅನುಪಮಾ ಶೆಟ್ಟಿ ಪಾತೆರ್ದ್ ಜೋಕ್ಲೆಡ ರಾಷ್ಟ್ರಪ್ರೇಮ ಪುಟ್ಟಾವುನ ಬಗೆಟ್ಟ್ ತೆರಿಪಾಯೆರ್. ಉಪ ಕಾರ್ಯಾಧ್ಯಕ್ಷೆರ್ ಸುಭಾಷ್ ಶೆಟ್ಟಿ ಇನ್ನಂಜೆ ಲೇಸ್ ದ ಸುಧಾರಿಕೆ ಮಲ್ತ್ ಸೊಲ್ಮೆ ಸಂದಾಯ ಮಲ್ತೆರ್. ಜೋಕ್ಲೆರ್ದ್ ವಿವಿಧ ದೇಶಭಕ್ತಿ ನೃತ್ಯ, ರಾಷ್ಟ್ರಗೀತೆದೊಟ್ಟುಗು ಲೇಸ್ ಸಂಪನ್ನ ಆಂಡ್.

ನಾಗರ ಪಂಚೆಮಿಗ್ ಶಾಲೆಗ್ ಆರ್ ಎಚ್ ರಜೆ

ಕುಡ್ಲ: ಈ ಸರ್ತಿ ನಾಗರ ಪಂಚೆಮಿದಾನಿ (ಆ.21 ಸೋಮಾರ) ಶಾಲೆಗ್ ಆರ್.ಎಚ್. (ನಿರ್ಬಂಧಿತ) ರಜೆ ಕೊರೊಲಿ ಪಂದ್ ದ.ಕ ಸಾರ್ವಜನಿಕ ಶಿಕ್ಷಣ ಇಲಾಖೆದ ಉಪನಿರ್ದೇಶಕೆರ್ ತೆರಿಪಾದೆರ್.

ವರ್ಷಡ್ ಇಂಚಿನ 4 ರಜೆ ಕೊರೊಲಿ, ಶಾಲಾ ಮಟ್ಟಡ್ ಈ ರಜೆನ್ ಕೊರ್ಪುನ ಅಧಿಕಾರ ಶಾಲೆದ ಮುಖ್ಯಸ್ಥೆರ್ ಗ್ ಬೊಕ್ಕ ಎಸ್ ಡಿಎಂಸಿ ಗ್ ಉಂಡು ಪಂದ್ ಆರ್ ತೆರಿಪಾದೆರ್.

ಶ್ರೀ ಕ್ಷೇತ್ರ ಪಡ್ಯಾರಬೆಟ್ಟಡು ಆಟಿಕೋಲ

ಪೆರಿಂಜೆ: ಇತಿಹಾಸ ಪ್ರಸಿದ್ದ ಪೆರಿಂಜೆದ ಶ್ರೀ ಕ್ಷೇತ್ರ ಪಡ್ಯಾರಬೆಟ್ಟ ಶ್ರೀ ಕೊಡಮಣಿತ್ತಾಯ ಮೂಲದೈವಸ್ಥಾನಡ್ ಆ.17 ದಾನಿ ಸಿಂಹ ಸಂಕ್ರಾಂದಿ ದಾನಿ ಬಯ್ಯಗ್ ಶ್ರೀ ದೈವದ ಆಟಿಕೋಲ ನಡತ್‌ಂಡ್.

ಬೊಲ್ಪುಗು ಕ್ಷೇತ್ರಡ್ ಸಿಂಹ ಸಂಕ್ರಮಣ ಆಚರಣೆ, ಪೂತ ಪೂಜೆ, ಮದ್ನಾಹ್ನ ಅನ್ನಸಂತರ್ಪಣೆ ನಡತ್‌ಂಡ್. ಬಯ್ಯಗ್ ನಡತಿನ ಆಟಿಕೋಲಡ್ ಸುಮಾರ್ ಭಕ್ತೆರ್ ದೈವದ ದರ್ಶನ ಪಡೆಯೆರ್. ಈ ಪೊರ್ತುಡ್ ಕ್ಷೇತ್ರಡ್ ತುಲಾಭಾರ ನಡತ್‌ಂಡ್.

ಕ್ಷೇತ್ರದ ಅನುವಂಶೀಯ ಆಡಳಿತದಾರೆರ್ ಎ.ಜೀವಂಧರ್ ಕುಮಾರ್ ಮಾತೆರೆನ್ ಎದ್ಕೊಡೆರ್. ಕ್ಷೇತ್ರದ ಪ್ರಧಾನ ಅರ್ಚಕೆರಾಯಿನ ವೇ|ಮೂ| ರಾಮದಾಸ ಅಸ್ರಣ್ಣೆರ್ ವೈದಿಕ ವಿಧಾನ ನೆರೆವೇರಿಸಾಯೆರ್.

ಗುತ್ತು ಬರ್ಕೆದಕುಲ್, ವಿಕಾಸ್ ಜೈನ್ ಬಾಲ್ನಗುತ್ತು ಬೊಕ್ಕ ಗುರಿಕಾರ್ಲು ಈ ಪೊರ್ತುಡ್ ಇತ್ತೆರ್.

You Missed