ಪಶ್ಚಿಮ ಅಫ್ಘಾನಿಸ್ತಾನಡ್ ಸನಿಯಾರ ನಡತಿನ ಭೂಕಂಪಡ್ ಇಡೆ ಮುಟ್ಟ 4000 ಜನ ತೀರ್ ಪೋತೆರ್ ಪಂದ್ ಅಧಿಕಾರಿಲು ತೆರಿಪಾದೆರ್.
6.2 ಬಿರ್ಸ್ ದ ಈ ಭೂಕಂಪಡ್ ಸುಮಾರ್ 2 ಸಾರ ಇಲ್ಲ್ ನೆಲಸಮ ಆತ್ಂಡ್ ಪಂದ್ ಅಫ್ಘಾನಿಸ್ತಾನ ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪ್ರಾಧಿಕಾರ ತೆರಿಪಾದ್ಂಡ್. ಈ ಭೂಕಂಪಡ್ ಹೆರಾತ್ ದ ಜಿಂದಾ ಜನ್ ಜಿಲ್ಲೆದ 13 ಹಳ್ಳಿಡ್ ವಾಸ ಮಲ್ತೊಂದು ಇತ್ತಿನ ಎಚ್ಚದ ಜನ ತೀರ್ ಪೋತೆರ್.
ಶಿರ್ವ: ಕಾರ್ಲ ತಾಲೂಕ್ ದ ಪಳ್ಳಿ ಶ್ರೀ ಕ್ಷೇತ್ರ ಅಡಪಾಡಿ ಶ್ರೀ ಉಮಾಮಹೇಶ್ವರ, ಶ್ರೀ ದುರ್ಗಾಪರಮೇಶ್ವರೀ ದೇವಿ ಸನ್ನಿಧಿಡ್ ಅ.15-23 ಮುಟ್ಟ ಮಾರ್ನೆಮಿ ಉಚ್ಚಯ ಬೊಕ್ಕ ಚಂಡಿಕಾ ಹೋಮ ನಡಪರೆ ಉಂಡು.
ಅ.15 ಕ್ಕ್ ಬೊಲ್ಪುಗು ಧಾರ್ಮಿಕ ಅನುಷ್ಠಾನಲು, ನವಕ ಪ್ರಧಾನ ಹೋಮ, ನವಕಲಶಾಭಿಷೇಕ, ಏಕಾದಶ ರುದ್ರಾಭಿಷೇಕ, ನವಚಂಡಿಕಾ ಹೋಮ, ಮಧ್ಯಾಹ್ನ ದೇವೆರೆನ ಮಹಾಪೂಜೆ, ದರ್ಶನ ಸೇವೆ, ಚಂಡಿಕಾ ಹೋಮದ ಪೂರ್ಣಾಹುತಿ, ನುಪ್ಪು ಪ್ರಸಾದ ಸೇವೆ, ಬಯ್ಯಗ್ ಭಜನೆ, ಕಲೋಕ್ತ ಪೂಜೆ, ರಂಗಪೂಜೆ, ನುಪ್ಪು ಪ್ರಸಾದ ಸೇವೆ ನಡಪರೆ ಉಂಡು.
ಅ.16 ರ್ದ್ ಪ್ರತಿ ದಿನೊಲ ಬೇತೆ ಬೇತೆ ಧಾರ್ಮಿಕ ಅನುಷ್ಠಾನಲು, ಚಂಡಿಕಾ ಹೋಮ, ಪೂರ್ಣಾಹುತಿ, ಶ್ರೀ ದೇವೆರೆನ ಮಹಾಪೂಜೆ, ನುಪ್ಪು ಪ್ರಸಾದ ಸೇವೆ, ಬಯ್ಯಗ್ ಭಜನೆ, ರಂಗಪೂಜೆ ನಡಪರೆ ಉಂಡು.
ಅ.23 ಕ್ಕ್ ಬೊಲ್ಪುಗು ಬೇತೆ ಬೇತೆ ಧಾರ್ಮಿಕ ಅನುಷ್ಠಾನಲು, ಚಂಡಿಕಾ ಹೋಮ, ಕುಮಾರಿಕಾ ಪೂಜೆ, ಸುವಾಸಿನಿ ಪೂಜೆ, ಚಂಡಿಕಾ ಹೋಮದ ಪೂರ್ಣಾಹುತಿ, ದೇವೆರೆನ ಮಹಾಪೂಜೆ, ನುಪ್ಪುಪ್ರಸಾದ ಸೇವೆ, ಬಯ್ಯಗ್ ಕಲ್ಲೋಕ್ತ ಪೂಜೆ, ರಂಗಪೂಜೆ, ಶ್ರೀ ದೇವೆರೆನ ರಜತ ಪಲ್ಲಕಿ ಉಚ್ಚಯ, ಪ್ರಸಾದ ಪಟ್ಟಿಯೆರೆ ಉಂಡು ಪಂದ್ ಶ್ರೀ ಕ್ಷೇತ್ರದ ಧರ್ಮದರ್ಶಿಲು ಪುಂಡಲೀಕ ನಾಯಕ್ ಪ್ರಕಟಣೆಡ್ ತೆರಿಪಾದೆರ್.
ಭಾರತ್ ಕೋ-ಆಪರೇಟಿವ್ ಬ್ಯಾಂಕ್ ದ ಪೊಸ ಕಾರ್ಯಾಧ್ಯಕ್ಷೆರಾದ್ ಸೂರ್ಯಕಾಂತ್ ಜಯ ಸುವರ್ಣ ನೇಮಕ ಆತೆರ್.
ನನ ದುಂಬಾಗ್ ಮೆರೆನ ದುಂಬಾತ್ತಿಗೆಡ್ ಈ ಬ್ಯಾಂಕ್ ನಡಪರೆ ಉಂಡು.
ಬೋಲ್ತೆರ್: ಬೋಲ್ತೆರ್ ತಹಶೀಲ್ದಾರ್ ಟಿ.ಸುರೇಶ್ ಕುಮಾರ್ ಚಿತ್ರದುರ್ಗದ ಭಾರತೀಯ ರಾಷ್ಟ್ರೀಯ ಹೆದ್ದಾರಿ ಪ್ರಾಧಿಕಾರ ಎನ್.ಎಚ್ 48 ಗ್ ಟ್ರಾನ್ಸ್‌ಪರ್‌ ಆತೆರ್. ಮೇರ್ ವೋಟ್‌ದ ಟೈಮ್‌ಡ್ ಬೋಲ್ತೆರ್‌ಗ್‌ ಟ್ರಾನ್ಸ್‌ಪರ್‌ ಆದ್ 7 ತಿಂಗೊಲ್‌ ಬೇಲೆ ಮಲ್ತ್ದ್ ಇತ್ತೆ ಚಿತ್ರದುರ್ಗಗ್‌ ಟ್ರಾನ್ಸ್‌ಪರ್‌ ಆತೆರ್.
ಕಾಸ್ರೋಡು: ತಾಡೆಯೋಲೆ, ಶಿಲಾಶಾಸನಡ್ ಇತ್ತಿನ ತುಲು ಲಿಪಿನ್ ಸಂಶೋಧನೆ ಮಲ್ತ್ ದ್ ಜನ ಸಾಮಾನ್ಯೆರ್ಲ ಸುಲಭವಾದ್ ಕಲ್ಪೊಲಿ ಪಂದ್ ತುಲು ಲಿಪಿನ್ ಜಗತ್ತ್ ಗ್ ತೂಪಾದ್ ಕೊರಿನ ತುಳು ಲಿಪಿ ಬ್ರಹ್ಮೆ ಪಂದೇ ಪುಗರ್ತೆ ಪಡೆಯಿನ, ಡಾ|ಪುಂಡೂರು ವೆಂಕಟರಾಜ ಪುಣಿಂಚತ್ತಾಯ ಮೆರೆನ ಪುಟ್ಟದಿನ ಆಚರಣೆ ಅ.10 ಕ್ಕ್ ವಿಶ್ವ ತುಲು ಲಿಪಿ ದಿನತಾನಿ ಜೈ ತುಲುನಾಡ್ (ರಿ.) ಕಾಸ್ರೋಡು ವಲಯದ ಮುತಾಲಿಕೆಡ್, ಪುಣಿಂಚತ್ತಾಯೆರ್ ಕಲ್ತಿನ ಶಾಲೆ ಮಹಾಜನ ಸಂಸ್ಕೃತ ಕಾಲೇಜ್ ನೀರ್ಚಾಲು ಪೆರಡಾಲ ನೆತ್ತ ಒಟ್ಟುಸೇರಿಗೆಡ್ ನಡತ್ಂಡ್.
ಶಾಲೆದ ವ್ಯವಸ್ಥಾಪಕೆರ್ ಜಯದೇವ ಖಂಡಿಗೆ ಮೇರ್ ಲೇಸ್ ನ್ ತುಡರ್ ಅರ್ಲಾದ್ ಉದಿಪನ ಮಲ್ತೆರ್. ಬೊಕ್ಕ ಪುವೆಂಪು ಮೆರೆನ ಭಾವಚಿತ್ರಗ್ ಪುಷ್ಪಾರ್ಚನೆ ಮಲ್ತ್ ದ್ ಪಾತೆರ್ದ್, ಪುಣಿಂಚಿತ್ತಾಯ ಮೇರ್ ಮುಲ್ಪ ವಿಧ್ಯಾಭ್ಯಾಸ ಮಲ್ದೆರ್ ಪನ್ಪುನವೇ ಎಂಕ್ಲೆಗ್ ಪೆರ್ಮೆ ಆಪುಂಡು. ಮೆರೆನ ಪುಟ್ಟುಪರ್ಬನ್ ಇನಿ ನಮ್ಮ ಶಾಲೆಡ್ ಜೈ ತುಲುನಾಡ್ (ರಿ.) ಸಂಘಟನೆದಕುಲು ಆಚರಣೆ ಮಲ್ಪುನವು ಕುಸಿ ಆಪುಂಡು ಪಂದ್ ಪಂಡೆರ್.
ಶಾಲೆದ ಮುಖ್ಯೋಪಾಧ್ಯಾಯೆರ್ ಶಿವಪ್ರಕಾಶ್ ಎಂ ಕೆ ಮೇರ್ ಪಾತೆರ್ದ್, ಪುವೆಂಪು ನಮ್ಮ ಶಾಲೆದ ಹಳೆ ವಿದ್ಯಾರ್ಥಿ ಪನ್ಪುನವೇ ಎಂಕ್ಲೆಗ್ ಪೆರ್ಮೆ ಆಪುಂಡು. ಎಂಕ್ಲೆನ ಶಾಲೆಡ್ ಇಂಚಿನ ಒಂಜಿ ಲೇಸ್ ನ್ ಆಯೋಜನೆ ಮಲ್ತ್ ದ್ ಪುವೆಂಪು ಮೆರೆನ ಬಗೆಟ್ಟ್ ಮಸ್ತ್ ತೆರಿಪುಲೆಕ್ಕ ಮಲ್ತಿನ ಜೈ ತುಲನಾಡ್ (ರಿ.) ಸಂಘಟನೆಗ್ ಎಡ್ಡೆ ಅವಡ್, ಎಂಕ್ಲೆನಶಾಲೆಡ್ಲಾ ತುಲು ಭಾಷೆ ತುಲು ಲಿಪಿ ಕಲ್ಪುಲೆಕ್ಕ ಅವಡ್ ಪಂದ್ ಎಡ್ಡೆಪ್ಪು ಬಯಕಿಯೆರ್.
ಜೈ ತುಲುನಾಡ್ (ರಿ.) ದ ಕಾರ್ಯದರ್ಶಿ ಕಿರಣ್ ತುಲುವೆ ಪಾತೆರ್ದ್, ಸಂಘಟನೆದ ಧ್ಯೇಯೋದ್ದೇಶದ ಬಗೆಟ್ಟ್ ತೆರಿಪಾದ್ ಎಡ್ಡೆಪ್ಪು ಬಯಕಿಯೆರ್.
ಪುವೆಂಪು ಮೆರೆನ ಮಗೆ ವಿಜಯರಾಜ ಪುಣಿಂಚತ್ತಾಯ ಮೇರ್ ಅಮ್ಮೆರೆನ ಸಾಧನೆದ ತಾದಿಗ್ ಬೊಲ್ಪು ಆಯಿನ ಅರೆನ ಗುರು ಖಂಡಿಗೆ ಶ್ಯಾಮ ಭಟ್ ಮೆರೆನ್ ನೆಂಪು ಮಲ್ತ್ ದ್ ಅರೆಗ್ ಕೃತಜ್ಞತೆ ಸಂದಾಯೆರ್. ಬೊಕ್ಕ ಪುವೆಂಪು ಮೆರೆನ ಸಾಹಿತ್ಯ, ಬರವುದ ಬಗೆಟ್ಟ್ ತೆರಿಪಾಯೆರ್.
ಈ ಪೊರ್ತುಡು ಜೈ ತುಲುನಾಡ್ (ರಿ.) ಸಂಘಟನೆದ ಉಪಾಧ್ಯಕ್ಷೆರ್ ಉಮೇಶ್ ಸಾಲಿಯಾನ್ ಸಿರಿಯಾ, ಉದಯ್ ಪೂಂಜ ಬೊಕ್ಕ ಕಾಸ್ರೋಡು ಸರಕಾರಿ ಕಾಲೇಜ್ ದ ಪ್ರಾಧ್ಯಾಪಕೆರ್ ಪ್ರೊ.ಎ ಶ್ರೀನಾಥ್ ಮೊಕುಲು ಪಾಲ್ ಪಡೆದ್ ಎಡ್ಡೆಪ್ಪು ಬಯಕಿಯೆರ್.
ಶಾಲೆದ ಅಧ್ಯಾಪಕಿ ಡಾ/ ವಿದ್ಯಾ ಲಕ್ಷ್ಮಿ ಮೇರ್ ಪುವೆಂಪು ನಡತ್ ಬತ್ತಿನ ತಾದಿ ಬೊಕ್ಕ ಸಾಧನೆದ ಬಗ್ಗೆ ತೆರಿಪಾಯೆರ್. ಅನ್ವಿತ ಬೊಕ್ಕ ಶೈಲಜಾ ಟೀಚರ್ ಪುವೆಂಪು ರಚನೆ ಮಲ್ತಿನ ಪದ್ಯನ್ ಪಂಡೆರ್.
ಜೈ ತುಲುನಾಡ್ (ರಿ.) ಕಾಸ್ರೋಡು ವಲಯದ ಗುರ್ಕಾರ್ದಿ ಕುಶಲಾಕ್ಷಿ ವಿ ಕುಲಾಲ್ ಕಣ್ವತೀರ್ಥ ಮೇರ್ ಗುರ್ಕಾರ್ಮೆನ್ ಒಯಿಸೊಂದು ಪುವೆಂಪು ಮೆರೆನ ನನಲ ಮುದ್ರಣ ಆವಂದೆ ಒರಿದಿನ ಲೇಖನನ್ ಸರಕಾರ ಸಾಹಿತ್ಯ ಅಕಾಡೆಮಿದ ಮುಖೇನ ಮುದ್ರಣ ಮಲ್ತ್ ದ್ ಅರೆನ ಜ್ಞಾನ ಸಂಪತ್ತ್ ನ್ ಮಾತೆರೆಗ್ಲಾ ತೆರಿಪುಲೆಕ್ಕ ಮಲ್ಪೊಡು ಪಂದ್ ಪಂಡೆರ್.
ಲೇಸ್ ನ್ ಶಾಲೆದ ಜೋಕುಲು ಪ್ರಾರ್ತನೆದ ಮುಖೇನ ಸುರು ಮಲ್ತೆರ್. ಕಾಸ್ರೋಡು ಜೈ ತುಲುನಾಡ್ (ರಿ.) ದ ಉಪಾಧ್ಯಕ್ಷೆರ್ ಶ್ರೀನಿವಾಸ ಆಳ್ವ ಎದ್ಕೊನಿಯೆರ್. ಕೋಶಾಧಿಕಾರಿ ಉತ್ತಮ್ ಯು ಸೊಲ್ಮೆ ಸಂದಾಯೆರ್.
ಈ ಪೊರ್ತುಡು ಮಹಾಜನ ಕಾಲೇಜ್ ದ ವ್ಯವಸ್ಥಾಪಕೆರೆಗ್ ಬೊಕ್ಕ ಮುಖ್ಯೋಪಾಧ್ಯಾಯೆರೆಗ್ ತುಲು ಲಿಪಿ ಕಲಿಕಾ ಕಾರ್ಯಾಗಾರನ್ ನಡಪಾಯೆರೆ ಅನುಮತಿ ಕೊರೊಡು ಪಂದ್ ಬಿನ್ನಾಪು ಸಂದಾಯೆರ್.
ಅಧ್ಯಾಪಕಿ ಶೈಲಜಾ ಲೇಸ್ ದ ಸುಧಾರಿಕೆ ಮಲ್ತೆರ್. ಜೈ ತುಲುನಾಡ್ (ರಿ.) ಕಾಸ್ರೋಡು ಘಟಕದ ಕಾರ್ಯದರ್ಶಿ ಜಗನ್ನಾಥ ಬದಿಯಡ್ಕ, ಮಾನಾದಿಗೆದ ಗುರ್ಕಾರೆ ಹರಿಕಾಂತ ಸಾಲಿಯಾನ್ ಕಾಸ್ರೋಡು ಬೊಕ್ಕ ಪದುಕೆರ್ ವಿನೋದ ಪ್ರಸಾದ್ ರೈ, ಪವಿತ್ರ ಮಾಡ, ನಿರ್ಮಲ ಖಂಡಿಗೆ ಸಹಕಾರ ಕೊರಿಯೆರ್.
ಗೇರುಕಟ್ಟೆ: ಕಳಿಯ ಗ್ರಾಮ ಪಂಚಾಯತ್ ವ್ಯಾಪ್ತಿದ ಕಳಿಯ ಗ್ರಾಮದ ಎರುಕಡಪ್ಪು ಅಂಗನವಾಡಿ, ಕಲ್ಕುರ್ಣಿ ಕಡೆಕ್ಕ್‌ ಪೋಪುನ ಕೈತಲ್‌ ಇಪ್ಪುನ ಅಂಗನವಾಡಿಗ್‌ ಸಂಬಂಧಪಟ್ಟಿನ ಸರ್ವೆ ನಂಬ್ರ 70/1B ರಲ್ಲಿ 0.30 ಸೆಂಟ್ಸ್ ಜಾಗದ ಗಡಿ ಗುರುತು ಮಲ್ತ್ ಇತ್ತೆರ್. ಕೈತಲ್‌ಡ್ 0.52 ಸೆಂಟ್ಸ್ ಸರಕಾರಿ ಖಾಲಿ ಜಾಗನ್ ಪೋಷಣಾ ಅಭಿಯಾನಗ್‌ ಮೀಸಲ್‌ ದೀದ್‌ ಇತ್ತೆರ್.
ಈ ಮೀಸಲ್‌ ದೀತಿನ ಜಾಗನ್ ಜೆ.ಸಿ.ಬಿ. ದ ಮುಖೇನ ಸ್ಥಳೀಯ ನಿವಾಸಿ ರಝಾಕ್ s/o ಬಾವುಂಞಿ ಕಲ್ಕುರ್ಣಿ ಅತಿಕ್ರಮಣ ಮಲ್ತ್ ಸಮತಟ್ಟು ಮಲ್ತ್‌ದೆರ್. ಈ ಬಗ್ಗೆ ಸಾರ್ವಜನಿಕೆರ್ ಬೊಕ್ಕ ಅಂಗನವಾಡಿ ಬಾಲ ವಿಕಾಸ ಸಮಿತಿ ವತಿರ್ದ್‌ ಆಕ್ಷೇಪ ಪಾರ್ದ್ ಈ ದುಂಬುಲ ದಾಖಲೆ ಇತ್ತಿನ ಈ ಜಾಗನ್ ಅತಿಕ್ರಮಣ ಮಲ್ತಿನ ಬಗ್ಗೆ ವಿರೋಧ ವ್ಯಕ್ತಪಡಿಸಾದ್ ತಹಶೀಲ್ದಾರರೆಗ್ ಬೊಕ್ಕ ಪೊಲೀಸ್ ಠಾಣೆಗ್ ದೂರು ಕೊರ್ತೆರ್. ತಹಶೀಲ್ದಾರರು ದೂರ್‌ನ್ ತೂದ್ ಕೂಡ್ಲೆ ತನಿಖೆ ಮಲ್ತ್ದ್ ವರದಿ ಕೊರಿಯೆರೆ ಕಂದಾಯ ಅಧಿಕಾರಿಲೆಗ್ ನೋಟಿಸ್‌ ಕೊರ್ತೆರ್.
ಪುತ್ತೂರು: ಹೈದರಾಬಾದ್‌ಡ್ ಅ.10ದಾನಿ ನಡತ್ತಿನ ವಿದ್ಯಾಭಾರತಿ ಕ್ಷೇತ್ರ ಮಟ್ಟದ ಅಥ್ಲೆಟಿಕ್ಸ್ ಕ್ರೀಡಾಕೂಟಡ್ ವಿವೇಕಾನಂದ ಪದವಿಪೂರ್ವ ಕಾಲೇಜ್‌ದ ಆಂಜೊಕ್ಲೆನ ತಂಡ ಸುರುತ ಇನಾಮು ಪಡೆದ್, ಬಿಹಾರಡ್ ನಡಪುನ ರಾಷ್ಟ್ರಮಟ್ಟದ ಅಥ್ಲೆಟಿಕ್ಸ್ ಕ್ರೀಡಾಕೂಟಗ್ ಆಯ್ಕೆಯಾತೆರ್.
ಆಂಜೊಕ್ಲೆನ ವಿಭಾಗದ ಕಲ್ಪಾರ್ಥಿಲಾಯಿನ ಅಭಿಷೇಕ್, ಕೀರ್ತನ್ ಎಸ್ ಕೆ, ಬ್ರಿಜೇಷ್, ಸುಶಾನ್, ಪ್ರಮಥ್, ನಿಹಾಲ್ ರಾಜ್, ಆಯುಷ್ ಪಾಲ್ ಪಡೆದಿತ್ತೆರ್. ಈ ತಂಡ ಕಾಲೇಜ್‌ದ ದೈಹಿಕ ಶಿಕ್ಷಣ ನಿರ್ದೇಶಕೆರ್ ರವಿಶಂಕರ್, ಡಾ. ಜ್ಯೋತಿ ಬೊಕ್ಕ ಯತೀಶ್ ಮೊಕ್ಲೆನ ನೇತೃತ್ವಡ್ ತರಬೇತಿನ್‌ ಪಡೆಯೊಂದು ಉಲ್ಲೆರ್. ಕಲ್ಪಾರ್ಥಿಲೆನ ಸಾಧನೆಗ್ ಕಾಲೇಜ್‌ದ ಆಡಳಿತ ಮಂಡಳಿ, ಪ್ರಾಂಶುಪಾಲೆರ್, ಅಧ್ಯಾಪಕೆರ್ ಬೊಕ್ಕ ಅಧ್ಯಾಪಕೇತರ ವೃಂದದಕುಲು ಸೊಲ್ಮೆ ಸಂದಾದೆರ್‌.
ಶ್ರೀ ಗುರು ನಾರಾಯಣ ಸ್ವಾಮಿ ಸೇವಾ ಸಂಘ ಅರಸಿನಮಕ್ಕಿ, ಹತ್ಯಡ್ಕ, ಶಿಶಿಲ, ಶಿಬಾಜೆ, ರೆಖ್ಯಾ ನೆತ್ತ ಒಟ್ಟು ಸೇರಿಗೆಡ್ ಬ್ರಹ್ಮಶ್ರೀ ನಾರಾಯಣ ಗುರುಕುಲೆನ 169ನೇ ಪುಟ್ಟುದಿನ ದಿನತ ಪ್ರಯುಕ್ತ ಶ್ರೀ ಗುರುಪೂಜೆ ಬೊಕ್ಕ ಪ್ರತಿಭಾ ಪುರಸ್ಕಾರ, ಸಾಧಕೆರೆಗ್‌ ಮಾನಾದಿಗೆ ಲೇಸ್ ಅ.29 ದಾನಿ ಅರಸಿನಮಕ್ಕಿ ಶ್ರೀ ಗುರುನಾರಾಯಣ ಮಂದಿರಡ್‌ ನಡಪರೆ ಉಂಡು.
ಲೇಸ್‌ದ ಸಭಾಧ್ಯಕ್ಷತೆನ್‌ ಅರಸಿನಮಕ್ಕಿ ಶ್ರೀ ಗುರುನಾರಾಯಣ ಸೇವಾ ಸಂಘದ ಗುರ್ಕಾರ್ಲು ವಿಶ್ವನಾಥ ಪೂಜಾರಿ ವಹಿಸೊನಿಯೆರೆ ಉಲ್ಲೆರ್. ಮಲ್ಲ ಬಿನ್ನೆರಾದ್‌ ಬೋಲ್ತೆರ್ ಶ್ರೀ ಗುರುನಾರಾಯಣ ಸೇವಾ ಸಂಘದ ಗುರ್ಕಾರ್ಲು ಚಿದಾನಂದ ಪೂಜಾರಿ ಎಲ್ದಕ್ಕ, ಯುವ ಬಿಲ್ಲವ ವೇದಿಕೆದ ಗುರ್ಕಾರ್ಲು ನಿತೀಶ್‌ ಹೆಚ್‌ ಕೋಟ್ಯಾನ್‌, ಯುವವಾಹಿನಿ ಬೋಲ್ತೆರ್ ಘಟಕದ ಗುರ್ಕಾರ್ಲು ಅಶ್ವತ್‌ ಕುಮಾರ್ ಪಾಲ್ ಪಡೆಯೆರೆ ಉಲ್ಲೆರ್. ಬಿನ್ನೆರಾದ್‌ ಅರಸಿನಮಕ್ಕಿ ಶ್ರೀ ಗು.ನಾ.ಸೇ.ಸಂಘದ ಮಾಜಿ ಗುರ್ಕಾರ್ಲುಲಾಯಿನ ಸತೀಶ್‌ ಪೂಜಾರಿ ಬೂಡ್ದಮಕ್ಕಿ, ಸುಂದರ ಪೂಜಾರಿ, ಗುರುವೇವ ಬ್ಯಾಂಕ್ ಶಾಖಾ ವ್ಯವಸ್ಥಾಪಕೆರ್ ಜಗದೀಶ್‌, ಉದ್ಯಮಿಲು ಸದಾಶಿವನ್‌ ಟಿ.ಕೆ, ಗುರುದೇವನ್‌ ಟಿ.ಕೆ, ಲಲಿತಾ ಎಲ್ಯಣ್ಣ ಪೂಜಾರಿ ಓಟ್ಲ, ಶಿಬಾಜೆ ಚಿನ್ನಯ್ಯ ಪೂಜಾರಿ, ವಿಜಯನ್‌ ಬಂಗೇರಡ್ಕ, ಈರಪ್ಪ ಪೂಜಾರಿ, ಎಸ್ ರವಿ ಬೆಂಗ್ಲೂರು, ಮಾಲತಿ ಈ ಪೊರ್ತುಡು ಪಾಲ್ ಪಡೆಯರೆ ಉಲ್ಲೆರ್.
ಬೆಂಗಳೂರು: ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲಾ ಕಂಬಳ ಸಮಿತಿ (ರಿ), ತುಳು ಕೂಟ ಬೆಂಗಳೂರು, ದಕ್ಷಿಣ ಕನ್ನಡ ಬೊಕ್ಕ ಒಡಿಪು ಜಿಲ್ಲಾ ಸರ್ವ ಸಂಘ ಸಂಸ್ಥೆದ ಒಟ್ಟು ಸೇರಿಗೆಡ್ ಬೆಂಗಳೂರು ಕಂಬಳ ಸಮಿತಿ ಮುಖೇನ ನಡಪುನ ಬೆಂಗಳೂರು ಕಂಬುಲಗ್ ಅ.11ದಾನಿ ಕರೆಪೂಜೆ ನಡತ್ಂಡ್.
ರಾಜ್ಯದ ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್, ಮಾಜಿ ಮುಖ್ಯಮಂತ್ರಿ ಡಿ.ವಿ.ಸದಾನಂದ ಗೌಡ, ಬೆಂಗಳೂರು ಕಂಬಳ ಸಮಿತಿದ ಗುರ್ಕಾರೆ, ಪುತ್ತೂರು ಶಾಸಕೆರ್ ಅಶೋಕ್‌ ಕುಮಾರ್ ರೈ ಸೇರಿನಂಚ ಗಣ್ಯೆರ್‌ ಸೇರ್ದ್ ಕರೆಪೂಜೆ ಮಲ್ತೆರ್. ಈ ಪೊರ್ತುಡು ಗುಣರಂಜನ್ ಶೆಟ್ಟಿ, ಮಾಜಿ ಡಿಸಿಎಂ ಡಾ.ಅಶ್ವತ್ಥನಾರಾಯಣ್, ಸ್ಥಳೀಯ ಶಾಸಕೆರ್ ಹ್ಯಾರಿಸ್ ನಲಪಾಡ್, ಉದ್ಯಮಿ ಉಮರ್ ಟಿ.ಕೆ., ಗುರುಕಿರಣ್, ಕಂಬಳ ಸಮಿತಿದ ಜಿಲ್ಲಾಧ್ಯಕ್ಷೆರ್ ದೇವಿಪ್ರಸಾದ್ ಶೆಟ್ಟಿ ಬೆಳಪು, ಎಸ್ ಸಿ‌ಡಿಸಿಸಿ ಬ್ಯಾಂಕ್‌ದ ಗುರ್ಕಾರ್ಲು ಡಾ.ಎಂ.ಎನ್. ರಾಜೇಂದ್ರಕುಮಾರ್, ಎಂಆರ್ ಜಿ ಗ್ರೂಪ್‌ದ ಧಣಿ ಪ್ರಕಾಶ್ ಶೆಟ್ಟಿ, ಇತ್ತೆರ್.
ಪಠಾಣ್ ಕೋಟ್ ದಾಳಿದ ಮಾಸ್ಟರ್ ಮೈಂಡ್ ಬೊಕ್ಕ ಭಾರತದ ಮೋಸ್ಟ್ ವಾಂಟೆಡ್ ಭಯೋತ್ಪಾದಕೆರೆಡ್‌ ಒರಿ ಆಯಿನ ಶಾಹಿದ್‌ನ್ ಪಾಕಿಸ್ತಾನದ ಸಿಯಾಲ್ಕೋಟ್‌ಡ್‌ ಅ.11 ದಾನಿ ಅಪರಿಚಿತೆರ್ ಗುಂಡು ಪಾಡ್ದ್ ಕೆರ್ತಿನ ಬಗೆಟ್ ವರದಿ ಆತ್ಂಡ್. 1994 ನವೆಂಬರ್ 12ದಾನಿ ಇಂಬೆನ್ ಅರೆಸ್ಟ್‌ ಮಲ್ತ್ ಇತ್ತೆರ್.
ಭಾರತಡ್ 16 ವರ್ಷ ಜೈಲ್ ಶಿಕ್ಷೆ ಅನುಭವಿಸಾದ್‌ ಬೊಕ್ಕ ಲತೀಫ್‌ನ್ 2010 ವಾಘಾ ಮುಖೇನ ಗಡಿಪಾರ್‌ ಮಲ್ತ್ ಇತ್ತೆರ್. 2010 ಡ್ ಬಿಡುಗಡೆ ಆಯಿ ಬೊಕ್ಕ ಲತೀಫ್ ಪಾಕಿಸ್ತಾನದ ಜಿಹಾದಿ ಕಾರ್ಖಾನೆಗ್‌ ಪಿರ ಪೋದಿತ್ತೆ ಪಂದ್ ರಾಷ್ಟ್ರೀಯ ತನಿಖಾ ಸಂಸ್ಥೆ ಪನ್ಪುಂಡ್. ಭಾರತ ಇಂಬೆನ್ ಸರ್ಕಾರ ಮೋಸ್ಟ್ ವಾಂಟೆಡ್ ಭಯೋತ್ಪಾದಕೆ ಪಂದ್ ಪಟ್ಟಿ ಮಲ್ತ್ ಇತ್ತೆರ್.
