ಬೆಂಗ್ಲೂರ್ ಡ್ ನಡುರಾತ್ರೆ IT ಅಧಿಕಾರಿಲು ಕಾರ್ಯಾಚರಣೆ ಸುರು ಮಲ್ದೆರ್.
ಈ ಪೊರ್ತುಡು BBMP ಗುತ್ತಿಗೆದಾರೆರೆನ ಸಂಘದ ಉಪಾಧ್ಯಕ್ಷೆರ್ ಆರ್ ಅಂಬಿಕಾಪತಿ ಬೊಕ್ಕ ಮಾಜಿ ಕಾರ್ಪೊರೇಟರ್ ಅಶ್ವತ್ಥಮ್ಮ ಮೆರೆನ ಸುಲ್ತಾನ್ ಪಾಳ್ಯದ ಇಲ್ಲಲ್ 23 ಬಾಕ್ಸ್ ಡ್ 42 ಕೋಟಿ ರೂ. ಪತ್ತೆ ಆತ್ಂಡ್. ಒಂಜೊಂಜಿ ಬಾಕ್ಸ್ ಡ್ 1 ಕೋಟಿ 65 ಲಕ್ಷ ರೂ. ಇತ್ಂಡ್ ಪಂದ್ ತೆರಿದ್ ಬೈದ್ಂಡ್.
SSLC ಪಾಸಾಯಿನ ಕಲ್ಪಾರ್ಥಿಲು ಮಾರ್ಕ್ಸ್ ಕಾರ್ಡ್ ತಿದ್ದುಪಡಿಗ್ ಬೆಂಗ್ಲೂರ್ ಗ್ ಪೋವೊಡು ಪಂದ್ ಇಜ್ಜಿ. ನನ ತಾನ್ ಕಲ್ತಿನ ಪ್ರೌಢಶಾಲೆಡೇ ಪಡೆವೊಲಿ.
ಈ ಉದ್ದೇಶಗಾದ್ ಕರ್ನಾಟಕ ಶಾಲಾ ಪರೀಕ್ಷೆ ಬೊಕ್ಕ ಮೌಲ್ಯನಿರ್ಣಯ ಮಂಡಳಿ ವಿದ್ಯಾರ್ಥಿಸ್ನೇಹಿ ತಂತ್ರಾಂಶ ಅಭಿವೃದ್ಧಿ ಮಲ್ದ್ಂಡ್. ರಾಜ್ಯದ ಮಾತ ಶಾಲೆದ ಮುಖ್ಯ ಶಿಕ್ಷಕೆರೆಗ್ ತಿದ್ದುಪಡಿ ಮಲ್ಪುನ ಅವಕಾಶಗಾದ್ ಅನುಕೂಲ ಮಲ್ತ್ ಕೊರ್ತುಂಡು. ಈ ತಿದ್ದುಪಡಿ ಪಂತ ಕಲ್ಪಾರ್ಥಿಲು ಬಿನ್ನಾಪು ಸಂದಾಯಿನ ಒಂಜಿ ವಾರಡೇ ಪರಿಷ್ಕೃತ ಮಾರ್ಕ್ಸ್ ಕಾರ್ಡ್ ತಿಕ್ಕುಂಡು.
ಇಸ್ರೇಲ್ ಡ್ ನಡತಿನ ದಾಳಿಡ್ ಇಡೇ ಮುಟ್ಟ ತನ್ನ ದೇಶಡ್ 447 ಜೋಕುಲು ಸೈದೆರ್ ಪಂದ್ ಪ್ಯಾಲೆಸ್ತೀನ್ ತೆರಿಪಾದ್ಂಡ್.
ಒಟ್ಟು 1417 ಜನ ಸೈದೆರ್, 6268 ಜನಕ್ಕ್ ಪೆಟ್ಟಾತ್ಂಡ್. ಈ ದಾಳಿರ್ದ್ 3,38000 ಪ್ಯಾಲೆಸ್ತೀನಿಯೆರ್ ಜಾಗೆ ಬದಲ್ ಮಲ್ದೆರ್. ಕುಡೊಂಜಿ ಕಡೆಟ್ಟ್ ಈ ಯುದ್ದರ್ದಾವೆರ 1300 ಜನ ಸೈದೆರ್. ಇಸ್ರೇಲ್-ಹಮಾಸ್ ನಡುತ್ತ ಯುದ್ದ ಉತ್ತರ ಸಿರಿಯಾಗ್ಲಾ ಬೈದ್ಂಡ್.
ಸುಳ್ಯ: ಬೇಲೆ ಕೊರ್ಪೆ ಪಂದ್ ಪೊಣ್ಣಗ್‌ ಒರಿ ಲಕ್ಷಾಂತರ ರೂ. ವಂಚನೆ ಮಲ್ತಿನ ಬಗೆಟ್ಟ್ ಬೆಳ್ಳಾರೆ ಪೊಲೀಸ್ ಠಾಣೆಡ್ ದೂರು ದಾಖಲಾತ್‌ಂಡ್. ಸುಳ್ಯ ತಾಲೂಕ್‌ದ ಅಮರಪಡ್ನೂರು ಗ್ರಾಮದ ನಿವಾಸಿ ಒರ್ತಿ ವಂಚನೆ ಆಯಿನ ಬಗ್ಗೆ ದೂರು ಕೊರ್ತೆರ್.
ಗುರ್ತನೇ ದಾಂತಿನ ಕದೀಮೆ ಒರಿ ಜುಲೈ 15 ದಾನಿ ಕಾಲ್ ಮಲ್ತ್ ದ್ ಯಾನ್ ವಿಸ್ತಾರ ಏರ್ಲೈನ್ಸ್ ಸಿಂಗಾಪುರ ಬ್ರಾಂಚ್, ದೇವನಹಳ್ಳಿ ಬೆಂಗಳೂರು ಸಂಸ್ಥೆರ್ದ್‌ ಪಾತೆರ್ನ ಪಂದ್ ಪರಿಚಯ ಮಲ್ತೊಂದು ಎಂಕ್ಲೆನ ಸಂಸ್ಥೆಡ್ ಉದ್ಯೋಗ ಖಾಲಿ ಉಂಡು ಎಚ್ಚ ಸಂಬಳ ಬೊಕ್ಕ ಬೇತೆ ಸೌಲಭ್ಯಲ ಕೊರ್ಪ ಪಂದ್ ತೆರಿಪಾದ್‌ ಇತ್ತೆ. ಆಂಡ ಬೇಲೆ ತಿಕ್ಕೊಡಾಂಡ ಕಾಸ್‌ ಕೊರೊಡು ಪಂದ್ ಪದೇ ಪದೇ ಕಾಲ್ ಮಲ್ತ್ ಕಾಸ್‌ನ್‌ ಪಡೆಯೊಂದೆ. ಒಟ್ಟು ಬೇತೆ ಬೇತೆ ಹಂತಡ್‌ 13,00,997 ರೂ. ಆನ್ಲೈನ್ ಮುಖೆನ ಕೊರ್ದ್ ಬೇಲೆ ಕೊರಂದೆ ಮೋಸ ಮಲ್ತ್‌ದೆ ಪಂದ್ ಪೊಣ್ಣು ಬೆಳ್ಳಾರೆ ಠಾಣೆಡ್ ದೂರು ಕೊರ್ತೆರ್.
AIIMS ಡ್ ಸಹಾಯಕ ಆಡಳಿತ ಅಧಿಕಾರಿ, ಆಹಾರ ತಜ್ಞೆರ್ ಬೊಕ್ಕ ಸಹಾಯಕ ಲಾಂಡ್ರಿ ಮೇಲ್ವಿಚಾರಕೆರ್ ಸೇರಿನಂಚೆನೆ ಸುಮಾರ್ ಬೇತೆ ಬೇಲೆಗ್ ನೇಮಕಾತಿ ಅಧಿಸೂಚನೆನ್ ಪ್ರಕಟ ಮಲ್ದ್ಂಡ್.
ಅ.7 ಕ್ಕ್ ಅರ್ಜಿ ಸಂದಾಯೆರೆ ಸುರು ಮಲ್ದೆರ್. ನನ ನ.6 ಮುಟ್ಟ ಅರ್ಜಿ ಸಂದಾಯೆರೆ ಅವಕಾಶ ಉಂಡು. ಅಭ್ಯರ್ಥಿಲು ಅಧಿಕೃತ ವೆಬ್‌ಸೈಟ್‌ ಗ್ ಭೇಟಿ ಕೊರ್ದು ಎಚ್ಚದ ಪೊಲಬು ಪಡೆದ್ ಆನ್ ಲೈನ್ ಡ್ ಅರ್ಜಿ ಸಂದಾವೊಲಿ. GEN/OBC -3000 ಬೊಕ್ಕ SC/ST ಅಭ್ಯರ್ಥಿಲೆಗ್ 1500 ರೂ. ಅರ್ಜಿ ಶುಲ್ಕ ಉಂಡು.
ಪುತ್ತೂರು: ನವೆಂಬರ್ 25 ಬೊಕ್ಕ 26 ಕ್ಕ್ ಬೆಂಗಳೂರುದ ಅರಮನೆ ಮೈದಾನಡ್ ನಡಪುನ ಬೆಂಗಳೂರು ಕಂಬುಲದ ಬಗೆಟ್ಟ್ ಚರ್ಚೆ ಮಲ್ಪೆರೆ ಕಂಬಳ ಸಮಿತಿದ ಗುರ್ಕಾರ್ಲು ಪುತ್ತೂರು ಶಾಸಕೆರ್ ಅಶೋಕ್ ರೈ ನೇತೃತ್ವದ ಕಂಬಳ ಸಮಿತಿದಕುಲು ಅ.12 ದಾನಿ ಮುಖ್ಯಮಂತ್ರಿ ಸಿದ್ದರಾಮಯ್ಯ ಮೇರೆನ್ ಭೇಟಿಯಾದ್ ಚರ್ಚೆ ಮಲ್ತೆರ್.
ಅರಮನೆ ಮೈದಾನಡ್ ನಡಪುನ ಕಂಬುಲಗ್ ಮುಖ್ಯಮಂತ್ರಿಗ್‌ ಲೆಪ್ಪೋಲೆ ಕೊರ್ದು ಪಾತೆರಕತೆ ಮಲ್ತ್‌ದ್ ಕಂಬುಲ ಸಮಿತಿದ ಗುರ್ಕಾರ್ಲು, ಶಾಸಕೆರ್ ಅಶೋಕ್ ರೈ ಕಂಬುಲಗ್ ಬರಿಯೆರೆ ಸುರುತ ಆಹ್ವಾನನ್‌ ಕೊರಿಯೆರ್. ಬೊಕ್ಕ ಅರೆನೊಟ್ಟಿಗೆ ಚರ್ಚೆ ಮಲ್ತಿನ ಶಾಸಕೆರ್ ಕಂಬುಲಗ್ ಬೇತೆ ಬೇತೆ ಇಲಾಖೆರ್ದ್ ಸಹಕಾರ ಕೊರ್ಪುನಂಚ ಇಲಾಖೆಗ್ ಸೂಚನೆನ್‌ ಕೊರ್ಲೆ ಪಂದ್ ಪಂಡೆರ್. ಕಂಬುಲಗ್ ಲಕ್ಷಾಂತರ ಜನ ಪಾಲ್ ಪಡೆಯುನ ನಿರೀಕ್ಷೆ ಉಂಡು. ದೇಶ , ವಿದೇಶದ ಸೆಲೆಬ್ರಿಟಿಲು ಪಾಲ್ ಪಡೆಯುನ ಕಾರಣ ಬೆಂಗಳೂರು ಟ್ರಾಫಿಕ್ ಸಮಸ್ಯೆದ ಬಗ್ಗೆಲ ಮಾಹಿತಿನ್‌ ಪಂಡೆರ್.
2 ಕೋಟಿ ಅನುದಾನಗ್‌ ಬಿನ್ನಾಪು
ಸುರುತ ಸರ್ತಿ ರಾಜ್ಯದ ರಾಜಧಾನಿಡ್‌ ನಡೆಯುವ ಕಂಬುಲಗ್ ಸುಮಾರು 7 ಕೋಟಿರ್ದ್‌ ಜಾಸ್ತಿ ಖರ್ಚ್ ಆವೆರೆ ಉಂಡು. ಸರಕಾರ ಕಂಬುಲಗ್ 2 ಕೋಟಿ ಅನುದಾನನ್‌ ಕೊರ್ಪುನಂಚ ಸಿ.ಎಂ ಗ್ ಮನವಿ ಸಲ್ಲಿಸಾಯೆರ್. ದ.ಕ ಬೊಕ್ಕ ಒಡಿಪು ಜಿಲ್ಲೆರ್ದ್ ಸುಮಾರ್ 125 ರ್ದ್‌ ಜಾಸ್ತಿ ಜತೆ ಎರುಕುಲ್ ಪಾಲ್ ಪಡೆಯೆರೆ ಇತ್ತ್‌ದ್‌, ಎರುಕುಲೆಗ್ ನೀರ್‌ರ್ದ್‌ ಬತ್ತಿನ ತಿನಿಯೆರೆ ಮುಟ್ಟ ಮಾತಲ ಕರಾವಳಿ ಜಿಲ್ಲೆರ್ದ್ ಪೂರೈಕೆ ಮಲ್ಪೊಡು.
ಪೊಸ ಕರೆ ನಿರ್ಮಾಣ ಸೇರಿನಂಚ ಮಾತ ಖರ್ಚ್ ದುಬಾರಿ ಆಪುನ ಕಾರಣ ಸರಕಾರರ್ದ್ ಅನುದಾನ ಕೊರ್ಪುನಂಚ ಮನವಿ ಮಾಲ್ತೆರ್. ಶಾಸಕೆರ್ನ ಮನವಿಗ್ ಮುಖ್ಯಮಂತ್ರಿಲು ಪೂರಕವಾದ್ ಸ್ಪಂದನೆ ಕೊರ್ತೆರ್ ಪಂದ್ ಶಾಸಕೆರ್ ತೆರಿಪಾದೆರ್. ಅಂಚನೆ ಈ ಪೊರ್ತುಡು ಕಂದಾಯ ಸಚಿವೆರಾಯಿನ ಕೃಷ್ಣ ಬೈರೇಗೌಡ ಮೇರೆನ್ ಭೇಟಿ ಮಲ್ತ್ ಲೆಪ್ಪೋಲೆನ್‌ ಕೊರಿಯೆರ್. ಬೊಕ್ಕ ಇಲಾಖೆರ್ದ್ ಸಹಕಾರನ್‌ ಕೊರ್ಪುನಂಚ ಮನವಿನ್‌ ಮಲ್ತೆರ್. ಕಂಬುಲ ಸಮಿತಿದ ಪ್ರಮುಖೆರ್ ಸಂಗೀತ ನಿರ್ದೇಶಕ ಕಂಬುಲ ಸಮಿತಿದ ಕಾರ್ಯಾಧ್ಯಕ್ಷೆರ್ ಗುರುಕಿರಣ್, ಪ್ರಮುಖೆರಾಯಿನ ಗುರುರಂಜನ್, ಗುಣರಾಜ್ ಶೆಟ್ಟಿ, ಸುಂದರ ರಾಜ್ ರಐ, ಮುರಳೀಧರ್ ರೈ ಮಠಂತಬೆಟ್ಟು, ಈ ಪೊರ್ತುಡು ಇತ್ತೆರ್.
ಮುಲ್ಕಿ: ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಶರನ್ನವರಾತ್ರಿ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.
ಈ ಉಚ್ಚಯಡ್ ಸಾಂಸ್ಕೃತಿಕ ಲೇಸ್ ದ ಲೆಕ್ಕೊಡು ಅ.15 ಐತಾರ ಭರತನಾಟ್ಯ ಬೊಕ್ಕ ಜಾನಪದ ನೃತ್ಯ ವೈವಿಧ್ಯ, ಅ.16 ಭಕ್ತಿಗೀತೆ, ಭಜನ್ ಸಂಧ್ಯ ಬೊಕ್ಕ ಭರತನಾಟ್ಯ ನೃತ್ಯ, ಅ.17 ಕರ್ನಾಟಕ ಶಾಸ್ತ್ರೀಯ ಸಂಗೀತ, ನೃತ್ಯ ನಿಷ ಲೇಸ್, ಅ.18 ಯಕ್ಷಗಾನ ತಾಳಮದ್ದಳೆ ದಕ್ಷಯಜ್ಞ ಬೊಕ್ಕ ಅಮರನಾಥನ ಅಮರ ಕಥೆ ರೂಪಕ, ಅ.19 ಭರತನಾಟ್ಯ ಲೇಸ್, ಭಕ್ತಿಗೀತೆ, ಅ.20 ಸುಕ್ರಾರ ಪಂಚವೀಣಾವಾದನ ಬೊಕ್ಕ ಭಜನೆ, ಅ.21 ಭರತನಾಟ್ಯ ಬೊಕ್ಕ ಭಕ್ತಿ ಗಾಯನ, ಅ.22 ಐತಾರ ಯಕ್ಷಗಾನ ತಾಳಮದ್ದಳೆ ವಾಮನ ಚರಿತ್ರೆ ಬೊಕ್ಕ ನೃತ್ಯ ಸಿಂಚನ, ಅ.23 ದಾಸ ಸಿಂಚನ ಬೊಕ್ಕ ಭರತನಾಟ್ಯ ಲೇಸ್, ಅ.24 ಭರತನಾಟ್ಯ ಬೊಕ್ಕ ನೃತ್ಯ ಲೇಸ್ ನಡಪರೆ ಉಂಡು ಪಂದ್ ಬಪ್ಪನಾಡು ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಆಡಳಿತ ಮೊಕ್ತೇಸರೆರ್ ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕಟೀಲ್: ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯಡ್ ಮಾರ್ನೆಮಿ ಉಚ್ಚಯ ಅ.15-24 ಮುಟ್ಟ ನಡಪರೆ ಉಂಡು.
ಸಾಂಸ್ಕೃತಿಕ ಲೇಸ್ ದ ಲೆಕ್ಕೊಡು ಅ.15 ಐತಾರ ತುಳು ತಾಳಮದ್ದಳೆ ಗೇಲ್ದ ಬೀರೆ ವಾಲಿ, ಅ.16 ಸೋಮಾರ ಪೊಂಜೋವ್ ಲೆನ ಬಡಗುತಿಟ್ಟು ಆಟ ವೀರ ಅಭಿಮನ್ಯು, ಅ.17 ಅಂಗಾರೆ ಕರ್ನಾಟಕ ಸಂಗೀತ, ಅ.18 ಬುಧಾರ ದಾಸ ಸಿಂಚನ, ಅ. 19 ಗುರುವಾರ ಕರ್ನಾಟಕ ಶಾಸ್ತ್ರೀಯ ಸಂಗೀತ, ಅ.20 ಸುಕ್ರಾರ ಭಕ್ತಿ ಸಂಗೀತ, ಅ.21 ಸನಿಯಾರ ಭರತನಾಟ್ಯ, ಅ. 22 ಐತಾರ ಶ್ರೀಕೃಷ್ಣ ಪಾರಿಜಾತ ಆಟ, ಅ.23 ಸೋಮಾರ ವೀಣಾವಾದನ, ಅ.24 ಅಂಗಾರೆ ಭರತನಾಟ್ಯ ನಡಪರೆ ಉಂಡು.
ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್ ಶ್ರೀಮುಡಿ ಗಂಧ ಪ್ರಸಾದ ದೆತೊಂದು ಶ್ರೀ ದೇವಿನ ಕೃಪೆಗ್ ಪಾತ್ರರಾವೊಡು ಪಂದ್ ಕಟೀಲ್ ಶ್ರೀ ದುರ್ಗಾಪರಮೇಶ್ವರೀ ದೇವಲ್ಯದ ಅನುವಂಶಿಕ ಮೊಕ್ತೇಸರೆರ್ ಕೆ. ವಾಸುದೇವ ಅಸ್ರಣ್ಣ, ಮೊಕ್ತೇಸರೆರೆನ ಮಂಡಳಿದ ಗುರ್ಕಾರೆ ಸನತ್ ಕುಮಾರ್ ಶೆಟ್ಟಿ ಕೊಡೆತ್ತೂರುಗುತ್ತು ಬೊಕ್ಕ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.
ಕೌಕ್ರಾಡಿ: ತ್ರಿಗುಣಾತ್ಮಿಕ ಶ್ರೀ ದುರ್ಗಾಪರಮೇಶ್ವರಿ ದೇವಸ್ಥಾನಡ್ ಅ.15 ರ್ದ್‌ 24 ಮುಟ್ಟ ನವರಾತ್ರಿ ಉಚ್ಚಯ ನಡಪೆರೆ ಉಂಡು. ಈ ಪೊರ್ತುಡು ಪ್ರತಿದಿನ ಬಯ್ಯ 6.30 ರ್ದ್‌ ರಂಗಪೂಜೆ ಬೊಕ್ಕ ಪ್ರತಿ ಅಂಗಾರೆ ಬೊಕ್ಕ ಶುಕ್ರವಾರ ದುರ್ಗಾಪೂಜೆ ಬೊಕ್ಕ ಮಹಾಪೂಜೆ, ಅ.16 ದಾನಿ ರಜತ ಕವಚ ಸಮರ್ಪಣೆ ಬೊಕ್ಕ ಚಂಡಿಕಾಯಾಗ ನಡಪೆರೆ ಉಂಡು.
ಅಂಚಾದ್‌ ಭಕ್ತೆರ್ ತನು-ಮನ-ಧನದೊಟ್ಟಿಗೆ ಸಹಕರಿಸಾದ್‌ ದೇವಿನ ಅನುಗ್ರಹಗ್‌ ಪಾತ್ರರಾವೊಡು ಪಂದ್ ಆಡಳಿತ ಮಂಡಳಿದಕುಲ್‌ ತೆರಿಪಾದೆರ್. ಅಂಚನೆ ಪ್ರತಿದಿನ ಮಧ್ಯಾಹ್ನ ಬೊಕ್ಕ ರಾತ್ರೆ ಅನ್ನಸಂತರ್ಪಣೆಲ ನಡಪುಂಡು.
ನಿಟ್ಟೆ : ದಿವಂಗತ ಸಿಂಧೂ ಅಮ್ಮ ಸ್ಥಾಪನೆ ಮಲ್ದಿನ ಕಡಂಬೂರಿ ಸಿಂಧು ನಿವಾಸ ಶ್ರೀ ದುರ್ಗಾಂಬಿಕಾ ದೇವಸ್ಥಾನಡ್ 51 ನೇ ವರ್ಷದ ಮಾರ್ನೆಮಿದ ಉಚ್ಚಯ ಅ.15 ನೇ ಐತಾರ ಸುರು ಆದ್ ಅ.24 ಅಂಗಾರೆ ಮುಟ್ಟ ನಡಪರೆ ಉಂಡು.
ಈ ಪೊರ್ತುಡು ಪ್ರತಿದಿನ ಭಜನೆ, ಮಹಾ ಆರತಿ ಅನ್ನಸಂತರ್ಪಣೆ.ನಡಪರೆ ಉಂಡು.
ಈ ಪುಣ್ಯ ಕಾರ್ಯೊಡು ಊರುದ ಬೊಕ್ಕ ಪರವೂರ್ದ ಮಾತಾ ಭಕ್ತೆರ್ ಕುಟುಂಬ ಪರಿವಾರದ ಒಟ್ಟುಗು ಬತ್ತ್ ದ್ ಶ್ರೀ ದೇವಿನ ಗಂಧ ಪುರ್ಸೊದ ದೆತೊಂದು ದೇವಿನ ಅನುಗ್ರಹೊಗು ಪಾತ್ರ ಆವೊಡು ಪಂದ್ ದೇವಸ್ಥಾನ ದ ಆಡಳಿತ ಸಮಿತಿ ದ ಪರವಾದ್ ಮೊಕ್ತೇಸರೆರ್ ಕಡಂಬೋಡಿ ಮಹಾಬಲ ಪೂಜಾರಿ, ಸಂಜೀವ ಬಂಗೇರ ಬೊಕ್ಕ ಸಮಿತಿದ ಸರ್ವ ಸದಸ್ಯೆರ್, ಮಹಿಳಾ ವಿಭಾಗ, ಮೊಕುಲು ಲೆಪ್ಪೋಲೆಡ್ ಬಿನ್ನಯ ಮಲ್ದೆರ್.
