ಬೊಳ್ಳಿ

ಟೋಕಿಯೊ ಓಲಂಪಿಕ್ ಡ್ ಬಾರತ ದೇಶೋಗು ಬೊಳ್ಳಿದ ಪದಕ ಗೆಂದಿನ ಮಿರಾಬಾಯಿ ಚಾನು

ಟೋಕಿಯೊ : ಜಪಾನ್ ದೇಶೋದ ಟೋಕಿಯೊಡು ನಡತೊಂದು ಇಪ್ಪುನ ಓಲಂಪಿಕ್ ಗೊಬ್ಬುಡು ಸುರುತ ದಿನೋಟ್ಟೆ ಬೊಳ್ಳಿದ ಪದಕ ಗೆಂದ್ ದ್ ದೇಶದ 1.3 ಕೋಟಿ ಜನಕ್ಲೆಗ್ ಖುಷಿತ ಸುದ್ದಿ ಕೋರ್ ಯೆರ್ ಮೇರ್ ನ ಮಿತ್ತ್ ಪದಕ ಗೆಂದುನ ಉಮೆದ್ ಇತ್ತಂಡ್ ಅವೆನ್ ನಿಜ ಮಲ್ತೆರ್ ,ಮೇರ್ 49 ಕೆಜಿ ವಿಭಾಗೊದ ದುಣ್ಣಾ ದೆರ್ ಪುನ ಗೊಬ್ಬುಡು 110 kg ದ ದುಣ್ಣಾ ದೆರ್ತದ್ 2 ನೇ ತಾನೊಡು ಉಂತ್ ಯೇರ್.

ಮುಲ್ಕಿ ರೋಟರಿ ಕ್ಲಬ್ ಬೊಳ್ಳಿ ಪರ್ಬದ ವರ್ಷದ ಪದಾಧಿಕಾರಿಲೆನ ಪದಗ್ರಹಣದ ಲೇಸ್

ಮುಲ್ಕಿ : ಬೊಳ್ಳಿ ಪರ್ಬದ ವರ್ಷದ ಕುಸಿಟ್ಟ್ ಉಪ್ಪುನ ಮುಲ್ಕಿ ರೋಟರಿ ಕ್ಲಬ್ ದ 2021-22 ಗುರ್ಕಾರ್ಲು ಶಿವರಾಮ್ ಜಿ ಅಮೀನ್ ಮುತಾಲಿಕೆದ ಪದಾಧಿಕಾರಿಲೆನ ಜಬದಾರಿ ಒಯಿಸೊನ್ನ ಲೇಸ್ (ಪದಗ್ರಹಣ) ಬುಧಾರದಾನಿ ಕಾರ್ನಾಡ್ ದ ರೋಟರಿ ಶತಾಬ್ಧ ಭವನೊಡು ನಡತ್ಂಡ್.

ರೊಟೇರಿಯನ್ ಪಿಎಚ್ಎಫ್ ಪ್ರಕಾಶ್ ಕಾರಂತ ಪ್ರಮಾಣ ವಚನ ಮಲ್ಪಾಯೆರ್.
ಅಸಿಸ್ಟೆಂಟ್ ಗವರ್ನರ್ ರೊ.ಅರುಣ್ ಭಂಡಾರಿ, ಝೋನಲ್ ಲೆಫ್ಟಿನೆಂಟ್ ರೊ.ಅಶೋಕ್ ಕುಮಾರ್ ಶೆಟ್ರ್ ಮಲ್ಲ ಬಿನ್ನೆರಾದ್ ಬತ್ತಿತ್ತೆರ್.
ಕರಿನ ವರ್ಷದ ಕಾರ್ಯಂತೆರ್ ವೈ.ಎನ್ ಸಾಲ್ಯಾನ್ ವರದಿ ಓದಿಯೆರ್.ಪೊಸ ವರ್ಷದ ಕಾರ್ಯಂತೆರ್ ರವಿಚಂದ್ರ ಇತ್ತೆರ್.ಉಂದುವೇ ಪೊರ್ತುಡು ಅನಾರೋಗ್ಯದ ಚಿಕಿತ್ಸೆ ಗ್ ಪಣವುದ ಸಾಕಾರ ಬೊಕ್ಕ ಪ್ರತಿಭಾವಂತ ವಿದ್ಯಾರ್ಥಿ ಲೆಗ್ ಪಣವುದ ಸಕಾಯ ಪಟ್ಟಿಯೆರ್.ಅಂಚೆನೇ ಕೊರೊನಾ ವಾರಿಯರ್ಸ್ ಆದ್ ಸೇವೆ ಮಲ್ಪುನ ಡಾ. ಚಿತ್ರಾ, ಡಾ. ಕೃಷ್ಣ ಬೊಕ್ಕ ಎಸ್ಐ ವಿನಾಯಕ ತೋರಗಲ್ ಮೊಕಲೆನ ಮಾನಾದಿಗೆ ನಡತ್ಂಡ್.
ರೊ. ನರೇಂದ್ರ ಕೆರೆಕಾಡು ಮುತಾಲಿಕೆದ “ನಮನ ತುಳುವ ನಲಿಕೆ” ಪಂಥೊದ ಪೋಸ್ಟರ್ ಬುಡುಗಡೆ ನಡತ್ಂಡ್.ರೊ. ನಾರಾಯಣ್ ಬಿನ್ನೆರೆನ ಪರಿಚಯ ಮಲ್ತೆರ್ .ಮುಲ್ಕಿ, ಬಜ್ಪೆ, ಬೆದ್ರ ವಲಯದ ಸದಸ್ಯೆರ್ ಲೇಸ್ ಡ್ ಪಾಲ್ ಪಡರದಿತ್ತೆರ್.ಜಿನರಾಜ್ ಸಾಲ್ಯಾನ್, ರಾಜಾ ಪತ್ರಾವೊ ಲೇಸ್ ನಡಪಾದ್ ಕೊರಿಯೆರ್.
ಪೊಸ ಕಾರ್ಯಂತೆರ್, ರೊ. ರವಿಚಂದ್ರ ಸೊಲ್ಮೆ ಸಂದಾಯೆರ್.