ಪ್ರತಿಭೆ

ಕಾಲಿವುಡ್ ಡ್ ಮೆನ್ಕೊಂದು ಉಪ್ಪುನ ಕುಡ್ಲದ ಪ್ರತಿಭೆ

Aug 19, 2021

ಕುಡ್ಲ : ‘ದಿಯಾ’ ಚಿತ್ರದ ಮುಖೇನ ಗಡಿ ದಾoಟ್ ದ್ ಮೆನ್ಕೊಂದು ಉಪ್ಪುನ ಕುಡ್ಲದ ಪ್ರತಿಭೆ ಪೃಥ್ವಿ ಅಂಬರ್ ಇತ್ತೆ ತಮಿಳು ಚಿತ್ರರಂಗ ಪೋಯೆರೆ ತಯಾರ್ ಆತೆರ್. ಮೇರ್ ನಟನೆ ಮಲ್ಪರೆ ಉಪ್ಪುನ ತಮಿಳು ಚಿತ್ರಡ್ ಡಾಲಿ ಧನಂಜಯ್ ಲಾ ನಟನೆ ಮಲ್ತೊಂದು ಉಲ್ಲೆರ್ ಪನ್ಪಿನವು ಕುಡೊಂಜಿ ಪೆರ್ಮೆದ ಸಂಗತಿ.

ವಿಜಯ್ ಮಿಲ್ಟನ್ ನಿರ್ದೇಶನದ “ಮಲೈ ಪಿಡಿಕ್ಕಾದ ಮಣಿದನ್” ಚಿತ್ರದ ಮುಖೇನ ಪೃಥ್ವಿ ಅಂಬರ್ ತಮಿಳು ಚಲನಚಿತ್ರ ರಂಗೋಗೂ ಕಾರ್ ದೀತೆರ್.

“ಮಳ್ಳೆ ಪಿಡಿಕ್ಕಾದ ಮಣಿದನ್” ಚಿತ್ರಡ್ ವಿಜಯ್ ಆಂಟನಿ ನಾಯಕೆ ಆದ್ ಉಲ್ಲೆರ್. ಪೃಥ್ವಿ ಅಂಬರ್ ಬೊಕ್ಕ ಧನಂಜಯ್ ಪ್ರಧಾನ ಭೂಮಿಕೆಡ್ ಉಲ್ಲೆರ್ . ಈ ಚಿತ್ರದ ಶೂಟಿಂಗ್ ಆಗಸ್ಟ್ 12ರ್ದ್ ಸುರು ಆಯರೇ ಉಂಡು.

ಸಕಲಕಲಾವಲ್ಲಭ ಅರಳು ಪ್ರತಿಭೆಲಾಯಿನ ಕುಮಾರಿ ಶ್ರಾವ್ಯಶ್ರೀ – ಕಾವ್ಯಶ್ರೀ

Jul 17, 2021

“ಕಲ್ಪುನ ಆಸಕ್ತಿ ಇತ್ತ್oಡ ಯಾವು ,ಮಾತಾ ಕಲೆಕ್ಲೆನ್ಲಾ ಕರಗತ ಮಲ್ತೊಂದು ಸಾಧನೆದ ಶಿಖರ ಏರೆರೆ ಸಾಧ್ಯ . ಕಲಿಕಾ ಆಸಕ್ತಿದೊಟ್ಟುಗು ಕಲೆತುಲಯಿ ತನನ್ ತಾನ್ ತೊಡಗಾವೊಂದಿನ ಒಂಜೇ ಕುಟುಮದ ಅಪ್ರತಿಮ ಪ್ರತಿಭೆಲಾಯಿನ ಕುಮಾರಿ ಶ್ರಾವ್ಯಶ್ರೀ ಬೊಕ್ಕ ಕುಮಾರಿ ಕಾವ್ಯಶ್ರೀ ಉಬರಳೆ.

ದುರ್ಗಾಪ್ರಸಾದ್ ಬೊಕ್ಕ ವಿಜಯಲಕ್ಷ್ಮಿ ದಂಪತಿಲೆನ ರಡ್ಡ್ ಪಿಂಗಾರದ ಪುರ್ಪಲಾಯಿನ ಈ ಜೋಕುಲು ತನ್ನ ಕಿನ್ಯ ಪ್ರಯೋಡೆ ಕಲಾಮಾತೆನ ಆಶೀರ್ವಾದ ಪಡೆತೆರ್ ಪಂಡ ತಪ್ಪಾವಂದ್.

ತನ್ನ ಪ್ರಾಥಮಿಕ ಶಿಕ್ಷಣನ್ ಕೇರಳದ ಎಸ್. ಆರ್. ಎ. ಯು. ಪಿ. ಎಸ್ ಕುಬಣುರುಡು ಮಲ್ತಿನ ಮೆಕುಲು ಪ್ರೌಢ ಶಾಲಾ ಶಿಕ್ಷಣನ್ ಕೇರಳದ ಜಿ. ಎಚ್. ಎಸ್. ಎಸ್ ಬೇಕೂರುಡು ಮಲ್ತರ್. ಐರ್ದ್ ಬೊಕ್ಕ ತನ್ಕುಲೆ ಪದವಿ ಶಿಕ್ಷಣಗ್ ಕುಡ್ಲಗ್ ಬತ್ತಿನ ಕುಮಾರಿ ಶ್ರಾವ್ಯಶ್ರೀ ತನ್ನ ಪಿಯುಸಿ ಶಿಕ್ಷಣನ್ ಕುಡ್ಲದ ಕೆನರಾ ಕಾಲೇಜ್ ಡ್ ಮಲ್ತ್oಡ ಕುಮಾರಿ ಕಾವ್ಯಶ್ರೀ ಅತ್ತಾವರದ ಸರೋಜಿನಿ ಮಧುಸೂಧನ್ ಕುಶೆ ಕಾಲೇಜ್ ಡ್ ಪಿಯುಸಿ ಶಿಕ್ಷಣ ಮುಗಿತ್ ದ್ ಕುಡ್ಲದ ಕೆನರಾ ಕಾಲೇಜ್ ಡ್ ಪದವಿ ಶಿಕ್ಷಣ ಮಲ್ತೊಂದು ಉಲ್ಲೆರ್.ಪ್ರಸ್ತುತ ಕುಡ್ಲಡೆ ವ್ಯಾಸಂಗ ಮಲ್ತೊಂದು ಉಪ್ಪುನ ಈ ರಡ್ಡ್ ಜೋಕುಲು, ನೃತ್ಯ,ಯಕ್ಷಗಾನ,ಸಂಗೀತ,ಹರಿಕಥೆ ಇಂಚ ಅವ್ವೆತೋ ಕಲೆಕ್ಲೆನ್ ಪ್ರಯೋಗ ಮಲ್ದಿನ ಮೆಕುಲು ತಮ್ಮ ಸಂಗೀತ ಶಿಕ್ಷಣನ್ ಗುರುಕುಲಾಯಿನ ಸುನೀತಾ ಬೈಪಾಡಿತ್ತಾಯ ಕುಬನೂರು, ಬೇಕೂರು ಬೊಕ್ಕ ಭರತನಾಟ್ಯ ಶಿಕ್ಷಣನ್ ಗುರುಕುಲಾಯಿನ ವಿದುಶಿ ವಿದ್ಯಾಲಕ್ಷ್ಮಿ ಕುಂಬ್ಳೆ ಮೆಕ್ಲೆಡ ಕಲ್ತೊಂದು ಉಲ್ಲೆರ್.
ಅಂಚನೇ ಹರಿಕಥೆ ಅಭ್ಯಾಸನ್ ಕಲಾರತ್ನ ಶಮ್ನಾಡಿಗ ಕುಂಬ್ಳೆ ಮೆರೆಡ ಕಲ್ತೊಂದು ಉಲ್ಲೆರ್.

ಕಲಿಕೆಡ್ಲಾ ಒಂಜಿ ಪಜ್ಜೆ ದುಂಬು ಉಪ್ಪುನ ಈ ರಡ್ಡ್ ಕಲಾವಿದೆರ್ ಅವ್ವೆತೋ ರಾಜ್ಯ ಮಟ್ಟ, ತಾಲೂಕು ಮಟ್ಟಡ್ ದೇಶಭಕ್ತಿಗೀತೆ, ಜಾನಪದ ಗೀತೆ,ಚಿತ್ರಕಲೆ, ನೃತ್ಯ ಮಲ್ದಿನ ಪುಗಾರ್ತೆ ಮೆಕ್ಲೆನವು .ಭರತನಾಟ್ಯಮ್ ಡ್ ಸೀನಿಯರ್, ಶಾಸ್ತ್ರೀಯ ಸಂಗೀತಡ್ ಜೂನಿಯರ್ ವಿಭಾಗಡ್ ಉಪ್ಪುನ ಈ ರಡ್ಡ್ ಪ್ರತಿಭೆಲು ಯುವ ಪೀಳಿಗೆಗ್ ಸ್ಫೂರ್ತಿ ಪಂಡ ತಪ್ಪಾವಂದ್.

“ಏರೆಗೇ ಆವಡ್ ಯಶಸ್ಸ್ ಪಡೆಯರೇ ರಹಸ್ಯ ಸೂತ್ರೊಲು ದಾಲ ಇಜ್ಜಿ. ಉನ್ನತ ಸ್ಥಾನಗ್ ಮುಟ್ಟೊಡು ಪನ್ಪಿನ ಬಯಕೆ ಅವ್ವೆತೋ ಉತ್ಸಾಹಿಲೆಗ್ ಉಪ್ಪುಂಡು. ಐಕಾದೆ ಅಕುಲು ತಾದಿ ನಾಡೊಂದು ಅಕ್ಲೆನ ಗುರಿ ಮುಟ್ಟುವೆರ್, ಐಕ್ ಪ್ರತ್ಯಕ್ಷ ಉದಾರ್ಮೆ ಈ ರಡ್ಡ್ ಜೋಕುಲು. ಶಾಲಾ ಮಟ್ಟದ ಅವ್ವೆತೋ ಪಂಥೋಡು ಪಾಲ್ ಪಡೆದ್ ಇನಾಮು ಗೆಂದಿನ ಪೆರ್ಮೆ ಮೆಕ್ಲೆನವು. ಪ್ರೌಢ ಶಾಲಾ ವಿಭಾಗದ ರಾಮಾಯಣ ಪರೀಕ್ಷೆಡ್ 94% ಪಡೆದ್ ಮಂಜೇಶ್ವರ ತಾಲೂಕುಗು ಸುರುತ್ತ ಸ್ಥಾನ ಕನೈದಿನ ಪೆರ್ಮೆ ಕುಮಾರಿ ಶ್ರಾವ್ಯಶ್ರೀ ಮೆರೆಗ್ ಉಂಡು.

ಸಕಲಕಲಾವಲ್ಲಭೆರಾಯಿನ ಈ ಅರಳು ಪ್ರತಿಭೆಲೆಗ್ ಪೋಷಕೆರ್ನ ಸಾಕಾರ, ಕುಟುಂಬ ದಕ್ಲೆನ ಪ್ರೋತ್ಸಾಹನೇ ಸ್ಫೂರ್ತಿ ಪಂದ್ ಈ ರಡ್ಡ್ ಜೋಕುಲು ಪನ್ಪೆರ್. ನ್ರತ್ಯ, ಭರತನಾಟ್ಯ, ಸಂಗೀತ, ಚಿತ್ರಕಲೆ, ಹರಿಕಥೆ ಇಂಚ ನಾನಾ ಕಲಾ ಕ್ಷೇತ್ರಡ್ ತನ್ನ ಕಲಾ ಪ್ರೌಢಿಮೆನ್ ಮೆರೆತಿನ ಈ ರಡ್ಡ್ ಪುರ್ಪೊಲು ಇತ್ತೆ ಕಲಾ ಕ್ಷೇತ್ರಡ್ ಅಂಚನೇ ಶೈಕ್ಷಣಿಕ ಕ್ಷೇತ್ರಡ್ ದಾಲ ಸಾಧನೆ ಮಲ್ಪೊಡು, ಪನ್ಪಿನ ಹಠಟ್ ಛಲ ಬುಡಂದೆ ಹಠ ಕಟ್ದ್ ಸಾಧನೆದ ತಾದಿಗ್ ಪಜ್ಜೆ ದೀವೊಂದು ಉಪ್ಪುನ ಈ ಜೋಕ್ಲೆಗ್ ನನಾತ್ ಅನನ್ಯ ಅವಕಾಶಲು ನಾಡೊಂದು ಬರಡ್ ಕಿನ್ಯ ಪ್ರಯೋಡೆ ಕಟ್ಟಿನ ಮಾಮಲ್ಲ ಕನ ನೆರವೇರಡ್ ಪಂದ್ ನಮ್ಮ ಆಶಯ.

✍️ಶ್ರೀನಿಧಿ ಶೆಟ್ಟಿ

ಯುವ ಪ್ರತಿಭೆ ರಂಗಭೂಮಿ ಕಲಾವಿದೆ ” ರಾಘವ್ ಸೂರಿ”

Jul 2, 2021

“ಬೆಳೆಯುವ ಸಿರಿ ಮೊಳಕೆಯಲ್ಲಿ” ಪನ್ಪಿನ ಪಾತೆರ ಉಂಡು.. ಕಲೆತ ಸೆಲೆ ಎಂಚ ಉಪ್ಪುಂಡು ಪಂಡ ಒಂಜಿ ಕಲಾವಿದಗ್ ಆ ಕಲೆನೇ ಪ್ರಪಂಚ ಆದ್ ಉಪ್ಪುಂಡು . ಆಯೆ ಒವ್ವೆ ವೃತ್ತಿಡ್ ಇತ್ತ್oಡಲಾ ಕಲಾವಿದನ ಜೀವನ ಆಯೆನ್ ಕೈ ಬೀಜಾದ್ ಲೆಪ್ಪುoಡು . ಅಂಚಿನ ಕಲಾವಿದೆರ್ನ ಪೈಕಿ ಒರಿಯೇ ಆದ್ ತೊಜಿದ್ ಬರ್ಪಿನಾರ್ ರಾಘವ್ ಸೂರಿ.

ತನ್ನ ಪ್ರಾಥಮಿಕ ಬೊಕ್ಕ ಪ್ರೌಢ ಶಿಕ್ಷಣನ್ ಕುಡ್ಲದ ಸಂತ ಅಲೋಶಿಯಸ್ ಶಾಲೆಡ್ ಮಲ್ತಿನ ಮೇರ್ ಕಲಿಕೆದ ಒಟ್ಟುಗು ನಟನಾಸಕ್ತಿ ತಾನ್ ರಡ್ಡನೇ ತರಗತಿಡ್ ಉಪ್ಪುನಗನೇ ಮೋನೆಗ್ ರಂಗ್ ಪಾರ್ದ್ ಮತ್ತರ್ಮೆ ಏರಿಯೆರ್. ಸುರುತ್ತ ಅವಕಾಶಡ್ ತಿಕ್ಕಿನ ಪ್ರೋತ್ಸಾಹ ದುಂಬುದ ಪಜ್ಜೆ ದೀಯರೇ ಅವಕಾಶ ಆಂಡ್. ಆನಿರ್ದ್ ಬೊಕ್ಕ ತಿಕ್ಕಿನ ಒವ್ವೆ ಅವಕಾಶನ್ ಬುಡoದೆ ಪ್ರತಿಯೊಂಜಿ ನಾಟಕಡ್ ಲಾ ಪಾಲ್ ಪಡೆಯೊಂದು ಮಾತೆರ್ನಲ ಪ್ರಶಂಸೆಗ್ ಪಾತ್ರ ಆವೊಂದು ಇತ್ತೆರ್. ತನ್ನ ಪ್ರೌಢಶಿಕ್ಷಣದ ವಿದ್ಯಾಭ್ಯಾಸದ ಪೊರ್ತುಡು ದೋಸ್ತಿಲ್ನಕ್ಲೆನೊಟ್ಟುಗು ಸೇರೊಂದು ತಾನೇ ಕಥೆ ಬರೆದ್,ನಿರ್ದೇಶನ ಮಲ್ತ್ ದ್, ನಾಟಕ ಪ್ರಸ್ತುತಿ ಮಲ್ತೆರ್. ಅಂಚನೇ ತನ್ನ ಕೂಟ ದೊಟ್ಟುಗು ಕುಡ್ಲದ ರೇಡಿಯೋ ಸಾರಂಗ್ ಡ್ಲಾ ವಿಶೇಷ ಕಾರ್ಯಕ್ರಮಲಾ ಕೊರೊಂದು ಇತ್ತೆರ್.

ತನ್ನ ಪಿಯುಸಿ ಶಿಕ್ಷಣಗ್ ಕುಡ್ಲದ ರಾಮಕೃಷ್ಣ ಕಾಲೇಜ್ಗ್ ಸೇರಿನ ಮೆರೆಗ್ ತನ್ನ ಕಲಾಸಕ್ತಿಗ್ ನನಾತ್ ಅವಕಾಶ ತಿಕ್ಕ್oಡ್. ಒಂಜೇ ವರ್ಷಡ್ ಸ್ವತಃ ತಾನೇ ರಚನೆ ಮಲ್ತಿನ ರಡ್ಡ್ ನಾಟಕನ್ ಗೊಬ್ಬಾಯೆರ್. ಆಂಡ ತನ್ನ ರಂಗಭೂಮಿ ಪಯಣ ಸುರು ಆಯಿನಿ ಅಲೋಶಿಯಸ್ ಕಾಲೇಜ್ ಡ್ ಪಂದ್ ಪನ್ಪೆರ್ ರಾಘವ್.

ಅಂದ್ 2016 ನೇ ಇಸವಿಡ್ “ರಂಗೋತ್ಸವ” ಪನ್ಪಿನ ಪಂಥೋ ಡು ಶ್ರೀಮತಿ. ಭವ್ಯ ಶೆಟ್ಟಿ ಮೆರೆನ ನಿರ್ದೇಶನಡ್ ಮೂಡ್ದು ಬತ್ತಿನ ” ಅಗ್ನಿವರ್ಣ” ಪನ್ಪಿನ ನಾಟಕಡ್ ಅಗ್ನಿವರ್ಣನ ಮುಖ್ಯ ಪಾತ್ರ ಮಲ್ಪುನ ಅವಕಾಶ ಮೆರೆಗ್ ತಿಕ್ಕ್oಡ್. ಅಲ್ಪರ್ದ್ ರಂಗಭೂಮಿ ಪಂಡ ಕಾಲಿ ಡೈಲಾಗ್ಸ್ ಪನ್ಪಿನ ಮಾತ್ರ ಅತ್ತ್ ಕಲ್ಪರೆ ನನಾತ್ ಉಂಡು ಪಂದ್ ತೆರಿಯೊಂಡಿನ ಮೇರ್ “ಜರ್ನಿ ಥಿಯೇಟರ್ ಗ್ರೂಪ್” ಗ್ ಸೇರಿಯೆರ್. ರಂಗ ಪರ್ಬಡ್ ಪಾಲ್ ಪಡೆದ್ ಬೇತೆ ಬೇತೆ ರಂಗ ನಿರ್ದೇಶಕೆರ್ ನೊಟ್ಟುಗು ಅಂಚನೇ ರಂಗಸಂಘಟಕೆರ್ನೊಟ್ಟುಗು
ಪಾಲ್ ಪಡೆದ್ ಅಕ್ಲೆನೊಟ್ಟುಗು ಬೇಲೆ ಮಲ್ತೆರ್. ಒಂಜಿ ರಂಗ ಚಟುವಟಿಕೆನ್ ಎಂಚ ಮಲ್ಪುನು ಪನ್ಪಿನೆನ್ ಮಾತಾ ತೆರಿಯೊಂದು ತನ್ನ ಕಾಲೇಜ್ ಡ್ ತಾನೇ ಸ್ವತಃ ನಾಟಕಗ್ ಬೋಡಾಯಿನ ಪರಿಕರನ್ ತಯಾರ್ ಮಲ್ಪರೆ ಕಲ್ತೆರ್.

ಬೀದಿ ನಾಟಕ, ಕಾರ್ಯಗಾರ ಇಂಚ ಬೇತೆ ಬೇತೆ ರಂಗಭೂಮಿ ಚಟುವಟಿಕೆಡ್ ಪಾಲ್ ಪಡೆದ್,2018 ನೇ ಇಸವಿಡ್ ಅಲೋಶಿಯಸ್ ಕಾಲೇಜ್ ಡ್ ನಡತಿನ ಬಿರುಗಾಳಿ ನಾಟಕದ ಮುಖ್ಯ ಪಾತ್ರಲಾ ಮಲ್ದೆರ್, ಅಂಚನೇ ಕದ್ರಿ ನವನೀತ ಶೆಟ್ಟಿ ನಿರ್ದೇಶಡ್ ಮೂಡ್ದ್ ಬತ್ತಿನ ” ಸಾಯಿನಾಥ ಶಿರಿಡಿ ಬಾಬಾ “ ನಾಟಕಡ್ ಸಾಯಿ ಬಾಬಾನ ಮುಖ್ಯ ಪಾತ್ರ ಮಲ್ತಿನ ಪುಗಾರ್ತೆ ಮೆರೆಗ್ ಉಂಡು.

ತಾನ್ ಕಲ್ತಿನ ವಿದ್ಯೆನ್ ನನಾತ್ ಜೋಕ್ಲೆಗ್, ರಂಗಭೂಮಿ ಆಸಕ್ತ ಕಲಾವಿದೆರೆಗ್ ಕಲ್ಪಾವೊಂದು ಉಲ್ಲೆರ್. ಪ್ರೌಢ ಶಾಲಾ ಜೋಕ್ಲೆಗ್ 2 ನಾಟಕ,1 ಬೀದಿ ನಾಟಕ, ಸಂತ ಅಲೋಶಿಯಸ್ ಕಾಲೇಜ್ ದ ಪಿಯುಸಿ ಜೋಕ್ಲೆಗ್ ಬೊಕ್ಕ ಎಸ್.ಡಿ.ಎಂ ಕಾನೂನು ಕಾಲೇಜ್ ದ ಜೋಕ್ಲೆಗ್ ಬೀದಿ ನಾಟಕ ನಿರ್ದೇಶನಲಾ ಮಲ್ದೆರ್ .

ತನ್ನ ವಿದ್ಯಾಭ್ಯಾಸ ಮುಗಿದ್ ಎನ್ಎಸ್ ಡಿ(NSD)ಸೇರೋಡು ಪನ್ಪಿ ಕನ ಇತ್ತಿನ ಮೇರ್ ಐತ ಪ್ರಕಾರ NSD ಬೆಂಗ್ಳೂರುಗು ಅರ್ಜಿ ಪಾರ್ದ್ ಐಟ್ ಆಯ್ಕೆ ಆದ್ ಅಲ್ಪ ಒಂಜಿ ವರ್ಷ ಡಿಪ್ಲೋಮ ಮಲ್ತೆರ್. ತನ್ನ ರಂಗಾಭ್ಯಾಸದ ಪೊರ್ತುಡು ಮಲೆಗಳಲ್ಲಿ ಮದುಮಗಳು ಪನ್ಪಿನ 9 ಗಂಟೆದ ನಾಟಕಡ್ ದೇವಯ್ಯ ಪನ್ಪಿನ ಮುಖ್ಯ ಪಾತ್ರ ಅಭಿನಯ ಮಲ್ತಿನವು ಪೆರ್ಮೆದ ಇಚಾರ.

ಪ್ರಸ್ತುತ ನಮ್ಮ ಕುಡ್ಲ ವಾಹಿನಿಡ್ ನಿರೂಪಕೆರಾದ್ ರಂಗಭೂಮಿಡ್ ನನಾತ್ ಸಾಧನೆ ಮಲ್ಪೋಡು ಪನ್ಪಿ ಅಂಗಲ್ಪುಡು ರಂಗಭೂಮಿಡ್ ನನಲ ಪೊರ್ಬೊಂದು ಉಪ್ಪುನ ಯುವ ಕಲಾವಿದೆರಾಯಿನ ಮೆರೆಗ್, ಮೆರ್ನ ಕಲಾಬದ್ಕ್ ಗ್ ನನಾತ್ ಮಾನಾದಿಗೆ ತಿಕ್ಕಡ್. ಈ ಅಭೂತಪೂರ್ವ ಕಲಾವಿದಗ್ ಕಲಾ ಪ್ರೇಮಿಲು ಬೆರಿ ಬೊಟುದು ನನಾತ್ ಪ್ರೋತ್ಸಾಹ ಕೊರಡ್ ಕಲಾಮಾತೆ ಮೆರೆಗ್ ನನಾತ್ ಕಲಾಸೇವೆ ಮಲ್ಪರೆ ಶಕ್ತಿ ಕೊರಡ್ ಪನ್ಪಿನವು ನಮ್ಮ ಬಿನ್ನಾಪು.

✍🏻ಶ್ರೀನಿಧಿ ಶೆಟ್ಟಿ