ಕೊರೋನ ಕೋವಿಡ್ ತುಲು ವಾರ್ತೆ ತುಳುನಾಡ್ ತುಲು ಭಾಷೆ

ಕರ್ನಾಟಕದ ಮಾತಾ ಗಡಿಜಿಲ್ಲೆಡ್ ವೀಕೆಂಡ್ ಕರ್ಪ್ಯೂ ರದ್ದು

ಬೆಂಗ್ಳೂರು: ಕರ್ನಾಟಕದ ಗಡಿ ಜಿಲ್ಲೆಡ್ ವೀಕೆಂಡ್ ಕರ್ಫ್ಯೂ ಉಂತಾದ್ ರಾಜ್ಯ ಸರ್ಕಾರ ಆದೇಶ ಕೊರ್ತುಂಡು . ಕೊಡಗು, ಕುಡ್ಲ , ಒಡಿಪು , ಹಾಸನಡ್ ಇತ್ತೆ ಜಾರಿಡ್ ಇತ್ತಿನ ವಾರಾಂತ್ಯದ ಕರ್ಫ್ಯೂನ್ ತೆರವು ಮಲ್ಪರೆ ಆದೇಶ ಕೊರ್ತೆರ್ .

ಗಡಿ ಜಿಲ್ಲೆಡ್ ಶೇ.2ರ್ದ್ ಕಮ್ಮಿ ಪಾಸಿಟಿವಿಟಿ ತೊಜಿದ್ ಬತ್ತಿನ ಕಾರಣ ಈ ನಿರ್ಧಾರ ದೆತೊನ್ದೆರ್ . ಆಂಡ ಕೊವಿಡ್ ಸೋಂಕು ಜಾಸ್ತಿ ಆಂಡ ಜಿಲ್ಲೆ ಜಿಲ್ಲಾಧಿಕಾರಿಲು ಕರ್ಫ್ಯೂ ಜಾರಿ ಮಲ್ಪೊಲಿ .

ಕುಡ್ಲಡ್ ಜಾಸ್ತಿ ಕೋವಿಡ್ ಟೆಸ್ಟ್ ಮಲ್ಪರೆ ಸೂಚನೆ

ಕುಡ್ಲ : ಜಿಲ್ಲೆಡ್ ಕೋವಿಡ್ ಪಾಸಿಟಿವಿಟಿ ರೇಟ್ ಶೇ.2ರ್ದ್ ಕಮ್ಮಿ ಮಲ್ಪುನ ನೆಲೆಟ್ಟ್ ಜಿಲ್ಲಾಡಳಿತದ ಸೂಚನೆ ಮಿತ್ತ್ ಟೆಸ್ಟ್ ಸಂಖ್ಯೆ ಜಾಸ್ತಿ ಮಲ್ತೊಂದು ಉಲ್ಲೆರ್ , ಜಿಲ್ಲೆದ ಪ್ರತಿ ಗ್ರಾಮ ಪಂಚಾಯ್ತಿಗ್ ತಲಾ 150 ಕೋವಿಡ್ ತಪಾಸಣೆ ನಡಪಾವುನ ಗುರಿ ದೀತೆರ್ . ಪ್ರತಿ ಸರ್ಕಾರಿ ಕಚೇರಿ, ವಾಣಿಜ್ಯ ಸಂಕೀರ್ಣಗ್ ಬರ್ಪಿನಕ್ಲೆನ ಕೋವಿಡ್ ಟೆಸ್ಟ್ ಮಲ್ಪರೆ ಸೂಚನೆ ಕೊರ್ತೆರ್ . ಇತ್ತೆ ವೈರಲ್ ಜ್ವರ ಉಪ್ಪುನೆರ್ದಾವರ ಕೋವಿಡ್ ಟೆಸ್ಟ್ ಅನಿವಾರ್ಯ ಆತುಂಡು . ಕುಡ್ಲಡ್ ಕೋವಿಡ್ ಪಾಸಿಟಿವಿಟಿ ದರ ಶೇ.3.2 ಉಂಡು . ಅವೆನ್ ಕಮ್ಮಿ ಮಲ್ಪರೆ ತಪಾಸಣೆ ಸಂಖ್ಯೆನ್ ನನಾತ್ ಜಾಸ್ತಿ ಮಲ್ಪರೆ ಆರೋಗ್ಯ ಇಲಾಖೆದ ಅಧಿಕಾರಿಲೆಗ್ ತೆರಿಪಾಯೆರ್.

13ಕ್ಕ್ ಜೋಕಟ್ಟೆ ಗ್ರಾ.ಪಂ ಜಮಾಬಂಧಿ

ಕುಡ್ಲ : ಪೇಂಟೆದ ಜೋಕಟ್ಟೆ ಗ್ರಾಮ ಪಂಚಾಯತ್ ದ 2020-21ನೇ ಸಾಲ್ ದ ಜಮಾಬಂಧಿ ಉಂದುವೇ ಸೆ.13ನೆ ಸೋಮವಾರ ಕಾಂಡೆ 11 ಗಂಟೆಗ್ ಜೋಕಟ್ಟೆ ಗ್ರಾಮ ಪಂಚಾಯತ್‍ದ ಸಭಾಂಗಣಡ್ ನಡಪರೆ ಉಂಡು ಪಂದ್ ಪಂಚಾಯತ್ ಅಭಿವೃದ್ಧಿ ಅಧಿಕಾರಿ ಪ್ರಕಟಣೆಡ್ ತೆರಿಪಾದೆರ್ .

ಕೊಡವೂರು : ನಿವೃತ್ತ ಶಿಕ್ಷಕಿ ಮಲ್ಲಿಕಾ ದೇವಿಗ್ ಮಾನದಿಗೆ

ಒಡಿಪು : ಕೊಡವೂರು ಸರಕಾರಿ ಮಾದರಿ ಹಿರಿಯ ಪ್ರಾಥಮಿಕ ಶಾಲೆ, ಶಾಲಾಭಿವೃದ್ಧಿ ಸಮಿತಿ, ಹಳೆ ವಿದ್ಯಾರ್ಥಿ ಸಂಘ, ಯುವಕ ಸಂಘ,ಶ್ರೀ ದುರ್ಗಾ ಮಹಿಳಾ ಮಂಡಲ, ಸಾರ್ವಜನಿಕ ಶ್ರೀ ಗಣೇಶೋತ್ಸವ ಸಮಿತಿದ ಒಟ್ಟು ಸೇರಿಗೆಡ್ ಕರಿನ 36 ವರ್ಷರ್ದ್ ಕೊಡವೂರು ಶಾಲಾ ಶಿಕ್ಷಕಿಯಾದ್ ಅನುಪಮ ಬೇಲೆ ಮಲ್ತ್ ಇಂಚೋಗು ನಿವೃತ್ತಿ ಆಯಿನ ಮಲ್ಲಿಕಾ ದೇವಿ ಮೆರೆನ ಮಾನದಿಗೆ ಲೇಸ್ ಸೆ.6 ತಾರೀಖ್ ಗ್ ಕೈತಲ್ ದ ವಿಪಶ್ರೀ ಸಭಾಂಗಣಡ್ ನಡತುಂಡು .

ಶಾಲೆದ ಪೊಸ ಕೊಠಡಿನ್ ಉದಿಪನ ಮಲ್ತ್ ಲೇಸ್ ಡ್ ಪಾಲ್ ಪಡೆಯಿನ ಒಡಿಪು ನಗರಾಭಿವೃದ್ಧಿ ಪ್ರಾಧಿಕಾರದ ಗುರ್ಕಾರ್ಲಾಯಿನ ರಾಘವೇಂದ್ರ ಕಿಣಿ ಮೇರ್ ಪಾತೆರ್ದ್ ಶಿಕ್ಷಕೆರ್ ಏಪಲಾ ಅಧ್ಯಯನ ಶೀಲರಾದ್ ಶಿಕ್ಷಣದ ಒಟ್ಟುಗು ಜೀವನಗ್ ದಾರಿದೀಪ ಆಪಿನ ಮೌಲ್ಯಯುತ ವಿಷಯನ್ ಜೋಕ್ಲೆಗ್ ತೆರಿಪಾದ್ ಕೊರ್ನಗ ಪ್ರಜ್ಞಾವಂತ ಸಮಾಜ ನಿರ್ಮಾಣ ಆಪಿನೆತ್ತ ಒಟ್ಟುಗು ಅಂಚಿನ ಕಲ್ಪರ್ತಿಲು ಸದಾ ಸ್ಮರಣೀಯರಾದ್ ಉಪ್ಪುವೆರ್ ಪಂದ್ ಪಂಡೆರ್.

ಮಾನದಿಗೆ ಸ್ವೀಕಾರ ಮಲ್ತ್ ಪಾತೆರಿನ ಮಲ್ಲಿಕಾ ದೇವಿ ಮೇರ್ ಸಹೋದ್ಯೋಗಿಲು ,ಶಿಕ್ಷಣ ಇಲಾಖೆದಕ್ಲೆಗ್ ಅಂಚನೇ ಕೈತಲ್ ದ ಸಂಘ ಸಂಸ್ಥೆದಕುಲು , ಹಳೆ ವಿದ್ಯಾರ್ಥಿಲು ಕೊರಿನoಚಿನ ಸಾಕಾರ ರ್ದ್ ಸತತ 36 ವರ್ಷದ ಕಾಲ ಸುಲಲಿತವಾದ್ ಸೇವೆ ಮಲ್ಪರೆ ಸಾಧ್ಯ ಆಂಡ್ ಅಂಚನೇ ಸಾಕಾರ ಕೊರಿನಕ್ಲೆಗ್ ಸೊಲ್ಮೆ ಸಂದೈತ ಮಲ್ತೆರ್ .

ಲೇಸ್ ಅಟ್ಟನೆ ಮಲ್ತಿನ ಸಂಘ ಸಂಸ್ಥೆದೊಟ್ಟುಗು ಊರುದ ಧಾರ್ಮಿಕ, ಸಾಮಾಜಿಕ, ಸಾಂಸ್ಕೃತಿಕ ,ಸಹಕಾರಿ ಬೊಕ್ಕ ಕ್ರೀಡಾ ಸಂಸ್ಥೆದಕುಲು , ಊರುದ ಗಣ್ಯೆರ್ , ಪರ ಜೋಕುಲು, ಶ್ರೀಮತಿ ಮಲ್ಲಿಕಾ ದೇವಿ ಮೆರೆನ್ ಆರ್ನ ಪತಿ ತಿಮ್ಮಪ್ಪ ಬಾಬು ಪೂಜಾರಿ ಮೆರೆನ ಒಟ್ಟುಗು ಮಾನದಿಗೆ ಮಲ್ತೆರ್.ಸ್ಥಳೀಯ ನಗರಸಭಾ ಸದಸ್ಯ ವಿಜಯ ಕೊಡವೂರು ಗುರ್ಕಾರ್ಮೆ ವಹಿಸ್ದ್ ಮಾನದಿಗೆ ಪಡೆಯಿನ ಪುಸ್ತಕದ ಪಾಠದ ಒಟ್ಟುಗು ಜೀವನ ಪಾಠ ಕಲ್ಪಯಿನ ಉತ್ತಮ ಶಿಕ್ಷಕಿ ಪಂಡೆರ್ .ಮಲ್ಲ ಬಿನ್ನೆರ್ ಆದ್ ಕೊಡವೂರು ವ್ಯವಸಾಯ ಸೇವಾ ಸಹಕಾರಿ ಸಂಘದ ಗುರ್ಕಾರ್ಲಾಯಿನ ನಾರಾಯಣ ಬಲ್ಲಾಳ್, ಮತ್ಸ್ಯೋದ್ಯಮಿ ಆನಂದ.ಪಿ.ಸುವರ್ಣ, ಶಂಕರನಾರಾಯಣ ಪ್ರತಿಷ್ಠಾನದ ಗುರ್ಕಾರ್ಲಾಯಿನ ಟಿ.ರಾಘವೇಂದ್ರ ರಾವ್,ಶಾಲಾ ಕಟ್ಟಡ ನಿರ್ಮಾಣ ಸಮಿತಿದ ಗುರ್ಕಾರ್ಲಾಯಿನ ಮಧು ಬಂಗೇರ,ಮುಖ್ಯ ಶಿಕ್ಷಕಿ ಪುಷ್ಪಾವತಿ,ಯುವಕ ಸಂಘದ ಗುರ್ಕಾರ್ಲಾಯಿನ ಪ್ರಭಾತ್ ಕೋಟ್ಯಾನ್, ಸಾರ್ವಜನಿಕ ಗಣೇಶೋತ್ಸವ ಸಮಿತಿದ ಗುರ್ಕಾರ್ಲಾಯಿನ ಹರೀಶ್ ಕೊಡವೂರು, ಸಾಮಾಜಿಕ ಮುಂದಾಳು ಅರುಣ್ ಕುಮಾರ್ ಪಾಲ್ ಪಡೆದಿತ್ತೆರ್ . ಈ ಪೊರ್ತುಡು ಶಾಲೆದ ಕನ್ನಡ ಬೊಕ್ಕ ಆಂಗ್ಲ ಮಾಧ್ಯಮ ತರಗತಿದ ಮಾತಾ ಶಿಕ್ಷಕೆರೆಗ್ ಮಾನದಿಗೆ ಮಲ್ತೆರ್.

ರೈತ ಸಾಹಿತಿ ವೀರಣ್ಣ ಕುರುವತ್ತಿ ಗೌಡ, ಶಿಕ್ಷಕಿ ಶೋಭಾ ನಿವ್ರತ್ತ ಶಿಕ್ಷಕಿನ ಕ್ರಿಯಾಶೀಲ ಸೇವಾ ವೈಖರಿದ ಬಗ್ಗೆ ಅಕ್ಲೆನ ಅನಿಸಿಕೆ ಪಂಡೆರ್.
ಮಧು ಬಂಗೇರ ಎದುಕೊಂಡೆರ್ ,ಪ್ರಭಾತ್ ಕೋಟ್ಯಾನ್ ಸೊಲ್ಮೆ ಸಂದೈತ ಮಲ್ತೆರ್ .ಹಳೆವಿದ್ಯಾರ್ಥಿ ಸಂಘ ದ ಗುರ್ಕಾರ್ಲಾಯಿನ ಸತೀಶ್ ಕೊಡವೂರು ಲೇಸ್ ನಡಪಾದ್ ಕೊರಿಯೆರ್.

ಅಮೃತ್ ಗ್ರಾಮ ಪಂಚಾಯತ್ ಯೋಜನೆದಡಿ ಜಿಲ್ಲೆದ 27 ಪಂಚಾಯತ್‍ ಆಯ್ಕೆ

ಕುಡ್ಲ : ಮೀನುಗಾರಿಕೆ, ಬಂದರು ಬೊಕ್ಕ ಒಳನಾಡು ಸಾರಿಗೆ ಸಚಿವೆರಾಯಿನ ಎಸ್. ಅಂಗಾರ ಮೆರ್ನ ಗುರ್ಕಾರ್ಮೆಡ್ ಪೇಂಟೆದ ಜಿಲ್ಲಾ ಪಂಚಾಯತ್ ಕಚೇರಿದ ವಿಡಿಯೋ ಕಾನ್ಫರೆನ್ಸ್ ಹಾಲ್‍ಡ್ ಅಮೃತ್ ಗ್ರಾಮ ಪಂಚಾಯತ್ ಯೋಜನೆ ಅನುಷ್ಠಾನದ ಸಮಿತಿ ಸಭೆನ್ ಅಟ್ಟನೆ ಮಲ್ತಿತ್ತೆರ್ , ಈ ಸಭೆಟ್ ಜಿಲ್ಲೆ ಪೇಂಟೆದ,ತಾಲೂಕುದ 27 ಗ್ರಾಮ ಪಂಚಾಯತ್‍ದ ಅಮೃತ್ ಗ್ರಾಮ ಪಂಚಾಯತ್ ಯೋಜನೆದಡಿ ಆಯ್ಕೆ ಮಲ್ತೆರ್ .

ಬಂಟ್ವಾಳ ತಾಲೂಕುದ ಸಂಗಬೆಟ್ಟು, ಇರ್ವತ್ತೂರು, ಪಿಲಾತ ಬೆಟ್ಟು, ಕಡೇಶ್ವಾಲ್ಯ, ಬಾಳೆಪುಣಿ ಬೊಕ್ಕ ಇಡ್ಕಿದು, ಬೆಳ್ತಂಗಡಿ ತಾಲೂಕುದ ಮಡಂತ್ಯಾರು, ಕೊಕ್ಕಡ, ಧರ್ಮಸ್ಥಳ, ಉಜಿರೆ, ಹೊಸಂಗಡಿ, ಅಳದಂಗಡಿ, ಕಡಬ ತಾಲೂಕುದ ಸವಣೂರು, ಅಲಂಕಾರು, ಪುತ್ತೂರು ತಾಲೂಕುದ ಉಪ್ಪಿನಂಗಡಿ, ಆರ್ಯಾಪು, ಕಬಕ, ಸುಳ್ಯ ತಾಲೂಕಿನ ಅರಂತೋಡು, ಮಂಡೆಕೋಲು, ಮರ್ಕಂಜ, ಮೂಡಬಿದ್ರೆ ತಾಲೂಕಿನ ಬೆಳುವಾಯಿ, ತೆಂಕಮಿಜಾರು, ಕುಡ್ಲ ತಾಲೂಕುದ ಬಡಗ ಎಡಪದವು, ಗಂಜಿಮಠ, ಮುನ್ನೂರು, ಹಳೆಯಂಗಡಿ, ಪೆರ್ಮುದೆ ಗ್ರಾಮ ಪಂಚಾಯತ್‍ ಅಮೃತ್ ಗ್ರಾಮ ಪಂಚಾಯತ್ ಯೋಜನೆದಡಿ ಆಯ್ಕೆ ಮಲ್ದೆರ್ ಪಂದ್ ಪಂಡೆರ್.

ಶಿಕ್ಷಕೆರ್ ಜೋಕ್ಲೆನ ಭವಿಷ್ಯ ರೂಪಿಸಾವುನಕುಲು : ಸಚಿವ ಎಸ್. ಅಂಗಾರ

ಕುಡ್ಲ : ಎಡ್ಡೆ ಶಿಕ್ಷಣ ಕೊರ್ದು ಜೋಕ್ಲೆನ ಸರ್ವಾಂಗೀಣ ವಿಕಾಸಗ್ ಕಾರಣವಾಯಿನ ಶಿಕ್ಷಕೆರ್ನ ಪಾತ್ರ ಬಾರಿ ಅನನ್ಯವಾಯಿನವು ಪಂದ್ ಮೀನುಗಾರಿಕೆ, ಬಂದರು ಬೊಕ್ಕ ಒಳನಾಡು ಜಲಸಾರಿಗೆ ಸಚಿವೆರಾಯಿನ ಎಸ್. ಅಂಗಾರ ಮೇರ್ ಶಿಕ್ಷಕೆರೆಗ್ ಪಂಡೆರ್ .

ಮೇರ್ ಪೇಂಟೆದ ಜಪ್ಪಿನಮೊಗರು ಪ್ರೆಸ್ಟೀಜ್ ಶಾಲೆಡ್ ಜಿಲ್ಲಾಡಳಿತ, ಜಿಲ್ಲಾ ಪಂಚಾಯತ್ ಬೊಕ್ಕ ಸಾರ್ವಜನಿಕ ಶಿಕ್ಷಣ ಇಲಾಖೆದ ವತಿರ್ದ್ ಅಟ್ಟನೆ ಮಲ್ತಿನ ಶಿಕ್ಷಕೆರ್ನ ದಿನಾಚರಣೆ ಲೇಸ್ ಗ್ ಚಾಲನೆ ಕೊರ್ದು ಈ ಅಭಿಪ್ರಾಯ ವ್ಯಕ್ತಪಡಿಸಾಯೆರ್ .

ಲೇಸ್ ಡ್ ಗುರ್ಕಾರ್ಮೆ ವಹಿಸಾಯಿನ ಶಾಸಕೆರಾಯಿನ ವೇದವ್ಯಾಸ ಕಾಮತ್ ಮೇರ್ ಪಾತೆರ್ದ್ , ಕೋವಿಡ್-೧೯ ಸೋಂಕುದ ಸಂಕಷ್ಟದ ಪೊರ್ತುಡು ಜೋಕುಲು ಶಿಕ್ಷಣ ವಂಚಿತೆರಾಯಿನ ಜೋಕ್ಲೆನ್ ತೂವೊಂದು , ಜೋಕ್ಲೆಗ್ ತಮ್ಮ ಕೈಟ್ ಆಪಿನ ಬೇಲೆನ್ ಮಲ್ಪೊಡು ಪಂದ್ ಪಂಡೆರ್.

ಕರ್ನಾಟಕ ಅಲೆಮಾರಿ/ಅರೆ ಅಲೆಮಾರಿ ಅಭಿವೃದ್ಧಿ ನಿಗಮದ ಗುರ್ಕಾರ್ಲಾಯಿನ ಕೆ. ರವೀಂದ್ರ ಶೆಟ್ಟಿ, ಕುಡ್ಲ ಮಹಾನಗರ ಪಾಲಿಕೆ ಸದಸ್ಯೆರಾಯಿನ ವೀಣಾ ಮಂಗಳ, ಸಾರ್ವಜನಿಕ ಶಿಕ್ಷಣ ಇಲಾಖೆದ ಉಪ ನಿರ್ದೇಶಕ ಮಲ್ಲೇ ಸ್ವಾಮಿ, ಗಣ್ಯರು ಬೊಕ್ಕ ಶಿಕ್ಷಕೆರ್ ಲೇಸ್ ಡ್ ಪಾಲ್ ಪಡೆದಿತ್ತೆರ್.

ಸೆ.8ರ ಬುಧವಾರದಾನಿ ಲಕ್ಷ ಲಸಿಕಾ ಮೇಳ

ಕುಡ್ಲ : ಜಿಲ್ಲೆಡ್ ಉಂದುವೇ ಸೆ. 8 ನೇ ಬುಧವಾರ ಕೋವಿಡ್ ಲಸಿಕೆದ ಲಕ್ಷ ಲಸಿಕಾ ಮೇಳನ್ ಅಟ್ಟನೆ ಮಲ್ದೆರ್ . 430 ಉಪಕೇಂದ್ರಡ್ ಐಕಾದ್ ಸೂಕ್ತ ವ್ಯವಸ್ಥೆ ಮಲ್ದೆರ್ , ಉಪ್ಪುನ ಸಿಬ್ಬಂದಿಲ್ ನೊಟ್ಟುಗು ಹೆಚ್ಚುವರಿ ಸಿಬ್ಬಂದಿಲೆನ್ ತಯಾರ್ ಮಲ್ದೆರ್ . ಪ್ರತಿ ಕೇಂದ್ರಡ್ ರಡ್ಡ್ ಜನ ಡೇಟಾ ಎಂಟ್ರಿ ಆಪರೇಟರ್ ಸೇರಿನಂಚ ಅಗತ್ಯ ಉಪ್ಪುನ ಸಿಬ್ಬಂದಿ ಲೆನ್ ಈ ಲೇಸ್ ನೇಮಕ ಮಲ್ದೆರ್ . 18 ವರ್ಷ ಮಿತ್ತ್ ದಕುಲು ಸುರುತ ಬೊಕ್ಕ ರಡ್ಡನೇ ಡೋಸ್ ಲಸಿಕೆನ್ ಈ ಲಸಿಕಾ ಮೇಳಡ್ ಪಡೆಯೊಲಿ .

ಮಹಾನಗರಪಾಲಿಕೆ ಮೇಯರ್ ಪ್ರೇಮಾನಂದ ಶೆಟ್ಟಿ, ಜಿಲ್ಲಾ ಪಂಚಾಯತ್ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಡಾ. ಕುಮಾರ್, ಮಹಾನಗರ ಪಾಲಿಕೆ ಆಯುಕ್ತ ಅಕ್ಷಯ್ ಶ್ರೀಧರ್ ಪಾಲ್ ಪಡೆದಿತ್ತೆರ್ .
ಶಾಸಕೆರಾಯಿನ ವೇದವ್ಯಾಸ ಕಾಮತ್, ಭರತ್ ಶೆಟ್ಟಿ, ವಿಧಾನ ಪರಿಷತ್ ಸದಸ್ಯೆರಾಯಿನ ಪ್ರತಾಪ್ ಸಿಂಹ ನಾಯಕ್, ಉಪ ವಿಭಾಗಾಧಿಕಾರಿ ಮದನ್ ಮೋಹನ್, ಜಿಲ್ಲಾ ಆರೋಗ್ಯ ಬೊಕ್ಕ ಕುಟುಂಬ ಕಲ್ಯಾಣಾಧಿಕಾರಿ ಡಾ.ಕಿಶೋರ್, ಆರೋಗ್ಯ ಇಲಾಖೆದ ಅಧಿಕಾರಿಲು ಸೇರಿನಂಚ ಅಧಿಕಾರಿಲು ಪಾಲ್ ಪಡೆದಿತ್ತೆರ್ .

ಕಾರ್ಕಡ ಗೆಳೆಯರ ಬಳಗದ ವತಿರ್ದ್ ಲಸಿಕಾಕರಣ ಮೇಳ

ಕೋಟ: ಗೆಳೆಯರ ಬಳಗ ಕಾರ್ಕಡ ಮೆಕ್ಲೆನ ವತಿರ್ದ್ ಕೋವಿಡ್ ಲಸಿಕಾ ಮೇಳ ಬುಧವಾರ ಕಾರ್ಕಡ ಪೆರಿಯ ಪ್ರಾಥಮಿಕ ಶಾಲಾ ಸಭಾಂಗಣಡ್ ನಡತುಂಡು . ಲೇಸ್ ನ್ ಸಾಲಿಗ್ರಾಮ ಪ್ರಾಥಮಿಕ ಆರೋಗ್ಯ ಕೇಂದ್ರದ ವೈದ್ಯಾಧಿಕಾರಿ ಡಾ. ರಾಘವೇಂದ್ರ ರಾವ್ ಉದಿಪನ ಮಲ್ತ್ ಕೋವಿಡ್ ನ್ ಉಂತಾಯೆರೆ ಬೋಡಾಯಿನ ಸಮರೋಪಾಧಿ ಲೇಸ್ ನ್ ಸರಕಾರ ಆಯಾ ಭಾಗಡ್ ಅಟ್ಟನೆ ಮಲ್ದೆರ್ . ನಮ್ಮ ಈ ಭಾಗಡ್ ನಮರ್ದ್ ಆಪಿನ ಪ್ರಯತ್ನ ಜನಪ್ರತಿನಿಧಿಲೆನ ನಮ್ಮ ಸಿಬ್ಬಂದಿಲೆನ ಮುಖೇನ ಯಶಸ್ವಿಯಾವೊಂದು ಉಂಡು . ಇಂಚಿನ ಪೊರ್ತುಡು ಸ್ಥಳೀಯ ಸಂಘ ಸಂಸ್ಥೆದ ಪಾತ್ರ ವಿಶೇಷ ಅಭಿನಂದನಾರ್ಹ ಪಂದ್ ಪಂಡೆರ್.

ಮಲ್ಲ ಬಿನ್ನೆರ್ ಆದ್ ಕಾರ್ಕಡ ಹೊಸ ಹಿರಿಯ ಪ್ರಾಥಮಿಕ ಶಾಲಾ ಮುಖ್ಯ ಶಿಕ್ಷಕ ಪ್ರಭಾಕರ ಕಾಮತ್, ಸಾಲಿಗ್ರಾಮ ಪ.ಪಂಚಾಯತ್ ಸದಸ್ಯೆ ಗಿರೀಜಾ ಪೂಜಾರಿ, ಪ್ರಾಥಮಿಕ ಆರೋಗ್ಯ ಕೇಂದ್ರದ ಪೆರಿಯಾ ಸಿಬ್ಬಂದಿ ಮಿನ್ನು,ಆಶಾ ಬೊಕ್ಕ ಅಂಗನವಾಡಿ ಕಾರ್ಯಂತೆರ್ ಪಾಲ್ ಪಡೆದಿತ್ತೆರ್.

ಉಳ್ಳಾಲ ದರ್ಗಾಡ್ ನಾರಾಯಣಗುರು ನಾಮಸ್ಮರಣೆ

ಉಳ್ಳಾಲ: ಉಳ್ಳಾಲ ಸಯ್ಯದ್ ಮದನಿ ದರ್ಗಾ ಸಮಿತಿ ಬೊಕ್ಕ ಉಳ್ಳಾಲ ಜುಮಾ ಮಸೀದಿ ಒಟ್ಟು ಸೇರಿಗೆಡ್ ಕುದ್ರೋಳಿ ಕ್ಷೇತ್ರದ ಗುರು ಬೆಳದಿಂಗಳು ಸೇವಾ ಸಂಸ್ಥೆ ವತಿರ್ದ್ ಬ್ರಹ್ಮಶ್ರೀ ನಾರಾಯಣ ಗುರುಕ್ಲೆನ 167ನೇ ಪುಟ್ಟು ಪರ್ಬದ ಪರವಾದ್ ಉಳ್ಳಾಲ ದರ್ಗಾವಠಾರಡ್ ಮರ್ದ್ ದ ದೈ ನಡಿಯೆರ್ .

ಗುರು ಬೆಳದಿಂಗಳು ಸೇವಾ ಸಂಸ್ಥೆ ಗುರ್ಕಾರ್ಲು ಬೊಕ್ಕ ಕುದ್ರೋಳಿ ಗೋಕರ್ಣನಾಥ ಕ್ಷೇತ್ರದ ಖಜಾಂಚಿ ಆರ್.ಪದ್ಮರಾಜ್ ಪಾತೆರ್ದ್ ನಾರಾಯಣ ಗುರುಕ್ಲೆನ ತತ್ವ, ಆದರ್ಶನ್ ಸಮಾಜಗ್ ತೆರಿಪಾವುನ ನೆಲೆಟ್ಟ್ ಈ ಲೇಸ್ ಅಟ್ಟನೆ ಮಲ್ದಿನ ಬಗ್ಗೆ ಪಂಡೆರ್.

ರಾಜ್ಯಸಭಾ ಪ್ರತಿಪಕ್ಷದ ಮುಖ್ಯ ಸಚೇತಕ ಡಾ.ಸಯ್ಯದ್ ನಾಸಿರ್ ಹುಸೇನ್, ಉಳ್ಳಾಲ ದರ್ಗಾ ಗುರ್ಕಾರ್ಲಾಯಿನ ರಶೀದ್ ಹಾಜಿ ಒತ್ತು ಗುರ್ಕಾರ್ಲಾಯಿನ ಯು.ಕೆ.ಮೋನು ಇಸ್ಮಾಯಿಲ್, ಬಾವ ಮೊಹಮ್ಮದ್, ಪ್ರಧಾನ ಕಾರ್ಯದರ್ಶಿ ಮೊಹಮ್ಮದ್ ತ್ವಾಹ, ಜತೆ ಕಾರ್ಯಂತೆರಾಯಿನ ನೌಷಾದ್ ಅಲಿ, ಕೋಶಾಧಿಕಾರಿ ಯು.ಕೆ.ಇಲ್ಯಾಸ್, ನಗರಸಭಾ ಗುರ್ಕಾರ್ದಿ ಚಿತ್ರಕಲಾ, ಉಪಾಧ್ಯಕ್ಷ ಆಯೂಬ್ ಮಂಚಿಲ ಪಾಲ್ ಪಡೆದಿತ್ತೆರ್.

ಕೋಟ: ಹೈಡೋಕ್ಲೋರಿಕ್ ಆ್ಯಸಿಡ್ ಕೊನೊವೊಂದು ಇತ್ತಿನ ಟ್ಯಾಂಕರ್ ಪಲ್ಟಿ

ಕೋಟ: ಟ್ಯಾಂಕರ್ ಒಂಜಿ ಚಾಲಕನ ನಿಯಂತ್ರಣ ತತ್ತ್ ದ್ ತಿರ್ತ್ ಬೂರಿನ ಘಟನೆ ರಾಷ್ಟ್ರೀಯ ಹೆದ್ದಾರಿ ೬೬ನೆ ಕೋಟ ಮರು ಬಾಳೆಬೆಟ್ಟು, ದಲ್ಪ ನಡತುಂಡು . ಹೈಡೋಕ್ಲೋರಿಕ್ ಆ್ಯಸಿಡ್ ಕೊನೊವೊಂದು ಇತ್ತಿನ ಟ್ಯಾಂಕರ್ ಚಾಲಕನ ನಿಯಂತ್ರಣ ತತ್ತ್ ದ್ ಡಿವೈಡರ್‌ಗ್ ಢಿಕ್ಕಿ ಆತುಂಡು . ಐರ್ದ್ ಬೊಕ್ಕ ಸುಮಾರ್ 30 ಮೀಟರ್ ದೂರ ಪೋದು ಮಗುರ್ದುಂಡು . ನೆರ್ದಾವರ ಟ್ಯಾಂಕರ್ ಚಾಲಕ ಬೊಕ್ಕ ಕ್ಲೀನರ್ಗ್ ಎಲ್ಯ ಎಲ್ಯ ಗಾಯ ಆತುಂಡು.

ಕಾರವಾರರ್ದ್ ಕೊಚ್ಚಿಗ್ 23 ಟನ್ ಹೈಡೋಕ್ಲೋರಿಕ್ ಆ್ಯಸಿಡ್ ಕೊನೊಂದು ಇತ್ತೆರ್ . ಜಾಗೆಗ್ ಬತ್ತಿನ ಅಗ್ನಿಶಾಮಕ ದಳದ ಸಿಬ್ಬಂದಿ ಸೂಕ್ತ ಮುಂಜಾಗ್ರತಾ ಕ್ರಮ ದೆತೊoದೆರ್ . ಕೋಟ ಪೊಲೀಸ್ ಠಾಣೆಡ್ ಪ್ರಕರಣ ದಾಖಲಾತುಂಡು .