ಕೊರೋನ ಕೋವಿಡ್ ತುಲು ವಾರ್ತೆ ತುಳುನಾಡ್ ತುಲು ಭಾಷೆ

“ಮಹಿಳಾ ಸುರಕ್ಷತೆಗ್ ಒಂಜಿ ದಿನ ” ಪೊಲೀಸ್ ಆಯುಕ್ತೆರ್ನ ಆಂದೋಲನ

ಕುಡ್ಲ : ಮಹಿಳಾ ಸುರಕ್ಷೆತೆಗ್ ಒತ್ತು ಕೊರ್ಪಿನ ನೆಲೆರ್ದ್ ಕುಡ್ಲ ಪೊಲೀಸ್ ಕಮಿಷನರೇಟ್ ವ್ಯಾಪ್ತಿಡ್ ಆ.28ಗ್ ‘ಮಹಿಳಾ ಸುರಕ್ಷತೆಗಾದ್ ಒಂಜಿ ದಿನ’- ‘112ಕ್ಕ್ ಕರೆ ನಿಕ್ಲೆನೆರ್ದ್ -ನಿಕುಲು ಉಪ್ಪುನಡೆ ಭೇಟಿ ನಮರ್ದ ಪರಿಕಲ್ಪನೆಡ್ ಆಂದೋಲನ ಮಾದರಿಡ್ ಈ ಲೇಸ್ ನಡಪರೆ ಉಂಡು.

ರಾಜ್ಯೋಡು ಕೋಡೆ 1,301 ಪೊಸ ಕೊರೋನ ಕೇಸ್

ಬೆಂಗ್ಳೂರು,: ರಾಜ್ಯಡ್ ಶುಕ್ರವಾರ 1,301 ಪೊಸ ಕೊರೋನ ಪ್ರಕರಣ ದೃಢ ಆತುಂಡು . 17 ಜನಕುಲು ಸೋಂಕುಗು ಬಲಿಯಾತೆರ್ , 1,614 ಜನಕುಲು ಹುಷಾರ್ ಆತೆರ್ .

ರಾಜ್ಯಡ್ ಇತ್ತೆ ಒಟ್ಟು ಸೋಂಕಿತೆರ್ನ ಸಂಖ್ಯೆ 29,44,764ಕ್ ಮುಟ್ಟುದುಂಡು .

ಸರಳವಾದ್ ಪರ್ಯಾಯ ಮಲ್ಪರೆ ತಯಾರಿ : ಕೃಷ್ಣಾಪುರಶ್ರೀ

ಒಡಿಪು : ದುಂಬುದ ನವೆಂಬರ್ ಪೊರ್ತುಡು ಕೋವಿಡ್-19 ಸಾಂಕ್ರಾಮಿಕದ ತೀವ್ರತೆ ಕಮ್ಮಿ ಆಯಿಜಿಂಡ ಸಾಂಪ್ರದಾಯಿಕ ಪರ್ಯಾಯಗ್ ಬದ್ದ ಉಂಡು , ಈ ನೆಲೆಟ್ಟ್ ತಯಾರಿ ಮಲ್ಪುವ . ಲೋಕಗ್ , ಜನಕ್ಲೆಗ್ ಕಂಟಕವಾದ್ ಪರ್ಯಾಯ ಮಲ್ಪೊಡು ಪನ್ಪಿನ ಹಠ ನಮಕ್ ಇಜ್ಜಿ ಪಂದ್ ಒಡಿಪು ಶ್ರೀಕೃಷ್ಣಾಪುರ ಮಠದ ಶ್ರೀವಿದ್ಯಾಸಾಗರತೀರ್ಥರ್ ಪಂತೆರ್ .

ದುಂಬುದ 2022ರ ಜ.18ಗ್ ನಾಲನೆ ಸಲ ಶ್ರೀಕೃಷ್ಣಪೂಜಾ ಕೈಂಕರ್ಯದ ಪರ್ಯಾಯ ಪೀಠಾರೋಹಣ ಮಲ್ಪರೆ ಉಪ್ಪುನ ನೆಲೆಟ್ಟ್ ಕೃಷ್ಣಾಪುರ ಮಠದ ಶ್ರೀಕೃಷ್ಣ ಸಭಾಭವನಡ್ ಶುಕ್ರವಾರ ನಡತಿನ ಪರ್ಯಾಯ ಸಿದ್ಧತೆದ ಪೂರ್ವಭಾವಿ ಸಭೆಟ್ ಆಶೀರ್ವಚನ ಕೊರ್ದು ಶ್ರೀಕುಲು ಪಾತೆರಿಯೆರ್.

ಬಂಗಾರ್ ಪಾಲಿಶ್ ಮಲ್ತ್ ಕೊರ್ಪೆ ಪಂದ್ ಐನರೆ ಪವನ್ ಬಂಗಾರ್ ಕರಗಾದ್ ಡೋಂಗಿ

ಪುತ್ತೂರು: ಬಂಗಾರ್ ಪಾಲಿಶ್ ಮಲ್ತ್ ಕೊರ್ಪೆ ಪಂದ್ 2 ಪವನ್‌ನ ಕರಿಮಣಿ ಸರ ಸೇರಿನಂಚ ಐನರೆ ಪವನ್ ಬಂಗಾರ್ ಕಳೆಯೊಂಡಿನ ಘಟನೆ ಸಂಪ್ಯ ಪೊಲೀಸ್ ಠಾಣಾ ವ್ಯಾಪ್ತಿಡ್ ನಡತುಂಡು . ವಂಚನೆ ಆಯಿನ ಪೊಂಜೊವು ನೆಟ್ಟಣಿಗೆ ಮುಟ್ಟೂರು ಗ್ರಾ.ಪಂ. ಸದಸ್ಯೆ ಪೆರ್ನಾಜೆ ನಿವಾಸಿ ಇಂದಿರಾ ಪಂದ್ ಪಂತೆರ್ .

ಬಂಗಾರ್ ಪಾಲಿಶ್ ಮಲ್ತ್ ಕೊರ್ಪೆ ಪಂದ್ ನಂಬಾದ್ ಅಪರಿಚಿತ ಜವಣ್ಯೆ ಒರಿ ಇಲ್ಲದ ಶೋಕೇಸ್, ಟಿವಿ, ಬೊಳ್ಳಿ , ಬಂಗಾರ ಸೇರಿನoಚ ಅವ್ವೆತೋ ವಸ್ತುನು ಸ್ವಚ್ಛ ಮಲ್ತ್ ಕೊರ್ಪೆ ಪಂದ್ ಇಂಚ ಮಲ್ದೆರ್.

ಕರ್ನಾಟಕಡ್ ಇನಿರ್ದ್ ನಾಲ್ ದಿನ ಭಾರಿ ಬರ್ಸ | ಕುಡ್ಲಡ್ ಯೆಲ್ಲೋ ಅಲರ್ಟ್

ಕುಡ್ಲ : ರಾಜ್ಯೋಡು ಕರಿನ 2 ವಾರಗರ್ದ್ ಅಲ್ಪ ಅಲ್ಪ ಬಾರಿ ಬರ್ಸ ಬರೊಂದು ಉಂಡು ಸೆಪ್ಟೆಂಬರ್ ಕಡೆ ಮುಟಲ ಮುಂಗಾರು ಬರ್ರೆ ಉಂಡು . ಇನಿರ್ದ್ ಆ. 31 ಮುಟಲ ಕರ್ನಾಟಕಡ್ ವರುಣನ ಆರ್ಭಟ ಜಾಸ್ತಿ ಆಯರೇ ಉಂಡು . ಕರ್ನಾಟಕದ ಜಿಲ್ಲೆಲಾಯಿನ ಒಡಿಪು , ಕುಡ್ಲ , ಉತ್ತರ ಕನ್ನಡಡ್ ನನಲಾ 4 ದಿನ ಬರ್ಸ ಬರ್ರೆ ಉಂಡು ಅಂಚನೇ ಕುಡ್ಲಡ್ ಯೆಲ್ಲೋ ಅಲರ್ಟ್ ಘೋಷಣೆ ಆತುಂಡು .

ಗುವೆಲ್ಗ್ ಲಾಗಿದ್ ಜೀವ ಬುಡಿನ ಬೊಲ್ತೆರ್ ತಾ.ಪಂ ಮಾಜಿ ಒತ್ತು ಗುರ್ಕಾರ್ಲಾಯಿನ ಸಂತೋಷ್‌ ಕುಮಾರ್ ಲಾಯಿಲ

ಬೊಲ್ತೆರ್: ತಾಲೂಕು ಪಂಚಾಯತ್ ಮಾಜಿ ಒತ್ತು ಗುರ್ಕಾರ್ಲಾಯಿನ, ಲಾಯಿಲ ನಿವಾಸಿ ಸಂತೋಷ್ ಕುಮಾರ್ (45ವ.) ಮೇರ್ ಇನಿ ಸರಕಾರಿ ಗುವೆಲ್ ಗ್ ಲಾಗಿದ್ ಆತ್ಮಹತ್ಯೆ ಮಲ್ದೆರ್ .

ಕೆಲ‌ವರ್ಷದ ಪಿರವು ಅಪಘಾತರ್ದಾವರ ಬೆರಿ ಮುಳ್ಳು ಪೊಲೀದ್ ಇತ್ತುಂಡು . ಸುರು ಸುರುಟು ಪಜೆಟೇ ಇತ್ತಿನ ಆರ್ ಮಲಗಿದ್ದ ಕೊಕ್ಕಡದ ಸೇವಾಧಾಮ ಬೆರಿ ಮುಳ್ಳುದ ಮರ್ದ್ ಗಾದ್ ಕೇಂದ್ರರ್ದ್ ಚಿಕಿತ್ಸೆ ಬೊಕ್ಕ ಫಿಸಿಯೋಥೆರಫಿ ಪಡೆದ್ ಹುಷಾರ್ ಆದಿತ್ತೆರ್
ಸುರುಟು ಬೆಳ್ತಂಗಡಿ ಆಟೋ ರಿಕ್ಷಾ ಚಾಲಕ ಮಾಲಕೆರ್ನ ಸಂಘದ ಪದಾಧಿಕಾರಿಯಾದ್ , ಲಾಯಿಲ ಶ್ರೀ ಗಣೇಶೋತ್ಸವ ಸಮಿತಿ, ಶ್ರೀ ಕೃಷ್ಣ ಜನ್ಮಾಷ್ಟಮಿ ಸಮಿತಿ ಸೇರಿನಂಚ ಬೇತೆ ಬೇತೆ ಸಂಘ ಸಂಸ್ಥೆಡ್ ಸಕ್ರೀಯವಾದ್ ಬೇಲೆ ಮಲ್ತೊಂದು ಇತ್ತೆರ್ .

ತಮ್ಮ ದೀರ್ಘಕಾಲಿಕ ಅನಾರೋಗ್ಯರ್ದ್ ಬೇಜಾರ್ ಆದ್ ಮೇರ್ ಜೀವನೊಡು ಜಿಗುಪ್ಸೆ ಬತ್ದ್ ಇಂಚಿನ ಬೇಲೆ ಮಲ್ದಿನ ಸಾಧ್ಯತೆ ಉಂಡು ಪಂದ್ ಪನೊಲಿ.

ತುಳುವ ಸಿರಿ ಪುಗಾರ್ತೆದ ಬಾಲೆ – ಅದ್ವಿಕ ಶೆಟ್ಟಿ.

ಬರವು :ನೀತು ಬೆದ್ರ

ನರಮಾನಿ ಪುಟ್ಟುದ ಅರ್ಥೊಗು ಸಾಧನೆ ಪನ್ಪಿ ಉಜ್ಜಾಲ್ ಕಟ್ಟರೆ ಪ್ರಾಯೊ ಆವೊಂಡುದಿಜ್ಜಿ. ಕಲೆ ಪನ್ಪಿನ ಒಲಿಯೆರೆ ಕಾಪೊಡುಂದುಲಾ ಇಜ್ಜಿ. ಸತತ ಪ್ರಯತ್ನ ಬೊಕ್ಕ ಕಲಾ ಚಾತಿರ್ಪುದ ಕೊಡಿಪು ಮುಂಗೆಗ್ ನೀರ್ ಪಾಡ್ದ್ ಬುಲೆಪಾವುನ ಮನಸ್‌ಲ್ ಒಟ್ಟುಗು ಇತ್ತ್ಂಡ ಯಾವು. ತನ್ನಾತೆಗೆ ಪುಗರ್ತೆದ ಮಾಲೆ ಕೆಕ್ಕಿಲ್‌ಗ್ ಬೂರುಂಡು. ಅಂಚಿನ ಕಿನ್ಯ ಪ್ರಾಯೊದ ಕಲಾ ಚಾತಿರ್ಪುದ ಬಾಲೆನ್ ಮೂಲು ಪೊಲಬು ಮಲ್ತೊಂದುಲ್ಲ. ಬಾಲೆಯೊಂಜಿ ಅಪ್ಪೆ ಮಟ್ಟೆಲ್‌ಡ್ದ್ ಪರತೊಂದು ಭೂಮ್ಯಪ್ಪೆ ಮಟ್ಟೆಲ್ಡ್ ಮಾನಾವೊಂದಿಪ್ಪುನಗನೇ ದೈವ ದೇಬೆರೆ ಮದಿಪುದ ವರಬಲೊ ಬೊಕ್ಕ ತನ್ನ ಚಾತಿರ್ಪುಡು ತನ್ನ ಪುದರ್‌ನ್ ಕೊಡಿ ಕಟ್ಟಾವರೆ ಸಾದ್ಯ ಪನ್ಪವೊಂದು ತನ್ನ ನಾಲನೇ ಒರ್ಸೊಡೇ ಕಲಾ ಆರಾಧನೆಡ್ ಜನೊಕ್ಲೆನ ಕಣ್ಣ್‌ಗ್ ಬಂಗಾರ್ದ ಕುರಲ್ ತೋಜಿನ, ತುಳುವ ಸಿರಿ ಪುಗಾರ್ತೆ ಪಡೆಯಿನ ಬಾಲೆ ಅದ್ವಿಕಾ ಶೆಟ್ಟಿನ್ ಸಾದನೆದ ಪಜ್ಜೆದ ಕಥೆ ಉಂದು.

ಸುರತ್ಕಲ್‌ದ ಪುಗಾರ್ತೆದ ಡಾಕ್ಟರ್ ಡಾ. ದಿ. ಕೆ. ಆರ್ ಶೆಟ್ರೆನ ಪುಲ್ಲಿ ಅದ್ವಿಕಾ ಶೆಟ್ಟಿ 2004 ಡಿಸೆಂಬರ್ ರಡ್ಡ್ ತಾರೀಕ್‌ಗ್ ಸುರತ್ಕಲ್ ಸುಭಾಷಿತ್ ನಗರದ ಹೇರೂರು ವೇಣುಗೋಪಾಲ್ ಶೆಟ್ರ್ ಬೊಕ್ಕ ಪೆರಾರ ಮುಂಡಬೆಟ್ಟು ಗುತ್ತು ಅರ್ಪಿತಾ ವಿ ಶೆಟ್ರೆನ ಉಡಲ್‌ಡುದಿತಿ ಮೋಕೆದ ಪಿಂಗಾರ ಪುರ್ಪ. ತನ್ನ ಎಲ್ಯ ಪ್ರಾಯೊಡೇ ಟಿ.ವಿ.ಡ್ ಯಕ್ಷಗಾನ ಬನ್ನಗ ಚಾನೆಲ್ ಬದಲ್ಪೆರೆ ಬುಡಂದಿ ಬಾಲೆ ಯಕ್ಷಗಾನಡ್ದಾದ್ ನಲಿಕೆದ ಮಿತ್ತ್ ಆಸೆ ಪುಟ್ಟವೊಂದು ಅಪ್ಪೆಮ್ಮೆರೆನ್ ಒತ್ತಾಯ ಮಲ್ತ್ ನಾಲ್ ಒರ್ಸೊಡೇ ಡ್ಯಾನ್ಸ್ ಕ್ಲಾಸ್ ಸೆರ್ಯೆರ್. ಸೇರ್ದ್ ಒಂಜಿ ತಿಂಗೊಳುಡೇ ಡ್ಯಾನ್ಸ್ ಗುರು ಸುನಿಲ್ ಶೆಟ್ರೆನ ಪ್ರಚೋದನೆಡ್ ಉಡುಪಿಡ್ ನಡತಿ ರಾಜ್ಯಮಟ್ಟದ ನಲಿಕೆದ ಪಂತೊಡು ಸುರುತ ಇನಾಮು ಗೆಂದ್ಯೆರ್. ಸುರುತ ವೇದಿಕೆ ಸುರುತ ಪಂತೊಡು ಸುರುತ ಇನಾಮು ಪಡೆತಿ ಅದ್ವಿಕಾ ಬ್ರಹ್ಮಾವರ ಸೇರಿನಂಚ ಪೋಯಿನಲ್ಪ ಮಾತ ಇನಾಮು ಗೆತೊಂದೇ ಬತ್ತೆರ್. ಗುರುಕುಲಾಯಿನ ಪ್ರಮೋದ್ ಆಳ್ವ, ಸುನೀಲ್ ಶೆಟ್ಟಿ, ಪ್ರವೀಣ್ ಕುಮಾರ್ ಬೊಕ್ಕ ಭರತನಾಟ್ಯ ಗುರುಕುಲಾಯಿನ ವಿದುಷಿ ಪ್ರತಿಮಾ ಶ್ರೀಧರ್ ಹೊಳ್ಳ, ಯಕ್ಷ ಗುರುಕುಲಾಯಿನ ರಕ್ಷಿತ್ ಶೆಟ್ಟಿ ಮೊಕುಲೆನ ಕಲ್ಪಾರ್ತಿಯಾದ್, ಮೊಕುಲೆನ ಬೆರಿಬಲಟ್ ರಾಷ್ಟ್ರಮಟ್ಟಡ್ ಪುದರ್ ಪುಗಾರ್ತೆ ಕನತಿನಾರ್. ಒಂಜಿಸಾರರ್ದ್ ಮಿತ್ತ್ ನಲಿಕೆದ ಲೇಸ್, ಇರ್ನೂದೆಡ್ದ್ ಮಿತ್ತ್ ಯಕ್ಷಗಾನ ಬೊಕ್ಕ ಯಕ್ಷನಾಟ್ಯ ಲೇಸ್‌ಡ್ ಪಾಲ್ ಪಡೆದ್ ಬೆರಿ ಬೊಟ್ಟವೊನ್ನಾರ್. ಎಲ್ಪತ್ತೈನೆರ್ದ್ ಮಿತ್ತ್‌ದ ಲೇಸ್‌ಡ್ ಲೇಸ್‌ದ ಬಿನ್ನೆದಿಯಾಯಿನಾರ್ ಬೊಕ್ಕ ಲೇಸ್ ಉದಿಪನ ಮಲ್ತಿನಾರ್.

ಗುರು ರಕ್ಷಿತ್ ಪಡ್ರೆನ ಮಾರ್ಗದರ್ಶನಡ್ ಯಕ್ಷಗಾನ ಕಲ್ತಿ ಅದ್ವಿಕಾ ತನ್ನ 9 ನೇ ವರ್ಷಡ್ ಸುರುಕಾದ್ ಕುಡ್ಲದ ಪುರಭವನಡ್ ನಡತಿ ‘ಕಾಳಿಂಗ ಮರ್ಧನ’ ಯಕ್ಷಗಾನಡ್ ಮಲ್ಲಕ್ಲೆನೊಟ್ಟುಗು ಕೃಷ್ಣ ವೇಷ ಪಾಡ್ದ್ ಗೆಜ್ಜೆ ಕಟ್ಟಿನ ಅದ್ವಿಕಾ ಸುರುಟೇ ಮಾತೆರೆ ಉಡಲ್ ಗೆಂದ್‌ದ್ “ಅವ್ವೊಂಜಿ ಆನ್ ಬಾಲೆ ಏರ್ ಕೃಷ್ಣ ವೇಷ ಪಾಡ್ಡಿನಿ?” ಪಂದ್ ಕೇನ್ಪವೊಂದಿನಾರ್. ಅಯಿಡ್ದ್ ಬೊಕ್ಕ ‘ಸುದರ್ಶನ ವಿಜಯ’ದ ಸುದರ್ಶನೆ, ‘ಅಭಿಮನ್ಯು ಕಾಳಗ’ದ ಅಭಿಮನ್ಯು, ‘ಹನುಮೋದ್ಭವ’ದ ಹನುಮಂತೆ, ‘ಶಾಂಭವಿ ವಿಜಯ’ದ ಕಾಳಿ, ‘ಶ್ರೀ ದೇವಿ ಮಹಾತ್ಮೆ’ದ ಪಿಂಗಲಾಕ್ಷ ಬೊಕ್ಕ ‘ಲವಕುಶ ಕಾಳಗ’ದ ಲವ ವೇಷಲೆಡ್ ಮೆಚ್ಚಿಗೆ ಪಡೆವೊಂದೆರ್.

2017ಡ್ ಬುಡುಗಡೆಯಾಯಿನ ಬರ್ಸ ತುಳು ಚಲನಚಿತ್ರಡ್ ಬಾಲನಟಿಯಾದ್ ಚಿತ್ರರಂಗಗ್ ಕಾರ್ ದೀದ್, ತುಳುತ್ತ ಸಿನೆಮಾಲಾಯಿನ ಮೈ ನೇಮ್ ಇಸ್ ಅಣ್ಣಪ್ಪ, ಅಪ್ಪೆ ಟೀಚರ್ ಸೇರಿನಂಚ ಕನ್ನಡ ಕಿರು ಚಿತ್ರ ಜನನಿಡ್ ಬಾಲನಟಿಯಾದ್ ಅಭಿನಯ ಮಲ್ದೆರ್.2012ಡ್ ಬೆಂಗಳೂರುಡ್ ನಡತಿನ ‘ಈ ಟಿವಿ ಕನ್ನಡ’ ವಾಹಿನಿಡ್ ಪ್ರಸಾರವಾಯಿನ “ಡಿ ಜ್ಯೂನಿಯರ್” ಡ್ಯಾನ್ಸ್ ರಿಯಾಲಿಟಿ ಶೋ ನೆಟ್ಟ್ ಆಯ್ಕೆಯಾಯಿನ 6 ಸ್ಪರ್ಧಿಲೆಡ್ ಮೆರ್ಲಾ ಒರ್ತಿ . ಮೆರ್ನ ತೆಲಿಕೆದಿಂಜಿ ಪಾತೆರಡ್ ತೀರ್ಪುಗಾರೆರಾಯಿನ ಚಿನ್ನಿ ಪ್ರಕಾಶ್, ಶುಭಾ ಪೂಂಜಾ, ಪ್ರಿಯಾಂಕ ಉಪೇಂದ್ರರೆನ ಉಡಲ್ ಗೆಂದ್‌ದೆರ್. ರಾಷ್ಟ್ರೀಯ ಚಾನೆಲ್ ಝೀ ಟಿವಿ (ಹಿಂದಿ)ಡ್ 2014ಡ್ ನಡತಿನ “ಡಾನ್ಸ್ ಇಂಡಿಯಾ ಡಾನ್ಸ್-ಲಿಟ್ಲ್ ಮಾಸ್ಟರ್” ರಿಯಾಲಿಟಿ ಶೋ ನೆಟ್ಟ್ ದೇಶದ ಮಾತ ದಿಕ್ಕ್‌ರ್ದ್ ಬತ್ತಿನ ಲಕ್ಷ ಲಕ್ಷ ಅಭ್ಯರ್ಥಿಲೆನ ಒಟ್ಟುಗು ಸ್ಪರ್ಧೆಡ್ ಪಾಲ್ ಪಡೆಯೊಂದು ಅಕೇರಿದ ಸುತ್ತುದ 16 ಸ್ಪರ್ಧಿಲೆಡ್ ಒರ್ತಿಯಾದ್, ದಕ್ಷಿಣ ಭಾರತರ್ದ್ ಈ ರಿಯಾಲಿಟಿ ಶೋಗು ಸುರುಕಾದ್ ಅಜತಿನ ಪ್ರತಿಭೆ ಅದ್ವಿಕಾ ಶೆಟ್ಟಿ. ಈ ಸ್ಪರ್ಧೆ ಅದ್ವಿಕಾಗ್ ಒಂಜಿ ಚಾಲೆಂಜ್ ಪಂದೇ ಪನೊಲಿ. ನೆಕ್ಕ್ ಅಜಪ್ಪವೊನುನವೇ ಒಂಜಿ ಬಙದ ಬೇಲೆ. ಅಯಿತ್ತ ಒಟ್ಟುಗು ತನನ್ ತಾನ್ ಅರ್ಪಿತೋ ಮಲ್ತೊನುನ ತನ್ಮಯತೆ, ಶ್ರಮ ಅಂಚನೆ ಛಲ ಬೋಡು. ಅದ್ವಿಕಾ ಅವೆನ್ ಮಾತ ತನ್ನೊಲಯಿ ದಿಂಜದ್ ದುಂಬು ಪೋಯೆರ್. ಮೆರ್ನ ಸಾಧನೆದ ಮಜಲ್‌ಲೆನ್ ತೂಯಿನ ರಿಯಾಲಿಟಿ ಶೋದ ಜಡ್ಜ್‌ಲಾಯಿನ ಮಿಥುನ್ ಚಕ್ರವರ್ತಿ, ಗೀತಾ ಕಪೂರ್, ಅಹ್ಮದ್ ಖಾನ್, ಮುದಸ್ಸರ್ ಮೊಕ್ಲೆನ ಉಡಲ್ ಗೆಂದ್‌ದ್ ಚೋಟಿ ಮಾಧುರಿ ದೀಕ್ಷಿತ್, ಕ್ಯೂಟಿ, ಚಕ್ಕರ್ ರಾಣಿ ಇಂಚಿತ್ತಿನ ಪುದರ್ನ್ ಲೆತ್ತ್ ಕೊಂಡಾಡ್ಪವೊಂಡಿನ ಪ್ರತಿಭೆ ಮೇರ್. 2015ಡ್ ಕಲರ್ಸ್ ಕನ್ನಡ ಚಾನೆಲ್‌ದ “ಡ್ಯಾನ್ಸಿಂಗ್ ಸ್ಟಾರ್ಸ್” ಕನ್ನಡ ಸೆಲೆಬ್ರಿಟಿ ಡ್ಯಾನ್ಸ್ ರಿಯಾಲಿಟಿ ಶೋಡು ಪಾಲ್ ಪಡೆಯೊಂದು ಲಕ್ಷ ಅಭಿಮಾನಿಲೆನ ಅಭಿಮಾನ ಪಡೆಯೊಂದಿನಾರ್. ಹಳ್ಳಿ ಹಳ್ಳಿಡ್ಲಾ ‘ಡ್ಯಾನ್ಸಿಂಗ್ ಸ್ಟಾರ್ ಅದ್ವಿಕಾ ಶೆಟ್ಟಿ’ ಪಂದ್ ಲೆಪ್ಪವೊಂದು ಜನೊಕ್ಲೆ ಆಶೀರ್ವಾದಡ್ ರಡ್ಡನೇ ರನ್ನರ್ ಅಪ್ ಆದ್ ಬತ್ತೆರ್.

ಟಿವಿ ಶೋಡು ಬತ್ತಿ ಬೊಕ್ಕ ಅದ್ವಿಕಾನ್ ಲೋಕಲ್ ಪಂತೊಲೆಗ್ ಮಾತ ಪಾಲ್ ಪಡೆಪುನ ಉಂತಯೆರ್. ಅಯಿಕ್ಕ್ ಕಾರಣ ಬೇತೆ ಜೋಕ್ಲೆಗ್ಲಾ ಅವಕಾಶ ತಿಕ್‌ದ್ ಅಕ್ಲ್‌ಲಾ ಬುಲೆವೊಡು ಪನ್ಪಿ ಉಡಲ ದುನಿಪು.
ಹೈದರಾಬಾದ್‌ಡ್ 2014ಡ್ ನಡತಿನ “ಈ ಟಿವಿ ತೆಲುಗು” ಚಾನೆಲ್‍ಡ್ ಅತಿಥಿ ಕಲಾವಿದೆಯಾದ್ ಪಾಲ್ ಪಡೆಯೊಂದೆರ್. 2018ಡ್ ಮಸ್ಕತ್ ಬಂಟರ ಐಸಿರಿ ಲೇಸ್‌ಡ್ ಬಿನ್ನೆದಿಯಾದ್ ಪಾಲ್ ಪಡೆದ್ ಮಾನಾದಿಗೆ ಪಡೆತೆರ್.
ಡ್ಯಾನ್ಸ್, ಮಾಡ್ಲಿಂಗ್, ಯೋಗ, ಯಕ್ಷಗಾನ, ಭರತನಾಟ್ಯ, ಟಾಕ್ ಶೋ, ಜಾನಪದ ನಲಿಕೆ, ಪದರಂಗೀತ, ಆಂಕರಿಂಗ್, ನಟನೆ, ಕತೆ ಕಬಿತೆ ಬರೆವುನು, ಡ್ರಾಯಿಂಗ್, ಪೈಂಟಿಂಗ್, ಅಲಂಕಾರಿಕ ತುತ್ತೈತ, ಭಾಷಣ ಪಂದ್ ಒಂಜಿ ಗೊತ್ತು ಕುಡೊಂಜಿ ಗೊತ್ತಿಜ್ಜಿ ಪನ್ಪುಲೆಕ ಮಾತ ಮರ್ಗಿಲ್‌ಡ್ಲಾ ತನ್ನ ಚಾತಿರ್ಪು ತೂಜಯಿನ ಈ ಪೊಣ್ಣು ಮಗಲ್ ಅದ್ವಿಕಾನ ಸಾಧನೆಗಾದ್ “ರಾಜ್ಯ ಪ್ರಶಸ್ತಿ” ಪಡೆತೆರ್. 2017 ಜನವರಿ 26 ಕ್ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆಡ್ದ್ ಕುಡ್ಲ ಡ್ “ಜಿಲ್ಲಾ ಮಟ್ಟದ ಅಸಾಧಾರಣ ಪ್ರತಿಭಾ ಪುರಸ್ಕಾರ ಪ್ರಶಸ್ತಿ” ಪಡೆತೆರ್. ಅಂಚೆನೇ 2017 ನವೆಂಬರ್ 14 ಕ್ ರಾಜ್ಯ ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಇಲಾಖೆಡ್ದ್ ರಾಜ್ಯಪಾಲೆರಾಯಿನ ವಾಜುಭಾಯಿ ವಾಲೆರ್ನ ಕೈಟ್ ಬೆಂಗಳೂರ್ ಡ್ “ಕರ್ನಾಟಕ ರಾಜ್ಯ ಅಸಾಧಾರಣ ಸಾಧನ ಪ್ರಶಸ್ತಿ” ಪಡೆತಿನಾರ್. ರಾಜ್ಯಪಾಲೆರ್ ಅದ್ವಿಕಾನ ಪುದರ್‌ನ್ ರಾಷ್ಟ್ರ ಪ್ರಶಸ್ತಿಗ್ ಶಿಪಾರಸ್ಸ್ ಮಲ್ದಿನವು ಅದ್ವಿಕಾ ಶೆಟ್ಟಿನ ಸಾಧನೆದ ಎರ್ತೆಲ ಕೈ ಕನ್ನಡಿಯೇ ಸರಿ.
2019ಡ್ “ದಕ್ಷಿಣಕನ್ನಡ ಜಿಲ್ಲಾ ರಾಜ್ಯೋತ್ಸವ ಪ್ರಶಸ್ತಿ” 2015ಡ್ ದಕ್ಷಿಣಕನ್ನಡ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತ್ ಕೊರ್ನ “ಕರ್ನಾಟಕ ರಾಜ್ಯೋತ್ಸವ ಸಾಧಕ ಪ್ರಶಸ್ತಿ” ಸೇರಿನಂಚ ಬೂಗಿ-ಊಗಿ, ಬಂಟಕುಮಾರಿ, ಲಿಟ್ಲ್ ಮಾಸ್ಟರ್, ಜೆಸಿ ಕ್ವೀನ್, ಉಡುಪಿ ಪ್ರಿನ್ಸೆಸ್, ಪೊರ್ಲುದ ಬಂಟೆದಿ, ರಾಜ್ಯ ಮಟ್ಟದ ಸೌರಭಾ ಪ್ರಶಸ್ತಿ, ಕರ್ನಾಟಕ ಪ್ರತಿಭಾ ರತ್ನ ಪ್ರಶಸ್ತಿ, ಸ್ವಸ್ತಿಕ್ ಸಂಭ್ರಮ ಪುರಸ್ಕಾರ, ಬಂಟ್ಸ್ ಸಂಘ ಬೆಂಗಳೂರುದ ಅಚ್ಯುಮೆಂಟ್ ಅವಾರ್ಡ್, ಅಗ್ನಿ ದುರ್ಗಾ ಪುರಸ್ಕಾರ, ಧರ್ಮೋಸ್ಥಾನ ಪ್ರಶಸ್ತಿ, ಬೆಸ್ಟ್ ಎಂಟರ್‌ಟ್ರೈನರ್ ಅವಾರ್ಡ್, ತುಳುನಾಡೋಚ್ಛಯ ಪ್ರಶಸ್ತಿ, ನಾಟ್ಯ ಸಿಂಚನ, ಕಾಸರಗೋಡು ಮಕ್ಕಳ ದಸರಾ ಗೌರವ, ಮಡಿಲು ಸಮ್ಮಾನ್, ನಮನ ಸಿರಿ ಯೂತ್ ಅವಾರ್ಡ್, ಕಲಾ ರತ್ನ ಪ್ರಶಸ್ತಿದೊಟ್ಟುಗು ಸುಮಾರ್ 700ಡ್ದ್ ಎಚ್ಚ ಪ್ರಶಸ್ತಿ, 250ರ್ದ್ ಜಾಸ್ತಿ ಸಂಘ ಸಂಸ್ಥೆದ ಪ್ರಶಸ್ತಿಲ್ ಮಾನಾದಿಗೆಲ್ ತಿಕ್ದ್ಂಡ್. ಜೆಸಿಐ ಮಂಗಳೂರು ಇನ್‌ಸ್ಪೈರ್‌ದ ಜೂನಿಯರ್ ಜೆಸಿ ಚೇರ್‌ಪರ್ಸನ್ ಆದ್ ಅದ್ವಿಕಾ ಆಯ್ಕೆ ಆತೆರ್. 2020ಡು ನಡತಿ ‘ಡ್ಯೂಡ್ಸ್ ಆಂಡ್ ಡಾಲ್ಸ್ ಫ್ಯಾಷನ್ ಶೋ’ಗು ಅಂಚನೆ ‘ಜೆಸಿಐ ಗೋಟ್ ಟ್ಯಾಲೆಂಟ್’ ಪನ್ಪಿ ಓನ್ಲೈನ್ ಪಂತೊಗು ಅಂಚನೆ ಫೋಟೋ ಪಂತೊಗು ತೀರ್ಪುಗಾರ್ತಿಯಾದ್ ಪಾಲ್ ಪಡೆದಿತ್ತೆರ್.
ಸಂಗೀತ ಕ್ಷೇತ್ರಡ್ಲಾ ತನ್ನ ಚಾತಿರ್ಪು ತೋಜಾಯಿ ಅದ್ವಿಕಾ ‘ಬಾಂಬಿಲದ ಬೊಲ್ಪು’ ಬೊಕ್ಕ ‘ಮಿಜಾರ ಬೊಲ್ಲಿ’ ಭಕ್ತಿಗೀತೆ ಕೋಪೆಡ್ ತನ್ನ ಸ್ವರತೊಂಜೊಂಜಿ ಗೀತೆ ಪನ್ತೆರ್. ಸಂಗೀತ ವಿದ್ವಾನ್ ನಾರಾಯಣ ಸರ್‌ಡ ಸಂಗೀತ ಕಲ್ತೊಂದುಪ್ಪುನಗ ಡ್ಯಾನ್ಸ್ ಮಿತ್ತ ಜಾಸ್ತಿದ ತನ್ಮಯತೆಡ್ ಸಂಗೀತ ಅರ್ಧಡೆ ಒರಿದ್ಂಡ್. ಆಂಡಲಾ ಸಮಯಾ ತಿಕ್‌ನಗ ಆರೆನಾತೆಗೆ ಪದ ಪನೊಂದು ಇಪ್ಪುವೆರ್.
ತುಳುತ್ತ ಮಿತ್ತ್ ಮಸ್ತ್ ಮೋಕೆ ಉಪ್ಪುನ ಅದ್ವಿಕಾ ಜಾಸ್ತಿ ಲೇಸ್‌ಡ್ ತುಳುಟ್ಟೇ ಭಾಷಣ ಮಲ್ತ್ ತುಳುವೆರೆ ಮೋಕೆ ಪಟ್ಟೊಂದಿನಾರ್. 2016ಡ್ ಟೈಮ್ಸ್ ಆಫ್ ಕುಡ್ಲ ತುಳು ಪತ್ರಿಕೆದ ತುಳು ಐಸಿರಿದ ಐಸ್ರೊ ತುಳು ಸಮ್ಮೇಳನಡ್ “ತುಳುವ ಸಿರಿ” ಪನ್ಪಿನ ಬಿರ್ದ್ ಪಡೆಯೊಂದೆರ್. 2013ಡ್ ಫ್ಯಾಷನ್ ಎಬಿಸಿಡಿದಕ್ಲ್ ನಡಪಾಯಿ “ಮಿಸ್ಸಿ ಆಂಡ್ ಮಾಸ್ಟರ್ ಮಂಗಳೂರು ಬ್ಯೂಟಿ ಕಾಂಟೆಸ್ಟ್ ಕಿಡ್ಸ್ ಫ್ಯಾಷನ್ ಶೋಡು “ಮಿಸ್ಸಿ ಮಂಗಳೂರು” ಆದ್ “ಮಿಸ್ಸಿ ಟ್ಯಾಲೆಂಟ್” ಬಿರ್ದ್, ಕನ್ನಡ ಪ್ರಭಾ ಪತ್ರಿಕೆ ದ 2017ದ “ಚೋಟಿ ಚೇತನ” ಬಿರ್ದ್ ಪಡೆವೊಂದೆರ್.
ತನ್ನ ಎಲ್ಯ ಪ್ರಾಯೋಡೆ ನಿರೂಪಕಿಯಾದ್, ನೃತ್ಯಗಾರ್ತಿಯಾದ್, ಯಕ್ಷಗಾನ ಕಲಾವಿದೆಯಾದ್, ಮಾತ ಕ್ಷೇತ್ರಡ್ ಸಾಧನೆ ಮಲ್ದಿನ ಮೇರ್ ಕುಡ್ಲದ ಎಂ.ಆರ್.ಪಿ.ಎಲ್ ಡೆಲ್ಲಿ ಪಬ್ಲಿಕ್ ಶಾಲೆಡ್ ಪತ್ತ್‌ನೇ ತರಗತಿಡ್ ಕಲ್ತೊಂದುಲ್ಲೆರ್.
ಸಾಧನೆ ಮಲ್ಪೊಡು ಪನ್ಪಿನಕ್ಲ್ ಅಕ್ಲೆನ ಸಾಧನೆದ ಪ್ರತಿಯೊಂಜಿ ಮರ್ಗಿಲ್‌ಡ್ಲಾ ಅವ್ವು ಯಕ್ಷಗಾನನೇ ಆದುಪ್ಪು, ನಲಿಕೆ ಅತಂಡ ಬೇತೆ ದಾದನೇ ಆದುಪ್ಪು ಅಲ್ಪ ಸ್ವಂತ ಚಾತಿರ್ಪು ಬೊಕ್ಕ ಸ್ವಂತ ಶೈಲಿಡ್ ಗುರ್ತ ಮಲ್ಪವೊನೊಡು. ಒರಿಯನ್ ರೋಲ್ ಮಾಡೆಲ್ ಆದ್ ದೆತೊಂದು ಅತಂಡ ಕುಡೊರ್ಯನ್ ಅನುಸರಿಸತ್ ಪೋಪುಂಡ ಅಯಿಟ್ಲಾ ತನ್ಕುಲೆ ಸ್ವಂತಿಕೆ ಬೋಡು. ಸಂಪೂರ್ಣ ಅಕ್ಲೆನ್ ಅನುಕರಿಪೆರೆ, ಅನುಸರಿಪೆರೆ ಬಲ್ಲಿ. ನಮ್ಮನೇ ಶೈಲಿ ಕನತ್ಂಡ ಜನಕ್ಲೆಗ್ ನೆಂಪು ಒರಿಯುಂಡು ಪನ್ಪಿನವು ಅದ್ವಿಕಾನ ಕೆಬಿ ಪಾತೆರ.
ಅಂತಾರಾಷ್ಟ್ರೀಯ ಮಾನ್ಯತೆದ ಒರುಟು ಕೋರಿಯೋಗ್ರಾಫರ್ ಆವೊಡು, ತುಳುವ ಸಂಸ್ಕೃತಿ ಲೋಕೊರ್ಮೆ ನೆಗಪವೊಡು, ಯಕ್ಷಗಾನದ ಅಧ್ಯಯನ ಮಲ್ಪುನ ಅಂಗಲ್ಪುದ ಅದ್ವಿಕಾಗ್ ಐ.ಎ.ಎಸ್ ಅಧಿಕಾರಿ ಆವೊಡು ಪನ್ಪಿ ಕನ ಉಂಡು. ಆರ್ನ ಕನ ಮಾತ ಈಡ್ ಸೇರ್‌ದ್ ಮೆರ್ನ ಸಾಧನೆ ಇಡೀ ವಿಶ್ವಗ್ ತೆರಿಯಡ್. ತುಳುನಾಡ ಗುತ್ತುದಿಲ್ಲದ ಮಗಲೆನ ಪುದರ್ ಲೋಕೊರ್ಮೆ ನಗಪಡ್. ಸಾಧನೆದ ಮಲೆಟ್ ಬೊಲ್ಲಿ ದಾರಗೆದಂಚ ಮೆನ್ಕಡ್. ದೈವ ದೇವೆರೆನ ಬೆರಿತಾಂಗ್ ಏಪೊಗುಲಾ ಇಪ್ಪಡ್ ಪನ್ಪಿನ ಉಡಲ ಮದಿಪು ನಮ್ಮವು.

ಅದ್ವಿಕ ಇತ್ತೆ St .Aloysius pre university college ಮಂಗಳೂರು (ಕುಡ್ಲ) ಪ್ರಥಮ ವಾಣಿಜ್ಯ ವಿಭಾಗೊಡು ಕಲ್ತೊಂದು ಉಲ್ಲಲ್.