ಎಸ್ ಪಿ ವೈ ಎಸ್ ಎಸ್ ಯೋಗ ಸಮಿತಿರ್ದ್ ಅಂತರಾಷ್ಟ್ರೀಯ ಯೋಗ ದಿನಾಚರಣೆ
ಕುಡ್ಲ : ಶ್ರೀ ಪತಂಜಲಿ ಯೋಗ ಶಿಕ್ಷಣ ಸಮಿತಿ (ರಿ.)ಕರ್ನಾಟಕ(ಎಸ್ ಪಿ ವೈ ಎಸ್ ಎಸ್) ವತಿರ್ದ್ ಸ್ವಾತಂತ್ರ್ಯದ ಅಮೃತ ಉಚ್ಚಯದ ಗೌಜಿ ಬೊಕ್ಕ 8ನೇ ಅಂತರಾಷ್ಟ್ರೀಯ ಯೋಗ ದಿನಾಚರಣೆದ ನೆಲೆಟ್ಟ್ ಜೈನಕಾಶಿ ಬೆದ್ರದ ಸಾವಿರ ಕಂಬದ ಬಸದಿಡ್ ಜಿಲ್ಲಾಡಳಿತ ಬೊಕ್ಕ ಆಯುಷ್ ಇಲಾಖೆದ ಒಟ್ಟು ಸೇರಿಗೆಡ್ ಸಾಮೂಹಿಕ ಯೋಗಾಭ್ಯಾಸ ಬೊಕ್ಕ ಯೋಗ ನಡಿಗೆ ಲೇಸ್ ನಡತoಡ್.
ಪುಲ್ಯ ಕಾಂಡೆ 05:30 ರ್ದ್ ಸುರು ಆಯಿನ ಲೇಸ್ 07:00 ಗಂಟೆಗ್ ಮುಗಿತಲ ಆಂಡ್ . ಜಗದ್ಗುರು ಡಾ ಸ್ವಸ್ತಿ ಶ್ರೀ ಚಾರುಕೀರ್ತಿ ಭಟ್ಟಾರಕ ಪಂಡಿತಾಚಾರ್ಯೆರ್ ಮಹಾಸ್ವಾಮೀಜಿ ಮೆರ್ನ ದಿವ್ಯ ಉಪಸ್ಥಿತಿಡ್ ಲೇಸ್ ಉದಿಪನ ಆಂಡ್.
ಸಮಿತಿದ ರಡ್ಡ್ ಸಾರರ್ದ್ ಜಾಸ್ತಿ ಯೋಗಪಟುಕ್ಕುಲು ,ಸಾರ್ವಜನಿಕ ಬಂಧುಲು ,ಗಣ್ಯೆರ್ ಯೋಗಾಭ್ಯಾಸ ಮಲ್ತೆರ್ .
ಕೋಡೆ ರಾತ್ರಿರ್ದೆ ಬುಡoದೆ ಬರ್ಸ ಬತ್ತ್ ದ್ ಬಸದಿದ ಜಾಲ್ ಚಂಡಿ ಆದ್ ಇತ್ತುಂಡಲ ಒವೆನ್ಲ ಗೆನ್ಪಂದೆ ಶಿಸ್ತುಬದ್ಧವಾದ್ ಸಾಲಾದ್ ಕುಲ್ದು ಯೋಗಾಭ್ಯಾಸ ಮಲ್ತೆರ್ .ಸುಮನಾ ಹೊಸಬೆಟ್ಟು ಬೊಕ್ಕ ಶಿಕ್ಷಕೆರ್ನ ಕೂಟ ದಕುಲು ಆಯುಷ್ ಇಲಾಖೆದ ಪಠ್ಯಕ್ರಮದ ಪ್ರಕಾರ ಅಭ್ಯಾಸ ಮಲ್ಪಾಯೆರ್.
ಲೇಸ್ ದ ಸೀದಾ ಪ್ರಸಾರದ ವ್ಯವಸ್ಥೆನ್ ಯೂಟ್ಯೂಬ್ ಮುಖೇನ ಮಲ್ತ್ ಇತ್ತೆರ್. ಅಂತರಾಷ್ಟ್ರೀಯ ಯೋಗ ದಿನಾಚರಣೆದ ಮಹತ್ವನ್ ಜಯರಾಮ ಚೆಂಬುಗುಡ್ಡೆ ತೆರಿಪಾಯೆರ್ .ಕಾಂಡೆ 5:00 ಗಂಟೆಗ್ ಬಸದಿದ ಒಳಾಂಗಣ,ಸುತ್ತುಪೌಳಿ ಭರ್ತಿಯಾದ್ .. ಐರ್ದ್ ಬೊಕ್ಕ ಹೊರಾಂಗಣಡ್ಲ ಯೋಗಪಟುನಕುಲು ಇತ್ತೆರ್.ಸಾಮೂಹಿಕ ಯೋಗಾಭ್ಯಾಸ ಆಯಿ ಬೊಕ್ಕ ಸಾವಿರ ಕಂಬದ ಬಸದಿರ್ದ್ ಸ್ವರಾಜ್ ಮೈದಾನರ್ದ್ ಬೆದ್ರ ಮುಟ ಯೋಗಪಟುಲು ಯೋಗ ನಡಿಗೆದ ಮುಖೇನ ಯೋಗ ಜಾಗೃತಿ ಮೂಡಾವುನ ಘೋಷಣೆ ಮಲ್ತೊಂದು ಸಾಲಾದ್ ಪೋಯೆರ್ ಐರ್ದ್ ಬೊಕ್ಕ ನಾರಾವಿ ಸೂರ್ಯನಾರಾಯಣ ದೇವಸ್ಥಾನ ಕೈತಲ್ ದ ದೇವಲ್ಯೊಗು ಭೇಟಿ ಕೊರ್ದು ಯೋಗ ಜಾಗೃತಿ ಮಲ್ತೆರ್ . ಸುಬ್ರಹ್ಮಣ್ಯ, ಪಂಜ, ಉಪ್ಪಿನಂಗಡಿ, ಪುತ್ತೂರು, ಕಲ್ಲಡ್ಕ, ಬಿಸಿರೋಡ್, ಪೊಳಲಿ, ಸುರತ್ಕಲ್ ಬೊಕ್ಕ ಕುಡ್ಲರ್ದ್ 15ರ್ದ್ ಜಾಸ್ತಿ ಬಸ್ಸು, ಮಿನಿ ಬಸ್ಸು, ಕಾರು, ಜೀಪು, ರಡ್ಡ್ ಚಕ್ರದ ಗಾಡಿಡ್ ಬತ್ತಿತ್ತೆರ್ . ಲೇಸ್ ರ್ದ್ ಬೊಕ್ಕ ಬಸದಿದ ಕೈತಲ್ ದ ಜಾಗೆನ್ ನಿರ್ಮಲ ಮಲ್ತೆರ್.
ಗೀತಾ ಷಡಕ್ಷರಿ ಮೆರ್ ಲೇಸ್ ನಡಪಾದ್ ಕೊರಿಯೆರ್. ಲೇಸ್ ದ ಸಂಚಾಲಕೆರಾಯಿನ ಶಿವಪ್ರಸಾದ್ ಪೊಳಲಿ ಸೊಲ್ಮೆ ಸಂದೈತ ಮಲ್ತೆರ್ .
ಲೇಸ್ ಡ್ ಪ್ರಾಂತ, ಜಿಲ್ಲಾ, ನಗರ ಪ್ರಮುಖೆರ್ ಪಾಲ್ ಪಡೆದಿತ್ತೆರ್..
