“ಕುಡ್ಲಡ್ ನೀರ್ದ ಸಮಸ್ಯೆ ಪರಿಹಾರಗ್ ತುಂಬೆ ಡ್ಯಾಮ್ ಎತ್ತರ ಮಲ್ಪಾಲೆ, ಕಡಲ್ದ ನೀರ್ ಶುದ್ದ ಮಲ್ಪಾಲೆ”
ವಿಧಾನಸಭೆಟ್ಟ್ ಶಾಸಕೆರ್ ವೇದವ್ಯಾಸ ಕಾಮತ್ ಆಗ್ರಹ
ಕುಡ್ಲ : ಪರ್ಪಿನ ನೀರ್ದ ಸಮಸ್ಯೆಗ್ ಪರಿಹಾರವಾದ್ ತುಂಬೆ ಡ್ಯಾಮ್ ಎತ್ತರ ಜಾಸ್ತಿ ಮಲ್ಪುಲೆ, ಕಡಲ್ದ ನೀರ್ ಶುದ್ಧ ಮಲ್ಪುಲೆ ಪಂದ್ ಶಾಸಕೆರ್ ವೇದವ್ಯಾಸ ಕಾಮತ್ ರಾಜ್ಯ ವಿಧಾನಸಭೆತ್ತ ಅಧಿವೇಶನಡ್ ಆಗ್ರಹ ಮಲ್ತೆರ್.
“ಕುಡ್ಲಡ್ ಬರಗಾಲದ ಬೆಚ್ಚ ಇತ್ತೆನೇ ಸುರುವಾತ್ಂಡ್. ನನ ಮಾರ್ಚ್ ತಿಂಗೊಲುಗು ಬೊಕ್ಕ ವರ್ಷದ ಅಕೇರಿಗ್ ಸಮಸ್ಯೆ ವಿಪರೀತಗ್ ಪೋಪಿನ ಲಕ್ಷಣ ಉಂಡು. ಈ ಬಗ್ಗೆ ಅಗತ್ಯ ಕ್ರಮ ದೆತೊನೊಡು ಪಂದ್ ಆರ್ ಒತ್ತಾಯ ಮಲ್ತೆರ್.
ಬರ ವಿಷಯವಾದ್ ನಡತಿನ ಚರ್ಚೆಡ್ ಪಾತೆರ್ನ ಆರ್, ನಮ್ಮ ಕುಡ್ಲ ಪೇಂಟೆಗ್ ತುಂಬೆ ಡ್ಯಾಮ್ ಆಸರೆಯಾದುಂಡು. ಸದ್ಯ ಅಯಿತ ಎತ್ತರ 6 ಮೀಟರ್ ಇತ್ತ್ಂಡಲ ಅಯಿಟ್ 2-3 ಮೀಟರ್ ದಾತ್ ಕೆಸರೇ ಉಂಡು. ಅಂಚಾದ್ ಡ್ಯಾಮ್ ಎತ್ತರ ಮಲ್ತ್ಂಡ ಪೇಂಟೆಗ್ ನೀರ್ ತಿಕ್ಕುಂಡು. ಅಪಗ ಸುತ್ತಮುತ್ತ ಮುಳುಗಡೆ ಪ್ರದೇಶದ ಜನಕ್ಲೆಗ್ ಅಗತ್ಯ ಪರಿಹಾರ ಯೋಜನೆಲ ಪಾಡೊಡು ಪಂಡೆರ್.
ಸದ್ಯೊಗು ಕಡಲ್ದ ಉಪ್ಪು ನೀರ್ ಶುದ್ಧಿಕರಣ ಕರ್ಚಿ ಎಚ್ಚಾಂಡಲ ಅವೆನ್ ಕೈಗಾರಿಕೆಗ್ ಕೊರೊಲಿ. ಎಂಆರ್ ಪಿ ಎಲ್ ಕಂಪೆನಿ ಪ್ರತಿ ನಿತ್ಯ 20 ಎಂ ಎಲ್ ಡಿ ನೀರ್ನ್ ಉಂದುವೇ ಮಾದರಿಡ್ ಗಲಸೊಂದುಲ್ಲೆರ್. ಸರ್ಕಾರ ಈ ಬಗೆಟ್ಟ್ ಗಂಭೀರವಾದ್ ಚಿಂತನೆ ಮಲ್ತ್ದ್ ನಗರ ಭಾಗಡ್ 2 ಪ್ಲಾಂಟ್ ಮಾಲ್ತ್ಂಡ ಮಸ್ತ್ ಉಪಯೋಗ ಆಪುಂಡು” ಪಂದ್ ಆರ್ ತೆರಿಪಾದೆರ್.
