Times of kudla

ಉಚ್ಚಿಲ ಮಹಾಲಕ್ಷ್ಮಿ ದೇವಲ್ಯಗ್ ಭೇಟಿ ಕೊರ್ನ ಗೃಹಸಚಿವೆರ್ ಆರಗ ಜ್ಞಾನೇಂದ್ರ

ಒಡಿಪು: ಇಂಚಿಪ್ಪ ನಿರ್ಮಾಣ ಆಯಿನ ಉಚ್ಚಿಲ ಶ್ರೀ ಮಹಾಲಕ್ಷ್ಮಿ ದೇವಲ್ಯಗ್ ರಾಜ್ಯ ಗೃಹ ಸಚಿವೆರ್ ಆರಗ ಜ್ಞಾನೇಂದ್ರ ಮೇರ್ ಬುಧಾರ ಬಯ್ಯಗ್ ಭೇಟಿ ಕೊರ್ದು ಶ್ರೀ ಮಹಾಲಕ್ಷ್ಮಿನ ದರ್ಶನ ಪಡೆಯೆರ್.

ಮೆರೆನ್ ದೇವಲ್ಯದ ವತಿರ್ದ್ ಪೂರ್ಣ ಕುಂಭದೊಟ್ಟಿಗೆ ಎದ್ಕೊನಿಯೆರ್. ಉಚ್ಚಿಲ ಮಹಾಲಕ್ಷ್ಮಿ ದೇವಲ್ಯದ ಅರ್ಚಕೆರ್ ಕೆ ವಿ ರಾಘವೇಂದ್ರ ಉಪಾಧ್ಯಾಯ ಬೊಕ್ಕ ವಿಷ್ಣುಮೂರ್ತಿ ಉಪಾಧ್ಯಾಯ ಮೊಕುಲು ಶ್ರೀದೇವಿಗ್ ಪೂಜೆ ಸಂದಾದ್, ಪ್ರಸಾದ ಕೊರಿಯೆರ್. ದೇವಲ್ಯದ ರೂವಾರಿ ನಾಡೋಜ ಡಾ. ಜಿ. ಶಂಕರ್ ಮೇರ್ ದೇವಲ್ಯದ ವತಿರ್ದ್ ಗೃಹ ಸಚಿವರೆಗ್ ತಮ್ಮನ ಮಲ್ತ್ ದ್ ಸ್ಮರಣಿಕೆ ಕೊರಿಯೆರ್. ಈ ಪೊರ್ತುಡು ಕಾಪು ಶಾಸಕೆರ್ ಲಾಲಾಜಿ ಆರ್ ಮೆಂಡನ್, ಮೊಗವೀರ ಮಹಾಜನ ಸಂಘದ ಅಧ್ಯಕ್ಷೆರ್ ಜಯ ಸಿ ಕೋಟ್ಯಾನ್ ಬೆಳ್ಳಂಪಳ್ಳಿ, ಕ್ಷೇತ್ರ ಆಡಳಿತ ಸಮಿತಿದ ಅಧ್ಯಕ್ಷೆರ್ ವಾಸುದೇವ ಸಾಲಿಯನ್, ಮಹಾಜನ ಸಂಘದ ಮಹಿಳಾ ಘಟಕದ ಉಪಾಧ್ಯೆಕ್ಷೆರ್ ಜಾನಕಿ ಲೀಲಾಧರ್, ನಾರಾಯಣ ಕರ್ಕೇರಾ, ದಿನೇಶ್ ಏರ್ಮಾಳ್, ದಿನೇಶ್ ಮೂಳೂರು, ಮೋಹನ್ ಬಂಗೇರ, ದೇವಲ್ಯದ ಪ್ರಧಾನ ಕಾರ್ಯನಿರ್ವಾಹಕೆರ್ ಸತೀಶ್ ಅಮೀನ್ ಮಟ್ಟು, ಕಾಪು ಬಿಜೆಪಿ ಅಧ್ಯಕ್ಷೆರ್ ಶ್ರೀಕಾಂತ್ ನಾಯಕ್, ಕಾರ್ಯದರ್ಶಿ ಗೋಪಾಲಕೃಷ್ಣ ರಾವ್, ಕಾಪು ಪೊಲೀಸ್ ವೃತ್ತ ನಿರೀಕ್ಷಕೆರ್ ಕೆ. ಸಿ ಪೂವಯ್ಯ, ಪಡುಬಿದ್ರೆ ಠಾಣಾಧಿಕಾರಿ ಪುರುಷೋತ್ತಮ್ ಇತ್ತೆರ್.

ನಟೆ ಉಪೇಂದ್ರ ಆಸ್ಪತ್ರೆಗ್ ದಾಖಲ್

ಬೆಂಗ್ಲೂರ್: ನಟೆ ಉಪೇಂದ್ರ ದಂಬುದ ಸಮಸ್ಯೆರ್ದ್ ಆಸ್ಪತ್ರೆಗ್ ದಾಖಲ್ ಆತೆರ್.

ಶೂಟಿಂಗ್ ದ ಪೊರ್ತುಡು ಡಸ್ಟ್ ಅಲರ್ಜಿರ್ದ್ ತೊಂದರೆ ಅನುಭವಿಸಿನ ಉಪೇಂದ್ರ ಮೆರೆನ್ ನೆಲಮಂಗಲದ ಕೈತಲ್ ಇಪ್ಪುನ ಹರ್ಷ ಆಸ್ಪತ್ರೆಗ್ ದಾಖಲ್ ಮಲ್ದೆರ್.ಇತ್ತೆ ಚಿಕಿತ್ಸೆ ಪಡೆದ್, ಮೇರ್ ಆಸ್ಪತ್ರೆರ್ದ್ ಪಿದಯಿ ಬೈದೆರ್ ಪಂದ್ ವರದಿ ಆತ್ಂಡ್.

ನ.27: ಪಕ್ಷಿಕೆರೆ “ಪತ್ತೆರೆ ಕೂಟ”ದ ಮುತಾಲಿಕೆಡ್ ತುಳುವ ಪರಂಪರೆದ ಗ್ರಾಮ ಉಚ್ಚಯ

ಹಳೆಯಂಗಡಿ: ಪತ್ತೆರೆ ಕೂಟ, ಪಕ್ಷಿಕೆರೆ ನೆತ್ತ ವತಿರ್ದ್ ತುಳುನಾಡ್ ದ ಜಾನಪದ ಪರಂಪರೆನ್ ತೆರಿಪಾವುನ ಗ್ರಾಮ ಉಚ್ಚಯ-2022 ಉಂದುವೇ ನ.27 ಐತಾರದಾನಿ ಪಕ್ಷಿಕೆರೆ ಇಗರ್ಜಿದ ಜಾಲ್ ಡ್ ನಡಪರೆ ಉಂಡು.

ಆನಿ ಬೊಲ್ಪುಗು 9 ಗಂಟೆಗ್ ತುಡರ ದಿಬ್ಬಣ ಬತ್ತ್ ದ್ ದ್, ಗೊಬ್ಬುದ ಕಲಟ್ ಬೇತೆ ಬೇತೆ ಗ್ರಾಮೀಣ ಗೊಬ್ಬುಲು ನಡಪರೆ ಉಂಡು. ಮಧ್ಯಾಹ್ನ 2 ಗಂಟೆರ್ದ್ 6 ಗಂಟೆ ಮುಟ್ಟ ನಲಿಕೆದ ಕಲಟ್ ಸಾಂಸ್ಕೃತಿಕ ವೈವಿಧ್ಯ ನಡಪರೆ ಉಂಡು. ಬೊಲ್ಪುಗು ನಡಪುನ ಉದಿಪನ ಲೇಸ್ ಬೊಕ್ಕ ಬಯ್ಯಗ್ ನಡಪುನ ಮುಗಿತಲದ ಲೇಸ್ ಡ್ ಮಲ್ಲ ಮಲ್ಲ ಬಿನ್ನೆರ್ ಓಲಗ ಆವರೆ ಉಲ್ಲೆರ್. ಈ ಪೊರ್ತುಡು ಪದ್ಮಶ್ರೀ ಅಕ್ಷರ ಸಂತ ಹರೇಕಳ ಹಾಜಬ್ಬ ಮೆರೆಗ್ ತಮ್ಮನ ಮಲ್ತ್ ದ್ ಮಾನಾದಿಗೆ ಮಲ್ಪರೆ ಉಂಡು. ಈ ನಡುಟ್ಟು ಬೇತೆ ಬೇತೆ ರೀತಿಡ್ ಮನಸ್ ದಿಂಜಾವುನ ಪಂತೊಲು ಬೊಕ್ಕ ತಿಂಡಿ ತಿನಿಸುಲು ಈ ಲೇಸ್ ಗ್ ಇಸೇಸ ಪೊರ್ಲು ಕೊರ್ರೆ ಉಂಡು. ಈ ಪರಿಸರಡ್ ಸುಮಾರ್ ವರ್ಷೊರ್ದು ಬೊಕ್ಕ ನಡತೊಂದು ಇಪ್ಪುನ ಈ ಗ್ರಾಮ ಉಚ್ಚಯಗ್ ಕೈತಲ್ ದ ಗಣ್ಯೆರೆನ್ ವಿಶ್ವಾಸಗ್ ದೆತೊಂದು ಸಮಿತಿ ರಚನೆ ಮಲ್ದ್ಂಡ್. ಅಂಚನೆ ಬೇತೆ ಬೇತೆ ಸಂಘ ಸಂಸ್ಥೆಲು ಬೊಕ್ಕ ಸ್ವಸಹಾಯ ಸಂಘಲು ಈ ಲೇಸ್ ಗ್ ಕೈತಾಂಗ್ ಕೊರೊಂದುಲ್ಲೆರ್. ಸುಮಾರ್ ಸಮಯರ್ದ್ ಈ ಲೇಸ್ ದ ಯಶಸ್ವಿಗ್ ಬೊಡಾದ್ ಸಂಘಟಕೆರ್ ಬೇಲೆ ಮಲ್ತೊಂದು ಉಲ್ಲೆರ್. ಪಕ್ಷಿಕೆರೆ ಚರ್ಚ್ ವಠಾರಡ್ ನಡಪುನ ಈ ಲೇಸ್ ಡ್ ಹಳ್ಳಿ ಬದ್ ಕ್ ದ ಪರತಿರಿ, ಪರಪೋಕುದ ಮಹತ್ವ ತೆರಿಯರೆ ಮಾತೆರ್ಲ ಹೆಚ್ಚದ ಸಂಖ್ಯೆಡ್ ಬತ್ತ್ ದ್ ಪಾಲ್ ಪಡೆದ್ ಸಹಕಾರ ಮಲ್ಪೊಡು ಪಂದ್ ಪತ್ತೆರೆ ಕೂಟದ ಪದಾಧಿಕಾರಿಲು ಪತ್ರಿಕಾ ಪ್ರಕಟಣೆಡ್ ತೆರಿಪಾದೆರ್.

ಡಿ.4: ಮೂಡುಶೆಡ್ಡೆ ಹಿಂದು ಜಾಗರಣ ವೇದಿಕೆ ಬೊಕ್ಕ ಮಹಿಳಾ ಜಾಗರಣ ವಿಷ್ಣುಮೂರ್ತಿ ಘಟಕದ ಸಾರ್ವಜನಿಕ ಶ್ರೀ ಶನೀಶ್ವರ ಪೂಜೆ

ಕುಡ್ಲ: ಕುಡ್ಲ ಮೂಡುಶೆಡ್ಡೆ ಹಿಂದು ಜಾಗರಣ ವೇದಿಕೆ ಬೊಕ್ಕ ಮಹಿಳಾ ಜಾಗರಣ ವಿಷ್ಣುಮೂರ್ತಿ ಘಟಕದ ಸಾರ್ವಜನಿಕ ಶ್ರೀ ಶನೀಶ್ವರ ಪೂಜೆ ಡಿ.4 ಐತಾರದಾನಿ ಮೂಡುಶೆಡ್ಡೆದ ಶಿವನಗರ ಪಂಚಾಯತ್ ಮೈದಾನಡ್ ಬಯ್ಯಗ್ 5 ಗಂಟೆಗ್ ನಡಪರೆ ಉಂಡು.

ಅಂಚನೆ ಸಾರ್ವಜನಿಕ ಶ್ರೀ ಶನೀಶ್ವರ ಪೂಜೆ, ಮಹಾಪೂಜೆ ಬೊಕ್ಕ ಅನ್ನಸಂತರ್ಪಣೆ, ಕೈತಲ್ ದ ಪ್ರತಿಭೆಲೆರ್ದ್ ವೈವಿಧ್ಯಮಯ ಸಾಂಸ್ಕೃತಿಕ ಲೇಸ್, ಸಭಾಕಾರ್ಯಕ್ರಮ, ಸಾಧಕೆರೆಗ್ ತಮ್ಮನ, ಉಮೇಶ್ ಮಿಜಾರ್ ಸಾರಥ್ಯದ ನಮ್ಮ ಕಲಾವಿದೆರ್ ಬೆದ್ರ ಅಭಿನಯದ ತುಳು ನಾಟಕ ಕುಸಲ್ದ ಗೊಬ್ಬು ನಡಪುಂಡು.

ಈ ಲೇಸ್ ಡ್ ಮಾತೆರ್ಲಾ ಪಾಲ್ ಪಡೆದ್, ಶ್ರೀ ಶನಿದೇವೆರೆನ ಕೃಪೆಗ್ ಪಾತ್ರರಾವೊಡು ಪಂದ್ ಮೂಡುಶೆಡ್ಡೆ ಹಿಂದೂ ಜಾಗರಣ ವೇದಿಕೆ ವಿಷ್ಣುಮೂರ್ತಿ ಘಟಕದ ಸಂಯೋಜಕೆರ್ ಲಿಖಿತ್ ರಾಜ್ ಮೂಡುಶೆಡ್ಡೆ ಮಹಿಳಾ ಜಾಗರಣ ವಿಷ್ಣುಮೂರ್ತಿ ಘಟಕದ ಸಂಯೋಜಕಿ ಪೂರ್ಣಿಮಾ ರಮೇಶ್ ಬೊಕ್ಕ ಮೂಡುಶೆಡ್ಡೆ ಹಿಂದೂ ಜಾಗರಣ ವೇದಿಕೆ ಬೊಕ್ಕ ಮಹಿಳಾ ಜಾಗರಣ ವಿಷ್ಣುಮೂರ್ತಿ ಘಟಕದ ಸರ್ವಸದಸ್ಯೆರ್ ಲೆಪ್ಪೋಲೆಡ್ ತೆರಿಪಾದೆರ್.

ಕುಡ್ಲ ದಕ್ಷಿಣ ಕ್ಷೇತ್ರದ ವೋಟುದ ಕಲೊಕ್ಕು ಯುವ ಅಭ್ಯರ್ಥಿ ಆಶಿತ್ ಜಿ ಪಿರೇರಾ ನಾಮಪತ್ರ

ಕುಡ್ಲ ದಕ್ಷಿಣ ವಿಧಾನಸಭಾ ಕ್ಷೇತ್ರದ ವೋಟುದ ಕಲೊಕ್ಕು ಯುವ ಅಭ್ಯರ್ಥಿ ಆಶಿತ್ ಜಿ ಪಿರೇರಾ ನಾಮಪತ್ರ ಸಂದಾಯೆರೆ ಕಾಂಗ್ರೆಸ್ ಟಿಕೆಟ್ ಗಾದ್ ಬೆಂಗ್ಲೂರ್ ಡ್ ಅರ್ಜಿ ಸಂದಾದೆರ್.

ವೃತ್ತಿಪರ ವಕೀಲರಾಯಿನ, ಮೇರ್ ನೇರ್ದ್ ದುಂಬು ಸಂತ ಅಲೋಸಿಯಸ್ ಕಾಲೇಜ್ ದ ಅಧ್ಯಕ್ಷೆರಾದ್, ಎನ್ ಎಸ್‌ಯುಐ ದಕ್ಷಿಣ ಕನ್ನಡ ಜಿಲ್ಲೆ ಅಧ್ಯಕ್ಷೆರಾದ್ ರಡ್ಡ್ ಸರ್ತಿ ಬೊಕ್ಕ ಗೋವಾ ರಾಜ್ಯ ಎನ್ ಎಸ್‌ಯುಐ ಬೊಕ್ಕ ಡೆಲ್ಲಿ ವಿದ್ಯಾರ್ಥಿ ಯೂನಿವರ್ಸಿಟಿ ಚುನಾವಣೆದ ಉಸ್ತುವಾರಿ ಆದ್ ಸೇವೆ ಸಂದಾದೆರ್. ಕಂಕನಾಡಿ ವಾರ್ಡ್ ದ ಮ.ನ.ಪಾ ಅಭ್ಯರ್ಥಿಯಾದ್, ಪ್ರಸ್ತುತ ಯುವ ಕಾಂಗ್ರೆಸ್‌ ಕರ್ನಾಟಕ ರಾಜ್ಯ ಸಮಿತಿ ಕಾರ್ಯದರ್ಶಿಯಾದ್ ಬೊಕ್ಕ ಮೈಸೂರ್ ಗ್ರಾಮಾಂತದ ಯುವ ಕಾಂಗ್ರೆಸ್‌ದ ಉಸ್ತುವಾರಿ ಆದ್ ಸೇವೆ ಸಂದಾವೊಂದು ಉಲ್ಲೆರ್.

ಡಿ. 24: ನಮ್ಮೂರ ಆಟ-ಕೂಟ ಟ್ರಸ್ಟ್ (ರಿ.) ಕುಡ್ಲ ಮುತಾಲಿಕೆಡ್ ತೆಂಕು ತಿಟ್ಟು ಪುಂಡುವೇಷ ಪ್ರವೇಶ ಪಂತೊ

ಕುಡ್ಲ: ನಮ್ಮೂರ ಆಟ-ಕೂಟ ಟ್ರಸ್ಟ್ (ರಿ.) ಕುಡ್ಲ ನೆತ್ತ ವತಿರ್ದ್ ಡಿ. 24 ಶನಿಯಾರದಾನಿ ಉರ್ವ ಚಿಲಿಂಬಿದ ಡಾ. ಅಂಬೇಡ್ಕರ್ ಭವನಡ್ ನಡಪುನ ನಮ್ಮ ಸಂಭ್ರಮ ಲೇಸ್ ಡ್ ಮಧ್ಯಾಹ್ನ 1 ಗಂಟೆರ್ದ್ ರಾತ್ರೆ 10 ಗಂಟೆ ಮುಟ್ಟ ತೆಂಕು ತಿಟ್ಟು ಯಕ್ಷಗಾನದ ಪುಂಡುವೇಷದ ಪ್ರವೇಶ ಪಂತೊ ನಡಪರೆ ಉಂಡು.

ಈ ಲೇಸ್ ಡ್ ಸುರುಕು ಬತ್ತಿನ ಪ್ರವೇಶ ಪತ್ರಲೆಡ್ 50 ಅರ್ಹ ಸ್ವರ್ಧಾಳುಲೆಗ್ ಮಾತ್ರ ಪಂತೊಡ್ ಪಾಲ್ ಪಡೆಯೆರೆ ಅವಕಾಶ. ಈ ಪಂತೊಡ್ ಪಾಲ್ ಪಡೆಯೆರೆ :
1.18 ವರ್ಷ ಉಲಯಿದ ಜವನೆರೆಗ್ ಮಾತ್ರ ಅವಕಾಶ, 2. ಆಯೋಜಕೆರ್ ಕೊರ್ಪುನ ಹಿಮ್ಮೇಳ ಗಲಸೊಲಿ, 3. ಸುರುತ ಸುತ್ತುಡು ಇಜಾರ್ ಪಾಡ್ದ್, ಗೆಜ್ಜೆ ಕಟ್ಟ್ ದ್ ರಂಗಪ್ರವೇಶ ಮಲ್ಪೊಡು 4. ರಡ್ಡ್ ನೇ ಹಂತೊಡ್ ಆಯ್ಕೆ ಪ್ರಕಿಯೆ ನಡಪುಂಡು‌. 5. ರಡ್ಡ್ ನೇ ಹಂತಗ್ ಆಯ್ಕೆ ಆಯಿನ ಸುಮಾರ್ 10 ಸ್ವರ್ಧಿಲು, ಪಗಡಿ ಕಟ್ಟ್ ದ್, ವೇಷ ಮಲ್ತ್ ದ್, ಕುಡೊರ ರಂಗಪ್ರವೇಶ ಮಲ್ಪೊಡು,7. ವೇಷಭೂಷಣದ ವ್ಯವಸ್ಥೆ ಸ್ವರ್ಧಿಲೆ ಮಲ್ಪುನಂಡ ಆಕ್ಷೇಪ ಇಜ್ಜಿ. ಅಂಚನೆ 1,2,3 ಪಂದ್ ಇನಾಮು ಉಂಡು. ರಡ್ಡ್ ನೇ ಸುತ್ತುಗು ಆಯ್ಕೆ ಆಯಿನಕ್ಲೆಗ್ 1000 ರೂ. ಗೌರವ ಧನ, ಪ್ರಮಾಣ ಪತ್ರ, ಸ್ಮರಣಿಕೆ, ಅಂಚನೆ ಟ್ರಸ್ಟ್ ದ ವತಿರ್ದ್ ಪ್ರಮಾಣ ಪತ್ರ, ನೆಂಪುದ ಕಾಣಿಕೆ ಕೊರ್ಪೆರ್. ಪ್ರವೇಶ ಪತ್ರದ ಅರ್ಜಿನ್ ಸ್ವರ್ಧಾಳುಲೆಗ್ ಪುದರ್, ವರ್ಷ, ಊರು, ಶಾಖೆ, ಕ್ಲಾಸ್, ಯಕ್ಷಗಾನ ಗುರು, ವಿಳಾಸ, ಆನ್/ಪೊಣ್ಣು ಪುಟ್ಟಿನ ದಿನ ಬೊಕ್ಕ ಮೊಬೈಲ್‌ ವಾಟ್ಸ್ ಪ್ ನಂಬರ್ ದೊಟ್ಟಿಗೆ ಕದ್ರಿ ನವನೀತ ಶೆಟ್ಟಿ ಮೊಬೈಲ್ ನಂ: 9448123061 ಬೊಕ್ಕ ಮುಲ್ಕಿ ಕರುಣಾಕರ ಶೆಟ್ಟಿ ಮೊ.ನಂ: 9880425265 ಮೊಕ್ಲೆಗ್ ಡಿ‌.5 ಉಲಯಿ ಪುದರ್ ಕೊರೊಡು ಪಂದ್ ಟ್ರಸ್ಟ್ ಪತ್ರಿಕಾ ಪ್ರಕಟಣೆ ತೆರಿಪಾದೆರ್.
ವರದಿ: ಕರುಣಾಕರ ಶೆಟ್ಟಿ

ನ.23: ಕಡಂದಲೆ ಶ್ರೀ ಸುಬ್ರಮಣ್ಯ ದೇವಲ್ಯಡ್ ಷಷ್ಠಿ ಉಚ್ಚಯದ ಲೆಕ್ಕೊಡು ಶ್ರಮದಾನ

ಕಡಂದಲೆ ಶ್ರೀ ಸುಬ್ರಮಣ್ಯ ದೇವಲ್ಯಡ್ ಷಷ್ಠಿ ಉಚ್ಚಯದ ಲೆಕ್ಕೊಡು ನ.23 ಬುಧಾರದಾನಿ ದೇವಲ್ಯದ ಚಾವಡಿಡ್ ಶ್ರಮದಾನ ನಡತ್ಂಡ್.

ಈ ಲೇಸ್ ಡ್ ಊರುದ ಗ್ರಾಮಸ್ಥೆರ್, ಶ್ರೀ ಕ್ಷೇ. ಧ. ಗ್ರಾ. ಯೋಜನೆದ ಕಡಂದಲೆ ಕಲ್ಲೋಳಿ ಒಕ್ಕೂಟದ ಸ್ವ ಸ ಪ್ರ ಬಂಧು ಸಂಘದ ಒಕ್ಕೂಟದ ಅಧ್ಯಕ್ಷೆರ್ ಜಗದೀಶ್ ಕೋಟ್ಯಾನ್ ಎಸ್ ಪಿ ವಸಂತಿ ಬೊಕ್ಕ ಪದಾಧಿಕಾರಿಲು, ಸರ್ವ ಸದಸ್ಯೆರ್ ಪಾಲ್ ಪಡೆದಿತ್ತೆರ್.

ಅಂಚನೆ ಈ ಪೊರ್ತುಡು ದ. ಕ. ಹಾಲು ಉತ್ಪದಕಾರ ಜಿಲ್ಲಾ ಒಕ್ಕೂಟದ ಅಧ್ಯಕ್ಷೆರ್ ಕೆ. ಪಿ. ಸುಚರಿತ ಶೆಟ್ಟಿ ಪಾಲಡ್ಕ, ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ದಿನೇಶ್ ಕಂಗ್ಲಾಯಿ, ಗ್ರಾಮಪಂಚಾಯಿತಿ ಸದಸ್ಯೆರ್, ಕಡಂದಲೆ ಗ್ರಾಮ ಪಂಚಾಯತ್ ಗ್ರಾಮ ಲೆಕ್ಕಿಗೆರ್ ಶ್ರೀನಿವಾಸ್ ಬೊಕ್ಕ ಊರುದ ಹಿರಿಯೆರ್ ಇತ್ತೆರ್.

ದೇವೆರೆ ಪಾದ ಸೇರಿಯೆರ್ ಸುಧಾಕರ್ ಟಿ. ಅಂಚನ್

ಬಿಲ್ಲವರ ಎಸೋಸಿಯೇಷನ್ ಸದಸ್ಯೆರ್, ಭಾರತ್ ಬ್ಯಾಂಕ್ ವಿಲೇಪಾರ್ಲೆ ಪೂರ್ವ ಶಾಖೆದ ಉಪ ಪ್ರಬಂಧಕೆರ್ ಬೊಕ್ಕ ಬಿಲ್ಲವ ಮಹಾಮಂಡಲದ ಅಧ್ಯಕ್ಷೆರ್ ರಾಜಶೇಖರ್ ಕೋಟ್ಯಾನ್ ಮೆರೆನ (ತಂಗಡಿನ ಕಂಡನಿ) ಬಾವೆ ಸುಧಾಕರ್ ಟಿ ಅಂಚನ್ ಬುಧಾರ ಕಾಂಡೆ ದೇವೆರೆ ಪಾದ ಸೇರಿಯೆರ್.

ಊರುಡ್ ರಾಜಶೇಖರ್ ಕೋಟ್ಯಾನ್ ಮೆರೆನ ಮಗನ ಮದಿಮೆಡ್ ಪಾಲ್ ಪಡೆದ್ ಪಿರ ಬನ್ನಗ ಮುಂಬೈ ಎಕ್ಸ್‌ಪ್ರೆಸ್‌ ರೈಲ್ ಡ್ ಇನಿ ಬೊಲ್ಪುಗು ಠಾಣೆ ಸ್ಟೇಷನ್ ಡ್ ಜಪ್ಪುನಗ ತಿಗಲೆ ಬೇನೆ ಬತ್ ದ್ ತೀರ್ ಪೋಯೆರ್ ಪಂದ್ ತೆರಿದ್ ಬೈದ್ಂಡ್. ‌
ಮೆರೆನ ಪೊಪ್ಪ ಅಮ್ಮ, ಸಂಸಾರ ಬೊಕ್ಕ ಕೈತಲ್ ದ ಬಂಧುಲು ಊರುಡ್ ಇಪ್ಪುನೆರ್ದಾವೆರ ಮೆರೆನ ಅಕೆರಿದ ಕ್ರಿಯೆ ಕಟಪಾಡಿಡ್ ಎಲ್ಲೆ (ಗುರುವಾರ)ನಡಪರೆ ಉಂಡು. ಮೆರೆನ ಆತ್ಮೊಗು ದೇವೆರ್ ಶಾಂತಿ, ಸದ್ಗತಿ ಕೊರಡ್ ಪಂದ್ ಬೊಂಬೈ ಬಿಲ್ಲವರ ಹಿತ ಚಿಂತಕೆರ್ ಬೊಕ್ಕ ದಿ. ಜಯ ಸುವರ್ಣ ಅಭಿಮಾನಿಲು ದೇವೆರೆಡ ಸುಗಿತೊಂದೆರ್.

ದೇವೆರೆ ಪಾದ ಸೇರಿಯೆರ್ ಕೊಡ್ಯಡ್ಕ ಜಯರಾಮ್ ಹೆಗ್ಡೆ

ಹೊಸನಾಡು: ಕೊಡ್ಯಡ್ಕ ಶ್ರೀ ಅನ್ನಪೂರ್ಣೇಶ್ವರಿ ದೇವಲ್ಯದ ಆಡಳಿತ ಮುಖ್ಯಸ್ಥೆರ್, ಉದ್ಯಮಿಲು ಆದಿಪ್ಪುನ ಕೊಡ್ಯಡ್ಕ ಜಯರಾಮ್ ಹೆಗ್ಡೆರ್ ಇನಿ ದೇವೆರೆ ಪಾದ ಸೇರಿಯೆರ್.

ಮೆರೆನ ನಿಧನಗ್ ಮುಲ್ಕಿ ಬೆದ್ರ ಕ್ಷೇತ್ರದ ಶಾಸಕೆರ್ ಉಮಾನಾಥ್ ಎ. ಕೋಟ್ಯಾನ್ ಬಿಜೆಪಿ ಜಿಲ್ಲಾ ಅಧ್ಯಕ್ಷೆರ್ ಬಿ. ಸುದರ್ಶನ್, ಬೊಕ್ಕ ದ. ಕ ಜಿಲ್ಲಾ ಹಾಲು ಉತ್ಪಾದಕೆರೆನ ಒಕ್ಕೂಟದ ಅಧ್ಯಕ್ಷೆರ್ ಕೆ. ಪಿ ಸುಚರಿತ್ ಶೆಟ್ಟಿ, ಪಾಲಡ್ಕ ಗ್ರಾಮ ಪಂಚಾಯತ್ ಅಧ್ಯಕ್ಷೆರ್ ದಿನೇಶ್ ಕಂಗ್ಲಾಯಿ, ಕೆ. ಪಿ. ಸಿ. ಸಿ. ಉಪಾಧ್ಯಕ್ಷೆರ್ ಬೊಕ್ಕ ಮಾಜಿ ಸಚಿವೆರ್ ಅಭಯಚಂದ್ರ ಜೈನ್ ಬೊಕ್ಕ ಕೆ. ಪಿ. ಸಿ. ಸಿ. ಪ್ರಧಾನ ಕಾರ್ಯದರ್ಶಿ ಮಿಥುನ್ ರೈ ಸಂತಾಪ ತೆರಿಪಾದೆರ್. ಮೆರೆಗ್ ಬೊಡೆದಿ, ಮಗೆ, ಮಗಲ್ ಉಲ್ಲೆರ್.

ನ.24: ಮಂಜೇಶ್ವರ ಶಾರದಾ ಆರ್ಟ್ಸ್ ಕಲಾವಿದೆರ್ ವಾರ್ಷಿಕ ಉಚ್ಚಯ, ದಿ.ತಿಮ್ಮಪ್ಪ ಕಾಂಜೆರ್ನ ನೆಂಪು ಲೇಸ್

ಮಂಜೇಶ್ವರದ ಶಾರದಾ ಆರ್ಟ್ಸ್ ಕಲಾವಿದೆರ್ (ರಿ.) ನೆತ್ತ 23 ನೇ ವಾರ್ಷಿಕ ಉಚ್ಚಯ ಬೊಕ್ಕ ದಿ.ತಿಮ್ಮಪ್ಪ ಕಾಂಜೆರ್ನ ನೆಂಪು ಲೇಸ್ ನ.24 ಗುರುವಾರ ರಾತ್ರೆ 6 ಗಂಟೆಗ್ ಉದ್ಯಾವರ ಮಾಡಡ್ ನಡಪರೆ ಉಂಡು.

ಈ ಪೊರ್ತುಡು ಹರೀಶ್ ಶೆಟ್ಟಿ ಮಾಡ ಬೊಕ್ಕ ವಿಜಯ್ ಪಂಡಿತ್ ಮಂಗಲ್ಪಾಡಿ ಮೊಕ್ಲೆಗ್ ತಿಮ್ಮಪ್ಪ ಕಾಂಜರ ಸಂಸ್ಮರಣಾ ಪ್ರಶಸ್ತಿ ಕೊರಿಯೆರ್ ಉಂಡು. ಬೊಕ್ಕ ರಂಗಭೂಮಿ, ಸಿನಿಮಾರಂಗ ಸಾಧಕೆರ್ ಪ್ರಕಾಶ್ ಕೆ. ತೂಮಿನಾಡ್, ರವಿರಾಮಕುಂಜ, ಪುಷ್ಪರಾಜ್ ಬೊಳ್ಯಾರ್ ಮೊಕ್ಲೆಗ್ ಬಿರುದು ಕೊರಿಯೆರೆ ಉಂಡು. ಅಂಚನೆ ರಾತ್ರೆ 7 ಗಂಟೆರ್ದ್ ಶಾರದಾ ಆರ್ಟ್ಸ್ ಕೂಟದ ಐಸಿರಿ ಕಲಾವಿದೆರ್ ಮಂಜೇಶ್ವರ ಮೋಕ್ಲೆಡ್ದ್, ಗಡಿನಾಡ ಕಲಾನಿಧಿ ‌ಕೃಷ್ಣ ಜಿ. ಮಂಜೇಶ್ವರ ಸಾರಥ್ಯದ, ತುಳುನಾಡ ಕಲಾಕದಿಕೆ ರಾಜೇಶ್ ಮುಗುಳಿ ರಚನೆ ಬೊಕ್ಕ ನಿರ್ದೇಶನದ ಪುಷ್ಪರಾಜ್ ಬೊಳ್ಯಾರ್ ಬೊಕ್ಕ ಜಿಲ್ಲಾ ರಾಜೋತ್ಸವ ಪ್ರಶಸ್ತಿ ಪುರಸ್ಕೃತೆರ್ ರವಿ ರಾಮಕುಂಜ ಅಭಿನಯ ಮಾತೆರ್ಲೆಕ ಅತ್ತ್ ತುಳು ನಾಟಕ ನಡಪುಂಡು.